სიახლეები

ნაძალადევის რაიონში კომპაქტურ ჩასახლებაში მცხოვრები აფხაზეთიდან დევნილი მოსახლეობისათვის უფასო სამედიცინო, კლინიკურ-ლაბორატორიული პროფილაქტიკური გამოკვლევები ჩატარდა.

სამედიცინო აქციას აფხაზეთის მთავრობის თავმჯდომარის მოვალეობის შემსრულებელი ვახტანგ ყოლბაია, ნაძალადევის რაიონის გამგებელი ზაზა გაბუნია, აფხაზეთის ჯანდაცვის მინისტრი ქეთევან ბაკარაძე და აფხაზეთის მთავრობის წარმომადგენლები დაესწრნენ, დევნილ მოსახლეობას შეხვდნენ და მათი პრობლემები მოისმინეს.

გამოკვლევების შესახებ ინფორმაცია ნაძალადევის რაიონში არსებულ 64-მდე ჩასახლების ობიექტში მცხოვრებ იძულებით გადაადგილებულ პირებს ეცნობათ. მთელი დღის განმავლობაში დევნილებს შარაშიძის სამედიცინო ცენტრის მედ-პერსონალი მოემსახურა.

დღესვე, აფხაზეთის შრომისა და ჯანმრთელობის დაცვის სამინისტროსა და მ. შარაშიძის სამედიცინო ცენტრს შორის გაფორმდა თანამშრომლობის მემორანდუმი, რომლის ფარგლებში დევნილი მოსახლეობისთვის ყოველი თვის ბოლო შაბათს დაიგეგმა უფასო სამედიცინო აქციები.

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებლის, ვახტანგ ყოლბაიას განცხადებით, იგი მიესალმება იმ ტრადიციის გაგრძელებას, რომელსაც აფაზეთის მთავრობამ გასულ წელს ჩაუყარა საფუძველი და დღემდე წარმატებით გრძელდება. თანამშრომლობისათვის მანვე მადლობა გადაუხადა მ. შარაშიძის სამედიცინო ცენტრის ხელმძღვანელობას.

„დიდი მადლობა მინდა მოვახსენო ამ მრავალპროფილური დაწესებულების ხელმძღვანელს - ბატონ ზურაბ ავალიანს იმის გამო, რომ მან მიიღო ჩვენი ჯანდაცვის სამინისტროს შეთავაზება და ხელი მოვაწერეთ მემორანდუმს, რომლის მიხედვითაც ყოველი თვის ბოლო შაბათს მოხდება დევნილი მოსახლეობის ყველა სახის სამედიცინო პროფილაქტიკური გამოკვლევა. ეყრება საფუძველი ტრადიციას, რომელსაც, ასე ვთქვათ, კარგი წინა ისტორია აქვს, მხედველობაში მაქვს ჩვენ მიერ რეგიონებში ჩატარებული პროფილაქტიკური გამოკვლევები; დარწმუნებული ვარ, ეს ტრადიცია ამ რაიონში და ამ კლინიკაში მომავალშიც გაგრძელდება. სიახლეა ის, რომ აქვე კონტროლზე იქნება აყვანილი ის პაციენტი, რომელსაც მკურნალობის გაგრძელება დასჭირდება, მედიკამენტებით უზრუნველყოფა კი ჩვენი ჯანდაცვის სამინისტროს მხრიდან მოხდება. მახარებს ის, რომ ჩვენ ამ შესანიშნავ კლინიკასთან ძალიან კრგი პროექტის დაწყება შევძელით; თანამშრომლობის მემორანდუმი სხვა კლინიკებთანაც გავაფორმეთ, რაც ჩვენს დევნილებს მნიშვნელოვნად გაუუმჯობესებს ჯანმრთელობის მდგომარეობას. ამ წამოწყებას გაგრძელება ექნება, რაზეც ჩვენ ინტენსიურად ვიმუშავებთ", - განაცხადა ვახტანგ ყოლბაიამ.

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრუბელი ვახტანგ ყოლბაია თბილისის კლასიკური გიმნაზიის უფროსკლასელებს შეხვდა. შეხვედრა მოსწავლეების ინიციატივით გაიმართა, რომლის მიზანიც აფხაზეთის მთავრობის პრიორიტეტების გაცნობა, ასევე აფხაზეთის განათლებისა და კულტურის სამინისტროს საქმიანობის შესახებ ინფორმაციის მიღება იყო.

ვახტანგ ყოლბაიამ მოსწავლეებს აფხაზეთის კულტურულ მემკვიდრეობის ძეგლების მდგომარეობაზე, კონფლიქტის მოგვარებისკენ გადადგმულ ნაბიჯებსა და  სამომავლოდ დაგეგმილ საგანმანათლებლო პროექტებზე ესაუბრა, რომლებშიც  სხვა ეროვნების ახლაგაზრდებიც ჩაერთვებიან.

„ყოველთვის საინტერესოა შეხვედრა ახლაგაზრდობასთან, განსაკუთრებით მოსწავლე ახალგაზრდობასთან. თბილისის პირველ სკოლა-გიმნაზიას გამორჩეული კონტინგენტი ჰყავს. ამიტომაც ჩემთვის ძლიან მნიშვნელოვანი იყო, რომ  შეხვედრის ინიციატივა სკოლის მოსწავლეებისგან და დირექციისგან მოდიოდა.  აქ  ხომ აფხაზეთიდან დევნილი ბევრი მასწავლებელი მუშაობს. ჩვენმა შეხვედრამ ცხადყო, რომ  ახალგაზრდებს აინტერესებთ აფხაზეთი. საამაყოა, რომ აფხაზეთის ისტორიისა და კულტურის მიმართ ინტერესი არამც თუ არ დაუკარგავს მოსწავლე ახალგაზრდობას, პირიქით  სამომავლო  ქართულ-აფხაზურ ერთობლივ პროექტებზეც ფიქრობენ, რომელსაც მათი აზრით, პოლიტიკური აკრძალვები წინ ვერ აღუდგება.  შეხვედრაში მონაწილეობდნენ ძალიან გონიერი ახალგაზრდები - მეათე კლასელებთან საუბარმა დიდი სიამოვნება მომგვარა. შევთანმხდით, რომ მათთან ვითანამშრომლებთ კონფლიქტის მოგვარების მშვიდობიან პროექტებში, რომლებიც ნდობის აღდგენის მიმართულებით მუშაობს. ამ საკითხებში თანამშრომლობისთვის მათ მზადყოფნას  მივესალმებით". - განაცხადა ვახტანგ ყოლბაიამ.

ღონისძიებას ესწრებოდნენ კლასიკური გიმნაზიის სკოლის დირექტორი თამარ კაპანაძე, აფხზეთიდან დევნილი პედაგოგები და უფროსი კლასის მოსწავლეები. შეხვედრა კითხვა-პასუხის წესრიგით წარიმართა და აფხაზეთის მთავრობის ინიციატივით შექმნილი ფილმების ჩვენებით დასრულდა. ვახტანგ ყოლბაიამ გიმნაზიის ბიბლიოთეკას საჩუქრად წიგნები გადასცა.

საქართველოს დამფუძნებელი კრების წევრის, აფხაზეთის ეროვნული მთავრობის პირველი თავმჯდომარის (1919-1921წ.წ.) , არზაყან (დიმიტრი) ემუხვარის 135-ე წლისთავთან დაკავშირებით პარიზში, ლევილის ქართველთა სასაფლაოზე მემორიალური დაფა გაიხსნა და პარიზის წმინდა ნინოს ეკლესიაში მოსახსენიებლად პანაშვიდი აღევლინა. დიასპორასთან გამართული შეხვედრა მისასალმებელი სიტყვით გახსნა საფრანგეთში ქართული სათვისტომოს თავმჯდომარემ ოთარ ზურაბიშვილმა, საზოგადოებას სიტყვით მიმართეს აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ, დიასპორის საკითხებში სახელმწიფო მინისტრმა გელა დუმბაძემ, საფრანგეთში საქართველოს ელჩის მოადგილემ გოჩა ჯავახიშვილმა, აფხაზეთის უმაღლესი საბჭოს დეპუტატმა ჯემალ გამახარიამ და არზაყან ემუხვარის შთამომავალმა ნატო მარშანიამ.

იმავე დღეს ლევილის ქართველთა სასაფლაოზე არზაყან ემუხვარის საფლავი და მემორიალური დაფა აფხაზეთის ხელისუფლების სახელით გვირგვინით შეამკეს ვახტანგ ყოლბაიამ და აფხაზეთის უმაღლესის საბჭოს თავმჯდომარის მოადგილე ჯემალ გამახარიამ. საელჩოს სახელით საქართველოს ელჩმა საფრანგეთში ეკატერინე სირაძე-დელონემ და სათვისტომოს სახელით საფრანგეთში ქართული სათვისტომოს თავმჯდომარემ ოთარ ზურაბიშვილმა, ხოლო შთამომავლების სახელით ნატო მარშანიამ.

არზაყან ემუხვარის სასაფლაოზე სულის მოსახსენიებელი პანაშვიდი გადაიხადეს და იგალობა წმ. თამარისა და წმ. ნინოს მგალობელთა გუნდმა.

აფხაზეთის ხელისუფლების დელეგაციამ ემიგრაციაში გარდაცვლილი საქართველოს მთავრობოს წევრების და საზოგადო მოღვაწეების: ნოე ჟორდანიას, სპირიდონ კედიას, აკაკი ჩხენკელის, მიხეილ შარვაშიძეს, ვლადიმე ემუხვარის, ვიქტორ და თამარ შაკაიების, ნოე რამიშვილისა და გრიგოლ რობაქიძის საფლავები მოინახულეს.

საფრანგეთის საელჩოში, საქართველოს სრულუფლებიან და საგანგებო ელჩი   საფრანგეთში ეკატერინე სირაძე-დელონე აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელ ვახტანგ ყოლბაიას და აფხაზეთის უმაღლესი საბჭოს თავმჯდომარის მოადგილეს ჯემალ გამახარიას შეხვდა. ჯემალ გამახარიამ ეკატერინე სირაძე-დელონეს წიგნები აფხაზეთის პოლიტიკური ისტორიის საკითხებზე, აფხაზეთის ტერიტორიაზე კულტურული ფასეულობების მდგომრეობის შესახებ და აფხაზეთიდან დევნილი მხატვარის ნუგზარ   მგალობლიშვილს ნამუშევარი ,,რექვიემი" გადასცა.

12-16 მარტს აფხაზეთის ავტონომიური რესპუბლიკის ხელისუფლების დელეგაცია, ,,რომუალდო დელ ბიანკოს'' ფონდის მიწვევით ფლორენციაში იმყოფებოდა.  დელეგაციაში შედიოდნენ აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, აფხაზეთის უმაღლესი საბჭოს დეპუტატი ადა მარშანია, ნდობის აღდგენისა და შერიგების საკითხებში აფხაზეთის ავტონომიური რესპუბლიკის მინისტრის პირველი მოადგილე ბელა კოპალიანი და ცხუმ-აფხაზეთის მეცნიერებათა აკადემიის წევრი, თბილისის სახელმწიფო უნივერსიტეტის პროფესორი ლეილა ხუბაშვილი.

დელეგაციის წარმომადგენლებმა მონაწილეობა მიიღეს „რომუალდო დელ ბიანკოს ფონდი"-ის ორგანიზებით მე-17 საერთაშორისო ასამბლეის მუშაობაში. ასამბლეაზე სიტყვით გამოვიდნენ აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, აფხაზეთის ავტონომიური რესპუბლიკის უმაღლესი საბჭოს დეპუტატი ადა მარშანია, ნდობის აღდგენისა და შერიგების საკითხებში აფხაზეთის ავტონომიური რესპუბლიკის მინისტრის პირველი მოადგილე ბელა კოპალიანი, რომლებმაც ისაუბრეს ქართველთა და აფხაზთა ურთიერთანაცხოვრების მრავალსაუკუნოვან ურთიერთობებზე, ქართველ და აფხაზ ახალგაზრდებს შორის ურთიერთობის დამყარების გზების ძიების აუცილებლობაზე, სამშვიდობო დიალოგის წარმართვაში მათ აქტიურ ჩართვასა და მონაწილეობაზე, აღნიშნულ საკითხებში ფონდის მხარდაჭერის მნიშვნელობაზე.

დელეგაციის წევრებმა მონაწილეობა მიიღეს ასევე ექსპერტთა მრგვალი მაგიდის ფარგლებში დაგეგმილ პრესკონფერენციაში, რომელიც ითვალისწინებს კულტურული მემკვიდრეობის პოპულარიზაციას.

დელეგაციის მიერ ასამბლეაზე გაჟღერდა იმ  წინადადების შესახებ, რომელიც ითვალისწინებს ფლორენციაში, ფონდთან ერთად სამუშაო შეხვედრას თემაზე  ,,კულტურული მემკვიდრეობის ეროვნული და ევროპული ასპექტები". პროექტში სხვა და სხვა ეროვნების ახალგაზრდების მონაწილეობაა გათვალისწინებული.  

აფხაზეთის მთავრობასა და „დელ ბიანკოს ფონდს" შორის გაფორმდა ურთიერთანამშრომლობის მემორანდუმი, რომელიც მიზნად ისახავს ინტერკულტურული დიალოგისათვის ხელშეწყობას და მასში ხელმომწერი მხარეების აქტიურ თანამშრომლობას.

ვიზიტის ფარგლებში, შედგა შეხვედრა ასევე ფლორენციის ინტეგრაციის ასესორთან,  სარა ფურანოსთან, რომელმაც აფხაზეთის მთავრობის წევრებს გაუზიარა იტალიის გამოცდილება ინტეგრაციის საკითხებში და დაიგეგმა  მომავალი თანამშრომლობა.

გაიმართა შეხვედრები ფლორენციის სამთავრობო და არასამთავრობო სექტორთან, ქართულ დიასპორასთან და ფლორენციის წმ. ნინოს სახელობის ეკლესიის სამრევლოსთან, რომელსაც ესწრებოდა იტალიის სხვადასხვა ქალაქში მცხოვრები აფხაზეთიდან დევნილი საზოგადოება. აფხაზეთის მთავრობის თავმჯდომარის მოვალეობის შემსრულებელმა ვახტანგ ყოლბაიამ მათ ღვთისმშობლის ხატი და სანთლები გადასცა.

ვიზიტის ორგანიზებაში აქტიურად იყო ჩართული საქართველოს საგარეო საქმეთა სამინისტრო და საქართველოს საელჩო იტალიაში.

აფხაზეთის ა/რ განათლებისა და კულტურის სამინისტრომ საქართველოს დამსახურებული მწვრთნელის ამირან მაისურაძის სახელობის ტურნირი თავისუფალ ჭიდაობაში გამართა. მონაწილეობდნენ გუნდები როგორც საქართველოს რეგიონებიდან ასევე სომხეთიდან.

ტურნირის შედეგების მიხედვით აფხაზეთიდან დევნილ სპორტსმენთა შორის ექვსმა მეორე საპრიზო,  ხოლო ერთმა მესამე საპრიზო ადგილი დაიკავა.
საპრიზო ადგილზე გასული ყველა სპორტსმენი შესაბამისი კატეგორიის დიპლომით, მედლითა და თასით დაჯილდოვდა.

გამარჯვებულ სპორტსმენებს შესაბამისი ჯილდოები გადასცეს ტურნირის საპატიო სტუმრებმა და მასპინძელი ორგანიზაციის ხელმძღვანელებმა: საქართველოს ეროვნული ჭიდაობის ფედერაციის ვიცე-პრეზიდენტმა თემურ ყაზარაშვილმა, აფხაზეთის ჭიდაობის ფედერაციის პრეზიდენტმა გია ყურაშვილმა, აფხაზეთის ა/რ განათლებისა და კულტურის მინისტრმა დიმიტრი ჯაიანმა, მინისტრის მოადგილემ როლანდ ნიჟარაძემ და სპორტისა და ახალგაზრდობის საქმეთა სამსახურის უფროსმა ვიტალი ბენდელიანმა.

ტურნირის ჩატარების პარტნიორ ორგანიზაციებს შორის იყვნენ: აფხაზეთის ჭიდაობის ფედერაცია, თბილისის სპორტული კომპლექსი „მართვე", შპს „დეველაიკი".

19 მარტს, აფხაზეთის ა/რ განათლებისა და კულტურის სამინისტროსთან არსებულ ვ. არქანიას არტ-გალერეაში ნორჩ-მხატვართა საგაზაფხულო გამოფენა-კონკურსი გაიმართა. გამოფენა-კონკურსში ააიპ ქ. თბილისის მერიის ხელოვნების სამხატვრო სკოლის - „აფხაზეთი №1" მოსწავლეები მონაწილეობდნენ. გამოფენა მრავალფეროვანი თემატიკით გამოირჩეოდა და წარმოდგენილი იყო როგორც ფერწერული, ასევე გრაფიკული ნამუშევრები.

აფხაზეთის მხატვართა კავშირის წევრებისგან შემდგარმა სპეციალურმა კომისიამ, მხატვარ ნუგზარ მგალობლიშვილის ხელმძღვანელობით, საუკეთესო ნამუშევრების ავტორად ანა კუჭაშვილი დაასახელა. გამარჯვებულ კონკურსანტს აფხაზეთის ა/რ განათლებისა და კულტურის მინისტრმა დიმიტრი ჯაიანმა საჩუქრად მსოფლიო ბესტსელერად აღიარებული წიგნი - ერნსტ გომბრიხის „ხელოვნების ამბავი" გადასცა.

გარდა ამისა, ჟიურის წევრთა მოწონება დაიმსახურეს: ვერიკო გერგაულის, ნინო გერგაულის, ლუკა ტალახაძის, ლუკა გადრანის, ეკა კურდღელიას, დავით ღადუას, მარიამ ჭიჭინაძის, მაიკო არღვლიანის, გიტო ბენდელიანის, ლუკა მეფარიშვილის, გიორგი დიხამინჯიასა და ანა ტალახაძის ნამუშევრებმა. მათ საჩუქრად ფუნჯები, აკვარელი და სახატავი რვეულები გადაეცათ.

ჟენევის საერთაშორისო მოლაპარაკებების მორიგ, 31-ე რაუნდში აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია მიიღებს მონაწილეობას. საერთაშორისო მოლაპარაკებებზე ქართულ დელეგაციას საქართველოს საგარეო საქმეთა მინისტრის პირველი მოადგილე დავით დონდუა ხელმძღვანელობს.

დისკუსიებზე ჰუმანიტარული საკითხებზე მომუშავე - მეორე სამუშაო ჯგუფს შერიგებისა და სამოქალაქო თანასწორობის საკითხებში სახელმწიფო მინისტრის პირველი მოადგილე ქეთევან ციხელაშვილი უხელმძღვანელებს.

ჰუმანიტარულ საკითხებზე მომუშავე ჯგუფის შეხვედრაზე ცენტრალურ საკითხად კვლავ დევნილთა დაბრუნების თემა იქნება განხილული. ქართული მხარე ასევე დააყენებს გადაადგილების თავისუფლების, კულტურული მემკვიდრეობის დაცვის, უკანონო დაკავებების და მშობლიურ ენაზე განათლების მიღების შესაძლებლობის შეზღუდვის საკითხებს.

15-16 მარტს, აფხაზეთში განვითარებული ტრაგიკული მოვლენებთან დაკავშირებით, დღეს აფხაზეთის ავტონომიურის რესპუბლიკის მთავრობის წევრებმა, აფხაზეთის უმაღლესი საბჭოს თავმჯდომარემ ელგუჯა გვაზავამ, აფხაზეთის უმაღლესი საბჭოს დეპუტატებმა, აფხაზეთის მთავრობის აპარატისა და აფხაზეთის სტუქტურების თანამშრომლებმა, ვეტერანებმა და დევნილმა საზოგადოებამ საქართველოს ტერიტორიული მთლიანობისთვის დაღუპულ გმირთა მემორიალი და სკულპტურული მემორიალი ,,ერთიანი საქართველოსთვის'' გვირგვინებით შეამკეს და პატივი მიაგეს მათ ხსოვნას.

1993 წლის 15-16 მარტს, მოწინაღმდეგემ სოხუმზე, გუმისთის მიდამოებში ფართომასშტაბიანი იერიში განახორციელა, რომელსაც ქართულმა შეიარაღებულმა ძალებმა მედგარი წინააღმდეგობა გაუწიეს, ღირსეულად მოიგერიეს და პოზიციები გაიმაგრეს, მაგრამ ამ ბრძოლამ ბევრი ადამიანის სიცოცხლე შეიწირა.

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია საქართველში ჩეხეთის რესპუბლიკის ელჩს ტომაშ პერნიცკის შეხვდა.

შეხვედრაზე ბატონმა ტომაშ პერნიცკიმ კიდევ ერთხელ დაადასტურა ჩეხეთის მთავრობის მხარდაჭერა არაღიარების პოლიტიკის მიმართ. ასევე, განხილული იქნა მომავალი თანამშრომლობის კონკრეტული ნაბიჯები, მათ შორის იძულებით გადაადგილებულ პირთა დასახმარებლად ჩეხეთის შესაძლო ჩართვა ჰუმანიტარულ პროექტებში.

შეთანხმდნენ, რომ აფხაზეთის ავტონომიური რესპუბლიკის მთავრობა ჩეხეთის  საეჩოსთან გააგრძელებს აქტიურ თანამშრომლობას.

აფხაზეთის ავტონომიური რესპუბლიკის მთავრობა ღრმა მწუხარებას გამოთქვამს ამერიკაში, ნიუ-ჯერსში ამერიკის შეერთებული შტატების საზღვაო თავდაცვის აკადემიის ქართველი კურსანტების - ბესარიონ გორჯოლაძისა და სოსო მაკარიძის გარდაცვალების გამო.

უსამძიმრებს და თანადგომას უცხადებს გარდაცვლილთა ოჯახებსა და ახლობლებს, საქართველოს შეიარაღებულ ძალებსა და მთელ საქართველოს.

რიგითები სოსო მაკარიძე და ბესარიონ გორჯოლაძე ნიუ-ჯერსის შტატში მომხდარი ავტოავარიის შედეგად დაიღუპნენ.

საქართველოს 2015 წლის ჩემპიონატის საგზურებისთვის ზუგდიდში ჩატარდა აფხაზეთის რეგიონალური შესარჩევი ტურნირი ჭადრაკში, სადაც მონაწილეობა მიიღეს ათიდან თექვსმეტ წლამდე ასაკის გოგონებმა და ბიჭებმა.

ტურნირს მასპინძლობდა აფხაზეთის N1 საჯარო სკოლა. ტურნირის მიზანი იყო ზემოთ ხსენებულ ასაკოვან ჯგუფებში გამოვლენილიყო გამარჯვებულები, რომლებიც ჭადრაკში 2015 წლის საქართველოს ჩემპიონატში მიიღებენ მონაწილეობას ტურნირის გამარჯვებულები და პრიზიორები თასებით, მედლებით და დიპლომებით დაჯილდოვდნენ.

7 მარტს  საქართველოს  ეროვნულ გმირს, აფხაზეთის ავტონომიური რესპუბლიკის თავდაცვის საბჭოსა და მინისტრთა საბჭოს ყოფილ თავმჯდომარეს ჟიული შარტავას 71 წელი შეუსრულდებოდა.

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ, აფხაზეთის უმაღლესი საბჭოს თავმჯდომარემ ელგუჯა გვაზავამ, აფხაზეთის ა/რ მთავრობის წევრეებმა  და უმაღლესი საბჭოს დეპუტატებმა, დევნილი საზოგადოების წარმომადგენლებმა ჟიული შარტავას საფლავი გვირგვინით  შეამკეს.

ვახტანგ ყოლბაია ესაუბრა ჟიული შარტავას ოჯახის წევრებსა  და ახლობლებს. ჟიული შარტავას დამ,  ცისანა შარტავამ  მადლობა გადაუხადა აფხაზეთის ავტონომიური რესპუბლიკის ხელისუფლებას და ყველა იმ ადამიანს, რომლებიც  წლების მანძილზე პატივს მიაგებდნენ ჟიული შარტავას ხსოვნას.

7 მარტს, სენაკის ცენტრალურ პარკში სამეგრელო-ზემო სვანეთის რეგიონში აფხაზეთის მთავრობის წარმომადგენლობის ხელმძღვანელობამ ყვავილებით შეამკო ჟიული შარტავას ძეგლი და პატივი მიაგო ეროვნული გმირის ხსოვნას.

ჟიული შარტავა გაიხსენეს ასევე რუსთავში, სადაც აღმოსავლეთ საქართველოში აფხაზეთის ავტონომიური რესპუბლიკის მთავრობის წარმომადგენლობის ხელმძღვანელობამ გვირგვინით შეამკო ეროვნული გმირის ძეგლი.

საქართველოს პარლამენტის ეროვნულ ბიბლიოთეკაში კრებულის „ლიტერატურა და ხელოვნება - აფხაზეთი" პრეზენტაცია გაიმართა. „20 წლის შემდეგ", ასე ერქვა პროექტს, რომელიც აფხაზეთის ავტონომიური რესპუბლიკის განათლებისა და კულტურის სამინისტრომ განახორციელა და მის ფარგლებში გამოიცა კრებული - „ლიტერატურა და ხელოვნება - აფხაზეთი".

კრებული თავს უყრის აფხაზეთის მკვიდრ სხვადასხვა თაობის ლიტერატორებსა და ხელოვანებს, აფხაზეთის შემოქმედებით კოლექტივებს და მკითხველს მათ მიერ დევნილობის მძიმე წლებში ქვეყნის შიგნით თუ მის ფარგლებს გარეთ განვლილ გზას და მათ შემოქმედებით ცხოვრებაზე, წარმატებებზე მოუთხრობს. წიგნი აფხაზეთის ავტონომიური რესპუბლიკის მთავრობის ეგიდით გამოიცა.

პრეზენტაციას ესწრებოდნენ აფხაზეთის ავტონომიური რესპუბლიკის უმაღლესი საბჭოს თავმჯდომარე გია გვაზავა, აფხაზეთის ავტონომიური რესპუბლიკის უმაღლესი საბჭოს დეპუტატები, აფხაზეთის ავტონომიური რესპუბლიკის მთავრობის წევრები, ქართული კულტურისა და საგანმანათლებლო სექტორის წარმომადგენლები.

დღეს, საქართველოს მეცნიერებათა ეროვნული აკადემიის სხდომათა დარბაზში, აფხაზური ლიტერატურის და ისტორიოგრაფიის ფუძემდებლის, აფხაზი მწერლის დიმიტრი გულიას დაბადების 140 წლისთავისადმი მიძღვნილი კონფერენცია გაიმართა. საიუბილეო საღამოზე, დიმიტრი გულიას ცხოვრება და მოღვაწეობა გაიხსენეს, ისაუბრეს ქართულ-აფხაზურ ურთიერთობებში მწერლის შემოქმედების როლსა და მნიშვნელობაზე, ნაჩვენები იქნა დიმიტრი გულიასადმი მიძღვნილი დოკუმენტური ფილმი. კონფერენცია გახსნა საქართველოს მეცნიერებათა ეროვნული აკადემიის პრეზიდენტმა, აკადემიკოსმა გიორგი კვესიტაძემ. საზოგადოებას მიესალმნენ და მწერლის მოღვაწეობაზე ისაუბრეს აფხაზეთის ავტონომიური რესპუბლიკის ხელისუფლების წევრებმა, ცხუმ -აფზაზეთის მეცნიერებათა აკადემიის პროფესორმა ტიტე მოსიამ, საქართველოს მეცნიერებათა ეროვნული აკადემიის პროფესორმა ვაჟა შენგელიამ, ხელოვნების დამსახურებულმა მოღვაწე სვეტლანა ქეცბამ, პროფესორმა რუსუდან ჯანაშიამ.

კონფერენციას ესწრებოდნენ აფხაზეთის ავტონომიური რესპუბლიკის უმაღლესი საბჭოს თავმჯდომარე გია გვაზავა, აფხაზეთის უმაღლესი საბჭოს თავმჯდომარის მოადგილე ჯემალ გამახარია, აფხაზეთის ავტონომიური რესპუბლიკის  მთავრობის წევრები, პროფესორები, ისტორიკოსები, ცნობილი საზოგადო მოღვაწეები  და პოეტები.

კონფერენციის ორგანიზატორები და მხარდამჭერები იყვნენ: საქართველოს მეცნიერებათა ეროვნული აკადემია, აფხაზეთის ავტონომიური რესპუბლიკის მთავრობა, აფხაზეთის ავტონომიური რესპუბლიკის უმაღლესი საბჭო, საქართველოს ისტორიკოსთა ეროვნული კომიტეტი, ცხუმ-აფხაზეთის მეცნიერებათა აკადემია, ექვთიმე თაყაიშვილის სახელობის საქართველოს საისტორიო საზოგადოება, აფხაზეთის სულიერებისა და კულტურის ცენტრი.

109 იძულებით გადაადგილებულ ოჯახს ახალი საცხოვრებელი სახლი აქვს. დღეს, ბინის გასაღები დევნილ ოჯახებს საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა, სოზარ სუბარმა, ამერიკის შეერთებული შტატების ელჩმა საქართველოში რიჩარდ ნორლანდმა, აფხაზეთის მთავრობის თავმჯდოამრის მოვალეობის შემსრულებელმა ვახტანგ ყოლბაიამ , იმერეთის გუბერნატორმა გივი ჭიჭინაძემ, ქუთაისის მერმა შოთა მურღულიამ და მუნიციპალური განვითარების ფონდის აღმასრულებელი დირექტორის მოადგილემ თორნიკე თორაძემ გადასცეს. ოცხელის ქუჩაზე მდებარე ყოფილი საავადმყოფოს შენობის რეაბილიტაცია საქართველოს მუნიციპალური  განვითარების ფონდმა, ამერიკის შეერთებული შტატების საერთაშორისო განვითარების სააგენტოს დაფინანსებით განახორციელა. პროექტის საერთო ღირებულება 5.560.000 ლარია.

ოცხელის ქუჩაზე, საცხოვრებელი ფართის მიღების მოთხოვნით, განაცხადი 1850-მა დევნილმა ოჯახმა შეავსო, საიდანაც „დევნილთა საცხოვრებელით უზრუნველყოფის წესის შესაბამისად", ბინა 109 ოჯახს გადაეცა. კრიტერიუმების შესაბამისად ბინების განაწილების პროცესი ღიად და გამჭირვალედ წარმართვის მიზნით დევნილთა საკითხების შემსწავლელი კომისიის მუშაობის პროცესში აქტიურად იყვნენ ჩართულნი სახალხო დამცველის აპრატის, ადგილობრივი და საერთაშორისო სექტორის წარმომადგენლები, სწორედ დანიის ლტოლვილთა საბჭოს (DRC) მონაწილეობით ჩატარდა იმ ნგრევადი ობიექტების პროფაილინგი საიდანაც 48 დევნილმა ოჯახმა ახლადრეაბილიტირებულ შენობაში მიიღო ბინა. 22 წლის განმავლობაში, მძიმე საცხოვრებელი პირობებში მყოფი დევნილები, ახალ, საერთაშორისო სტანდარტების შესაბამისად რეაბილიტირებულ სახლში იცხოვრებენ. 

2013-2014 წლებში საქართველოს მუნიციპალური განვითარების ფონდმა, ამერიკის შეერთებული შტატების საერთაშორისო განვითარების სააგენტოს დაფინანსებით, საქართველოს სხვადასხვა რეგიონში სულ 14 შენობის რეაბილიტაცია განახორციელა და ჯამში, საცხოვრებლი სახლი  576 ოჯახს გადაეცა.