იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრი გიორგი ძიგუა, მინისტრის პირველი მოადგილე ნოდარ ჯალაღონია და აფხაზეთის ა/რ ფინანსთა და ეკონომიკის მინისტრი ლაშა დოლბაძე, აფხაზეთის მთავრობის თავმჯდომარის ლევან მგალობლიშვილის დავალებით, მეორე დღეა, საქართველოს რეგიონებში დიდთოვლობის შედეგად გამოწვეულ ვითარებას ეცნობიან.

 

"შექმნილია საგანგებო შტაბი, რომელიც სწავლობს სტიქიასთან დაკავშირებულ საკითხებს. გამოსულები ვართ რეგიონებში, მოვიარეთ კომპაქტურად ჩასახლებული ჩვენი დროებით დევნილი მოსახლეობის ყველა ლოკაცია. ვსწავლობთ როგორც ახლანდელ პრობლემებს, რომელიც სტიქიამ შექმნა, ასევე იმ პრობლემებს, რაც აქამდეც ჰქონდათ. დახმარება სჭირდებათ ამ ადამიანებს და ყველაფერს ვაკეთებთ ამისთვის“, - განაცხადა გიორგი ძიგუამ.

 

დღეს შეხვედრა ზუგდიდში, ბარამიას ქუჩაზე დევნილთა კომპაქტურად ჩასახლების ადგილზე გაიმართა. მინისტრებმა აფხაზეთიდან დროებით დევნილი მოსახლეობის საჭიროებები მოისმინეს და ადგილზე სტიქიის შედეგად არსებული მდგომარეობა შეაფასეს.

 

სამუშაო ჯგუფის წევრები სწრაფი მოქმედების მიზნით, ცენტრალურ უწყებებთან სრულ კოორდინაციაში იმყოფებიან.