აფხაზეთის ავტონომიური რესპუბლიკის იძულებით გადაადგილებულ პირთა მინისტრი დავით ფაცაცია, აფხაზეთის მთავრობის წევრებთან ერთად, საქართველოს საპატრიარქოში გამართულ სამეცნიერო კონფერენციას - „აფხაზეთი - ისტორია და თანამედროვეობა“ დაესწრო.

კონფერენციაზე სამღვდელოების წარმომადგენლებმა, ისტორიკოსებმა და ანალიტიკოსებმა აფხაზეთის ისტორიასთან და თანამედროვე გამოწვევებთან დაკავშირებულ საკითხებზე მოხსენებები წარმოადგინეს და თემებთან დაკავშირებით ერთმანეთს საკუთარი მოსაზრებები გაუზიარეს.

„კონფერენციის თემა: „აფხაზეთი - ისტორია და თანამედროვეობა“ მკაფიოდ გამოკვეთს ჩვენი ფიქრისა და მსჯელობის თვალსაწიერს. ჩვენ უნდა შევძლოთ და სიღრმისეულად წარმოვაჩინოთ აფხაზეთის ისტორია, როგორც საქართველოს განუყოფელი ნაწილი, რომელსაც უდიდესი როლი მიუძღვის ერთიანი ქართული სახელმწიფოებრიობის და ეროვნული თვითშეგნების ჩამოყალიბების პროცესში. არაერთი უცხოური წყარო საქართველოს აფხაზეთად მოიხსენიებდა, ხოლო აფხაზებს - ქართველებად და ქართველს - აფხაზად.

უნდა გვახსოვდეს, რომ აფხაზეთი არამარტო ტერიტორია, არამედ ჩვენი ერის სულიერი მთლიანობის ერთ-ერთი ის აუცილებელი მდგენელია, რომლის გარეშეც ჩვენი საზოგადოების წინსვლა და ერთობა წარმოუდგენელია.

ხშირად ვამბობთ, რომ აფხაზეთი ჩვენი ტკივილია. დიახ, ეს ასეცაა, მაგრამ ქრისტიანული აზროვნება სხვაგვარად გვთავაზობს ყოველგვარი პრობლემის აღქმას. ჩვენი რწმენით, ჯვარცმას და გოლგოთას ყოველთვის მოსდევს აღდგომა და ამაღლება; დიდ განსაცდელებს, თუკი ადამიანი გადაიტანს მართებულად, გონივრულად, სიბრძნით, ღვთის ნებით, მოსდევს დიდი სულიერი აღმავლობა და გამარჯვებები. ამიტომ ამ ტკივილთან დაკავშირებულია ჩვენი იმედიც. ეს არის იმედი იმისა, რომ ჩვენ აუცილებლად შევძლებთ ერთმანეთის ახლებურად დანახვას, ეს არის იმედი ურთიერთმიტევების, ეს არის იმედი იმისა, რომ ჩვენი დევნილები თავიანთ კუთხეში დაბრუნდებიან, ყველანი... ეს არის იმედი იმისა, რომ ჩვენ შევძლებთ ერთ სახელმწიფოში, ერთ ქვეყანაში თანაცხოვრებას სიყვარულითა და ურთიერთპატივისცემით, უფლის ნებითა და ყოვლადწმინდა ღვთისმშობლის მეოხებით.“ - განაცხადა სრულიად საქართველოს კათოლიკოს-პატრიარქის მოსაყდრე, სენაკისა და ჩხოროწყუს მიტროპოლიტმა შიომ.

აფხაზეთის მთავრობის წევრებმა კონფერენციის მონაწილეებს მისასალმებელი სიტყვით მიმართეს, ორგანიზატორებს მადლობა გადაუხადეს და მსგავსი ტიპის კონფერენციების მნიშვნელობაზე ისაუბრეს.

„განსაკუთრებულ მადლობას ვუხდი სრულიად საქართველოს კათოლიკოს-პატრიარქის მოსაყდრე, სენაკისა და ჩხოროწყუს მიტროპოლიტ შიოს კონფერენციის ორგანიზებისთვის, რადგანაც უაღრესად მნიშვნელოვანია ტრაგედიის 31 წლის თავზე, კიდევ ერთხელ ხაზი გავუსვათ საქართველოს ერთიანობის აუცილებლობას და დავაფიქსიროთ ჩვენი საზოგადოების განწყობა, დამოკიდებულება.

კონფერენციის მიზანი და ამოცანა საბოლოო ჯამში არის ჭეშმარიტების დადგენა, თუ როგორ ხელოვნურად ვითარდებოდა ის პროცესები, რომლებმაც ძმათა დაპირისპირებამდე მიგვიყვანა და ჩვენ - ორივე მხარემ ვეძებოთ სწორი, ისტორიული, ქრისტიანული და სიყვარულის გზა ერთმანეთის დასაბრუნებლად.

ჩვენ ალბათ ეს გოლგოთა უნდა გაგვევლო, რომ გაგვეაზრებინა თუ რა ბედნიერები ვიყავით აფხაზეთში და მეორე მხრივ, ის უბედურება რაც გვჭირდა - ჩვენ ღმერთი დავკარგეთ აფხაზეთში და შემდგომ უფრო უარესი მოხდა, როცა ნათესავები, ახლობლები, ოჯახის წევრები დაუპირისპირდნენ ერთმანეთს. ზუსტად იგივე დაემართა აფხაზეთის ოკუპირებულ ტერიტორიაზე დარჩენილ მოსახლეობას.

ახლა ისე როგორც არასოდეს დიდგორი გველოდება, უნდა გადავარჩინოთ ჩვენი მომავალი, რომელიც პირველ რიგში გადის ჩვენს რწმენაზე და თუ ეკლესია იქნება ძლიერი, საქართველო იქნება ძლიერი, თუ ვიქნებით ქრისტიანულად მტკიცედ, ერთმანეთის მიმართ სიყვარულით, მაშინ ვერავინ მოგვერევა.

სახელმწიფოს სიძლიერით, მდგრადობით და სწორი სტრატეგიული ქმედებებით ჩვენ უნდა შევქმნათ და გავაძლიეროთ ერთიანი საქართველო და ჩვენი ერთობით უნდა დავამარცხოთ გარე და შიდა მტრები, რომლებიც ებრძვიან ჩვენ ეკლესიას, ქართულ სიმტკიცეს და მშვიდობას.“ - განაცხადა დავით ფაცაციამ.

კონფერენცია სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსის და ბიჭვინთისა და ცხუმ-აფხაზეთის მიტროპოლიტ ილია II-ის ინიციატივითა და ლოცვა-კურთხევით და საქართველოს საპატრიარქოს ქართველოლოგიური კვლევის ცენტრის თანადგომით ორი დღის განმავლობაში გაგრძელდება.

აფხაზეთის ავტონომიური რესპუბლიკის განათლებისა და კულტურის მინისტრმა დავით მორგოშიამ ვ. არქანიას არტგალერეაში აფხაზეთის სპორტული ფედერაციებისა და კლუბების, აფხაზეთის კულტურის, სპორტის და ახალგაზრდულ საქმეთა სააგენტოს ხელმძღვანელებთან, აფხაზეთის დამსახურებულ სპორტსმენებთან და მწვრთნელებთან გაცნობითი ხასიათის შეხვედრა გამართა.

შეხვედრაზე ფედერაციების და კლუბების წარმომადგენლებმა საკუთარ საქმიანობასა და სპორტულ მიღწევებზე ისაუბრეს. ყურადღება გაამახვილეს სპორტული ინფრასტრუქტურის გაუმჯობესებაზე, შესაბამისი ინვენტარის საჭიროებაზე და საერთაშორისო ასპარეზობებში მონაწილეობისთვის დაფინანსების მოპოვებაზე.

„ეს იყო ინფორმაციული ხასიათის, ძალიან სასარგებლო შეხვედრა, რომელიც მომავალში ინდივიდუალურად გაგრძელდება. ჩვენ ერთად შევეცდებით, გამოვნახოთ გზები და შესაძლებლობები, სპორტის შემდგომი განვითარებისთვის, იმისთვის თუ როგორ დავეხმაროთ აფხაზეთის სპორტსმენებს კიდევ უკეთესი შედეგების მიღწევაში“, - განაცხადა დავით მორგოშიამ.

შეხვედრას სამინისტროს თანამშრომლები და აფხაზეთის სპორტული საზოგადოების წარმომადგენლები ესწრებოდნენ.

აფხაზეთის მთავრობის თავმჯდომარემ ლევან მგალობლიშვილმა ჟენევის საერთაშორისო მოლაპარაკებების 62-ე რაუნდის მოსამზადებელ შეხვედრაში მიიღო მონაწილეობა.

ევროკავშირიდან, გაეროდან და ეუთოდან მოლაპარაკებების თანათავმჯდომარეებთან შეხვედრას ქართული მხრიდან საგარეო საქმეთა მინისტრის პირველი მოადგილე და ჟენევის საერთაშორისო მოლაპარაკებებში საქართველოს დელეგაციის ხელმძღვანელი ლაშა დარსალია ხელმძღვანელობდა.

შეხვედრაზე ხაზი გაესვა ჟენევის საერთაშორისო მოლაპარაკებების ეფექტიანი ფუნქციონირების მნიშვნელობას და, ამ კონტექსტში, აქცენტი გაკეთდა ჟენევის საერთაშორისო მოლაპარაკებების დღის წესრიგის მთავარი საკითხების — რუსეთის მიერ ევროკავშირის შუამავლობით დადებული 2008 წლის 12 აგვისტოს ცეცხლის შეწყვეტის შეთანხმებით ნაკისრი საერთაშორისო ვალდებულებების შესრულებისა და იძულებით გადაადგილებულ პირთა და ლტოლვილთა უსაფრთხო და ღირსეული დაბრუნების  მიმართულებით წინსვლის საჭიროებაზე.

ასევე, ხაზი გაესვა გალში ინციდენტების პრევენციისა და მათზე რეაგირების მექანიზმის (IPRM) ყოველგვარი წინაპირობების გარეშე აღდგენის და გალსა და ერგნეთში ხსენებული მექანიზმის რეგულარულად, ფუძემდებლური პრინციპების შესაბამისად გამართვის მნიშვნელობას.

ჟენევის საერთაშორისო მოლაპარაკებების 62-ე რაუნდი 2024 წლის 5-6 ნოემბერს არის დაგეგმილი.

თბილისობის დღესასწაულთან დაკავშირებით, ეთნოგრაფიულ მუზეუმში, აფხაზეთის ავტონომიური რესპუბლიკის მთავრობის ორგანიზებით, „აფხაზური ეზო“ მოეწყო.

ღონისძიებას აფხაზეთის ავტონომიური რესპუბლიკის მთავრობის თავმჯდომარე ლევან მგალობლიშვილი, საქართველოს პარლამენტის თავმჯდომარის პირველი მოადგილე, ტერიტორიული მთლიანობის აღდგენისა და დეოკუპაციის საკითხებთან დაკავშირებული დროებითი კომისიის თავმჯდომარე გიორგი ვოლსკი, აფხაზეთის მთავრობის წევრები, უმაღლესი საბჭოს დეპუტატები და დიპლომატიური კორპუსის წარმომადგენლები ესწრებოდნენ.

ღონისძიება მისასალმებელი სიტყვით აფხაზეთის ავტონომიური რესპუბლიკის  განათლებისა და კულტურის მინისტრმა დავით მორგოშიამ გახსნა, მოწვეულ სტუმრებს მადლობა გადაუხადა და ღონისძიების მნიშვნელობაზე ისაუბრა.

„თბილისობის“ ფარგლებში, ეთნოგრაფიულ მუზეუმში წარმოდგენილი იყო აფხაზეთიდან დევნილი მეწარმეების პროდუქცია, მოეწყო ტრადიციული სამოსისა და ხელნაკეთი ნივთების გამოფენა, აფხაზური თემატიკის ფოტო მასალა და ბეჭდური გამოცემები, გასტრონომიული და კალიგრაფიული მასტერკლასები, ღვინისა და ტრადიციული კერძების დეგუსტაცია და ქვიშაზე მომზადებული ყავა სოხუმურად.

მოწვეული სტუმრების წინაშე აფხაზურ-ქართული მუსიკალური და ფოლკლორული წარმოდგენით აფხაზეთის სიმღერისა და ცეკვის სახელმწიფო აკადემიური ანსამბლი „აფხაზეთი“, აფხაზეთის სიმღერისა და ცეკვის სახელმწიფო აკადემიურ ანსამბლთან არსებული ბავშვთა ქორეოგრაფიული ანსამბლი „ოტობაია“ და გოგონათა ფოლკლორული ანსამბლი „გუმბათი“ წარდგნენ.

„მინდა თბილისობა მივულოცო  ჩემს თბილისს, თბილისელებს და ყველა კუთხის წარმომადგენლებს. განსაკუთრებით ჩემ დროებით დევნილ მოსახლეობას, დიდი ამაგი აქვს თბილისს ჩვენი დევნილი  მოსახლეობის მიმართ. მინდა ვისარგებლო შემთხვევით და მადლობა გადაუხადო  ქალაქის მერს, ბატონ კახი კალაძეს,  საკრებულოს თავმჯდომარეს, ბატონ გიორგი ტყემალაძეს. ასევე, ყველა რაიონის გამგებელს იმ სიკეთისთვის და გვერდში დგომისთვის, რასაც ისინი ყოველდღიურად ჩვენი მოსახლეობის მიმართ იჩენენ. დღევანდელი ღონისძიება ამ ყველაფრის ნათელი დასტურია და დღეს გვაქვს შესაძლებლობა, ჩვენი მრავალფეროვანი კულტურა წარმოვაჩინოთ და გავუზიაროთ სხვადსხვა სტუმარს, მათ შორის ტურისტებს. დარწმუნებული ვარ, რომ ძალიან მალე ჩვენი ცენტრალური ხელისუფლების სწორი პოლიტიკიდან გამომდინარე, ძალიან მალე, ჩვენს აფხაზ დებთან და ძმებთან სოხუმში გიმასპინძლებთ.“ - განაცხადა ლევან მგალობლიშვილმა.

გაგრის დაცემის დღესთან დაკავშირებით, აფხაზეთის ავტონომიური რესპუბლიკის მთავრობის წევრები და უმაღლესი საბჭოს დეპუტატები თბილისის ილორის წმინდა გიორგის სახელობის ეკლესიაში იმყოფებოდნენ.

ტაძრის წინამძღვარმა დეკანოზმა ლევან ჯანაშიამ 1992 წელს გაგრაში განვითარებული ტრაგიკული მოვლენების დროს დაღუპულთა სულების მოსახსენებელი პანაშვიდი გადაიხადა.

პანაშვიდს აფხაზეთის მთავრობისა და დევნილი საზოგადოების წარმომადგენლები ესწრებოდნენ.

აფხაზეთის ავტონომიური რესპუბლიკის მთავრობის თავმჯდომარე ლევან მგალობლიშვილმა, აფხაზეთის უმაღლესი საბჭოს თავმჯდომარე ჯემალ გამახარიას და აფხაზეთის მთავრობის წევრებთან ერთად, გაგრის ტრაგიკული მოვლენების დროს დაღუპულთა ხსოვნას პატივი მიაგო.

„დღეს არის გაგრის დაცემის დღე. ჩვენ კიდევ ერთხელ ვიხსენებთ და პატივს მივაგებთ 1992 წელს გაგრაში დატრიალებული ტრაგიკული მოვლენების დროს დაღუპულთა ხსოვნას. ჩვენი ვალია, გვახსოვდეს გმირები და ყველაფერი გავაკეთოთ მათი სახელების უკვდავსაყოფად“, - განაცხადა ლევან მგალობლიშვილმა.

გაგრის დაცემის დღესთან დაკავშირებით, მთავრობის თავმჯდომარემ, ასევე, გმირთა მოედანზე საქართველოს პირველი ეროვნული გმირის ჟიული შარტავასა და ეროვნული გმირის, გენერალ-მაიორ გენო ადამიას ბიუსტები ყვავილებით შეამკო.

გმირთა მემორიალთან აფხაზეთის მთავრობის წარმომადგენლები და უმაღლესი საბჭოს დეპუტატები იმყოფებოდნენ.

ღონისძიების ფარგლებში დაჯილდოვდნენ აფხაზეთის ღვაწლმოსილი პედაგოგები და აფხაზეთის 2024 წლის საუკეთესო მასწავლებლები.

აფხაზეთის განათლებისა და კულტურის მინისტრმა დავით მორგოშიამ პედაგოგებს პროფესიული დღე მიულოცა, მადლობის სიგელები და სიმბოლური საჩუქრები გადასცა.

"მინდა მასწავლებელთა საერთაშორისო დღე მივულოცო აფხაზეთის საჯარო სკოლის პედაგოგებს, განსაკუთრებით კი ოკუპირებულ ტერიტორიაზე მცხოვრებ მასწავლებლებს. ადამიანებს, რომლებსაც თავდაუზოგავი შრომითა და პროფესიონალიზმით, უდიდესი წვლილი შეაქვთ უკეთესი საზოგადოების ფორმირებაში. განსაკუთრებული პატივისცემით ვულოცავთ ოკუპირებულ ტერიტორიებზე მოღვაწე მასწავლებლებს, რომლებიც პირადი გმირობის ფასად, ძალიან რთულ პირობებში უწევთ სასწავლო პროცესის წარმართვა, თუმცა უამრავი შეზღუდვის მიუხედავად ერთგულად ემსახურებიან საკუთარ საქმეს“, - განაცხადა დავით მორგოშიამ.

შეხვედრას სამინისტროს თანამშრომლები და აფხაზეთის საჯარო სკოლების პედაგოგები ესწრებოდნენ.

მასწავლებლის საერთაშორისო დღესთან დაკავშირებით, აფხაზეთის განათლებისა და კულტურის სამინისტრო, ღვაწლმოსილ პედაგოგებსა და წლის საუკეთესო მასწავლებლებთან შეხვედრას ტრადიციულად, ყოველწლიურად მართავს. წელს მინისტრის სპეციალური მილოცვა 10-მა ღვაწლმოსილმა პედაგოგმა მიიღო.

აფხაზეთის ავტონომიური რესპუბლიკის მთავრობის თავმჯდომარე ლევან მგალობლიშვილმა და ჟიული შარტავას შვილიშვილმა ზუგდიდში საქართველოს ეროვნულ გმირ ჟიული შარტავას ბიუსტი გახსნეს.

ბიუსტი აფხაზეთის ავტონომიური რესპუბლიკის მთავრობის, აფხაზეთის ავტონომიური რესპუბლიკის უმაღლესი საბჭოსა და ზუგდიდის მუნიციპალიტეტის მერიის მხარდაჭერით გაიხსნა.

ღონისძიებაზე დამსწრე საზოგადოებას სიტყვით მიმართეს და სამშობლოს წინაშე ჟიული შარტავას ღვაწლსა და დამსახურებაზე ისაუბრეს: აფხაზეთის ავტონომიური რესპუბლიკის მთავრობის თავმჯდომარე ლევან მგალობლიშვილმა, აფხაზეთის ავტონომიური რესპუბლიკის უმაღლესი საბჭოს თავმჯდომარე ჯემალ გამახარიამ, ჟიული შარტავას საზოგადოების თავმჯდომარე ვახტანგ ყოლბაიამ და ზუგდიდის მუნიციპალიტეტის მერმა მამუკა წოწერიამ. ბიუსტის გახსნაზე, ასევე, იმყოფებოდნენ ადგილობრივი ხელისუფლებისა და საზოგადოების წარმომადგენლები.

„ბატონი ჟიული შარტავა ყველასთვის ცნობილი პიროვნებაა. ადამიანი, რომელმაც, ვიტყოდი, რომ გარდაცვალების შემდეგაც შექმნა ახალი ეპოქა და ამის დასტურია ქალბატონი ლიკას, მისი შვილიშვილის ჩვენს გუნდში ყოფნა, გაწევრიანება ჩვენს დიდ პოლიტიკურ ოჯახში. იმედი მაქვს, ჩვენ ერთად ყველაფერს გავაკეთებთ ბატონი ჟიულის სახელის უკვდავსაყოფად" - განაცხადა ლევან მგალობლიშვილმა.

ჟიული შარტავას ბიუსტი "ეროვნული ერთიანობის ცენტრი - ჟიული შარტავას საზოგადოების" ინიციატივით შეიქმნა.

აფხაზეთის ავტონომიური რესპუბლიკის მთავრობის თავმჯდომარე ლევან მგალობლიშვილი, საქართველოს პარლამენტის ვიცე-სპიკერთან, ტერიტორიული მთლიანობის აღდგენისა და დეოკუპაციის საკითხებთან დაკავშირებული დროებითი კომისიის თავმჯდომარე გიორგი ვოლსკისთან, შერიგებისა და სამოქალაქო თანასწორობის საკითხებში საქართველოს სახელმწიფო მინისტრის მოადგილე შოთა რეხვიაშვილთან ერთად, კონსტანტინე გამსახურდიას სახელობის სოხუმის სახელმწიფო დრამატულ თეატრში "აზდაკის ბაღის“ - ინტეგრირებული თეატრის სეზონის გახსნას დაესწრო. ღონისძიებაზე, ასევე, იმყოფებოდნენ აფხაზეთის აღმასრულებელი და საკანონმდებლო ხელისუფლების წარმომადგენლები.

ინტეგრირებული თეატრის ახალი სეზონი წარმოდგენილი იყო ნოდარ დუმბაძის მოთხრობის მიხედვით დადგმული სპექტაკლით "Helliados", რომელიც სოხუმში განვითარებულ მოვლენებზეა და ასახავს ორი მეგობრისა და სამშობლოს სიყვარულის ისტორიას.

ინტეგრირებული თეატრის მიზანია, განსაკუთრებული საჭიროების მქონე პირებმა, რომლებიც დაინტერესებულნი არიან თეატრით, გამოსცადონ თავიანთი ძალები სამსახიობო ხელოვნებაში.

ღონისძიება აფხაზეთის ავტონომიური რესპუბლიკის მთავრობისა და აფხაზეთის განათლებისა და კულტურის სამინისტროს მხარდაჭერით გაიმართა.

აფხაზეთის ავტონომიური რესპუბლიკის მთავრობის თავმჯდომარე ლევან მგალობლიშვილმა, აფხაზეთის უმაღლესი საბჭოს თავმჯდომარე ჯემალ გამახარიასთან, აფხაზეთის მთავრობის წევრებთან და უმაღლესი საბჭოს დეპუტატებთან ერთად, სოხუმის დაცემის თარიღთან დაკავშირებით, საქართველოს ეროვნული გმირების - ჟიული შარტავას, გურამ გაბესკირიასა და გენო ადამიას საფლავები ყვავილებით შეამკო და მათ ხსოვნას პატივი მიაგო.

დღესვე ლევან მგალობლიშვილმა პატივი მიაგო აფხაზეთის ავტონომიური რესპუბლიკის მინისტრთა საბჭოს ყოფილ თავმჯდომარესა და დევნილობაში აფხაზეთის ავტონომიური რესპუბლიკის უმაღლესი საბჭოს პირველ თავმჯდომარე თამაზ ნადარეიშვილს.

აფხაზეთის ავტონომიური რესპუბლიკის მთავრობის თავმჯდომარე ლევან მგალობლიშვილმა ვაკის პანთეონში საქართველოს ეროვნული გმირის, აფხაზეთის ავტონომიური რესპუბლიკის მინისტრთა საბჭოს ყოფილი თავმჯდომარის, ჟიული შარტავას საფლავი ყვავილებით შეამკო და მის ხსოვნას პატივი მიაგო.

ეროვნული გმირის საფლავზე ასევე იმყოფებოდნენ: საქართველოს პარლამენტის თავმჯდომარე შალვა პაპუაშვილი, შერიგებისა და სამოქალაქო თანასწორობის საკითხებში საქართველოს სახელმწიფო მინისტრი თეა ახვლედიანი, აფხაზეთის უმაღლესი საბჭოს თავმჯდომარე ჯემალ გამახარია, აფხაზეთის ავტონომიური რესპუბლიკის მთავრობის წევრები და უმაღლესი საბჭოს დეპუტატები.

სოხუმის დაცემის დღეს, ტრაგიკულად დაღუპული ჟიული შარტავას საფლავზე მამა ლევან ჯანაშიამ სულის მოსახსენიებელი პანაშვიდი გადაიხადა, რომელსაც ჟიული შარტავას ოჯახის წევრებიც ესწრებოდნენ.

1993 წლის 27 სექტემბერს, სოხუმის დაცემის დღეს, აფხაზეთის უზენაესი საბჭოს თავმჯდომარე ჟიული შარტავა და მისი თანამებრძოლები, რომლებმაც გაქცევაზე უარი თქვეს, 30-მდე ქართველთან ერთად, მთავრობის სახლის წინ დახვრიტეს.

სიონის საკათედრო ტაძარში წირვა სრულიად საქართველოს კათალიკოს-პატრიარქმა, უწმინდესმა და უნეტარესმა ილია მეორემ კათალიკოს-პატრიარქის ტახტის მოსაყდრესთან, სენაკისა და ჩხოროწყუს მიტროპოლიტ შიოსთან და სამღვდელოებასთან ერთად აღავლინა.

,,მინდა ყველას მოვულოცო დღევანდელი დღე, ჯვარი უპირველესი ძალაა, რომელიც ხილული და უხილავი მტრისგან გვიცავს და ღრმად მწამს, რომ ძალიან მალე სრულიად საქართველოს კათოლიკოს-პატრიარქი სოხუმიდან დალოცავს გაერთიანებულ საქართველოს და ეს მხოლოდ უფლის ნებით, ჩვენი სიყვარულით და ერთიანობით მოხდება." - დავით ფაცაცია

ლევან მგალობლიშვილი  დაღუპულ გმირთა მემორიალთან შვილებთან და შვილიშვილთან ერთად იმყოფებოდა.

აფხაზეთის მთავრობის თავმჯდომარის განცხადებით, ნებისმიერ პოლიტიკურ ნაბიჯს უნდა მოყვეს სახალხო დიპლომატია.

"მე დღეს მოვედი ჩემს შვილებთან და შვილიშვილთან ერთად, მე დარწმუნებული ვარ, რომ ძალიან მალე ისინი ნახავენ სოხუმს, ნახავენ აფხაზეთს და ისეთივე ღირსებით და სულისკვეთებით გააგრძელებენ მოღვაწეობას, როგორი ღირსებითაც არის აი, ამ კედელზე, მემორიალურ დაფაზე ამოტვიფრული მათი დიდი ბაბუის ბიძინა მგალობლიშვილის სახელი. ნებისმიერ პოლიტიკურ ნაბიჯს უნდა მოყვეს სახალხო დიპლომატია, რამეთუ ჩვენ ვართ ერთი ტრადიციების, ერთი ადათ-წესების მატარებელი ხალხი და ჩვენი შერიგება გარდაუვალია. ყველაფერი უნდა ვიღონოთ იმისათვის,  რომ ქართველმა  და აფხაზმა დებმა და ძმებმა ერთად გავაგრძელოთ ცხოვრება. "ქართული ოცნება" კი ყველაფერს გააკეთებს იმისათვის, რათა ერთი სახელი და გვარიც კი არ მიემატოს ამ კედელს", - განაცხადა ლევან მგალობლიშვილმა.

აფხაზეთის მთვრობის თავმჯდომარემ, ასევე, ყვავილებით შეამკო საქართველოს ეროვნული გმირების - ჟიული შარტავასა და გენო ადამიას ბიუსტები.

აფხაზეთში საბრძოლო მოქმედებები 1992 წლის 14 აგვისტოს დაიწყო, 13 თვესა და 13 დღეს გაგრძელდა და 1993 წლის 27 სექტემბერს სოხუმის დაცემით დასრულდა.