აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძემ, აფხაზეთის მთავრობის დელეგაციის წევრებთან ერთად, სიცილიის რეგიონის სამეწარმეო საქმიანობის მინისტრ ედი ტამაიოსთან შეხვედრა გამართა.

შეხვედრაზე საუბარი შეეხო აფხაზეთის ავტონომიური რესპუბლიკის სავაჭრო-სამრეწველო პალატისა და სიცილიის რეგიონის სამეწარმეო საქმიანობის სამინისტროსთან ურთიერთთანამშრომლობის განვითარებას, რომელიც აფხაზეთიდან დევნილი მეწარმეების მიერ წარმოებული პროდუქციის იტალიაში პოპულარიზაციას ითვალისწინებს.

შეხვედრაზე ასევე, მიმდინარე წლის ზაფხულში, პალერმოში აფხაზეთიდან დევნილი მეწარმე ქალების მიერ წარმოებული პროდუქციის გამოფენა-გაყიდვის ორგანიზების საკითხი განიხილეს.

შეხვედრას აფხაზეთის ავტონომიური რესპუბლიკის განათლებისა და კულტურის მინისტრი გიორგი ძაძამია, აფხაზეთის ავტონომიური რესპუბლიკის იუსტიციისა და სამოქალაქო ინტეგრაციის მინისტრი ალიონა ჩხოტუა, აფხაზეთის უმაღლესი საბჭოს დეპუტატი ელგუჯა გვაზავა, საქართველოს საგანგებო და სრულუფლებიანი ელჩი იტალიაში თამარ ლილუაშვილი, საქართველოს გენერალური კონსული ქალაქ ბარიში ირაკლი ქოიავა, საქართველოს საპატიო კონსული ლეონარდა ამელია და საქართველოს პარლამენტის ტერიტორიული მთლიანობის აღდგენისა და დეოკუპაციის საკითხებთან დაკავშირებული დროებითი კომისიის თავმჯდომარის წარმომადგენელი ქეთევან ქორქაშვილი ესწრებოდნენ.

იტალიაში ოფიციალური ვიზიტის ფარგლებში, აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე ევროპარლამენტარ ლეოლუკა ორლანდოს შეხვდა.

შეხვედრაზე საუბარი შეეხო ოკუპირებულ ტერიტორიაზე მცხოვრები მოზარდების ჩართვას საქართველო-იტალიის გაცვლით პროგრამაში. პროექტი 1997-2007 წლებში მოქმედი მოდელის მსგავსი იქნება, რომლის ფარგლებშიც ასობით დევნილმა ახალგაზრდამ შეძლო იტალიაში გამგზავრება და სხვადასხვა კულტურულ-საგანმანათლებლო პროგრამაში მონაწილეობა.

დღევანდელ შეხვედრაზე აღნიშნული პროექტის აღდგენის პერსპექტივები განიხილეს.

შეხვედრის ფარგლებში მხარეებმა ასევე ისაუბრეს ქართულ-აფხაზური კულტურული მემკვიდრეობის დაცვასა და კულტურული ურთიერთობების გაღრმავებაზე, რაც სხვადასხვა ფორმატის პროექტებით განხორციელდება.

„ეს პროექტი ჩემთვის განსაკუთრებით მნიშვნელოვანია, რადგან თავად ვიყავი მისი მონაწილე და პირადი გამოცდილებით ვიცი, თუ რაოდენ დიდი როლი აქვს მსგავს ინიციატივებს მოზარდების განვითარებისთვის.

ამ პროექტის აღდგენა უმნიშვნელოვანესი გზავნილია ოკუპირებულ ტერიტორიებზე მცხოვრები ახალგაზრდებისთვის. აფხაზეთის მთავრობის პრიორიტეტია, მათ განვითარების მეტი შესაძლებლობა და ევროპული პერსპექტივები შევთავაზოთ“, - განაცხადა გიორგი ჯინჭარაძემ.

ევროპარლამენტარის თქმით, გიორგი ჯინჭარაძესთან შეხვედრამ მას წლების წინანდელი გამოცდილება გაახსენა.

„ჩემთვის დიდი პატივია აფხაზეთის ავტონომიური რესპუბლიკის თავმჯდომარესთან გიორგი ჯინჭარაძესთან შეხვედრა, რომელიც მახსენებს წლების წინანდელ გამოცდილებას, როდესაც სიცილიელმა ოჯახებმა აფხაზეთიდან დევნილ ასობით ბავშვებს უმასპინძლეს. გიორგი ერთ-ერთი იყო ამ ბავშვებიდან. მიხარია, როცა ვფიქრობ, რომ სტუმართმოყვარეობის ეს ჟესტი გადაიქცა ბევრი ახალგაზრდისთვის შესაძლებლობად“, - განაცხადა ლეოლუკა ორლანდომ.

აფხაზეთის მთავრობის თავმჯდომარემ, მადლიერების ნიშნად, წლების განმავლობაში გაწეული მხარდაჭერისთვის ევროპარლამენტარი მადლობის სიგელით დააჯილდოვა, ლეოლუკა ორლანდომ კი გიორგი ჯინჭარაძეს საჩუქრად გადასცა ავტობიოგრაფიული წიგნი, რომელიც ევროპარლამენტარის საქართველოში ვიზიტსა და საქართველო-იტალიის მეგობრულ ურთიერთობებს ეძღვნება.

შეხვედრას აფხაზეთის ავტონომიური რესპუბლიკის განათლებისა და კულტურის მინისტრი გიორგი ძაძამია, აფხაზეთის ავტონომიური რესპუბლიკის იუსტიციისა და სამოქალაქო ინტეგრაციის მინისტრი ალიონა ჩხოტუა, აფხაზეთის უმაღლესი საბჭოს დეპუტატი ელგუჯა გვაზავა, საქართველოს საგანგებო და სრულუფლებიანი ელჩი იტალიაში თამარ ლილუაშვილი, საქართველოს გენერალური კონსული ქალაქ ბარიში ირაკლი ქოიავა, საქართველოს საპატიო კონსული სიცილიის რეგიონში ლეონარდა ამელა, აფხაზეთის საინფორმაციო-ანალიტიკური ცენტრის დირექტორი ეკა წივწივაძე და საქართველოს პარლამენტის ტერიტორიული მთლიანობის აღდგენისა და დეოკუპაციის საკითხებთან დაკავშირებული დროებითი კომისიის თავმჯდომარის წარმომადგენელი ქეთევან ქორქაშვილი ესწრებოდნენ.

იტალიაში სამუშაო ვიზიტის ფარგლებში, აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე დელეგაციის წევრებთან ერთად პალერმოს უნივერსიტეტს ეწვია და უნივერსიტეტის რექტორთან, პროფესორ მასიმო მიდირისთან შეხვედრა გამართა.

შეხვედრაზე მხარეებმა აფხაზეთის საკითხებზე კვლევითი საქმიანობის განვითარების მიმართულებები განიხილეს, რაც აკადემიური პერსონალის და სტუდენტებისთვის გაცვლითი პროგრამების შეთავაზებას ითვალისწინებს. ასევე ყურადღება გამახვილდა ახალგაზრდებისთვის მოკლევადიანი საზაფხულო და ზამთრის სკოლების შემუშავების შესაძლებლობებზე.

შეხვედრის მონაწილეებმა სამომავლო პარტნიორობის გაგრძელების და ურთიერთთანამშრომლობის მემორანდუმის გაფორმების მზაობა გამოხატეს.

ამასთან, აფხაზეთის მთავრობის თავმჯდომარემ პალერმოს უნივერსიტეტის რექტორი და აკადემიური პერსონალი აფხაზეთის სიმღერისა და ცეკვის სახელმწიფო აკადემიურ ანსამბლ "აფხაზეთის" კონცერტზე მიიწვია, რომელიც პალერმოში 22 თებერვალს გაიმართება.

შეხვედრას აფხაზეთის ავტონომიური რესპუბლიკის განათლებისა და კულტურის მინისტრი გიორგი ძაძამია, აფხაზეთის ავტონომიური რესპუბლიკის იუსტიციისა და სამოქალაქო ინტეგრაციის მინისტრი ალიონა ჩხოტუა, აფხაზეთის უმაღლესი საბჭოს დეპუტატი ელგუჯა გვაზავა, საქართველოს საგანგებო და სრულუფლებიანი ელჩი იტალიაში თამარ ლილუაშვილი, საქართველოს გენერალური კონსული ქალაქ ბარიში ირაკლი ქოიავა, საქართველოს საპატიო კონსული სიცილიის რეგიონში ლეონარდა ამელა და საქართველოს პარლამენტის ტერიტორიული მთლიანობის აღდგენისა და დეოკუპაციის საკითხებთან დაკავშირებული დროებითი კომისიის თავმჯდომარის წარმომადგენელი ქეთევან ქორქაშვილი ესწრებოდნენ.

აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე, დელეგაციის წევრებთან ერთად, პალერმოს მერს რობერტო ლაგალას შეხვდა.

შეხვედრაზე საუბარი შეეხო ოკუპირებულ ტერიტორიაზე მცხოვრები ბავშვების ჩართვას საქართველო-იტალიას შორის გაცვლით პროგრამაში. რომელიც 1997-2007 წლებში მოქმედი პროგრამის მსგავსი იქნება. დღევანდელ შეხვედრაზე აღნიშნული პროექტის აღდგენის პერსპექტივები განიხილეს.

პალერმოს მერმა საქართველოს ტერიტორიული მთლიანობის და სუვერენიტეტის მიმართ მხარდაჭერა გამოთქვა და თანამშრომლობის გაღრმავებაზე ისაუბრა.

"დიდი სიამოვნებით ვუმასპინძლე საქართველოს დელეგაციას, რომელსაც აფხაზეთის მთავრობის თავმჯდომარე ხელმძღვანელობს გავეცანი ამ რეგიონის აქტუალურ პრობლემებს, ქართველებს დავუდასტურე ჩვენი თანადგომა და მეგობრობა. განვიხილეთ არამარტო კოლაბორაციის, არამედ გაცვლით პროგრამებთან დაკავშირებული საკითხებიც. განსაკუთრებით გვინდა იმედი ჩავუსახოთ იმ ახალგაზრდებს, რომლებიც ოკუპირებულ ტერიტორიაზე ცხოვრობენ", - განაცხადა პალერმოს მერმა.

თავის მხრივ, გიორგი ჯინჭარაძემ იტალიურ მხარეს დევნილი ახალგაზრდების მხარდაჭერისთვის მადლობა გადაუხადა.

"ძალიან მნიშვნელოვანი შეხვედრა გავმართეთ პალერმოს მერთან, სადაც საუბარი გვქონდა ურთიერთთანამშრომლობის გაღრმავებაზე. ასევე, პროექტზე, როდესაც სიცილიელი ოჯახები მასპინძლობდნენ დევნილ ბავშვებს და ეს იყო ჩვენი დევნილი საზოგადოებისთვის ერთ-ერთი წარმატებული პროექტი და დღეს პალერმოს მერი დაგვპირდა, რომ ამ პროექტის განახლება შესაძლებელია. მინდა, დიდი მადლობა გადავუხადო იტალიურ მხარეს. ვფიქრობ, რომ ჩვენი თანამშრომლობა კიდევ უფრო მეტად გაღრმავდება და განვითარდება", - განაცხადა გიორგი ჯინჭარაძემ.

შეხვედრას აფხაზეთის მთავრობის წევრები, აფხაზეთის უმაღლესი საბჭოს დეპუტატი ელგუჯა გვაზავა, საქართველოს საგანგებო და სრულუფლებიანი ელჩი იტალიაში თამარ ლილუაშვილი, საქართველოს გენერალური კონსული ქალაქ ბარიში ირაკლი ქოიავა და საქართველოს პარლამენტის ტერიტორიული მთლიანობის აღდგენისა და დეოკუპაციის საკითხებთან დაკავშირებული დროებითი კომისიის თავმჯდომარის წარმომადგენელი ქეთევან ქორქაშვილი ესწრებოდნენ.

აფხაზეთის ფინანსთა და ეკონომიკის მინისტრი თენგიზ ნასარიძე თურქეთის თანამშრომლობისა და კოორდინაციის სააგენტოს (TİKA) თბილისის საკოორდინაციო ოფისის კოორდინატორს სალიჰ ოზერს შეხვდა.

აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტროსა და კლინიკა „ვივამედს“ შორის ურთიერთანამშრომლობის მემორანდუმი გაფორმდა. დოკუმენტს ხელი აფხაზეთის ჯანმრთელობისა და სოციალური დაცვის მინისტრმა ბესიკ კუსიდიმ და კლინიკა „ვივამედის“ გენერალურმა დირექტორმა ნინო ნადირაძემ მოაწერეს.

მემორანდუმი მიზნად ისახავს დევნილი და ოკუპირებული აფხაზეთის ტერიტორიაზე მუდმივად მცხოვრები პირებისთვის მაღალტექნოლოგიურ სამედიცინო სერვისებზე ხელმისაწვდომობის გაზრდას და საჭიროებებზე ორიენტირებული პროგრამების განხორციელებას.

ღონისძიების ფარგლებში მინისტრი სამედიცინო პერსონალს პირადად შეხვდა და მათ სამუშაო პროცესს გაეცნო.

ღონისძიებას აფხაზეთის ავტონომიური რესპუბლიკის ჯანმრთელობისა და სოციალური დაცვის მინისტრის პირველი მოადგილე მანონა გეჯუა, „ვივამედის“ კლინიკური დირექტორი ზურაბ ჩხაიძე და ფინანსური დირექტორი სოფიო დათუაშვილი ესწრებოდნენ.

დღეს აფხაზეთის ავტონომიური რესპუბლიკის უმაღლესმა საბჭომ საგაზაფხულო სესიის ფორმატით მუშაობა განაახლა. სხდომას აფხაზეთის უმაღლესი საბჭოს თავმჯდომარე ჯემალ გამახარია უძღვებოდა.

სესიაზე დეპუტატებს სიტყვით აფხაზეთის ავტონომიური რესპუბლიკის მთავრობის თავმჯდომარემ გიორგი ჯინჭარაძემ მიმართა, რომელმაც დეპუტატებს საგაზაფხულო სესიის გახსნა მიულოცა და დევნილი მოსახლეობის სოციალური და ეკონომიკური მდგომარეობის გაუმჯობესებასა და განათლების მიმართულებით არსებულ გამოწვევებზე გაამახვილა ყურადღება. მთავრობის თავმჯდომარემ, ასევე, აფხაზეთის უმაღლეს საბჭოსთან ურთიერთთანამშრომლობის საკითხებზე ისაუბრა.

აფხაზეთის უმაღლესი საბჭოს საგაზაფხულო სესიის გახსნას აფხაზეთის მთავრობის წევრები, აფხაზეთის უმაღლესი საბჭოს დეპუტატები ესწრებოდნენ.

აფხაზეთის ავტონომიური რესპუბლიკის მთავრობის თავმჯდომარემ გიორგი ჯინჭარაძემ ჟენევის საერთაშორისო მოლაპარაკებების 66-ე რაუნდის მოსამზადებელ შეხვედრაში მიიღო მონაწილეობა.

ევროკავშირიდან, გაეროდან და ეუთოდან მოლაპარაკებების თანათავმჯდომარეებთან შეხვედრას ქართული მხრიდან საგარეო საქმეთა მინისტრის მოადგილე და ჟენევის საერთაშორისო მოლაპარაკებებში საქართველოს დელეგაციის ხელმძღვანელი ლაშა დარსალია ხელმძღვანელობდა.

შეხვედრაზე ხაზი გაესვა ჟენევის საერთაშორისო მოლაპარაკებების ეფექტიანი ფუნქციონირების მნიშვნელობას. ყურადღება გამახვილდა ჟენევის საერთაშორისო მოლაპარაკებების დღის წესრიგის მთავარი საკითხების - რუსეთის მიერ ევროკავშირის შუამავლობით დადებული 2008 წლის 12 აგვისტოს ცეცხლის შეწყვეტის შეთანხმებით ნაკისრი საერთაშორისო ვალდებულებების შესრულებისა და იძულებით გადაადგილებულ პირთა და ლტოლვილთა უსაფრთხო და ღირსეული დაბრუნების მიმართულებით წინსვლის საჭიროებაზე. ხაზი გაესვა გალში ინციდენტების პრევენციისა და მათზე რეაგირების მექანიზმის (IPRM) ყოველგვარი წინაპირობების გარეშე აღდგენის და გალსა და ერგნეთში ხსენებული მექანიზმის რეგულარულად, ფუძემდებლური პრინციპების შესაბამისად გამართვის მნიშვნელობას.

შეხვედრაზე ქართულმა მხარემ ყურადღება გაამახვილა ოკუპირებულ რეგიონებსა და საოკუპაციო ხაზის სიახლოვეს უსაფრთხოების, ჰუმანიტარულ და ადამიანის უფლებათა კუთხით არსებულ ვითარებაზე, ასევე საერთაშორისო სამართლის ფუნდამენტური პრინციპების უხეში დარღვევით გადადგმულ ნაბიჯებზე, რაც მიმართულია ოკუპირებული რეგიონების უკანონო ანექსიისკენ.

გარდა ამისა, ყურადღება გამახვილდა რუსეთის ფედერაციისა და სოხუმში საოკუპაციო რეჟიმის მხრიდან ნდობის აღდგენისაკენ მიმართული პროექტების შეზღუდვისა და დაბლოკვის მცდელობებზე.

ჟენევის საერთაშორისო მოლაპარაკებების 66-ე რაუნდის გამართვა დაგეგმილია 2026 წლის 18-19 მარტს.

აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე პარლამენტში საქართველოს პრეზიდენტის ყოველწლიურ მოხსენებას დაესწრო.

დღეს საქართველოს პრეზიდენტი მიხეილ ყაველაშვილი საქართველოს პარლამენტში ქვეყნის მდგომარეობის მნიშვნელოვან საკითხებზე ყოველწლიური მოხსენებით წარსდგა.

პრეზიდენტმა სიტყვით გამოსვლისას საქართველოს ოკუპირებულ ტერიტორიებზე და იმ ნაბიჯებზე ისაუბრა, რომელიც საქართველოს ტერიტორიული მთლიანობის აღდგენას უზრუნველყოფს.

„ჩვენი ქვეყნისთვის კვლავ უმთავრეს გამოწვევად რჩება ჩვენი ისტორიული ტერიტორიების ოკუპაცია. ჩვენი გზავნილები მკაფიოა: ყველაფერი უნდა გავაკეთოთ იმისთვის, რომ ჩვენს აფხაზ და ოს და-ძმებთან ერთად ერთიანი, ძლიერი, განვითარებული და მშვიდობიანი საქართველო ავაშენოთ.

ჩვენი ნაბიჯები ადასტურებს, რომ არა მხოლოდ ვსაუბრობთ მშვიდობაზე, არამედ რეალურად ვზრუნავთ მის უზრუნველყოფაზე, რაც ნდობის აღდგენისა და ჩატეხილი ხიდების ხელახლა აგების გზაზე მნიშვნელოვან წინაპირობად შეიძლება გადაიქცეს.

სამშვიდობო პოლიტიკა, ეკონომიკური წინსვლა და კეთილდღეობის მაღალი ხარისხი არის გზა, რომელიც ადრე თუ გვიან აუცილებლად მიგვიყვანს ჩვენი ქვეყნისა და ხალხის საბოლოო გაერთიანებასთან. ამის რწმენას კი ჩვენი საერთო ისტორია, კულტურა და ღირებულებები გვიმყარებს“, - განაცხადა მიხეილ ყაველაშვილმა.

მოხსენებას აღმასრულებელი ხელისუფლების, დიპლომატიური კორპუსის, საპატრიარქოს, აფხაზეთისა და აჭარის ავტონომიური რესპუბლიკების მთავრობებისა და უმაღლესი საბჭოს წარმომადგენლები ესწრებოდნენ.

აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე საქართველოში უნგრეთის საგანგებო და სრულუფლებიან ელჩ პეტრა პონევაჩ-პანას შეხვდა.

მთავრობის თავმჯდომარემ უნგრელ დიპლომატს თანამდებობაზე დანიშვნა მიულოცა და საქართველოში წარმატებული საქმიანობა უსურვა.

გიორგი ჯინჭარაძემ ელჩს აფხაზეთის ავტონომიური რესპუბლიკის მთავრობის საქმიანობა და ძირითადი პრიორიტეტები გააცნო. ასევე დეტალურად ისაუბრა ოკუპირებული აფხაზეთის ტერიტორიაზე ადამიანის უფლებების კუთხით არსებულ რთულ ვითარებაზე.

თავის მხრივ, ელჩმა საქართველოს სუვერენიტეტის და ტერიტორიული მთლიანობის მიმართ უნგრეთის მთავრობის მტკიცე მხარდაჭერა კიდევ ერთხელ დაადასტურა და ხაზი გაუსვა ბოლო პერიოდში საქართველოსა და უნგრეთს შორის უფრო მჭიდრო თანამშრომლობას.

გიორგი ჯინჭარაძემ უნგრეთის ელჩს მისი ქვეყნის მხრიდან საქართველოს ტერიტორიული მთლიანობისა და არაღიარების პოლიტიკის აქტიური მხარდაჭერისთვის მადლობა გადაუხადა.

შეხვედრაზე მხარეებმა ორ ქვეყანას შორის არსებული სტრატეგიული პარტნიორობის ფარგლებში სხვადასხვა მიმართულებით სამომავლო თანამშრომლობის გაძლიერების შესაძლებლობები განიხილეს.

შერიგებისა და სამოქალაქო თანასწორობის საკითხებში სახელმწიფო მინისტრის თეა ახვლედიანის ხელმძღვანელობით, ჩართულობის სტრატეგიის სამოქმედო გეგმის განხორციელების მიზნით შექმნილი სამთავრობო უწყებათაშორისი კომისიის სხდომა გაიმართა.
სხდომის ფორმატში აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძემ აფხაზეთის მთავრობის მიერ განხორციელებულ და მიმდინარე საქმიანობაზე, ასევე სამომავლო ხედვებზე ისაუბრა.

კომისიის სხდომა სახელმწიფო მინისტრმა თეა ახვლედიანმა გახსნა, რომელმაც საქართველოს მთავრობის შერიგებისა და ჩართულობის პოლიტიკის ფარგლებში 2025 წლის გაწეული საქმიანობის ანგარიში წარმოადგინა. მინისტრმა ისაუბრა სამშვიდობო ინიციატივის „ნაბიჯი უკეთესი მომავლისკენ“ განხორციელების მიმდინარეობაზე, რომელიც მიზნად ისახავს ოკუპირებულ რეგიონებში მცხოვრები მოსახლეობის სოციალურ-ეკონომიკური მდგომარეობის გაუმჯობესებისა და ხელოვნურად გაყოფილ საზოგადოებას შორის ნდობის აღდგენისა და თანამშრომლობის ხელშეწყობას. სამთავრობო უწყებათაშორისმა კომისიამ შეაფასა სამშვიდობო პოლიტიკის ფარგლებში მიღწეული შედეგები, არსებული გამოწვევები და სამომავლო გეგმებზე იმსჯელა.

სამთავრობო კომისიის შემადგენლობაში არიან საქართველოს სახელმწიფო უწყებების, მათ შორის აფხაზეთის ავტონომიური რესპუბლიკის მთავრობის წარმომადგენლები. სხდომას ასევე ესწრებოდნენ საქართველოს მთავრობის ადმინისტრაციისა და შიდა ქართლის მხარეში სახელმწიფო რწმუნებულის წარმომადგენლები.

აფხაზეთის ავტონომიური რესპუბლიკის განათლებისა და კულტურის მინისტრი გიორგი ძაძამია აფხაზეთის უმაღლეს საბჭოში გამართულ საერთაშორისო კავშირების, განათლებისა და კულტურის საკითხთა კომიტეტის სხდომას დაესწრო.

სხდომას საერთაშორისო კავშირების, განათლებისა და კულტურის საკითხთა კომიტეტის თავმჯდომარე ნუგზარ მგალობლიშვილი უძღვებოდა.

სხდომაზე აფხაზეთის დროებით ოკუპირებულ ტერიტორიაზე, განათლებისა და კულტურის სფეროში არსებული გამოწვევები და შესაძლებლობები განიხილეს, ისაუბრეს მათი გადაჭრის გზებზე და სამომავლოდ განსახორციელებელ პროექტებზე.

კომიტეტის სხდომას აფხაზეთის უმაღლესი საბჭოს თავმჯდომარის პირველი მოადგილე, აფხაზეთის განათლებისა და კულტურის მინისტრის მოადგილეები, აფხაზეთის მთავრობის აპარატის უფროსი გიორგი სუთიძე, უმაღლესი საბჭოს აპარატის უფროსი ზურაბ მებონია, კომიტეტის აპარატის წევრები და აფხაზეთის განათლებისა და კულტურის სამინისტროს წარმომადგენლები ესწრებოდნენ.

აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე, აფხაზეთის განათლებისა და კულტურის მინისტრ გიორგი ძაძამიასთან ერთად, სოხუმის დრამატულ თეატრში სასკოლო პროექტის „გმირის დღის“ ფარგლებში გამართულ მოსწავლეთა თეატრალურ წარმოდგენას დაესწრო, რომელიც გენერალ გიორგი მაზნიაშვილის ცხოვრებას ეძღვნებოდა.

საგანმანათლებლო-შემეცნებითი პროექტი, საქართველოს პარლამენტის ქალთა და ბავშვთა საკითხებზე მომუშავე კომისიის მიერ არის ინიცირებული და მიზნად ისახავს ახალგაზრდებისთვის ეროვნული გმირების გაცნობას და პატრიოტული სულისკვეთების ამაღლებას.

ღონისძიებას საქართველოს საკანონმდებლო და აღმასრულებელი ხელისუფლების წარმომადგენლები და სხვა მოწვეული სტუმრები ესწრებოდნენ.

"აფხაზეთის ავტონომიური რესპუბლიკის ოკუპირებული ტერიტორიიდან (ზემო აფხაზეთი) იძულებით გადაადგილებულ პირთა - დევნილთა სოციალური დაცვის მიზნით ერთჯერადი დახმარების გაცემის წესის დამტკიცების შესახებ" აფხაზეთის ავტონომიური რესპუბლიკის მთავრობის 2026 წლის 30 იანვრის №1 დადგენილებით განისაზღვრა:
ა). ზემო აფხაზეთიდან დევნილი სოციალურად დაუცველი (არაუმეტეს 57000 სარეიტინგო ქულა) ოჯახებიდან ოთხ წლამდე ასაკის ბავშვებისთვის კვების პროდუქტებით და ჰიგიენის საგნებით ერთჯერადი დახმარება ვაუჩერის წესით დაფინანსდება.
ერთჯერადი დახმარების მიღების პირობები, წარსადგენი დოკუმენტაცია
1. ერთჯერადი დახმარების მიღების მსურველმა პირმა (ბენეფიციარი) - მშობელმა, ან ბავშვის კანონიერმა წარმომადგენელმა განცხადებით უნდა მიმართოს კომისიას და წარუდგინოს ქვემოთ ჩამოთვლილი დოკუმენტაცია კატეგორიების მიხედვით:
ა) ზემო აფხაზეთიდან სოციალურად დაუცველი (არაუმეტეს 57000 სარეიტინგო ქულა) ოჯახებიდან ოთხ წლამდე ასაკის ბავშვებისთვის კვების პროდუქტების და ჰიგიენის საგნების შესყიდვის, ვაუჩერის წესით დაფინანსება - ერთი ვაუჩერი 310 (სამასათი) ლარის ოდენობით - წარმოდგენილ უნდა იქნეს:
ა.ა) განმცხადებლის ბენეფიციარის პირადობის დამადასტურებელი მოწმობა (ასლი)
ა.ბ) განმცხადებლის (ბენეფიციარის) დევნილის მოწმობა;
ა.გ) ბავშვის დაბადების მოწმობა (ასლი);
ა.დ) ბავშვის დევნილის მოწმობა (ასლი);
ა.ე) ბავშვის მეურვის ან მზრუნველის პირადობის მოწმობა (ასლი);
ა.ვ) არსებობის შემთხვევაში - მეურვის ან მზრუნველის დევნილის მოწმობა (ასლი);
ა.ზ) ცნობა სოციალური მომსახურების სააგენტოდან სოციალურად დაუცველის ოჯახის სტატუსის და სარეიტინგო ქულების შესახებ, გაცემული არაუგვიანეს 14 სამუშაო დღისა წარმომადგენლობაში განცხადების წარდგენამდე;
ა.თ) არსებობის შემთხვევაში - ცნობა შეზღუდული შესაძლებლობის მქონე პირის - ბავშვის შესახებ;
ა.ი) არსებობის შემთხვევაში - ცნობა მშობლის შეზღუდული შესაძლებლობის მქონე პირის შესახებ;
ა.კ) არსებობის შემთხვევაში - ომის ვეტერანის მოწმობის ასლი;
ა.ლ) არსებობის შემთხვევაში - სამი ან მეტი არასრულწლოვანშვილიანი ოჯახის ბავშვების დაბადების მოწმობის ასლები;
ა.მ) არსებობის შემთხვევაში - ცნობა მარტოხელა მშობლის სტატუსის შესახებ;
ა.ნ) არსებობის შემთხვევაში - ცნობა ონკოლოგიური ან სხვა მძიმე დაავადების შესახებ(ფორმა №100 ).
გასათვალისწინებელია რომ:
ა.ა) ოჯახის ოთხ წლამდე ერთ ბავშვს - ერთი ვაუჩერი;
ა.ბ) ოჯახს რომელსაც ჰყავს ტყუპები - თითოეულს ერთი ვაუჩერი;
ა.გ) ოჯახს რომელსაც ჰყავს სამი და მეტი არასრულწლოვანი ბავშვი - დამატებით ერთი ვაუჩერი;
ა.დ) ოჯახს რომელსაც ჰყავს შეზღუდული შესაძლებლობის მქონე პირი - ბავშვი - დამატებით ერთი ვაუჩერი;
ა.ე) ოჯახს სადაც მშობელი (ერთ-ერთი მაინც) შეზღუდული შესაძლებლობის მქონე პირია - დამატებით ერთი ვაუჩერი;
ა.ვ) ოჯახს სადაც მშობელი (ერთ-ერთი მაინც) ომის ვეტერანია - დამატებით ერთი ვაუჩერი;
ა.ზ) ოჯახს სადაც მშობელს აქვს მარტოხელა მშობელის სტატუსი - დამატებით ერთი ვაუჩერი;
ა.თ) ოჯახს სადაც ბავშვი და/ან მშობელი (ერთ-ერთი მაინც) ონკოლოგიური დაავადების მქონე პირია - დამატებით ერთი ვაუჩერი.
II). ზემო აფხაზეთიდან დევნილ, ამჟამად უმუშევარ ან პენსიონერი პედაგოგებისთვის ერთჯერადი 250 (ორასორმოცდაათი) ლარის დახმარების მიზნით წარმოდგენილი უნდა იქნეს:
ბ.ა) განმცხადებლის (ბენეფიციარის) პირადობის დამადასტურებელი მოწმობა (ასლი);
ბ.ბ) განმცხადებლის დევნილის მოწმობა (ასლი);
ბ.გ) ცნობა - საქართველოს შემოსავლების სამსახურიდან, იმის შესახებ რომ, ცნობის წარდგენის თარიღამდე უკანასკნელი 6 თვის განმავლობაში არ იყო ნებისმიერი სახით გადასახადის გადამხდელი;
ბ.დ) ცნობა ზემო აფხაზეთის საგანმანათლებლო რესურს ცენტრიდან პედაგოგიური მოღვაწეობის შესახებ;
ბ.ე) ცნობა საბანკო რეკვიზიტების შესახებ.