აფხაზეთის ავტონომიური რესპუბლიკის მთავრობაში მორიგი ცვლილება განხორციელდა. აფხაზეთის ავტონომიური რესპუბლიკის მთავრობის თავმჯდომარემ აფხაზეთის იუსტიციისა და სამოქალაქო ინტეგრაციის მინისტრის თანამდებობაზე ალიონა ჩხოტუა დანიშნა.

ახლად დანიშნული მინისტრი გიორგი ჯინჭარაძემ დღეს სამინისტროს თანამშრომლებს პირადად წარუდგინა.

ალიონა ჩხოტუა 1976 წელს გაგრაში დაიბადა. დაამთავრა ივანე ჯავახიშვილის სახელობის თბილისის სახელმწიფო უნივერსიტეტის სოხუმის ფილიალის ფილოლოგიის ფაკულტეტი, ინგლისური ენისა და ლიტერატურის სპეციალობით. მას საჯარო სექტორში მრავალწლიანი მუშაობის გამოცდილება აქვს. ხანგრძლივი დროის განმავლობაში სხვადასხვა თანამდებობებზე მუშაობდა დიასპორის საკითხებში საქართველოს სახელმწიფო მინისტრის აპარატსა და საქართველოს საგარეო საქმეთა სამინისტროში.

ალიონა ჩხოტუამ იუსტიციისა და სამოქალაქო ინტეგრაციის მინისტრის თანამდებობაზე გიორგი ძიგუა შეცვალა, რომელიც აღნიშნულ პოზიციას 2024 წლიდან იკავებდა.

აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე აფხაზეთის მაგიდის ჩოგბურთის ფედერაციას ესტუმრა, სადაც დევნილ ახალგაზრდებს შეხვდა და მათ ვარჯიშს დაესწრო. შეხვედრაში აფხაზეთის განათლებისა და კულტურის მინისტრი ბექა ღვაჩლიანი მონაწილეობდა.

შეხვედრის ფარგლებში გიორგი ჯინჭარაძემ სპორტული ინფრასტრუქტურა დაათვალიერა და ფედერაციის წარმომადგენლებსა და სპორტსმენებს გაესაუბრა.

შეხვედრაზე ყურადღება გამახვილდა იმ გამოწვევებსა და საჭიროებებზე, რომელთა წინაშეც ახალგაზრდა დევნილი სპორტსმენები დგანან.

გიორგი ჯინჭარაძემ კიდევ ერთხელ გაუსვა ხაზი სპორტის, როგორც ახალგაზრდების განვითარების ერთ-ერთი უმნიშვნელოვანესი ინსტრუმენტის როლს და აღნიშნა, რომ აფხაზეთის მთავრობა დევნილი სპორტსმენების ხელშეწყობასა და სპორტული მიმართულების აქტიურ მხარდაჭერას მომავალშიც გააგრძელებს.

სოხუმის კონსტანტინე გამსახურდიას სახელობის პროფესიული სახელმწიფო დრამატული თეატრის დიმიტრი ჯაიანის სახელობის დარბაზში, საქართველოს დამსახურებული არტისტის, მსახიობ ლიანა მიქაშავიძის შემოქმედებითი საღამო გაიმართა.

ღონისძიებაზე ნაჩვენები იყო რეალურ ისტორიებზე შექმნილი თეატრალიზებული წარმოდგენა. სცენაზე მსახიობებმა სოხუმის კონსტანტინე გამსახურდიას სახელობის პროფესიული სახელმწიფო დრამატული თეატრის ისტორიის არაერთი მნიშვნელოვანი ეპიზოდი გააცოცხლეს.

საიუბილეო საღამოს აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე დაესწრო, რომელმაც ლიანა მიქაშავიძეს იუბილე მიულოცა და ხანგრძლივი და ნაყოფიერი შემოქმედებითი მოღვაწეობისთვის, აფხაზეთის მთავრობის სახელით სპეციალური ჯილდო გადასცა.

ღონისძიების ფარგლებში ასევე მოეწყო ლიანა მიქაშავიძის წიგნის „სოხუმის თეატრი გისმენთ“ პრეზენტაცია.

შემოქმედებითი საღამო აფხაზეთის ავტონომიური რესპუბლიკის განათლებისა და კულტურის სამინისტროს, აფხაზეთის კულტურის, სპორტისა და ახალგაზრდულ საქმეთა სააგენტოსა და სოხუმის კონსტანტინე გამსახურდიას სახელობის პროფესიული სახელმწიფო დრამატული თეატრის მხარდაჭერით გაიმართა.

აფხაზეთის ავტონომიური რესპუბლიკის მთავრობის თავმჯდომარემ გიორგი ჯინჭარაძემ საქართველოს ეროვნული ბიბლიოთეკის წიგნის მუზეუმში აფხაზი თავადების ნიკოლოზ და ჩარლზ ჩხოტუების პირადი ნივთების გამოფენა დაათვალიერა.

ღონისძიებაზე მთავრობის თავმჯდომარემ და ეროვნულ ბიბლიოთეკის გენერალურმა დირექტორმა კონსტანტინე გამსახურდიამ ჩხოტუების მოღვაწეობის შესახებ ისაუბრეს და შერიგების პროცესში ქართულ-აფხაზური კულტურული დიალოგის მნიშვნელობაზე გაამახვილეს ყურადღება.

„იმ პირობებში, როდესაც მიდის ისტორიის გაყალბების მცდელობა, უმნიშვნელოვანესია ჩხოტუების არქივის მნიშვნელობა. ეს ფოტომასალა, კულტურული მემკვიდრეობა და გამოცემები ძალიან მნიშვნელოვანია და კიდევ ერთხელ ადასტურებს იმ ისტორიულ კავშირს, რომელიც ჩვენ აფხაზი ხალხის მიმართ გვაქვს და ქართველებისა და აფხაზების საერთო კულტურულ მნიშვნელობაზე აკეთებს აქცენტს.

ასევე მინდა აღვნიშნო, რომ აფხაზეთის მთავრობის მკვლევრები აქტიურად მუშაობენ მსგავსი ისტორიის წინ წამოწევაზე და პოპულარიზაციაზე, რაც კიდევ ერთხელ ხაზს უსვამს ნდობის აღდგენისა და ერთიანობის სურვილს, რომელიც აფხაზებსა და ქართველებს შორის წლების მანძილზე არსებობდა“, - განაცხადა გიორგი ჯინჭარაძემ.

ღონისძიების ფარგლებში აფხაზეთის ავტონომიური რესპუბლიკის განათლებისა და კულტურის სამინისტროსა და საქართველოს ეროვნულ ბიბლიოთეკას შორის ურთიერთთანამშრომლობის მემორანდუმი გაფორმდა, რომელიც ერთობლივი პროექტების განხორციელების შესაძლებლობას ითვალისწინებს.

აფხაზი თავადების საარქივო მასალების საქართველოში ჩამოტანა, 2024 წელს აფხაზეთის ავტონომიური რესპუბლიკის მთავრობის, საქართველოს ეროვნული ბიბლიოთეკისა და საზოგადოებრივი მაუწყებლის ერთობლივი ორგანიზებით, პროექტის „აფხაზური არქივები“ ფარგლებში განხორციელდა.

მარჯანიშვილის თეატრის სხვენზე სოხუმის გიორგი რატიანის სახელობის მოზარდ მაყურებელთა თეატრის სპექტაკლი „ზღვის თეატრი“ დაიდგა, რომელსაც აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე დაესწრო.

რეჟისორ ალექსანდრე ელოშვილის წარმოდგენა თეატრის მნიშვნელობასა და შემოქმედებითი თავისუფლებისთვის ბრძოლას ეხება. სპექტაკლი დროებით დევნილობაში მყოფ, ენთუზიაზმით სავსე ახალგაზრდების ისტორიაზე მოგვითხრობს, რომელთაც ქალაქში ახალი თეატრის გახსნას სურთ.

სპექტაკლს აფხაზეთის ავტონომიური რესპუბლიკის განათლებისა და კულტურის მინისტრი ბექა ღვაჩლიანი, აფხაზეთის ფინანსთა და ეკონომიკის მინისტრი თენგიზ ნასარიძე, აფხაზეთის უმაღლესი საბჭოს დეპუტატები და აფხაზეთის მთავრობის წარმომადგენლები ესწრებოდნენ.

აფხაზეთის ომის დროს, ტამიშთან მომხდარი ბრძოლიდან 32 წელი გავიდა. ამ დღესთან დაკავშირებით აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძემ, აფხაზეთის უმაღლესი საბჭოს თავმჯდომარე ჯემალ გამახარიასთან და ვეტერანების საქმეთა სახელმწიფო სამსახურის დირექტორ კობა კობალაძესთან ერთად, საქართველოს ერთიანობისთვის ბრძოლაში დაღუპული გმირების ხსოვნას პატივი მიაგო და გმირთა მემორიალი გვირგვინით შეამკო.

„ტამიშის ბრძოლა საქართველოს უახლეს ისტორიაში ერთ-ერთი უმნიშვნელოვანესი მოვლენაა, ეს მაგალითია ჩვენი ახალგაზრდებისთვის. ჩვენმა გმირებმა საქართველოს ერთიანობისთვის გაწირეს ყველაზე ძვირფასი საკუთარი სიცოცხლე.

დარწმუნებული ვარ, რომ ის იდეა, რომლის გამოც ეს ადამიანები ჩვენს სამშობლოს შეეწირნენ აუცილებლად იქნება აღსრულებული და საქართველო იქნება ერთიანი“, - განაცხადა გიორგი ჯინჭარაძემ.

მემორიალთან ასევე აფხაზეთის მთავრობის წევრები, უმაღლესი საბჭოს დეპუტატები, ვეტერანების საქმეთა სახელმწიფო სამსახურისა და აფხაზეთის მეომართა კავშირის წარმომადგენლები იმყოფებოდნენ.

1993 წლის 2 ივლისს, დაბა ტამიშთან აფხაზურმა მხარემ რუსეთის სამხედრო ხომალდით საზღვაო დესანტი გადმოსხა. ქართულმა მხარემ რამდენიმედღიანი ბრძოლის შედეგად 300-მდე მებრძოლი დაკარგა. მიუხედავად დიდი დანაკარგისა, ქართველმა ჯარისკაცებმა დესანტის მოგერიება შეძლეს, პოზიციები შეინარჩუნეს და საზღვაო დესანტი მთლიანად გაანადგურეს.

აფხაზეთის ავტონომიური რესპუბლიკის მთავრობის შემადგენლობაში ცვლილება განხორციელდა. აფხაზეთის ავტონომიური რესპუბლიკის მთავრობის თავმჯდომარემ აფხაზეთის ფინანსთა და ეკონომიკის მინისტრად თენგიზ ნასარიძე წარადგინა.

თენგიზ ნასარიძე ქალაქ სოხუმში დაიბადა. განათლება მიღებული აქვს სამართალმცოდნეობის მიმართულებით. სწავლობდა ჯორჯ ვაშინგტონის უნივერსიტეტის ბიზნესის სკოლაში. მას საჯარო და კერძო სექტორში მუშაობის მრავალწლიანი გამოცდილება აქვს. სხვადასხვა დროს იკავებდა საქართველოს გარემოს დაცვისა და სოფლის მეურნეობის მინისტრის მოადგილისა და „საქართველოს მელიორაციის“ გენერალური დირექტორის თანამდებობებს.

თენგიზ ნასარიძემ აღნიშნულ თანამდებობაზე ლაშა დოლბაძე შეცვალა.

დღესვე მთავრობის თავმჯდომარემ ახლად დანიშნული მინისტრი სამინისტროს თანამშრომლებს წარუდგინა და სამომავლო გეგმებზე ისაუბრა.

აფხაზეთის ავტონომიური რესპუბლიკის განათლებისა და კულტურის სამინისტროს ორგანიზებით, საქართველოს ეროვნულ ბიბლიოთეკაში, ჟურნალ „რიწის“ 50-ე წლის საიუბილეო ნომრის პრეზენტაცია გაიმართა, რომელსაც აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე დაესწრო.

ჟურნალი „რიწა“ 1975 წლიდან გამოიცემა, თავდაპირველად სოხუმში, ხოლო შემდეგ დევნილობაში განაგრძო არსებობა. განახლებული გამოცემა ორენოვანია და მასში შესულია აფხაზეთელი პოეტებისა და მწერლების ნამუშევრები ქართულ და აფხაზურ ენებზე.

ღონისძიების ფარგლებში აფხაზეთის კულტურის, სპორტის და ახალგაზრდულ საქმეთა სააგენტოს პროექტის „მე, აფხაზეთისთვის“ ნომინანტების დაჯილდოება გაიმართა.

2025 წლის წარმატებული აფხაზეთელები სიმბოლური საჩუქრებით აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძემ, აფხაზეთის განათლებისა და კულტურის მინისტრმა ბექა ღვაჩლიანმა და აფხაზეთის უმაღლესი საბჭოს თავმჯდომარის პირველმა მოადგილემ თამაზ ხუბუამ დააჯილდოვეს.

მიმდინარე წლის ნომინანტები გახდნენ:

• გურამ ოდიშარია - ქართველი პოეტი, მწერალი, დრამატურგი, საზოგადო მოღვაწე, ათზე მეტი ეროვნული და საერთაშორისო პრემიის ლაურეატი;
• ილია თოფურია - აფხაზეთიდან დევნილი ქართველი სპორტსმენი, UFC-ის ჩემპიონი;
• ბაჩანა ჭანტურია - ქორეოგრაფი, აფხაზეთის სიმღერისა და ცეკვის სახელმწიფო აკადემიური ანსამბლი „აფხაზეთის“ სამხატვრო ხელმძღვანელი;
• გიორგი ეთერია - სოხუმში დაბადებული მხატვარ-მოქანდაკე;
• ელენე მიქაბერიძე - აფხაზი რეჟისორი; 
• დაურ ბუავა - აფხაზი ბლოგერი;
• ანზორ კუდბა - აფხაზი მწერალი, რომანებისა და მოთხრობების კრებულის ავტორი; 
• თორნიკე ჯობავა - ინოვაციების და ტექნოლოგიების სააგენტოს თავმჯდომარის მოადგილე;
• ირინა ხაბურზანია - აფხაზეთიდან დევნილი ფეხბურთელი; 
• სოფო ფანცულაია - სოხუმელი ბალერინა;
• მურმან (მურო) გაგოშიძე - ნაციონალურ ბალეტ „სუხიშვილების“ სოლისტი და ქორეოგრაფი.

პროექტი „მე, აფხაზეთისთვის“ ყოველწლიურ სახეს ატარებს, რომლის მიზანია საზოგადოებამ გაიცნოს სხვადასხვა სფეროში მოღვაწე, წარმატებული ადამიანები აფხაზეთიდან.

ღონისძიებას აფხაზეთის ავტონომიური რესპუბლიკის მთავრობის წევრები, აფხაზეთის უმაღლესი საბჭოს დეპუტატები და დევნილი საზოგადოების წარმომადგენლები ესწრებოდნენ.