აფხაზეთის ავტონომიური რესპუბლიკის განათლებისა და კულტურის მინისტრმა გიორგი ძაძამიამ სამინისტროს მიერ 2025 წელს გაწეული საქმიანობის ანგარიში წარადგინა და შედეგები შეაჯამა.
მოხსენებაში მინისტრმა განსაკუთრებული ყურადღება უწყების მიერ განხორციელებულ კულტურულ-საგანმანათლებლო პროექტებზე, ასევე საანგარიშო პერიოდში სამინისტროს მიღწევებსა და შედეგებზე გაამახვილა. გიორგი ძაძამიამ ასევე აფხაზეთის განათლებისა და კულტურის სამინისტროს მიერ მიმდინარე წელს განსახორციელებელ პროგრამებსა და პროექტებზე ისაუბრა.
მინისტრის მოხსენების შემდეგ, ღონისძიებაზე მისასალმებელი სიტყვით აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე წარდგა. მთავრობის თავმჯდომარემ სამინისტროს საქმიანობის ანგარიში დადებითად შეაფასა და სამინისტროს პროგრამებში ახალგაზრდების როლის გაძლიერებასა და განათლების მიმართულებით დაგეგმილ სიახლეებზე ისაუბრა.
ღონისძიების ბოლოს აფხაზეთის განათლებისა და კულტურის სამინისტროს მხარდამჭერი ორგანიზაციებისა და აფხაზეთის შემოქმედებითი კოლექტივების ხელმძღვანელები დაჯილდოვდნენ.
ანგარიშს საქართველოს პარლამენტის თავმჯდომარის პირველი მოადგილე გიორგი ვოლსკი, საკანონმდებლო და აღმასრულებელი ხელისუფლების წარმომადგენლები, აფხაზეთის მთავრობის წევრები, უმაღლესი საბჭოს დეპუტატები, საქართველოს ეროვნული ბიბლიოთეკის და დევნილი საზოგადოების წარმომადგენლები ესწრებოდნენ.