სასტუმრო „ბილტმორში“ რელიგიის საკითხთა სახელმწიფო სააგენტოს 2018-2019 წლების ანგარიშის და ფოტოალბომის „რწმენა თავისუფლების აქტია“ პრეზენტაცია გაიმართა.

პრეზენტაციას აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე, იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრი დავით ფაცაცია, აფხაზეთის ავტონომიური რესპუბლიკის მთავრობის ა(ა)იპ სულიერების ცენტრის დირექტორი ბესიკ სილაგაძე, საქართველოს აღმასრულებელი და საკანონმდებლო ხელისუფლების და საქართველოში მოქმედი რელიგიური  კონფესიების წარმომადგენლები ესწრებოდნენ.

სტუმრებს ანგარიში  რელიგიის საკითხთა სახელმწიფო სააგენტოს თავმჯდომარე ზაზა ვაშაყმაძემ წარუდგინა. მან იმ ძირითად ღონისძიებებზე ისაუბრა, რასაც სააგენტო ქვეყანაში რელიგიის თავისუფლების, შემწყნარებლური გარემოს განმტკიცებისთვის ახორციელებს. განსაკუთრებული ყურადღება გაამახვილა ოკუპირებულ ტერიტორიებზე, სადაც მუდმივად ირღვევა ადგილობრივი მოსახლეობის უფლებები რელიგიის, გამოხატვის, გადაადგილების თავისუფლების კუთხით. ასევე, მან ქართული ტაძრების თვითნებური გადაკეთების და დაზიანების ტენდენციებზე ისაუბრა. სააგენტოს თავმჯდომარე  2018-2019 წლების საანგარიშო პერიოდში რელიგიის საკითხთა სახელმწიფო სააგენტოს მიერ განხორციელებულ უმნიშვნელოვანეს პროექტებს შეეხო.

ღონისძიების ფარგლებში მოეწყო ფოტოალბომის პრეზენტაცია, სადაც ასევე წარმოდგენილი იყო რელიგიური ლიტერატურა, შესამოსელი და სარიტუალო ინვენტარი, პუბლიკაციები რელიგიის თავისუფლების, რელიგიებისა და სახელმწიფოს ურთიერთობის თემატიკაზე.