საქართველოს პარლამენტის ეროვნულ ბიბლიოთეკაში კრებულის „ლიტერატურა და ხელოვნება - აფხაზეთი" პრეზენტაცია გაიმართა. „20 წლის შემდეგ", ასე ერქვა პროექტს, რომელიც აფხაზეთის ავტონომიური რესპუბლიკის განათლებისა და კულტურის სამინისტრომ განახორციელა და მის ფარგლებში გამოიცა კრებული - „ლიტერატურა და ხელოვნება - აფხაზეთი".
კრებული თავს უყრის აფხაზეთის მკვიდრ სხვადასხვა თაობის ლიტერატორებსა და ხელოვანებს, აფხაზეთის შემოქმედებით კოლექტივებს და მკითხველს მათ მიერ დევნილობის მძიმე წლებში ქვეყნის შიგნით თუ მის ფარგლებს გარეთ განვლილ გზას და მათ შემოქმედებით ცხოვრებაზე, წარმატებებზე მოუთხრობს. წიგნი აფხაზეთის ავტონომიური რესპუბლიკის მთავრობის ეგიდით გამოიცა.
პრეზენტაციას ესწრებოდნენ აფხაზეთის ავტონომიური რესპუბლიკის უმაღლესი საბჭოს თავმჯდომარე გია გვაზავა, აფხაზეთის ავტონომიური რესპუბლიკის უმაღლესი საბჭოს დეპუტატები, აფხაზეთის ავტონომიური რესპუბლიკის მთავრობის წევრები, ქართული კულტურისა და საგანმანათლებლო სექტორის წარმომადგენლები.
