ქალაქ სენაკში საქართველოს ეროვნული გმირის, ჟიული შარტავას დაბადების დღე სევდითა და სიამაყის გრძნობით აღნიშნეს. ჟიული შარტავა ქ. სენაკში 1944 წლის 7 მარტს დაიბადა. იგი აფხაზეთის ომის დროს აფხაზეთის ავტონომიური რესპუბლიკის მინისტრთა საბჭოსა და თავდაცვის საბჭოს თავმჯდომარე იყო. ჟიული შარტავამ ბოლომდე არ დატოვა ქ. სოხუმი, ქალაქის მოსახლეობა, მთავრობის სახლი და უთანასწორო ბრძოლაში თანამებრძოლებთან ერთად გმირულად დაიღუპა.
აფხაზეთის ავტონომიური რესპუბლიკის მთავრობამ და სენაკის მუნიციპალიტეტის ხელისუფლებამ ჟიული შარტავას ბიუსტი გვირგვინით შეამკეს. შემდეგ ეწვივნენ ჟიული შარტავას სახელობის მუზეუმს, სადაც აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ ჟიული შარტავა და მისი გმირობის ამბები გაიხსენა.
გმირის ხსოვნისადმი მიძღვნილ ღონისძიებებს აფხაზეთის ა/რ განათლებისა და კულტურის მინისტრი მანანა ქვაჩახია, აფხაზეთის განათლებისა და კულტურის მინისტრის მოადგილე ჯაბა ჯაიანი, სენაკის მუნიციპალიტეტის მერი ლევან კუპრეიშვილი, სამეგრელო-ზემო სვანეთის რეგიონში აფხაზეთის ავტონომიური რესპუბლიკის წარმომადგენლობის ხელმძღვანელი ალექსანდრე ჩიკვაიძე, ჟიული შარტავას მეგობრები და თანაკლასელები ესწრებოდნენ.
სენაკის ჟიული შარტავას სახელობის მე-7 საჯარო სკოლის მოსწავლეებმა ეროვნული გმირისადმი მიძღვნილი ლექსები წაიკითხეს.
