საქართველოს ეროვნულ ბიბლიოთეკაში პედაგოგიკის მეცნიერებათა დოქტორის, დალი ჭედიას ალბომის ,,აფხაზ-ქართველთა ფოტომატინე" პრეზენტაცია გაიმართა. ღონისძიებას აფხაზეთის ავტონომიური რესპუბლიკის განათლებისა და კულტურის მინისტრი გიორგი ძაძამია დაესწრო.

პრეზენტაციაზე დამსწრე საზოგადოებას სიტყვით აფხაზეთის ავტონომიური რესპუბლიკის მთავრობის თავმჯდომარემ, გიორგი ჯინჭარაძემ, პარლამენტის თავმჯდომარის პირველმა მოადგილემ, გიორგი ვოლსკიმ და ეროვნული ბიბლიოთეკის ხელმძღვანელმა, კონსტანტინე გამსახურდიამ მიმართეს.

ალბომი საქართველოს კულტურის სამინისტროს მხარდაჭერით გამოიცა და მასში ქართული და ქართულ-აფხაზური ოჯახების არქივებიდან 200-ზე მეტი უნიკალური ფოტოა შესული. ნაშრომი XIX-XX საუკუნეების ქართულ-აფხაზური ურთიერთობების შესახებ მნიშვნელოვან ფოტოდოკუმენტურ კრებულს წარმოადგენს.

ღონისძიება მუსიკალურად აფხაზეთის სიმღერისა და ცეკვის სახელმწიფო აკადემიურმა ანსამბლმა ,,აფხაზეთმა" გააფორმა. პრეზენტაციას აფხაზეთის ავტონომიური რესპუბლიკის უმაღლესი საბჭოს თავმჯდომარის მოადგილე ვახტანგ ყოლბაია, ქართველი მწერლები, ხელოვანები და სხვა მოწვეული სტუმრები ესწრებოდნენ.