2026-10-30 |
ჯანმრთელობისა და სოციალური დაცვის სამინისტრო
„სამედიცინო ცენტრ აფხაზეთში“ უფასო სკრინინგის აქცია გაიმართა
„ვარდისფერი ოქტომბრის“ გლობალურ კამპანიას „სამედიცინო ცენტრი აფხაზეთი” შეუერთდა და აფხაზეთიდან დევნილი ქალებისთვის უფასო სკრინინგის აქცია გამართა.
სამედიცინო ცენტრის გლდანის ფილიალში პაციენტებს საშუალება ჰქონდათ ჩაეტარებინათ ძუძუსა და საშვილოსნოს ყელის კიბოს სკრინინგი. აქციით 50-მდე ქალმა ისარგებლა. ღონისძიების ფარგლებში ბენეფიციარებს უფასო მედიკამენტები გადაეცათ.
სკრინინგის აქციას „სამედიცინო ცენტრი აფხაზეთის“ გენერალური დირექტორი ნათია ფარცვანია და ქართული ოცნების ქალთა ორგანიზაციის - აფხაზეთის წარმომადგენელი ირმა ირემაძე ესწრებოდნენ.
აღსანიშნავია, რომ უფასო სკრინინგი აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტროს, „სამედიცინო ცენტრ აფხაზეთისა“ და ქართული ოცნების ქალთა ორგანიზაციის - აფხაზეთის წარმომადგენლობის ერთობლივი ორგანიზებით გაიმართა.
ოქტომბერი ძუძუს კიბოს შესახებ ცნობიერების ამაღლების საერთაშორისო თვეა. კამპანიის მიზანია დაავადების პრევენციის, ადრეული დიაგნოსტიკისა და სკრინინგის მნიშვნელობაზე საზოგადოების ცნობიერების ამაღლება.
