აფხაზეთიდან დროებით დევნილ და აფხაზეთის ოკუპირებულ ტერიტორიაზე მცხოვრებ ორსულებს ღუდუშაურის სამედიცინო ცენტრში პირველი კონსულტაცია უფასოდ გაეწევათ. ასევე ბენეფიციარები "მშობელთა სკოლაში" უფასოდ ჩაერთვებიან.

აღნიშნულ საკითხებთან დაკავშირებით აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტროსა და აკადემიკოს ოთარ ღუდუშაურის სახელობის ეროვნულ სამედიცინო ცენტრს შორის ურთიერთთანამშრომლობის მემორანდუმი გაფორმდა.

დოკუმენტს ხელი აფხაზეთის ავტონომიური რესპუბლიკის ჯანმრთელობისა და სოციალური დაცვის მინისტრმა ლაშა ქარდავამ და სამედიცინო ცენტრის გენერალურმა დირექტორმა მარინა გელანტიამ მოაწერეს.

ღონისძიების ფარგლებში მინისტრი სამედიცინო პერსონალს პირადად შეხვდა და მათ სამუშაო პროცესს გაეცნო.

აფხაზეთის ავტონომიური რესპუბლიკის უმაღლეს საბჭოში ინტერპელაციის წესით აფხაზეთის ჯანმრთელობისა და სოციალური დაცვის მინისტრს ლაშა ქარდავას მოუსმინეს.

მინისტრმა პასუხი გასცა უმაღლესი საბჭოს წევრების წერილობით შეკითხვებს. მოხსენების ფარგლებში ისაუბრა ჯანდაცვის სფეროში არსებულ გამოწვევებზე, დროებით დევნილებისა და ოკუპირებულ ტერიტორიაზე მცხოვრები პირებისთვის ხარისხიანი სამედიცინო სერვისების მიწოდებაზე, ასევე ამ მიმართულებით არსებულ საჭიროებებსა და პრობლემებზე.

სხდომის ბოლოს უმაღლესი საბჭოს თავმჯდომარე, ჯემალ გამახარიამ აუდიტორიას მიმართა და ასევე მადლობა გადაუხადა მინისტრს წარმოდგენილი ინფორმაციისთვის.

აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტროს ორგანიზებით, სენაკში, ხობსა და აბაშაში მცხოვრებ აფხაზეთიდან დროებით დევნილ მოსახლეობას სენაკის სამედიცინო ცენტრ “დიომედში” მრავალპროფილური სკრინინგული გამოკვლევები ჩაუტარდა.

100-ზე მეტ ბენეფიციარს 10-მდე სხვადასხვა პროფილის, თბილისის წამყვანი კლინიკების, მაღალკვალიფიციური ექიმ სპეციალისტის კონსულტაცია და სხვადასხვა დიაგნოსტიკური კვლევები უფასოდ ჩაუტარდა, ასევე ექიმის დანიშნულების შესაბამისად საჭირო მედიკამენტები უსასყიდლოდ გადაეცა.

ღონისძიების ფარგლებში ხობსა და აბაშაში მცხოვრები აფხაზეთიდან დროებით დევნილი ბენეფიციარების ტრანსპორტირება ადგილობრივმა მუნიციპილატიტეტებმა უზრუნველყო.

აქციის მიმდინარეობას აფხაზეთის ჯანდაცვის მინისტრი ლაშა ქარდავა, სამედიცინო ცენტრ “დიომედის” გენერალური დირექტორი ნათია ფარცვანია, სენაკის მუნიციპალიტეტის მერის მოადგილე ნანა ზარანდია, სამინისტროსა და აფხაზეთის მთავრობის აპარატის წარმომადგენლები და სამედიცინო ცენტრის თანამშრომლები ესწრებოდნენ.

სამედიცინო ცენტრ "დიომედის“ გენერალური დირექტორი ნათია ფარცვანია სამუშაო ვიზიტით დასავლეთ საქართველოში იმყოფებოდა, სადაც ადგილობრივ სამედიცინო დაწესებულებებში დასაქმებულ სამედიცინო პერსონალს შეხვდა.

ვიზიტის ფარგლებში პოლიკლინიკების თანამშრომლებთან სამუშაო და გაცნობითი შეხვედრები გაიმართა.

შეხვედრებზე განსაკუთრებული ყურადღება გამახვილდა პოლიკლინიკების სამომავლო განვითარების გეგმებზე, მათ შორის, დევნილი მოსახლეობისთვის პირველადი ამბულატორიული სერვისების ხელმისაწვდომობის უზრუნველყოფაზე, სამედიცინო მომსახურების ხარისხის გაუმჯობესებასა და ინფრასტრუქტურული პროექტების განვითარების აუცილებლობაზე.

ღონისძიებას აფხაზეთის ავტონომიური რესპუბლიკის ჯანმრთელობისა და სოციალური დაცვის მინისტრის პირველი მოადგილე მერაბ მარაქველიძე, აფხაზეთის ფინანსთა და ეკონომიკის მინისტრი ლაშა დოლბაძე და სამედიცინო ცენტრ „დიომედის“ წარმომადგენლები ესწრებოდნენ.

აფხაზეთის ავტონომიური რესპუბლიკის ჯანმრთელობისა და სოციალური დაცვის მინისტრი ლაშა ქარდავა, აფხაზეთის ავტონომიური რესპუბლიკის მთავრობის აპარატის წარმომადგენელ გიორგი დათუაშვილთან ერთად, თბილისში, კომპაქტური განსახლების ადგილზე მცხოვრებ აფხაზეთიდან დროებით დევნილ მოსახლეობას შეხვდა.

„განსაკუთრებით მნიშვნელოვანია დღესასწაულების პერიოდში ჩვენი დროებით დევნილი მოსახლეობის მხარდაჭერა. აფხაზეთის ავტონომიური რესპუბლიკის მთავრობის თავმჯდომარის გადაწყვეტილებითა და ჩვენი ჩართულობით აქტიურად მიმდინარეობს სააღდგომო ნობათების გადაცემა სოციალურად დაუცველ ჯგუფებზე”- განაცხადა ლაშა ქარდავამ.

აფხაზეთის ავტონომიური რესპუბლიკის მთავრობის ორგანიზებით და ქალაქ თბილისის მერიის მხადაჭერით, აღდგომის დღესასწაულთან დაკავშირებით, წელს, მთელი ქვეყნის მასშტაბით, სადღესასწაულო ნობათი აფხაზეთიდან დროებით დევნილ, მოწყვლადი კატეგორიის 1000-მდე ოჯახს გადაეცა. დარიგების პროცესში აქტიურად იყვნენ ჩართული აფხაზეთის მთავრობის წევრები, მთავრობის აპარატისა და სამინისტროების წარმომადგენლები.

აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტროსა და საქველმოქმედო ორგანიზაცია „ილია მართალის საზოგადოებას“ შორის ურთიერთთანამშრომლობის მემორანდუმი გაფორმდა, რომელსაც ხელი ჯანდაცვის მინისტრმა ლაშა ქარდავამ და ორგანიზაციის დირექტორმა მარიამ მჭედლიანმა მოაწერეს.

მემორანდუმი ითვალისწინებს განსაკუთრებული საჭიროებების მქონე აფხაზეთიდან დროებით დევნილი 9-დან 14 წლამდე ბავშვებისთვის სხვადასხვა სახის გადასაადგილებელი საშუალებებით და სამედიცინო ინვენტარით დახმარებას.

შეხვედრას მინისტრის მრჩეველი მეგი ჯაში და „საზოგადოება ილია მართალის“ დამფუძნებელი ბესიკ მარგიანი ესწრებოდნენ.

აფხაზეთის ავტონომიური რესპუბლიკის ჯანმრთელობისა და სოციალური დაცვის მინისტრმა ლაშა ქარდავამ, სამინისტროს დაქვემდებარებაში არსებული სამედიცინო ცენტრ “დიომედის” გენერალური დირექტორის პოზიციაზე ნათია ფარცვანია წარადგინა.

ნათია ფარცვანიას განათლება მიღებული აქვს ბიზნესტექნოლოგიების მიმართულებით.

მას ჯანდაცვის სექტორში ხელმძღვანელ თანამდებობებზე მუშაობის მრავალწლიანი გამოცდილება აქვს. ბოლო პერიოდში ის იაშვილის ბავშვთა კლინიკაში პერსონალის მართვის და ადმინისტრირების განყოფილების უფროსის პოსტს იკავებდა.

ნათია ფარცვანიამ გენერალური დირექტორის თანამდებობაზე ნინო დოხნაძე შეცვალა.

ლაშა ქარდავამ სამედიცინო ცენტრ “დიომედის” ყოფილ გენერალურ დირექტორ ნინო დოხნაძეს გაწეული საქმიანობისთვის მადლობა გადაუხადა და წარმატებები უსურვა.

აფხაზეთის ავტონომიური რესპუბლიკის მთავრობის მხარდაჭერით და ჯანმრთელობისა და სოციალური დაცვის სამინისტროს ორგანიზებით ჩაფიძის გულის ცენტრში დროებით დევნილ პირებს უფასო სამედიცინო გამოკვლევები ჩაუტარდათ.

ყურადღება გამახვილდა ქრონიკული სისხლის მიმოქცევის დაავადების მქონე პაციენტებზე, რომლებსაც სრული კარდიოლოგიური გამოკვლევა ჩაუტარდათ.

მაღალი მოთხოვნიდან გამომდინარე სამინისტროს ორგანიზებით აფხაზეთიდან დროებით დევნილებისთვის აქტიურად გაგრძელდება მსგავსი აქციები.

ღონისძიების მიმდინარეობას აფხაზეთის ავტონომიური რესპუბლიკის ჯანმრთელობისა და სოციალური დაცვის მინისტრი ლაშა ქარდავა, პოლიტიკის დეპარტამენტის უფროსი ლელა დუნდუა და სამინისტროს თანამშრომლები ესწრებოდნენ.

აფხაზეთის ავტონომიური რესპუბლიკის მთავრობის მხარდაჭერით და აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტროს ორგანიზებით დაუნის სინდრომის მსოფლიო დღესთან დაკავშირებით სამინისტროს პროგრამებში ჩართულ ბავშვებთან და მათ მშობლებთან შეხვედრა გაიმართა.

შეხვედრის მონაწილეებმა არსებული საჭიროებები და სამინისტროში მოქმედი პროგრამები განიხილეს.

შეხვედრის ფარგლებში აფხაზეთის ჯანდაცვის მინისტრმა ლაშა ქარდავამ ბავშვებს თანამშრომლებთან ერთად საჩუქრები გადასცა. ასევე მინისტრმა მადლობა გადაუხადა ყველა მხარდამჭერ კომპანიას.