ძვირფასო მეგობრებო!
გილოცავთ 26 მაისს, საქართველოს დამოუკიდებლობის დღეს, ჩვენი ქვეყნის უმთავრეს ეროვნულ დღესასწაულს!
ჩვენი დიდი წინაპრების თავგანწირულმა საუკუნოვანმა ბრძოლამ თავისუფლებისა და დამოუკიდებლობისათვის, როგორც იქნა, შედეგი გამოიღო და ასრულდა ყველა ქართველის ოცნება - საქართველო დამოუკიდებელი გახდა!
ამ უდიდესი მნიშვნელობის მოვლენას ჩვენი ქვეყნის ისტორიაში 1918 წლის 26 მაისს მიღებულმა საქართველოს დამოუკიდებლობის აქტმა დაუდო საფუძველი, რასაც მოჰყვა უმთავრესი რამ - საკუთარი ტერიტორიების შემომტკიცება და საერთაშორისო აღიარების მოპოვება. უნდა ითქვას, რომ მაშინ ამ დოკუმენტს ხელს აწერდა აფხაზეთის სახალხო საბჭოს ხუთი წევრი: არზაყან (დიმიტრი) ემუხვარი, ვარლამ შარვაშიძე, ვასილ ღურჯუა, ი. ფაშალიდი, ბ. ზახაროვი.
ამიტომაც, მინდა, ეს დღესასწაული - ჩვენ, აფხაზ და ოს თანამოქალაქეებს, კვლავაც გვაერთიანებდეს და საერთო სამშობლოს დამოუკიდებლობის დღის მილოცვაც ყველას გვეკუთვნოდეს!
გილოცავთ, მეგობრებო, და ვისურვებ, რომ ამ დღესასწაულს სულ მალე საქართველოს ტერიტორიული მთლიანობის განცდაც დაბრუნებოდეს!