1918 წლის 26 მაისს საქართველომ დამოუკიდებლობა გამოაცხადა. პირველმა დემოკრატიულმა რესპუბლიკამ, მხოლოდ სამ წელს იარსება და 1921 წლის 25 თებერვალს გასაბჭოების შემდეგ არსებობა შეწყვიტა, მაგრამ არ განელებულა ქართველთა ბრძოლა საქართველოს დამოუკიდებლობისთვის. 70 წლიანი ოკუპაციის შემდეგ 1991 წელს 9 აპრილს საქართველომ კვლავ აღიდგინა დამოუკიდებლობა, მაგრამ დამოუკიდებლობა სრულყოფილი ვერ იქნება, სანამ საქართველოს ტერიტორიის ნაწილი კვლავ ოკუპირებულია.
მჯერა, რომ ისტორიული კანონზომიერება სრულად აღდგება. ჩვენი მშვიდობიანი პოლიტიკით და სახელმწიფოს გაძლიერებით, შევძლებთ საქართველოს გაერთიანებას და ჩვენ აფხაზ და ოს თანამოქალაქეებთან ერთად დავიმკვიდრებთ ღირსეულ ადგილს ცივილიზებულ სამყაროში.
გილოცავთ საქართველოს დამოუკიდებლობის დღეს. ღმერთმა დალოცოს საქართველო!