ქალთა გუნდ „დინამო“ სოხუმმა საქართველოს ქალთა უმაღლესი ლიგის 2020 წლის სეზონზე პირველი მატჩი გამართა. მან ახმეტის „თუშეთს“ 8:0 მოუგო და 14-გუნდიან ცხრილში მოწინავეთა შორის აღმოჩნდა. ქალთა გუნდი „დინამო“ სოხუმი ახლახან აფხაზეთის ფეხბურთის ფედერაციის ორგანიზებით შეიქმნა.
მატჩის დაწყებამდე „დინამო“ სოხუმის წევრები ახალგაზრდა ფეხბურთელების - ნინო გურგენიძისა და გიორგი შაქარაშვილის ხსოვნის პატივსაცემად მინდორზე მათი გამოსახულებიანი მაისურებით გამოვიდნენ.
საფეხბურთო მატჩს აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე დაესწრო. მან „დინამო“ სოხუმის ქალთა გუნდს პირველი გამარჯვება მიულოცა და შემდგომი წარმატებები უსურვა. მატჩს ასევე ესწრებოდა აფხაზეთის ავტონომიური რესპუბლიკის განათლებისა და კულტურის სამინისტროს სპორტისა და ახალგაზრდულ საქმეთა სამსახურის უფროსი ვიტალი ბენდელიანი.
