აფხაზეთის ავტონომიური რესპუბლიკის განათლებისა და კულტურის სამინისტრომ აფხაზეთის დღისადმი მიძღვნილი კვირეული მზიურის ამფითეატრში ფოტოგამოფენით „კადრები აფხაზეთიდან“ გახსნა.
კადრებზე ომამდელი აფხაზეთის ულამაზესი პეიზაჟები, სოხუმის, გაგრის, ბიჭვინთის, ოჩამჩირის, გალისა და და სხვა ქალაქების ცხოვრების, ქართულ-აფხაზური ურთიერთობების ამსახველი ეპიზოდებია აღბეჭდილი.
ფოტოგამოფენას აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი ეკატერინე ტიკარაძე, აფხაზეთის ა/რ უმაღლესი საბჭოს თავმჯდომარე ჯემალ გამახარია, აფხაზეთის ა/რ განათლებისა და კულტურის მინისტრი ეკა ხოფერია, დევნილთა, ეკომიგრანტთა და საარსებო წყაროებით უზრუნველყოფის სააგენტოს დირექტორი ბესარიონ სიმონიშვილი, აფხაზეთის კულტურის, სპორტის და ახალგაზრდულ საქმეთა სააგენტოს დირექტორი ლიკა კვარაცხელია, აფხაზეთის ა/რ მთავრობის წევრები, აფხაზეთის უმაღლესი საბჭოს დეპუტატები და მოწვეული სტუმრები ესწრებოდნენ.
აქვე გაიმართა კონცერტი აფხაზეთის სიმღერისა და ცეკვის სახელმწიფო აკადემიური ანსამბლი „აფხაზეთის“, აფხაზეთის გურამ ყურაშვილის სახელობის საგუნდო კაპელისა და აფხაზეთის გოგონათა ფოლკლორული ანსამბლ „გუმბათის“ მონაწილეობით.
ღონისძიების მხარდამჭერები იყვნენ აფხაზეთის ა/რ მთავრობა და თბილისის მერია.