საგარეო საქმეთა სამინისტროში ევროკავშირის, გაერო-სა და ეუთო-ს თანათავმჯდომარეების მონაწილეობით ჟენევის საერთაშორისო მოლაპარაკებების 51-ე რაუნდის მოსამზადებელი შეხვედრა გაიმართა. შეხვედრას ქართული მხრიდან საგარეო საქმეთა მინისტრის მოადგილე ლაშა დარსალია ხელმძღვანელობდა. შეხვედრაში აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე მონაწილეობდა.

შეხვედრაზე მწვავედ დაისვა პანდემიის პირობებში რუსეთის ფედერაციის მხრიდან გახშირებული პროვოკაციები, მათ შორის ე.წ. ბორდერიზაციის და უკანონო დაკავების შემთხვევები, რაც ადგილზე უსაფრთხოებისა და ჰუმანიტარულ ვითარებას კიდევ უფრო ამწვავებს.
 
მინისტრის მოადგილემ შეშფოთება გამოხატა საოკუპაციო რეჟიმის მიერ 20 ნოემბერს სოფელ ზარდიანთკარის მიმდებარედ დაკავებული მირიან თაზიაშვილის გამო; განსაკუთრებული ყურადღება ასევე გამახვილდა უკანონო პატიმრობაში მყოფ ზაზა გახელაძის, გენადი ბესტაევის და ირაკლი ბებუას საკითხზე. თანათავმჯდომარეებს ეთხოვათ, ყველა ღონეს მიმართონ საქართველოს მოქალაქეების უმოკლეს დროში გათავისუფლებისთვის.
 
საქართველოს დელეგაციის მხრიდან აღინიშნა, რომ ახალგორში მცხოვრები ექიმის, ონისე გათენაშვილის გარდაცვალების ბოლო შემთხვევა კიდევ ერთხელ ნათლად ადასტურებს საოკუპაციო ხაზის ჩაკეტვის შედეგად ცხინვალის რეგიონში შექმნილ მძიმე ჰუმანიტარულ მდგომარეობას, მათ შორის, გადაუდებელ სამედიცინო მომსახურებაზე წვდომის შეზღუდვის თვალსაზრისით. ხაზი გაესვა, რომ ე.წ. გადასასვლელი პუნქტების ხანგრძლივი დახურვის გამო ოკუპირებულ ცხინვალის რეგიონში მცხოვრები მოსახლეობა სრულ იზოლაციაშია მოქცეული, რაც საფრთხეში აგდებს ადგილობრივი მოსახლეობის სიცოცხლეს.
 
ლაშა დარსალიამ განაცხადა, რომ რუსეთის ფედერაცია და მისი საოკუპაციო რეჟიმები სამწუხაროდ აგრძელებენ ადამიანის უფლებების თემით მანიპულირებას და ჰუმანიტარული საკითხების პოლიტიზირებას. თავის მხრივ, თანათავმჯდომარეებმა შეშფოთება გამოთქვეს ბოლოს დროს ადგილზე გართულებული მდგომარეობის გამო და ხაზი გაუსვეს შექმნილი რთული ვითარების გადაჭრის აუცილებლობას.
 
მინისტრის მოადგილემ ხაზი გაუსვა რუსეთის მიერ 2008 წლის 12 აგვისტოს ცეცხლის შეწყვეტის შესახებ შეთანხმების რეგულარულ დარღვევებს, მათ შორის, აფხაზეთისა და ცხინვალის რეგიონებში მიმდინარე უკანონო მილიტარიზაციასა და სამხედრო წვრთნებს. საუბარი შეეხო რუსეთის ფედერაციის მიერ საქართველოს ოკუპირებული ტერიტორიების ფაქტობრივი ანექსიისკენ გადადგმულ ნაბიჯებს.

შეხვედრაზე ასევე განხილულ იქნა ოკუპირებულ ტერიტორიებზე თავისუფლად გადაადგილების შეზღუდვის, მშობლიურ ენაზე განათლების მიღების აკრძალვის და ქართველების ეთნიკური ნიშნით დისკრიმინაციის საკითხები. საქართველოს დელეგაციამ თანათავმჯდომარეებთან შეხვედრაზე კვლავ დააყენა დავით ბაშარულის, გიგა ოთხოზორიასა და არჩილ ტატუნაშვილის მკვლელობის საქმეებზე მართლმსაჯულების აღსრულების აუცილებლობის საკითხი. ამ კონტექსტში ხაზი გაესვა ცხინვალში ინალ ჯაბიევის მკვლელობას, რაც ნათლად ცხადჰყოფს ოკუპირებულ რეგიონებში ადამიანის უფლებების კუთხით არსებულ ურთულეს მდგომარეობას.
 
ლაშა დარსალიამ აღნიშნა, რომ ადგილზე არსებული რთული ვითარება მკაფიოდ წარმოაჩენს ჟენევის მოლაპარაკებების დღის წესრიგის მთავარ თემებზე - ძალის არგამოყენება, ადგილზე უსაფრთხოების საერთაშორისო მექანიზმების შექმნა, ლტოლვილთა და იძულებთ გადაადგილებულ პირთა უსაფრთხო და ღირსეული დაბრუნება, პროგრესის მიღწევის საჭიროებას. საგარეო საქმეთა მინისტრის მოადგილემ განსაკუთრებულად გაუსვა ხაზი რუსეთის ფედერაციის მიერ 2008 წლის 12 აგვისტოს ცეცხლის შეწყვეტის შეთანხმების შესრულების აუცილებლობას, რაც მთავარი წინაპირობაა მდგრადი მშვიდობისა და უსაფრთხოების უზრუნველსაყოფად.
 
არსებული გამოწვევების ფონზე გამოითქვა წუხილი, რომ წლის განმავლობაში ვერ მოხერხდა ჟენევის საერთაშორისო მოლაპარაკებების რაუნდების გამართვა. ოქტომბერში დაგეგმილი მოლაპარაკებების რაუნდის რუსეთის წარმომადგენელთა მიერ ჩაშლის ფონზე, საქართველოს დელეგაციის ხელმძღვანელმა ხაზი გაუსვა ჟენევაში მოლაპარაკებების დეკემბერში ჩატარების კრიტიკულ აუცილებლობას. აქცენტი გაკეთდა ასევე გალში ინციდენტებისა და მათზე რეაგირების მექანიზმების (IPRM) შეხვედრების ყოველგვარი წინაპირობის გარეშე აღდგენის აუცილებლობაზე.

20 ნოემბერს საქართველოს ფინანსთა სამინისტროს სახელმწიფო შიდა კონტროლის დეპარტამენტის (ჰარმონიზაციის ცენტრი) ორგანიზებით გაიმართა ვებინარი თემაზე - „ძირეული მიზიზების ანალიზი".

ვებინარი ჩატარდა ინტერაქტიულ რეჟიმში ვებექსის ონლაინ პლატფორმის გამოყენებით და მასში აფხაზეთის ავტონომიური რესპუბლიკის განათლებისა და კულტურის სამინისტროს შიდა აუდიტის სამსახურის თანამშრომლებიც ჩაერთნენ.

ონლაინ ტრენინგის ფარგლებში განხილულ იქნა ძირეული მიზეზების ანალიზი და მისი გამოყენების ტექნიკები, პრაქტიკული საკითხები, ძირითადი გამოწვევები.

აფხაზეთის ავტონომიური რესპუბლიკის მთავრობის მხარდაჭერით და აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტროს ორგანიზებით, კორონავირუსის შემთხვევათა დროული გამოვლენის და ვირუსის გავრცელების შეკავების მიზნით, ზუგდიდის მუნიციპალიტეტის დევნილთა კომპაქტურ ჩასახლებებში მოსახლეობის COVID-19-ზე სწრაფი ტესტირება და სეზონური გრიპის უფასო ვაქცინაცია ჩატარდა.

აფხაზეთის ჯანმრთელობისა და სოციალური დაცვის სამინისტროს COVID-19-ის წინააღმდეგ ბრძოლის მიზნობრივი პროგრამის ფარგლებში ზუგდიდის მუნიციპალიტეტში იმყოფებოდნენ აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე, ჯანმრთელობისა და სოციალური დაცვის მინისტრი ქეთევან ბაკარაძე, სამეგრელო-ზემო სვანეთის რეგიონის სახელმწიფო რწმუნებულის მოვალეობის შემსრულებელი მალხაზ თორია, ზუგდიდის მუნიციპალიტეტის მერი გიორგი (გეგა) შენგელია და აფხაზეთიდან იძულებით გადაადგილებულ პირთა-დევნილთა სამინისტროს სამეგრელო-ზემო სვანეთის ტერიტორიული ორგანოს ხელმძღვანელი კოტე ბასარია.

ფართომასშტაბიანი და ნებაყოფლობითი, ანტიგენზე დაფუძნებული სწრაფი ტესტირება და სეზონური გრიპის ვაქცინა აფხაზეთიდან იძულებით გადაადგილებულ პირებს ზუგდიდისა და ჯვარის დევნილთა პოლიკლინიკების სამედიცინო ჯგუფებმა გაუკეთეს. აფხაზეთის ჯანმრთელობისა და სოციალური დაცვის სამინისტროს წარმომადგენლებმა მოსახლეობას ვირუსის გამოვლენის შემთხვევაში დაწესებული სავალდებულო იზოლაციის შესახებ ინფორმაცია მიაწოდეს და COVID-19-ის მსუბუქი შემთხვევების სახლის პირობებში მართვის პროტოკოლით გათვალისწინებული რეკომენდაციები გააცნეს. ტესტირების შედეგად გამოვლენილ, კორონავირუსით ინფიცირებულ აფხაზეთიდან დევნილებს, პირბადეები და საჭირო მედიკამენტები გადაეცათ.

COVID-19-ის საპრევენციო ღონისძიებები ზუგდიდის მუნიციპალიტეტის დევნილთა კომპაქტური ჩასახლების სხვადასხვა ლოკაციაზე გუშინ დაიწყო და რამდენიმე დღე გაგრძელდება.

„ტოლერანტობის  საერთაშორისო  დღე,  ერთ-ერთი  გამორჩეული  დღეა  მთელი  კაცობრიობისთვის,  რომელიც  განსაკუთრებით  გვახსენებს  რომ  რასის,    რელიგიური  აღმსარებლობის  თუ   პოლიტიკური  შეხედულებების,  გენდერული  თუ  სხვა სახის განსხვავებულობის  მიუხედავად, ყველას  ზოგადსაკაცობრიო  ჰუმანური  ფასეულობები  გვაერთიანებს  და  ამ  ფასეულობების  იგნორირებით, ადამიანები  ვურთულებთ  ერთმანეთს  არსებობას.

აფხაზეთის ავტონომიური რესპუბლიკის მთავრობა უერთდება მსოფლიო  თანამეგობრობის  მცდელობას, რომ  ყოველი  ჩვენთაგანის  განსხვავებულობა  ვაქციოთ  ერთიანი  საზოგადოების  ძლიერ მხარედ  და  არა  გამყოფ  ფაქტორად.  ჩვენი  საზოგადოების მრავალსაუკუნოვანი ტოლერანტობის  გამოცდილება,  გვაძლევს  რწმენას,  რომ   ღირსეულად  გავუმკლავდებით ამ  გამოწვევასაც  და  უზრუნველვყოფთ  უნიკალური  იდენტობის  შენარჩუნებას,“ - განაცხადა რუსლან აბაშიძემ. 

• ქ.თბილისში, პაიჭაძის ქ. N 1-ში, მდებარე დევნილთა საცხოვრებელ ობიექტში მცირე და გადაუდებელი სახის სარემონტო სამუშაო შესრულდა.
  • შენობის პირველი და მეორე სართულების დერეფნებში ხის ფანჯრების მინები შეიცვალა.
  • სარემონტო სამუშაო, აფხაზეთის ავტონომიური რესპუბლიკის იძულებით გადაადგილებულ პირთა-დევნილთა სამინისტროს დაკვეთით განხორციელდა.
  • დასრულებული სამუშაო აღმოსავლეთ საქართველოს ტერიტორიული ორგანოს ხელმძღვანელის მოადგილემ ვალერი ბედენაშვილმა და რეგიონული განყოფილების უფროსმა ზურაბ ხარაიშვილმა დაათვალიერეს

Covid 19-ის პირობებში, მოცემული რეგულაციების თანახმად აფხაზეთის ავტონომიური რესპუბლიკის იძულებით გადაადგილებულ პირთა-დევნილთა სამინისტროს აღმოსავლეთ საქართველოს ტერიტორიული ორგანოს წვევამდელთა, აღრიცხვის,გაწვევის და მობილიზაციის სამსახურში მიმდინარეობს, სამხედრო სავალდებულო სამსახურში აფხაზეთიდან დევნილ მოქალაქეთა 2020 წლის საშემოდგომო გაწვევისათვის ორგანიზებული ხელშეწყობა.
• აფხაზეთიდან დევნილი წვევამდელები სამხედრო სავალდებულო სამსახურს გაივლიან: საქართველოს თავდაცვის სამინისტროს მოთხოვნის შესაბამისად, საქართველოს თავდაცვის ძალებში.
• საქართველოს იუსტიციის სამინისტროს მოთხოვნის შესაბამისად, საქართველოს იუსტიციის სამინისტროს მმართველობის სფეროში მოქმედ სახელმწიფო საქვეუწყებო დაწესებულებების სპეციალურ პენიტენციურ სამსახურებში.
• საქართველოს შინაგან საქმეთა სამინისტროს მოთხოვნის შესაბამისად, საქართველოს შინაგან საქმეთა სამინისტროში.
• საქართველოს სახელმწიფო დაცვის სპეციალური სამსახურის მოთხოვნის შესაბამისად, საქართველოს სახელმწიფო დაცვის სპეციალურ სამსახურში.
• 18-დან 27 წლამდე ასაკის გასაწვევი აფხაზეთიდან დევნილი მოქალაქეები ვალდებულნი არიან 2020 წლის 26 დეკემბრამდე გამოცხადდნენ, აფხაზეთის ავტონომიური რესპუბლიკის იძულებით გადაადგილებულ პირთა-დევნილთა სამინისტროს აღმოსავლეთ საქართველოს ტერიტორიული ორგანოს წვევამდელთა, აღრიცხვის,გაწვევის და მობილიზაციის სამსახურში.
• საკონტაქტო ტელეფონი: 0322953289, 577245547. ელექტრონული ფოსტა: asto@abkhazia.gov.ge, aphkhazeti@gmail.com. skype მისამართი: აღმოსავლეთ საქართველოს ტერიტორიული ორგანო.

მიმდინარე წლის 13 ნოემბერს, შედგა შეხვედრა - ქ. ქუთაისში, ილია ჭავჭავაძის გამზ. N- 58- მდებარე დევნილთა ჩასახლების ობიექტში. ზემოთ ღნიშნულ მისამართზე მდებარე კორპუსში, სამუსიკო სკოლა 44, დევნილთა რაოდენობა შედგენს 33/116 ოჯახი/სულადობა. ყოფ.სამუსიკო სკოლა 44 (კორპ. ბ), ბმა ოჩამჩირე 2, ოჯახი/სულადობა -32/105. ყოფ.სამუსიკო სკოლა 44 (კორპ. ა) ოჯახი/სულადობა -68/222, ბმა სოხუმი. სამივე კორპუსი პრივატიზებულია და ქუთაისის მუნიციპალიტეტის ბალანსზეა. კორპუსი - სამუსიკო სკოლა 44 - რამდენიმეწლიანი მოთხოვნებისა და განცხადებების შემდეგ (რომელშიც აქტიურად იყო ჩართული ტერიტორიული ორგანო, მანამდე აფხაზეთის ა.რ. მთავრობის წარმომადგენლობა) გამოიცა მთავრობის განკარგულება #2146, 29/10/2020წ, „სახელმწიფო საკუთრებაში არსებული უძრავი ქონების პირდაპირი მიყიდვის ფორმით პრივატიზების შესახებ, სიმბოლურ ფასად, 1 ლარად.

 დევნილთა მოთხოვნები: - ობიექტი არის 3 კორპუსიანი. ეზოში სავალი გზის ნაწილზე დასაგებია ასფალტის საფარი, რომელიც (ჯდება 24 000 ლარამდე). არის შეპირება ქუთაისის მერიიდან, რომ  2021 წლისათვის; - კანალიზაციის  პრობლემა მოგვარდება. ჭიდან ჭამდე არის მილი გამოსაცვლელი. საჭიროა დეტალური ხარჯთააღრიცხვის გაკეთება. ამის შესახებ ასევე აქვთ ზეპირი დაპირება დევნილთა, ეკომიგრანტთა და საარსებო წყაროებით უზრუნველყოფის სააგენტოდან.

 ტერიტორიულ ორგანოში  2020 წელს ობიექტიდან მიღებულია 20 განცხადება, 16 დევნილზე გაცემულია ერთჯერადი მატერიალური დახმარებებები. დანარჩენი კი განიხილება მომდევნო პერიოდში.

 დასახლებაში დევნილებს შეხვდნენ იმერეთის, გურიის, რაჭა - ლეჩხუმისა და ქვემო სვანეთის რეგიონებისა და აჭარის ა.რ. ტერიტორიული ორგანოს ხელმძღვანელი ბესიკ ჭანტურია და დევნილთა სამსახურის უფროსი სპეციალისტი აბესალომ ჩარქსელიანი.

აფხაზეთის ავტონომიური რესპუბლიკის აფხაზეთის ავტონომიური რესპუბლიკიდან იძულებით გადაადგილებულ პირთა- დევნილთა სამინისტროს იმერეთის, გურიის, რაჭა - ლეჩხუმისა და ქვემო სვანეთის რეგიონებისა და აჭარის ავტონომიურ რესპუბლიკის ტერიტორიული ორგანოში ჩატარდა ტერიტორიული ორგანოს აფხაზეთის ავტონომიური რესპუბლიკის ოკუპირებული ტერიტორიიდან იძულებით გადაადგილებულ (დევნილის სტატუსის მაძიებელი) პირთა ფოტოიდენტურობის დადასტურებისა და მუდმივი საცხოვრებელი ადგილის დამდგენი კომისიის სხდომა. სხდომაზე განხილულ იქნა მოქალაქეთა განცხადებები მუდმივი საცხოვრებელი ადგილის დადგენის კუთხით და კომისიის მიერ მიღებულ იქნა შესაბამისი გადაწყვეტილებები.

ქვეყანაში COVID-19-ის წინააღმდეგ ბრძოლისა და წერტილოვანი შეზღუდვების პირობებში, იმერეთის, გურიის, რაჭა - ლეჩხუმისა და ქვემო სვანეთის რეგიონებისა და აჭარის ავტონომიურ რესპუბლიკის ტერიტორიული ორგანო, სამოქმედო რეგიონის ადმინისტრაციულ-ტერიტორიულ ერთეულებში თავისი უფლებამოსილების ფარგლებში უზრუნველყოფს სამინისტროს კომპეტენციას მიკუთვნებული საკითხების განხორციელებას და თანამშრომელთა მონაცვლეობით (მორიგეობითი) სამუშაო რეჟიმში განაგრძობს ტერიტორიული ორგანოსადმი დაკისრებული სამსახურეობრივი უფლებამოსილების განხორცილებას. კერძოდ:

• მუდმივი საცხოვრებელი ადგილისა და/ან ფოტოიდენტურობის დადგენის;
  • აფხაზეთის ავტონომიური რესპუბლიკის ოკუპირებული ტერიტორიიდან იძულებით გადაადგილებულ პირთა – დევნილთა საკუთრებაში/სარგებლობაში გადაცემულ საცხოვრებელ ობიექტებში მცირეფასიანი და გადაუდებელი სარემონტო სახის სამუშაოების ჩატარების;
  • დევნილთა სოციალური დაცვის მიზნით ერთჯერადი დახმარების გაცემის და სხვა სახის დახმარების გაწევის;
  • წვევამდელთა სამხედრო სავალდებულო სამსახურში გაწვევის, რეზერვში ჩარიცხვის;
  • და სხვა მიმართულებებით.
  საკონტაქტო ინფორმაცია:
  ქუთაისი, ირაკლი აბაშიძის 27, მე-3 სართ. საკონტაქტო ტელეფონი (ცხელი ხაზი): 598328432 ელექტრონული ფოსტა: amragovimeri@gmail.com. skype : იმერეთის ტერიტორიული ორგანო

აზერბაიჯანის საელჩოში აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე საქართველოში აზერბაიჯანის რესპუბლიკის საგანგებო და სრულუფლებიან ელჩ ფაიგ გულიევს შეხვდა. შეხვედრა გაცნობით ხასიათს ატარებდა.

შეხვედრაზე მხარეებმა კიდევ ერთხელ დაადასტურეს საქართველოსა და აზერბაიჯანის ტერიტორიული მთლიანობის სრული მხარდაჭერა.

შეეხნენ ბოლო პერიოდში მთიანი ყარაბახის ირგვლივ განვითარებულ მოვლენებს, რომელიც საბოლოოდ რეგიონში მშვიდობის დამყარებით დასრულდა.

რუსლან აბაშიძემ ელჩს ასევე გააცნო ოკუპირებულ აფხაზეთში დღეს არსებული მდგომარეობა.

შეხვედრაზე სხვადასხვა მიმართულებით, მათ შორის კულტურულ-საგანმანათლებლო კუთხით სამომავლო თანამშრომლობის შესაძლებლობებზე ისაუბრეს.

შეხვედრას საქართველოში აზერბაიჯანის რესპუბლიკის საელჩოს მრჩეველი ელდარ ბაირამოვი, საელჩოს პირველი მდივნები სეიმურ ილიასლი და ანარ რასულოვი და აფხაზეთის ავტონომიური რესპუბლიკის მთავრობის აპარატის საერთაშორისო ურთიერთობათა და პროტოკოლის დეპარტამენტის უფროსი დავით გახარია ესწრებოდნენ.

აფხაზეთის ავტონომიური რესპუბლიკის  იძულებით გადაადგილებულ პირთა-დევნილთა მინისტრი კონსტანტინე კუჭუხიძე და აღმოსავლეთ საქართველოს ტერიტორიული ორგანოს ხელმძღვანელი დავით ძალამიძე  ქ. რუსთავში დევნილთა საცხოვრებელ ობიექტებში იმყოფებოდნენ.

მინისტრი სამუშაოების მიმდინარეობის შეფასების პარალელურად, შეხვდა ობიექტებზე მცხოვრებ დევნილ მოსახლეობას, მოისმინა არსებული პრობლემები და იმსჯელა მათი მოგვარების შესაძლებლობებზე.

სასტუმრო „შერატონ გრანდ თბილისში“ აფხაზეთის ავტონომიური რესპუბლიკის მთავრობისა და ჟურნალ „სითის“ ერთობლივი პროექტის „მე აფხაზეთისთვის“ მონაწილეთა დაჯილდოება გაიმართა.

კონკურსის ნომინანტებს სპეციალური პრიზები აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ და პროექტის ავტორებმა გადასცეს.

ღონისძიების ფარგლებში, ასევე, ირინე ჟორდანიას მოკლემეტრაჟიანი ფილმის „მარქსის ქუჩა №12“ ჩვენება მოეწყო.

პროექტი „მე აფხაზეთისთვის“ სხვადასხვა სფეროში მოღვაწე, წარმატებული აფხაზეთელების საზოგადოებისთვის გაცნობას ისახავს მიზნად.

კონკურსის შედეგად შერჩეულ საუკეთესო და საინტერესო ისტორიის მქონე გმირებზე მომზადდება სპეციალური ფოტოპროექტი, დაიწერება მცირე ისტორიები და შემდეგ ჟურნალ „სითიში“ გამოქვეყნდება. მასალა განთავსდება ასევე  გამომცემლობის ონლაინ პლატფორმასა და  სააგენტოს ვებგვერდზე.

სამომავლოდ პროექტი „მე აფხაზეთისთვის“ მუდმივ სახეს მიიღებს და ყოველწლიურად გაიმართება.