ვალერი არქანიას სახელობის არტ-გალერეაში გამოფენა „ფერების ზღვა“ გაიხსნა. ღონისძიებას აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე დაესწრო.

გალერეაში წარმოდგენილი იყო აფხაზეთიდან დევნილი ხელოვანების ესმა არღვლიანის, მარიამ აქუბარდიას, თამარ გითოლენდიას, ქეთევან ეფაძის, ნინო ჭედიას, ფლორა ჩხოტუას, თეკლა ჯუღელის, და ნანა ესიავას პერსონალური ნამუშევრები.

გამოფენა აფხაზეთის კულტურის, სპორტის და ახალგაზრდულ საქმეთა სააგენტოს ორგანიზებით გაიმართა და მისი მიზანია აფხაზეთიდან დევნილი მხატვრების მხარდაჭერა და მათი პოპულარიზაცია როგორც ქვეყნის შიგნით, ასევე მის ფარგლებს გარეთ.

ვალერი არქანიას სახელობის არტ-გალერეაში აფხაზეთიდან დევნილი ჟურნალისტი ქალბატონების დაჯილდოება გაიმართა.

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ, აფხაზეთის განათლებისა და კულტურის მინისტრმა ეკა ხოფერიამ და აფხაზეთის კულტურის, სპორტის და ახალგაზრდულ საქმეთა სააგენტოს დირექტორმა ლიკა კვარაცხელიამ მედიის წარმომადგენლებს აფხაზეთიდან სიმბოლური საჩუქრები გადასცეს.

ღონისძიების ფარგლებში, დაჯილდოვდნენ დალი ჯონჯუა, გულიადა ჭკადუა, მედეა კორსანტია, ვენერა რურუა, მანანა ბიგვავა, მარი ჟღენტი, ხათუნა გოგია, ეკატერინე შუკვანი, სვეტლანა კვიკვინია და ციალა კოპალიანი, რომლებიც წლების განმავლობაში აქტიურად მუშაობდნენ აფხაზეთთან დაკავშირებულ საკითხებზე და განსაკუთრებული წვლილი მიუძღვით აფხაზეთის თემატიკის ინტენსიურად გაშუქებაში.

ასევე, დაჯილდოვდნენ ჟურნალისტები ნანა და ნონა ქობალიები, რომლებსაც რუსლან აბაშიძე ზუგდიდის მუნიციპალიტეტში პირადად ესტუმრა და საჩუქრები გადასცა.

8 მარტი საქართველოს ეროვნული გმირის, გენერალ-მაიორ გენო ადამიას დაბადების დღეა. ამ თარიღთან დაკავშირებით აფხაზეთის ავტონომიური რესპუბლიკის მთავრობის წევრებმა და ვეტერანების საქმეთა სახელმწიფო სამსახურის წარმომადგენლებმა გენო ადამიას საფლავი ყვავილებით შეამკეს და მის ხსოვნას პატივი მიაგეს.

თანადაფინანსების გზით სახელმწიფო პროგრამაში „დანერგე მომავალი“ აფხაზეთიდან დევნილების ჩართულობის ხელშეწყობის მიზნით, სსიპ „ეკონომიკური პროგრამების სააგენტო“ ახორციელებს მიზნობრივი ქვეპროგრამის - „სასოფლო-სამეურნეო და ენდემური კულტურების წარმოების მხარდაჭერა“ - შესაბამისი ნაწილის იმპლემენტაციას.  თანადაფინანსების მაქსიმალური მოცულობა 2.500 ლარს შეადგენს.

1. ქვეპროგრამის აღნიშნულ ნაწილში მონაწილეობის მიღება შეუძლია:

• აფხაზეთიდან იძულებით გადაადგილებულ პირებს, რომლებიც გახდნენ სახელმწიფო პროგრამის „დანერგე მომავალის“ ბენეფიციარები.

2. ინფორმაცია თანადაფინანსების პირობების, ეტაპებისა და შესავსები განაცხადის ფორმის შესახებ იხილეთ ლინკზე: abkhazia.gov.ge/saministro/MINISTRY-OF-FINANCE-AND-ECONOMY

3. განაცხადის მიღება თანდართული აუცილებელი დოკუმენტაციით ხორციელდება მატერიალური ფორმით 2023 წლის 9 მარტიდან 2023 წლის 9 აპრილამდე მისამართზე:

ქ. თბილისი, თამარაშვილის ქ. N15ა, სსიპ „ეკონომიკური პროგრამების სააგენტო“  

საკონტაქტო პირები:   მერაბ ჩაკვეტაძე - 599950991; ნიკა ჯანგირაშვილი - 591931461.

საქართველოს პირველ ეროვნულ გმირს, ჟიული შარტავას დღეს 79 წელი შეუსრულდებოდა. ამ თარიღთან დაკავშირებით აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ, აფხაზეთის განათლებისა და კულტურის მინისტრ ეკა ხოფერიასთან და აფხაზეთის იძულებით გადაადგილებულ პირთა მინისტრ დავით ფაცაციასთან ერთად, ვაკის პანთეონში ჟიული შარტავას საფლავი ყვავილებით შეამკო და პატივი მიაგო მის ხსოვნას.

შეხვედრაზე განიხილეს დევნილთა განსახლების ობიექტებზე არსებული საჭიროებები და აფხაზეთის ავტონომიური რესპუბლიკის იძულებით გადაადგილებულ პირთა სამინისტროს ინფრასტრუქტურული პროგრამების ფარგლებში, ობიექტებზე განსახორციელებელი აუცილებელი სამუშაოები.

შეხვედრის მონაწილეებმა, ასევე, ისაუბრეს უკვე შერჩეულ დევნილთა განსახლების ობიექტებზე ინფრასტრუქტურული პროექტების მიმდინარეობის პროცესებზე.

შეხვედრას ესწრებოდნენ აფხაზეთის ავტონომიური რესპუბლიკის იძულებით გადაადგილებულ პირთა მინისტრის პირველი მოადგილე გურამ მისაბიშვილი, მოადგილეები - გიორგი ბულისკერია და იგორ კოპალიანი, სამინისტროს სტრუქტურული ერთეულებისა და ტერიტორიული ორგანოების ხელმძღვანელები.

პროექტი ხორციელდება იგპ ქალთა ასოციაციის „თანხმობა“ მიერ და მიზნად ისახავს ხელი შეუწყოს დევნილთა ხელმისაწვდომობის გაძლიერებას არსებულ სერვისებზე, მათი საჭიროებების იდენტიფიცირების, პასუხისმგებელ მხარეთა შორის კოორდინაციის გაუმჯობესებისა და ინფორმირებულობის გაზრდის გზით.

პროექტი ევროკავშირის მიერ დაფინანსებული პროექტის „სოციალური დაცვის გაძლიერება საქართველოში“, ქვეგრანტის ფარგლებში ხორციელდება, რომლის პარტნიორები არიან „Expertise France“ (AFD ჯგუფი) და ჩეხეთის განვითარების სააგენტო.

პროექტის პრეზენტაცია სასტუმრო Holiday INN-ში გაიმართა და მას სახელმწიფო უწყებების, დევნილთა საკითხებზე მომუშავე არასამთავრობო და საერთაშორისო ორგანიზაციების წარმომადგენლები ესწრებოდნენ.

აფხაზეთის ავტონომიური რესპუბლიკის იძულებით გადაადგილებულ პირთა მინისტრი დავით ფაცაცია, პირველ მოადგილე გურამ მისაბიშვილთან და სამინისტროს წარმომადგენლებთან ერთად, აფხაზეთიდან დევნილ, მრავალშვილიან ოჯახს ესტუმრა, ქალბატონ მარიამ არაბულს დედის დღე მიულოცა და სიმბოლური საჩუქრები გადასცა.

"დედის დღესთან დაკავშირებით, აფხაზეთიდან დევნილ, მრავალშვილიან ოჯახს ვესტუმრეთ და ქალბატონ მარიამ არაბულს დედის დღე მივულოცეთ.

მრავალშვილიანი დედები ჩვენი მხრიდან განსაკუთრებულ ყურადღებას იმსახურებენ. იყო 9 შვილის მშობელი დიდი გმირობის ტოლფასია. მინდა ქალბატონ მარიამს სიკეთე, ჯანმრთელობა და შვილების კეთილდღეობა, ხოლო მის შვილებს ბედნიერი ბავშვობა და ნათელი მომავალი ვუსურვო.

დედის დღეს ვულოცავ ყველა დედას, განსაკუთრებით იმ გმირების დედებს, რომლებმაც სამშობლოს ერთიანობას შესწირეს სიცოცხლე.

დღევანდელი დღე ასევე, მინდა მივულოცო აფხაზეთის ოკუპირებულ ტერიტორიაზე მცხოვრებ და აფხაზეთიდან დევნილ დედებს, ვუსურვო მათ ჯანმრთელობა, მშვიდობა, შვილების ბედნიერება და ერთიან საქართველოში ცხოვრება.მჯერა, რომ თქვენი აღზრდილი შვილები განსაკუთრებულ წვლილს შეიტანენ ჩვენი სამშობლოს განვითარებისა და გაძლიერების საქმეში." - დავით ფაცაცია

აფხაზეთის ავტონომიური რესპუბლიკის იძულებით გადაადგილებულ პირთა მინისტრმა დავით ფაცაციამ, პირველ მოადგილე გურამ მისაბიშვილთან ერთად, სოხუმის დაცემის დღეს დახვრეტილი გმირების - ჟიული შარტავას, გურამ გაბესკირიასა და ჯუმბერ ბეთაშვილის მეუღლეები მოინახულა, მათ დედის დღე მიულოცა და სიმბოლური საჩუქრები გადასცა.

სამინისტროს წარმომადგენლებმა დედის დღე, ასევე, მიულოცეს გიგა ოთხოზორიას დედას - ჯულიეტა ოთხოზორიას.

„გმირობის ტოლფასი და განსაკუთრებული სიძლიერეა იყო იმ ადამიანის მეუღლე, დედა, რომელიც მომავალი თაობებისთვის შეუდრეკელობის, სიმამაცისა და სამშობლოს უსაზღვრო სიყვარულის მაგალითია.

თითოეულ ამ ქალბატონს მადლობას ვუხდი გამძლეობისთვის, რადგანაც მათ ჩვენი სამშობლოს ერთიანობის დასაცავად ყველაზე ძვირფასი ადამიანის სიცოცხლე დაკარგეს. სწორედ თქვენნაირი ქალბატონების სიძლიერის მაგალითია საქართველოს ისტორია.

კიდევ ერთხელ გილოცავთ დედის დღეს და გისურვებთ ჯანმრთელობას, ბედნიერებას, სიკეთეს და მალე გაერთიანებულ საქართველოში ცხოვრებას!“ - დავით ფაცაცია

3 მარტს, დედის დღეს, აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ, მთავრობის თავმჯდომარის მოადგილე ანზორ მარგიანთან ერთად, აფხაზეთის ომში დაღუპული მეომრების დედები მოინახულა. რუსლან აბაშიძემ და ანზორ მარგიანმა ქალბატონებს დედის დღე მიულოცეს, მადლობა გადაუხადეს ღირსეული ვაჟკაცების აღზრდისა და მათი გმირული თავდადებისთვის.

დედის დღესთან დაკავშირებით, აფხაზეთის მთავრობის თავმჯდომარის რუსლან აბაშიძის გადაწყვეტილებით, აფხაზეთის შეიარაღებული კონფლიქტის დროს დაღუპული 251 მეომრის დედას ერთჯერადი ფინანსური დახმარება გაეწია.

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ, მთავრობის თავმჯდომარის მოადგილე ანზორ მარგიანთან და აფხაზეთის მთავრობის წევრებთან ერთად, ვაშლიჯვრის ძმათა სასაფლაოზე საქართველოს ეროვნული გმირის, გურამ გაბესკირიას საფლავი ყვავილებით შეამკო და პატივი მიაგო მის ხსოვნას.

გურამ გაბესკირია 1947 წლის 2 მარტს სოხუმში დაიბადა. 1992 წელს გახდა სოხუმის მერი, ხოლო 1993 წელს აფხაზეთის ავტონომიური რესპუბლიკის მინისტრთა საბჭოს და თავდაცვის საბჭოს წევრი. 1993 წლის 27 სექტემბერს, სოხუმის დაცემის დღეს, აფხაზმა სეპარატისტებმა პოლკოვნიკი გურამ გაბესკირია აფხაზეთის ავტონომიური რესპუბლიკის მთავრობის წარმომადგენლებთან ერთად დახვრიტეს.

2017 წლის 27 სექტემბერს გურამ გაბესკირიას საქართველოს ეროვნული გმირის წოდება მიენიჭა.