აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე ქალაქ სტამბოლში მსოფლიო პატრიარქ ბართლომე I-ს შეხვდა.
შეხვედრაზე მსოფლიო პატრიარქმა საქართველოს ტერიტორიული მთლიანობისა და სუვერენიტეტის მიმართ მხარდაჭერა კიდევ ერთხელ დაადასტურა და კონფლიქტით დაზარალებულ მოსახლეობას მხარდაჭერა აღუთქვა.
საუბარი შეეხო, ასევე, აფხაზეთის ომით დაზარალებული მოსახლეობის ჰუმანიტარულ მდგომარეობასა და იძულებით გადაადგილებულ პირთა უფლებებს. მთავრობის თავმჯდომარემ ხაზი გაუსვა აფხაზეთის ტერიტორიაზე არსებული მართლმადიდებლური ტაძრების, მონასტრებისა და კულტურული მემკვიდრეობის დაცვის საკითხებს.
მთავრობის თავმჯდომარემ მსოფლიო პატრიარქს წლების განმავლობაში დევნილი ბავშვების მიმართ გამოჩენილი ყურადღებისა და მხარდაჭერისთვის მადლობა გადაუხადა. ასევე, მადლიერება გამოხატა კუნძულ ქინალიადაზე გამართულ საერთაშორისო საზაფხულო ბანაკში აფხაზეთიდან იძულებით გადაადგილებული ბავშვების მასპინძლობისთვის.
შეხვედრას აფხაზეთის ავტონომიური რესპუბლიკის მთავრობის აპარატის უფროსი გიორგი სუთიძე, საქართველოს გენერალური კონსული სტამბოლში ალექსანდრე ჯიშკარიანი და მსოფლიო საპატრიარქოს საყდრის არქიმანდრიტი და სტამბოლის ქართული სამრევლოს წინამძღვარი ილია ჯინჯოლავა ესწრებოდნენ.
აფხაზეთის მთავრობის ორგანიზებითა და მსოფლიო პატრიარქის მხარდაჭერით, საერთაშორისო საზაფხულო ბანაკი ყოველწლიურად იმართება.
აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე იძულებით გადაადგილებულ პირებთან აქტიურ კომუნიკაციასა და მათ წინაშე არსებული გამოწვევების შესწავლას განაგრძობს. მთავრობის თავმჯდომარემ დევნილ მოქალაქეებთან მორიგი შეხვედრა ქუთაისში გამართა.
შეხვედრაზე მოსახლეობამ აფხაზეთის მთავრობის თავმჯდომარეს უმთავრესი პრობლემები გააცნეს და კომპაქტურ ჩასახლებებში არსებულ ძირითად საჭიროებებზე ისაუბრეს.
გიორგი ჯინჭარაძის განცხადებით, დევნილი მოსახლეობის მხარდაჭერა აფხაზეთის მთავრობის უმთავრესი პრიორიტეტია, ხოლო მოქალაქეებთან პირდაპირი დიალოგი და მათი საჭიროებების სიღრმისეულად შესწავლა გადამწყვეტია პრობლემების სწრაფად გამოვლენისა და მათზე ეფექტიანი რეაგირებისთვის. შეხვედრებზე მიღებული ინფორმაციის საფუძველზე აფხაზეთის მთავრობა, თავისი უფლებამოსილების ფარგლებში, დროულ და ეფექტურ რეაგირებას განახორციელებს.
მთავრობის თავმჯდომარემ დევნილებს, ასევე, დეტალური ინფორმაცია მიაწოდა აფხაზეთის მთავრობის ერთიანი ელექტრონული პორტალის შესახებ, რომელიც ყველა უწყების პროგრამებსა და სერვისებს ერთიან ციფრულ სივრცეში აერთიანებს.
იძულებით გადაადგილებულ მოსახლეობასთან მსგავსი ფორმატის შეხვედრები, მთელი ქვეყნის მასშტაბით, მომავალშიც აქტიურად გაგრძელდება.
აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძის ხელმძღვანელობით მთავრობის მორიგი სხდომა გაიმართა. სხდომაზე მთავრობის წევრებმა დღის წესრიგით გათვალისწინებული მიმდინარე საკითხები განიხილეს და რამდენიმე ახალ მნიშვნელოვან ინიციატივაზე იმსჯელეს.
მთავრობის თავმჯდომარის განცხადებით, აფხაზეთის ავტონომიური რესპუბლიკის მთავრობა განაგრძობს დევნილი მოსახლეობის საჭიროებებზე მორგებული პოლიტიკის გატარებას, სადაც განსაკუთრებული ადგილი სამოქალაქო ინტეგრაციას, სამშვიდობო ინიციატივებსა და ახალგაზრდა თაობის მხარდაჭერას უკავია.
„დღევანდელი სხდომის დღის წესრიგით გათვალისწინებული საკითხების განხილვამდე, მინდა ახალი პროგრამები დავაინიციირო.
პირველი ეს არის კონკურსი „სამოქალაქო ინტეგრაციის მხარდაჭერა“, რომლის მიზანია ისეთი ინიციატივების წახალისება, რომლებიც ხელს უწყობს აფხაზეთიდან დევნილთა სამოქალაქო ინტეგრაციას, ნდობის აღდგენასა და სამშვიდობო პოლიტიკის განხორციელებას. კონკურსში მონაწილეობა შეუძლიათ როგორც ფიზიკურ პირებს, ისე საქართველოში რეგისტრირებულ ორგანიზაციებს. თითოეული გამარჯვებული პროექტის მაქსიმალური დაფინანსება 30 000 ლარს შეადგენს.
ასევე, მინდა შევეხო ჩვენი ახალგაზრდების მხარდაჭერისა და წახალისების მიზნით მორიგ მნიშვნელოვან ინიციატივას. აფხაზეთის თემატიკის გაძლიერების მიზნით, ამოქმედდა აკაკი ჩხენკელის სახელობის სტიპენდია, რომელიც წარმატებული სტუდენტებისთვის თვეში 300 ლარის ოდენობით, ერთი სასწავლო წლის განმავლობაში გაიცემა.
ამასთანავე, წელს პირველად დაემატა დოქტორანტების სტიპენდიის კომპონენტი. აფხაზეთის თემატიკაზე მომუშავე, მაღალი აკადემიური მოსწრების იძულებით გადაადგილებული დოქტორანტები 1000 და 1500-ლარიან ერთჯერად სტიპენდიას მიიღებენ“, - განაცხადა გიორგი ჯინჭარაძემ.
მთავრობის თავმჯდომარემ ხაზგასმით აღნიშნა, რომ ახალი პროექტები უზრუნველყოფს საზოგადოებაში ნდობის აღდგენისა და შერიგების მიმართულებით არსებული პროცესების გაძლიერებას და დამატებით სტიმულს მისცემს ახალგაზრდა მკვლევრებს და სტუდენტებს, რომლებიც თავიანთ სამეცნიერო თუ აკადემიურ საქმიანობას აფხაზეთის თემატიკას უკავშირებენ.
აღსანიშნავია, რომ ახალი პროექტების ამოქმედებით აფხაზეთის მთავრობა განაგრძობს სამშვიდობო ინიციატივების გაძლიერებასა და ახალგაზრდული პროექტების ხელშეწყობას.
აფხაზეთის ავტონომიური რესპუბლიკის მინისტრთა საბჭოს თავმჯდომარესა და აფხაზეთის ავტონომიური რესპუბლიკის უმაღლესი საბჭოს პირველ თავმჯდომარეს დევნილობაში თამაზ ნადარეიშვილს დღეს 72 წელი შეუსრულდებოდა.
ამ თარიღთან დაკავშირებით, აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძემ, აფხაზეთის იუსტიციისა და სამოქალაქო ინტეგრაციის მინისტრ ალიონა ჩხოტუასთან და აფხაზეთის განათლებისა და კულტურის მინისტრ გიორგი ძაძამიასთან ერთად, თამაზ ნადარეიშვილის საფლავი ყვავილებით შეამკო და მის ხსოვნას პატივი მიაგო.
საფლავზე, ასევე, თამაზ ნადარეიშვილის ოჯახის წევრები იმყოფებოდნენ.
თამაზ ნადარეიშვილი დაჯილდოებულია ვახტანგ გორგასლის I ხარისხის ორდენით, იყო გიორგი შერვაშიძის სახელობის სახელმწიფო პრემიის ლაურეატი.
