აფხაზეთის ავტონომიური რესპუბლიკის განათლებისა და კულტურის მინისტრმა ეკა ხოფერიამ აფხაზეთის ავტონომიური რესპუბლიკის მთავრობის წევრების გასვლით შეხვედრაზე სამინისტროს 2022 წლის 6 თვის საქმიანობის ანგარიში წარადგინა. მან განათლების, კულტურული მემკვიდრეობის, კულტურის, სპორტისა და ახალგაზრდულ საქმეთა სფეროების პროგრამებსა და პროექტებზე, მათ შედეგებზე ისაუბრა.

ეკა ხოფერიამ დამსწრეთ ასევე გააცნო სამინისტროს სსიპ-ების - აფხაზეთის კულტურის, სპორტისა და ახალგაზრდულ საქმეთა სააგენტოს, კონსტანტინე გამსახურდიას სახელობის სოხუმის სახელმწიფო დრამატული თეატრის, სოხუმის მოზარდ მაყურებელთა თეატრ „თეთრი ტალღას“, აფხაზეთის გურამ ყურაშვილის სახელობის სახელმწიფო საგუნდო კაპელის, სახელმწიფო აკადემიურ ანსამბლ „აფხაზეთის“, აფხაზეთის სახელმწიფო ანსამბლ „შავნაბადას“ შემოქმედებით საქმიანობაში არსებული სიახლეები და გეგმები.

შეხვედრას აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე, აფხაზეთის მთავრობისა და აფხაზეთის ა/რ განათლებისა და კულტურის სამინისტროს წარმომადგენლები ესწრებოდნენ.

დღეს, აფხაზეთიდან იძულებით გადაადგილებულ პირთა-დევნილთა მომსახურების სააგენტოს, სენაკისა და ჩხოროწყუს ეპარქიის განათლების ცენტრის, წმინდა ალექსი შუშანიას სახელობის მართლმადიდებლური სკოლა-გიმნაზიის ერთობლივი ორგანიზებითა და ქ. სენაკის მუნიციპალიტეტის მერიის მხარდაჭერით, ქ. სენაკში, მართლმადიდებლურ სკოლა-გიმნაზიაში აფხაზეთიდან დევნილი, 15-დან 17 წლამდე მოზარდებისთვის საზაფხულო სკოლა გაიხსნა.

საზაფხულო სკოლის გახსნით ღონისძიებას აფხაზეთიდან იძულებით გადაადგილებულ პირთა-დევნილთა მომსახურების სააგენტოს დირექტორი – სალომე დოლიძე, ქ. სენაკის მუნიციპალიტეტის მერ – ვახტანგ გადელიასთან, მის პირველ მოადგილე – გრიგოლ ბაღათურიასთან, წმინდა ალექსი შუშანიას სახელობის მართლმადიდებლური სკოლა-გიმნაზიის დირექტორ – ნინო ჯანჯღავასთან და შესაბამისი სექტორის წარმომადგენლებთან ერთად დაესწრო.

საზაფხულო სკოლის მონაწილეები არიან - ოკუპირებული ტერიტორიაზე მცხოვრები, ჩხოროწყუს მუნიციპალიტეტის აფხაზეთის მე-10 საჯარო, სენაკის მუნიციპალიტეტის აფხაზეთის მე-7 საჯარო სკოლებისა და წმინდა ალექსი შუშანიას სახელობის მართლმადიდებლური სკოლის მოსწავლეები.

პროექტის ფარგლებში განხორციელდება მნიშვნელოვანი საგანმანათლებლო, კულტურული და სპორტული ღონისძიებები. საზაფხულო სკოლის მონაწილეები შეიძენენ და განივითარებენ ისეთ მნიშვნელოვან უნარ-ჩვევებს, როგორიც არის - პრობლემის გადაჭრა, ეფექტური კომუნიკაცია, კრიტიკული აზროვნება, გუნდური მუშაობა, კონფლიქტების მართვა, ინფორმაციის დამუშავება და ანალიზი, სტრესის მართვა, პროექტის წერა და სხვა. პროექტის მიზანია - მაღალი სამოქალაქო თვითშეგნების გაღვივება, მოზარდთა თავისუფალი დროის გონივრული ორგანიზება, მოსწავლეებში STEM-ის მიმართულებით ინტერესის აღძვრა, ქვეყნის ისტორიის და ეთნოგრაფიის, კულტურული მემკვიდრეობის გაცნობა, გარემოსდაცვითი ღონისძიებების განხორციელება, ახალგაზრდებისათვის ჯანსაღი და მეგობრული გარემოს შექმნა.

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე ზუგდიდში საქართველოს ეროვნული გმირის, გენერალ-მაიორ გენო ადამიას ბიუსტის გახსნას დაესწრო. ბიუსტი ფრანგულ პარკში დაიდგა და მისი ავტორია მოქანდაკე ბადრი სხულუხია.

ღონისძიება საქართველოს ეროვნული ჰიმნით გაიხსნა, დამსწრე საზოგადოებას სიტყვით მიმართეს და სამშობლოს წინაშე გენო ადამიას ღვაწლსა და დამსახურებაზე ისაუბრეს აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ, აფხაზეთის უმაღლესი საბჭოს თავმჯდომარე ჯემალ გამახარიამ, საქართველოს პრეზიდენტის მთავარმა მრჩეველმა დავით თევზაძემ, თავდაცვის სამინისტროს თავდაცვის ძალების დასავლეთის სარდალმა კობა გრიგოლიამ, ვეტერანთა საქმეების სახელმწიფო სამსახურის დირექტორმა კობა კობალაძემ, ყოფილი 23-ე ბრიგადის მეთაურის პირველმა მოადგილემ სპარტაკ მარხულიამ და აფხაზეთის მეომართა კავშირის თავმჯდომარის მოვალეობის შემსრულებელმა თემურ დარჯანიამ. ღონისძიებაზე, ასევე, იმყოფებოდნენ ადგილობრივი ხელისუფლების და საზოგადოების წარმომადგენლები.

გენო ადამიას ბიუსტი საქართველოს კულტურის, სპორტის და ახალგაზრდობის სამინისტროს, ზუგდიდის მუნიციპალიტეტის მერიისა და საკრებულოს ჩართულობით და მხარდაჭერით შეიქმნა.

გენო ადამია აფხაზეთში ეროვნულ–განმათავისუფლებელი მოძრაობის აქტიური მონაწილე, აფხაზეთში შეიარაღებული კონფლიქტის დაწყების შემდეგ საქართველოს შეიარაღებული ძალების 23-ე მექანიზებული ბრიგადის მეთაური იყო. მან 1993 წლის 27 სექტემბერს, სოხუმის დაცემის შემდეგაც განაგრძო წინააღმდეგობის გაწევა და 28 სექტემბერს კელასურის ხიდზე ბრძოლისას დაიღუპა.

დაჯილდოებულია ვახტანგ გორგასლის I და III ხარისხის ორდენებით. 2020 წლის 27 სექტემბერს გენერალ-მაიორ გენო ადამიას საქართველოს ეროვნული გმირის წოდება მიენიჭა.

ზემო აფხაზეთში აფხაზეთის ა.რ. მთავრობის წარმომადგენლობის თანამშრომლებმა ქ.თბილისში და თეთრიწყაროს რაიონში მცხოვრებ, ზემო აფხაზეთიდან დევნილ სოციალურად დაუცველ ოჯახებს, ზემო აფხაზეთში აფხაზეთის ა.რ. მთავრობის წარმომადგენლობის 2022 წლის ბიუჯეტით გათვალისწინებული პროგრამის ფარგლებში, ორ წლამდე ბავშვებისთვის კვების პროდუქტების და ჰიგიენის საგნების შესაძენად ვაუჩერები გადასცა.

შეხვედრას აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე და მთავრობის წევრები ესწრებოდნენ.

შეხვედრაზე ლევან ჩაკვეტაძემ სამინისტროს 2022 წლის 6 თვის საქმიანობის ანგარიში წარადგინა და სამედიცინო და სოციალური მიმართულებებით განხორციელებულ და მიმდინარე პროგრამებზე, მათ შედეგებსა და სამომავლო გეგმებზე დეტალურად ისაუბრა.

სხდომაზე ლევან ჩაკვეტაძემ ასევე წარადგინა ინფორმაცია ააიპ - “აფხაზეთის სამედიცინო დაწესებულებებთან კოორდინაცის სააგენტოს” 2022 წლის 6 თვის განმავლობაში განხორციელებული პროგრამების შესახებ.

მინისტრმა და მთავრობის წევრებმა განიხილეს აფხაზეთის ოკუპირებულ ტერიტორიაზე მცხოვრები და აფხაზეთიდან დევნილი მოსახლეობის ჯანმრთელობასთან დაკავშირებული საჭიროებები, მათი სოციალური მდგომარეობის გაუმჯობესებისა და მხარდაჭერის მიზნით სამინისტროს მიერ დაგეგმილი ღონისძიებები.

დღეს აფხაზეთის განათლებისა და კულტურის სამინისტროს დაქვემდებარებული სსიპ-ების წარმომადგენლებთან შეხვედრა გაიმართა. შეხვედრაზე აღინიშნა, რომ აფხაზეთის ავტონომიური რესპუბლიკის მთავრობის ხელშეწყობითა და აფხაზეთის განათლებისა და კულტურის სამინისტროს ინიციატივით, დაპირებისამებრ, 2022 წლის სექტემბრიდან სამინისტროს დაქვემდებარებაში მყოფი შემოქმედებითი ჯგუფებისათვის  სახელფასო ფონდი გაიზარდა. შეხვედრაზე ასევე ისაუბრეს სოხუმის კონსტანტინე გამსახურდიას სახელობის პროფესიული სახელმწიფო დრამატული თეატრის დარბაზის რეაბილიტაციის პროექტზე, რომლის ფარგლებშიც წლის ბოლომდე თეატრის დარბაზი განათებისა და გახმოვანების თანამედროვე სისტემებით აღიჭურვება.

შეხვედრაში აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე და აფხაზეთის განათლებისა და კულტურის მინისტრი ეკა ხოფერია მონაწილეობდნენ.

აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტრომ სსიპ “კულტურის, სპორტისა და ახალგაზრდულ საქმეთა სააგენტოს” ქვეპროგრამის “ნორჩი ფეხბურთელების საზაფხულო სკოლა” მონაწილე ახალგაზრდა სპორტსმენებს რუხის რესპუბლიკურ საავადმყოფოში მრავალპროფილური სამედიცინო შემოწმება ჩაუტარა.

სპორტსმენების ფიზიკური დატვირთვიდან გამომდინარე განსაკუთრებული მნიშვნელობა ენიჭება სისხლის მიმოქცევის სისტემის დაავადებათა სკრინინგს. შესაბამისად ყველა ახალგაზრდას ჩაუტარდა ეკგ და კარდიოლოგის კონსულტაცია, გაიცა შესაბამისი რეკომენდაციები. დამატებით ყველა ბენეფიციარს ჩაუტარდა პედიატრის, ენდოკრინოლოგის, ნევროლოგის, ოფთამოლოგის, რეაბილიტოლოგის კონსულტაციები და ულტრასონოგრაფიული კვლევები.

გამოკვლევებში საქართველოს წამყვანი კლინიკების ექიმ-სპეციალისტები მონაწილეობდნენ.

ბენეფიციარებს ასევე, ჰიგიენური სასაჩუქრე ნაკრები გადაეცათ.

აფხაზეთის ავტონომიური რესპუბლიკის იძულებით გადაადგილებულ პირთა სამინისტროში აფხაზეთის ავტონომიური რესპუბლიკის მთავრობის წევრების გასვლითი შეხვედრა გაიმართა.

შეხვედრაზე დავით ფაცაციამ სამინისტროს 2022 წლის 6 თვის საქმიანობის ანგარიში წარადგინა და დეტალურად ისაუბრა პრიორიტეტული მიმართულებებით განხორციელებულ და მიმდინარე პროგრამებზე, პროექტებზე, მათ შედეგებსა და სამომავლო გეგმებზე.

შეხვედრაზე სსიპ - „აფხაზეთიდან იძულებით გადაადგილებულ პირთა - დევნილთა მომსახურების სააგენტოს“ დირექტორმა სალომე დოლიძემ, ასევე, წარადგინა ინფორმაცია სააგენტოს 2022 წლის 6 თვის განმავლობაში განხორციელებული პროგრამების შესახებ და ისაუბრა სააგენტოს მიერ წლის ბოლომდე დაგეგმილ ღონისძიებებზე.

შეხვედრის დასასრულს, მთავრობისა და სამინისტროს წარმომადგენლებმა განიხილეს აფხაზეთის ოკუპირებულ ტერიტორიაზე მცხოვრები და აფხაზეთიდან დევნილი მოსახლეობის საჭიროებები, მათი სოციალური მდგომარეობის გაუმჯობესებისა და მხარდაჭერის მიზნით სამინისტროს მიერ დაგეგმილი ღონისძიებები და მათი მოსალოდნელი შედეგები.

შეხვედრას აფხაზეთის ავტონომიური რესპუბლიკის მთავრობის თავმჯდომარე - რუსლან აბაშიძე, აფხაზეთის მთავრობისა და აფხაზეთის ავტონომიური რესპუბლიკის იძულებით გადაადგილებულ პირთა სამინისტროს წარმომადგენლები ესწრებოდნენ.

ევროკავშირის შესახებ ცნობიერების ამაღლების კამპანიის ფარგლებში, აფხაზეთის მთავრობის საჯარო მოხელეებისთვის პროექტი „ევროკავშირის ინსტიტუციონალური მოწყობა, ევროკავშირის გადაწყვეტილების მიღების პროცედურები და ევროკავშირის ინსტიტუტების როლი ამ პროცესში“ დასრულდა.

პროგრამის მონაწილეებს აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ  და იუსტიციისა და სამოქალაქო ინტეგრაციის საკითხებში აფხაზეთის მინისტრმა ნანა გაბელიამ აქტიური ჩართულობისთვის მადლობა გადაუხადეს და სერტიფიკატები გადასცეს.

პროექტის ფარგლებში, დღეს ასევე, ევროკავშირის თემაზე პირველი აფხაზურენოვანი სახელმძღვანელოს „შვიდი ნაბიჯი ევროკავშირის გასააზრებლად“  პრეზენტაცია გაიმართა.

შეხვედრას EPLO-ს რეგიონული წარმომადგენლობის ხელმძღვანელი იოსებ ნანობაშვილი, იუსტიციისა და სამოქალაქო ინტეგრაციის საკითხებში აფხაზეთის მინისტრის აპარატის, სამთავრობო და არასამთავრობო ორგანიზაციების, დიპლომატიური კორპუსისა და აკადემიური წრეების წარმომადგენლები ესწრებოდნენ.

ღონისძიება მინისტრის აპარატის, ივ.ჯავახიშვილის სახელობის თბილისის სახელმწიფო უნივერსიტეტისა და სამხრეთ კავკასიაში ევროპის საჯარო სამართლის ორგანიზაციის რეგიონული წარმომადგენლობის მხარდაჭერით ჩატარდა.

აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტროში მოქმედი მრავალპროფილური სკრინინგული კვლევის პროგრამის ფარგლებში ზემო სვანეთის რეგიონში არსებულ ხანდაზმულთა სათემო ცენტრის - „ჩემი მორდუს” ბენეფიციარებს სამედიცინო გამოკვლევები ჩაუტარდათ.

აღნიშნული აქციის ფარგლებში მაღალკვალიფიციური ექიმ-სპეციალისტების მიერ განხორციელდა ცენტრის ბენეფიციართა სამედიცინო მომსახურება და
დანიშნულების შესაბამისად გაიცა საჭირო მედიკამენტები.

აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტრო მხარს უჭერს  ხანდაზმულთა სათემო ცენტრის - „ჩემი მორდუს“  ამუშავებას, რაც მნიშვნელოვანი ნაბიჯია   მარტოხელა ხანდაზმულებზე ზრუნვისა და მათთვის  სოციალური სერვისების მიწოდების თვალსაზრისით.

აფხაზეთის სავაჭრო-სამრეწველო პალატის ორგანიზებით დევნილ მეწარმეებთან შეხვედრა გაიმართა.
შეხვედრას აფხაზეთის ფინანსთა და ეკონომიკის მინისტრის მოადგილე გიორგი ჯინჭარაძე ესწრებოდა.
შეხვედრაზე განიხილეს მინდინარე და სამომავლო პროექტები , ასევე საგრანტო პროგრამები, რომელსაც ეკონომიკური პროგრამების სააგენტო, სოფლის განვითარების სააგენტო, დევნილთა, ეკომიგრანტთა და საარსებო წყაროებით უზრუნველყოფის სააგენტო, ,,აწარმოე საქართველოში“ და „თიბისი ბიზნესისთვის“ ახორციელებენ.
შეხვედრის მონაწილეები გაეცნენ პალატის წევრი ქალი მეწარმეების წარმატებულ საქმიანობას და გაიზიარეს მათი გამოცდილებაც.
ღონისძიების დასასრულს ორგანიზაციების წარმომადგენლებმა დევნილი მეწარმეების კუთხვებს ამომწურავად უპასუხეს.
ბიზნეს შეხვედრის პარალელურად, დარბაზში ჩატარდა აფხაზეთიდან დევნილი მეწარმეების პროდუქციის გამოფენა.
ღონისძიება პროექტის ,,მოწყვლადი დევნილი და ადგილობრივი მოსახლეობის ეკონომიკური და სოციალური ჩართულობის ხელშეწყობა სამხრეთ კავკასიაში (EPIC)’’ ფარგლებში ჩატარდა, რომელსაც გერმანიის ეკონომიკური თანამშრომლობისა და განვითარების ფედერალური სამინისტროს (BMZ) დაფინანსებით , გერმანიის საერთაშორისო თანამშრომლობის საზოგადოება (GIZ) საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროსთან (MOH) თანამშრომლობით ახორციელებს.

ლევან თევზაიამ საქართველოს საერთაშორისო ბიზნეს ფორუმში მიიღო მონაწილეობა.
ღონისძიება საქართველო- ლიბანის სავაჭრო პალატის ორგანიზებით ჩატარდა.
შეხვედრის მიზანს წარმოადგენდა ბიზნეს სექტორის, სერვისის პროვაიდერების, ინვესტორებისა და მეწარმეების ერთმანეთთან დაკავშირება.
ფორუმის დასრულების შემდეგ, B2B შეხვედრები გაიმართა. B2B შეხვედრების ფარგლებში, განიხილეს მათი პოტენციური თანამშრომლობა ყველა ბიზნესსა და ინვესტიციის დონეზე.
ღინისძიებას საქართველოს მთავრობის, ქართული და უცხოური ბიზნეს სექტორის წარმომადგენლები ესწრებოდნენ.