აფხაზეთის ავტონომიური რესპუბლიკის იძულებით გადაადგილებულ პირთა - დევნილთა მინისტრი დავით ფაცაცია და მინისტრის პირველი მოადგილე გურამ მისაბიშვილი, სამინისტროს თანამშრომლებთან და ადგილობრივი ხელისუფლების წარმომადგენლებთან ერთად, აბაშასა და ხობში მცხოვრებ, აფხაზეთიდან იძულებით გადაადგილებულ პირებს შეხვდნენ და მათ საჭიროებებს ადგილზე გაეცნენ.
შეხვედრაზე აბაშასა და ხობში მცხოვრებ, აფხაზეთიდან დევნილ ბავშვებს აფხაზეთის ავტონომიური რესპუბლიკის იძულებით გადაადგილებულ პირთა-დევნილთა სამინისტროს „ადამიანის უფლებათა დაცვის საერთაშორისო კომისიისგან“ (IHRC) მიღებული ჰუმანიტარული დახმარება - სათამაშოები გადასცეს.
სამინისტროს მიერ, დევნილთა სოციალური მხარდაჭერის მიზნით მსგავსი შეხვედრები მომავალშიც ეტაპობრივად გაგრძელდება.

უკრაინელი ხალხის დასახმარებლად საქველმოქმედო აქციაში აფხაზეთის ავტონომიური რესპუბლიკის მთავრობის და უმაღლესი საბჭოს თანამშრომლები ჩაერთვნენ. სოლიდარობის ნიშნად, ომით დაზარალებული მოსახლეობის მხარდასაჭერად, აფხაზეთის მთავრობის და უმაღლესი საბჭოს თანამშრომლებმა კუთვნილი ხელფასებიდან გარკვეული რაოდენობის თანხა ერთიან ანგარიშზე გადარიცხეს. ერთობლივი გადაწყვეტილებით, აღნიშნული თანხით შეძენილ იქნა ჰუმანიტარული ტვირთი პირველადი სამედიცინო დახმარების საგნები, ბავშვთა კვება და ჰიგიენური საშუალებები.

ჰუმანიტარული ტვირთის დატვირთვისა და გაგზავნის პროცესს საქართველოს ფოსტის ტერმინალში აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე დაესწრო. ტვირთის გაგზავნას საქართველოს ფოსტა უზრუნველყოფს, ჰუმანიტარული დახმარება უკრაინაში სახმელეთო გზით გაიგზავნება.

ადგილზე ასევე იმყოფებოდნენ აფხაზეთის უმაღლესი საბჭოს თავმჯდომარე ჯემალ გამახარია, აფხაზეთის მთავრობის თავმჯდომარის მოადგილე ანზორ მარგიანი, აფხაზეთის ფინანსთა და ეკონომიკის მინისტრი ლევან თევზაია და აფხაზეთიდან იძულებით გადაადგილებულ პირთა - დევნილთა მინისტრი დავით ფაცაცია.

აფხაზეთის ავტონომიური რესპუბლიკის იძულებით გადაადგილებულ პირთა - დევნილთა მინისტრი დავით ფაცაცია, მინისტრის პირველი მოადგილე გურამ მისაბიშვილი, ჩხოროწყუს მუნიციპალიტეტის მერი დათო გოგუა, სამინისტროს თანამშრომლებთან და ადგილობრივი ხელისუფლების წარმომადგენლებთან ერთად, ჩხოროწყუში მცხოვრებ, აფხაზეთიდან იძულებით გადაადგილებულ პირებს შეხვდნენ, მათ საჭიროებებსა და პრობლემებს გაეცნენ.

შეხვედრაზე ჩხოროწყუში მცხოვრებ, აფხაზეთიდან დევნილ ბავშვებს აფხაზეთის ავტონომიური რესპუბლიკის იძულებით გადაადგილებულ პირთა-დევნილთა სამინისტროს „ადამიანის უფლებათა დაცვის საერთაშორისო კომისიისგან“ (IHRC) მიღებული ჰუმანიტარული დახმარება - სათამაშოები გადასცეს.

„ჩხოროწყუს მუნიციპალიტეტში მცხოვრებ, აფხაზეთიდან დევნილ მოსახლეობას შეხვდით და ადგილზე გავეცანით მათ საჭიროებებს, ასევე, ვისაუბრეთ მათი მოგვარების გზებზე.

აფხაზეთიდან დევნილ ბავშვებთან განსაკუთრებული პოზიტიური ემოციებით სავსე შეხვედრაზე, გადავეცით „ადამიანის უფლებათა დაცვის საერთაშორისო კომისიისგან“ (IHRC) მიღებული ჰუმანიტარული დახმარება - სათამაშოები.

აქვე ავღნიშნავ, რომ მსგავსი შეხვედრები ძალიან მნიშვნელოვანია ჩვენი დევნილი მოსახლეობის სოციალური მდგომარეობის გაუმჯობესებაზე ორიენტირებული ქმედითი ღონისძიებების შემუშავებისთვის და შესაბამისად, აქტიურად ვაგრძელებთ დევნილთა საჭიროებების ადგილზე გაცნობას.“ - დავით ფაცაცია.

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე თბილისის ოპერისა და ბალეტის თეატრში საქართველო-აშშ-ის სტრატეგიული პარტნიორობის 30 წლის იუბილესთან დაკავშირებით გამართულ სოლიდარობის კონცერტს დაესწრო.

ღონისძიება ამერიკის შეერთებული შტატების საელჩოსა და ამერიკული კულტურის ცენტრის ორგანიზებით გაიმართა და მას საქართველოს პრეზიდენტი, პრემიერ-მინისტრი, აშშ-ის საგანგებო და სრულუფლებიანი ელჩი საქართველოში, აღმასრულებელი და საკანონმდებლო ხელისუფლებისა და საქართველოში აკრედიტებული დიპლომატიური კორპუსის წარმომადგენლები ესწრებოდნენ.

იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატის ორგანიზებით საქართველოს ეროვნული არქივის დირექტორ თეონა იაშვილთან სამუშაო შეხვედრა გაიმართა. შეხვედრაში აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე და იუსტიციისა და სამოქალაქო ინტეგრაციის საკითხებში აფხაზეთის მინისტრი ნანა გაბელია მონაწილეობდნენ.

შეხვედრაზე ისაუბრეს აფხაზეთის ავტონომიური რესპუბლიკის არქივის სამმართველოს საქმიანობის შესახებ, სადაც სამუშაო პროცესი დღემდე აქტიურად მიმდინარეობს. განიხილეს ურთიერთთანამშრომლობის შესაძლებლობები აფხაზეთის არქივის ინფრასტრუქტურის გაუმჯობესებისა და არქივში არსებული დოკუმენტების გაციფრულების თაობაზე, სადაც საერთაშორისო სტანდარტების შესაბამისად, საარქივო დოკუმენტების შენახვის პირობები ბევრად უკეთ იქნება დაცული.

საქართველოს ეროვნული არქივის მხარდაჭერით, თანამშრომლობის ფარგლებში, აფხაზეთის არქივის თანამშრომლებს ჩაუტარდებათ ტრენინგები და გაეწევათ კონსულტაციები საარქივო მასალების, მათ შორის, ოჯახებში შემონახული დოკუმენტების ახალი ტექნოლოგიებით დამუშავებისა და ელექტრონულ კატალოგში განთავსების შესახებ, რომელიც უფრო გაამარტივებს და ხელმისაწვდომს გახდის არქივში შენახული მასალების მოძიებას და გამოყენებას.

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ, შერიგებისა და სამოქალაქო საკითხებში სახელმწიფო მინისტრმა თეა ახვლედიანმა და საგარეო საქმეთა მინისტრის პირველმა მოადგილემ ლაშა დარსალიამ სამოქალაქო საზოგადოების წარმომადგენლებთან ერთობლივი შეხვედრა გამართეს.

შეხვედრაზე განხილულ იქნა კონფლიქტის მშვიდობიანი მოგვარების პოლიტიკის განხორციელების პროცესი ორივე განზომილების - საქართველოს ტერიტორიების დეოკუპაციის, ასევე შერიგებისა და ჩართულობის მიმართულებით, აფხაზეთისა და ცხინვალის რეგიონებში უსაფრთხოების, ჰუმანიტარული და ადამიანის უფლებათა კუთხით არსებული ვითარება, ჟენევის საერთაშორისო მოლაპარაკებების მიმდინარეობა და სამშვიდობო პოლიტიკასთან დაკავშირებული სხვა აქტუალური საკითხები.

შეხვედრის მონაწილეებმა ასევე იმსჯელეს და გაცვალეს მოსაზრებები უკრაინის წინააღმდეგ რუსეთის მიერ განხორციელებული სამხედრო აგრესიისა და მიმდინარე საომარი მოქმედებების შედეგად შექმნილ ურთულეს მდგომარეობაზე, მის გავლენაზე გლობალურ და რეგიონულ უსაფრთხოებაზე და საქართველოს წინაშე მდგარ გამოწვევებზე.

შეხვედრა საგარეო საქმეთა სამინისტროსა და სახელმწიფო მინისტრის აპარატის ინიციატივით გაიმართა და მასში მონაწილეობა მიიღეს კონფლიქტის თემაზე მომუშავე არასამთავრობო ორგანიზაციების ხელმძღვანელებმა და ექსპერტებმა.

მინისტრმა ახალგაზრდებს აქტიური ჩართულობისთვის მადლობა გადაუხადა და წარმატებები უსურვა.

„გამყოფი  ხაზის ორივე მხარეს მცხოვრები ახალგაზრდების გაცნობა და დაახლოება  მნიშვნელოვანია. ტრენინგის ფარგლებში შეძენილი უნარ-ჩვევები  გაააქტიურებს და ხელს შეუწყობს მონაწილეთა ცნობიერების ამაღლებას, სოციალიზაციასა და სამოქალაქო ინტეგრაციას“-აღნიშნა ნანა გაბელიამ.

ოკუპირებული გალის რაიონიდან ოთხი აბიტურიენტი, მინისტრის აპარატის მხარდაჭერით ორგანიზებულ, თბილისში მიმდინარე  ორდღიან ტრენინგს ესწრებოდა. 

კურსის ფარგლებში, ახალგაზრდები ფასილიტატორების დახმარებით, იძულებით გადაადგილებულ პირთა სოციალიზაციისა და ინტეგრაციის პროცესებს აქტიურად განიხილავდნენ.

შეხვედრას მინისტრის პირველი მოადგილე გიორგი გაბედავა და აპარატის თანამშრომლები ესწრებოდნენ.

ღონისძიება მისასალმებელი სიტყვით იუსტიციისა და სამოქალაქო ინტეგრაციის საკითხებში აფხაზეთის მინისტრმა, ნანა გაბელიამ გახსნა.

შეხვედრაზე მინისტრის აპარატის საქმიანობისა და  მრჩეველთა საბჭოს პროექტის  შესახებ პრეზენტაცია გაიმართა.

სამუშაო ფოკუს ჯგუფების მიერ იდენტიფიცირებული პრობლემების, მომზადებული რეკომენდაციებისა და ინიციატივების განხილვაც მოეწყო.

„მრჩეველთა საბჭოს წევრები ღია კონკურსის წესით შევარჩიეთ. საბჭო იქნება წარმომადგენლობითი, საკონსულტაციო ორგანო და ახალგაზრდული პროგრამების შემუშავებასა და განხორციელებასთან დაკავშირებით მინისტრის აპარატს რეკომენდაციებს წარუდგენს. ერთი წლის განმავლობაში 11 ახალგაზრდისგან დაკომპლექტებული გუნდი ახალგაზრდული პოლიტიკის შემუშავებას უზრუნველყოფს. გაიმართება მნიშვნელოვანი შეხვედრები ადგილობრივი ხელისუფლების წარმომადგენლებთან, არასამთავრობო ორგანიზაციებთან.  პროექტის ყველაზე აქტიური ორი წარმომადგენელი საქართველოს ფარგლებს გარეთ დაგეგმილ ქართულ-აფხაზური სამშვიდობო დიალოგის პროგრამაში მიიღებს მონაწილეობას“-განაცხადა მინისტრმა.

პროექტი იუსტიციისა და სამოქალაქო ინტეგრაციის საკითხებში აფხაზეთის მინისტრის აპარატის ორგანიზებით ხორციელდება.

21 მარტი დაუნის სინდრომის საერთაშორისო დღეა, რომელსაც მსოფლიოს სხვადასხვა ქვეყნები დაუნის სინდრომზე ცნობადობის ამაღლების ღონისძიებებით აღნიშნავენ.

სწორედ ამ მიზნით, სსიპ - „აფხაზეთიდან იძულებით გადაადგილებულ პირთა – დევნილთა მომსახურების სააგენტომ“ საირმეში, აფხაზეთიდან დევნილი, შეზღუდული შესაძლებლობების სტატუსის მქონე ბავშვებისა და მათი მშობლებისთვის განახორციელა 2 დღიანი პროექტი - „შეზღუდული შესაძლებლობები არ არსებობს“.

ღონისძიების ფარგლებში, შეზღუდული შესაძლებლობის მქონე პირთა საკითხების ექსპერტ-კონსულტანტმა მაკა ჭანკვეტაძემ მშობლებს ჩაუტარა თემატური ტრენინგები, ხოლო ბავშვებისთვის დაიგეგმა და განხორციელდა სხვადასხვა აქტივობები.

პროექტის დასკვნით ღონისძიებას აფხაზეთიდან იძულებით გადაადგილებულ პირთა-დევნილთა მინისტრი დავით ფაცაცია, მინისტრის პირველი მოადგილე გურამ მისაბიშვილი, სამინისტროს იმერეთის, გურიის, რაჭა-ლეჩხუმისა და ქვემო სვანეთის რეგიონებისა და აჭარის ავტონომიური რესპუბლიკის ტერიტორიული ორგანოს ხელმძღვანელი ნათია კოპალიანი და სსიპ - „აფხაზეთიდან იძულებით გადაადგილებულ პირთა – დევნილთა მომსახურების სააგენტოს“ დირექტორი სალომე დოლიძე დაესწრნენ და ბავშვებს სამსახსოვრო საჩუქრები გადასცეს.

პროექტში 40-მდე აფხაზეთიდან დევნილმა ბავშვმა და მათმა მშობლებმა მიიღეს მონაწილეობა, რომლის მიზანი დაუნის სინდრომის საერთაშორისო დღის აღნიშვნა, შეზრუდულ შესაძლებლობებზე ცნობიერების ამაღლება, ახალი და ჯანსაღი მიდგომების ჩამოყალიბების ხელშეწყობაა.

„სასიამოვნო, თბილი და პოზიტიური განცდებია აფხაზეთიდან დევნილ ბავშვებთან და მათ მშობლებთან შეხვედრა, შთაბეჭდილებების გაცნობა და განსაკუთრებით მინდა ავღნიშნო მათი აქტიურობა, პროექტით დაინტერესება და ჩართულობის მაღალი სურვილი.

გარდა იმისა, რომ პროექტით დაგეგმილი აქტივობების მიზანია დევნილი მოსახლეობის ცნობიერების ამაღლება და შეზღუდულ შესაძლებლობებზე ჯანსაღი მიდგომების ჩამოყალიბების ხელშეწყობა, ვფიქრობ მსგავსი ტიპის გასვლითი ღონისძიებებით უფრო მეტად მოვახდენთ ჩვენი დევნილი მოსახლეობის ყოველდღიური ცხოვრების გახალისებასა და მათი სოციალური ურთიერთობების გაღრმავებას.

ჩვენი ერთ-ერთი ძირითადი პრიორიტეტი აფხაზეთიდან დევნილი, მათ შორის შეზღუდული შესაძლებლობების მქონე პირების საზოგადოებრივ ცხოვრებაში სრულყოფილად ჩართვის ხელშეწყობაა. ავღნიშნავ, რომ მსგავსი ღონისძიებები არ იქნება ერთჯერადი ხასიათის და მომავალშიც გავაგრძელებთ აფხაზეთიდან დევნილი მოსახლეობის მხარდამჭერი აქტივობების განხორციელებას.“- დავით ფაცაცია.

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე და მთავრობის თავმჯდომარის მოადგილე ანზორ მარგიანი ფოცხოეწერში პროექტის „დევნილ მოზარდთა სამოქალაქო ჩართულობის სივრცე“ დახურვის ღონისძიებას დაესწრნენ. პროექტი იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატის ქვეპროგრამის „სამოქალაქო ინტეგრაციის მხარდაჭერა“ ფარგლებში განხორციელდა.

პროექტის ფარგლებში, მინისტრის აპარატის მხარდაჭერით, აფხაზეთიდან დევნილმა 54 მოზარდმა შემეცნებითი და გასართობი ტრენინგები გაიარა. პროექტში მონაწილეებს სერტიფიკატები და სამახსოვრო საჩუქრები გადაეცათ.

ღონისძიებას აფხაზეთის ავტონომიური რესპუბლიკის მთავრობის და ადგილობრივი ხელისუფლების წარმომადგენლები ესწრებოდნენ.

იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატის ორგანიზებით ფოთში, აფხაზეთის 21-ე საჯარო სკოლის ბაზაზე დევნილი მოზარდებისთვის სოციალური სივრცე მოეწყო. ცენტრი აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ და იუსტიციისა და სამოქალაქო ინტეგრაციის საკითხებში აფხაზეთის მინისტრმა ნანა გაბელიამ გახსნეს.

ღონისძიებას აფხაზეთის მთავრობის თავმჯდომარის მოადგილე ანზორ მარგიანი, აფხაზეთის ავტონომიური რესპუბლიკის მთავრობის და ადგილობრივი ხელისუფლების წარმომადგენლები ესწრებოდნენ.

პროექტში 10-დან 18 წლამდე ასაკის აფხაზეთიდან დევნილი მოზარდები (50 ბენეფიციარი) ჩაერთვებიან. სამოქალაქო ჩართულობის სივრცე 2 თვის განმავლობაში იფუნქციონირებს და სხვადასხვა სახის სპორტული, საგანმანათლებლო და შემეცნებითი აქტივობების განხორციელებას ითვალისწინებს.

პროექტი ქვეპროგრამის ,,სამოქალაქო ინტეგრაციის მხარდაჭერა” ფარგლებში ხორციელდება და მისი მიზანია დევნილი ახალგაზრდების სამოქალაქო ინტეგრაციისა და სოციალიზაციის ხელშეწყობა, ფსიქოლოგიური და კეთილმოწყობილი უსაფრთხო გარემოს შექმნა, არაფორმალური განათლების მიღებისა და მულტიკულტურული საზოგადოებისთვის საჭირო უნარ-ჩვევების ჩამოყალიბება, სამოქალაქო აქტიურობისათვის მოტივაციის ამაღლება, ნიჭიერი ბავშვებისა და მოზარდების გამოვლენა და მათი შემდგომი წინსვლის ხელშეწყობა.

აფხაზეთიდან იძულებით გადაადგილებულ პირთა - დევნილთა მინისტრი დავით ფაცაცია, მინისტრის პირველი მოადგილე გურამ მისაბიშვილი და სენაკის მუნიციპალიტეტის მერი ვახტანგ გადელია სენაკში მცხოვრებ, აფხაზეთიდან იძულებით გადაადგილებულ პირებს შეხვდნენ, მათ საჭიროებებს გაეცნენ და აფხაზეთიდან იძულებით გადაადგილებულ პირთა-დევნილთა სამინისტროს „ადამიანის უფლებათა დაცვის საერთაშორისო კომისიისგან“ (IHRC) მიღებული სათამაშოები სენაკში მცხოვრებ, აფხაზეთიდან დევნილ ბავშვებს გადასცეს.
ჩემს პირველ მოადგილესთან, გურამ მისაბიშვილთან და სენაკის მუნიციპალიტეტის მერთან, ვახტანგ გადელიასთან ერთად, თბილი შეხვედრა გვქონდა სენაკში მცხოვრებ, აფხაზეთიდან დევნილ ბავშვებთან.
შეხვედრაზე „ადამიანის უფლებათა დაცვის საერთაშორისო კომისიისგან“ (IHRC) მიღებული ჰუმანიტარული დახმარება - სათამაშორები გადავეცით სენაკში მცხოვრებ, ჩვენს დევნილ ბავშვებს და მიხარია, რომ შევძელით მათი გახარება და კიდევ ერთი დღის გალამაზება.
მადლობას ვუხდი „ადამიანის უფლებათა დაცვის საერთაშორისო კომისიას“ (IHRC) მხარდაჭერისთვის და აქვე ავღნიშნავ, რომ მსგავსი ტიპის აქტივობები არ არის ერთჯერადი ხასიათის და გრძელდება მთელი ქვეყნის მასშტაბით.“ - დავით ფაცაცია.

 „აფხაზეთის ავტონომიური რესპუბლიკის განათლებისა და კულტურის სფეროში ნაყოფიერი მოღვაწეობისათვის, აფხაზეთის პრობლემატიკის ობიექტური საინფორმაციო უზრუნველყოფის საქმეში შეტანილი განსაკუთრებული წვლილისათვის, აქტიური სახელმწიფოებრივი, ეროვნული და მოქალაქეობრივი პოზიციისათვის“  აფხაზეთის ავტონომიური რესპუბლიკის განათლებისა და კულტურის მინისტრი ეკა ხოფერია  აფხაზეთის ავტონომიური რესპუბლიკის უმაღლესი საბჭოს საპატიო სიგელით დაჯილდოვდა.

მინისტრს სიგელი აფხაზეთის ავტონომიური რესპუბლიკის უმაღლესი საბჭოს თავმჯდომარის მოადგილემ თამაზ ხუბუამ და საერთაშორისო ურთიერთობათა, განათლებისა და კულტურის კომიტეტის თავმჯდომარემ ნუგზარ მგალობლიშვილმა გადასცეს.

15 მარტს ქართული არტილერიის დღე აღინიშნება. ამ დღესთან დაკავშირებით აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ და მთავრობის თავმჯდომარის მოადგილე ანზორ მარგიანმა გმირთა მოედანზე, საქართველოს ტერიტორიული მთლიანობისთვის დაღუპულთა მემორიალი გვირგვინით შეამკეს და მათ ხსოვნას პატივი მიაგეს.

მემორიალთან აფხაზეთიდან იძულებით გადაადგილებულ პირთა - დევნილთა მინისტრი დავით ფაცაცია, აფხაზეთის ჯანმრთელობისა და სოციალური დაცვის მინისტრი ლევან ჩაკვეტაძე, იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრი ნანა გაბელია, აფხაზეთის ფინანსთა და ეკონომიკის მინისტრი ლევან თევზაია და აფხაზეთის მთავრობის წარმომადგენლები იმყოფებოდნენ.

1993 წლის 15-16 მარტს აფხაზეთში სეპარატისტებმა, დაქირავებულმა ბოევიკებმა და სადესანტო შენაერთებმა მდინარე გუმისთის გასწვრივ არსებულ 8 კმ-იან ფრონტის ხაზზე ფართომასშტაბიანი შეტევა დაიწყეს. ქართულმა შეიარაღებულმა ძალებმა და არტილერიამ სოხუმისკენ წამოსულ მოწინააღმდეგეს გამანადგურებელი დარტყმა მიაყენა და იძულებული გახადა უკან დაეხია. უთანასწორო ბრძოლაში ქართველმა მებრძოლებმა საკუთარი სიცოცხლის და ჯანმრთელობის ფასად ათასობით მშვიდობიანი მოქალაქე გადაარჩინეს.

რუსეთის ფედერაციის მიერ აფხაზეთის რეგიონში მიმდინარე უკანონო ოკუპაციის, ეთნიკური წმენდისა და ფაქტობრივი ანექსიისაკენ გადადგმული ნაბიჯების ლეგიტიმაციის მორიგ უშედეგო მცდელობას წარმოადგენს ე.წ. არჩევნების ჩატარება.

ე.წ. არჩევნები აგრეთვე წარმოადგენს საქართველოს სუვერენიტეტისა და ტერიტორიული მთლიანობის წინააღმდეგ მიმართულ მორიგ უკანონო ქმედებას და უხეშად არღვევს საერთაშორისო სამართლის ნორმებსა და პრინციპებს.

ხსენებულ ე.წ. არჩევნებს ვერანაირი სამართლებრივი შედეგები ვერ ექნება, რადგან აფხაზეთის რეგიონში ეთნიკური წმენდის შედეგად გამოდევნილია ადგილობრივი მოსახლეობის უმრავლესობა, ხოლო ადგილზე დარჩენილი მოსახლეობის ნაწილი მუდმივი ძალადობისა და ზეწოლის ქვეშ იმყოფება, რადგან ეფექტური კონტროლი ხორციელდება საოკუპაციო ძალის მიერ.

აფხაზეთის მთავრობა მოუწოდებს საერთაშორისო თანამეგობრობას, რომელიც ცნობს საქართველოს სუვერენიტეტსა და ტერიტორიულ მთლიანობას საერთაშორისოდ აღიარებულ საზღვრებში და სთხოვს აღნიშნული ქმედება შეფასდეს სათანადოდ.