საგარეო საქმეთა სამინისტროში გაიმართა ჟენევის საერთაშორისო მოლაპარაკებების 55-ე რაუნდის მოსამზადებელი შეხვედრა თანათავმჯდომარეებთან- ევროკავშირის, გაეროსა და ეუთოს მხრიდან. შეხვედრას ქართული მხრიდან ხელმძღვანელობდა საგარეო საქმეთა მინისტრის პირველი მოადგილე და ჟენევის მოლაპარაკებებში საქართველოს დელეგაციის ხელმძღვანელი ლაშა დარსალია. შეხვედრაში აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე მონაწილეობდა.

შეხვედრაზე მხარეებმა განიხილეს მოლაპარაკებების მომდევნო, 55-ე რაუნდის დღის წესრიგის საკითხები და რუსეთის უკანონო ქმედებები, რომლებიც იწვევს ადგილზე უსაფრთხოებისა და ჰუმანიტარული ვითარების გაუარესებას.

ქართულმა დელეგაციამ განსაკუთრებული შეშფოთება გამოთქვა რუსეთის მიერ აფხაზეთის და ცხინვალის რეგიონების ფაქტობრივი ანექსიისკენ გადადგმული ნაბიჯების გამო, მათ შორის რუსეთსა და აფხაზეთის რეგიონს შორის ერთიანი სოციალურ-ეკონომიკური სივრცის შექმნის შესახებ „პროგრამის” განხორციელების თვალსაზრისით მიმდინარე სამუშაოებზე, ასევე საოკუპაციო რეჟიმებთან ბოლო პერიოდში დადებულ ე.წ. შეთანხმებებზე, რომელთა მიზანია საქართველოს ოკუპირებული რეგიონების რუსეთის სხვადასხვა სისტემაში ინტეგრაცია.

განხილულ იქნა ოკუპირებულ ტერიტორიებზე ევროკავშირის შუამავლობით დადებული 2008 წლის 12 აგვისტოს ცეცხლის შეწყვეტის შეთანხმების დარღვევით მიმდინარე მილიტარიზაცია და უკანონო სამხედრო წვრთნები, ასევე საოკუპაციო ხაზის მავთულხლართებითა და სხვადასხვა ხელოვნური ბარიერებით გამაგრების მიზნით, განხორციელებული სამუშაოები, რაც ქმნის ვითარების ესკალაციის რისკს და ამავდროულად წარმოშობს მძიმე ჰუმანიტარულ შედეგებს.

მინისტრის პირველმა მოადგილემ განსაკუთრებული ყურადღება დაუთმო საქართველოს მოქალაქეთა გატაცებისა და უკანონო დაკავების შემთხვევებს და დასვა საკითხი ცხინვალსა და სოხუმში უკანონოდ დაკავებული საქართველოს მოქალაქეების, მათ შორის ირაკლი ბებუას ყოველგვარი წინაპირობების გარეშე, დაუყოვნებლივ გათავისუფლების შესახებ.

ადგილზე გახშირებული პროვოკაციების ფონზე, ხაზი გაესვა გალში ინციდენტების პრევენციისა და მათზე რეაგირების მექანიზმის შეხვედრების ყოველგვარი წინაპირობების გარეშე აღდგენისა და ერგნეთსა და გალში IPRM-ების შეხვედრების შეუფერხებლად და ეფექტიანად ფუნქციონირების აუცილებლობას.

მწვავედ დაისვა ქართველების ეთნიკური ნიშნით დისკრიმინაციის და მშობლიურ ენაზე განათლების მიღების აკრძალვის საკითხები. ასევე, აქცენტი გაკეთდა ცხინვალის რეგიონის საოკუპაციო ხაზზე ე.წ. გადასასვლელი პუნქტების ხანგრძლივი დახურვის შედეგად გამოწვეულ უმძიმეს ჰუმანიტარულ შედეგებზე ახალგორის რაიონში.

საქართველოს დელეგაციამ თანათავმჯდომარეებთან შეხვედრაზე კვლავ გაუსვა ხაზი დავით ბაშარულის, გიგა ოთხოზორიასა და არჩილ ტატუნაშვილის სიცოცხლის ხელყოფის საქმეებზე მართლმსაჯულების აღსრულების საჭიროებას და აფხაზეთის რეგიონში რუსეთის სამხედრო ბაზაზე ირაკლი კვარაცხელიას გარდაცვალების ფაქტს.

შეხვედრაზე აღინიშნა ჟენევის საერთაშორისო მოლაპარაკებების ფორმატში კონფლიქტით დაზარალებული მოსახლეობის უსაფრთხოებისა და ჰუმანიტარული პრობლემების გადაჭრის მნიშვნელობა და პროგრესის მიღწევის საჭიროება დღის წესრიგის მთავარ საკითხებზე, როგორიცაა რუსეთის მიერ 2008 წლის 12 აგვისტოს ცეცხლის შეწყვეტის შეთანხმებით ნაკისრი საერთაშორისო ვალდებულებების შესრულება, კერძოდ, საოკუპაციო ძალების საქართველოს ტერიტორიიდან გაყვანა, ძალის არგამოყენება და ადგილზე უსაფრთხოების საერთაშორისო მექანიზმების შექმნა, აგრეთვე იძულებთ გადაადგილებულ პირთა და ლტოლვილთა უსაფრთხო და ღირსეული დაბრუნება. მხარეებმა იმსჯელეს ამ მიზნით მოლაპარაკებების ეფექტიანად გამოყენებისთვის შესაძლო გზების გამონახვაზე.

ჟენევის საერთაშორისო მოლაპარაკებების 55-ე რაუნდი 2021 წლის 7-8 დეკემბერს გაიმართება.

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე სამოქალაქო ინტეგრაციის აკადემია აფხაზეთიდან დევნილი ბავშვებისთვის პროექტში მონაწილეების დაჯილდოებას დაესწრო.

ღონისძიებაზე მისასალმებელი სიტყვით გამოვიდნენ მთავრობის თავმჯდომარე რუსლან აბაშიძე და  იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრი ნანა გაბელია, რომლებმაც ახალგაზრდებს კურსის წარმატებით დასრულება მიულოცეს,  სერტიფიკატები გადასცეს და შემდგომი წარმატებები უსურვეს.

კონკურსის შედეგად შერჩეულ, აფხაზეთიდან დევნილ 20 ახალგაზრდას  სამოქალაქო ინტეგრაციის მიმართულებით ხუთდღიანი სასწავლო კურსი ჩაუტარდა.  მონაწილეებს  საქართველოს ახალგაზრდობის წარმომადგენელმა გაეროში ნინო გოგოხიამ სხვადასხვა საერთაშორისო პროექტებში მიღებული გამოცდილება გაუზიარა. პროგრამის დასასრულს ახალგაზრდებმა კურსის ფარგლებში  მომზადებული პრეზენტაციები წარადგინეს.

პროექტი იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატის ორგანიზებით განხორციელდა და მისი მიზანია ახალგაზრდებში სამოქალაქო ინტეგრაციის საკითხებზე ცოდნის მიღება, აქტიურ მოქალაქეებად ჩამოყალიბების ხელშეწყობა და ახალი უნარების განვითარება.

13 ნოემბერს აფხაზეთის გურამ ყურაშვილის სახელობის სახელმწიფო საგუნდო კაპელამ (სამხატვრო ხელმძღვანელი და დირიჟორი ზვიად ბოლქვაძე) ქ. ბათუმის მუსიკალური ცენტრის დარბაზში „კლასიკური მუსიკის კონცერტი“ გამართა.

კონცერტი საქართველოს კულტურის, სპორტისა და ახალგაზრდობის სამინისტროს კონკურსის - „კლასიკური მუსიკის კონცერტებისა და საბალეტო წარმოდგენების ხელშეწყობა თბილისსა და რეგიონებში“ - ფარგლებში ჩატარდა.

აფხაზეთის კაპელა დამსწრეთ წარუდგინა აფხაზეთის ავტონომიური რესპუბლიკის განათლებისა და კულტურის მინისტრმა ეკა ხოფერიამ. კონცერტს ესწრებოდა აჭარის ავტონომიური რესპუბლიკის განათლების, კულტურისა და სპორტის მინისტრი მაია ხაჯიშვილი.

ქ. ბათუმის მუსიკალურ ცენტრში, აფხაზეთის საგუნდო კაპელის კონცერტის პარალელურად, აფხაზეთის ავტონომიური რესპუბლიკის განათლებისა და კულტურის სამინისტროს ფოტოგამოფენა - „კადრები აფხაზეთიდან“ - მოეწყო. აქვე  მინისტრი ეკა ხოფერია შეხვდა სოფელ ფერიის საჯარო სკოლის მოსწავლეებს, რომელთა მშობლებიც აფხაზები არიან და აქ მუჰაჯირობის ან ბოლო დროინდელი მოვლენების გამო გადმოსახლდნენ. ეკა ხოფერია პედაგოგებსა და მოსწავლეებს მომავალ თანამშრომლობაზეც ესაუბრა.

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე საქართველოში რუმინეთის საგანგებო და სრულუფლებიან ელჩ რეზვან როტუნდუს შეხვდა.

მთავრობის თავმჯდომარემ რუმინელ დიპლომატს მიაწოდა ინფორმაცია ოკუპირებულ აფხაზეთში არსებული მდგომარეობის შესახებ. რუსლან აბაშიძემ ისაუბრა საოკუპაციო რეჟიმის მხრიდან ადგილობრივი მოსახლეობის ფუნდამენტური უფლებების დარღვევის ფაქტებზე.

შეხვედრაზე მხარეებმა ერთობლივი პროგრამების განხორციელების და სამომავლო თანამშრომლობის  შესაძლებლობები განიხილეს. ელჩმა მზადყოფნა გამოთქვა დევნილი საზოგადოების ჩართულობით სხვადასხვა ინიციატივების მხარდასაჭერად.

რუმინელმა დიპლომატმა კიდევ ერთხელ დაადასტურა მისი ქვეყნის ურყევი პოზიცია და სრული მხარდაჭერა საქართველოს ტერიტორიული მთლიანობის მიმართ.

ნანა გაბელიამ აფხაზეთის უმაღლეს საბჭოს სესიაზე მინისტრის აპარატის საქმიანობასა და სამომავლო გეგმებზე ისაუბრა

იუსტიციისა და სამოქალაქო ინტეგრაციის საკითხებში აფხაზეთის მინისტრმა ნანა გაბელიამ ინტერპელაციის წესის შესაბამისად, აფხაზეთის ავტონომიური რესპუბლიკის უმაღლესი საბჭოს დეპუტატების მიერ დასმულ შეკითხვებს დეტალურად უპასუხა.

მინისტრმა ასევე მიმოიხილა უწყების საქმიანობა, ისაუბრა დღეს არსებულ გამოწვევებსა და სამინისტროს სამომავლო სტრატეგიაზე. ასევე, მინისტრის აპარატის მიერ უკვე განხორციელებულ პროექტებზე, მათ შედეგებსა და მიმდინარე პროგრამებზე.

„ჩართულობის სტრატეგიის სამოქმედო გეგმის“ ფარგლებში მინისტრის აპარატის კომპეტენციებისა და საქმიანობის ძირითადი მიმართულებების გათვალისწინებით, აქტიურად ვმუშაობთ, რათა შევძლოთ მაქსიმალურის გაკეთება უწყების ეფექტიანი საქმიანობისთვის. უმაღლესი საბჭოს დეპუტატებს შეკითხვის ფარგლებში, ასევე მივაწოდე ინფორმაცია იმ კრიტერიუმებზე, რომლითაც ვხელმძღვანელობთ მინისტრის აპარატში კადრების შერჩევისას“ - განაცხადა ნანა გაბელიამ.

აფხაზეთის ფინანსთა და დარგობრივი ეკონომიკის სამინისტროს მხარდაჭერით, აფხაზეთიდან დევნილმა ხუთმა ბენეფიციარმა პროფესიული გადამზადების კურსი ესთეტიკის აკადემია „კურაჟში“ დაიწყო. პროგრამის მონაწილეებს, აფხაზეთის ფინანსთა და დარგობრივი ეკონომიკის მინისტრის მოადგილე, გიორგი ჯინჭარაძე, ა(ა)იპ ,,საერთაშორისო ინიციატივა განვითარებისა და თანადგომისათვის” დირექტორთან, ვახტანგ ფოჩხუათან ერთად შეხვდა და სასწავლო პირობებს ადგილზე გაეცნო. პროფესიული გადამზადების კურსი ა(ა)იპ ,,საერთაშორისო ინიციატივა განვითარებისა და თანადგომისათვის“ ქვეპროგრამის - ,,მცირე ბიზნესის გენერირებისა და მატერიალური მხარდაჭერა’’ ფარგლებში ხორციელდება. პროგრამის მიზანია დევნილი ბენეფიციარების სხვადასხვა პროფესიული მიმართულებით გადამზადება და მათი დასაქმების ხელშეწყობა.

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე ფოცხოეწერში პროექტის „დევნილ მოზარდთა სამოქალაქო ჩართულობის სივრცე“ გახსნას დაესწრო. პროექტი იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატის ქვეპროგრამის „სამოქალაქო ინტეგრაციის მხარდაჭერა“ ფარგლებში ხორციელდება.

ღონისძიებას იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრი ნანა გაბელია, სამეგრელო-ზემო სვანეთის გუბერნატორის პირველ მოადგილე ნინო ვიბლიანი და ადგილობრივი ხელისუფლების წარმომადგენლები ესწრებოდნენ.

საპილოტე პროექტის ფარგლებში ფოცხოეწერში მცხოვრები 4-17 წლის ასაკის დევნილი ბავშვებისა და მოზარდებისთვის (47 ბენეფიციარი) სოციალური სივრცე შეიქმნა. პროექტი ბენეფიციარებისთვის სხვადასხვა სახის სპორტული, საგანმანათლებლო და შემეცნებითი აქტივობების განხორციელებას ითვალისწინებს.

პროექტი 2 თვის განმავლობაში გაგრძელდება და მისი მიზანია დევნილი ახალგაზრდების სამოქალაქო ინტეგრაციისა და სოციალიზაციის ხელშეწყობა, ფსიქოლოგიური და კეთილმოწყობილი უსაფრთხო გარემოს შექმნა, არაფორმალური განათლების  მიღებისა და   მულტიკულტურული საზოგადოებისთვის საჭირო უნარ-ჩვევების  ჩამოყალიბება, სამოქალაქო აქტიურობისათვის მოტივაციის ამაღლება, ნიჭიერი  ბავშვებისა და მოზარდების  გამოვლენა და მათი  შემდგომი  წინსვლის ხელშეწყობა.

აფხაზეთის ავტონომიური რესპუბლიკის მთავრობა არ ადასტურებს გავრცელებულ ინფორმაციას აფხაზეთიდან იძულებით გადაადგილებულ პირთა ზუგდიდის დევნილთა პოლიკლინიკის გასხვისებასთან დაკავშირებით. აფხაზეთიდან იძულებით გადაადგილებულ პირთა ზუგდიდის დევნილთა პოლიკლინიკას დაფუძნების დღიდან, აფხაზეთის ფინანსთა და დარგობრივი ეკონომიკის სამინისტრო მართავს და მის დაქვემდებარებაშია.

არანაირი სამართლებრივი აქტი არ არსებობს პოლიკლინიკის გასხვისებასთან დაკავშირებით და ეს საკითხი აფხაზეთის მთავრობაში არც განხილულა. პოლიკლინიკა ჩვეულ რეჟიმში, სამინისტროს დაქვემდებარების ქვეშ აქტიურად აგრძელებს მუშაობას და პაციენტების მიღებას.

გავრცელებული ინფორმაცია არის დეზინფორმაცია და მიზნად ისახავს საზოგადოების შეცდომაში შეყვანას.

აფხაზეთის ფინანსთა და დარგობრივი ეკონომიკის სამინისტროს მხარდაჭერით აფხაზეთიდან დევნილი ოთხი ბენეფიციარი კოლეჯ „მოდუსში“ პროფესიული გადამზადების ორთვიან კურსს გაივლის. დღეს, პროგრამის მონაწილეებს აფხაზეთის ფინანსთა და დარგობრივი ეკონომიკის მინისტრის მოადგილე გიორგი ჯინჭარაძე, ,,საერთაშორისო ინიციატივა განვითარებისა და თანადგომისათვის” დირექტორ ვახტანგ ფოჩხუათან ერთად შეხვდა და სასწავლო პირობებს ადგილზე გაეცნო. პროფესიული გადამზადების პროგრამა აფხაზეთის ფინანსთა და დარგობრივი ეკონომიკის სამინისტროს „საერთაშორისო ინიციატივა განვითარებისა და თანადგომისათვის“ და კოლეჯ „მოდუსი“-ს თანამშრომლობის ფარგლებში ხორციელდება. პროგრამის მიზანია დევნილი ბენეფიციარების სხვადასხვა პროფესიული მიმართულებით გადამზადება და მათი დასაქმების ხელშეწყობა.

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე საქართველოში ავსტრიის რესპუბლიკის საგანგებო და სრულუფლებიან ელჩ თომას მიულმანს შეხვდა.

რუსლან აბაშიძემ ავსტრიელ დიპლომატს ოკუპირებულ აფხაზეთში არსებული მდგომარეობის შესახებ ინფორმაცია მიაწოდა. მთავრობის თავმჯდომარემ ისაუბრა ადამიანის ფუნდამენტური უფლებების დარღვევის ფაქტებზე, განსაკუთრებული ყურადღება გაამახვილა გალის რაიონის სკოლებში ქართულ ენაზე განათლების მიღების აკრძალვისა და თავისუფალი გადაადგილების საკითხებზე. შეხვედრაზე მხარეებმა სამომავლო თანამშრომლობის შესაძლებლობები განიხილეს.

ავსტრიის რესპუბლიკის ელჩმა კიდევ ერთხელ დაადასტურა მისი ქვეყნის მთავრობის მტკიცე მხარდაჭერა საქართველოს სუვერენიტეტის და ტერიტორიული მთლიანობის პოლიტიკის მიმართ.

აფხაზეთის ავტონომიური რესპუბლიკის განათლებისა და კულტურის სამინისტროს სალექციო კვირეულის - „აღმოაჩინე აფხაზეთის“ - რიგით მეხუთე და წლეულს უკვე ბოლო ლექცია მწერალმა დათო ტურაშვილმა ქუთაისის საერთაშორისო უნივერსიტეტში წაიკითხა. საუბრის თემა ისევ აფხაზეთი და მასთან დაკავშირებული ამბები თუ ემოციები იყო.

სტუმარი დამსწრეთ წარუდგინა აფხაზეთის ავტონომიური რესპუბლიკის განათლებისა და კულტურის მინისტრმა ეკა ხოფერიამ.

ლექციას ესწრებოდნენ ქუთაისის საერთაშორისო უნივერსიტეტის სტუდენტები და ქუთაისში განთავსებული აფხაზეთის საჯარო სკოლის მოსწავლეები.