მთავრობის აპარატი
ახალი ამბები
აფხაზეთის ოკუპირებულ ტერიტორიაზე განათლების სისტემაში არსებულ პრობლემებზე იმსჯელეს დღეს ტერიტორიული მთლიანობის აღდგენის საკითხთა დროებითი კომისიის, საგარეო ურთიერთობათა, განათლების, მეცნიერებისა და კულტურის და დიასპორის და კავკასიის საკითხთა კომიტეტების ერთობლივ სხდომაზე.
დღევანდელი სხდომის მიზანი ხელისუფლების ყველა შტოს პოლიტიკური, სამართლებრივი და დიპლომატიური ძალისხმევის გააქტიურებაა გალის რაიონის მკვიდრთა განათლების უფლების დასაცავად, ასევე, საკითხის შემდგომი აქტუალიზაცია, საერთაშორისო ორგანიზაციების გააქტიურების მიღწევა, რათა ოკუპირებულ ტერიტორიაზე განხორციელდეს ადამიანის უფლებათა საერთაშორისო სამართლით გარანტირებული განათლების უფლების მონიტორინგი.
აფხაზეთის ოკუპირებულ ტერიტორიაზე განათლების მდგომარეობის შესახებ ინფორმაცია დეპუტატებს აფხაზეთის ავტონომიური რესპუბლიკის განათლებისა და კულტურის მინისტრის მოადგილემ, მანანა ქვაჩაკიამ გააცნო. მისი თქმით, ოკუპირებულ ტერიტორიაზე კვლავ გრძელდება ქართული მოსახლეობის უფლებების შელახვა. მისივე განცხადებით, ამ მხრივ, უკიდურესად არის ვითარება გამწვავებული გალის რაიონში, რომელიც მუდამ იყო და დღესაც რჩება უპირატესად ქართულ რეგიონად. „კონფლიქტის დასრულებიდან 20 წლის განმავლობაში ოკუპანტები და სეპარატისტები თანმიმდევრულად ეწევიან ადგილობრივი მოსახლეობის წინააღმდეგ ფიზიკური და კულტურული გენოციდის მიზანმიმართულ პოლიტიკას. გალის რაიონის მოსახლეობა აღნიშნული პოლიტიკის გავლენით ამჟამად განახევრებულია, და ეს მაშინ, როდესაც ის ომამდე უტოლდებოდა მთელ აფხაზეთში ეთნიკური აფხაზი ეროვნების ადამიანების რაოდენობას. რაიონს აკონტროლებენ რუსული საოკუპაციო ძალები. მოქალაქეები ელემენტარულ ადამიანურ უფლებებს არიან მოკლებულნი", - აღნიშნა მინისტრის მოადგილემ. მისი ინფორმაციით, ოკუპანტები და სეპარატისტები ცდილობენ დემოგრაფიული მდგომარეობის ძალადობრივ შეცვლას და იძულებით რუსიფიკაციას;შეიცვალა რაიონის ადმინისტრაციული საზღვრები, მოსახლეობის უმრავლესობა კანონგარეშე არის გამოცხადებული; ქართველებს ჩამოართვეს პირადობის დამადასტურებელი საბუთები.
მანანა ქვაჩაკიამ ოკუპირებული გალის რაიონის საგანმანათლებლო სისტემის მდგომარეობა მიმოიხილა, ზოგადსაგანმანათლებლო სკოლებში სწავლების ენისა და სტატუსის შესახებ ისაუბრა და მოსწავლეთა და მასწავლებელთა უფლებების დარღვევის ზოგადი სურათი და ფაქტები გააცნო დეპუტატებსა და მოწვეულ სტუმრებს. ასევე, ისაუბრა მშობლიურ ენაზე განათლების მიღების უფლების შეზღუდვით გამოწვეულ იძულებით გადაადგილებაზე ოკუპირებული ტერიტორიიდან საქართველოს მიერ კონტროლირებად ტერიტორიაზე. მინისტრის მოადგილემ ყურადღება გაამახვილა ოკუპირებული ტერიტორიის სკოლებში სწავლების რუსულ სტანდარტზე გადაყვანის კონკრეტულ ღონისძიებებსა და ფაქტებზე.
განათლების სისტემაში, მისი განცხადებით, მძიმე მდგომარეობაა. ოკუპანტები და სეპარატისტები კატეგორიულად კრძალავენ მშობლიურ ენაზე განათლების მიღებას. „ომამდე, იქ არსებული ზოგადსაგანმანათლებლო 58 სკოლიდან, მხოლოდ ორი იყო რუსული, დანარჩენში სწავლება ქართულ ენაზე მიმდინარეობდა. ამჟამად გალის რაიონში 31 სკოლაა, აქედან 20 ქართული სკოლა იძულებითი წესით რუსულ სწავლებაზეა გადაყვანილი, დანარჩენი 11 სკოლა გასული წლის სექტემბრიდან ეტაპობრივად გადაჰყავთ რუსულენოვან სწავლებაზე, და ეს ხდება მაშინ, როდესაც რაიონში მოსწავლეთა კონტიგენტის 98 %-ს ქართველები შეადგენენ", - განაცხადა მანანა ქვაჩაკიამ. მისი თქმით, ტყვარჩელის და ოჩამჩირის რაიონის სკოლებსა და საბავშვო ბაღებში 2008 წლიდან მთლიანად აიკრძალა ქართულ ენაზე სწავლება, ქართული სახელმძღვანელოების გამოყენება, საქართველოს ისტორიისა და გეოგრაფიის შესწავლა. მისივე ინფორმაციით, სასკოლო ატესტატებში მოსწავლეებს მშობლიურ ენად უწერენ არა ქართულს ან აფხაზურს, არამედ რუსულ ენას. დარღვეულია ქართველი მასწავლებლებისა და მოსწავლეების უფლება, ასწავლონ და ისწავლონ მშობლიურ ენაზე.
მანანა ქვაჩაკიამ ისაუბრა, ასევე, საქართველოში მიმდინარე სხვადასხვა კულტურულ-საგანმანათლებლო პროგრამასა და პროექტში გალის რაიონის მოსწავლე-ახალგაზრდობისა და პედაგოგთა ჩართულობაზე.
აფხაზეთის ავტონომიური რესპუბლიკის მთავრობის თავმჯდომარის, ვახტანგ ყოლბაიას მოსაზრებით, ეს საკითხი მტკივნეულია არა მხოლოდ აფხაზეთის მოსახლეობისთვის, არამედ სრულიად საქართველოსთვის. მისი თქმით, აღნიშნულ თემაზე როგორც გაეროს ტრიბუნიდან, ასევე პრეზიდენტის, პრემიერის და სხვადასხვა საერთაშორისო ორგანიზაციების ტრიბუნიდან არაერთხელ გაჟღერებულა. „ჩვენი იურისდიქცია არ ვრცელდება ოკუპირებულ ტერიტორიაზე. სხვადასხვა უწყებები დიპლომატიურ ურთიერთობებით ცდილობენ ამ რთული საკითხის მოგვარებას", - აღნიშნა ვახტანგ ყოლბაიამ.
დროებითი კომისიის თავმჯდომარის, გიორგი ვოლსკის განმარტებით, არის თემები, რომელზეც ქართულმა საზოგადოებამ არ იცის და ეს თემები არ უნდა დავივიწყოთ. „დღევანდელი ინფორმაცია, რომელიც მოვისმინეთ, მნიშვნელოვანია. ჩვენს საზოგადოებას სჭირდება გზავნილი, რომ იყოს მობილიზებული და არამარტო ჩვენს საზოგადოებას", - აღნიშნა გიორგი ვოლსკიმ. იგი კულტურულ მემკვიდრეობასთან დაკავშირებით წლის ბოლოს საერთაშორისო კონფერენციის გამართვას გეგმავს. „ყველა საკითხს, რაც აქ ითქვა, კრიტიკული იყო თუ არა, აქვს თავისი ნიშა. მოდით, ვიმუშაოთ იმ თემებზე, რაც დღეს სხდომაზე მოვისმინეთ", - განაცხადა დროებითი კომისიის თავმჯდომარემ.
აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია ვეტერანების საქმეთა სახელმწიფო სამსახურის დირექტორს კობა კობალაძეს შეხვდა.
შეხვედრა გაცნობითი ხასიათის იყო, სადაც სტრუქტურებს შორის თანამშრომლობის გაღრმავებაზე, არსებულ მემორანდუმში დამატებით პუნქტებისა და მასში ცვლილებების შეტანის შესახებ ისაუბრეს.
აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ აფხაზეთის მთავრობის დაქვემდებარებაში მყოფი ვეტერანთა პრობლემებზე მომუშავე სტრუქტურის შექმნის შესახებ ისაუბრა.
შეხვედრაზე დაიგეგმა ვეტერანებთან მიმართებაში ქმედითი პროგრამების შემუშავება, რაც ხელს შეუწყობს მათი სოციალურ-ეკონომიკური მდგომარეობის გაუმჯობესებას.
სამუშაო შეხვედრაზე აფხაზეთის ავტონომიური რესპუბლიკის მთავრობის წევრები, ვეტერანების საქმეთა სახელმწიფო სამსახურის თანამშრომლები და აფხაზეთიდან დევნილი ვეტერანები იმყოფებოდნენ.
აფხაზეთის ავტონომიური რესპუბლიკის მთავრობა ღრმა მწუხარებას გამოთქვამს 14 აპრილს იაპონიის სამხრეთ ნაწილში მომხდარი ტრაგედიის გამო. მიწისძვრამ ათეულობით ადამიანის სიცოცხლე შეიწირა და ასეულობით დაშავდა.
აფხაზეთის ავტონომიური რესპუბლიკის მთავრობა თანაგრძნობას უცხადებს იაპონიის ხელისუფლებასა და უსამძიმრებს გარდაცვლილთა ოჯახებს.
ზუგდიდის დევნილთა ახალ დასახლებაში რამდენიმე დღის წინ სასმელი წყლის დაბინძურების ფაქტი დაფიქსირდა, რამაც 110 ადამიანის მოწამლვა გამოიწვია. წყლის დაბინძურება სურსათის უვნებლობის სამსახურმა დაადასტურა.
აღნიშნული ფაქტის აღმოსაფხვრელად ადგილობრივი ჯანდაცვის სამსახურის, აფხაზეთის დევნილთა პოლიკლინიკისა და ინფექციური საავადმყოფოს ერთობლივი მოქმედებით პრევენციული ღონისძიებები გატარდა.
დევნილთა დასახლებაში სამეგრელო-ზემო სვანეთში აფხაზეთის ავტონომიური რესპუბლიკის მთავრობის წარმომადგენლობის, საქართველოს ოკუპირებული ტერიტორიებიდან იძულებით გადაადგილებულ პირთა, ლტოლვილთა და განსახლების სამინისტროს სამეგრელო-ზემო სვანეთის რეგიონალური სამმართველოსა და ადგილობრივი ხელისუფლების წარმომადგენლები ყოველდღიურ მონიტორინგს ახორციელებენ.
ადგილზე ზუგდიდის მუნიციპალიტეტის საკრებულოს თავმჯდომარე მერაბ ქვარაია, მერიის ზედამხედველობის სამსახურის უფროსი ნუკრი ესართია, ზუგდიდის მუნიციპალიტეტის საზოგადოებრივი ჯანდაცვის ცენტრის ხელმძღვანელი ნანა ოდიშარია და სამეგრელო-ზემო სვანეთში აფხაზეთის ავტონომიური რესპუბლიკის მთავრობის წარმომადგენლობის ხელმძღვანელი ალექსანდრე ჩიკვაიძე იმყოფებოდნენ, პრობლემებს გაეცნნენ და მათი გადაჭრის გზებზე ისაუბრეს.
დღეს, თბილისის ახალ სპორტის სასახლეში „სოხუმისა" და „დინამოს" საკალათბურთო გუნდებს შორის შეხვედრა გაიმართა. მატჩი თბილისის დინამოს მცირედი უპირატესობით, ანგარიშით 67:62 დასრულდა.
საკალათბურთო მატჩს აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, აფხაზეთის ავტონომიური რესპუბლიკის მთავრობის წევრები და თანამშრომლები ესწრებოდნენ.
აფხაზეთის სულიერებისა და კულტურის ცენტრში ქართული ენის დღისადმი მიძღვნილი ღონისძიება „ენა დედაა ერისა" მოეწყო.
ღონისძიებაში მონაწილეობა მარნეულის რაიონის აზერბაიჯანული, აფხაზეთის #2 და #3 საჯარო სკოლების მოსწავლეებმა და საქველმოქმედო სახლის „მომავლის გზა" აღსაზრდელებმა მიიღეს, ასევე მკვლევარ-ფილოლოგ მარინე კოლხიდაშვილთან შეხვედრა გაიმართა.
ღონისძიებას აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, აფხაზეთის განათლებისა და კულტურის სამინისტროს წარმომადგენლები და იაკობ გოგებაშვილის შთამომავალი ლილი გოგებაშვილი ესწრებოდნენ.
იმავე დღეს კორნელი კეკელიძის სახელობის ხელნაწერთა ეროვნული ცენტრის პროექტის „გზად დედა ენისაკენ" პრეზენტაცია გაიმართა და ილია ჭავჭავაძის მემორიალურ მუზეუმში ლიტერატურული კომპოზიცია „ვადიდოთ ენა ქართული" მოეწყო.
ასევე, ღონისძიებაზე დამსწრე საზოგადოებამ დედა ენის ძეგლი ყვავილებით შეამკეს.
აფხაზეთის ავტონომიური რესპუბლიკის მთავრობისა და აფხაზეთის ავტონომიური რესპუბლიკის უმაღლესი საბჭოს წევრებმა საქართველოს სახელმწიფოებრივი დამოუკიდებლობის აღდგენისა და სამშობლოსთვის დაღუპულთა ხსოვნის დღესთან დაკავშირებით, 1989 წლის 9 აპრილს დაღუპულ გმირთა მემორიალი გვირგვინით შეამკეს.
დღესვე, აფხაზეთის ხელისუფლების წარმომადგენლები სამების საკათედრო ტაძარში, აფხაზეთის ომის დროს ბაბუშერის აეროპორტში, თვითმფრინავის აფეთქებისას დაღუპული მებრძოლების სამოქალაქო პანაშვიდს დაესწრნენ და გარდაცვლილთა ხსოვნას პატივი მიაგეს.
აფხაზეთის ომის დროს ბაბუშერის აეროპორტში თვითმფრინავის აფეთქებისას დაღუპული 12 მებრძოლის ნეშტი დიღმის ძმათა სასაფლაოზე დღეს სამხედრო პატივით დაკრძალეს.
6-7 აპრილს აფხაზეთის ავტონომიური რესპუბლიკის მთავრობის, აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტროსა და შპს „ბაზი"-ს აღდგენითი ცენტრის თანამშრომლობითა და მხარდაჭერით ქ.თბილისის დევნილთა მე-2 და მე-3 საჯარო სკოლებში 200 მოსწავლეს აღნაგობის დარღვევის გამოსავლენად პროფილაქტიკური გასინჯვები ჩაუტარდათ.
სამედიცინო გამოკვლევებს აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, აფხაზეთის ავტონომიური რესპუბლიკის ჯანმრთელობისა და სოციალური დაცვის მინისტრი ქეთევან ბაკარაძე, შპს" ბაზი"-ს აღდგენითი ცენტრის ხელმძღვანელი ვიქტორ გეგეშიძე და აფხაზეთის მთავრობის წარმომადგენლები ესწრებოდნენ.
პროფილაქტიკური გასინჯვები შპს"ბაზი"-ს მაღალკვალიფიცურმა ექიმებმა ჩაატარეს. გამოკვლევების ფარგლებში დევნილმა მოზარდებმა თერაპევტის, ქირურგისა და ტრავმატოლოგის კონსულტაცია მიიღეს. შედეგების მიხედვით, მოსწავლეების 70% სქოლიოზი დაუდგინდა, ასევე გამოვლინდა გულის მანკის ერთი შემთხვევა. ქ.თბილისის მერიის პროგრამის ფარგლებში, სქოლიოზისა და ბრტყელტერფიანობის მქონე სიღარიბის ზღვარს მიღმა მყოფ მოზარდებს შპს"ბაზი"-ს თანამშრომლები უფასო აღდგენით თერაპიასა და მკურნალობას ჩაუტარებენ.
აქცია აფხაზეთის ავტონომიური რესპუბლიკის ჯანმრთელობისა და სოციალური დაცვის სამინიტროს ორგანიზებით გაიმართა.
აფხაზეთისა/რ განათლებისა და კულტურის სამინისტროს ერთ-ერთი მნიშვნელოვანი პროგრამაა „აფხაზეთის კულტურულ ფასეულობათა დაცვა და პოპულარიზაცია", რომლის ქვეპროგრამაცაა „აფხაზეთის ტაძრების დეტალური რუკის"შედგენა. სამინისტროს კულტურულ ფასეულობათა დაცვის სამსახურმა ამ რუკაზე ანუ აფხაზეთის ხუროთმოძღვრული რუკის ელექტრონულ ვერსიაზე მუშაობა უკვე დაასრულა. რუკაზე დატანილ იქნა 150 არქიტექტურული ნაგებობის კოორდინატი, არსებული მდგომარეობის მითითებით.
„აფხაზეთის ტაძრების დეტალური რუკის" კიდევ უფროდაზუსტების მიზნით აფხაზეთისა/რ განათლებისა და კულტურის სამინისტროს არტ გალერეაში გაიმართა სამუშაო შეხვედრა იმ ადამიანებთან, რომელთაც აფხაზეთის კულტურულ მემკვიდრეობაზე უმუშავიათ ან ფლობენ ინფორმაციას აფხაზეთში არქიტექტურული ნაგებობების მდებარეობის შესახებ. შეხვედრას ესწრებოდა აფხაზეთის ა/რ განათლებისა და კულტურის მინისტრი დიმიტრი ჯაიანი.
აფხაზეთის ა/რ განათლებისა და კულტურის სამინისტროს კულტურულ ფასეულობათა დაცვის სამსახურის უფროსმა ირაკლი გელენავამ დამსწრეთ წარუდგინა აფხაზეთის ხუროთმოძღვრული რუკის ელექტრონული ვერსია და სთხოვა, რუკის სრულყოფის მიზნით გამოეთქვათ თავიანთი შენიშვნები და წინადადებები.რუკის წარმოდგენილ ვარიანტთან დაკავშირებით მოსაზრებები და შენიშვნები გამოთქვეს: აფხაზეთის ა/რ უმაღლესი საბჭოს დეპუტატებმა - ჯემალ გამახარიამ, ნუგზარ მგალობლიშვილმა და აკაკი გასვიანმა, სოხუმის სახელმწიფო უნივერსიტეტის პროფესორმა რეზო ხვისტანმა, აფხაზეთის ა/რ მთავრობის წარმომადგენელმა შერმადინ შარიამ და სხვ.
ერთხმად ითქვა, რომ აფხაზეთის ხუროთმოძღვრული რუკის შესადგენად ძალიან შრომატევადი სამუშაოა გაწეული; და რომ თანამშრომლობის შემდეგ მასში შეტანილი ცვლილებები ხელს შეუწყობს აფხაზეთის კულტურული მემკვიდრეობის ზუსტი რიცხოვნობის წარმოჩენას და სამომავლოდ აფხაზეთის ტერიტორიაზე არსებული კულტურული მემკვიდრეობის ძეგლების მოძიებას გაამარტივებს.
სამუშაო შეხვედრას აფხაზეთის მთავრობის თავმჯდომარის მოვალეობის შემსრულებელი ვახტანგ ყოლბაია, UNDP-ის მუდმივი წარმომადგენელი საქართველოში ნილ სკოტი, საქართველოში აკრედიტებული ჩეხეთის, პოლონეთის, რუმინეთის, იაპონიის საელჩოებისა და საერთაშორისო არასამთავრობო ორგანიზაციების - USAID, USAID REAP, FAO, IOM, OXFAM, ACF, სოფლის მეურნეობის პროექტების მართვის სამსახურის წარმომადგენლები ესწრებოდნენ.
აფხაზეთის ავტონომიური რესპუბლიკის სოფლის მეურნეობის, გარემოს დაცვისა და ბუნებრივი რესურსების დეპარტამენტის უფროსმა ვალერი ბასარიამ დევნილთა დასაქმებაზე ორიენტირებული, მიმდინარე და დაგემილი აგრო-პროექტების პრეზენტაცია გამართა, რომლებიც საქართელოში აკრედიტებული დიპლომატიური კორპუსის, საერთაშორისო, არასამთავრობო ორგანიზაციების ხელშეწყობითა და აფხაზეთის ავტონომიური რესპუბლიკის მთავრობის ორგანიზებით ხორციელდება.
ცენტრალური ხელისუფლებისგან გამოყენების უფლებით გადმოცემულ მიწებზე ერთწლიანი კულტურის მოყვანისა და სასათბურე მეურნეობებში 200-ზე მეტი სამუშაო ადგილი შეიქმნა, სადაც დევნილები არიან დასაქმებული.
შეხვედრაზე ისაუბრეს სამომავლო თანამშრომლობის პერსპექტივებზე, რაც აგრარულ სექტორში დევნილთა დასაქმებას შეუწყობს ხელს.
დღეს ვალერი არქანიას სახელობის სამხატვრო გალერეაში აფხაზეთის ავტონომიური რესპუბლიკის მთავრობის მხარდაჭერით და ნიდერლანდების დიასპორის წარმომადგენლის პროდიუსერ დალი უბილავა-დე გრააფის პროექტის „ოსკარი გადაეცემა - სილია ვან დაიკის ვორქშოფები"-ს ფარგლებში აფხაზეთის მთავრობის შემოქმედებითი კოლექტივი ოსკაროსან პროდიუსერს სილია ვან დაიკის შეხვდა.
ღონისძიებას აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, აფხაზეთის ავტონომიური რესპუბლიკის უმაღლესი საბჭოს თავმჯდომარე ელგუჯა გვაზავა, აფხაზეთის მთავრობის წევრები, უმაღლესი საბჭოს დეპუტატები და შემოქმედებითი კოლექტივი ესწრებოდნენ.
შეხვედრაზე ანიმაციური ფილმების რეტროსპექტივა გაიმართა და ოსკაროსანმა პროდიუსერმა აფხაზეთის შემოქმედებითი კოლექტივისათვის ვორქშოფი ჩაატარა.
სილია ვან დაიკი ჰოლანდიური ანიმაციის ასოციაციის საბჭოს წევრია. მის კოლექციაში 10 წელიწადში 400-მდე ანიმაციური ფილმი დაგროვდა. 1985 წელს კი ამერიკის კინოაკადემიამ სილია ვან დაიკის პროდიუსერული საქმიანობა უმაღლესი ჯილდოთი შეაფასა და გადასცა „ოსკარი" ანიმაციური ფილმისთვის „ანა და ბელა".
აფხაზეთის ავტონომიური რესპუბლიკის მთავრობა მიესალმება ნატოს დაარსებიდან 50 წლისთავთან დაკავშირებით სახალხო დიპლომატიის ფორუმის გახსნით ნატოს კვირეულის გამართვას.
ჩრდილო-ატლანტიკური ალიანსი დაარსებიდან დღემდე მოწოდებული იყო დაეცვა არამარტო რეგიონალური, არამედ საერთაშორისო უსაფრთხოება, რომელიც პირველ რიგში თავისთავში მოიცავდა კონსტრუქციულ - პოლიტიკურ თანამშრომლობას მსოფლიოში მშვიდობის, უსაფრთხოებისა და განვითარების შესანარჩუნებლად.
აფხაზეთის ავტონომიური რესპუბლიკის მთავრობა იმედს გამოთქვამს, რომ საქართელოში გამართული ნატოს კვირეული კიდევ ერთი დამაახლოვებელი ფაქტორი იქნება საქართველოს ევროპული და ევროატლანტიკული მისწრაფებების გზაზე, რომლისკენაც საქართველო წლებია მიზანმიმართულად მიისწრაფვის და თავისი სერიოზული წვლილი შეაქვს ნატოს ეგიდით მშვიდობის განმტკიცების საქმეში.
ვიმედოვნებთ, რომ საქართველო უახლოეს მიომავალში ღირსეულ ადგილს დაიკავებს ევროპულ და ევროატლანტიკურ სივრცეში.
1991 წლის 31 მარტი საქართველოს უახლეს ისტორიაში გარდატეხის დღეა, რომელმაც მთლიანად შეცვალა სახელმწიფოს მომავალი.
რეფერენდუმი ჩატარდა 25 წლის წინ 31 მარტს, როდესაც ქართველმა და აფხაზმა ხალხმა ერთად დაადასტურა დამოუკიდებელ საქართველოში ცხოვრების ნება.
დღევანდელი დღე საქართველოს პირველი პრეზიდენტის, საქართველოს ეროვნულ-განმათავისუფლებელი მოძრაობის ლიდერ - ზვიად გამსახურდიას სახელს უკავშირდება. დღეს მას 77 წელი შეუსრულდებოდა.
სწორედ, ჩვენ უნდა გავაკეთოთ ყველაფერი, რათა უზრუნველვყოთ ქართველებისა და აფხაზების შერიგება და მშვიდობიანი თანაცხოვრება ერთიან საქართველოში.
აფხაზეთის ავტონომიური რესპუბლიკის მთავრობა
აფხაზეთის ავტონომიური რესპუბლიკის მთავრობის ინიციატივითა და ნდობის აღდგენისა და შერიგების საკითხებში აფხაზეთის ავტონომიური რესპუბლიკის მინისტრის აპარატის ორგანიზებით, მორიგი შეხვედრა თემაზე „აფხაზეთი დღეს. პრობლემები და გამოწვევები" გაიმართა.
სამუშაო შეხვედრაზე მონაწილეობა სამთავრობო და არასამთავრობო ორგანიზაციებმა, აკადემიური წრის წარმომადგენლებმა, აფხაზეთის თემით დაინტერესებულმა სხვადასხვა უნივერსიტეტის სტუდენტებმა მიიღეს და აფხაზეთში პოლიტიკურ, სოციალურ-ეკონომიკურ და კულტურულ სფეროში არსებული პრობლემები და მათი გადაჭრის გზები განიხილეს.
აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ სტუდენტებს ვრცელი ინფორმაცია მიაწოდა აფხაზეთში არსებულ ვითარებაზე და ისაუბრა ჟენევის საერთაშორისო მოლაპარაკებების 35 -ე რაუნდის შედეგებზე.
მსგავსი ფორმატის სამუშაო შეხვედრები სისტემატიური ხასითის ატარებს და საქართველოს ყველა უმაღლეს სასწავლებელში გაიმართება. ღონისძიების მიზანია ახალგაზრდების მეტად ჩართულობა აფხაზეთის თემასთან დაკავშირებული პრობლემების განხილვასა და გადაწყვეტილების მიღების პროცესში.
აფხაზეთის ავტონომიური რესპუბლიკის მთავრობა ღრმა მწუხარებას გამოთქვამს 2016 წლის 22 მარტს ქ. ბრიუსელის აეროპორტსა და მეტროში განხორციელებული ტერორისტული აქტების გამო და სამძიმარს უცხადებს გარდაცვლილთა ოჯახების წევრებს.
მომხდარი ტერაქტები არ ეხება კონკრეტულ ქვეყანას, არამედ წარმოადგენს გამოწვევას ყველა სახელმწიფოსთვის. მთელი კაცობრიობის ძალისხმევაა საჭირო, რომ 21-ე საუკუნეში არ ხდებოდეს მსგავსი სახის ბარბაროსული აქტები და არ იღუპებოდნენ უდანაშაულო ადამიანები.
კიდევ ერთხელ თანაგრძნობას ვუცხადებთ ყველა დაღუპულის ოჯახს და ამ მძიმე წუთებში ვდგევართ ბელგიელი ხალხისა და ხელისუფლების გვერდით.