აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე, ტრადიციულად, ოჯახთან ერთად, აღდგომის დღესასწაულთან დაკავშირებით ბავშვთა თავშესაფარს „კიდევაც დაიზრდებიან“ ესტუმრა, ბავშვებს აღდგომის დღესასწაული მიულოცა და საჩუქრები გადასცა. ღონისძიებაში აფხაზეთის სულიერების ცენტრის დირექტორი ბესიკ სილაგაძე მონაწილეობდა.

დღესვე, აფხაზეთის სულიერების ცენტრის ორგანიზებით, საქართველოს საპატრიარქოსთან არსებულ ლომისის წმინდა გიორგის დედათა და ბავშვთა თავშესაფარს სხვადასხვა დასახელების სასურსათო პროდუქტი გადაეცა.

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე, აფხაზეთის განათლებისა და კულტურის მინისტრ ეკა ხოფერიასთან ერთად,  საქართველოს განათლებისა და მეცნიერების სამინისტროში ქართული ენის დღისადმი მიძღვნილ ღონისძიებას დაესწრო.

ღონისძიებაზე დამსწრე საზოგადოებას სიტყვით მიმართეს საქართველოს განათლებისა და მეცნიერების მინისტრმა გიორგი ამილახვარმა და შერიგებისა და სამოქალაქო თანასწორობის საკითხებში სახელმწიფო მინისტრმა თეა ახვლედიანმა, რომლებმაც სახელმწიფო ენის დღის მნიშვნელობაზე გაამახვილეს ყურადღება.

საქართველოს განათლებისა და მეცნიერების მინისტრმა და სახელმწიფო ენის დეპარტამენტის თავმჯდომარემ ქართული ენის სწავლებასა და კვლევაში გაწეული განსაკუთრებული წვლილისათვის სამი ღვაწლმოსილი მეცნიერი – მზექალა შანიძე, დამანა მელიქიშვილი და ჟუჟუნა ფეიქრიშვილი დააჯილდოვეს.

ღონისძიების ფარგლებში, დიმიტრი გულიასა და კოსტა ხეთაგუროვის სახელობის სტიპენდიები გადაეცათ ოკუპირებულ ტერიტორიებზე მცხოვრებ იმ სტუდენტებს, რომლებმაც 2022-2023 წლის ერთიან ეროვნულ გამოცდებზე საუკეთესო შედეგები აჩვენეს.  სიმბოლური საჩუქრებით დაჯილდოვდნენ ასევე ეთნიკური უმცირესობის წარმომადგენლები, რომლებსაც ქართული ენის სწავლასა და პოპულარიზაციაში  განსაკუთრებული წვლილი შეაქვთ.

ღონისძიებაზე ქართული სალიტერატურო ენის ნორმების მესამე ბიულეტენის პრეზენტაცია გაიმართა, სადაც სტუმრებს საშუალება ჰქონდათ გაცნობოდნენ სახელმწიფო ენის დეპარტამენტის გამოცემებს. მასწავლებელთა პროფესიული განვითარების ეროვნული ცენტრის „არაქართულენოვანი სკოლების მხარდაჭერის პროგრამის“ ბენეფიციარებმა კალიგრაფიის მასტერკლასი და დედაენის თემატიკაზე შესრულებული ხელნაკეთი წიგნები  წარმოადგინეს.

აღდგომის ბრწყინვალე დღესასწაულთან დაკავშირებით აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ თბილისში, ვაზიანსა და რუსთავში მცხოვრები აფხაზეთიდან იძულებით გადაადგილებული, სოციალურად დაუცველი ოჯახები (მრავალშვილიანი და აფხაზეთის ომში დაღუპულთა ოჯახები) მოინახულა, აღდგომის დღესასწაული მიულოცა და სააღდგომო ნობათი გადასცა. ღონისძიების ფარგლებში სოციალურად დაუცველი ოჯახების ბავშვებს ასევე საჩუქრად სათამაშოები გადაეცათ.

ღონისძიებაში აფხაზეთის ავტონომიური რესპუბლიკის მთავრობის წარმომადგენლები მონაწილეობდნენ.

აღდგომის დღესასწაულთან დაკავშირებით აფხაზეთის ავტონომიური რესპუბლიკის მთავრობის ორგანიზებით საქველმოქმედო აქცია ყოველწლიურად იმართება და სხვადასხვა სახეობის სასურსათო პროდუქტი გადაეცემა როგორც თბილისში, ასევე რეგიონებში მცხოვრებ აფხაზეთიდან იძულებით გადაადგილებულ სოციალურად დაუცველ და უკიდურესად შეჭირვებულ ოჯახებს.

საჯარო სექტორში ფინანსური მართვისა და კონტროლის სისტემის რეფორმის დანერგვასთან დაკავშირებით აფხაზეთის მთავრობაში, აფხაზეთის ავტონომიური რესპუბლიკის მთავრობის თავმჯდომარის რუსლან აბაშიძის, საქართველოს ფინანსთა სამინისტროს სახელმწიფო შიდა კონტროლის დეპარტამენტისა და აფხაზეთის მთავრობის წარმომადგენლების მონაწილეობით სამუშაო შეხვედრა გაიმართა.

შეხვედრის მსვლელობისას განიხილეს ფინანსური მართვისა და კონტროლის სისტემის დანერგვის მიზნით გასატარებელი ღონისძიებები და განისაზღვრა აქტივობები. მთავრობის თავჯდომარის გადაწყვეტილებით, შეირჩა სისტემაში შემავალი სამინისტრო, რომელიც აქტიურად იმუშავებს ფინანსური მართვისა და კონტროლის სისტემის დანერგვის მიმართულებით. ფინანსთა სამინისტრო თავისი კომპეტენციის ფარგლებში უზრუნველყოფს როგორც საერთაშორისო, ისე  ქვეყანაში არსებული საუკეთესო პრაქტიკებისა და მარეგულირებელი დოკუმენტების გაზიარებას სამუშაო შეხვედრებისა და ტრეინინგების უზრუნველყოფის გზით.

ფინანსური მართვისა და კონტროლის სისტემის  დანერგვით აფხაზეთის ავტონომიური რესპუბლიკის შერჩეულ სამინისტროში გაუმჯობესდება ბიუჯეტის დაგეგმვის ხარისხი და შიდა კონტროლის მექანიზმები, რომელიც ხელს შეუწყობს რესურსების ეკონომიურ, ეფექტიან და პროდუქტიულ გამოყენებას. აგრეთვე, თავის მხრივ მენეჯერული უფლებამოსილების დელეგირება უზრუნველყოფს სამინისტროს სხვადასხვა იერარქიულ საფეხურზე მდგომი მენეჯერის დაწესებულების საქმიანობის მართვაში ჩართულობის ხარისხის ზრდასა და რესურსების ეფექტურ მართვას.

უახლოვეს მომავალში დაგეგმილია შერჩეულ სამინისტროში  მაღალი და საშუალო რგოლის მენეჯერებთან ფინანსური მართვისა და კონტროლის სისტემის დანერგვის მიზნით პრაქტიკული ნაბიჯების განხორციელება.

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ, მთავრობის თავმჯდომარის მოადგილე ანზორ მარგიანთან და აფხაზეთის მთავრობის წევრებთან ერთად, რუსთაველის გამზირზე, 1989 წლის 9 აპრილის მოვლენების დროს დაღუპულთა მემორიალი ყვავილებით შეამკო და პატივი მიაგო მათ ხსოვნას.

„დღევანდელ თარიღს ორი განსხვავებული ისტორიული კონტექსტი აქვს.  1989 წლის 9 აპრილი ერთდროულად უდიდესი ტრაგედიის და სიამაყის დღეა. ამავდროულად, დღევანდელი დღე არის ქართველი ხალხის სიძლიერისა და შეუდრეკელობის სიმბოლო. ეს მოვლენა იყო იმის მაჩვენებელი, რომ საფრთხისა და გამოწვევების წინაშე ჩვენი ხალხი თავს არასდროს დახრის.

ქედს ვიხრი და პატივს მივაგებ იმ გმირებს, რომლებმაც თავი შესწირეს ქვეყნის თავისუფლებას. სწორედ ჩვენი ქვეყნის სახელმწიფოებრიობის აღდგენა იყო ის იდეალი, რომლებსაც ჩვენი თანამემამულეები შეეწირნენ. ჩვენი ვალია მუდამ გვახსოვდეს მათი თავგანწირვა, რადგან დღევანდელი საქართველო სწორედ მათ მონაპოვარზე დგას. მათი თავდადება არის მაგალითი, თუ როგორ უნდა გიყვარდეს შენი სამშობლო.

დღეს საქართველო დემოკრატიული, წარმატებული და თავისუფალი სახელმწიფოა. ჩვენ უნდა განვაგრძოთ მშვიდობიანი განვითარების უპრეცედენტო პროცესი, რადგან მჯერა, რომ მხოლოდ ამ გზით არის შესაძლებელი ჩვენი ქვეყნის დეოკუპაცია და ტერიტორიული მთლიანობის აღდგენა“, - განაცხადა რუსლან აბაშიძემ.

34 წელი გავიდა მას შემდეგ, რაც საქართველოს დამოუკიდებლობის მოთხოვნით დაწყებული საპროტესტო აქცია 9 აპრილს, გამთენიისას, მშვიდობიანი დემონსტრანტების დარბევით დასრულდა. 21 ადამიანი დაიღუპა, ასობით დაიჭრა, მოიწამლა და დასახიჩრდა.

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე ჟენევის საერთაშორისო მოლაპარაკებების 57-ე რაუნდში მიიღებს მონაწილეობას.

ქართულ დელეგაციას საქართველოს საგარეო საქმეთა მინისტრის პირველი მოადგილე ლაშა დარსალია ხელმძღვანელობს. საერთაშორისო მოლაპარაკებების 57-ე რაუნდი 4 - 5 აპრილს გაიმართება.

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე და იუსტიციისა და სამოქალაქო ინტეგრაციის საკითხებში აფხაზეთის მინისტრი ნანა გაბელია, იტალიის რესპუბლიკაში სამუშაო ვიზიტის ფარგლებში, რომის ლა საპიენცას უნივერსიტეტის აკადემიურ პერსონალს შეხვდნენ.

აფხაზეთის ავტონომიური რესპუბლიკის მთავრობასა და რომის ლა საპიენცას უნივერსიტეტს შორის სამეცნიერო-კვლევითი თანამშრომლობის შეთანხმება გაფორმდა. შესაბამის დოკუმენტს ხელი იუსტიციისა და სამოქალაქო ინტეგრაციის საკითხებში აფხაზეთის მინისტრმა ნანა გაბელიამ და რომის ლა საპიენცას უნივერსიტეტის სოციალური მეცნიერებების ასოცირებულმა პროფესორმა რომინა გურაშმა მოაწერეს.

აღნიშნული შეთანხმების თანახმად, ხელმომწერი მხარეები ერთობლივ სამეცნიერო-კვლევით პროექტებს განახორციელებენ, რაც მიზნად ისახავს კონფლიქტის შედეგად დაზარალებულ ქართულ-აფხაზურ საზოგადოებებს შორის შერიგებისა და ნდობის აღდგენის ხელშეწყობას. ამასთანავე, ამ მიმართულებით იგეგმება, მინისტრის აპარატის მიერ საერთაშორისო სამეცნიერო კონფერენციების, ტრენინგებისა და პროფესიული განვითარების პროგრამების განხორციელება, რომელთა ფარგლებში წარმოდგენილი ერთობლივი სამეცნიერო ნაშრომები პუბლიკაციების სახით დაიბეჭდება.

ასევე, აფხაზეთის მთავრობის წარმომადგენლები საქართველოს კონფლიქტების შესახებ უნივერსიტეტში დაცულ სამეცნიერო ნაშრომებს გაეცნენ და  რომის ლა საპიენცას უნივერსიტეტის ბიბლიოთეკას კონფლიქტოლოგიის თემაზე გამოცემული ქართულენოვანი წიგნები გადასცეს. შეხვედრას მინისტრის პირველი მოადგილე გიორგი გაბედავა ესწრებოდა.

აფხაზეთის ავტონომიური რესპუბლიკის მთავრობის თავმჯდომარის მოადგილე ანზორ მარგიანი ანტიკორუფციული ბიუროს პრეზენტაციის ღონისძიებას დაესწრო.

პრეზენტაცია სახელმწიფო ცერემონიების სასახლეში გაიმართა, სადაც მიწვეულ სტუმრებს სიტყვით მიმართეს საქართველოს პრემიერ-მინისტრმა ირაკლი ღარიბაშვილმა, საქართველოს პარლამენტის თავმჯდომარემ შალვა პაპუაშვილმა და ანტიკორუფციული ბიუროს უფროსმა რაჟდენ კუპრაშვილმა.

„მინდა აღვნიშნო, რომ ბიურო გამოირჩევა დამოუკიდებლობის მაღალი ხარისხით, რაც ასევე მოიცავს ფინანსურ დამოუკიდებლობასაც. იგი პასუხისმგებელია მხოლოდ საქართველოს პარლამენტისა და უწყებათაშორისი ანტიკორუფციული საბჭოს წინაშე, რაც გულისხმობს მათ წინაშე ყოველწლიურ ანგარიშგებას.

ბიუროს უფროსის კანდიდატები შეირჩა დამოუკიდებელი კომისიის მიერ, რომელიც აერთიანებდა სახელმწიფო უწყებათა და სამოქალაქო საზოგადოების წარმომადგენლებს. სწორედ ამ კომისიის მიერ შემოთავაზებული კანდიდატების სიიდან დაინიშნა ბიუროს უფროსი, ბატონი რაჟდენ კუპრაშვილი. მინდა კიდევ ერთხელ მოგილოცოთ და გისურვოთ წარმატებები,“ - განაცხადა სიტყვით გამოსვლისას პრემიერ-მინისტრმა.

ღონისძიებას აღმასრულებელი და საკანონმდებლო ხელისუფლების და დიპლომატიური კორპუსის წარმომადგენლები ესწრებოდნენ.

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე და იუსტიციისა და სამოქალაქო ინტეგრაციის საკითხებში აფხაზეთის მინისტრი ნანა გაბელია იტალიაში სამუშაო ვიზიტის ფარგლებში, რომის ქართული დიასპორის წარმომადგენლებს შეხვდნენ.

ღონისძიება მისასალმებელი სიტყვით იტალიის რესპუბლიკაში საქართველოს საგანგებო და სრულუფლებიანმა ელჩმა კონსტანტინე სურგულაძემ და საქართველოს საგანგებო და სრულუფლებიანმა ელჩმა წმინდა საყდართან (ვატიკანი) ქეთევან ბაგრატიონ-მუხრანბატონმა გახსნეს.

შეხვედრის მიმდინარეობისას აფხაზეთის მთავრობის თავმჯდომარემ ქართულ-აფხაზური კონფლიქტის მოგვარების გზების ძიების პროცესებში დევნილი ემიგრანტების მონაწილეობის და ქართულ-აფხაზური კულტურის პოპულარიზაციის საქმეში მათი ჩართულობის მნიშვნელობაზე ისაუბრა. მთავრობის თავმჯდომარემ ხაზგასმით აღნიშნა, რომ დიალოგის ხელშეწყობა და შერიგების მხარდაჭერა მთავრობისა და მინისტრის აპარატის საქმიანობის ერთ-ერთი პრიორიტეტული მიმართულებაა.

იუსტიციისა და სამოქალაქო ინტეგრაციის საკითხებში აფხაზეთის მინისტრმა შეხვედრის მონაწილეებს მინისტრის აპარატის მიერ შემუშავებული, დიასპორისა და დევნილ ემიგრანტთა მხარდაჭერის პროგრამით გათვალისწინებული პროექტები და სამომავლოდ დაგეგმილი ღონისძიებები გააცნო. ნანა გაბელიამ დევნილ ემიგრანტებს ქართული დიასპორებისთვის სპეციალურად შექმნილი საკომუნიკაციო ონლაინ პლატფორმა წარუდგინა.

შეხვედრაზე საუბარი შეეხო აფხაზეთის ოკუპირებულ ტერიტორიაზე არსებულ ვითარებას, ადამიანის უფლებათა დარღვევის ფაქტებს და დეზინფორმაციასთან ბრძოლის მექანიზმებს. მონაწილეებმა ასევე განიხილეს ისეთი მნიშვნელოვანი საკითხები, რომლებიც ხელს შეუწყობს ქართულ დიასპორულ ორგანიზაციებთან ურთიერთობების გაღრმავებას, ერთობლივი ღონისძიებების და ქართულ-აფხაზური კულტურული შეხვედრების ორგანიზებას.

ღონისძიების დასკვნით ნაწილში ემიგრაციაში მცხოვრები საზოგადო მოღვაწის გიორგი აფხაზის შემოქმედებისადმი მიძღვნილი ანიმაციის ჩვენება გაიმართა.

ქართული დიასპორის წარმომადგენლებთან შეხვედრა პროგრამის „დიასპორა და დევნილ ემიგრანტთა მხარდაჭერა“ ფარგლებში მინისტრის აპარატის ორგანიზებით და საქართველოს საგარეო საქმეთა სამინისტროს მხარდაჭერით განხორციელდა. შეხვედრაში იუსტიციისა და სამოქალაქო ინტეგრაციის საკითხებში აფხაზეთის მინისტრის პირველი მოადგილე გიორგი გაბედავა მონაწილეობდა.

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე, იუსტიციისა და სამოქალაქო ინტეგრაციის საკითხებში აფხაზეთის მინისტრ ნანა გაბელიასთან ერთად, საქართველოს სახალხო დამცველს, ლევან იოსელიანს შეხვდა.

შეხვედრაზე ოკუპირებულ აფხაზეთში ადამიანის უფლებათა დაცვის კუთხით არსებული ვითარება განიხილეს. ისაუბრეს ჯანდაცვის, მშობლიურ ენაზე განათლების მიღებისა და გადაადგილების უფლებებზე. საუბარი შეეხო საკუთრების, გარემოს დაცვისა და სოფლის მეურნეობის მიმართულებით არსებულ პრობლემებსა და გამოწვევებს.

შეხვედრის მონაწილეები სამომავლო აქტიური ურთიერთთანამშრომლობის საკითხებზე შეთანხმდნენ.

საქართველოს საგარეო საქმეთა სამინისტროში, ვიდეოკონფერენციის ფორმატში, ჟენევის საერთაშორისო მოლაპარაკებების თანათავმჯდომარეებთან 57-ე რაუნდის მოსამზადებელი შეხვედრა გაიმართა, რომელსაც ქართული მხრიდან საგარეო საქმეთა მინისტრის პირველი მოადგილე და ჟენევის მოლაპარაკებებში საქართველოს დელეგაციის ხელმძღვანელი ლაშა დარსალია ხელმძღვანელობდა. შეხვედრაში აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე მონაწილეობდა.

შეხვედრაზე ხაზი გაესვა ჟენევის საერთაშორისო მოლაპარაკებების დიდ მნიშვნელობას, ვინაიდან ის წარმოადგენს, საერთაშორისო პარტნიორების ჩართულობით, საქართველოსა და რუსეთს შორის მოლაპარაკებების ერთადერთ პლატფორმას ევროკავშირის შუამავლობით დადებული 2008 წლის 12 აგვისტოს ცეცხლის შეწყვეტის შეთანხმების რუსეთის მიერ  შესრულების საკითხზე.

საქართველოს დელეგაციამ განსაკუთრებული ყურადღება გაამახვილა ფორმატის ეფექტიანად გამოყენების აუცილებლობაზე, რათა მიღწეულ იქნას პროგრესი დღის წესრიგის მთავარ საკითხებზე, როგორებიცაა: რუსეთის მიერ 2008 წლის 12 აგვისტოს ცეცხლის შეწყვეტის შეთანხმებით ნაკისრი საერთაშორისო ვალდებულებების შესრულება, განსაკუთრებით - საქართველოს ტერიტორიიდან რუსეთის სამხედრო ძალების გაყვანა და იძულებით გადაადგილებულ პირთა და ლტოლვილთა უსაფრთხო და ღირსეული დაბრუნება. ასევე, შეხვედრაზე აქცენტი გაკეთდა გალში ინციდენტების პრევენციისა და მათზე რეაგირების მექანიზმის (IPRM) ყოველგვარი წინაპირობების გარეშე აღდგენისა და გალსა და ერგნეთში ამ მექანიზმის რეგულარულად, ფუძემდებლური პრინციპების შესაბამისად გამართვის აუცილებლობაზე. ჟენევის საერთაშორისო მოლაპარაკებების 57-ე რაუნდი 2023 წლის 4-5 აპრილს გაიმართება.

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე საქართველოში საფრანგეთის რესპუბლიკის საგანგებო და სრულუფლებიან ელჩს, შერაზ გასრის შეხვდა. შეხვედრა გაცნობით ხასიათს ატარებდა.

რუსლან აბაშიძემ უცხოელ დიპლომატს აფხაზეთის ავტონომიური რესპუბლიკის მთავრობისა და მისი სტრუქტურული ერთეულების საქმიანობის შესახებ ინფორმაცია მიაწოდა. გააცნო ოკუპირებულ აფხაზეთში ამჟამად არსებული ვითარება და საოკუპაციო რეჟიმის მხრიდან ადამიანის ფუნდამენტური უფლებების დარღვევის ფაქტებზე ისაუბრა.

ფრანგმა დიპლომატმა კიდევ ერთხელ დაადასტურა მისი ქვეყნის ურყევი პოზიცია და სრული მხარდაჭერა საქართველოს ტერიტორიული მთლიანობის მიმართ.

შეხვედრაზე მხარეებმა სხვადასხვა სფეროში სამომავლო თანამშრომლობის შესაძლებლობები განიხილეს.

შეხვედრას საფრანგეთის ელჩის მოადგილე რიშარ რეკენა და აფხაზეთის ავტონომიური რესპუბლიკის მთავრობის აპარატის სტრატეგიული კომუნიკაციებისა და საერთაშორისო ურთიერთობების დეპარტამენტის უფროსის მოადგილე დავით გახარია  ესწრებოდნენ.

ქართული თეატრის კვირეულის ფარგლებში, ინდოეთში, ქალაქ აგრაში აფხაზეთიდან დევნილი მხატვრების გამოფენა “გაგრიდან აგრამდე” მოეწყო. ღონისძიებას აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე და აფხაზეთის კულტურის, სპორტისა და ახალგაზრდულ საქმეთა სააგენტოს დირექტორი ლიკა კვარაცხელია ესწრებოდნენ.

გამოფენაზე წარმოდგენილი იყო მარიამ აქუბარდიას, ბიძინა სიდიანის და პაპუნა პაპასკირის ნამუშევრები. აფხაზეთიდან დევნილმა ახალგაზრდებმა საერთაშორისო საზოგადოებას აფხაზეთის თემატიკაზე შექმნილი, ტილოსა და ხეზე შესრულებული შემოქმედება გააცნეს. გამოფენის პარალელურად, ქართველი და ინდოელი მხატვრების ერთობლივი ვორქშოფი გაიმართა. კვირეულის ფარგლებში, აგრასა და ჯაიპურში კულტურისა და ხელოვნების წარმომადგენლებთან შეხვედრები მოეწყო.

ქართული თეატრის საერთაშორისო ფესტივალი ინდოეთში წელს პირველად გაიმართა და მასში 4 ქართული თეატრალური დასი მონაწილეობდა. ფესტივალი საქართველოს კულტურის სპორტისა და ახალგაზრდობის სამინისტროს მხარდაჭერით მოეწყო და აქტიურად გაშუქდა ინდოეთში ადგილობრივი მედია საშუალებების მიერ.

აფხაზეთის ავტონომიური რესპუბლიკის მთავრობის თავმჯდომარის მოადგილე ანზორ მარგიანმა საქართველოს ტერიტორიული მთლიანობისთვის დაღუპულთა მემორიალი გვირგვინით შეამკო და მათ ხსოვნას პატივი მიაგო. გმირთა მემორიალთან ასევე იმყოფებოდნენ აფხაზეთის მთავრობის წევრები, აფხაზეთის უმაღლესი საბჭოს დეპუტატები და ვეტერანების საქმეთა სახელმწიფო სამსახურის წარმომადგენლები.

1993 წლის 15-16 მარტს აფხაზეთში სეპარატისტებმა, დაქირავებულმა ბოევიკებმა და სადესანტო შენაერთებმა მდინარე გუმისთის გასწვრივ არსებულ 8 კმ-იან ფრონტის ხაზზე ფართომასშტაბიანი შეტევა დაიწყეს. ქართულმა შეიარაღებულმა ძალებმა და არტილერიამ სოხუმისკენ წამოსულ მოწინააღმდეგეს გამანადგურებელი დარტყმა მიაყენა და იძულებული გახადა უკან დაეხია. უთანასწორო ბრძოლაში ქართველმა მებრძოლებმა საკუთარი სიცოცხლის და ჯანმრთელობის ფასად ათასობით მშვიდობიანი მოქალაქე გადაარჩინეს.