სიახლეები

2024 წლის 25-26 ივნისს გაიმართა ჟენევის საერთაშორისო მოლაპარაკებების 61-ე რაუნდი. მოლაპარაკებებზე საქართველოს დელეგაცია წარმოდგენილი გახლდათ საგარეო საქმეთა მინისტრის პირველი მოადგილის, ლაშა დარსალიას ხელმძღვანელობით. სამუშაო ჯგუფის შეხვედრებში აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე მონაწილეობდა.

შეხვედრაზე ქართულმა დელეგაციამ ძირითადი აქცენტი გააკეთა მოლაპარაკებების დღის წესრიგის მთავარ საკითხებზე. კერძოდ, რუსეთის მიერ ევროკავშირის შუამავლობით დადებული 2008 წლის 12 აგვისტოს ცეცხლის შეწყვეტის შეთანხმების შესრულების აუცილებლობასა და ოკუპირებული ტერიტორიებიდან იძულებით გადაადგილებულ პირთა და ლტოლვილთა საკუთარ სახლში დაბრუნებაზე. 

მოლაპარაკებებზე ქართულმა დელეგაციამ მორიგ ჯერზე  დასვა ოკუპირებულ რეგიონებსა და საოკუპაციო ხაზის სიახლოვეს რუსეთის საოკუპაციო რეჟიმის დესტრუქციული ქმედებების შედეგად წარმოქმნილი რთული უსაფრთხოების, ადამიანის უფლებებისა და ჰუმანიტარული მდგომარეობის საკითხი.  
 
ქართულმა მხარემ ასევე შეშფოთება გამოხატა საქართველოს ოკუპირებულ რეგიონებში ე.წ. არჩევნების ჩატარებასთან დაკავშირებით და დაგმო 9 ივნისს, ოკუპირებულ ცხინვალის რეგიონში გამართული ე.წ. საპარლამენტო არჩევნები, ასევე,  მიმდინარე წლის მარტში ორივე ოკუპირებულ რეგიონში გამართული რუსეთის საპრეზიდენტო არჩევნები, რომლებიც უხეშად არღვევს საქართველოს სუვერენიტეტსა და ტერიტორიულ მთლიანობას მის საერთაშორისოდ აღიარებულ საზღვრებში. 

რუსეთისა და საოკუპაციო რეჟიმების წარმომადგენლებმა, მათ მიერვე დამკვიდრებული  პრაქტიკის გამოყენებით, კიდევ ერთხელ დატოვეს მოლაპარაკებების მაგიდა დღის წესრიგის ერთ-ერთი უმთავრესი საკითხის განხილვის დაწყებისთანავე, რომელიც ოკუპირებული ტერიტორიებიდან იძულებით გადაადგილებული პირებისა და ლტოლვილთა საკუთარ სახლში დაბრუნებას შეეხებოდა, რითაც ჩაშალეს მოლაპარაკებები. 

ჟენევის საერთაშორისო მოლაპარაკებები შექმნილია ევროკავშირის შუამავლობით დადებული 2008 წლის 12 აგვისტოს ცეცხლის შეწყვეტის შესახებ შეთანხმების საფუძველზე და მის მთავარ განსახილველ საკითხებს ცეცხლის შეწყვეტის შეთანხმების შესრულება, იძულებით გადაადგილებულ პირთა და ლტოლვილთა საკუთარ სახლში უსაფრთხო და ღირსეულ დაბრუნება, რუსეთის ოკუპაციის შედეგად შექმნილი უსაფრთხოებისა და ჰუმანიტარული პრობლემები წარმოადგენს. 

მოლაპარაკებები იმართება ევროკავშირის, გაერო-სა და ეუთო-ს თანათავმჯდომარეობით და საქართველოს, რუსეთის ფედერაციისა და ამერიკის შეერთებული შტატების მონაწილეობით. სამუშაო ჯგუფის შეხვედრებს ესწრებიან აგრეთვე აფხაზეთის ავტონომიური რესპუბლიკის მთავრობის თავმჯდომარე და ყოფილი სამხრეთ ოსეთის ავტონომიური ოლქის ტერიტორიაზე დროებითი ადმინისტრაციულ-ტერიტორიული ერთეულის ადმინისტრაციის ხელმძღვანელი, ისევე, როგორც ცხინვალსა და სოხუმში რუსეთის საოკუპაციო რეჟიმის წარმომადგენლები.

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე, აფხაზეთის მთავრობის წარმომადგენლებთან ერთად, შვეიცარიაში, ქალაქ ლოზანაში ოფიციალური ვიზიტით იმყოფებოდა, სადაც აფხაზეთის მთავრობის ინიციირებული პროექტის ფარგლებში, ფილმის „ცნობილი აფხაზების უცნობი სახეები“ გადაღება გრძელდება. 

ემიგრაციაში მოღვაწე ცნობილი აფხაზების  შესახებ ფილმის გადაღება საქართველოს საზოგადოებრივი მაუწყებლის მხარდაჭერით ევროპის რამდენიმე ქვეყანაში მიმდინარეობს და მისი პრეზენტაცია წლის ბოლოს იგეგმება.

ღონისძიების ფარგლებში აფხაზეთის მთავრობის წარმომადგენლები პრილის მუნიციპალიტეტის მერიის წარმომადგენლებს შეხვდნენ და პრილის სასაფლაოზე პატივი მიაგეს გასული საუკუნის აფხაზური ემიგრაციის ცნობილი წარმომადგენლის ზურაბ ჩხოტუას ხსოვნას. იქვე დაკრძალულია ცნობილი დიპლომატის ნიკი (ნიკოლოზ) ჩხოტუას ბიცოლა, ჩხოტუების საგვარეულოს ერთ-ერთი ცნობილი წარმომადგენლის ჯოტო ემუხვარის მეუღლე - ვერონიკა ჰარისი-ემუხვარი, რომელსაც დიდი წვლილი მიუძღვის ქართული ემიგრაციის მხარდაჭერაში.

ღონისძიება აფხაზეთის ავტონომიური რესპუბლიკის მთავრობის, საქართველოს საზოგადოებრივი მაუწყებლისა და საქართველოს პარლამენტის ეროვნული ბიბლიოთეკის პროექტის ფარგლებში განხორციელდა, რომელიც მიზნად ისახავს ემიგრაციაში წასული აფხაზური წარმოშობის ცნობილი მოღვაწეების საარქივო მასალების მოძიებასა და მათ საქართველოში დაბრუნებას.

აფხაზეთის ავტონომიური რესპუბლიკის მთავრობის ინიციატივით, იუსტიციისა და სამოქალაქო ინტეგრაციის საკითხებში აფხაზეთის მინისტრის აპარატისა და საზოგადოებრივი მაუწყებლის თანამშრომლობით პროექტის „ფილმი - ცნობილი აფხაზების უცნობი სახეების“ მეორე ნაწილის განხორციელება დაიწყო.

პროექტის ფარგლებში, იუსტიციისა და სამოქალაქო ინტეგრაციის საკითხებში აფხაზეთის მინისტრმა გიორგი გაბედავამ საფრანგეთის რესპუბლიკაში, საქართველოს საელჩოში სამუშაო შეხვედრები გამართა საქართველოს სრულუფლებიან დესპან ეკატერინე კოკაიასთან. შეხვედრები ასევე გაიმართა ლეგენდარულ ფრანგ მსახიობ ფანი არდანთან, საქართველოს დემოკრატიული რესპუბლიკის საგარეო საქმეთა მინისტრის აკაკი ჩხენკელის შვილიშვილ თამარ ჩხენკელთან და საფრანგეთის ეროვნულ ბიბლიოთეკის საზოგადოებასთან ურთიერთობის დეპარტამენტის დირექტორ ჰერვე გოსტოდ-არტურთან.

პროექტის პირველ ეტაპზე მოხდა საარქივო მასალებისა და ფოტო დოკუმენტაციის მოძიება და განხორციელდა ვიდეოგადაღებები ესპანეთსა და საფრანგეთში. გაფორმდა ურთიერთთანამშრომლობის მემორანდუმი საქართველოს პარლამენტის ეროვნულ ბიბლიოთეკასთან.

პროექტის მეორე ნაწილის ფარგლებში, მიმდინარეობს  სამუშაო შეხვედრები საფრანგეთის რესპუბლიკაში, რომელიც გულისხმობს არსებულ სხვადასხვა თემატურ არქივებთან, მუზეუმებსა ბიბლიოთეკებთან და ალექსანდრე შერვაშიძესთან დაკავშირებულ პიროვნებებთან შეხვედრებს, მასალების, ვიდეოკადრებისა და ინტერვიუს გადაღება-ჩაწერას.

აფხაზეთის ავტონომიური რესპუბლიკის მთავრობის მხარდაჭერით, იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატის მიერ, უკვე მესამე წელია აქტიურად ხდება ემიგრაციაში გადახვეწილი აფხაზი საზოგადო მოღვაწეების მიერ შექმნილი ფასდაუდებელი ნამუშევრების მოძიება, დაარქივება და ქართველი და აფხაზი საზოგადოებისთვის გაცნობა.

ქუთათელ-გაენათელი მიტროპოლიტ მეუფე იოანეს ლოცვა - კურთხევით ქუთაისის აკაკი წერეთლის სახელობის სახელმწიფო უნივერსიტეტის სააქტო დარბაზში გაიმართა ფოლკლორული მუსიკის საღამო - "იმერეთიდან აფხაზეთისკენ", რომელშიც მონაწილეობდნენ სხვადასხვა ფოლკლორული კოლექტივები.

„მსგავსი ტიპის ღონისძიებები, რომლებშიც ჩართულნი არიან ბავშვები, ახალგაზრდები განსაკუთრებით აფხაზეთელებისთვის არის ერთ-ერთი ყველაზე მნიშვნელოვანი. სწორედ, კულტურა არის პირველი ხიდი, პირველი წყარო ნდობის, სიყვარულისა და ერთიანობისა.

იმისთვის, რომ ჩვენი და ჩვენი შვილების მომავალი იყოს ბედნიერი, ქართველებს და აფხაზებს გვაქვს ვალდებულება - მშვიდობით, სიყვარულით და ერთმანეთის ნდობით შევქმნათ ახალი რეალობა და გავერთიანდეთ არა ძალით, არამედ იმ სიყვარულით, ერთობით და ნდობით, როგორითაც ცხოვრობდნენ ჩვენი წინაპრები.

ამ გზაზე უწმინდესი ილია მეორე არის ყველაზე დიდი მაგალითი თავმდაბლობის, სათნოების, უბრალოების, სიყვარულის, მოთმინების, რომელმაც ყველა მძიმე პერიოდებში დაანთო თითოეული ჩვენგანის გულებში, ოჯახებში სანთელი და გვასწავლა ღვთის გზაზე სიყვარულით, ერთობით სიარული. ველოდები იმ დღეს, როცა უწმინდესი და უნეტარესი ილია II დალოცავს სოხუმიდან გაერთიანებულ საქართველოს და ღმერთმა ქნას ეს ძალიან მალე მოხდეს.

მადლობას ვუხდი ღონისძიების ყველა მონაწილეს საოცარი ემოციებისთვის, წარმატებებს ვუსურვებ მათ და მჯერა, რომ ნიჭიერი ახალგაზრდა თაობაა, ის ძლიერი ძალა, რომელიც დიდ როლს ითამაშებს ჩვენი ქვეყნის განვითარებისა და გაძლიერების საქმეში.“ - დავით ფაცაცია

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ, აფხაზეთის განათლებისა და კულტურის მინისტრმა ნანა გაბელიამ და აშშ-ის საელჩოს კულტურის ატაშე ივენ კალიმ ინგლისური ენის შემსწავლელი ინტენსიური პროგრამის კურსდამთავრებულებს სერტიფიკატები გადასცეს. სერტიფიკატების გადაცემის ცერემონია აფხაზეთის ავტონომიური რესპუბლიკის განათლებისა და კულტურის სამინისტროში შედგა.

ექვსთვიანი სასწავლო კურსი ამერიკის საელჩოს მხარდაჭერით განხორციელდა და განკუთვნილი იყო აფხაზეთის სკოლების იმ კურსდამთავრებულთათვის, რომლებიც სწავლას საქართველოს ავტორიზებულ უმაღლეს საგანმანათლებლო დაწესებულებებში განაგრძობენ.

პროგრამის ფარგლებში აფხაზეთიდან იძულებით გადაადგილებულმა თხუთმეტმა სტუდენტმა ინგლისური ენის ცოდნა გაიუმჯობესა.

აფხაზეთის ავტონომიური რესპუბლიკის განათლებისა და კულტურის სამინისტროში „6-თვიანი ინგლისური ენის შემსწავლელი ინტენსიური პროგრამის“ შემაჯამებელი ღონისძიება გაიმართა.

პროგრამის კურსდამთავრებულებს აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ, აფხაზეთის განათლებისა და კულტურის მინისტრმა ნანა გაბელიამ და აშშ-ის საელჩოს კულტურის ატაშე ივენ კალიმ სერტიფიკატები გადასცეს.

ექვსთვიანი სასწავლო კურსი ამერიკის საელჩოს მხარდაჭერით განხორციელდა და განკუთვნილი იყო აფხაზეთის სკოლების იმ კურსდამთავრებულთათვის, რომლებიც სწავლას საქართველოს ავტორიზებულ უმაღლეს საგანმანათლებლო დაწესებულებებში განაგრძობენ.

პროგრამის ფარგლებში თხუთმეტმა აფხაზეთიდან იძულებით გადაადგილებულმა სტუდენტმა ინგლისური ენის ცოდნა გაიუმჯობესა.

ვახტანგ სალარიძის საკონცერტო დარბაზში „აფხაზეთის დღე-2024“ აღინიშნა, სადაც აფხაზეთის ავტონომიური რესპუბლიკის მთავრობის მხარდაჭერით, „ბრავო რექორდსის“ მიერ შექმნილი აფხაზურენოვანი მუსიკალური ალბომის „ერთ სიმღერას ვმღერით“ პრეზენტაცია გაიმართა.

წელს პირველად აფხაზეთის დღის აღნიშვნა აფხაზეთიდან დევნილ მოზარდებსა და ახალგაზრდებს, ასევე, დროებით ოკუპირებულ აფხაზეთში მცხოვრებ მათ თანატოლებს მიეძღვნა.

საღამოზე დამსწრე საზოგადოებას სიტყვით მიმართეს და პროექტის მნიშვნელობაზე ისაუბრეს აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ, „ბრავო რექორდსის“ პრეზიდენტმა ზაზა შენგელიამ და პოეტმა და საზოგადო მოღვაწემ, გურამ ოდიშარიამ.

კონცერტზე ალბომში შესული აფხაზური მუსიკალური კომპოზიციები ცნობილმა ქართველმა შემსრულებლებმა წარმოადგინეს.

ღონისძიებას აფხაზეთის ავტონომიური რესპუბლიკის მთავრობის წევრები, აფხაზეთის უმაღლესი საბჭოს დეპუტატები, საქართველოს საკანონმდებლო და აღმასრულებელი ხელისუფლების წარმომადგენლები ესწრებოდნენ.

პროექტის ფარგლებში, მოხდა დღევანდელ აფხაზეთში ყველაზე მოსმენადი და პოპულარული თანამედროვე მუსიკალური ჰიტების შერჩევა-გადამუშავება და მათი ახლებურად გააზრებული არანჟირებების შექმნა. სიმღერების ვოკალური ნაწილი აფხაზურ ენაზე პოპულარულმა ახალგაზრდა ქართველმა მომღერლებმა ჩაწერეს.

პროექტში მონაწილეობდნენ ნუცა თოფურია, ია ჯგერენაია, ნოდიკო ტატიშვილი და სალომე ბაკურაძე, გიორგი ცხადაძე, დუეტი „ჯორჯია“, სოფო გელოვანი და გიორგი სუხიტაშვილი, თიკა მახალდიანი, სოფო ხალვაში, ანსამბლი „ოდა“, მილენა აჟიბა და ნინო პაპავა, აფხაზეთის სიმღერის სახელმწიფო ანსამბლი „შავნაბადა“.

ალბომში შესულია 10 თანამედროვე აფხაზური პოპ-ჰიტი და ერთი ავთენტური აფხაზური ხალხური სიმღერა, აფხაზეთის სიმღერის სახელმწიფო ანსამბლ „შავნაბადას“ შესრულებით.

პროექტი აფხაზეთის ავტონომიური რესპუბლიკის განათლებისა და კულტურის სამინისტროს, აფხაზეთის კულტურის, სპორტის და ახალგაზრდულ საქმეთა სააგენტოს, იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატის, აფხაზეთის ავტონომიური რესპუბლიკის საინფორმაციო-ანალიტიკური ცენტრისა და საქართველოში ევროკავშირის წარმომადგენლობის მიერ, ჟურნალ „სითისა“ და რადიოჰოლდინგ „ფორტუნას“ მხარდაჭერით განხორციელდა.

აფხაზეთის ავტონომიური რესპუბლიკის მთავრობა, „აფხაზეთის დღეს“ ყოველწლიურად სხვადასხვა თემატური ღონისძიებებით მთელი საქართველოს მასშტაბით აღნიშნავს. ზემოაღნიშნულის ფარგლებში 30 ივნისს ბათუმში დაგეგმილია გალაკონცერტი „აფხაზეთისთვის“, ასევე, სხვადასხვა აქტივობები დასავლეთ საქართველოში, სადაც აფხაზეთობისადმი მიძღვნილი ღონისძიებების ციკლი ე.წ. გამყოფ ხაზთან მასშტაბური კონცერტით დაიხურება.

საგარეო საქმეთა სამინისტროში ჟენევის საერთაშორისო მოლაპარაკებების თანათავმჯდომარეებთან 61-ე რაუნდის მოსამზადებელი შეხვედრა გაიმართა. შეხვედრაში აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე მონაწილეობდა.

შეხვედრას ქართული მხრიდან ხელმძღვანელობდა საგარეო საქმეთა მინისტრის პირველი მოადგილე და ჟენევის მოლაპარაკებებში საქართველოს დელეგაციის ხელმძღვანელი, ლაშა დარსალია.

შეხვედრაზე ხაზი გაესვა ჟენევის საერთაშორისო მოლაპარაკებების ეფექტიანი ფუნქციონირების მნიშვნელობას და, ამ კონტექსტში, აქცენტი გაკეთდა ჟენევის საერთაშორისო მოლაპარაკებების დღის წესრიგის მთავარი საკითხების — რუსეთის მიერ ევროკავშირის შუამავლობით დადებული 2008 წლის 12 აგვისტოს ცეცხლის შეწყვეტის შეთანხმებით ნაკისრი საერთაშორისო ვალდებულებების შესრულებისა და იძულებით გადაადგილებულ პირთა და ლტოლვილთა უსაფრთხო და ღირსეული დაბრუნების მიმართულებით პროგრესის მიღწევის საჭიროებაზე.

ასევე, ხაზი გაესვა გალში ინციდენტების პრევენციისა და მათზე რეაგირების მექანიზმის (IPRM) ყოველგვარი წინაპირობების გარეშე აღდგენისა და გალსა და ერგნეთში ხსენებული მექანიზმის რეგულარულად, ფუძემდებლური პრინციპების შესაბამისად გამართვის აუცილებლობას.

შეხვედრაზე საქართველოს მხრიდან მწვავედ დაისვა ოკუპირებულ რეგიონებსა და საოკუპაციო ხაზის სიახლოვეს უსაფრთხოების, ჰუმანიტარულ და ადამიანის უფლებათა კუთხით არსებული რთული ვითარების საკითხი. შეხვედრაზე ქართულმა მხარემ შეშფოთება გამოხატა საქართველოს ოკუპირებულ რეგიონებში ე.წ. არჩევნების ჩატარებასთან დაკავშირებით და დაგმო სულ ახლახანს — 9 ივნისს, ოკუპირებულ ცხინვალის რეგიონში გამართული ე.წ. საპარლამენტო არჩევნები.

ჟენევის საერთაშორისო მოლაპარაკებების 61-ე რაუნდის გამართვა დაგეგმილია 2024 წლის 25-26 ივნისს.

მიმდინარე წლის 7 ივნისს, აფხაზეთის ავტონომიური რესპუბლიკის მთავრობის მხარდაჭერით, აფხაზეთის განათლებისა და კულტურის სამინისტროსა და შპს „სქილვილს“ შორის ურთიერთთანამშრომლობის მემორანდუმი გაფორმდა.

მემორანდუმს ხელი აფხაზეთის ავტონომიური რესპუბლიკის განათლებისა და კულტურის მინისტრმა ნანა გაბელიამ და შპს „სქილვილის“ დირექტორმა გიორგი მარიამიძემ მოაწერეს.

ურთიერთთანამშრომლობის მემორანდუმის ფარგლებში დაგეგმილი სამუშაო შეხვედრები ხელს შეუწყობს IT სფეროს მიმართულებით აფხაზეთიდან იძულებით გადაადგილებულ პირთა განათლების გაუმჯობესებას და ციფრული მარკეტინგის სფეროს პოპულარიზაციას. შესაბამისი სემინარები და ტრენინგები დაეხმარება დევნილ ახალგაზრდებს პროფესიული პროგრამების სწავლების პროცესში და პროფესიული პროგრამის კურსდამთავრებულთა შრომით ბაზარზე კონკურენტუნარიანობის გაზრდას უზრუნველყოფს.

მემორანდუმის გაფორმებას აფხაზეთის განათლებისა და კულტურის მინისტრის პირველი მოადგილე ზვიად ბულისკერია, აფხაზეთის ფინანსთა და ეკონომიკის მინისტრის მოადგილე გიორგი ჯინჭარაძე, სამინისტროსა და „სქილვილის“ წარმომადგენლები ესწრებოდნენ.

აფხაზეთის ავტონომიური რესპუბლიკის სავაჭრო-სამრეწველო პალატის ორგანიზებითა და თბილისის საკრებულოს მხარდაჭერით რიყის პარკში აფხაზეთიდან დევნილი მეწარმე ქალების ხელნაკეთი ნივთებისა და პროდუქციის გამოფენა-გაყიდვა გაიმართა. ღონისძიება აფხაზეთის ფინანსთა და ეკონომიკის სამინისტროსა და აფხაზეთის განათლებისა და კულტურის სამინისტროების თანაორგანიზებით გაიმართა.

ღონისძიებას აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე, აფხაზეთის მთავრობის წევრები, შერიგებისა და სამოქალაქო თანასწორობის საკითხებში სახელმწიფო მინისტრის აპარატის, სამხრეთ ოსეთის ადმინისტრაციის, თბილისის საკრებულოსა და აფხაზეთის მთავრობის წარმომადგენლები ესწრებოდნენ.

გამოფენაზე წარმოდგენილი იყო დევნილი მეწარმეების მიერ წარმოებული ხელნაკეთი ნივთები და პროდუქცია. ღონისძიებაზე მისულ დამთვალიერებლებს ასევე შესაძლებლობა ჰქონდათ სხვადასხვა გასართობ პროგრამაში მიეღოთ მონაწილეობა.

ღონისძიება მუსიკალურად გოგონათა ვოკალურ-ინსტრუმენტულმა ანსამბლმა „გუმბათმა“ და ბავშვთა ქორეოგრაფიულმა ანსამბლმა „აფხაზეთმა“ გააფორმა.

აფხაზეთის ავტონომიური რესპუბლიკის იძულებით გადაადგილებულ პირთა მინისტრი დავით ფაცაცია და მინისტრის მოადგილე იგორ კოპალიანი, სამგორის რაიონის გამგებელ კახა სამხარაძესთან და მოწვეულ სტუმრებთან ერთად, პროექტის „აფხაზეთი საქართველოა“ შემაჯამებელ ღონისძიებას დაესწრნენ, რომლის ფარგლებშიც დაიდგა სპექტაკლი აფხაზეთის თემატიკაზე, ასევე წარმოდგენილ იქნა საცეკვაო და მუსიკალური ნომრები.

პროექტი აფხაზეთიდან იძულებით გადაადგილებულ პირთა-დევნილთა მომსახურების სააგენტოსა და არასამთავრობო ორგანიზაცია "ვოი-ახალგაზრდების ხმის" ერთობლივი ორგანიზებით და საქართველოს საპატრიარქოს მხარდაჭერით განხორციელდა.

თბილისში მდებარე 50-მდე საჯარო და კერძო ზოგადსაგანმანათლებლო დაწესებულების მოსწავლეებს საშუალება ჰქონდათ აქტიურად ჩართულიყვნენ ქართულ-აფხაზური ურთიერთობის გაუმჯობესებისათვის მიმართულ კამპანიაში, ასევე, გაეღრმავებინათ ცოდნა მიმდინარე პროცესების შესახებ.

პროექტის ფარგლებში, მოეწყო კონკურსი, მონაწილეებმა არაერთი საჩვენებელი ღონისძიება მოაწყვეს და კონკურსის გამარჯვებული სკოლის მოსწავლეებისთვის აფხაზეთის ავტონომიური რესპუბლიკის იძულებით გადაადგილებულ პირთა სამინისტროსა და საქართველოს საპატრიარქოს ერთობლივი ორგანიზებით მოეწყობა ტაო-კლარჯეთის ტური.

„ვეცადე, რომ პროექტის ფარგლებში გამართული ღონისძიებების უმეტესობას დავსწრებოდი და თამამად შეიძლება ითქვას არცერთი დადგმა არ მინახია ემოციების გარეშე - ეს იყო საოცარი სითბო, სიყვარული ერთმანეთისა და აფხაზეთის მიმართ. მიხარია მოსწავლეების მონდომება, განწყობა, სწორედ ეს ახალგაზრდები გვაძლევენ იმედს, რომ ჩვენ ვერავინ მოგვერევა.

წარმატებებს ვუსურვებ პროექტის ყველა მონაწილეს და მჯერა, რომ ნიჭიერი ახალგაზრდა თაობაა, ის ძლიერი ძალა, რომელიც დიდ როლს ითამაშებს ჩვენი ქვეყნის განვითარებისა და გაძლიერების საქმეში.“ - დავით ფაცაცია.

შეხვედრებში მონაწილეობდნენ აფხაზეთის ავტონომიური რესპუბლიკის იძულებით გადაადგილებულ პირთა მინისტრი დავით ფაცაცია, აფხაზეთის ავტონომიური რესპუბლიკის სავაჭრო-სამრეწველო პალატის პრეზიდენტი გოგიტა თედორაძე, სსიპ - „აფხაზეთიდან იძულებით გადაადგილებულ პირთა – დევნილთა მომსახურების სააგენტო“ დირექტორი სალომე დოლიძე.

შეხვედრები გაიმართა სხვადასხვა სფეროს წარმომადგენლებთან, რომლებსაც ქართული დელეგაციის წევრებმა აფხაზეთის ავტონომიური რესპუბლიკის მთავრობის საქმიანობა, ძირითადი მიმართულებები გააცნეს.

მხარეებმა ურთიერთთანამშრომლობის საკითხები განიხილეს და სამომავლო გეგმები დასახეს, ოკუპირებულ ტერიტორიაზე მცხოვრები და აფხაზეთიდან იძულებით გადაადგილებული პირების მხარდაჭერის, კვალიფიკაციის ამაღლების, დასაქმების ხელშეწყობის, სამედიცინო მომსახურების მიზნით.

ერთ-ერთი მნიშვნელოვანი შეხვედრა, გერმანიის რესპუბლიკაში ვიზიტისას, საფეხბურთო კლუბ აინტრახტის პრეზიდენტთან აქსელ ჰელმანთან გაიმართა, სადაც საუბარი შეეხო ახალგაზრდების მხარდაჭერის მიმართულებით ხედვებსა და პოლიტიკას. შეხვედრის მონაწილეებმა ურთიერთთანამშრომლობის კონკრეტული საკითხები განიხილეს.

აფხაზეთის მთავრობის მხარდაჭერით, ბავშვთა დაცვის საერთაშორისო დღესთან დაკავშირებით, აფხაზეთის რეგიონალურმა ოლიმპიურმა ორგანიზაციამ, სპორტის სხვადასხვა სახეობებში ღონისძიებები გამართა.

ღონისძიების ფარგლებში აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ და აფხაზეთის განათლებისა და კულტურის მინისტრმა ნანა გაბელიამ სპორტულ აქტივობებში გამარჯვებული ახალგაზრდები მედლებით, სიგელებითა და სიმბოლური საჩუქრებით დააჯილდოვეს.

ღონისძიება საქართველოს ეროვნული ოლიმპიური კომიტეტისა და აფხაზეთის ავტონომიური რესპუბლიკის განათლებისა და კულტურის სამინისტროს მხარდაჭერით გაიმართა და მასში აფხაზეთის №2 და ვოვა ვეკუას სახელობის აფხაზეთის №3 საჯარო სკოლის მოსწავლეები მონაწილეობდნენ.