აფხაზეთის ავტონომიური რესპუბლიკის მთავრობა

Аҧснытәи автономтә республика аиҳабыра

სიახლეები

პრეზიდენტმა აფხაზეთის მთავრობის თავმჯდომარესთან სამუშაო შეხვედრა გამართა

საქართველოს პრეზიდენტმა სალომე ზურაბიშვილმა და აფხაზეთის ავტონომიური რესპუბლიკის მთავრობის თავმჯდომარემ რუსლან აბაშიძემ ოკუპირებულ აფხაზეთში არსებულ ვითარებასა და კორონავირუსის პანდემიით გამოწვეულ სიტუაციაზე ისაუბრეს. 

საუბარი შეეხო ასევე, სამომავლო გეგმებსა და აფხაზურ კულტურასა და ენასთან დაკავშირებით არსებულ მდგომარეობას.

გალის რაიონის ორი სხვადასხვა სკოლის XI კლასის მოსწავლე ესეების კონკურსის- ,,ბერტა ფონ ზუტნერი - ევროპა საქართველოში" გამარჯვებულები გახდნენ

ევროპის დღეებთან დაკავშირებით, საქართველოში ავსტრიის რესპუბლიკის საელჩოსა და ბერტა ფონ ზუტნერის მშვიდობის პრემიის ესეების კონკურსი უფროსკლასელებისთვის – „ბერტა ფონ ზუტნერი – ევროპა საქართველოში“ დასრულდა, კონკურსში 150-მდე სკოლის მოსწავლე მონაწილეობდა და იგი ევროპული ღირებულებების უკეთ შემეცნებასა და ქართულ-ავსტრიული ურთერთობების განმტკიცებას ემსახურება. კონკურსის შედეგად გამოვლინდა 6 გამარჯვებული, რომელთაგან პირველი და მესამე პრემია გალის რაიონის ორი სხვადასხვა სკოლის XI კლასის მოსწავლეებს გადაეცათ.

  • პირველი პრემია - ჯიმი თუთისანი, ოზურგეთის მუნიციპალიტეტის დაბა ლაითურის საჯარო სკოლა (XI კლასი); გალის რაიონის XI კლასის მოსწავლე;
  • მეორე პრემია - კესო ავალიშვილი, ქ. თბილისის 35-ე საჯარო სკოლა (XI კლასი); სოფიო ბასიალაია - ქ. ფოთის წმ. ნიკოლოზის ზ/ს საშუალო სკოლა (XI კლასი);
  • მესამე პრემია - ანა კეკოშვილი, ვლადიმერ კომაროვის თბილისის ფიზიკა-მათემატიკის 199-ე საჯარო სკოლა (XII კლასი); გალის რაიონის XI კლასის მოსწავლე;

კონკურსში გამარჯვებულები 6 ივლისს, ავსტრიის ელჩის რეზიდენციაში დააჯილდოვეს. ახალი კორონავირუსის პანდემიის გამო ჩაკეტილი ენგურის ხიდის პირობებში, გალის რაიონის საჯარო სკოლების გამარჯვებულები დაჯილდოებას დისტანციურად დაესწრნენ. გამაჯვებულებს კი კომპეტენტური ჟიურის გადაწყვეტილებით ,,ბერტა ფონ ზუტნერის“ პრემია, სიგელები და ფულადი ჯილდო გადაეცათ. ღონისძიებას ესწრებოდა გალის რაიონის საგანმანათლებლო რესუსცენტრის უფროსი ნონა შონია.

რუსლან აბაშიძე საქართველოში ლატვიის რესპუბლიკის საგანგებო და სრულუფლებიან ელჩს შეხვდა

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე საქართველოში ლატვიის რესპუბლიკის საგანგებო და სრულუფლებიან ელჩს ინგრიდა ლევრენცეს შეხვდა. შეხვედრა გაცნობით ხასიათს ატარებდა.

ლატვიის ელჩმა კიდევ ერთხელ დაადასტურა საქართველოს ტერიტორიული მთლიანობის მტკიცე მხარდაჭერა და მისი ქვეყნის ურყევი პოზიცია ოკუპირებული ტერიტორიების არაღიარების პოლიტიკის მიმართ.

რუსლან აბაშიძემ ლატვიელ დიპლომატს მადლობა გადაუხადა მისი ქვეყნის მხრიდან საქართველოს ტერიტორიული მთლიანობის მხარდაჭერისათვის და აღნიშნა, რომ ლატვია საქართველოს ევროპულ და ევროატლანტიკურ სტრუქტურებში ინტეგრაციის ერთი-ერთი მთავარი მხარდამჭერია.

მთავრობის თავმჯდომარემ ელჩს მიაწოდა ინფორმაცია აფხაზეთის ლეგიტიმური მთავრობისა და მისი სტრუქტურული ერთეულების საქმიანობის შესახებ. გააცნო ოკუპირებული აფხაზეთის ტერიტორიაზე არსებული ვითარება და საოკუპაციო რეჟიმის მხრიდან ადგილობრივი მოსახლეობის ფუნდამენტური უფლებების დარღვევის ფაქტებზე ისაუბრა.

შეხვედრაზე განათლების სფეროში და გარემოს დაცვის მიმართულებით სამომავლო თანამშრომლობის შესაძლებლობები განიხილეს.

რუსლან აბაშიძე სენაკის წმინდა იოანე ნათლისმცემლის საკათედრო ტაძარში სადღესასწაულო ლიტურგიას დაესწრო

იოანე ნათლისმცემლის შობის დღესასწაულთან დაკავშირებით სენაკში, წმინდა იოანე ნათლისმცემლის საკათედრო ტაძარში სრულიად საქართველოს კათოლიკოს-პატრიარქის მოსაყდრემ, სენაკისა და ჩხოროწყუს მიტროპოლიტმა შიომ (მუჯირი), ეპარქიის სამღვდელოებასთან ერთად სადღესასწაულო წირვა-ლოცვა აღავლინა.

ტაძარში აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე, სენაკის მუნიციპალიტეტის მერის პირველი მოადგილე გრიგოლ ბაღათურია, მერის მოადგილე კახაბერ კუპრეიშვილი, აფხაზეთის ავტონომიური რესპუბლიკიდან იძულებით გადაადგილებულ პირთა - დევნილთა მინისტრი კონსტანტინე კუჭუხიძე, მინისტრის პირველი მოადგილე გურამ მისაბიშვილი, მინისტრის მოადგილე დავით მიქავა და სამეგრელო-ზემო სვანეთის ტერიტორიული ორგანოს ხელმძღვანელი კოტე ბასარია იმყოფებოდნენ.

წირვის ბოლოს, მეუფე შიომ სრულიად საქართველოს კათოლიკოს პატრიარქის ილია II-ის კურთხევით ეპარქიის სამღვდელოების წარმომადგენლები დააჯილდოვა.

5 ივლისი კამანის ტრაგედიის დღეა

აფხაზეთში, სოფელ კამანში დატრიალებული ტრაგედიიდან 27 წელი გავიდა.

1993 წლის 5 ივლისის ფართომასშტაბიანი შემოტევა კამანელებისთვის მოულოდნელი არ ყოფილა,  ქართველები მოწინააღმდეგის იერიშებს ღირსეულად იგერიებდნენ, თუმცა არათანაბარი ბრძოლა საბოლოოდ, კამანის აღებით დასრულდა.

კამანის ტრაგედიის დღეს, იოანე ოქროპირის ტაძრის წინამძღვარი მამა ანდრია (ყურაშვილი) და  აფხაზი საზოგადო მოღვაწე იური (გიორგი) ანუა  ტაძრის ეზოში მოწამეობრივად აღესრულნენ. ისინი ბოლომდე ერთგულნი დარჩნენ თავისი სულიერი მრწამსის და საკუთარი სიცოცხლე სამშობლოს შესწირეს, სამშობლოს რომელიც ყველასთვის ერთი იყო. მამა ანდრია  და  იური (გიორგი) ანუა დაკრძალული არიან კამანის ეკლესიის გალავანთან.

1988-1990 წლებში იური ანუამ სოფელ კამანში არსებული ნგრევისპირას მისული, იოანე ოქროპირის სახელობის ტაძარი, საკუთარი სახსრებით აღადგინა და წმ. იოანე ოქროპირის სასწაულმოქმედი ქვის სარკოფაგი სოხუმის საკათედრო ტაძრიდან კამანის განახლებულ ეკლესიაში დააბრუნა. 1990 წელს სრულიად საქართველოს კათოლიკოს-პატრიარქმა, უწმინდესმა და უნეტარესმა ილია მეორემ ტაძარში სადღესასწაულო წირვა აღავლინა და იური (გიორგი) ანუას გაწეული უდიდესი ღვაწლისათვის საქართველოს ეკლესიის უმაღლესი ჯილდო, წმინდა გიორგის პირველი ხარისხის ორდენი გადასცა.

რუსლან აბაშიძე აშშ-ის ხელისუფლებას და ამერიკელ ხალხს დამოუკიდებლობის დღეს ულოცავს

აფხაზეთის ავტონომიური რესპუბლიკის მთავრობის სახელით ამერიკის შეერთებული შტატების ხელისუფლებას და ამერიკელ ხალხს გილოცავთ ეროვნული დღესასწაულს- ამერიკის შეერთებული შტატების დამოუკიდებლობის დღეს.

საქართველოსა და აშშ-ის ურთიერთობები ორმხრივ პატივისცემასა და ნდობაზეა დამყარებული, რომელიც შეუქცევადი ხასიათის მატარებელია და ურთიერთთანამშრომლობის სანიმუშო მაგალითს  წარმოადგენს.

ძალიან მნიშვნელოვანია ამერიკის შეერთებული შტატების მტკიცე მხარდაჭერა საქართველოს ტერიტორიული მთლიანობისა და სუვერენიტეტის დაცვის საქმეში, რაც ოკუპირებული ტერიტორიების არაღიარების პოლიტიკის გატარებაში, აფხაზეთის კონფლიქტის მშვიდობიანი დარეგულირების მუდმივ მცდელობაში, აფხაზეთიდან დევნილთა თავიანთ საცხოვრებელ ადგილებში დაბრუნების აუცილებლობის მუდმივ მხარდაჭერაში, დევნილი და ოკუპირებულ ტერიტორიებზე მცხოვრები ჩვენი საზოგადოების უფლებების დაცვასა და საქართველოს ევრო-ატლანტიკური მისწრაფებების თანადგომაში გამოიხატება. 

მსურს კიდევ ერთხელ გამოვხატო ჩემი პატივისცემა და გულითადად მოგილოცოთ ამერიკის შეერთებული შტატების დამოუკიდებლობის დღე და ვუსურვო ამერიკელ ხალხს მშვიდობა, კეთილდღეობა და სტაბილურობა.

აფხაზეთის ავტონომიური რესპუბლიკის მთავრობის თავმჯდომარე

რუსლან აბაშიძე

პროექტის - „კლასგარეშე დისტანციური სწავლების დანერგვა“ - განხორციელების თაობაზე სამუშაო შეხვედრა გაიმართა
აფხაზეთის ავტონომიური რესპუბლიკის განათლებისა და კულტურის სამინისტროში პროექტის - „კლასგარეშე დისტანციური სწავლების დანერგვა“ - განხორციელების თაობაზე სამუშაო შეხვედრა გაიმართა. პროექტს აფხაზეთის ავტონომიური რესპუბლიკის მთავრობის მხარდაჭერით, აფხაზეთის ავტონომიური რესპუბლიკის უმაღლესი საბჭო ახორციელებს.
 
შეხვედრას ესწრებოდნენ აფხაზეთის ავტონომიური რესპუბლიკის განათლებისა და კულტურის მინისტრის პირველი მოადგილე ირაკლი გელენავა, სამინისტროს განათლებისა და საგანმანათლებლო პროგრამების სამსახურის უფროსი ნინო ლობჟანიძე, გალის რაიონის საგანმანათლებლო რესუსრსცენტრის უფროსი ნონა შონია და აფხაზეთის ა/რ უმაღლესი საბჭოს აფხაზეთის ოკუპირებულ ტერიტორიაზე მცხოვრებ მოსახლეობასთან ურთიერთობის კოორდინატორი ნანა კვარაცხელია.
 
პროექტი ოკუპირებული აფხაზეთის ტერიტორიაზე არსებულ საშუალო სკოლებსა და აფხაზეთის საჯარო სკოლებში დისტანციურ სწავლებას ითვალისწინებს და ამ სკოლებისთვის დამატებით სასწავლო რესურსს წარმოადგენს. პროექტით სარგებლობა ასევე შეეძლებათ საქართველოს სხვა რეგიონებსა და საზღვარგარეთ მცხოვრებ წარმოდგენილი საკითხით დაინტერესებულ მოზარდებს.
პროექტში მონაწილეობის მიღება შეუძლიათ მოსწავლეებს I-დან xII კლასის ჩათვლით. რეგისტრაციის გავლა, სხვადასხვა სასწავლო კურსის მიხედვით, შესაძლებელი იქნება ონლაინელექტრონულ ბმულზე (მისამართს მოგვიანებით გამოვაქვეყნებთ).
შეხვედრის ფარგლებში მხარეები შეთანხმდნენ, რომ მაქსიმალურად უზრუნველყოფენ ხსენებულ პროექტში მოსწავლეების ჩართულობას.
აფხაზეთის ავტონომიური რესპუბლიკის მთავრობის ინიციატივით 16 დევნილ შშმ პირს გადასაადგილებელი ეტლი გადაეცა

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე, თავმჯდომარის მოადგილე ანზორ მარგიანი და ჯანმრთელობისა და სოციალური დაცვის მინისტრი ქეთევან ბაკარაძე დაბა წყნეთში იმყოფებოდნენ, სადაც აფხაზეთიდან დევნილ რეზო ჯაფარიძეს გადასაადგილებელი ეტლი გადასცეს.

საქველმოქმედო აქცია აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტროს ორგანიზებით და საერთაშორისო ასოციაცია „საქართველოს ქალები მშვიდობისა და სიცოცხლისათვის“ მხარდაჭერით გაიმართა. პროექტის ფარგლებში გადასაადგილებელი ეტლი მთელი საქართველოს მასშტაბით 16 აფხაზეთიდან დევნილ შშმ პირს გადაეცემა.

რუსლან აბაშიძემ ტამიშის ბრძოლის დროს დაღუპული გმირების ხსოვნას პატივი მიაგო

აფხაზეთის ომის დროს, დაბა ტამიშთან მოწინააღმდეგის მხრიდან საზღვაო დესანტის გადმოსხმის შედეგად გამართული ბრძოლის დაწყებიდან 27 წელი გავიდა. აფხაზეთის ავტონომიური რესპუბლიკის მთავრობის თავმჯდომარემ რუსლან აბაშიძემ და თავმჯდომარის მოადგილემ ანზორ მარგიანმა დუშეთში, ტამიშის ბრძოლის დროს დაღუპულ გმირთა მემორიალი ყვავილებით შეამკეს და პატივი მიაგეს მათ ხსოვნას. მემორიალთან მცხეთა-მთიანეთის რეგიონში სახელმწიფო რწმუნებული შალვა კერესელიძე, დუშეთის მუნიციპალიტეტის მერი ზურაბ სეხნიაშვილი, მერის მოადგილე, ვეტერანების საქმეთა სახელმწიფო სამსახურის წარმომადგენლები და აფხაზეთის ომის მონაწილეები იმყოფებოდნენ.

„2 ივლისი ჩვენი ქვეყნის  უახლეს ისტორიაში  ერთ-ერთი ყველაზე ტრაგიკული დღეა. ტამიშის  ბრძოლა საქართველოს ისტორიაში შევა, როგორც ქართველი ჯარისკაცების  თავგანწირვისა და გმირობის უდიდესი მაგალითი. პატივს მივაგებთ ჩვენი მებრძოლების ხსოვნას, რომლებმაც სამშობლოს შესწირეს ყველაზე ძვირფასი საკუთარი სიცოცხლე. ყოველი ასეთი დღე  მაგალითია ჩვენი მომავალი თაობებისთვის, რათა არასდროს დაივიწყონ როგორ იბრძოდნენ მათი მშობლები და წინაპრები სამშობლოს დამოუკიდებლობისთვის. ყველაფერი უნდა გავაკეთოთ იმისთვის, რომ ქვეყანაში იყოს  მშვიდობა  და  ასეთი დღეები არასოდეს განმეორდეს“, - განაცხადა რუსლან აბაშიძემ.

კონკურსი დიმიტრი (არზაყან) ემუხვარის, ჟიული შარტავასა და აკადემიკოს ილია ვეკუას სახელობის სტიპენდიების მოსაპოვებლად

აფხაზეთის ავტონომიური რესპუბლიკის  განათლების და კულტურის სამინისტრო ბაკალავრიატისა და მაგისტრატურის საფეხურის წარჩინებული სტუდენტებისათვის აცხადებს კონკურსს დიმიტრი (არზაყან) ემუხვარის, ჟიული შარტავასა და აკადემიკოს ილია ვეკუას სახელობის სტიპენდიების მოსაპოვებლად

დიმიტრი (არზაყან) ემუხვარისა და ჟიული შარტავას სახელობის სტიპენდიები აფხაზეთის ავტონომიური რესპუბლიკის მთავრობის ინიციატივით 2016 წელს დაწესდა.  სტიპენდიების დაწესება ემსახურება მაგისტრატურისა და ბაკალავრიატის სტუდენტების მოტივაციის ამაღლებას, ახალგაზრდების მხარდაჭერასა და აფხაზეთის თემატიკის პოპულარიზაციას.

  • დიმიტრი (არზაყან) ემუხვარის სტიპენდია გამიზნულია პოლიტიკის მეცნიერების დარგში განსაკუთრებული მიღწევებითა და წარმატებებით წარმოჩენილი  აფხაზეთის თემატიკაზე მომუშავე იმ ბაკალავრიატისა და მაგისტრატურის აკრედიტირებული უმაღლესი საგანმანათლებლო პროგრამის  სტუდენტებისათვის, რომლებსაც აქვთ 80% და მეტი აკადემიური მოსწრება, გამოქვეყნებული აქვთ სამეცნიერო ნაშრომები, მონაწილეობდნენ სამეცნიერო კონფერენციებში და არიან საზოგადოებრივად აქტიურები.
  • ჟიული შარტავას სახელობის სტიპენდია გამიზნულია (გარდა პოლიტიკის მეცნიერების დარგში) განსაკუთრებული მიღწევებითა და წარმატებებით წარმოჩენილი აფხაზეთის თემატიკაზე მომუშავე იმ ბაკალავრიატისა და მაგისტრატურის აკრედიტირებული უმაღლესი საგანმანათლებლო პროგრამის სტუდენტებისათვის, რომლებსაც აქვთ 80% და მეტი აკადემიური მოსწრება, გამოქვეყნებული აქვთ სამეცნიერო ნაშრომები, მონაწილეობდნენ სამეცნიერო კონფერენციებში და არიან საზოგადოებრივად აქტიურები.
  • ილია ვეკუას სახელობის სტიპენდია აფხაზეთის ა/რ მთავრობამ 2017 წელს დააწესა. სტიპენდია გამიზნულია სსიპ - სოხუმის სახელმწიფო უნივერსიტეტის ზუსტი და საბუნებისმეტყველო მიმართულების ბაკალავრიატის აკრედიტებული უმაღლესი საგანმანათლებლო პროგრამის იმ სტუდენტებისათვის, რომლებსაც აქვთ 70% და მეტი აკადემიური მოსწრება, გამოქვეყნებული აქვთ სტუდენტური ნაშრომები, მონაწილეობდნენ კონფერენციებში  და  არიან   საზოგადოებრივად  აქტიურები.

სტიპენდია გამიზნულია ასევე  სსიპ - სოხუმის  სახელმწიფო  უნივერსიტეტის ზუსტი და საბუნებისმეტყველო მიმართულების მაგისტრატურის აკრედიტებული უმაღლესი საგანმანათლებლო პროგრამის იმ სტუდენტისათვის, რომლებსაც აქვთ 80% და მეტი აკადემიური მოსწრება, გამოქვეყნებული აქვთ სამეცნიერო ნაშრომები, მონაწილეობდნენ კონფერენციებში  და  არიან  საზოგადოებრივად   აქტიურები.

დიმიტრი (არზაყან) ემუხვარისა და ჟიული შარტავას სახელობის სტიპენდიების კონკურსში მონაწილეობის  მსურველთა  განცხადებების   წარდგენის ვადაა 2020 წლის 01 ივლისიდან 31 ივლისის ჩათვლით, ხოლო ილია ვეკუას სახელობის სტიპენდიის კონკურსში მონაწილეობის მსურველების განცხადებების   წარდგენისა - 2020  წლის 01 ივლისიდან 10 აგვისტოს ჩათვლით.

დეტალური ინფორმაციისთვის იხილეთ დანართები:

რუსლან აბაშიძე საქართველოში ნორვეგიის სამეფოს საგანგებო და სრულუფლებიან ელჩს შეხვდა

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე ნორვეგიის სამეფოს საგანგებო და სრულუფლებიან ელჩს საქართველოში ჰელენ სანდ ანდრესენს შეხვდა. შეხვედრა გაცნობით ხასიათს ატარებდა.

ნორვეგიელმა დიპლომატმა კიდევ ერთხელ დაადასტურა მისი ქვეყნის ურყევი პოზიცია და სრული მხარდაჭერა საქართველოს ტერიტორიული მთლიანობის მიმართ.

რუსლან აბაშიძემ უცხოელ დიპლომატს აფხაზეთის ავტონომიური რესპუბლიკის მთავრობისა და მისი სტრუქტურული ერთეულების საქმიანობის შესახებ ინფორმაცია მიაწოდა. გააცნო ოკუპირებულ აფხაზეთში ამჟამად არსებული ვითარება და საოკუპაციო რეჟიმის მხრიდან ადამიანის ფუნდამენტური უფლებების დარღვევის ფაქტებზე ისაუბრა. საუბარი შეეხო ჟენევის საერთაშორისო ფორმატით მიმდინარე მოლაპარაკებებს და COVID-19-ის პანდემიის პერიოდში ოკუპირებულ აფხაზეთში არსებულ მდგომარეობას.

შეხვედრაზე მხარეებმა სხვადასხვა სფეროში დევნილი საზოგადოების ჩართულობით სამომავლო თანამშრომლობის შესაძლებლობები განიხილეს.

შეხვედრას პოლიტიკურ და ეკონომიკურ საკითხებში ელჩის მრჩეველი დავით მაღრაძე და აფხაზეთის ავტონომიური რესპუბლიკის მთავრობის აპარატის საერთაშორისო ურთიერთობათა და პროტოკოლის დეპარტამენტის უფროსი დავით გახარია ესწრებოდნენ.

დევნილთა საქმეების დეპარტამენტის უფროსმა გ. კოკაიამ აღმოსავლეთ საქართველოს ტერიტორიულ ორგანოში სამუშაო შეხვედრა გამართა.

დევნილთა საქმეების დეპარტამენტის უფროსმა გ. კოკაიამ აღმოსავლეთ საქართველოს ტერიტორიულ ორგანოში სამუშაო შეხვედრა გამართა.

შეხვედრაზე განხილულ იქნა ტერიტორიული ორგანოს მიერ დაგეგმილი ღონისძიებების შესრულების მიმდინარეობა, მოხელეთა შეფასების პროცესის მნიშვნელობა, ტერიტორიული ორგანოს მიერ შესრულებული სამუშაოს შედეგები და სხვა მიმდინარე საკითხები.

 

რუსლან აბაშიძე თბილისში, ყოფილი 165-ე ბაგა-ბაღის შენობაში მცხოვრებ დევნილებს შეხვდა

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე თბილისში, ვაზისუბნის მე-2 მიკრორაიონში, ყოფილი 165-ე ბაგა-ბაღის კომპაქტურ ჩასახლებაში იმყოფებოდა.

აფხაზეთის ავტონომიური რესპუბლიკის მთავრობის ინიციატივით და შპს „უშბა დისტილერის“ მხარდაჭერით ჩასახლებაში მცხოვრებ აფხაზეთიდან დევნილ 34 ოჯახს კორონავირუსის გავრცელების პრევენციული ღონისძიებების ფარგლებში  სადეზინფექციო და ჰიგიენის საშუალებები გადაეცა.

მთავრობის თავმჯდომარე აფხაზეთის ავტონომიური რესპუბლიკიდან იძულებით გადაადგილებულ პირთა-დევნილთა სამინისტროს წარმომადგენლებთან ერთად ადგილზე გაეცნო დევნილთა საცხოვრებელ პირობებს, მოისმინა მათი სოციალური პრობლემები და კორპუსში ინფრასტრუქტურული საკითხების მოგვარების გზებზე იმსჯელა.

შეხვედრაზე აფხაზეთის ავტონომიური რესპუბლიკიდან იძულებით გადაადგილებულ პირთა-დევნილთა მინისტრი კონსტანტინე კუჭუხიძე, მინისტრის პირველი მოადგილე გურამ მისაბიშვილი, სამინისტროს აღმოსავლეთ საქართველოს ტერიტორიული ორგანოს ხელმძღვანელი დავით ძალამიძე და შპს „უშბა დისტილერის“ დირექტორი დიმიტრი აბესაძე იმყოფებოდნენ.

იუსტიციისა და სამოქალაქო ინტეგრაციის საკითხებში აფხაზეთის ა/ რ მინისტრის აპარატმა ანგარიში წარადგინა

იუსტიციისა და სამოქალაქო ინტეგრაციის საკითხებში აფხაზეთის ა/რ მინისტრმა დავით ფაცაციამ, აფხაზეთის ავტოპნომიური რესპუბლიკის მთავრობის თავმჯდომარეს რუსლან აბაშიძეს, მიმდინარე წლის პირველი ორი კვარტლის ანგარიში წარუდგინა. პრეზენტაციაზე პროგრამის „სამშვიდობო ინიციატივები, სამოქალაქო ინტეგრაცია, ნდობის აღდგენის მხარდაჭერა და დიალოგისკენ მიმართული შესაძლებლობების გაძლიერება“ ფარგლებში განხორციელებული  პროექტები შეაჯამეს, ასევე საერთაშორისო ღონისძიებები - ,,დიასპორები ერთიანი საქართველოსთვის“ და „სახალხო დიპლომატიის როლი ქართულ-აფხაზურ ურთიერთობებში“. 

ანგარიშში, პანდემიის პირობებში არსებული სოციალური და სამოქალაქო  პასუხისმგებლობიდან გამომდინარე, მინისტრის აპარატის მიერ, დისტანციურ სამუშაო რეჟიმში დაგეგმილი და ჩატარებული სამუშაოების, მათ შორის სხვადასხვა კომპანიებთან თანამშრომლობით,  ომის ვეტერნ, სოციალურად დაუცველ და შეზღუდული შესაძლებლობების მქონე დევნილი ოჯახების მიმართ გაწეული დახმარების შესახებაც ისაუბრეს.

პრეზენტაციის დასკვნით ნაწილში მიმდინარე პროექტები და სამომავლო გეგმები განიხილეს.

სოხუმის კონსტანტინე გამსახურდიას სახელობის სახელმწიფო დრამატული თეატრის მსახიობი სერგო პაჭკორია გარდაიცვალა

საქართველოს სახალხო არტისტი, ღირსების ორდენის კავალერი, საქართველოს და აფხაზეთის დამსახურებული მსახიობი, სოხუმის კონსტანტინე გამსახურდიას სახელობის სახელმწიფო დრამატული თეატრის მსახიობი სერგო პაჭკორია 60 წელი იდგა სოხუმის კ. გამსახურდიას სახელობის  სახელმწიფო დრამატული თეატრის სცენაზე. ის თავის კოლეგებთან ერთად ქმნიდა ამ თეატრის ისტორიას, მის შემოქმედებით ცხოვრებას, მათ შორის ოქროს ხანად წოდებულ პერიოდს.

სერგო პაჭკორიამ დიდი ოსტატობით აღბეჭდილი სახეები შექმნა ისეთ გახმაურებულ სპექტაკლებში, როგორებიცაა უ. შექსპირის „ვენეციელი ვაჭარი“ (ანტონიო), კონსტანტინე გამსახურდიას „დიდოსტატის მარჯვენა“ (ზვიად სპასალარი), გურამ ბათიაშვილის „1832 წელი“ (ნიკოლოზ ფალავანდიშვილი), ჰ. იბსენის „ბრძოლა ტახტისათვის“ (ნიკოლასი), ნ. დუმბაძის „ერთი ცის ქვეშ“ (ხრისტო), დემნა შენგელაიას „ბათა ქექია“ (ბათა) და ა. შ. მის მიერ შესრულებულ თითქმის 150 როლში აისახა მსახიობის თანამედროვე  ეპოქა თავისი ჭირ-ვარამითა და ქარტეხილებით. მან, როგორც სოხუმის თეატრის მთელმა დასმა, საკუთარ თავზე იწვნია საქართველოს ძიძველი კუთხის აფხაზეთის თავზე დატეხილი უბედურება და დევნილის უმძიმესი ხვედრი გაიზიარა.

სერგო პაჭკორია არა მარტო გამორჩეული მსახიობი, არამედ გამორჩეული პიროვნება იყო, მისი თითოეული პერსონაჟიც (დადებითი თუ უარყოფითი) გამოკვეთილი პიროვნული თვისებებით ამახსოვრებდა მაყურებელს თავს.

„მადლობა ჩემს მაყურებელს გულწრფელი ტაშისთვის, რომელიც ხშირად სიხარულის ცრემლებს მგვრიდა“, - თქვა ერთ-ერთ საიუბილეო საღამოზე სერგო პაჭკორიამ, რომლისთვისც მაყურებელს ანალოგიური სათქმელი ჰქონდა: „მადლობა თქვენს მიერ განსახიერებული გულწრფელი როლებისათვის, რომელიც ხშირად ცრემლებს გვგვრიდა“. სწორედ ამგვარი დამოკიდებულება ქმნიდა საოცარ კავშირს მსახიობსა და მაყურებელს შორის, რის გამოც ორივე ბედნიერი იყო. და ეს ბედნიერი დღეები და წლები ყოველთვის ემახსოვრება სოხუმელ მაყურებელს. 

თეატრმცოდნე ნათელა არველაძე წერდა: „სერგო პაჭკორიას ნიღბები ისეთივე მრავალფეროვანია, როგორც ბუნება, ისეთივე მრავალგვარია, როგორც ცხოვრება, ისეთივე მბორგავი, სევდიანი, დამაფიქრებულია, როგორც ადამიანი“.

წავიდა ჩვენგან გამორჩეული მსახობი, მბორგავი და ამავე დროს დაფიქრებული პიროვნება, რომელსაც თან გაჰყვა მშობლიურ ქალაქ სოხუმსა თუ მის განუყოფელ თეატრში დაბრუნების სევდა.