აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძემ, თბილისის საკრებულოს თავმჯდომარე ზურაბ აბაშიძესთან სამუშაო შეხვედრა გამართა.
სამუშაო შეხვედრაზე სამომავლო ერთობლივი ღონისძიებების განხორციელების შესაძლებლობები განიხილეს და გეოგრაფიული ობიექტების სახელდების საკითხებში თანამშრომლობის მზადყოფნა გამოთქვეს.
გიორგი ჯინჭარაძემ საკრებულოს თავმჯდომარეს თანამშრომლობისა და დევნილი მოსახლეობის მხარდაჭერისთვის მადლობა გადაუხადა.
თავის მხრივ, ზურაბ აბაშიძემ თბილისის საკრებულოსა და აფხაზეთის ავტონომიური რესპუბლიკის მთავრობას შორის მომავალში თანამშრომლობის კიდევ უფრო გაღრმავების იმედი გამოთქვა.
შეხვედრაში აფხაზეთის ავტონომიური რესპუბლიკის განათლებისა და კულტურის მინისტრი გიორგი ძაძამია და თბილისის საკრებულოს სახელდებისა და სიმბოლიკის კომისიის თავმჯდომარე ლევან აბაშიძე მონაწილეობდნენ.
აფხაზეთის მთავრობის თავმჯდომარის გიორგი ჯინჭარაძის გადაწყვეტილებით, აფხაზეთიდან იძულებით გადაადგილებულ, მკვეთრად გამოხატული შეზღუდული შესაძლებლობის მქონე I ჯგუფის ვეტერანებს 500-ლარიანი ერთჯერადი ფინანსური დახმარება გაეწევათ.
აღნიშნული გადაწყვეტილების შესახებ აფხაზეთის მთავრობის თავმჯდომარემ ვეტერანის დღისადმი მიძღვნილ ღონისძიებაზე სიტყვით გამოსვლისას ისაუბრა.
გიორგი ჯინჭარაძემ ვეტერანებს სამშობლოს წინაშე გაწეული სამსახურისთვის მადლობა გადაუხადა და აფხაზეთის მთავრობის იმ პროგრამებზე ისაუბრა, რომლებიც აფხაზეთიდან დევნილი ვეტერანებისთვის ხორციელდება.
ღონისძიებას ვეტერანების საქმეთა სახელმწიფო სამსახურის დირექტორი კობა კობალაძე, აფხაზეთის მეომართა კავშირის მეთაურთა საბჭოს თავმჯდომარე ლევან ქეცბაია, აფხაზეთის მთავრობის წევრები, ვეტერანების საქმეთა სახელმწიფო სამსახურის და აფხაზეთის მეომართა კავშირის წარმომადგენლები ესწრებოდნენ.
ვეტერანების დღესთან დაკავშირებით, აფხაზეთიდან დევნილ ვეტერანებს აფხაზეთის მთავრობისგან ერთჯერადი დახმარება ყოველწლიურად გადაეცემათ.
აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე სოხუმის სახელმწიფო უნივერსიტეტის სტუდენტებს შეხვდა. შეხვედრაში აფხაზეთის განათლებისა და კულტურის მინისტრი გიორგი ძაძამია მონაწილეობდა.
შეხვედრაზე მთავრობის თავმჯდომარემ და მინისტრმა ისაუბრეს დევნილი სტუდენტებისთვის არსებულ სტიპენდიებსა და ახალგაზრდების წახალისების სხვა შესაძლებლობებზე. ასევე განიხილეს სტუდენტების მხარდასაჭერად სამომავლოდ დაგეგმილი ახალი პროექტები.
„სტუდენტებთან შეხვედრაზე გაჟღერებულ ინიციატივებსა და იდეებს სამომავლოდ აუცილებლად გავითვალისწინებთ, რათა დავნერგოთ და განვახორციელოთ მათ ინტერესებსა და პროფესიულ განვითარებაზე მორგებული პროგრამები“, - განაცხადა გიორგი ჯინჭარაძემ.
შეხვედრა ღია დისკუსიის ფორმატში წარიმართა. სტუდენტებმა სტუმრებს მათთვის აქტუალურ საკითხებზე კითხვები დაუსვეს და საკუთარი მოსაზრებები გაუზიარეს.
საქართველოს სხვადასხვა უმაღლესი სასწავლებლების სტუდენტებთან შეხვედრები მთელი ქვეყნის მასშტაბით იმართება და მის მიზანს ახალგაზრდებთან კომუნიკაცია, მათი საჭიროებების მოსმენა და საგანმანათლებლო მიმართულებით დაგეგმილი სიახლეების გაცნობა წარმოადგენს.
აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე საქართველოს პრემიერ-მინისტრის მიერ ინიცირებული ანაზღაურებადი სტაჟირების პროგრამით შერჩეულ ახალგაზრდებს შეხვდა.
მთავრობის თავმჯდომარემ ახალგაზრდებს სტაჟირების პროგრამაში ჩართვა მიულოცა და წარმატებები უსურვა.
„ახალგაზრდების მოზიდვა, მათი პროფესიული განვითარება და ჩვენს სტრუქტურაში ჩართულობა ჩვენი უმთავრესი პრიორიტეტია. სწორედ ამ მიზანს ემსახურება საქართველოს პრემიერ-მინისტრის ინიციატივით დაწყებული სტაჟირების პროგრამაც.
დარწმუნებული ვარ, სტაჟიორები თავიანთ შესაძლებლობებს საუკეთესოდ გამოავლენენ. ეს გვაძლევს საფუძველს, რომ ჩვენი თანამშრომლობა ამ სამთვიანი პროგრამით არ დასრულდეს და სამომავლოდაც გავაგრძელოთ ურთიერთობა“, - აღნიშნა გიორგი ჯინჭარაძემ.
3-თვიანი ანაზღაურებადი სტაჟირების პროგრამის ფარგლებში, აფხაზეთის ავტონომიური რესპუბლიკის მთავრობის აპარატსა და სამინისტროებში 14 ახალგაზრდა დასაქმდა, რომლებიც უწყებების საქმიანობის სპეციფიკას გაეცნობიან და პროფესიულ გამოცდილებას მიიღებენ.
საქართველოს ეროვნული ბიბლიოთეკის საგამოფენო დარბაზში ალბომის „აფხაზ-ქართველთა ფოტომატიანე“ პრეზენტაცია გაიმართა. ღონისძიებას აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე დაესწრო.
პრეზენტაციაზე მთავრობის თავმჯდომარემ დამსწრე საზოგადოებას სიტყვით მიმართა, სადაც შერიგების პროცესში მსგავსი კულტურული პროექტებისა და ინიციატივების მნიშვნელობაზე ისაუბრა.
ღონისძიებას საქართველოს პარლამენტის თავმჯდომარის პირველი მოადგილე გიორგი ვოლსკი, აფხაზეთის განათლებისა და კულტურის მინისტრი გიორგი ძაძამია, აფხაზეთის უმაღლესი საბჭოს თავმჯდომარის მოადგილე ვახტანგ ყოლბაია და საქართველოს ეროვნული ბიბლიოთეკის გენერალური დირექტორი კონსტანტინე გამსახურდია ესწრებოდნენ.
ალბომი პედაგოგიკის მეცნიერებათა დოქტორმა დალი ჭედიამ შეადგინა და მასში შესულია ქართული და ქართულ-აფხაზური ოჯახების არქივებიდან შეკრებილი 200-ზე მეტი ფოტო, რომელიც XIX-XX საუკუნეების ქართულ-აფხაზური ურთიერთობების შესახებ მნიშვნელოვან ფოტოდოკუმენტურ კრებულს წარმოადგენს.
უნიკალურ ფოტოებს ახლავს ქართულ და ინგლისურ ენებზე შედგენილი ტექსტები, რომლებიც საინტერესო ბიოგრაფიულ ცნობებსა და ისტორიულ ფაქტებს შეიცავს.
ფოტოალბომი საქართველოს კულტურის სამინისტროს მხარდაჭერით გამოიცა.
