აფხაზეთის ავტონომიური რესპუბლიკის მთავრობა

Аҧснытәи автономтә республика аиҳабыра

რუსლან აბაშიძე საქართველოს იუსტიციის მინისტრს შეხვდა

იუსტიციის მინისტრმა გოჩა ლორთქიფანიძემ აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე მიიღო. შეხვედრას იუსტიციის მინისტრის მოადგილე ბექა ძამაშვილი და აფხაზეთის ავტონომიური რესპუბლიკის მინისტრი იუსტიციისა და სამოქალაქო ინტეგრაციის საკითხებში დავით ფაცაცია ესწრებოდნენ.

შეხვედრაზე გოჩა ლორთქიფანიძემ იმ ისტორიულ გამარჯვებაზე ისაუბრა, რომელიც საქართველომ 2021 წლის 21 იანვარს 2008 წლის ომის საქმეზე სტრასბურგის სასამართლოს მიერ გამოტანილი გადაწყვეტილებით მიაღწია.

გოჩა ლორთქიფანიძემ და ბექა ძამაშვილმა სტუმრებს სტრასბურგის სასამართლოს მიერ გამოტანილი გადაწყვეტილება გააცნეს დეტალურად, რომლითაც რუსეთს დაეკისრა პასუხისმგებლობა აფხაზეთისა და ცხინვალის რეგიონის ოკუპაციის, აგრეთვე ცხინვალის რეგიონში ქართველთა ეთნიკური წმენდის, ქართველი სამხედრო ტყვეების და სამოქალაქო პირების წამებისა და მათი მკვლელობის გამოუძიებლობის გამო.

შეხვედრაზე, ასევე, ისაუბრეს 2008 წლის ომის საქმეზე სტრასბურგის სასამართლოს გადაწყვეტილების აღსრულებისთვის საჭირო იმ ღონისძიებებზე, რომლებიც იუსტიციის სამინისტროს აქვს დაგეგმილი და ამ ისტორიული გადაწყვეტილების მნიშვნელობაზე არაღიარების პოლიტიკისა და ქვეყნის დეოკუპაციის პროცესისათვის.

საუბარი ასევე შეეხო ურთიერთთანამშრომლობის სხვა საკითხებს.

2021 წლის 21 იანვარს აფხაზეთის ავტონომიური რესპუბლიკის მთავრობის სხდომა გაიმართა

დღეს აფხაზეთის ავტონომიური რესპუბლიკის მთავრობის მორიგი სხდომა გაიმართა. სხდომას მთავრობის თავმჯდომარე რუსლან აბაშიძე უძღვებოდა.

აფხაზეთის ავტონომიური რესპუბლიკის ფინანსთა და დარგობრივი ეკონომიკისა და აფხაზეთის ავტონომიური რესპუბლიკიდან იძულებით გადაადგილებულ პირთა-დევნილთა მინისტრებმა მთავრობის წევრებს ოკუპირებულ გალის რაიონში გაჩენილი ხანძრის შედეგად მიყენებული ზარალისა და მასთან დაკავშირებით განსახორციელებელი ღონისძიებების შესახებ ინფორმაცია მიაწოდეს.

სხდომაზე ასევე დღის წესრიგით გათვალისწინებული სხვა საკითხები განიხილეს.

რუსლან აბაშიძემ და ეკა ხოფერიამ საქართველოს განათლების, მეცნიერების, კულტურისა და სპორტის მინისტრთან სამომავლო თანამშრომლობის გეგმები განიხილეს

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე და განათლებისა და კულტურის მინისტრი ეკა ხოფერია საქართველოს განათლების, მეცნიერების, კულტურისა და სპორტის მინისტრ მიხეილ ჩხენკელს შეხვდნენ.

მიხეილ ჩხენკელმა აფხაზეთის ავტონომიური რესპუბლიკის განათლებისა და კულტურის მინისტრ ეკა ხოფერიას თანამდებობაზე დანიშვნა მიულოცა და წარმატებები უსურვა საქმიანობაში.

სამუშაო შეხვედრა საქართველოს განათლების, მეცნიერების, კულტურისა და სპორტის სამინისტროში გაიმართა და მონაწილეებმა მიმდინარე და სამომავლო ერთობლივი პროექტები განიხილეს.

შეხვედრაზე განსაკუთრებული ყურადღება დაეთმო საქართველოს კონტროლირებად ტერიტორიაზე არსებული აფხაზეთის საჯარო სკოლების მასწავლებლების პროფესიული მხარდაჭერის და „ტელესკოლის“ პროგრამების გამდიდრების საკითხებს.

მიხეილ ჩხენკელმა ქუთაისის საერთაშორისო უნივერსიტეტის მნიშვნელობაზე ისაუბრა, სადაც ოკუპირებულ ტერიტორიაზე მცხოვრები ახალგაზრდებიც  შეძლებენ მიიღონ საერთაშორისო სტანდარტების, უმაღლესი დონის განათლება.

შეხვედრაზე ასევე, დევნილი და ოკუპირებულ ტერიტორიებზე მცხოვრები მოსახლეობისთვის პროფესიული განათლების ხელმისაწვდომობის გაზრდის გზებზე იმსჯელეს. ამ მიმართულებით წალენჯიხის მუნიციპალიტეტის სოფელ ფოცხოეწერში დაიწყო პროფესიული სწავლებისათვის საჭირო ინფრასტრუქტურის განვითარება, რომელიც სწორედ ამ მიზანს მოემსახურება.

რუსლან აბაშიძე სტრასბურგის ადამიანის უფლებათა დაცვის ევროპული სასამართლოს გადაწყვეტილებას გამოეხმაურა
აფხაზეთის ავტონომიური რესპუბლიკის მთავრობა მიესალმება სტრასბურგის ადამიანის უფლებათა დაცვის ევროპული სასამართლოს გადაწყვეტილებას.
 
დღეს საქართველომ მნიშვნელოვანი სამართლებრივი გამარჯვება მოიპოვა!
 
სტრასბურგის ადამიანის უფლებათა დაცვის ევროპული სასამართლოს გადაწყვეტილებამ დაადასტურა, რომ 2008 წელს საქართველო იყო რუსული აგრესიის მსხვერპლი. 2008 წლის რუსეთ-საქართველოს ომის დროს უხეშად დაარღვია ევროპული კონვენციის არაერთი მუხლი.
 
სტრასბურგის ადამიანის უფლებათა დაცვის ევროპული სასამართლოს აღნიშნულ გადაწყვეტილებას ისტორიული მნიშვნელობა აქვს ჩვენთვის. ის წარმოადგენს რუსეთ-საქართველოს 2008 წლის ომის პირველ სამართლებრივ შეფასებას, რომელიც ადასტურებს რუსეთის მიერ საქართველოს ოკუპაციას.
 
ევროპული სასამართლოს გადაწყვეტილება თავისი მნიშვნელობით წინგადადგმული ნაბიჯია საერთაშორისო სამართლებრივი მექანიზმების გამოყენებით დევნილი საზოგადოების ლეგიტიმური უფლებების დაცვის და კონფლიქტების მოწესრიგებისა და ტერიტორიული მთლიანობის აღდგენის თვალსაზრისით.
 
მადლობას ვუხდი ყველა იმ უწყებას და საჯარო მოხელეს, რომლებიც ჩართულნი იყვნენ აღნიშნული სასამართლო საქმის წარმოებაში და წარმატებით შეძლეს ჩვენი ქვეყნის ინტერესების დაცვა!
რუსლან აბაშიძე და ეკა ხოფერია აფხაზეთის საჯარო სკოლების დირექტორებს შეხვდნენ

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე და განათლებისა და კულტურის მინისტრი ეკა ხოფერია აფხაზეთის საჯარო სკოლების დირექტორებს შეხვდნენ. შეხვედრაში საქართველოს კონტროლირებად ტერიტორიაზე განთავსებული საჯარო სკოლების დირექტორები მონაწილეობდნენ.

შეხვედრაზე COVID-19-ის პანდემიის პირობებში სწავლების დისტანციურ რეჟიმზე გადასვლის შედეგად სკოლებში არსებულ მდგომარეობაზე ისაუბრეს. დირექტორებმა მოსწავლეების კომპიუტერთან და ინტერნეტთან წვდომის შესაძლებლობის შესახებ კონკრეტული ინფორმაცია წარმოადგინეს.

აღნიშნული ინფორმაციის გათვალისწინებით, აფხაზეთის ავტონომიური რესპუბლიკის მთავრობა მოსწავლეებს, შესაძლებლობის ფარგლებში, კომპიუტერის შეძენასა და ინტერნეტთან წვდომის უზრუნველყოფაში დაეხმარება, რათა მათ ონლაინსაკომუნიკაციო პლატფორმების - Microsoft Teams-ის, Skype-ისა თუ Zoom-ის სრულყოფილად გამოყენება შეძლონ.

რუსლან აბაშიძემ საშობაო ნობათი თბილისის ილორის წმინდა გიორგის სახელობის ეკლესიას გადასცა

შობის დღესასწაულთან დაკავშირებით აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე თბილისში მდებარე ილორის წმინდა გიორგის სახელობის ეკლესიაში იმყოფებოდა.

ეპიდემიოლოგიური ვითარებიდან გამომდინარე, აფხაზეთის მთავრობამ წელს "ალილოს" საშობაო ნობათი ეკლესიას გადასცა.

ტაძარში ასევე იმყოფებოდნენ აფხაზეთის მთავრობის თავმჯდომარის მოადგილე ანზორ მარგიანი, ფინანსთა და დარგობრივი ეკონომიკის მინისტრი ივანე დოლიძე და აფხაზეთის სულიერების ცენტრის დირექტორი ბესიკ სილაგაძე.

სადღესასწაულო შემოწირულობას ტაძრის წინამძღვარი მამა ლევან ჯანაშია მოგვიანებით ბენეფიციარებს გადასცემს.

აფხაზეთის ავტონომიური რესპუბლიკის მთავრობის თავმჯდომარის რუსლან აბაშიძის საახალწლო მილოცვა

აფხაზეთის ავტონომიური რესპუბლიკის მთავრობის სახელით გილოცავთ დამდეგ 2021 წელს!

ახალ წელს იმედით და სასიკეთო ცვლილებების მოლოდინით ველით. ვისურვებდი, რომ ეს მოლოდინები გაგვიმართლდეს.

განსაკუთრებულად ვულოცავ ჯანდაცვის სფეროს მუშაკებს, რომლებმაც პროფესიული თავგანწირვის და ადამიანური შესაძლებლობის რესურსების ზღვარზე გაიარეს. 

ვულოცავ საოკუპაციო ხაზის ორივე მხარეს მცხოვრებ  იძულებით დაშორიშორებულ  საზოგადოებას, რომლებიც ყოველდღიურად განიცდიან ოკუპაციის ნეგატიურ შედეგებს.  

ჩვენი ვალია,  ერთად  ვიზრუნოთ ქვეყნის მომავალზე ისე, როგორც ზრუნავდნენ ჩვენი წინაპრები, ერთად  დავძლიოთ არსებული გამოწვევები და წინ აღვუდგეთ საყოველთაო გათიშულობის მცდელობას.

ვისურვებდი, რომ  2021 წელი ყოფილიყოს, უპირველეს ყოვლისა, ჯანმრთელობის, ერთობის, ურთიერთგაგების და თანადგომის წელი.  

კიდევ ერთხელ ვულოცავ სრულიად საქართველოს და აფხაზეთის საზოგადოებას დამდეგ ახალ წელს. მშვიდობის, სტაბილურობის და წარმატების წელი ყოფილიყოს ჩვენი ქვეყნის და თითოეული ჩვენგანის ოჯახისთვის!

 

რუსლან აბაშიძე

აფხაზეთის ავტონომიური რესპუბლიკის მთავრობის თავმჯდომარე

2020 წლის 30 დეკემბერს აფხაზეთის ავტონომიური რესპუბლიკის მთავრობის სხდომა გაიმართა

დღეს აფხაზეთის ავტონომიური რესპუბლიკის მთავრობის მორიგი სხდომა გაიმართა. სხდომას მთავრობის თავმჯდომარე რუსლან აბაშიძე უძღვებოდა.

სხდომაზე დღის წესრიგით გათვალისწინებული საკითხები განიხილეს.

რუსლან აბაშიძემ ახლადდანიშნული მინისტრები თანამშრომლებს წარუდგინა

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ განათლებისა და კულტურის და აფხაზეთიდან იძულებით გადაადგილებულ პირთა-დევნილთა ახალი მინისტრები თანამშრომლებს წარუდგინა.

აფხაზეთის ავტონომიური რესპუბლიკის მთავრობაში განხორციელებული ცვლილებების შედეგად აფხაზეთის ავტონომიური რესპუბლიკის განათლებისა და კულტურის მინისტრად ეკა ხოფერია, ხოლო აფხაზეთიდან იძულებით გადაადგილებულ პირთა-დევნილთა მინისტრად ლევან თევზაია დაინიშნენ.

კოპიტნარში მცხოვრებ აფხაზეთიდან დევნილებს COVID-19-ის ტესტირება და სეზონური გრიპის ვაქცინაცია ჩაუტარდათ

კორონავირუსის შემთხვევათა დროული გამოვლენის და ვირუსის გავრცელების შეკავების მიზნით, კოპიტნარის დევნილთა კომპაქტურ ჩასახლებაში აფხაზეთიდან იძულებით გადაადგილებულ პირებს COVID-19-ზე სწრაფი ტესტირება და სეზონური გრიპის უფასო იმუნიზაცია/ვაქცინაცია ჩაუტარდათ.

COVID-19-ის საპრევენციო მიზნობრივი პროგრამის ფარგლებში წყალტუბოს მუნიციპალიტეტში, კოპიტნარის დევნილთა ჩასახლებაში აფხაზეთის ავტონომიური რესპუბლიკის მთავრობის თავმჯდომარის მოადგილე ანზორ მარგიანი, აფხაზეთიდან იძულებით გადაადგილებულ პირთა-დევნილთა სამინისტროს იმერეთის ტერიტორიული ორგანოს ხელმძღვანელი ბესიკ ჭანტურია და აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტროს თანამშრომლები იმყოფებოდნენ.

აფხაზეთიდან დევნილებს ნებაყოფლობითი,  ანტიგენზე დაფუძნებული სწრაფი ტესტირება და სეზონური გრიპის ვაქცინაცია ქუთაისის დევნილთა საოჯახო ცენტრ „ბიჭვინთა“-ს ექიმებმა გაუკეთეს. მედიკოსებმა დევნილ მოსახლეობას COVID-19-ის მართვის შესახებ რეკომენდაციები გააცნეს და პროგრამის ფარგლებში დევნილ მოსახლეობას საჭირო მედიკამენტები,  პირბადეები და ინდივიდუალური დაცვის სხვა საშუალებები გადასცეს.

ღონისძიების ფარგლებში მთავრობის თავმჯდომარის მოადგილემ აფხაზეთიდან დევნილ ბავშვებს დამდეგი შობა-ახალი წელი მიულოცა და სადღესასწაულო საჩუქრები და ტკბილეული გადასცა.

სამედიცინო აქცია აფხაზეთის ავტონომიური რესპუბლიკის მთავრობის მხარდაჭერით და აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტროს ორგანიზებით გაიმართა.

ანზორ მარგიანმა ბათუმში მცხოვრებ აფხაზეთიდან დევნილ ბავშვებს დამდეგი შობა-ახალი წელი მიულოცა

აფხაზეთის ავტონომიური რესპუბლიკის მთავრობის მხარდაჭერით ბათუმის კომპაქტურ ჩასახლებებში მცხოვრებ აფხაზეთიდან დევნილ ბავშვებს შობა-ახალი წლის დღესასწაულთან დაკავშირებით საჩუქრები გადაეცათ.

ბათუმში იმყოფებოდა აფხაზეთის ავტონომიური რესპუბლიკის მთავრობის თავმჯდომარის მოადგილე ანზორ მარგიანი, რომელმაც დევნილ ბავშვებს დამდეგი-შობა-ახალი წელი მიულოცა და სადღესასწაულო საჩუქრები და ტკბილეული გადასცა.

კომპაქტურ ჩასახლებებში ასევე იმყოფებოდა აფხაზეთიდან იძულებით გადაადგილებულ პირთა-დევნილთა სამინისტროს იმერეთის ტერიტორიული ორგანოს დევნილებთან ურთიერთობის და სოციალურ საკითხთა რეგიონული მართვის განყოფილების უფროსი ნანა ჭანტურია.

აქცია შობა-ახალი წლის დღესასწაულთან დაკავშირებით აფხაზეთის ავტონომიური რესპუბლიკის მთავრობის მხარდაჭერით და აფხაზეთიდან იძულებით გადაადგილებულ პირთა-დევნილთა სამინისტროს ტერიტორიული ორგანოების ჩართულობით 3-დან 8 წლამდე ასაკის სოციალურად დაუცველ ოჯახში მცხოვრები (სოციალური სარეიტინგო ქულა 30000-ზე ნაკლები) აფხაზეთიდან დევნილი ბავშვებისთვის მთელი ქვეყნის მასშტაბით გაგრძელდება.

რუსლან აბაშიძემ ფოცხოეწერსა და წყალტუბოში მცხოვრებ აფხაზეთიდან დევნილ ბავშვებს შობა-ახალი წელი მიულოცა

წალენჯიხის მუნიციპალიტეტის სოფელ ფოცხოეწერსა და ქალაქ წყალტუბოში აფხაზეთის ავტონომიური რესპუბლიკის მთავრობის მხარდაჭერით და აფხაზეთის სპორტის, კულტურის და ახალგაზრდულ საქმეთა სააგენტოს ორგანიზებით  შობა-ახალი წლის დღესასწაულთან დაკავშირებით აფხაზეთიდან დევნილ ბავშვებს საჩუქრები დაურიგდათ.

ფოცხოეწერსა და წყალტუბოში იმყოფებოდა აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე, რომელმაც დევნილ ბავშვებს პირადად მიულოცა დამდეგი-შობა-ახალი წელი და საჩუქრები და ტკბილეული გადასცა.

ღონისძიებაში ასევე მონაწილეობდნენ წყალტუბოს მუნიციპალიტეტის ვიცე-მერი ალექსანდრე ბაბუნაშვილი, აფხაზეთიდან იძულებით გადაადგილებულ პირთა-დევნილთა სამინისტროს იმერეთის ტერიტორიული ორგანოს ხელმძღვანელი ბესიკ ჭანტურია და სამეგრელო-ზემო სვანეთის ტერიტორიული ორგანოს ხელმძღვანელი კოტე ბასარია.

აქცია შობა-ახალი წლის დღესასწაულთან დაკავშირებით აფხაზეთის ავტონომიური რესპუბლიკის მთავრობის მხარდაჭერით და აფხაზეთიდან იძულებით გადაადგილებულ პირთა-დევნილთა სამინისტროს ტერიტორიული ორგანოების ჩართულობით 3-დან 8 წლამდე ასაკის სოციალურად დაუცველ ოჯახში მცხოვრები (სოციალური სარეიტინგო ქულა 30000-ზე ნაკლები) აფხაზეთიდან დევნილი ბავშვებისთვის მთელი ქვეყნის მასშტაბით გაგრძელდება.

აფხაზეთის ავტონომიური რესპუბლიკის მთავრობის თავმჯდომარის მილოცვა სრულიად საქართველოს კათოლიკოს-პატრიარქის აღსაყდრებასთან დაკავშირებით
„აფხაზეთის ავტონომიური რესპუბლიკის მთავრობის სახელით ვულოცავ მის უწმინდესობას და უნეტარესობას სრულიად საქართველოს კათოლიკოს-პატრიარქს, მთავარეპისკოპოსს მცხეთა-თბილისისა და მიტროპოლიტს ბიჭვინთისა და ცხუმ აფხაზეთისა აღსაყდრების 43-ე წელიწადს.
 
ჩვენი პატრიარქის სიბრძნით, მოთმინებით და მიზანმიმართულობით საქართველოს ეკლესიამ შეძლო არა მარტო გაეძლო ნებისმიერი გამოწვევისთვის, არამედ ყოფილიყო ნუგეშინისმცემელი დედა ეკლესიის მილიონობით წევრისათვის და საყოველთაო გაუცხოების პერიოდში უშიშრად ექადაგა სიყვარულისა და ტოლერანტული ფასეულობების შესახებ.
 
სწორედ ამიტომ არის, რომ საქართველოს ეკლესიის საჭეთმპყრობელი აღტაცების და მიბაძვის მაგალითია არა მარტო საქართველოში, არამედ მთელ მსოფლიოში.
 
მისი უწმინდესობის ტიტულატურაში საქართველოს ტერიტორიული მთლიანობის სიმბოლიზმია და მჯერა, რომ მისი ლოცვა დიდი შეწევნა იქნება საქართველოს გამთლიანების და დემოკრატიულ სახელმწიფოდ ჩამოყალიბების საქმეში.
 
თქვენო უწმინდესობავ, მრავალჟამიერ თქვენს მეუფებას!!!,“ - განაცხადა რუსლან აბაშიძემ.
თბილისში აფხაზეთის მთავრობამ აფხაზეთიდან დევნილ შშმ ბავშვებს საახალწლო საჩუქრები გადასცა

აფხაზეთის ავტონომიური რესპუბლიკის მთავრობის მხარდაჭერით და აფხაზეთის სპორტის, კულტურის და ახალგაზრდულ საქმეთა სააგენტოს ორგანიზებით დღეს თბილისში აფხაზეთიდან დევნილ შეზღუდული შესაძლებლობის მქონე ბავშვებს საახალწლო საჩუქრები გადაეცათ.

COVID-19-ის პანდემიის შედეგად დაწესებული შეზღუდვების გამო, აფხაზეთის სპორტის, კულტურის და ახალგაზრდულ საქმეთა სააგენტოს დირექტორი ლიკა კვარაცხელია დევნილთა კომპაქტურ ჩასახლებებში ადგილზე მივიდა, შშმ მოზარდებს დამდეგი შობა-ახალი წელი მიულოცა და თოვლის ბაბუასთან ერთად სადღესასწაულო საჩუქრები და ტკბილეული გადასცა.

რუსლან აბაშიძემ აფხაზეთიდან დევნილი წარმატებული სპორტსმენები და სპორტის მუშაკები დააჯილდოვა

ვალერი არქანიას სახელობის არტ-გალერეაში აფხაზეთიდან დევნილი ვეტერანი სპორტსმენების, სპორტის მუშაკების და წარმატებული სპორტსმენების დაჯილდოება გაიმართა.

სპორტსმენებს საპატიო სიგელები და სიმბოლური საჩუქრები აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ, განათლებისა და კულტურის მინისტრმა როლანდ ნიჟარაძემ, მინისტრის მოადგილეებმა მარინა შენგელიამ და ირმა კეკელიძემ, განათლებისა და კულტურის სამინისტროს სპორტისა და ახალგაზრდულ საქმეთა სამსახურის უფროსმა ვიტალი ბენდელიანმა გადასცეს.

სპეციალური კომისიის მიერ მიმდინარე წლის საუკეთესო სპორტსმენებად მურთაზ ვეკუა, ნუგზარ ბოჯგუა, გერასიმე ესებუა, დავით ზარქუა, ზურაბ შენგელია, დავით თაქთაქიშვილი, ბენო ადამია, ლუკა კაჭარავა, მარიამ შხვაცაბაია და სოხუმის „დინამოს“ ქალთა გუნდი დასახელდნენ.

ღონისძიების ფარგლებში სპორტისა და ახალგაზრდულ საქმეთა სამსახურის უფროსმა 2020 წლის საქმიანობის ანგარიში წარადგინა. ღონისძიებას ცნობილი სპორტსმენები და აფხაზეთის საზოგადოების წარმომადგენლები ესწრებოდნენ.

წახალისების მიზნით, წარმატებული სპორტსმენების დაჯილდოება აფხაზეთის ავტონომიური რესპუბლიკის განათლებისა და კულტურის სამინისტროს პროგრამის ფარგლებში ყოველწლიურად იმართება. ნომინანტების შერჩევა სპორტული ორგანიზაციების და ფედერაციების მიერ წარდგენილი კანდიდატების საფუძველზე, საგანგებოდ შექმნილი კომისიის მიერ ხორციელდება.