დღეს, აფხაზეთის მთავრობის თვმჯდომარე ვახტანგ ყოლბაია, აფხაზეთის სოფლის მეურნეობის, გარემოს დაცვისა და ბუნებრივი რესურსების დეპარტამენტის თავმჯდომარე ვალერი ბასარია და იმერეთის გუბერნატორი გივი ჭიჭინაძე სსიპ „ბიზნესინკუბატორს" ესტუმრნენ. „ბიზნესინკუბატორში" ამჟამად ფუნქციონირებს მონღოლური მწვანე ჩაის ქარხანა და სხვადასხვა ნაკეთობების საწარმო. აღნიშნული საწარმო მერხებსა და ნაგვის ურნებს აწარმოებს. გარდა ამისა, „ბიზნესინკუბატორში" მიმდინარეობს სასათბურე კონსტრუქციების დამონტაჟება, პროექტის ფარგლებში ასევე გათვალისწინებულია სასათბურე მეურნეობაში მოყვანილი პროდუქციისათვის საგამოფენო-სარეალიზაციო პავილიონის მშენებლობა, დაგეგმილია კადრების მომზადების და გადამზადების სასწავლო ცენტრის ამოქმედებაც.

ვახტანგ ყოლბაია და გივი ჭიჭინაძე გაეცნენ სასათბურე კონსტრუქციის მშენებლობას, სადაც მოიყვანენ მარწყვს, ყვავილებს, ადგილზე იქმნება სამშენებლო მასალების შემნახველი საწყობი, ასევე სასწავლო სადემონსტრაციო ცენტრი და მაღაზია, სადაც ჩაის დაგემოვნება და შეძენა იქნება შესაძლებელი. შენობაში ასევე შეიქმნა აფხაზეთიდან დევნილთათვის რეფერალური ავადმყოფების მისაღები. იმერეთის გუბერნატორმა აფხაზეთის მთავრობასა და ბიზნესინკუბატორს ხელშეწყობა აღუთქვა.

„აფხაზეთის მთავრობის თავმჯდომრესთან ერთად დღეს გავეცანი ბიზნესინკუბატორს. მართლაც ძალიან საინტერესო ბიზნეს-გეგმებია დასახული.ტერიტორია ძალიან დიდია და ძალიან კარგი პროექტები ხორციელდება. პროცესში ჩართულნი არიან არა მხოლოდ დევნილები, არამედ ეკომიგრანტები და ერთობლივად ხდება ისეთი პროექტების განხორციელება, რომელიც საქართველოში ალბათ არსად არ არის. ვფიქრობ, უნდა ჩავრთოთ სხვადასხვა ორგანიზაციები და ერთად გამოვიყენოთ ის გამოცდილება, რომელიც ბიზნესინკუბატორს უკვე აქვს". - განაცხადა იმერეთის გუბერნატორმა გივი ჭიჭინაძემ.

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებლის, ვახტანგ ყოლბაიას განცხადებით, იმერეთის გუბერნატორმა, გივი ჭიჭინაძემ აფხაზეთის მთავრობამ რეგიონში მიმდინარე და სამომავლოდ დასახული პროექტების განხორციელებაში სრული მხარდაჭერა აღუთქვა. მისივე თქმით, „ბიზნესინკუბატორი" ერთ-ერთი ყველაზე წარმატებული და წამყვანი საწარმოა დევნილთა დასაქმების კუთხით.

„იმერეთში ჩვენ გვყავს საკმაოდ მოტივირებული, წარმატებული არასამთავრობო და სამთავრობო ორგანიზაციები, მათ შორის ერთ-ერთი სსიპ „ბიზნესინკუბატორია", რომელსაც ალუ გამახარია ხელმძღვანელობს და რომელზეც ძალიან დიდ იმედებს ვამყარებთ. შენობა აფხაზეთის მთავრობამ სარგებლობის უფლებით  ერთი წლის წინ გადავეცით "ბიზნესინკუბტორს". როგორც ხედავთ სამუშაოები სრული სვლით მიმდინარეობს. აქვე ისიც მინდა აღვნიშნო, რომ ამ პროექტების განხორციელებისთვის მხოლოდ ჩვენი მხარდაჭერა არ არის საკმარისი. ამ მიზნით, გუშინ გვქონდა შეხვედრა იმერეთის გუბერნატორთან, ბატონ გივი ჭიჭინაძესთან, რომელმაც სურვილი გამოთქვა ჩვენთან ერთად მოენახულებინა სამუშაოები, რომელიც ახლა მიმდინარეობს. ჩემთვის სასიამოვნო იყო, რომ გუბერნატორი ნანახით გაკვირვებულიც კი დარჩა. იმ საკითხებში, სადაც გვჭირდება მხარში ამოდგომა, მან სრული მხარდაჭერა აღგვითქვა. საერთოდ უნდა ითქვას, რომ ჩვენ სერიოზული მხარდაჭერა გვაქვს  ადგილობრივი ხელისუფლების მხრიდან, რაც ძალიან მნიშვნელოვანი ფაქტია. არანაკლებ მნიშვნელოვანია, რომ გადაწყდება დევნილთა ადგილზე დასაქმების  საკითხები. რაღა თქმა უნდა, ამ საქმეში ერთ-ერთი წამყვანია საწარმო,საჯარო სამართლის იურიდიული პირი „ბიზნესინკუბატორი". მიხარია, რომ ბატონ ალუს ირგვლივ შემოკრებილი ჰყავს პროფესიონალები, მცოდნე და გამოცდილი ადამიანები, რომლებთან ერთადაც, საერთო ძალიხმევით, ადგილობრივი ხელისუფლების მხარდაჭერით, ერთობლივად განვახორციელებთ იმ პროექტებს, რომელიც სასიცოცხლოდ აუცილებელია ჩვენი დევნილი მოსახლეობისთვის." - განაცხადა ვახტანგ ყოლბაიამ.

6 აგვისტოს, ფოთის ცენტრალური ბიბლიოთეკის სააქტო დარბაზში, ფოთის განსახლებულ დევნილთა საზოგადოებრივი საბჭოს სხდომა გაიმართა. შეხვედრას ესწრებოდნენ აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, აფხაზეთის ავტონომიური რესპუბლიკის უმაღლესი საბჭოს თავმჯდომარე გია გვაზავა, აფხაზეთის ავტონომიური რესპუბლიკის განათლებისა და კულტურის მინისტრი დიმიტრი ჯაიანი, აფხაზეთის ჯანმრთელობისა და სოციალური დაცვის მინისტრი ქეთევან ბაკარაძე, აფხაზეთის ავტონომიური რესპუბლიკის სოფლის მეურნეობის, გარემოს დაცვისა და ბუნებრივი რესურსების დაცვისდეპარტამენტის თავმჯდომარე ვალერი ბასარია, ნდობის აღდგენისა და შერიგების საკითხებში აფხაზეთის ავტონომიური რესპუბლიკის მინისტრი დავით გვაძაბია, საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა დალტოლვითა სამინისტროს, ქალაქ ფოთის მერიისა და საკრებულოს ხელმძღვანელ მუშაკთა, გაეროს , საქართველოს სახალხო დამცველის აპარატის და სხვა საერთაშორისო და საზოგადოებრივი ორგანიზაციების წარმომადგენლები.

სხდომაზე განიხილეს კავშირის თავმჯდომარის ანგარიში და სამომავლო გეგმები, ქ. ფოთში განსახლებულ იძულებით გადაადგილებულ პირთა სოციალური საკითხების დარეგულირება, მათ შორის საცხოვრებელი ფართით დევნილთა უზრუნველყოფის პროცესების მიმდინარეობასთან დაკავშირებით ხელისუფლებისადმი მიმართვის ტექსტი და ორგანიზაციული საკითხები.

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ სხდომის მონაწილე საზოგადოებას აფხაზეთის ჯანდაცვისა და სოციალური დაცვის, აფხაზეთის სოფლის მეურნეობის, აფხაზეთის კულტურისა და განათლების სამინისტროების, აფხაზეთის მთავრობის სხვა და სხვა სტრუქტურების მიერ განხორციელებული წარმატებული პროექტები გააცნო. ყოლბაიამ მზადყოფნა გამოთქვა, დევნილთა პრობლემების მოსაგვარებლად, საბჭოს  უშუამდგომლოს სახელმწიფოს შესაბამის სტრუქტურებთან.

„ფოთში უკვე ერთი წელია ფუნქციონირებს დევნილთა საზოგადოებრივი საბჭო, რომელიც დევნილთა პრობლემებს განაზოგადებს და საკუთარ ხედვას წარმოგვიდგენს. მნიშვნელოვანია მათი დასკვნები სოციალურ პრობლემათა მოწესრიგების კუთხით, ასევე დევნილთა ბინებით უზრუნველყოფის მხრივაც. ჩვენ მზად ვართ ვუშუამდგომლოთ საზოგადოებრივ საბჭოს სახელმწიფოს შესაბამის სტრუქტურებთან დევნილთა პრობლემების დროულად გადაწყვეტის მიზნით. დღევანდელმა დღემ ბევრი რამ დაგვანახა. უწინარესად ის, რომ საზოგადოებრივი საბჭოს მუშაობა ძალიან პროდუქტიული და არსებითია. მათ მიერ მოწოდებული მასალები საყურადღებო ინფორმაციას ეყრდნობა.

დღევანდელ შეხვედრას ესწრებოდნენ ასევე საერთაშორისო ორგანიზაციების წარმომადგენლები, რომლებიც თანამშრომლობენ საზოგადოებრივ საბჭოსათან და ძალიან ბევრ საინტერესო პროექტს და იდეას უყრიან საფუძველს. მაგალითად, ძალიან მნიშვნელოვანია პროექტი მცირე ბიზნესის განვითარებისა და სამუშაო ადგილების შექმნის თვალსაზრისით. ჩვენ მხარს დავუჭერთ მათ და  ერთობლივად ვიმუშავებთ ამ პროექტებზე. თუ ბინის თემას დავუბრუნდებით ფოთელთა პრეტენზიები ძირითადად ბინების განაწილების  კრიტერიუმებს უკავშირდება. ამ საკითხებში ჯერ კიდევ არსებობს პრობლემები, რომელთა გამოსწორებაც შეიძლება. საზოგადოებრივ საბჭოს დავპირდით, რომ  ამ თემებზე ხელისუფლებასთან მუშაობას გავაგრძელებთ.“ – განაცხადა ვახტანგ ყოლბაიამ.

კონფერენციის მონაწილე რამდენიმე დევნილს აფხაზეთის ავტონომიური რესპუბლიკის უმაღლესი საბჭოს საპატიო სიგელები გადაეცათ.

დღეს, საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა სოზარ სუბარმა, ხონში მცხოვრებ დევნილ ოჯახებს საცხოვრებელი ფართის საკუთრების დამადასტურებელი მოწმობები გადასცა. 

დევნილებთან შეხვედრას ასევე ესწრებოდნენ იმერეთის გუბერნატორი გივი ჭიჭინაძე, ენერგეტიკის მინისტრის მოადგილე ილია ელოშვილი, აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია და აფხაზეთის ავტონომიური რესპუბლიკის ხელისუფლების წარმომადგენლები.

ხონში, ყოფილ სამხედრო დასახლებაში მცხოვრებ 200 დევნილ ოჯახს საცხოვრებელი ფართი, სიმბოლურ ფასად - 1 ლარად, უკვე დაუკანონდა. იძულებით გადაადგილებულ პირთა, დევნილთა მართლზომიერ მფლობელობაში არსებული საცხოვრებელი ფართების საკუთრებაში გადაცემის პროექტის ფარგლებში, დაკანონების პროცესი გრძელდება. 2015 წლის სექტემბრამდე, საცხოვრებელი ფართი ხონის სამხედრო დასახლებაში მცხოვრებ ყველა დევნილ ოჯახს დაუკანონდება.

დაკანონების პროცესის პარალელურად, 2015 წლის თებერვალში ენერგეტიკის სამინისტრომ ხონის სამხედრო დასახლების სრული გაზიფიცირება მოახდინა.

დღესვე, აშშ-ს საერთაშორისო განვითარების სააგენტოს (USAID) მისიის დირექტორმა, სტივენ ჰეიკინმა კონფლიქტების შედეგად დაზარალებული ოჯახების საცხოვრებელი პირობების გაუმჯობესების მიზნით, დევნილ ოჯახებს გაზის გამათბობლები გადასცა.

USAID-ის დაფინანსებით გაზის გამათბობლები 450 ოჯახში დამონტაჟდება, გარდა ამისა, დასახლებაში მოეწყობა ახალი სათამაშო მოედანი ბავშვებისათვის და სპორტული მოედანი.

ყოვლადწმინდა ღვთისმშობლის ხატი - „ყოველთა მწუხარეთა სიხარული" ქარელის ყოვლადწმინდა სამების სახელობის საკათედრო ტაძრიდან წამოაბრძანეს და ბორჯომისა და ბაკურიანის ეპარქიაში, ბორჯომის წმინდა მღვდელმთავარ ნიკოლოზის სახელობის საკათედრო ტაძარში დაბრძანდა.

თურქეთის საერთაშორისო თანამშრომლობისა და კოორდინაციის სააგენტო „TIKA"-ს თბილისის საკოორდინაციო ოფისმა აფხაზეთის ავტონომიური რესპუბლიკის მთავრობასთან კოორდინაციით ვაზიანში არსებული ერთ-ერთი მიტოვებული, ნაწილობრივ დანგრეული ფართის კაპიტალური რემონტი და ფეხსაცმლისა და სამკერვალო მინი-ფაბრიკის ფუნქციონირებისათვის საჭირო თანამედროვე დანადგარებითა და ინვენტარით აღჭურვა განახორციელა.

„TIKA"-ს თბილისის საკოორდინაციო ოფისმა პროექტის ფარგლებში მინი-ფაბრიკას გადასცა ტანსაცმლისა და ფეხსაცმლის საკერავი მანქანები, ფრიზერის, პრესისა და საშრობი აპარატები, ქსოვილები და ნაჭრების კომპლექტები. საწარმოში ამჟამად 10 იძულებით გადაადგილებული პირი დასაქმდა.

სამკერვალო მინი-ფაბრიკა დღეს გარდაბანის რაიონ სოფელ ვაზიანში გახსნეს აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაიამ, საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი სოზარ სუბარმა, აფხაზეთის უმაღლესი საბჭოს თავმჯდომარემ გია გვაზავამ, გარდაბნის მუნიციპალიტეტის გამგებელი გარსევან ნიორაძე, თურქეთის რესპუბლიკის ელჩმა საქართველოში ზექი ლევენთ გიუმრუქჩუმ, თურქეთის თანამშრომლობისა და კოორდინაციის სააგენტო „TIKA-ს" თავმჯდომარემ სერდარ ჩამ, თურქეთის პარლამენტის (მეჯლისი) დეპუტატმა ლუთფიე სელვა ჩამ, თურქეთის თანამშრომლობისა და კოორდინაციის სააგენტო „TIKA-ს" თბილისის ოფისის კოორდინატორმა მუსტაფა კორკმაზმა გახსნეს.

გახსნის ცერემონიას ქვემო ქართლში სახელმწიფო რწმუნებულ-გუბერნატორის მოადგილე ნუგზარ სალია, აფხაზეთის უმაღლესი საბჭოს დეპუტატები, აფხაზეთის მთავრობის წევრები და დევნილი საზოგადოება დაესწრო.

აფხაზეთის მთავრობა და თურქეთის საერთაშორისო თანამშრომლობისა და კოორდინაციის სააგენტო „TIKA" სამომავლო ურთერთანამშრომლობაზე შეთანხმდნენ. თურქეთის თანამშრომლობისა და კოორდინაციის სააგენტო „TIKA-ს" თავმჯდომარის, მისი აღმატებულება სერდარ ჩამის განცხადებით, მინი-ფაბრიკის ფინანსური დახმარების მიზნით, „TIKA" შეისყიდის აღნიშნული სამკერვალოს მიერ 1 თვის მანძილზე წარმოებულ 300-350 წყვილ ფეხსაცმელს და მას გადასცემს დევნილებს საჩუქრად.

თქვენო უწმინდესობავ და უნეტარესობავ, გილოცავთ თქვენი ანგელოზის დღეს. გისურვებთ ჯანმრთელობას, დღეგრძელობას და სულიერ მხნეობას ჩვენი ქვეყნისა და მთელი მართლმადიდებლური სამყაროს საკეთილდღეოდ.

გვწამს, რომ დიდი წინასწარმეტყველი წმიდა ილია თეზბიტელის, წმიდა ილია მართლის მადლით შეიწყნარებს უფალი თქვენს მოუკლებლივ ლოცვებს აფხაზეთის დედასამშობლოს წიაღში დაბრუნებისა და საქართველოს გამთლიანებისათვის.

პატივისცემით, ვახტანგ ყოლბაია

აფხაზეთის ავტონომიური რესპუბლიკის მთავრობის
თავმჯდომარის მოვალეობის შემსრულებელი

დღეს, „რუმს თბილისში" ჟენევის საერთაშორისო დისკუსიების მონაწილეებისა და არასამთავრობო ორგანიზაციების საინფორმაციო შეხვედრა გაიმართა, რომელშიც შერიგებისა და სამოქალაქო თანასწორობის საკითხებში სახელმწიფო მინისტრის პირველი მოადგილე ქეთევან ციხელაშვილი, აფხაზეთის მთავრობის თავმჯდომარის მოვალეობის შემსრულებელი ვახტანგ ყოლბაია, ქალთა საინფორმაციო ცენტრის დირექტორი ელენე რუსეცკაია, იუსტიციის სამინისტროს, საგარეო საქმეთა სამინისტროს, გაეროს ქალთა ორგანიზაციისა და სხვა არასამთავრობო სექტორის წარმომადგენლები მონაწილეობდნენ.

შეხვედრაზე ჟენევის საერთაშორისო დისკუსიების მიმდინარეობა, მათ შორის ბოლო რაუნდის საკითხები და შედეგები განიხილეს. საუბარი შეეხო ოკუპირებულ ტერიტორიებზე განათლების, ჯანდაცვის, გადაადგილების თავისუფლების, კულტურული მემკვიდრეობის დაცვის საკითხებს. ყურადღება გამახვილდა არასამთავრობო სექტორის მეტ ჩართულობაზე კონფლიქტის მოგვარების საქმეში, განიხილეს ერთობლივი პროექტების შემუშავებისა და განხორციელების პერსპექტივები.

შეხვედრის მონაწილეებმა ზემოაღნიშნულ მნიშვნელოვან თემებზე რეკომენდაციები შეიმუშავეს. კონფლიქტებისა და ქალთა საკითხებზე მომუშავე არასამთავრობო ორგანიზაციებისა და ჟენევის საერთაშორისო დისკუსიების ქართველი მონაწილეების შეხვედრა „ქალთა საინფორმაციო ცენტრის" ორგანიზებით გაიმართა.

მისი უწმინდესობისა და უნეტარესობის სრულიად საქართველოს კათოლიკოს პატრიარქის მცხეთა-თბილისის მთავარეპისკოპოსის და ბიჭვინთისა და ცხუმ-აფხაზეთის მიტროპოლიტის ილია II ლოცვა-კურთხევით და აფხაზეთის ავტონომიური რესპუბლიკის მთავრობის ხელშეწყობით ყოვლადწმინდა ღვთისმშობლის ხატი - „ყოველთა მწუხარეთა სიხარული" მოსალოცად დაბრძანდა ქარელის ყოვლადწმინდა სამების სახელობის საკათედრო ტაძარში. (29 ივლისი -2 აგვისტო).

მისი უწმინდესობისა და უნეტარესობის სრულიად საქართველოს კათოლიკოს პატრიარქის, მცხეთა-თბილისის მთავარეპისკოპოსის და ბიჭვინთისა და ცხუმ-აფხაზეთის მიტროპოლიტის ილია II ლოცვა-კურთხევით და აფხაზეთის ავტონომიური რესპუბლიკის მთავრობის ხელშეწყობით, საქართველოს სამოციქულო ეკლესიის ეპარქიებში მოსალოცად დაბრძანდება ყოვლადწმინდა ღვთისმშობლის ხატი - „ყოველთა მწუხარეთა სიხარული".

აღსანისნავია, რომ დასრულდა ღვთისმშობლის ხატის დასავლეთ საქართველოში მოგზაურობა და 29 ივლისიდან ხატი გადმობრძანდება აღმოსავლეთ საქართველოში. აფხაზეთის ავტონომიური რესპუბლიკის მთავრობა  აცნობებს საქართველოს სამოციქულო ეკლესიის მრევლს ხატის მოგზაურობის მარშრუტს და განრიგს:

• ურბნისისა და რუისის ეპარქია --- 29 ივლისი - 2 აგვისტო.

ხატი დაბრძანდება -  ქარელის  ყოვლადწმინდა სამების  სახელობის საკათედრო ტაძარში და ურბნისში წმინდა სტეფანე პირველმოწამის სახელობის საკათედრო ტაძარში. 

• ბორჯომისა და ბაკურიანის ეპარქია --- 3 აგვისტო - 8 აგვისტო.

ხატი დაბრძანდება - ბორჯომის  წმინდა მღვდელმთავარ ნიკოლოზის სახელობის საკათედრო ტაძარში, ბორჯომის ყოვლადწმინდა ღვთისმშობლის ტაძრად მიყვანების სახელობის ტაძარში და სოფელ ტიმოთესუბნის  ყოვლადწმინდა ღვთისმშობლის მიძინების სახელობის ტაძარში.

• სამთავისისა და გორის ეპარქია --- 9 აგვისტო - 14 აგვისტო.

ხატი დაბრძანდება - გორის ყოვლადწმინდა ღვთისმშობლის შობის სახელობის ტაძარში.

• ბოლნისის ეპარქია --- 15 აგვისტო - 20 აგვისტო.

ხატი  დაბრძანდება - ბოლნისის სიონის ყოვლადწმინდა ღვთისმშობლის მიძინების სახელობის ტაძარში და ბოლნისის ცენტრში არსებულ წმინდა გიორგის სახელობის ტაძარში.

• ალავერდის ეპარქია --- 21 აგვისტო - 27 აგვისტო.

ხატი  დაბრძანდება - ალავერდის წმინდა დიდმოწამე გიორგის სახელობის მამათა მონასტერში.

• მცხეთა-თბილისის ეპარქია - 27 აგვისტო.

ხატი  დაბრძანდება - ილორის წმინდა გიორგის სახელობის ეკლესიაში (ელიავას ბაზრობის მიმდებარე ტერიტორიაზე არსებული ტაძარი).

დღეს, ზუგდიდის რაიონის სოფელ ახალსოფელში, 42 დევნილი ოჯახი საცხოვრებელი ფართის მფლობელი გახდა. საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა, სოზარ სუბარმა, ლტოლვილთა დანიის საბჭოს სამხრეთ კავკასიის წარმომადგენლობის დირექტორმა სვენდ მონრად გრაუნბოელმა, აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ, სამეგრელოს გუბერნატორმა ლევან შონიამ, ზუგდიდის მერმა ირაკლი გოგოხიამ  და აფხაზეთის განათლებისა და კულტურის მინისტრმა დიმიტრი ჯაიანმა დევნილ ოჯახებს ბინის გასაღებები გადასცეს და ახალმოსახლეობა მიულოცეს.

ახალსოფელში შენობის სამშენებლო-სარეაბილიტაციო სამუშაოები შვედეთის საერთაშორისო განვითარების სააგენტოს დაფინანსებით, დანიის ლტოლვილთა საბჭომ განახორციელა. საცხოვრებელი ფართის მიღების მოთხოვნით განაცხადი 141 დევნილმა ოჯახმა შეავსო, საიდანაც გრძელვადიანი განსახლების კრიტერიუმების შესაბამისად 42 ოჯახი შეირჩა. შენობაში სულ 42 ბინაა, აქედან 14 - ერთოთახიანი, 23 ოროთახიანი, 5 - სამოთახიანი. თანამედროვე სტანდარტის შენობის თითოეულ ბინაში დამონტაჟდა წყლის ელექტროგამაცხელებელი და გაზის გამათბობელი, ეზოში მოეწყო სათამაშო მოედანი ბავშვებისათვის.

ბინების გადაცემის პარალელურად, დანიის ლტოლვილთა საბჭომ, სამინისტროსთან მჭიდრო თანამშრომლობით, ახალ საცხოვრებელ ადგილას შემოსავლის წყაროს გაჩენის მიზნით, დევნილი ოჯახებს მცირე გრანტები გადასცა. ახალ ბინებში გადასულ ყველა დევნილ ოჯახს, მათი სურვილის შესაბამისად, გადაეცათ საბრუნავი კაპიტალი ან ხელსაწყოები და დანადგარები მცირე ბიზნესისათვის.

დღესვე ზუგდიდში, ბარამიას ქუჩაზე, დევნილი ოჯახების განსახლების მიზნით, მასშტაბური მშენებლობის დაწყებას ჩაეყარა საფუძველი. ზუგდიდში, ბარამიას ქუჩაზე, 28 თორმეტსართულიანი კორპუსი აშენდება, სადაც საცხოვრებელი ფართი 2016 დევნილ ოჯახს გადაეცემა. საწყის ეტაპზე ორი 12-სართულიანი კორპუსის მშენებლობა მიმდინაროებს, რომელიც 2016 წლის შემოდგომაზე დასრულდება და ბინას 144 დევნილი ოჯახი მიიღებს.

27 ივლისს, ფოთში იუსტიციის სახლის მეთოთხმეტე ფილიალი გაიხსნა. იუსტიციის სახლი საპორტო ქალაქში საქართველოს იუსტიციის მინისტრმა თეა წულუკიანმა გახსნა.

ფოთში იუსტიციის სახლის გახსნას აფხაზეთის მთავრობის თავმჯდომარის მოვალეობის შემსრულებელი ვახტანგ ყოლბაია და აფხაზეთის განათელბისა და კულტურის მინისტრი დიმიტრი ჯაიანი დაესწრნენ.

მინისტრის გადაწყვეტილებით, ფოთის იუსტიციის სახლის გახსნა ადგილობრივი მოსახლეობისა და ქალაქის სტუმრებისთვის სახალხო ზეიმის ფორმატში წარიმართა. ფოთის მოსახლეობას, შემოგარენი სოფლებიდან და დედაქალაქიდან ჩასულ სტუმრებს დაუვიწყარი სანახაობა მოუწყეს.

მოსახლეობას საშუალება ექნება მომსახურეობის 400-მდე სერვისი უმაღლესი სტანდარტებით, უმოკლეს დროში მიიღოს. იუსტიციის სახლის გახსნას მთავრობის, დიპლომატიური კორპუსის, პარლამენტისა და ბიზნეს სექტორის წარმომადგენლები დაესწრნენ.

25 ივლისს მცხეთაში მცხოვრებ აფხაზეთიდან დევნილებს საოჯახო მედიცინის ცენტრში უფასო სამედიცინო გამოკვლევები ჩაუტარდათ. აქცია ორგანიზებული იყო აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტროს მიერ „აფხაზეთიდან იძულებით გადაადგილებულ პირთა გასვლითი პროფილაქტიკური სამედიცინო გასინჯვების" პროგრამის ფარგლებში.

სამედიცინო აქციაში მონაწილეობა მიიღეს თბილისის წამყვანი კლინიკების მაღალკვალიფიციურმა სპეციალისტებმა, აფხაზეთიდან იგპ-თა სამედიცინო დაწესებულებების წამყვანმა ექიმ-სპეციალისტებმა.

სამედიცინო ჯგუფის შემადგენლობაში შედიოდნენ: ოჯახის ექიმი, თერაპევტი, პედიატრი, კარდიოლოგი, ნევროლოგი, გინეკოლოგი, ქირურგი, ოფთალმოლოგი, ოტორინოლარინგოლოგი, ენდოკრინოლოგი, ულტრასონოგრაფიის აპარატურით აღჭურვილი სპეციალისტი, ექიმი-ლაბორანტი, დერმატოლოგი.

აქციის ფარგლებში დევნილებს ლაბორატორიული და ინსტრუმენტული გამოკვლები ჩაუტარდათ და გადაეცათ საჭირო მედიკამენტები.

მცხეთაში სამედიცინო აქციის მიმდინარეობას მონიტორინგი აფხაზეთის ა/რ ჯანმრთელობისა და სოციალური დაცვის მინისტრმა ქეთევან ბაკარაძემ გაუწია.

აფხაზეთის ავტონომიური რესპუბლიკის მთავრობის, აფხაზეთის ავტონომიური რესპუბლიკის განათლებისა და კულტურის სამინისტროს, აფხაზეთის სულიერებისა და კულტურის ცენტრის ორგანიზებით, ეთნოგრაფიულ მუზეუმში აფხაზეთის დღე გაიმართა.

აფხაზეთის დღის ფარგლებში მაყურებლის წინაშე წარსდგნენ: სოხუმის სახელმწიფო უნივერსიტეტის ქორეოგრაფიული ანსამბლი „მირონი“ და სხვა ინდივიდუალური შემსრულებლები. 

ღონისძიებას აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, აფხაზეთის ავტონომიური რესპუბლიკის უმაღლესი საბჭოს თავმჯდომარე ელგუჯა (გია) გვაზავა, აფხაზეთის ავტონომიური რესპუბლიკის განათლებისა და კულტურის მინისტრი დიმიტრი ჯაიანი, აფხაზეთის ავტონომიური რესპუბლიკის იუსტიციის დეპარტამენტის თავმჯდომარე იგორ კოპალიანი, აფხაზეთის უმაღლესი საბჭოს თავმჯდომარის მოადგილე ჯემალ გამახარია, სოხუმის სახელმწიფო უნივერსიტეტის რექტორი ჯონი აფაქიძე ესწრებოდნენ.

ქართულ-აფხაზური ეროვნულ-კულტურული ფასეულობების წარმოსაჩენად, მუზეუმის ტერიტორიაზე გამოიფინა აფხაზეთის კულტურული მემკვიდრეობის ამსახველი ფოტომასალა.

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი სოზარ სუბარი, აფხაზეთის ავტონომიური რესპუბლიკის უმაღლესი საბჭოს თავმჯდომარე გია (ელგუჯა) გვაზავა და აფხაზეთის ავტონომიური რესპუბლიკის განათლებისა და კულტურის მინისტრი დიმიტრი ჯაიანი ევროპის ახალგაზრდულ ოლიმპიურ ფესტივალში მონაწილე დევნილ სპორტსმენებს შეხვდნენ, სიმბოლური საჩუქრები გადასცეს და წარმატებები უსურვეს.

დევნილი ახალგაზრდები სპორტის სხვადასხვა სახეობებში იასპარეზებენ, კერძოდ, დიანა ზოლოტუხინა, საბა სოსელია, მარი ჩაკაბერია, დათო ლუკავა  მძლეოსნობაში, თათია გადელია - ხელბურთში, ოთარ პერტაია - კალათბურთში, ანა მაქაცარია - ჩოგბურთში.

„დღევანდელი შეხვედრა იმ ქართველ სპორტსმენებს გავუმართეთ, რომლებიც აფხაზეთიდან არიან დევნილები. ჩვენ ახალგაზრდებს ძალიან კარგი სპორტული ტრადიციები მოსდგამთ აფხაზეთიდან, რომელთაც არაერთხელ უსახელებიათ თავიანთი სამშობლო. დღეს ჩვენთან თავი მოიყარეს გამორჩეულმა სპორტსმენებმა, რომლებიც 50 ქვეყნის 6 ათას საუკეთესო სპორტსმენთა რიგებში მოხვდნენ. დარწმუნებული ვარ, ჩვენ ბავშვებს ძალიან სერიოზული მომავალი ელით წინ. ეს ხომ მათი პირველი ნაბიჯია დიდ საერთაშორისო სპორტულ ფორუმებში ასპარეზობის გზაზე. მათ შორის ჩვენ აუცილებლად ვიხილავთ მომავალ მსოფლიოსა და ოლიმპიურ ჩემპიონებს. დიდი მადლობა მინდა გადავუხადო სოზარ სუბარს ჩვენი ერთობლივი ღონისძიებისთვის. ვუსურვებ საინტერესო, წარმატებულ სპორტულ ასპარეზობას ქართველ სპორტსმენებს, რომელთაც ამ ოლიმპიურ ფესტივალზე მთელი საქართველო გულშემატკივრობს," - განაცხადა ვახტანგ ყოლბაიამ.

ღონისძიებას აფხაზეთის ავტონომიური რესპუბლიკის მთავრობის წევრები, აფხაზეთის ავტონომიური რესპუბლიკის უმაღლესი საბჭოს დეპუტატები, აფხაზეთიდან დევნილი მსოფლიო ჩემპიონები გოგიტა არქანია, სვეტლანა ფრუიძე, ირაკლი ცხოვრებაშვილი, აფხაზეთის სხვადასხვა სპორტული ფედერაციის ხელმძღვანელები და სპორტული მწვრთნელები ესწრებოდნენ.

2015 წლის 26 ივლისიდან 2 აგვისტომდე საქართველოს დედაქალაქი უმნიშვნელოვანეს სპორტულ ღონისძიებას - ევროპის ახალგაზრდულ ოლიმპიურ ფესტივალს უმასპინძლებს. ამასთან დაკავშირებით თბილისს 50 ქვეყნის 6 ათასი ახალგაზრდა სპორტსმენი ესტუმრება.

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ 2015 წლის 13-14 ივნისს ქ. თბილისში მომხდარი სტიქიის სალიკვიდაციო სამუშაოებში მონაწილე აფხაზეთის ავტონომიური რესპუბლიკის აღმასრულებელი ხელისუფლების დეპარტამენტებისა და ორგანიზაციების ხელმძღვანელებსა და თანამშრომლებს მადლობის სიგელები გადასცა.