აფახაზეთის ავტონომიური რესპუბლიკის ოფიციალური ვებ-გვერდი ხუთენოვანი გახდა და ამიერიდან ქართულის, აფხაზურის, ინგლისურისა და რუსულის გარდა აფხაზეთის ავტონომიური რესპუბლიკის მთავრობის საქმიანობის შესახებ ინფორმაციის მიღება უკვე თურქულ ენაზეც გახდება შესაძლებელი.

აღნიშნულ ენაზე საიტის ამოქმედება განპირობებულია თურქეთში მცხოვრები ქართული და აფხაზური დიასპორების მაღალი ინტერესიდან გამომდინარე, რომლებმაც სურვილი გამოთქვეს აფხაზეთის ავტონომიური რესპუბლიკის მთავრობის საქმიანობის შესახებ ობიექტური ინფორმაცია მათთვის პრიორიტეტულ თურქულ ენაზე მიიღონ.

აფხაზეთის ავტონომიური რესპუბლიკის მთავრობა ღრმა მწუხარებას გამოთქვამს თურქეთის ქალაქ სტამბოლში მომხდარ ტერორისტულ აქტთან დაკავშირებით, რომლის შედეგადაც ათეულობით ადამიანი დაშავდა და დაიღუპა.

მომხდარი ფაქტი, ტრაგედიაა არა მარტო თურქეთისთვის, არამედ მთელი საერთაშორისო საზოგადოებისთვის.

აფხაზეთის ავტონომიური რესპუბლიკის მთავრობა ქვეყნისთვის ამ უმძიმეს წუთებში მორალურ თანადგომას უცხადებს გარდაცვლილთა ოჯახებს, სრულიად თურქეთის მოსახლეობასა და თურქეთის ხელისუფლებას.

აფხაზეთის მთავრობაში აფხაზეთის ავტონომიური რესპუბლიკის მთავრობასა და საერთაშორისო ასოციაცია „საქართველოს ქალები მშვიდობისა და სიცოცხლისათვის" შორის ურთიერთშეთანხმების მემორანდუმი გაფორმდა.

მემორანდუმს აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ და საერთაშორისო ასოციაცია „საქართველოს ქალები მშვიდობისა და სიცოცხლისათვის" ასოციაციის თავმჯდომარემ მაია კვეზერელი-კოპაძემ მოაწერეს ხელი.

შეთანხმება ითვალისწინებს აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტროსთან შეთანხმების საფუძველზე აფხაზეთიდან იძულებით გადაადგილებულ შშმ პირთათვის ეტლებით დახმარებასა და აფხაზეთიდან იძულებით გადაადგილებულ პირთა სოციალური მდგომარეობის გაუმჯობესების მიზნით აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტროსთან ერთობლივ ღონისძიებებში მონაწილეობას.

მემორანდუმის ხელმოწერის ცერემონიას აფხაზეთის ავტონომიური რესპუბლიკის ჯანმრთელობისა და სოციალური დაცვის მინისტრი ქეთევან ბაკარაძე და მინისტრის მოადგილე მარინა ონიანი ესწრებოდნენ.

გალერეა „Black & White"-ში ვაჩე რაინდელის პერსონალური ფოტოგამოფენა სახელწოდებით „დასაბრუნებელი ტერიტორიები" გაიმართა. გამოფენაზე წარმოდგენილი იყო უნიკალური ფოტომასალა აფხაზეთის, სამაჩაბლოს, ტრაპიზონის, ტაო-კლარჯეთის, ლორესა და ჰერეთის შესახებ.

ღონისძიებას აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, აფხაზეთის ავტონომიური რესპუბლიკის უმაღლესი საბჭოს თავმჯდომარე ელგუჯა (გია) გვაზავა, აფხაზეთის ავტონომიური რესპუბლიკის განათლებისა და კულტურის მინისტრი დიმიტრი ჯაიანი და აფხაზეთის ავტონომიური რესპუბლიკის მთავრობის აპარატის უფროსი ოთარ გარმელია ესწრებოდნენ.

სოხუმის მოზარდ მაყურებელთა პროფესიულმა სახელმწიფო თეატრმა „თეთრი ტალღა“-მ, რეჟისორ დავით კობახიძის ერთმოქმედებიანი ტრაგედია „ანტიგონე“ წარუდგინა მაყურებლებს.

სპექტაკლს აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებებლი ვახტანგ ყოლბაია, აფხაზეთის ავტონომიური რესპუბლიკის განათლებისა და კულტურის მინისტრი დიმიტრი ჯაიანი და აფხაზეთის ავტონომიური რესპუბლიკის იუსტიციის დეპარტამენტის თავმჯდომარე იგორ კოპალიანი ესწრებოდნენ.

აფხაზეთის ავტონომიური რესპუბლიკის განათლებისა და კულტურის სამინისტროსთან არსებულ ვალერი არქანიას სახელობის არტ-გალერეაში ეთერ სამხარაძე-ჯღამაძის ლექსების კრებულის პრეზენტაცია გაიმართა. კრებული პოეტის ხსოვნის უკვდავსაყოფად აფხაზეთის ავტონომიური რესპუბლიკის განათლებისა და კულტურის სამინისტროს ხელოვნებისა და მიმდინარე ღონისძიებების სამსახურის ქვეპროგრამის „ბეჭვდითი გამოცემების“ ფარგლებში გამოიცა.

პრეზენტაციას აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, აფხაზეთის ავტონომიური რესპუბლიკის უმაღლესი საბჭოს თავმჯდომარე ელგუჯა (გია) გვაზავა, აფხაზეთის ავტონომიური რესპუბლიკის განათლებისა და კულტურის მინისტრი დიმიტრი ჯაიანი, პოეტის ახლობლები და მეგობრები ესწრებოდნენ.

ეთერ სამხარაძე-ჯღამაძე XX საუკუნის II ნახევრის აფხაზეთის ქართული მწერლობის ერთ-ერთი თვალსაჩინო წარმომადგენელი იყო, შესანიშნავი პოეტი და სანიმუშო პიროვნება, რომელმაც პირველი პოეტური კრებულის გამოქვეყნებისთანავე მიიქცია მკითხველის ყურადღება. მან აფხაზეთის ტრაგედიამდე 20-მდე წიგნის გამოქვეყნება მოასწრო. ეთერ სამხარაძე-ჯღამაძის ლექსები თარგმნილია რუსულ, უკრაინულ, აფხაზურ და სხვა ენებზე. არაერთმა კომპოზიტორმა შექმნა მის 50-მდე ლექსზე საესტრადო, საგუნდო და საბავშვო სიმღერები.

თბილისის საკრებულოს დეპუტატ ზურაბ ნეფარიძის ინიციატივით, ისნის რაიონში საქართველოს ტერიტორიული მთლიანობისათვის დაღუპული მებრძოლის ბესიკ გეთიას სახელობის ქუჩა გაიხსნა.

ღონისძიებას აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, აფხაზეთის ავტონომიური რესპუბლიკის უმაღლესი საბჭოს თავმჯდომარე ელგუჯა (გია) გვაზავა, აფხაზეთის ავტონომიური რესპუბლიკის უმაღლესი საბჭოს დეპუტატები, ბესიკ გეთიას ოჯახის წევრები, თანამებრძოლები და მეგობრები ესწრებოდნენ.

ბესიკ გეთია აფხაზეთში ომის დაწყების დღიდან 23-ე ბრიგადის მოტომსროლელ ბატალიონში ირიცხებოდა. მან განსაკუთრებული მამაცობა გამოიჩინა 1993 წლის 15-16 მარტს გუმისთის მიდამოებში წარმოებულ ბრძოლებში. დაიღუპა სეპარატისტების მიერ მძევლად აყვანილი ქართველი მებრძოლის გათავისუფლების ოპერაციის დროს. ბესიკ გეთია სიკვდილის შემდეგ დაჯილდოებულია მედლით „მხედრული მამაცობისათვის".

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია ზუგდიდის მუნიციპალიტეტის სოფელ რუხში მდებარე სასათბურე მეურნეობას ეწვია და სათბურებში მორიგი სამუშაოების ჩატარების მიმდინარეობას გაეცნო ამ სამუშაოების ხელმძღვანელ, აფხაზეთიდან დევნილ რევაზ ჯალაღონიასთან ერთად.

აფხაზეთის ავტონომიური რესპუბლიკის მთავრობისა და აფხაზეთის ავტონომიური რესპუბლიკის ჯანდაცვის სამინისტროს ორგანიზებით „აფხაზეთიდან იძულებით გადაადგილებულ პირთა გასვლითი პროფილაქტიკური სამედიცინო გასინჯვების“ პროგრამის ფარგლებში, ფოთსა და დარჩელში მცხოვრებ დევნილთათვის უფასო სამედიცინო-პროფილაქტიკური გამოკვლევები ჩატარდა.

გამოკვლევები ორი დღის განმავლობაში მიმდინარეობდა და მასში მონაწილეობას იღებდნენ აკადემიკოს ოთარ ღუდუშაურის სახელობის ეროვნული სამედიცინო ცენტრის, კ. ერისთავის სახელობის ქირურგიის ეროვნული ცენტრის, მერაბ დვალის თვალის კლინიკა „ახალი მზერა“-ს, ენდოკრინოლოგიის ცენტრი „ენმედიცი“-ს, სენაკის ფსიქონევროლოგიური კლინიკის, თბილისსა და ქუთაისში მდებარე დევნილთა სამედიცინო დაწესებულებების, ალ. წულუკიძის სახელობის უროლოგიის ეროვნული ცენტრისა და ჩიჩუების კლინიკა „მზერა“-ს წამყვანი სპეციალისტები. ამ დღეების განამავლობაში მოქალაქეებმა მიიღეს  ოჯახის ექიმის, თერაპევტის, პედიატრის, კარდიოლოგის, ნევროლოგის, გინეკოლოგის, რეპრუდუქტოლოგის, ქირურგის, ოფთალმოლოგის, ოტოლარინგოლოგის, ენდოკრინოლოგის, უროლოგის, ულტრასონოგრაფიის აპარატურით აღჭურვილი სპეციალისტის, დერმატოლოგისა და ლაბორანტის მომსახურებები.

სამედიცინო გამოკვლევების პარალელურად, დევნილებს უფასოდ დაურიგდათ 85 სახის სხვადასხვა დანიშნულების მედიკამენტი.

გამოკვლევების პროცესის მონიტორინგს აფხაზეთის ავტონომიური რესპუბლიკის მთავრობის თავმჯდომარის მოვალეობის შემსსრულებელი ვახტანგ ყოლბაია, აფხაზეთის ჯანდაცვის მინისტრი ქეთევან ბაკარაძე და ქალაქ ფოთის მერიის ჯანმრთელობისა და სოციალური უზრუნველყოფის სამსახურის უფროსი მაია მაკალათია ახორციელებდნენ.

აფხაზეთის ავტონომიური რესპუბლიკის მთავრობასა და რომუალდო დელ ბიანკოს ფონდს შორის 2014 წელს გაფორმებული მემორანდუმის ფარგლებში იტალიის ქალაქ ფლორენციაში 13-20 ნოემბერს ნდობის აღდგენისა და შერიგების საკითხებში აფხაზეთის ავტონომიური რესპუბლიკის მთავრობის მინისტრის აპარატის ორგანიზებით საერთაშორისო პროექტი "კულტურათაშორისი დიალოგი აღმოსავლეთ პარტნიორობის პროგრამის ფარგლებში" განხორციელდა.

პროექტი საქართველოს საგარეო საქმეთა სამინისტროს, საქართველოს კულტურისა და ძეგლთა დაცვის სამინისტროს, საქართველოს პარლამენტის წევრ ადა მარშანიას, საქართველოს საელჩოს იტალიის რესპუბლიკაში, აფხაზეთის ავტონომიური რესპუბლიკის მთავრობის, რომაულდო დელ ბიანკოს ფონდის, ორგანიზაცია „რონდინე"-ს, საქართველოს საპატრიარქოს, რობერტ კენედის ფონდის, ერნესტო ბალდუჩის ფონდის, აჭარის სკოლა „გორდა"-სა და სხვადახვა ქვეყნის უნივერსიტეტების მხარდაჭერით განხორციელდა.

საქართველოს დელეგაციას აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია ხელმძღვანელობდა. პროექტში რვა ქვეყნის წარმომადგენელი მონაწილეობდა, მათ შორის იყვნენ  საქართველოს საპატრიარქოს წარმომადგენლები, ქართველი და აფხაზი ახალგაზრდები თბილისის, სოხუმის და ბათუმის უნივერსიტეტებიდან.

საერთაშორისო სამეცნიერო შეხვედრებზე სხვა ქვეყნების უნივერსიტეტების პროფესორებთან ერთად ლექციები საქართველოს იუსტიციის საბჭოს წევრმა, პროფესორმა ვახტანგ თორდიამ, საქართველოს ტექნიკური უნივერსიტეტის პროფესორმა ვაჟა შუბითიძემ და საქართველოს საპატრიარქოს წმინდა თამარ მეფის სახელობის უნივერსიტეტის რექტორმა, პროფესორმა მამა ადამმა (ვახტანგ ახალაძე)  წაიკითხეს.

საერთაშორისო პროექტის ფარგლებში ფლორენციაში ქართველების, აფხაზებისა და ჩეჩნების მონაწილეობით ფოლკლორის საღამო გაიმართა.

პროექტის მიზანი იყო საქართველოს აქტიური ჩართულობა ინტერკულტურულ დიალოგში, საქართველოს კულტურული მემკვიდრეობის პოპულარიზაცია, საერთაშორისო საზოგადოების ყურადღების გამახვილება ქართულ-აფხაზური კულტურული ფასეულობების შენარჩუნების პროცესში, ქართველ და აფხაზ ახალგაზრდებს შორის ურთიერთობებისა და ნდობის აღდგენა, სახალხო დიპლომატიის ხელშეწყობა.

პროექტის მე-2 ეტაპი იგეგმება  საქართველოში, რომელიც აღმოსავლეთ პარტნიორობის ქვეყნების მონაწილეობით საერთაშორისო ინტერკულტურულ ფორუმს ითვალისწინებს.

მერაბ ბერძენიშვილის სახელობის კულტურის ცენტრში „მუზა" აფხაზეთის სულიერებისა და კულტურის ცენტრის საიუბილეო საღამო გაიმართა.

საღამოზე საზოგადოებას სიტყვით მიმართეს აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ, პროფესორმა ოთარ ჟორდანიამ, საქართველოს დამსახურებულმა არტისტმა ჯემალ ჭკუასელმა და საზოგადოების სხვა წარმომადგენლებმა.

ღონისძიებას აფხაზეთის ავტონომიური რესპუბლიკის უმაღლესი საბჭოს თავმჯდომარე ელგუჯა(გია) გვაზავა, აფხაზეთის განათლებისა და კულტურის მინისტრი დიმიტრი ჯაიანი, აფხაზეთის სულიერებისა და კულტურის ცენტრის ხელმძღვანელი სვეტლანა ქეცბა, სასულიერო პირები და საზოგადო მოღვაწეები ესწრებოდნენ.

კონცერტში გურამ ყურაშვილის სახელობის აფხაზეთის სახელმწიფო კაპელა, აფხაზეთის სიმღერისა და ცეკვის სახელმწიფო ანსამბლი „აფხაზეთი",  სახელმწიფო ანსამბლი „რუსთავი", ზვიად ბოლქვაძე, დიმიტრი ჯაიანი, ელდარ გეწაძე, ელდინო საღარაძე და სხვა შემსრულებლები მონაწილეობდნენ.

ასევე, საგამოფენო დარბაზში აფხაზეთის მხატვრების ნამუშევრების გამოფენა გაიმართა.

აფხაზეთის სულიერებისა და კულტურის ცენტრი 10 წლის წინ საქართველოს პატრიარქის, უწმინდესისა და უნეტარესის ილია მეორის ლოცვა-კურთხევით დაარსდა.

აფხაზეთის ავტონომიური რესპუბლიკის მთავრობაში გურამ ყურაშვილის სახელობის აფხაზეთის სახელმწიფო საგუნდო კაპელას წევრებთან და გუნდის სამხატვრო ხელმძღვანელთან შეხვედრა გაიმართა.

ვახტანგ ყოლბაიამ აფხაზეთის საგუნდო კაპელას  ბელგიის სამეფოში, ბრიუსელის წმინდა მიქაელის და გუდულას სახელობის საკათედრო ტაძარში გამართულ კლასიკური მუსიკის საქველმოქმედო კონცერტში მონაწილეობისათვის  მადლობა გადაუხადა და წარმატებული გამოსვლა მიულოცა.

შეხვედრას აფხაზეთის ავტონომიური რესპუბლიკის უმაღლესი საბჭოს თავმჯდომარე ელგუჯა (გია) გვაზავა, აფხაზეთის განათლებისა და კულტურის მინისტრი დიმიტრი ჯაიანი და აფხაზეთის საგუნდო კაპელას სამხატვრო ხელმძღვანელი ზვიად ბოლქვაძე ესწრებოდნენ.

აფხაზეთის საგუნდო კაპელამ მსოფლიო მნიშვნელობის კულტურული მემკვიდრეობის ძეგლის დაცვა-შენარჩუნების პროცესში საქართველოს კულტურისა და ძეგლთა დაცვის სამინისტროს, აფხაზეთის ავტონომიური რესპუბლიკის მთავრობისა და აფხაზეთის ავტონომიური რესპუბლიკის განათლებისა და კულტურის სამინისტროს მხარდაჭერით მიიღო მონაწილეობა.

საქართველოს საპატრიარქოში სამეცნიერო კონფერენცია „ქართულ-აფხაზური კონფლიქტის დაძლევის პერსპექტივები" გაიმართა. სამეცნიერო კონფერენციაზე მომხსენებლებმა - ბეჟან ხორავამ, დაზმირ ჯოჯუამ, ქეთევან პავლიაშვილმა, ზაზა წურწუმიამ და არქიმანდრიტმა ადამ ახალაძემ ისაუბრეს აფხაზეთის ისტორიული გეოგრაფიის, აფხაზური ისტორიოგრაფიის, ცხუმ-აფხაზეთის ეპარქიის ისტორიის აქტუალურ საკითხებზე, 1992/1993 წლების ომის გეოპოლიტიკურ შედეგებზე, თურქეთის აფხაზური დიასპორის საქმიანობაზე, დაურეგულირებელი ქართულ-აფხაზური კონფლიქტის პირობებში გახანგრძლივებული დევნილობისა და იძულებითი გადაადგილების სოციალურ, დემოგრაფიულ, ფსიქოლოგიურ და კულტურულ პრობლემებზე.

კონფერენციის მონაწილენი დალოცა და დამსწრეთ სიტყვით მიმართა სრულიად საქართველოს კათოლიკოს-პატრიარქმა უწმინდესმა და უნეტარესმა ილია მეორემ. კონფერენციას ასევე აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, აფხაზეთის ავტონომიური რესპუბლიკის უმაღლესი საბჭოს თავმჯდომარე ელგუჯა (გია) გვაზავა, აფხაზეთის მთავრობის წევრები და უმაღლესი საბჭოს დეპუტატები ესწრებოდნენ.

აფხაზეთის მთავრობის თავმჯდომარის მოვალეობის შემსრულებელმა ვახტანგ ყოლბაიამ, აფხაზეთის უმაღლესი საბჭოს თავმჯდომარე გია გვაზავამ და აფხაზეთის ჯანმრთელობისა და სოციალური დაცვის მინისტრმა, ქეთევან ბაკარაძემ კალაუბნის ქ. #16-ში აფხაზეთის ჯანდაცვის სამინისტროს დაქვემდებარებაში მყოფ სამედიცინო დაწესებულების სარეაბილიტაციო ცენტრში პაციენტები ინახულეს. ამჟამად იქ ოკუპირებული აფხაზეთიდან გადმოსული ოთხი პაციენტი მკურნალობს, ერთ-ერთ მათგანს, ეთნიკურად აფხაზ მამაკაცს რამდენიმე დღეში ოპერაცია გაუკეთდება.

ოთხი სხვადასხვა კომპონენტისგან შემდგარ მიზნობრივ სარეაბილიტაციო პროგრამას აფხაზეთის ჯანდაცვის სამინისტრო ახორციელებს.

ვახტანგ ყოლბაიას განცხადებით, აღნიშნული პროგრამით აფხაზეთიდან გადმოსული ძალიან ბევრი პაციენტი სარგებლობს, რაც უმნიშვნელოვანესია ქართულ-აფხაზური ურთიერთობებისათვის.

„დღეს მოვინახულეთ აფხაზეთიდან ჩამოსული პაციენტები; ერთი მათგანი ეთნიკურად აფხაზია, ოთხი კი ქართველი. აფხაზეთიდან ჩამოსულ მცირეწლოვან ბავშვებს ჯანმრთელობის სერიოზული პრობლემები აქვთ, რაც ინტენსიურ მკურნალობას საჭიროებს. აფხაზეთიდან თბილისში სამკურნალოდ ჩამოსულ მამაკაცს რამდენიმე დღეში უკეთდება ოპერაცია, მის ძმას კი ორი დღით ადრე თავის არეში სერიოზული ოპერაცია ჩაუტარდა. ოპერაციამ კარგად ჩაიარა და პაციენტი უკვე გაემგზავრა სოხუმში. მახარებს იმის აღნიშვნა, რომ აქ ყველა პირობაა შექმნილი პაციენტებისთვის, რომ მათ ნორმალურ გარემოში შეძლონ საკუთარ ჯანმრთელობაზე ზრუნვა. მახარებს ისიც, რომ ცენტრის სერვისი საუკეთესო სტანდარტით გამოირჩევა, რაც  სარეაბილიტაციო ცენტრის მუშაობას მნიშვნელოვნად უწყობს ხელს. კიდევ ერთხელ მინდა დიდი მადლობა გადავუხადო თურქეთის საელჩოსა და თურქეთის მთავრობის სტრუქტურა „ტიკას". დღეს ამ ცენტრს ჩვენი ჯანდაცვისა და ეკონომიკის სამინისტროები უწევენ მეთვალყურეობას. რა თქმა უნდა, ამაზე ვერ შევჩერდებით, საჭირო გახდება უფრო მეტი თანხების მობილიზაცია, რომ ყველა ბენეფიციარი დავაკმაყოფილოთ. აქედანვე ვხედავთ, რომ  ძალიან ბევრი მსურველი გვეყოლება, უკვე ძალიან ბევრი განაცხადი გვაქვს. მინდა ჩვენს ბენეფიციარებს ვუსურვო სიკეთე და ჯანმრთელობა. ჩვენ გახსნილი ვართ ყველასთვის. ჩვენ ძმებ აფხაზებს მუდამ შეუძლიათ იმედი იქონიონ, რომ  მათი ჯანმრთელობის პრობლემებზე ზრუნვას ცდას არ დავაკლებთ თბილისში და საქართველოს ნებისმიერ კუთხეში", - განაცხადა ვახტანგ ყოლბაიამ.

აფხაზეთის შრომის, ჯანმრთელობისა და სოციალური დაცვის მინისტრის, ქეთევან ბაკარაძის თქმით, პროგრამა მომავალი წლისთვის კიდევ უფრო გაიზრდება, რადგან მასში ჩართვა ოკუპირებლ აფხაზეთში მცხოვრებ ძალიან ბევრ პაციენტს სურს.

„ეს გახლავთ აფხაზეთის სამინისტროს მიზნობრივი სარეაბილიტაციო პროგრამა, რომელიც ოთხი სხვადასხვა კომპონენტით არის წარმოდგენილი. ჩვენ ვემსახურებით კონკრეტულ სეგმენტს, წინასწარ მოკვლეული პრობლემატიკის საფუძველზე. ეს განსაკუთრებით მნიშვნელოვანია ოკუპირებული გალის რაიონში მცხოვრები ჩვენი მოქალაქეებისთვის, რომლებსაც მაქსიმალურად შეზღუდული აქვთ ასეთი ტიპის სერვისის მიღება. პროგრამა აუცილებლად გაგრძელდება, კიდევ უფრო გაფართოვდება. ვთანამშრომლობთ გალის რაიონში არსებულ სარეაბილიტაციო ცენტრთან, რომელიც ინფორმაციას გვაწვდის მსგავსი ტიპის პაციენტებზე, რომლებზე ზრუნვაც ჩვენ სამინისტროს დაეკისრება. ვფიქრობ, ამ პროგრამაში უნდა მოვახდინოთ კიდევ უფრო მეტი ფინანსური რესურსის მობილიზაცია, რომ მომავალ წელს უფრო მეტ ბენეფიციარს მივცეთ მკურნალობის საშუალება. ამჯერად პროგრამა  მიმდინარეობს ტატიშვილის სპორტულ-გამაჯანსაღებელ სარეაბილიტაციო ცენტრში, რომელიც რეგიონში უპრეცედენტოდ შეგვიძლია მივიჩნიოთ. დღის განმავლობაში, ამ ცენტრში, 20-მდე ბენეფიციარი ღებულობს მომსახურებას", - განაცხადა აფხაზეთის ჯანდაცვის მინისტრმა ქეთევან ბაკარაძემ.

მოსწავლე-ახალგაზრდობის ეროვნული სასახლის სარკეებიან დარბაზში შოთა რუსთაველის 850 წლის იუბილესთან დაკავშირებით აფხაზეთის სულიერებისა და კულტურის ცენტრის ორგანიზებითა და აფხაზეთის ავტონომიური რესპუბლიკის მთავრობის, საქართველოს სპორტისა და ახალგაზრდობის სამინისტროს, მოსწავლე-ახალგაზრდობის ეროვნული სასახლის, „მედია-პალიტრა"-ს , „რადიო -1"-ს, საქართველოს პარლამენტის ეროვნული ბიბლიოთეკისა და კორნელი კეკელიძის სახელობის ხელნაწერთა ეროვნული ცენტრის მხარდაჭერით საქალაქო დათვალიერება-კონკურსის „ვკითხულობთ „ვეფხისტყაოსანს" ლაურეატთა დაჯილდოვების ცერემონიალი და კონცერტი გაიმართა.

ღონისძიებას აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, აფხაზეთის ავტონომიური რესპუბლიკის უმაღლესი საბჭოს თავმჯდომარე ელგუჯა (გია) გვაზავა, აფხაზეთის ავტონომიური რესპუბლიკის განათლებისა და კულტურის მინისტრი დიმიტრი ჯაიანი , აფხაზეთის სულიერებისა და კულტურის ცენტრის ხელმძღვანელი სვეტლანა ქეცბა და საზოგადო მოღვაწეები ესწრებოდნენ.

ფინალში გადასულ მონაწილეებს სიგელები და სხვადასხვა სახის პრიზები გადასცეს.