აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია და მთავრობის წევრები აფხაზეთიდან დევნილ გოგიტა არქანიას შეხვდნენ. ვახტანგ ყოლბაიამ სპორტსმენს მსოფლიო ასპარეზზე მოპოვებული გამარჯვება მიულოცა და საჩუქრად სმარტ ფონი გადასცა. გოგიტა არქანია პირველი ქართველი კარატისტია, რომელიც WKF-ის ვერსიით კარატეს მსოფლიოს ჩემპიონი გახდა.

გერმანიის ქალაქ ბრემენში WKF ვერსიით მსოფლიო ჩემპიონატი ჩატარდა, სადაც მონაწილეობდა 120 ქვეყნის 1 000-მდე სპორტსმენი. საქართველოს ნაკრების წევრმა, აფხაზეთის მკვიდრმა (ქ. ოჩამჩირე) გოგიტა არქანიამ იასპარეზა 84 კგ. წონით კატეგორიაში. მან წარმატებით ჩაატარა ფინალამდე მისასვლელი ყველა ორთაბრძოლა, ფინალში 4:1 დაამარცხა იაპონიის წარმომადგენელი რიუტარო არაგა და მსოფლიოს ჩემპიონობა მოიპოვა.

შეხვედრას საქართველოს კარატე-დოს ეროვნული ფედერაციის პრეზიდენტი კახა ბასილია, საქართველოს სპორტისა და ახალგაზრდობის სამინისტროს სპორტის დეპარტამენტის უფროსი ირაკლი დოლაბერიძე და აფხაზეთის კარატეს ფედერაციის პრეზიდენტი თამაზ ჯახაია ესწრებოდნენ.

აფხაზეთის მთავრობის თავმჯდომარის მოვალეობის შემსრულებელმა ვახტანგ ყოლბაიამ საქართველოს პრეზიდენტის განკარგულებით სახელმწიფო ჯილდო - ღირსების ორდენები გადასცსა 1986-1993 (26 სექტემბრამდე) წლებში აფხაზეთის ავტონომიური რესპუბლიკის მინისტრთა საბჭოს თავმჯდომარის მოადგილეს ვახტანგ ბერულავასა და პოეტ ამრიდონ ჩეგიანს. ღონისძიებას აფხაზეთის უმაღლესი საბჭოს თავმჯდომარე გია გვაზავა, აფხაზეთის მთავრობის წევრები, უმაღლესი საბჭოს დეპუტატები და ოჯახის წევრები ესწრებოდნენ.

ვახტანგ ბერულავა, აფხაზეთის ავტონომიური რესპუბლიკის მინისტრთა საბჭოს თავმჯდომარის მოადგილე, აქტიურად მონაწილეობდა აფხაზეთში კონფლიქტის დარეგულირების კომისიის საქმიანობაში. იგი სატრანსპორტო კომისიას ხელმძღვანელობდა და საგანგებო რეჟიმში უძღვებოდა ქალაქ სოხუმიდან მშვიდობიანი მოსახლეობის ევაკუაციის საპასუხისმგებლო საქმეს. საგანგებო რეჟიმში მომუშავე სოხუმში, როგორც სახმელეთო, ასევე, საჰაერო ტრანსპორტის გამართულ და შეუფერხებელ მუშაობას დაღუპვისგან უხსნია არა მარტო ათასობით თანამოქალაქე, რომელთა შორის მეტწილად ქალები და ბავშვები იყვნენ, არამედ ბრძოლის ველზე დაჭრილ-დასახიჩრებული, სისხლისგან თითქმის დაცლილი მეომრებიც. ვახტანგ ბერულავას ბოლო წუთებამდე არ დაუტოვებია მშობლიური ქალაქი.

ამრიდონ ჩეგიანმა გაგრის დაცემის შემდეგ, ალყაში მყოფ მშობლიურ სოფელი ოთხარაში, ჩამოაყალიბა ,,სოფელ ოთხარის ხსნის კომიტეტი" და თავად ჩაუდგა სათავეში, სადაც ქართველებთან ერთად გაერთიანდნენ სოფლის უხუცესი აფხაზებიც. ხსნის კომიტეტმა შესძლო კონტაქტის დამყარება გუდაუთის ხელისუფლებასთან, გაკეთდა ე.წ. სამშვიდობო დერეფანი, ტყვეობიდან განთავისუფლდნენ სოფლის ახალგაზრდები და ოთხარის მრავალრიცხოვანი მოსახლეობა გადაურჩა სრულ განადგურებას. იგი 16 პოეტური კრებულის ავტორია.

აფხაზეთის მთავრობამ საქართველოს პრეზიდენტს გიორგი მარგველაშვილს ორივე მათგანის კანდიდატურა ღირსების ორდენზე იმ გმირობებისთვის წარუდგინა, რომელიც მათ აფხაზეთში საქართველოს ტერიტორიული მთლიანობისათვის წარმოებული ბრძოლების დროს გამოიჩინეს.

სტუდენტთა საერთაშორისო დღესთან დაკავშირებით აფხაზეთის ავტონომიური რესპუბლიკის უმაღლესი საბჭოს ორგანიზებით „მაგთი კლუბში" აფხაზეთიდან დევნილი, წარმატებული სტუდენტებისთვის საზეიმო შეხვედრა გაიმართა. აფხაზეთის მთავრობის თავმჯდომარის მოვალეობის შემსრულებელმა ვახტანგ ყოლბაიამ ახალგაზრდებს სტუდენტა საერთაშორისო დღე მიულოცა და პროფესიულ განვითარებაში წარმატებები უსურვა.

საღამოს ასევე დედაქალაქის მერის მოადგილე ალუდა გოგლიჩიძე, სოხუმის სახელმწიფო უნივერსიტეტის რექტორი, პროფესორი ჯონი აფაქიძე, თბილისის სახელმწიფო სამედიცინო უნივერსიტეტის რექტორი, პროფესორი ზურაბ ვადაჭკორია, საქართველოს განათლების მინისტრის მრჩეველი ოთარ აბესაძე, საქართველოს პარლამენტის ტერიტორიული მთლიანობის აღდგენის დროებითი კომისიის წარმომადგენელი ავთანდილ ბესელია, საქართველოს დავით აღმაშენებლის სახელობის უნივერსიტეტის მედიის სკოლის დეკანი ივანე სეხნიაშვილი, შავი ზღვის საერთაშორისო უნივერსიტეტის პრორექტორი, პროფესორი ნათელა დოღონაძე , აფხაზეთის ავტონომიური რესპუბლიკის მთავრობის წევრები და უმაღლესი საბჭოს დეპუტატები ესწრებოდნენ.

აფხაზეთის უმაღლესი საბჭოს თავმჯდომარემ ელგუჯა გვაზავამ ახალგაზრდობის აღზრდის საქმეში პირადი ღვაწლისათვის და აფხაზეთიდან დევნილი სტუდენტების მიმართ გამოჩენილი მზრუნველობისათვის უმაღლესი საბჭოს საპატიო სიგელით დააჯილდოვა თბილისის სახელმწიფო სამედიცინო უნივერსიტეტის, ივანე ჯავახიშვილის სახელობის სახელმწიფო უნივერსიტეტის, ილიას სახელმწიფო უნივერსიტეტის, კავკასიის საერთაშორისო უნივერსიტეტის, საქართველოს დავით აღმაშენებლის სახელობის უნივერსიტეტის რექტორები. წარმატებულ სტუდენტებს საღამოს ორგანიზატორებმა, სპონსორებმა და უნივერსიტეტების რექტორატმა ფასიანი საჩუქრები გადასცეს.

სტუმრების წინაშე მუსიკალური ნომრებით წარდგნენ მომღერლები ნინი წიკლაური, სალომე ბაკურაძე და ახალაგზრდული „ჯაზ-ბენდი" საღამო კომპანიების : „მაგთის", „ლიბერთი ბანკის", „ავერსისა" და „ჯიპისის" მხარდაჭერით გაიმართა.

აფხაზეთის მთავრობის მხარდაჭერით სამეგრელოს რეგიონში მცხოვრებმა დევნილმა ოჯახებმა 15 ტონამდე სიმინდის მოსავალი მიიღეს. ათი ჰექტარი მიწის ფართობიდან მიღებული მოსავალი, რომელიც საქართველოს ეკონომიკის სამინისტრომ აფხაზეთის მთავრობას სარგებლობის უფლებით გადმოსცა თითოეულ ოჯახზე ერთი ტონის ოდენობით გადანაწილდა.

აფხაზეთის ავტონომიური რესპუბლიკის მთავრობის მხარდაჭერითა და შპს „მექანიზატორის" თანადგომით ზუგდიდის რაიონში ათი ჰექტარი მიწის ნაკვეთზე აგროტექნიკური სამუშაოები (ნიადაგის ხვნა, დადისკვა, დაფარცხვა, თესვა და კულტივაცია სასუქის შეტანით) განხორციელდა. პროექტი საქართველოს სოფლის მეურნეობის სამინისტროსა და აფხაზეთის სოფლის მეურნეობისა და გარემოს დაცვის დეპარტამენტის ერთობლივი თანამშრომლობით განხორციელდა, რომლის ფარგლებშიც გამყოფ ხაზთან მცხოვრები აფხაზეთიდან დევნილი რადმენიმე დევნილი ოჯახი დასაქმდა.

სასტუმრო „შერატონ მეტეხი პალასში" ფოტორეპორტიორების ირაკლი გედენიძის, გია აბდალაძისა და ზურაბ ქურციკიძის ფოტოგამოფენა - "რეჟიმი ნიღბის გარეშე" გაიმართა, სადაც 2007 წლის 7 ნოემბერისა და 2011 წლის 26 მაისის გადაღებული 60 ფოტო იყო წარმოდგენილი.

გამოფენას საქართველოს მთავრობის წარმომადგენლები დაესწრნენ, მათ შორის ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი სოზარ სუბარი, შერიგებისა და სამოქალაქო თანასწორობის საკითხებში სახელმწიფო მინისტრი პაატა ზაქარეიშვილი, აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია და იუსტიციის მინისტრი თეა წულუკიანი.

გამოფენის ორგანიზატორების განცხადებით, ფოტოგამოფენა აღნიშნულ პერიოდში რეპრესირებულ პირებს და იმ ადამიანებს ეძღვნება, რომლებიც 7 ნოემბრისა და 26 მაისის ტრაგიკული მოვლენების დროს დაიღუპნენ.

აღმოსავლეთ საქართველოში აფხაზეთის ავტონომიური რესპუბლიკის მთავრობის წარმომადგენლობისა და აფხაზეთის ავტონომიური რესპუბლიკის სოფლის მეურნეობის გარემოს დაცვისა და ბუნებრივი რესურსების დეპარტამენტის საქვეუწყებო დაწესებულების სატყეო სამმართველოს ინიციატივით ქ. თბილისში №78 ბაგა-ბაღის ტერიოტორიაზე გამწვანების აქცია მოეწყო.

აქცია ითვალისწინებდა დევნილთა კომპაქტური ჩასახლების სკვერის გამწვანებას. აფხაზეთში საომარი მოქმედებების დროს დაღუპული ლაშა ლაშხიას სახელზე გაშენებულ სკვერში ხეების დარგვის აქციაში მონაწილეობა მიიღეს წარმომადგენლობის ხელმძღვანელმა დემურ კეკელიამ და სოფლის მეურნეობის სატყეო სამმართველოს უფროსმა ჯუმბერ ბოიკომ. ღონისძიებას ასევე ესწრებოდა ომში დაღუპულის დედა ქალბატონი მზია ჯოჯუა.

აფხაზეთის ტერიტორიაზე არსებული კულტურული მემკვიდრეობის ძეგლების მდგომარეობის შესახებ მსჯელობდნენ დღეს პარლამენტში ტერიტორიული მთლიანობის აღდგენის საკითხთა დროებითი კომისიის, საგარეო ურთიერთობათა, განათლების მეცნიერებისა და კულტურის, ევროპასთან ინტეგრაციისა და დიასპორისა და კავკასიის საკითხთა კომიტეტების გაერთიანებულ სხდომაზე.

სხდომას აფხაზეთის მთავრობის თავმჯდომარის მოვალეობის შემსრულებელი ვახტანგ ყოლბაია, უმაღლესი საბჭოს წევრები,აფხაზეთის განათლებისა და კულტურის სამინისტროს წარმოამდგენლები ესწრებოდნენ.

სხდომაზე ოკუპირებული აფხაზეთის ტერიტორიაზე არსებული ქართული კულტურის ძეგლების სავალალო მდგომარეობასა და მათი დაცვა-რესტავრაცია-კონსერვაციისათვის გასაწევი სამუშაოების ჩატარებისა უცილებლობაზე იმსჯელეს.

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა, ვახტანგ ყოლბაიამ განაცხადა, რომ „ჟენევის მოლაპარაკებების ფორმატში ეს საკითხები დაფიქსირებულია და ყველა შეხვედრაზე განიხილება. ამ ფორმატში იუნესკოს ექსპერტთა ჯგუფი უნდა ჩასულიყო აფხაზეთში საკითხის შესასწავლად, მაგრამ მაშინ ჩაიშალა. საუბარი ამ თემაზე ისევ უნდა გაგრძელდეს".

ზემოაღნიშნული საკითხის ამომწურავად შესასწავლად, სამოქმედო გეგმის შესამუშავებლად სამუშაო ჯგუფის შექმნა და შეხვედრები დაიგეგმა.

თბილისის მერი დავით ნარმანია და დედაქალაქის მთავრობის წევრები აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელს ვახტანგ ყოლბაიას და აფხაზეთის მთავრობის წევრებს შეხვდნენ. შეხვედრას ოკუპირებული ტერიტორიებიდან იძულებით გადაადგილებულ პირთა, ლტოლვილთა და განსახლების მინისტრის მოადგილე შოთა რეხვიაშვილი ესწრებოდა.

შეხვედრაზე თბილისში მცხოვრებ აფხაზეთიდან დევნილთა პრობლემებსა და მათ გადასაჭრელად ერთობლივად განსახორციელებელ ღონისძიებებზე იმსჯელეს. რაიონების გამგებლებმა ის პრობლემური საკითხები წარადგინეს, რომელიც თბილისის სხვადასხვა რაიონში დევნილთა საცხოვრებელი პირობებით უზრუნველყოფას ეხება.

გადაწყდა, რომ დევნილებთან დაკავშირებით არსებული პრობლემური საკითხების განსახილველად შეიქმნება საკოორდინაციო ჯგუფი, რომელშიც თბილისის მერიის, აფხაზეთის მთავრობის, ასევე ლტოლვილთა და განსახლების სამინისტროს წარმომადგენლები შევლენ.

ღვთისმშობლის ხატი „ყოველთა მწუხარეთა სიხარული" ფოთის საკათედრო ტაძრიდან ქობულეთის ღვთისმშობლის სახელობის ტაძარში გადააბრძანეს, შემდეგ კი ბათუმის საკათედრო ტაძარში დააბრძანეს, სადაც პარაკლისი აღესრულა. პარაკლისს აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, აფხაზეთის ავტონომიური რესპუბლიკის ჯანდაცვისა და სოციალური დაცვის მინისტრი ქეთევან ბაკარაძე, აფხაზეთის ავტონომიური რესპუბლიკის იუსტიციის დეპარტამენტის თავმჯდომარე იგორ კოპალიანი, აფხაზეთის ავტონომიური რესპუბლიკის დევნილთა საქმეების დეპარტამენტის თავმჯდომარე დავით გვაძაბია, დევნილები და მომლოცველები დაესწრნენ. დღეს ამ ხატის ხსენების დღეა.

„ყოველთა მწუხარეთა სიხარული" ერთი წლის წინ, 90-იან წლებში აფხაზეთში განვითარებული ტრაგიკული მოვლენებისას დაღუპულთა სულების მოხსენიებისა და შერიგების მლოცველთათვის, სრულიად საქართველოს კათოლიკოს პატრიარქის უწმინდესისა და უნეტარესის, ილია II-ის ლოცვა-კურთხევით და აფხაზეთის მთავრობის მხარდაჭერით დაიწერა.

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებლის, ვახტანგ ყოლბაიას თქმით:

„როდესაც ეს ხატი დაიწერა, უწმინდესმა ისურვა, რომ მან მოიაროს მთელი საქართველო, რადგან ის დაწერილია აფხაზეთის ომში დაღუპულთა სულების მოსახსენიებელად. რა თქმა უნდა, ჩვენ ვასრულებთ პატრიარქის სურვილს. ხატმა უკვე მოიარა სამეგრელო, ახლა აჭარაში ვართ, ამის შემდეგ სხვა რეგიონებში წაბრძანდება. მე კიდევ ერთხელ ვულოცავ ჩვენს მრევლს ამ ხატის ხსენების დღეს და მჯერა, რომ ეს ხატი გაგვიწევს მეგზურობას - აფხაზეთში ჩვენი დაბრუნებისა და აფხაზებთან შერიგების გზაზე", - განაცხადა ვახტანგ ყოლბაიამ.

სექტემბრის ბოლოს, ხატი თბილისიდან ქუთაისში წააბრძანეს და ღვთისმშობლის ხარების სახელობის ტაძარში დააბრძანეს. 5 ოქტომბერს კი ხატი ქუთაისიდან ზუგდიდის ვლაქერნის ყოვლადწმიდა ღვთისმშობლის ხატის სახელობის ტაძარში გადააბრძანეს. აფხაზეთის ომში დაღუპულთა სულების მოსახსენიებელი პანაშვიდი მამა მალხაზმა (ჭანტურია) გადაიხადა. ხატის გადაბრძანება იმერეთისა და სამეგრელო-ზემო სვანეთის რეგიონებში აფხაზეთის მთავრობის წარმომადგენლობების ორგანიზებით მოეწყო.

აფხაზეთის ა/რ საინფორმაციო უზრუნველყოფის ცენტრის სამეთვალყურეო საბჭოს პირველი სხდომა გაიმართა

31 ოქტომბერს გაიმართა აფხაზეთის ა/რ საინფორმაციო უზრუნველყოფის ცენტრის სამეთვალყურეო საბჭოს პირველი სხდომა შემდეგი შემადგენლობით:

1.ოთარ ჟორდანია - ცხუმ -აფხაზეთის მეცნიერებათა აკადემიის პრეზიდენტი, ისტორიის მეცნიერებათა დოქტორი, პროფესორი ;

2 ოთარ ბენიძე - იუსტიციის სახელმწიფო მრჩეველი, შავი ზღვის საერთაშორისო უნივერსიტეტის პროფესორი ;

3. თემურ ჩილაჩავა - ცხუმ-აფხაზეთის მეცნიერებათა აკადემიის ვიცე-პრეზიდენტი, ფიზიკა- მათემატიკის მეცნიერებათა დოქტორი, სოხუმის სახელმწიფო უნივერსიტეტის პროფესორი, არასამთავრობო ორგანიზაცია - „სამართლიანი, ეფექტიანი რეფორმების" თავმჯდომარე ;

4. ორესტი (ზაურ) ბედია - არასამთავრობო ორგანიზაცია „ქართულ-აფხაზური სახალხო დიპლომატიის საქველმოქმედო ფონდის „ თავმჯდომარე;

5. ირაკლი ბოკუჩავა - არასამთავრობო ორგანიზაცია „საზოგადოებრივი პროგრამების ფონდის" თავმჯდომარე ;

6. მურმან ყოლბაია - არასამთავრობო ორგანიზაცია „სამურზაყანო"- ს თავმჯდომარე ;

7. მერაბ პაპასკირი - „მრავალარხიანი დიპლომატიის ინსტიტუტის" - სამხრეთ კავკასიის ბიუროს აფხაზეთის განყოფილების კოორდინატორი, საქართველოს ძალოვან ვეტერანთა ლიგის წევრი, თადარიგის პოლკოვნიკი ;

8. ნატო მარშანია - არასამთავრობო ორგანიზაცია ქართულ-აფხაზური კავშირ „პირისპირის" წევრი ;

9. თამაზ გოგოხია -არასამთავრობო ორგანიზაცია „ აფხაზეთიდან იძულებით გადაადგილებულ პირთა საერთაშორისო ორგანიზაციის" თავჯდომარის მოადგილე ;

10. ოთარ გუჯეჯიანი - არასამთავრობო ორგანიზაცია „საქართველოს კონფლიქტურ რეგიონებში მცხოვრებ ოჯახთა დახმარების ფონდ „დაბრუნების" წევრი ;

11. ზაზა დოლბაძე - არასამთავრობო ორგანიზაცია „მშვიდობა XXI-ის (სოციალურად, ეთნიკურ-რელიგიურად დაუცველ პირთა და პატიმართა უფლებების დაცვის კავკასიის ფედერაცია) წევრი ;

12. ათანასე ოდიშარია - მედიცინის დოქტორი, პროფესორი, არასამთავრობო ორგანიზაცია - „სამართლიანი, ეფექტიანი რეფორმების" წევრი ;

13. მზისადარ (ლორა) გადილია - არასამთავრობო ორგანიზაცია „საქართველოს ეროვნული სათათბიროს" წევრი, ექიმ-ორგანიზატორი ;

14. ვალერი დადვანი- არასამთავრობო ორგანიზაცია „გზა აფხაზეთისკენ" წევრი ;

15. მერაბ ჯიქია - არასამთავრობო ორგანიზაცია „ გზა აფხაზეთისკენ" წევრი ;

16.დალი ჯონჯუა - აფხაზეთის ა/რ უმაღლესი საბჭოს კონფლიქტის დარეგულირებასთან დაკავშირებული პროცესების ანალიტიკური უზრუნველყოფის დეპარტამენტის თავმჯდომარის მოადგილე ;

17. გურამ მაღლაკელიძე - საქართველოს სახელმწიფო ორგანოებთან ურთიერთობის საკითხებში აფხაზეთის ა/რ უმაღლესი საბჭოს წარმომადგენელი;

18. იგორ კოპალიანი - აფხაზეთის ა/რ მთავრობის იუსტიციის დეპარტამენტის თავმჯდომარე

19. ოთარ გარმელია - აფხაზეთის ა/რ მთავრობის აპარატის უფროსი.

 სხდომაზე განხილულ იქნა საორგანიზაციო საკითხები. სამეთვალყურეო საბჭოს თავმჯდომარედ ერთხმად არჩეულ იქნა ცხუმ-აფხაზეთის მეცნიერებათა აკადემიის ვიცე-პრეზიდენტი, ფიზიკა-მათემატიკის მეცნიერებათა დოქტორი, სოხუმის სახელმწიფო უნივერსიტეტის პროფესორი, არასამთავრობო ორგანიზაცია - „სამართლიანი, ეფექტიანი რეფორმების" თავმჯდომარე თემურ ჩილაჩავა, მდივნად - არასამთავრობო ორგანიზაცია „საქართველოს ეროვნული სათათბიროს" წევრი მზისადარ (ლორა) გადილია.

აფხაზეთის ავტონომიური რესპუბლიკის მთავრობის ინიციატივით და აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტროს ორგანიზებით 1-2 ნოემბერს ქ.ბორჯომში აფხაზეთიდან დევნილთათვის სამედიცინო პროფილაქტიკური გასინჯვები ჩატარდა.

ღონისძიებას აფხაზეთის ავტონომიური რეპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, აფხაზეთის ავტონომიური რესპუბლიკის განათლებისა და კულტურის მინისტრი დიმიტრი ჯაიანი, აღმოსავლეთ საქართველოში აფხაზეთის ავტონომიური რესპუბლიკის მთავრობის წარმომადგენლობის ხელმძღვანელი დემურ კეკელია და ცენტრ „ლანცეტის" გენერალური დირექტორი ფარმან ჯეირანლი დაესწრნენ.

სამედიცინო აქცია აფხაზეთის ჯანმრთელობისა და სოციალური დაცვის მინისტრის ქეთევან ბაკარაძის ხელმძღვანელობით მიმდინარეობდა და მასში

სამინისტროს თანამშრომლებთან ერთად მონაწილეობდნენ სამედიცინო კლინიკა „ლანცეტი"-ს მაღალკვალიფიციური სპეციალისტები, აგრეთვე დევნილთა სამედიცინო დაწესებულებების წამყვანი ექიმი - სპეციალისტები: თერაპევტი, პედიატრი, კარდიოლოგი, ნევროლოგი, გინეკოლოგი, ქირურგი, ოფთალმოლოგი, ოტორინოლარინგოლოგი, ენდოკრინოლოგი, უროლოგი, რევმატოლოგი, ექოსკოპისტი, ექიმი-ლაბორანტი, დერმატოლოგი.

ბენეფიციარებს საჭიროების შესაბამისად ჩაუტარდათ ლაბორატორიული და ინსტუმენტული გამოკვლევები და დაურიგდათ მედიკამენტები.

დღეს საქართველოს პარლამენტის ეროვნულ ბიბლიოთეკის საკონფერენციო დარბაზში აფხაზეთის ავტონომიური რესპუბლიკის მთავრობასა და ეროვნულ ბიბლიოთეკას შორის ურთიერთთანამსრომლობის მემორანდუმის ფარგლებში მრგვალი მაგიდა „შავი ზღვის სანაპიროს ეკოლოგიური ოპტიმიზაციის საკითხები და ამ მიმართულებით ქართველი და აფხაზი კოლოგების თანამშრომლობის გაღრმავების პერსპექტივები" გაიმართა.

ღონისძიებაში მონაწილეობა შავი ზღვის ეკოლოგიის საკითხებზე მომუშავე მეცნიერებმა და არასამთავრობო სექტორის წარმომადგენლებმა მიიღეს.

ღონისძიება აფხაზეთის ავტონომიური რესპუბლიკის სოფლის მეურნეობის, გარემოს დაცვისა და ბუნებივი რესურსების დეპარტამენტის, ცხუმ-აფხაზეთის მეცნიერებათა აკადემიისა და საქართველოს ეკოლოგიურ მეცნიერებათა აკადემიის ეგიდით ჩატარდა.

აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტროსა და კლინიკა „ენმედიცს" შორის გაფორმებული მემორანდუმის ფარგლებში, აკადემიკოს ვ.ივერიელის სახელობის ენდოკრინოლოგია-მეტაბოლოგია-დიეტოლოგიის ცენტრ „ენმედიცში", გენერალური დირექტორის - კობა ბურნაძის ხელმძღვანელობით, 5 თვიდან 2 წლამდე ასაკის დევნილი ბავშვებისთვის მორიგი საქველმოქმედო აქცია გამართა.

ღონისძიება 12:00 საათიდან „ენმედიცის" ვაკის ფილიალში მიმდინარეობდა. ბავშვებს ჩაუტარდათ პედიატრის კონსულტაცია, გადაეცათ კომპანია „ფრისოს" საკვები ფაფა და „ლიბეროს" მიერ მოწოდებული პამპერსები, ასევე, კომპანია „ეგისიდან" მოწოდებული ვიტამინების კრებული.

ბავშვების მშობლებმა და 25-მა სოციალურად დაუცველმა ბენეფიციარებმა გაიარეს სხვადასხვა პროფილის ექიმის კონსულტაცია და ჩაიტარეს  ექოსკოპიური და დიაგნოსტიკური გამოკვლევები. მათ მოემსახურათ მაღალპროფესიონალი ექიმთა ჯგუფი, კერძოდ: ოჯახის ექიმი, კარდიოლოგი, დერმატოლოგი, ნევროლოგი, ენდოკრინოლოგი, გინეკოლოგი, ოფთალმოლოგი, პედიატრი.

ღონისძიებაში მონაწილეობა მიიღეს აფხაზეთის ავტონომიური რესპუბლიკის ჯანმრთელობისა და სოციალური დაცვის მინისტრმა, ქეთევან ბაკარაძემ და სამინისტროს თანამშრომლებმა.

აფხაზეთის ავტონომიური რესპუბლიკის განათლებისა და კულტურის სამინისტროს ორგანიზებით საქართველოს სპორტის დამსახურებული მოღვაწის, საკავშირო კატეგორიის მსაჯის, აფხაზეთის სპორტის დეპარტამენტის ყოფილი თავმჯდომარის მოადგილის, ნოდარ დარახველიძის ხსოვნისადმი მიძღვნილი ნორჩ კალათბურთელთა ტურნირი - „ჩვენ გვიყვარს კალათბურთი" ჩატარდა.

ტურნირი კალათბურთში 29-30 ოქტომბერს საქართველოს ტექნიკური უნივერსიტეტის სპორტული ცენტრის დარბაზში ჩატარდა და მასში მონაწილეობა სოხუმის, თსსუ-ს მართვე-სა და შსს-ს გუნდებმა მიიღეს.

ფინალური შეხვედრები 30 ოქტომბერს გაიმართა. საპრიზო ადგილები გამარჯვებულ გუნდებს შორის შემდეგნაირად განაწილდა:

პირველი ადგილი - შსს-ს გუნდმა დაიკავა, მეორე ადგილზე - სოხუმის გუნდი გავიდა, მესამე და მეოთხე ადგილები „მართვემ" და თსსუ-ს გუნდებმა გაინაწილეს.

ტურნირში მონაწილე გუნდები დაჯილდოვდნენ დიპლომებითა და მედლებით. სპეციალური პრიზები ტურნირის საუკეთესო მოთამაშეებს გადაეცათ.

ფინლურ შეხვედრას საქართველოს კალათბურთის ეროვნული ფედერაციის ვიცე - პრეზიდენტი კახა შენგელია, აფხაზეთის ავტონომიური რესპუბლიკის განათლებისა და კულტურის სამინისტროს თანამშრომლები და ნოდარ დარახველიძის ოჯახის წევრები დაესწრნენ.

აფხაზეთის ავტონომიური რესპუბლიკის მთავრობის ორგანიზებით, აფხაზეთის ჯანმრთელობისა და სოციალური დაცვის სამინისტროს, ორგანიზაცია „საზოგადოებრივი აზრის", საქველმოქმედო ფონდების - „სიცოცხლის ხის" და „ქვიშის საათის" ინიციატივითა და დახმარებით, სამეგრელოს რეგიონში მცხოვრებ შეზღუდული შესაძლებლობის მქონე დევნილებს ინვალიდის ეტლები გადაეცათ.

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ  და აფხაზეთის ჯანდაცვის მინისტრმა ქეთევან ბაკარაძემ აფხაზეთიდან დევნილი შეზღუდული შესაძლებლობის მქონე გენო შონგირაძე, ლონდა ჯობავა (მამფორია) და ზვიად რუხაია პირადად მოინახულეს და ინვალიდის ეტლები გადასცეს. ეტლების გადაცემის პროცესში მონაწილეობა მიიღეს სამეგრელო-ზემო სვანეთის რეგიონში აფხაზეთის ავტონომიური რესპუბლიკის მთავრობის წარმომადგენლობის ხელმძღვანელმა ოთარ გოგოხიამ და უწყების სხვა თანამშრომლებმა.

ავსტრიული წარმოების მექანიკური ეტლები ორგანიზაცია „საზოგადოებრივი აზრის", საქველმოქმედო ფონდების - „სიცოცხლის ხის" და „ქვიშის საათის" მხარდაჭერით საქართველოს მასშტაბით 30-მდე დევნილ, შეზღუდული შესაძლებლობის პირს ეტაპობრივად დაურიგდება.