აფხაზეთის ავტონომიური რესპუბლიკის მთავრობა

Аҧснытәи автономтә республика аиҳабыра

სიახლეები

ვახტანგ ყოლბაიამ აფხაზეთის ომში დაღუპული მეომრების მშობლების ნაწილთან შეხვედრა გამართა

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია აფხაზეთის ომში დაღუპული მეომრების მშობლების ჯგუფს შეხვდა.

შეხვედრაზე წამოწეული იქნა აფხაზეთის ომში დაღუპულთა ოჯახებთან მიმართებაში სოციალური შეღავათებისა და პენსიების მოწესრიგების საკითხები.

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა მათ პრობლემების მოგვარების პროცესში აქტიურად ჩართვას და შესაბამის სახელმწიფო უწყებებთან შუამდგომლობას შეპირდა.

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია უგზო-უკვლოდ დაკარგულ პირთა საერთაშორისო დღის აღსანიშნავად გამართულ ღონისძიებას დაესწრო

30 აგვისტოს, უგზო-უკვლოდ დაკარგულ პირთა საერთაშორისო დღისადმი მიძღვნილი ღონისძიებები თბილისში, გორში, ქუთაისში, ზუგდიდსა და ბათუმში ჩატარდა.

თბილისში, გამოფენების ცენტრ „ექსპო ჯორჯიაში“ უგზო-უკვლოდ დაკარგულ პირთა საერთაშორისო დღის აღსანიშნავად გამართულ ღონისძიებაზე საზოგადოების წინაშე სიტყვით გამოვიდნენ მთავრობის წარმომადგენლები, მათ შორის აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებებლი ვახტანგ ყოლბაია.

ამავე ცენტრში უგზო-უკვლოდ დაკარგულ მებრძოლთა საინფორმაციო ვებ-გვერდ „ხსოვნის" პრეზენტაცია მოეწყო და დამსწრე საზოგადოება დაკარგულ მებრძოლთა მოძიების პროექტის მიმდინარეობას გაეცნო.

მოგვიანებით, აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა და მთავრობის წარმომადგენლებმა პატივი მიაგეს დაღუპულთა ხსოვნას და გვირგვინით შეამკეს ვაშლიჯვრის ძმათა სასაფლაო. ძმათა სასაფლაოზე აფხაზეთის ხალხური სიმღერის ჯგუფის „დიოსკურიას“ მიერ საგალობლები ქართულ და აფხაზურ ენებზე შესრულდა.

ღონისძიება უგზო-უკვლოდ დაკარგულ პირთა მოძიების ფონდის „მოლოდინი“, წამების მსხვერპლთა ფსიქოსოციალური და სამედიცინო რეაბილიტაციის საქართველოს ცენტრისა და წითელი ჯვრის საერთაშორისო კომიტეტის ორგანიზებითა და აფხაზეთის ავტონომიური რესპუბლიკის მთავრობის მხარდაჭერით ჩატარდა.

აფხაზეთიდან დევნილი და გალის რაიონში მცხოვრები ბავშვები ესპანეთიდან საქართველოში დაბრუნდნენ

აფხაზეთის ავტონომიური რესპუბლიკის მთავრობისა და ინტეგრაციისა და სოლიდარობის ფონდი „FINSOL"-ის ერთობლივი პროექტის ფარგლებში, გალის რაიონის სკოლებისა და აფხაზეთიდან იძულებით გადაადგილებული სოციალურად დაუცველი ოჯახების ბავშვებმა საზაფხულო არდადეგები ესპანეთის სამეფოში გაატარეს.

მოზარდებს ესპანურ მოხალისე ოჯახებში დასვენებასთან ერთად 2 თვის განმავლობაში ესპანელი ხალხის კულტურის გაზიარების, ესპანური ენის შესწავლის, ტოლერანტული, მშვიდობიანი და ჯანსაღი წესით ცხოვრების შესაძლებლობები მიეცათ.

დევნილი მოზარდები 29 აგვისტოს დაბრუნდნენ საქართველოში. თბილისის საერთაშორისო აეროპორტში მათ აფხაზეთის დევნილთა საქმეების დეპარტამენტისა და გალის რაიონის საგანმანათლებლო რესურსცენტრის წარმომადგენლები დახვდნენ.

აფხაზეთის ავტონომიური რესპუბლიკის მთავრობა და ფონდი „FINSOL"-ი 2008 წლიდან თანამშრომლობს. ხელშეკრულების თანახმად, აფხაზეთში მცხოვრები და იძულებით გადაადგილებული ოჯახების ბავშვები საზაფხულო არდადეგებს ყოველწლიურად ესპანეთში ატარებენ.

საქველმოქმედო აქცია დევნილი ბავშვებისათვის

აფხაზეთის ავტონომიური რესპუბლიკის მთავრობის ინიციატივითა და კინოთეატრ „რუსთაველი"-ს მხარდაჭერით დევნილი ბავშვებისათვის, მარიამობის ბრწყინვალე დღესასწაულთან დაკავშირებით საქველმოქმედო აქცია მოეწყო.

25 დევნილი მოზარდი 3D ფორმატში გადაღებული ანიმაციური ფილმის „სმურფები 2" ჩვენებას დაესწრო. ბავშვებს ფონდი „კეთილი სამარინელი საქართველოში" მიერ მოწოდებული საჩუქრებიც დაურიგდათ.

ღონისძიება აფხაზეთის ავტონომიური რესპუბლიკის განათლებისა და კულტურის სამინისტროს ორგანიზებით ჩატარდა.

აფხაზეთის ავტონომიური რესპუბლიკის მთავრობა მარიამობის ბრწყინვალე დღესასწაულს გილოცავთ!

დღეს მართლმადიდებლური ეკლესია მარიამობის ბრწყინვალე დღესასწაულს ზეიმობს – მიძინებას ყოვლადწმიდისა დედუფლისა ჩვენისა ღმრთისმშობელისა და მარადის ქალწულისა მარიამისა.

წმინდა მარიამ ღვთისმშობლის მადლი შეეწიოს სრულიად საქართველოს!

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია აფხაზ მრავალშვილიან დედას შეხვდა

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია აფხაზ მრავალშვილიან დედას ნატალია მარშანიას შეხვდა.

ნატალია მარშანია ქართველ მეუღლესა და 6 შვილთან ერთად კოჯორში ცხოვრობს. ოჯახი შვილებს ქართულ–აფხაზური ტრადიციებით და ცნობიერებით ზრდის.

ნატალია მარშანია ვახტანგ ყოლბაიას პრობლემების შესახებ ესაუბრა, რომელიც ძირითადად სოციალურ პრობლემატიკას უკავშირდება. აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა აფხაზ ქალბატონს პრობლემების მოგვარებაში მხარდაჭერა აღუთქვა.

აფხაზეთის მთავრობის თავმჯდომარის მოვალეობის შემსრულებლის ვახტანგ ყოლბაიას ინტერვიუ „Кавказский узел"-ის ჟურნალისტ ბესლან კმუზოვთან

ვაზტანგ ყოლბაია: „ ... ურთიერთობა აუცილებელია, რადგან მათი (აფხაზების) მონაწილეობის გარეშე კონფლიქტის მოგვარებას არ აქვს არანაირი საფუძველი. მაშინაც კი, თუ კი „ძლიერნი ამა ქვეყნისანი" მოილაპარაკებენ, ამ პროცესში აფხაზების მონაწილეობის გარეშე არაფერი გამოგვივა".

http://www.kavkaz-uzel.ru/articles/228410/

აფხაზეთის სიმღერისა და ცეკვის სახელმწიფო ანსამბლი და ახლგაზრდული კაპელა კულტურის საერთაშორისო ფესტივალზე გაემგზავრა

აფხაზეთს ავტონომიური რესპუბლიკის მთავრობის მხარდაჭერით აფხაზეთის სიმღერისა და ცეკვის სახელმწიფო ანსამბლი და ახლგაზრდული კაპელა საბერძნეთის ქალაქ ათენში კულტურის მესამე საერთაშორისო ფესტივალზე გაემგზავრა.

კულტურის საერთაშორისო ფესტივალი 26 აგვისტოს გაიხსნება და 2 სექტემბრამდე გასტანს. აფხაზეთის სიმღერისა და ცეკვის სახელმწიფო ანსამბლი და ახლგაზრდული კაპელა მასში მონაწილეობას პირველად მიიღებს და მაყურებლის წინაშე ქართულ-აფხაზური სემღერებითა და ცეკვებით წარსდგება.

ფესტივალში ასევე მონაწილეობას იღებენ ესპანეთის, სერბეთის, ჩინეთის, ინდოეთის, იორდანიის, ერაყის, პოლონეთის, მექსიკის, შვედეთის ინდონეზიის და შვეიცარიის წარმომადგენლები.

აფხაზეთიდან დევნილი ბავშვები ათენის მერიის საბავშვო ბანაკში დაისვენებენ

აფხაზეთის ავტონომიური რესპუბლიკის მთავრობის ორგანიზებითა და ათენის მერიის მხარდაჭერით, აფხაზეთიდან დევნილი სოციალურად დაუცველი 40 ბავშვი საბერძნეთში, ატიკის ნახევარკუნძულზე დასასვენებლად გაემგზავრა.

10-დან 12 წლამდე ასაკის მოზარდები საბერძნეთის რესპუბლიკის ხალკიდიკის მუნიციპალიტეტის დაბა სკიონში არსებულ საერთაშორისო საზაფხულო ბანაკში ორი კვირის განმავლობაში დაისვენებენ.

ბავშვებისთვის სპეციალური საგანმანათლებლო პროგრამები ჩატარდება, რომლის ფარგლებში მათთვის სხვადასხვა სახის ექსკურსიები მოეწყობა. დევნილი მოზარდები საბერძნეთის ისტორიულ და ღირსშესანიშნავ ადგილებს დაათვალიერებენ.

მოზარდებს საბერძნეთში აფხაზეთის ავტონომიური რესპუბლიკის მთავრობის წევრებმა გააცილეს. აფხაზეთიდან დევნილი მოზარდები საქართველოში 4 სექტემბერს დაბრუნდებიან.

 

ვახტანგ ყოლბაია ბათუმის მკვიდრის, აფხაზი ქალბატონის, მოსკოვის ლომონოსოვის სახელობის სახელმწიფო უნივერსიტეტის პროფესორის, ფერიდე აცამბასადმი მიძღვნილ, ნათელა დუმბაძის წიგნის „ფერიდე“-ს პრეზენტაციას დაესწრო

აფხაზეთისა ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტაბგ ყოლბაია ნათელა დუმბაძის წიგნის „ფერიდეს" პრეზენტაციას დაესწრო, რომელიც 22 აგვისტოს ბათუმის ხელოვნების ცენტრში გაიმართა.

საქართველოში სოროპტიმისტული მოძრაობის დამფუძნებლის, „ქართულ-აფხაზური საგის" პირველი პრეზიდენტის ნათელა დუმბაძის წიგნი „ფერიდე" ბათუმის მკვიდრ, აფხაზ ქალბატონს, მოსკოვის ლომონოსოვის სახელობის სახელმწიფო უნივერსიტეტის პროფესორს, ფერიდე აცამბას მიეძღვნა. ქალბატონ ფერიდეს უდიდესი წვლილი შეაქვს ქართველთა და აფხაზთა შორის ურთიერთობების დარეგულირებაში. გამომსვლელბმა ხაზი გაუსვეს ქალბატონ ფერიდეს დაუზოგავ ენერგიას, ძალისხმევას, რომელსაც ის ანდომებს ქართველებსა და აფხაზებს შორის ომამდელი ურთიერთობის დაბრუნებას.

აღნიშნულ ღონისძიებას ესწრებოდნენ: საქართველოს მეცნიერებათა ეროვნული აკადემიის პრეზიდენთი ოთარ კვესიტაძე, აჭარის უმაღლესი საბჭოს თავმჯდომარე - ავთანდილ ბერიძე, აჭარის განათლების, კულტურტისა და სპორტის მინისტრი გიორგი თავამაიშვილი, აფხაზეთის ეროვნული აკადემიის პრეზიდენტი ზურაბ ლომთათიძე, საქართველოს კოლტურისა და ძეგლთა დაცვის სამინისტროს, რეინტეგრაციის საკითხებში საქართველოს სახელმწიფო მინისტრის აპარატის, აჭარის ავტონომიური რესპუბლიკის საკანონმდებლო და აღმასრულებელი ხელისუფლების წარმომადგენლები, კულტურისა და ხელოვნების თვალსაჩინო მოღვაწეები, აჭარაში მცხოვრები ეთნიკური აფხაზების წარმომადგენლები.

აფხაზეთის საჯარო სკოლის მოსწავლეები და მოზარდები გალის რაიონიდან ქობულეთში „საზაფხულო ბანაკში“ გაემგზავრნენ

აფხაზეთის ავტონომიური რესპუბლიკის მთავრობის მხარდაჭერით, აფხაზეთის ავტონომიური რესპუბლიკის განათლებისა და კულტურის სამინისტროს პროექტის „საზაფხულო ბანაკი" ფარგლებში აფხაზეთიდან დევნილი 39 მოსწავლე აფხაზეთის საჯარო სკოლებიდან და მოზარდები გალის რაიონიდან  ქობულეთში გაემგზავრნენ.

ბავშვები ქობულეთში დაისვენებენ და მიიღებენ საგანმანათლებლო პროგრამით გათვალისწინებულ სათანადო ინფორმაციას. პროექტის ფარგლებში ასევე დაგეგმილია ექსკურსიები, ადგილობრივი ღირსშესანიშნაობებისა და ქალაქ ბათუმის დათვალიერება, ინტელექტუალურ აქტივობები, სპორტულ-გამაჯანსაღებელ შეჯიბრებები.

პროექტი წარმოადგენს აფხაზეთის ავტონომიური რესპუბლიკის განათლებისა და კულტურის სამინისტროს სამშვიდობო სტრატეგიის ნაწილს, რაც გულისხმობს სამშვიდობო განათლების ტრენინგ-სემინარების ფორმატში განხილვასა და სწავლებას. მისი მიზანია აფხაზეთიდან დევნილ მოსწავლეებში ტოლერანტობის განვითარება, ურთიერთობის კულტურის სწავლება, ემოციების მართვა, ჯანსაღი ცხოვრების წესის პოპულარიზაცია.

აფხაზეთის ავტონომიური რესპუბლიკის განათლებისა და კულტურის სამინისტრო აცხადებს კონკურსს

სამინისტროს მმართველობის სფეროში შემავალი პროფესიული სახელმწიფო თეატრების სამხატვრო ხელმძღვანელების კანდიდატთა შესარჩევად.

კონკურსი ცხადდება შემდეგ პროფესიულ სახელმწიფო თეატრებში: სოხუმის კ.გამსახურდიას სახელობის სახელმწიფო დრამატული თეატრი და აფხაზეთის მოზარდ მაყურებელთა სახელმწიფო თეატრი „თეთრი ტალღა".

კანდიდატთა წარდგენის უფლება აქვთ თეატრალური საქმიანობით დაკავებულ იურიდიულ პირებს (ორგანიზაციებს) და თეატრალური საქმიანობით დაკავებული პირებისგან შემდგარ საინიციატივო ჯგუფებს.

აფხაზეთის ავტონომიური რესპუბლიკის განათლებისა და კულტურის სამინისტროსთან არსებული სახელმწიფო პროფესიული თეატრების სამხატვრო ხელმძღვანელობის კანდიდატთა შესარჩევი სარეკომენდაციო საბჭო წარმოდგენილი დოკუმენტაციის საფუძველზე შეარჩევს შესაბამის კანდიდატებს და დასანიშნად წარუდგენს მინისტრს.

საკონკურსო დოკუმენტაცია მიიღება აფხაზეთის ავტონომიური რესპუბლიკის განათლებისა და კულტურის სამინისტროში 2013 წლის 23 აგვისტოს ჩათვლით, დღის 12:00 სთ-მდე.

დამატებითი ინფორმაციისთვის მიმართეთ:

თბილისი, უზნაძის ქუჩა N68, აფხაზეთის ავტონომიური რესპუბლიკის განათლებისა და კულტურის სამინისტრო.

ტელ.: 2 95 18 49

აფხაზეთის ავტონომიური რესპუბლიკის მთავრობისა და უმაღლესი საბჭოს წევრებმა გმირთა მემორიალი გვირგვინით შეამკეს

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ, აფხაზეთის ავტონომიური რესპუბლიკის მთავრობისა და უმაღლესი  საბჭოს წევრებმა 1992-1993 წლებში აფხაზეთის ტერიტორიაზე საომარი მოქმედებების დაწყების 21 წლისთავთან დაკავშირებით, საქართველოს ტერიტორიული მთლიანობისათვის დაღუპულ გმირთა მემორიალი გვირგვინით შეამკეს და პატივი მიაგეს მათ ხსოვნას. ასევე გმირთა მოედანზე იმყოფებოდნენ თავდაცვის მინისტრის მოადგილე ზაზა ბროლაძე და შეიარაღებული ძალების გაერთიანებული შტაბის უფროსის პირველი მოადგილე, ბრიგადის გენერალი ვახტანგ კაპანაძე.

დღესვე, აფხაზეთის ავტონომიური რესპუბლიკის მთავრობისა და უმაღლესი საბჭოს წევრებმა გვირგვინით შეამკეს ვაშლიჯვრის ძმათა სასაფლაო „გმირთა სავანე" და დაათველიერეს უგზოუკვლოდ დაკარგულ და დაღუპულ მებრძოლთა ხსოვნის მუზეუმი „მოლოდინი". მათ ასევე პატივი მიაგეს საბურთალოს სასაფლაოზე დაკრძალულ აფხაზეთიდან დევნილ საზოგადო მოღვაწეთა და დაღუპულ მეომართა ხსოვნას და გვირგვინებით შეამკეს მათი საფლავები.

1992 წლის 14 აგვისტოს აფხაზეთში საკომუნიკაციო ინფრასტრუქტურის უსაფრთხოების დაცვის მიზნით აფხაზეთის ხელმძღვანელობასთან შეთანხმების შემდეგ, საქართველოს შინაგანი ჯარებისა და სამხედროების შეზღუდული კონტიგენტი აფხაზეთის ტერიტორიაზე გადაადგილდა. პირველი შეტაკებები ოჩამჩირისა და გულრიფშის რაიონებში მოხდა. ასე დაიწყო ძმათა მკვლელი ომი აფხაზეთში, რომელიც 13 თვე და 13 დღე გაგრძელდა, რასაც ათიათასობით მშვიდობიანი მოქალაქე და ჯარისკაცი შეეწირა, ხოლო სამასი ათასამდე ადამიანი დევნილი გახდა.

აფხაზეთის ავტონომიური რესპუბლიკის მთავრობამ და აფხაზეთის ავტონომიური რესპუბლიკის უმაღლესმა საბჭომ გმირთა მემორიალი გვირგვინით შეამკეს

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ, აფხაზეთის ავტონომიური რესპუბლიკის მთავრობისა და აფხაზეთის უმაღლესი საბჭოს წარმომადგენლებმა მუხათგვერდის ძმათა სასაფლაოზე 2008 წლის აგვისტოს ომში დაღუპულ გმირთა ხსოვნას პატივი მოაგეს და გმირთა მემორიალი გვირგვინით შეამკეს.

აფხაზეთიდან დევნილ სოციალურად დაუცველ მოზარდებს თბილისის ზოოპარკმა უმასპინძლა

აფხაზეთის ავტონომიური რესპუბლიკის მთავრობისა და აფხაზეთის განათლებისა და კულტურის სამინისტროს ორგანიზებით აფხაზეთიდან დევნილ სოციალურად დაუცველ 40-მდე მოზარდს თბილისის ზოოპარკმა უმასპინძლა.

მოზარდებმა ზოოპარკის ბინადარი ცხოველები და ფრინველები დაათვალიერეს, შეისწავლეს სხვადასხვა სახეობა, მათი გავრცელების არეალები, ქცევის თავისებურებები. ბავშვები გაეცნენ ზოოპარკის მობინადრეების ბუნებაში ქცევის მარტივ წესებს, დააკვირდნენ ცხოველთა კვების პროცესს.

მოზარდები ასევე ზოოპარკის ტერიტორიაზე არსებულ სხვადასხვა ატრაქციონებზე გაერთნენ.

დღის ბოლოს აფხაზეთიდან დევნილ ბავშვებს ზოოპარკის ადმინისტრაციისაგან სამახსოვრო საჩუქრები დაურიგდათ.