აფხაზეთის ავტონომიური რესპუბლიკის მთავრობა

Аҧснытәи автономтә республика аиҳабыра

ახალი ამბები
გერმანული ენის უფასო კურსი

იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატი აცხადებს მიღებას გერმანული ენის უფასო კურსზე.

გერმანული ენის უფასო კურსი ხორციელდება გერმანიის საერთაშორისო თანამშრომლობის საზოგადოების (GIZ) გლობალური პროგრამის „მიგრაცია და დიასპორის“ მხარდაჭერით, რომლის ფარგლებშიც გერმანიიდან მოწვეული სპეციალისტი კურსში მონაწილე საზოგადოებას ცოდნის გაზიარებისა და გაღრმავების მიზნით შეასწავლის გერმანულ ენას, გააცნობს გერმანულ კულტურას და მიაწვდის ინფორმაციას გერმანიაში არსებული სასწავლო პროგრამების, სტიპენდიებისა და პირობების შესახებ.

კურსში მონაწილეობის მიღება შეუძლია ნებისმიერ დაინტერესებულ პირს.
კურსის მონაწილეები უზრუნველყოფილ იქნებიან სასწავლო მასალით.

კურსზე სწავლება დაიწყება 10 აგვისტოს.
ხანგრძლივობა - 1 თვე.

რეგისტრაციის ბოლო ვადა - 24 ივლისი.

რეგისტრაციისთვის ეწვიეთ ბმულს:  გაიარე რეგისტრაცია

წიგნის "ოკუპირებული მემკვიდრეობა" პრეზენტაცია.

სიმონ ჯანაშიას სახელობის საქართველოს ეროვნული მუზეუმის ეზოში გაიმართა რელიგიის საკითხთა სახელმწიფო სააგენტოს მიერ მომზადებული გამოცემის - „ოკუპირებული მემკვიდრეობა“ პრეზენტაცია, რომელსაც ესწრებოდნენ რელიგიური ორგანიზაციების, საქართველოს ხელისუფლების, აფხაზეთის ავტონომიური რესპუბლიკის მთავრობის, დიპლომატიური კორპუსის, აკადემიური წრეებისა და ფართო საზოგადოების წარმომადგენლები.

გამოცემაში დამოუკიდებელი საქართველოს ისტორიაში პირველად, სრულად არის ასახული საქართველოს ოკუპირებულ ტერიტორიებზე, აფხაზეთის ავტონომიურ რესპუბლიკასა და ცხინვალის რეგიონში, არსებული მართმადიდებლური და რელიგიური უმცირესობების ისტორიულ-კულტურული ძეგლები (საარქივო და ახალი ფოტო მასალა).

მოწვეულ სტუმრებს სიტყვით მიმართეს იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრმა დავით ფაცაცია. პარლამენტის თავმჯდომარის მოადგილემ გიორგი ვოლსკიმ, პრემიერ-მინისტრის სპეციალურმა წარმომადგენელმა რუსეთთან ურთიერთობის საკითხებში ზურაბ აბაშიძემ.

„ოკუპირებულ აფხაზეთის ტერიტორიაზე მიმდინარეობს მიზანმიმართული რუსიფიკაცია, იქ არსებულ კულტურულ მემკვიდრეობას სერიოზული საფრთხე ემუქრება, რაც ოკუპირებულ ტერიტორიაზე არსებული უნიკალური ძეგლებისათვის პირვანდელი იერსახისა და არსის განადგურებაში გამოიხატება.

გამოცემა „ოკუპირებული მემკვიდრეობა“ წარმოადგენს საერთო კულტურული მემკვიდრეობის დაცვის სფეროში ერთ-ერთ ძლიერ ბერკეტს რუსეთის ფედერაციის საოკუპაციო რეჟიმის წინააღმდეგ. მადლობას ვუხდი რელიგიის საკითხთა სახელმწიფო სააგენტოს და ყველა იმ ორგანიზაციას, თუ პირს, რომლებმაც მონაწილეობა მიიღეს ამ მნიშვნელოვანი გამოცემის მომზადებასა და სრულყოფაში.“ - განაცხადა დავით ფაცაციამ.

გამოფენა - „ბრიტანეთი და საქართველო"

იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრი დავით ფაცაცია, თავის პირველ მოადგილესთან, ბელა კოპალიანთან ერთად, ხელნაწერთა ეროვნულ ცენტრში, გამოფენას „ბრიტანეთი და საქართველო“ დაესწრო.

გამოფენა ხელნაწერთა ეროვნული ცენტრის საიუბილეო ღონისძიებების ფარგლებში მოეწყო. ღონისძიებას ესწრებოდნენ, აფხაზეთის ავტონომიური რესპუბლიკის სულიერების ცენტრისა და ფონდის „დიასპორების ალიანსი საქართველოსთვის“ წარმომადგენლები, კალიგრაფები - ლეილა ბაღბაია, დავით მაისურაძე, გიორგი გორგიაშვილი და ნინი იკაშვილი, კალიგრაფიის ონლაინ-გაკვეთილების აფხაზეთიდან დევნილი მოსწავლეები. ZOOM პლატფორმის საშუალებით შეხვედრაში, ასევე, მონაწილეიბდნენ აფხაზეთში მცხოვრები ახალგაზრდები.

იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატსა და ხელნაწერთა ეროვნულ ცენტრს შორის ურთიერთანაშრომლობის მემორანდუმი გაფორმდა, რომელიც ითვალისწინებს აფხაზეთის მოსახლეობის მეტი ჩართულობის უზრუნველყოფის მიზნით სხვადასხვა საგანმანათლებლო და სემცნიერო პროექტების ერთობლივად განხორციელებას.

შეხვედრის დასასრულს, ხელნაწერთა ეროვნული ცენტრის დირექტორმა, ზაზა აბაშიძემ დავით ფაცაციას და ბელა კოპალიანს ქართული ხელნაწერი მემკვიდრეობისა და კალიგრაფიის ხელოვნების პოპულარიზაციის საქმეში შეტანილი წვლილისათვის მადლობის სიგელები გადასცა.

პროექტის „ევროპული არდადეგები“ გახსნითი ღონისძიება

იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის დავით ფაცაციამ მონაწილეობა მიიღო საგურამოში, ილია ჭავჭავაძის სახლ-მუზეუმში, აფხაზეთის კულტურის, სპორტის და ახალგაზრდულ საქმეთა სააგენტოს და ნატოსა და ევროკავშირის შესახებ საინფორმაციო ცენტრის ერთობლივი პროექტის „ევროპული არდადეგების“ გახსნითი ღონისძიებაში.

ღონისძიებაზე ახალგაზრდებს მისასალმებელი სიტყვით მიმართეს იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრმა დავით ფაცაციამ, აფხაზეთის კულტურის, სპორტისა და ახალგაზრდულ საქმეთა სააგენტოს დირექტორმა ლიკა კვარაცხელიამ და საგარეო საქმეთა სამინისტროს ნატოსა და ევროკავშირის შესახებ საინფორმაციო ცენტრის დირექტორმა თამარა წულეისკირმა.

პროექტის ფარგლებში მოწვეულმა ექსპერტმა, ივანე ჯავახიშვილის თბილისის სახელმწიფო უნივერსიტეტის პროფესორმა, ფილოლოგმა ლევან გიგინეიშვილმა აფხაზეთიდან დევნილ ახალგაზრდებს საქართველოს ევროპულ და ევროატლანტიკურ სტრუქტურებში ინტეგრაციის საკითხებზე ერთდღიანი სემინარი ჩაუტარა. სემინარზე ყურადღება გამახვილდა ისეთ თემებზე როგორიცაა, ადამიანის უფლებები, ტოლერანტობა და ქართული კულტურა - როგორც საერთო ევროპული ტრადიციისა და ღირებულებების ნაწილი.

პროექტის პირველი სემინარი აფხაზეთის ავტონომიური რესპუბლიკიდან იძულებით გადაადგილებულ პირთა-დევნილთა სამინისტროს აღმოსავლეთ საქართველოს ტერიტორიული ორგანოს მხარდაჭერით გაიმართა და მასში მონაწილეობდნენ თბილისში მცხოვრები დევნილი ახალგაზრდები. ღონისძიებას აღმოსავლეთ საქართველოს ტერიტორიული ორგანოს ხელმძღვანელი დავით ძალამიძე ესწრებოდა.

პროექტი „ევროპული არდადეგები“ მეორე წელია იმართება და მისი მიზანია ანტიდასავლური პროპაგანდის, მითების და სტერეოტიპების დაძლევა და ნდობის აღდგენის პროცესის ხელშეწყობა.

„საქართველოს ევროპული და ევროატლანტიკური ინტეგრაცია უზრუნველყოფს დემოკრატიის უფრო მაღალ სტანდარტებს, მშვიდობას და კეთილდღეობას, როგორც ჩვენს ქვეყანაში, ისე მთლიანად რეგიონში. აღნიშნულ პროცესებში ახალგაზრდების აქტიური ჩართულობისათვის მნიშვნელოვანია მათთვის სწორი ინფორმაციის მიწოდება და შესაბამის ცოდნით აღჭურვა, რადგან სწორედ ისინი წარმოადგენენ სამომავლოდ იმ ძლიერ ძალას, რომლებმაც აქტიურად უნდა მიიღონ მონაწილეობა ქვეყნის განვითარებისა და გაერთიანების პროცესებში.

პროექტი „ევროპული არდადეგები“ არის ერთერთი ეფექტური საშუალება, ახალგაზრდებმა გაიღრმავონ ცოდნა დასავლური ინტეგრაციის უპირატესობებზე, თუ რამდენად მნიშვნელოვანია ჩვენი ქვეყნისთვის ევროპულ და ევროატლანტიკურ სტრუქტურებში ინტეგრაცია, ასევე, ადამიანის უფლებებზე, ტოლერანტობასა და ქართულ კულტურაზე, როგორც ევროპული ტრადიციებისა და ღირებულებების ნაწილზე.“ - განაცხადა დავით ფაცაციამ

შეხვედრა ახალგაზრდებთან

ქ. ბათუმში იუსტიციისა და სამოქალაქო ინეტრგაციის საკითხებში აფხაზეთის ავტონომიური რესპუბლიკის მინისტრმა დავით ფაცაციამ, მონაწილეობა მიიღო არასამთავრობო ორგანიზაცია – „აფხაზთა და ქართველთა ერთობის საზოგადოება „ერთობა ხვალისთვის“ და იუსტიციისა და სამოქალაქო ინეტრგაციის საკითხებში აფხაზეთის ავტონომიური რესპუბლიკის მინისტრის აპარატის ორგანიზებით სხვადასხვა უნივერსიტეტების თვითმართველობების წარმომადგენლებთან და აფხაზ ახალგაზრდებთან გამართულ შეხვედრაში.

შეხვედრის მონაწილეებმა იმსჯელეს კონფლიქტის მშვიდობიანად მოგვარების გზებზე, ქართულ-აფხაზური მეგობრული, ისტორიული ურთიერთობების აღდგენასა და შერიგების პროცესების ხელშეწყობაზე.

 „საინტერესო და ნაყოფიერი შეხვედრა გვქონდა სხვადასხვა უნივერსიტეტების თვითმართველობების წარმომადგენლებთან და აფხაზ ახალგაზრდებთან.

ახალგაზრდებთან ერთად, ვიმსჯელეთ საქართველოს ერთიანობის, თავისუფლებისა და განვითარებისთვის ყველაზე მნიშნელოვან საკითხებზე - კონფლიქტის მშვიდობიანად მოგვარების გზებზე, ქართულ-აფხაზური მეგობრული, ისტორიული ურთიერთობების აღდგენასა და შერიგების პროცესების ხელშეწყობაზე.

შეხვედრაზე, ასევე, განვიხილეთ ახალგაზრდების საინტერესო ინიციატივები და მათ გამოხატეს სურვილი მეტი აქტიურობით ჩაერთონ სამშვიდობო პროცესების ხელშემწყობ ღონისძიებებში.

მნიშვნელოვანია მსგავს შეხვედრებში აფხაზი და ქართველი, განსაკუთრებით კი ოკუპირებული აფხაზეთის ტერიტორიაზე მცხოვრები ჩვენი აფხაზი ახალგაზრდების მონაწილეობა, რადგან სწორედ ისინი წარმოადგენენ ერთ-ერთ ძლიერ ბერკეტს, სახალხო დიპლომატიის გზით იმ ბარიერების დასანგრევად, რომლის აღმართვასაც რამდენიმე ათწლეულია მტრულად განწყობილი ძალები ცდილობენ.“ - განაცხადა დავით ფაცაციამ.

შეხვედრების მიზანია ოკუპაციის შედეგად დაშორიშორებულ საზოგადოებებს შორის ნდობის აღდგენის და მისი მოგვარების გზების მოძიების პროცესში ახალგაზრდების მეტი ჩართულობის ხელშეწყობა.

სტაჟიორებისთვის სერტიფიკატების გადაცემა
იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატში „საჯარო დაწესებულებაში სტაჟირების გავლის წესისა და პირობების შესახებ“ სახელმწიფო პროგრამა განხორციელდა.
 
სახელმწიფო პროგრამის ფარგლებში სხვადასხვა უმაღლესი სასწავლებლის სტუდენტებმა, მაგისტრანტებმა და დოქტორანტებმა 6 თვის განმავლობაში გაიარეს სტაჟირება იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატის იუსტიციის დეპარტამენტის ადამიანის უფლებათა დაცვის სამმართველოში, რომლის დასრულების შემდგომ სტაჟირება გავლილ პირებს, დავით ფაცაციამ სერტიფიკატები და სიმბოლური საჩუქრები გადასცა.
 
იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრმა სტაჟიორებს მადლობა გადაუხადა სტაჟირების 6 თვიანი პროგრამის განმავლობაში მინისტრის აპარატის საქმიანობაში შეტანილი წვლილისთვის და იმედი გამოთქვა, რომ უწყებაში შეძენილი ცოდნა და პრაქტიკული უნარები მნიშვნელოვან გავლენას მოახდენს მათ სამომავლო კარიერულ არჩევანსა და პროფესიულ საქმიანობაზე.
 
იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატი სტაჟირებას ყოველწლიურად ახორციელებს და მისი მიზანია მაღალკვალიფიციური პერსონალის მომზადება, სტაჟიორების პროფესიული ზრდა, პრაქტიკული უნარ-ჩვევების გამომუშავება და განვითარება.
ლტოლვილთა საერთაშორისო დღე
,,20 ივნისი ლტოლვილთა საერთაშორისო დღეა,
 
ჩვენი ქვეყნისთვის, რომლის ტერიტორიების 20% ოკუპირებულია და გვყავს აფხაზეთიდან და ცხინვალის რეგიონიდან დევნილი ასეულობით ათასი ადამიანი, ამ თარიღს განსაკუთრებული მნიშვნელობა აქვს.
 
რუსეთის ფედერაციის მიერ პროვოცირებული შეიარაღებული კონფლიქტის შედეგად განახორციელდა აფხაზეთის ავტონომიურ რესპუბლიკაში მცხოვრები ქართველების წმენდა, რომელსაც შეეწირა შვიდი ათასზე მეტი მშვიდობიანი მოქალაქე, უგზო-უკვლოდ დაიკარგა ათასზე მეტი, დაიჭრა და დასახიჩრდა ათი ათასამდე ადამიანი, ხოლო ასეულობით ათასი მოქალაქე იძულებული გახდა დაეტოვებინა საკუთარი საცხოვრებელი ადგილი.
 
27 წლის შემდგომაც ოკუპირებულ ტერიტორიაზე ვითარება სულ უფრო მძიმდება. რუსეთის ფედერაციის საოკუპაციო რეჟიმი ოკუპირებულ ტერიტორიებზე დღემდე აგრძელებს ჩვენი მოქალაქეების ძირითადი უფლებებისა და თავისუფლებების უხეშ დარღვევებს, მათ შორის, ხდება თავისუფლების თვითნებური აღკვეთა, სახელმწიფო ქონების, კერძო საკუთრების მოსპობა-გასხვისება, ქართული ენის სახელმწიფოებრივი სტატუსის ხელყოფა, შეზღუდულია მშობლიურ ენაზე განათლების მიღების უფლება. მასობრივად ნადგურდება ქართული კულტურის ძეგლები, სამეცნიერო და საგანმანათლებლო დაწესებულებები და ხორციელდება სხვა მსგავსი ქმედებები.
 
საქართველოს ხელისუფლება, ყველა ლეგიტიმური საშუალებით, მათ შორის საერთაშორისო საზოგადოების დახმარებით ყველაფერს აკეთებს საქართველოს ოკუპირებულ ტერიტორიებზე ამჟამად მცხოვრები ჩვენი მოქალაქეების უფლებების დაცვისთვის, დევნილთა სოციალურ-ეკონომიკური და ჯანდაცვის მდგომარეობის გაუმჯობესებისა და მათი სამოქალაქო საზოგადოებაში ინტეგრაციის ხელშეწყობისთვის. ახორციელებს სხვადასხვა პროექტებსა და პროგრამებს, რომელიც დაშორიშორებულ საზოგადოებას შორის სახალხო დიპლომატიის, სოციალურ-ეკონომიკურ და კულტურულ-საგანმანათლებლო სფეროებში თანამშრომლობის გაუმჯობესებას უწყობს ხელს.
 
მნიშვნელოვანია, რომ საქართველოს მთავრობა ყველა საერთაშორისო სამართლებრივი მექანიზმების გამოყენებით იცავს სახელმწიფოს სუვერენიტეტს, რასაც 2021 წლის 21 იანვარს სტრასბურგის სასამართლოს გამოტანილი გადაწყვეტილებით საქართველოს მიერ მიღწეული ისტორიული სამართლებრივი გამარჯვებაც ადასტურებს.
 
მჯერა, რომ ერთობლივი ძალისხმევით, ჩვენ შევძლებთ ქართულ-აფხაზური და ქართულ-ოსური ისტორიული ერთობის აღდგენას."- დავით ფაცაცია.
შეხვედრა საქართველოს იუსტიციის მინისტრის მოადგილესთან
იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატის იუსტიციის დეპარტამენტის ადამიანის უფლებათა დაცვის სამმართველოს ორგანიზებით 2021 წლის 8 ივნისს ZOOM პლატფორმის საშუალებით გაიმართა ონლაინ შეხვედრა საქართველოს იუსტიციის მინისტრის მოადგილესთან, ბატონ ბექა ძამაშვილთან.
 
შეხვედრაში მონაწილეობდნენ იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრი დავით ფაცაცია, მინისტრის პირველი მოადგილე ბელა კოპალიანი, მინისტრის აპარატის იუსტიციის დეპარტამენტის ადამიანის უფლებათა დაცვის სამმართველოს უფროსი ავთანდილ ხაზალია, მინისტრის აპარატის თანამშრომლები და სტაჟიორები.
 
შეხვედრაზე, ბატონმა ბექა ძამაშვილმა იმ ისტორიულ გამარჯვებაზე ისაუბრა, რომელიც საქართველომ 2021 წლის 21 იანვარს 2008 წლის ომის საქმეზე სტრასბურგის სასამართლოს მიერ გამოტანილი გადაწყვეტილებით მიაღწია.
 
საუბარი შეეხო სტრასბურგის სასამართლოს გადაწყვეტილების აღსრულებისთვის საჭირო იმ ღონისძიებებს, რომლებიც საქართველოს იუსტიციის სამინისტროს აქვს დაგეგმილი და ამ ისტორიული გადაწყვეტილების მნიშვნელობაზე არაღიარების პოლიტიკისა და ქვეყნის დეოკუპაციის პროცესისათვის.
 
შეხვედრის მონაწილეებმა, ყურადღება გაამახვილეს სტრასბურგის ადამიანის უფლებათა ევროპული სასამართლოს 2019 წლის 31 იანვარის გადაწყვეტილებაზე, რომლის მიხედვითაც, საქართველომ რუსეთს დავა კომპენსაციის ნაწილშიც მოუგო.
 
მონაწილეებმა განიხილეს, ასევე, ადამიანის უფლებათა ევროპული სამართლისა და ლტოლვილთა საერთაშორისო სამართლის ურთიერთმიმართების ძირითადი ასპექტები.
 
შეხვედრის მიზანია სტრასბურგის სასამართლოს ისტორიული გადაწყვეტილების მნიშვნელობასა და ადამიანის უფლებათა ევროპულ სამართალზე საზოგადოების ცნობიერების ამაღლება, ასევე, ლტოლვილთა საერთაშორისო სამართალში არსებული გამოწვევების თეორიული და პრაქტიკული ანალიზი.
შეხვედრა სტუდენტებთან

იუსტიციისა და სამოქალაქო ინეტრგაციის საკითხებში აფხაზეთის ავტონომიური რესპუბლიკის მინისტრმა დავით ფაცაციამ, მონაწილეობა მიიღო არასამთავრობო ორგანიზაციის – „აფხაზთა და ქართველთა ერთობის საზოგადოება „ერთობა ხვალისთვის“ მიერ საქართველოს სხვადასხვა უნივერსიტეტის სტუდენტებთან გამართულ შეხვედრაზე.

შეხვედრაში, ასევე, მონაწილეობდნენ არასამთავრობო ორგანიზაციის – „აფხაზთა და ქართველთა ერთობის საზოგადოება „ერთობა ხვალისთვის“ თავმჯდომარე გიორგი შერვაშიძე, თავმჯდომარის მოადგილე შორენა ახალაია, დამფუძნებელი და გამგეობის წევრი მარინა ხანთაძე, მცირე და საშუალო მეწარმეთა ასოციაციის პრეზიდენტი მიხეილ ჭელიძე.

მონაწილეებმა განიხილეს ოკუპირებულ ტერიტორიებზე ამჟამად არსებული მდგომარეობა, ისაუბრეს ამ მიმართულებით ქვეყნის წინაშე მდგარ გამოწვევებსა და მათი გადაჭრის შესაძლო გზებზე.

„ძალიან პოზიტიური და ნაყოფიერი შეხვედრა მქონდა, საქართველოს სხვადასხვა უნივერსიტეტის სტუდენტებთან.

შეხვედრაზე განვიხილეთ სტუდენტების საინტერესო ინიციატივები. ახალგაზრდებმა გამოხატეს სურვილი მეტი აქტიურობით ჩაერთონ სამშვიდობო პროცესების ხელშემწყობ ღონისძიებებში.

სტუდენტებს გავუზიარე, აფხაზეთის კონფლიქტის მშვიდობიანად მოგვარების საკითხებზე ხედვები, მოსაზრებები და გავაცანი, ამ მიმართულებით განხორციელებული და დაგეგმილი ღონისძიებები.

მსგავსი შეხვედრები არ იქნება ერთჯერადი ხასიათის და ახალგაზრდების აქტიური ჩართულობით ვიმსჯელებთ და დავგეგმავთ ისეთ ღონისძიებებს, რომლებიც ხელს შეუწყობს აფხაზ და ქართველ საზოგადოებას შორის ნდობის აღდგენასა და შერიგებას.“ - აღნიშნა დავით ფაცაციამ

შეხვედრების მიზანია ოკუპაციის შედეგად დაშორიშორებულ საზოგადოებებს შორის ნდობის აღდგენის და მისი მოგვარების გზების მოძიების პროცესში ახალგაზრდების მეტი ჩართულობის ხელშეწყობა.

გარემოს დაცვის საერთაშორისო დღე
იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატმა საქართველოს საპატრიარქოს მოზარდთა თავშესაფარსა და ღვთისმშობლის საფარველის სახელობის დედათა მონასტერში გამწვანების აქციები მოაწყო.
 
მინისტრის აპარატის თანამშრომლებმა საქართველოს საპატრიარქოს მოზარდთა თავშესაფრისა და ღვთისმშობლის საფარველის სახელობის დედათა მონასტრის მიმდებარე ტერიტორიებზე მწვანე ნარგავები დარგეს.
 
გამწვანების აქციები გარემოს დაცვის საერთაშორისო დღესთან დაკავშირებით მოეწყო და მისი მიზანი გარემოს დაცვით აქტივობებში მონაწილეობით, ბუნების მიმართ პასუხისმგებლობის გაცნობიერებისა და გარემოს გამწვანების ხელშეწყობა არის.
წიგნის „აფხაზი არისტოკრატები ემიგრაციაში“ პრეზენტაცია
იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრი დავით ფაცაცია, მწერალთა სახლში, ცნობილი მკვლევარისა და მეცნიერის, ნატო მარშანიას წიგნის „აფხაზი არისტოკრატები ემიგრაციაში“ პრეზენტაციას დაესწრო.
 
სსიპ "კულტურის, სპორტის და ახალგაზრდულ საქმეთა სააგენტოს" მიერ გამოცემული ნატო მარშანიას წიგნის ინგლისურ ენაზე თარგმნა ფონდ - „დიასპორების ალიანსი საქართველოსთვის“ პრეზიდენტის, თიკა სვანიძე ვენკოს ფინანსური მხარდაჭერით განხორციელდა.
 
წიგნი დოკუმენტურ მასალაზეა აგებული და მოგვითხრობს 1921 წელს რუსეთის მიერ ოკუპირებული საქართველოდან დევნილი, ევროპაში ემიგრირებული აფხაზი არისტოკრატების ცხოვრებასა და მოღვაწეობაზე, მათ მცდელობაზე, ქართველ ემიგრანტებთან ერთად თავიანთი წვლილი შეეტანათ საქართველოს ბოლშევიკური ოკუპაციისაგან გათავისუფლებაში.
 
ღონისძიებაზე, ასევე, მოეწყო კინოჩვენება, რომელიც ასახავდა მე-20 საუკუნის დასაწყისში დამოუკიდებელი, საერთო ქართული სახელმწიფოს შენებაში აფხაზ მოღვაწეთა ფასდაუდებელ დამსახურებას.
 
ღონისძიებაში მონაწილეობდნენ საქართველოს პარლამენტის წევრი - დიასპორისა და კავკასიის საკითხთა კომიტეტის თავმჯდომარე - ბექა ოდიშარია, აფხაზეთის ავტონომიური რესპუბლიკის უმაღლესი საბჭოს წევრები - ვახტანგ ყოლბაია და გია გვაზავა, იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრი - დავით ფაცაცია, აფხაზეთის ავტონომიური რესპუბლიკის განათლებისა და კულტურის მინისტრი - ეკა ხოფერია, სსიპ "კულტურის, სპორტის და ახალგაზრდულ საქმეთა სააგენტოს" დირექტორი - ლიკა კვარაცხელია, ფონდ - „დიასპორების ალიანსი საქართველოსთვის“ პრეზიდენტი, თიკა სვანიძე ვენკო, გორისა და ატენის ეპისკოპოსი მეუფე ანდრია.
 
ღონისძიება მიეძღვნა, საქართველოს დამფუძნებელი კრების წევრის, 1919 -1921 წლებში აფხაზეთის ეროვნული მთავრობის პირველი თავმჯდომარის, დიმიტრი (არზაყან) ემუხვარის იუბილეს, რომელსაც 26 ოქტომბერს დაბადებიდან 140 წელი შეუსრულდა.
 
“ქართულ-აფხაზური მეგობრული ურთიერთობების გულშემატკივარი თითოეული ადამიანისთვის განსაკუთრებულად ძვირფასია წიგნში აღწერილი ისტორიები, რომლებიც წარმოაჩენს ემიგრაციაში მყოფი აფხაზი არისტოკრატიის ერთიან, ეროვნულ – ქართულ ცნობიერებას, მათ მცდელობას, ქართველ ემიგრანტებთან ერთად, წვლილი შეეტანათ საქართველოს ბოლშევიკური ოკუპაციისაგან გათავისუფლებაში.
 
მადლობას ვუხდი წიგნის ავტორს, ქალბატონ ნატო მარშანიასა და გამოცემის მხარდამჭერს - სსიპ "კულტურის, სპორტის და ახალგაზრდულ საქმეთა სააგენტოს" ამ მეტად მნიშვნელოვან საქმეში მონაწილეობისთვის, რომლითაც ჩვენი საერთო ისტორია, ტრადიცია და კულტურა წარმოჩნდება.
 
მინდა ავღნიშნო, რომ მსგავსი აქტივობები განსაკუთრებით მნიშვნელოვანია და ჭეშმარიტი დადასტურებაა იმისა, რომ ჩვენი და ოკუპირებულ ტერიტორიაზე მცხოვრები აფხაზი თანამოქალაქეების ცხოვრება ერთმანეთის გარეშე შეუძლებელია.
 
განსაკუთრებული მადლობა მინდა ვუთხრა წიგნის ინგლისურ ენაზე თარგმანისა და გამოცემის ფინანსურ მხარდამჭერს, ფონდ - „დიასპორების ალიანსი საქართველოსთვის“ პრეზიდენტს თიკა სვანიძე-ვენკოს, ქართულ-აფხაზური ურთიერთობების პოპულარიზაციაში შეტანილი განსაკუთრებული წვლილისათვის, რომელიც ამ ღონისძიების გარდა, სხვა არაერთი მნიშვნელოვანი პროექტების მხარდაჭერითა და განხორციელებით არის ცნობილი.
 
მზად ვართ, კიდევ უფრო მეტი აქტიურობით ჩავერთოთ მსგავს ღონისძიებებში, რათა თითოეული ჩვენგანის ერთობლივი ძალისხმევით მოხდეს ქართულ-აფხაზური პოზიტიური ურთიერთობების წარმოჩენა, ჩვენი საერთო ისტორიის, კულტურის, ტრადიციებისა და ფასეულობების შესანარჩუნებლად!” - აღნიშნა დავით ფაცაციამ.
შეხვედრა გერმანიის საერთაშორისო თანამშრომლობის საზოგადოებასთან
იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრი დავით ფაცაცია, სამოქალაქო ინტეგრაციის დეპარტამენტის, სტრატეგიული კომუნიკაციებისა და პროექტების მართვის სამმართველოს უფროსთან - სალომე დოლიძესთან ერთად, შეხვდა გერმანიის საერთაშორისო თანამშრომლობის საზოგადოების (GIZ), გლობალური პროგრამის „მიგრაცია და დიასპორის“ კოორდინატორს, ქალბატონ ირმა წერეთელსა და დიასპორის ექსპერტს, ქალბატონ ნათია კიკალეიშვილს.
 
შეხვედრაზე განხილულ იქნა გერმანიის საერთაშორისო თანამშრომლობის საზოგადოების (GIZ) გლობალური პროგრამა „მიგრაცია და დიასპორა“, რომლის ფარგლებშიც გერმანიიდან მოწვეული სპეციალისტი, იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატის სამოქალაქო ინტეგრაციის ცენტრის ბენეფიციარებს, ცოდნის გაზიარებისა და გაღრმავების მიზნით შეასწავლის გერმანულ ენას.
 
შეხვედრის მონაწილეებმა, ასევე, ისაუბრეს არსებული თანამშრომლობის ფარგლებში ერთობლივად განსახორციელებელ სხვა პროექტებსა და სამომავლო გეგმებზე.
2021 წლის 4 ივნისს აფხაზეთის ავტონომიური რესპუბლიკის მთავრობის სხდომა გაიმართა

დღეს აფხაზეთის ავტონომიური რესპუბლიკის მთავრობის მორიგი სხდომა გაიმართა. სხდომას მთავრობის თავმჯდომარე რუსლან აბაშიძე უძღვებოდა.

აფხაზეთის ავტონომიური რესპუბლიკის ფინანსთა და დარგობრივი ეკონომიკისა და აფხაზეთის ავტონომიური რესპუბლიკიდან იძულებით გადაადგილებულ პირთა-დევნილთა მინისტრებმა მთავრობის წევრებს 2021 წლის იანვარში ოკუპირებულ გალის რაიონში მომხდარი სტიქიური უბედურების (ხანძრის) შედეგად დაზარალებული მოსახლეობისთვის გაწეული მიზნობრივი დახმარებების შესახებ ინფორმაცია მიაწოდეს.

სხდომაზე მოისმინეს იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის ინფორმაცია აფხაზეთის მთავრობის ჩართულობით „ჩართულობის სახელმწიფო სტრატეგიისა და სამოქმედო გეგმის“ ძირეული ასპექტების შესრულების თაობაზე და სახელმწიფო სტრატეგიისა და სამოქმედო გეგმის განახლების მიზნით აფხაზეთის ავტონომიური რესპუბლიკის მთავრობის წინადადებები.

ასევე, განიხილეს სხდომის დღის წესრიგით გათვალისწინებული სხვა საკითხები.

ბავშვთა დაცვის საერთაშორისო დღე
1 ივნისი ბავშვთა დაცვის საერთაშორისო დღეა. აღნიშნულ თარიღთან დაკავშირებით იუსტიციისა და სამოქალაქო ინეტგრაციის საკითხებში აფხაზეთის ავტონომიური რესპუბლიკის მინისტრის აპარატისა და აფხაზეთის ავტონომიური რესპუბლიკის აფხაზეთის ავტონომიური რესპუბლიკიდან იძულებით გადაადგილებულ პირთა-დევნილთა სამინისტროს ერთობლივი ორგანიზებით, აფხაზეთიდან დევნილი ბავშვებისთვის ღონისძიებები გაიმართა.
 
მუშთაიდის ბაღში, აფხაზეთიდან დევნილი ბავშვების მონაწილოებით ჩატარდა ღონისძიება - „მშვიდობა მსოფლიოს ბავშვებს“, რომლის ფარგელბშიც გაიმართა ბავშვთა დაცვის საერთაშორისო დღისადმი მიძღვნილი კონცერტი. კონცერტზე შესრულდა ცნობილი საბავშვო სიმღერები და ნაწყვეტები მიუზიკლებიდან. ბავშვებმა მონაწილეობა მიიღეს ფოტოსესიაში ზღაპრის გმირებთან ერთად, ასევე, მოეწყო მხიარული ვიქტორინა პრიზებით. ღონისძიების დასასრულს აფხაზეთიდან დევნილ ბავშვებს ტკბილეულობა და სხვადასხვა სასაჩუქრე პაკეტები გადაეცათ.
 
ბავშვთა დაცვის საერთაშორისო დღესთან დაკავშირებით იუსტიციისა და სამოქალაქო ინეტრგაციის საკითხებში აფხაზეთის ავტონომიური რესპუბლიკის მინისტრი დავით ფაცაცია და აფხაზეთის ავტონომიური რესპუბლიკიდან იძულებით გადაადგილებულ პირთა-დევნილთა მინისტრი ლევან თევზაია, ასევე, ეწვივნენ ქ. ზუდიდის დევნილთა კომპაქტურ ჩასახლებაში მცხოვრებ, აფხაზეთიდან იძულებით გადაადგილებულ, მათ შორის სოციალურად დაუცველ ბავშვებს, დღესასწაული მიულოცეს და სამახსოვრო საჩუქრები გადასცეს.
 
დღევანდელი დღის ღონისძიებები ბარამბოსა და ბიბლუსის მხარაჭერითა და თანადგომით განხორციელდა.
 
იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატი ყველა ბავშვს გილოცავთ ბავშვთა დაცვის საერთაშორისო დღეს, ბედნიერ და ლაღ ბავშვობას გისურვებთ!
შეხვედრა აჭარაში მცხოვრებ აფხაზებთან

28 მაისს, ქ. ბათუმში იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრმა დავით ფაცაციამ, მინისტრის აპარატის იუსტიციის დეპარტამენტის ადამიანის უფლებათა დაცვის სამმართველოს უფროსთან - ავთანდილ ხაზალიასთან ერთად, მონაწილეობა მიიღო არასამთავრობო ორგანიზაცია – „აფხაზთა და ქართველთა ერთობის საზოგადოება „ერთობა ხვალისთვის“ და საქართველოს მცირე და საშუალო საწარმოთა ასოციაციის ორგანიზებითა და იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატის მხარდაჭერით აჭარაში მცხოვრებ აფხაზებთან გამართულ შეხვედრაში.

შეხვედრაში, ასევე, მონაწილეობდნენ საქართველოს პარლმანეტის წევრები, ექსპერტები, ადგილობრივი ხელისუფლების, არასამთავრობო სექტორისა და სამოქალაქო საზოგადოების წარმომადგენლები.

შეხვედრის მონაწილეებმა, ქართულ-აფხაზური საზოგადოების წარმომადგენლებთან ერთად, იმსჯელეს საქართველოს ერთიანობის, თავისუფლებისა და განვითარებისთვის ყველაზე მნიშნელოვან საკითხებზე -კონფლიქტის მშვიდობიანად მოგვარების გზებზე, ქართულ-აფხაზური მეგობრული ურთიერთობების აღდგენასა და შერიგების პროცესების ხელშეწყობაზე.

“ქართულ-აფხაზური საზოგადოების წარმომადგენლებთან ერთად ვიმსჯელეთ საქართველოს ერთიანობის, თავისუფლებისა და განვითარებისთვის ყველაზე მნიშნელოვან საკითხებზე - კონფლიქტის მშვიდობიანად მოგვარების გზებზე, ქართულ-აფხაზური მეგობრული ურთიერთობების აღდგენასა და შერიგების პროცესების ხელშეწყობაზე და ჩემთვის განსაკუთრებული პატივია, რომ ეს შეხვედრა ბათუმში შედგა. რადგანაც, სწორედ ბათუმი არის პირდაპირი ხიდი სოხუმთან, რომელიც აჭარაში მცხოვრებ აფხაზებზე გადის, ამიტომაც აფხაზებისთვის დღემდე ბათუმი და აჭარლები არიანი განსაკუთრებულად ახლოს. ხაზგასმით აღსანიშნავია, რომ აჭარამ და ბათუმმა ომის დროსაც და მის შემდგომ პერიოდშიც განსაკურებული თანადგომა გამოხატეს აფხაზეთის საკითხის მიმართ, რაც დღემდე გრძელდება.

დიდ მადლობას ვუხდი შეხვედრების ორგანიზატორებს, რომლებმაც მოახერხეს სხვადასხვა სფეროსა და კულტურის წარმომადგენლების ერთად შეკრება და ჩვენს საერთო ტკივილზე ერთობლივი მსჯელობის გამართვა. აღსანიშნავია, რომ ამგვარი შეხვედრები განსაკუთრებულად მნიშვნელოვანია

ოკუპირებულ ტერიტორიაზე მცხოვრები ჩვენი თანამოქალაქეებისთვის - ჩვენი დადებითი განწყობის, საერთო კულტურის, ხელოვნების, ტრადიციის საჩვენებლად და იმ ბარიერების დასანგრევად, რომლის აღმართვასაც რამდენიმე ათწლეულია მტრულად განწყობილი ძალები ცდილობენ. მჯერა, რომ მსგავსი ტიპის კონფერენციებით, შეხვედრებით, სხვადასხვა პროგრამებითა და პროექტებით შევძელებთ ჩვენს აფხაზ და ოს ძმებთან ერთად ერთიანი საზოგადოების მშენებლობას.”- განაცხადა დავით ფაცაციამ.

შეხვედრების მიზანია ოკუპაციის შედეგად დაშორიშორებულ საზოგადოებებს შორის ნდობის აღდგენის და მისი მოგვარების გზების მოძიების პროცესში ფართო მასების ჩართულობის, აფხაზური კულტურისა და ხელონების პოპულარიზაციის ხელშეწყობა.

აღნიშნული საკითხებისადმი მიძღვნილი საუნივერსიტეტო სამეცნიერო კონფერენციები და შეხვედრები გაიმართა საქართველოს სხვადასხვა რეგიონში.

აღსანიშნავია, რომ იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატი კონფლიქტის მშვიდობიანი დარეგულირებისთვის აუცილებელი, ერთობლივი პროცესების განვითარების ხელშეწყობის მიზნით, საზოგადოების სხვადასხვა წრეებისა და აფხაზი თანამოქალაქეების აქტიური ჩართულობით, მომავალშიც გეგმავს მსგავსი ტიპის კონფერენციებისა და შეხვედრების ორგანიზების მხარდაჭერას.