აფხაზეთის ავტონომიური რესპუბლიკის მთავრობა

Аҧснытәи автономтә республика аиҳабыра

ახალი ამბები
გიორგი გაბედავა ქალაქ ფოთში მცხოვრებ დევნილ მოზარდებს შეხვდა
იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატის მხარდაჭერით ქ. ფოთში განხორციელდა პროექტი „ქალაქ ფოთში დევნილი ბავშვების ცურვის კურსები“.
პროექტის მიზანი იყო ბავშვებსა და მოზარდებში ჯანსაღი ცხოვრების წესის პოპულარიზაცია, მათი სოციალიზაციისა და სამოქალაქო ინტეგრაციის გაძლიერება.
პროექტში ჩართული იყვნენ ქალაქ ფოთში დევნილთა დასახლებაში მცხოვრები ბავშვები და მოზარდები.
პროექტი ითვალისწინებდა ერთი თვის განმავლობაში ქალაქ ფოთში მდებარე საცურაო კომპლექსში 6-დან 17 წლის ჩათვლით აფხაზეთიდან დევნილი მოზარდებისა და ახალგაზრდების ცურვის გაკვეთილებს. აღნიშნული პროექტი მინისტრის აპარატის პროგრამის „სამოქალაქო ინტეგრაციის მხარდაჭერა“ ფარგლებში განხორციელდა.
აფხაზეთის მთავრობის თავმჯდომარემ რუსლან აბაშიძემ და იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრმა გიორგი გაბედავამ ინტეგრაციისა და ჩართულობის ახალგაზრდული ბანაკის მონაწილეებს სერტიფიკატები გადასცეს
იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატის ორგანიზებით, დაბა შეკვეთილში ინტეგრაციისა და ჩართულობის ახალგაზრდული საზაფხულო ბანაკი წარმატებით დასრულდა.
რუსლან აბაშიძემ და გიორგი გაბედავამ ბანაკის მონაწილეებს აქტიური ჩართულობისთვის მადლობა გადაუხადეს და წარმატებები უსურვეს.
კონკურსის წესით შერჩეული აფხაზეთიდან დევნილი მოზარდები მონაწილეობდნენ შემეცნებით ტრენინგებში, სპორტულ და გუნდურ აქტივობებში. ამასთან ერთად, მათ შეისწავლეს ფოტო-ვიდეო გადაღების მონტაჟი, პროფესიონალური დრონის მართვა-გადაღება და ვიდეო კამერასთან მუშაობა.
პროექტის მიზანი იყო აფხაზეთიდან დევნილი ახალგაზრდების მედია პროდუქტების მომზადების შესახებ ცნობიერების ამაღლება, გუნდური მუშაობის უნარების განვითარება, სამოქალაქო ინტეგრაციის ხელშეწყობა და ჯანსაღი ცხოვრების წესის პოპულარიზაცია.
გიორგი გაბედავამ ბელგიის ქალაქ ანტვერპენში მოქმედ, ქართულ ეთნო-კულტურულ ცენტრს ,,კავკასიონი“ აფხაზური ცეკვის ფორმები გადასცა

იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატის მხარდაჭერით, მიზნობრივი პროექტის ფარგლებში, ქართულ ცენტრთან არსებულ ანსამბლ "მედეას" მოცეკვავეებს აფხაზური ცეკვის ფორმები გადაეცათ შემდგომში ნიდერლანდებში საერთაშორისო ფესტივალზე მონაწილეობის მისაღებად, რომელიც მთლიანად დაეთმობა საქართველოს თემატიკას, მათ შორის საერთაშორისო საზოგადოებისათვის ქართულ-აფხაზური კულტურის გაცნობასა და პოპულარიზაციას. პროექტი განხორციელდა მინისტრის აპარატის ქვეპროგრამის "დიასპორა და დევნილ ემიგრანტთა მხარდაჭერა" ფარგლებში, რომლის მიზანია აფხაზეთიდან დევნილი ემიგრანტების მხარდაჭერა და მათი პრობლემების იდენტიფიკაცია, ქართულ დიასპორულ ორგანიზაციებთან ურთიერთობების გაღრმავება და ერთობლივი ღონისძიებების დაგეგმვა, ქართული დიასპორების, როგორც სამშვიდობო რესურსის გააქტიურება და ქართულ-აფხაზური კულტურული ღონისძიებების ხელშეწყობა.

ღონისძიებას მინისტრის მოადგილე მარინე გითოლენდია და მინისტრის აპარატის თანამშრომლები ესწრებოდნენ.

აფხაზეთიდან დევნილი მოზარდებისთვის იმერეთის რეგიონში ექსკურსია მოეწყო
იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატის ორგანიზებით, ბათუმში დევნილ მოზარდთა სამოქალაქო ჩართულობის სივრცის მონაწილეებისთვის, იმერეთის რეგიონში კულტურულ-შემეცნებითი ექსკურსია მოეწყო.
აღნიშნული პროგრამა ითვალისწინებდა მინისტრის აპარატის მიერ განხოციელებული პროექტის „დევნილ მოზარდთა სამოქალაქო ჩართულობის სივრცე“ ბენეფიციარების, აფხაზეთიდან დევნილი 14-17 წლის ასაკის 30 ახალგაზრდის მონაწილეობით, იმერეთის რეგიონში არსებული ღირსშესანიშნაობების - გელათის სამონასტრო კომლექსის, ბაგრატის ტაძრის, მოწამეთას მონასტრისა და პრომეთეს მღვიმის მონახულებას.
ღონისძიება, რომლის მიზანი იყო აფხაზეთიდან დევნილი ახალგაზრდების სოციალიზაციისა და ინტეგრაციის ხელშეწყობა, ასევე საქართველოს კულტურული ღირებულებების შესახებ მოზარდების ცნობიერების ამაღლება, მინისტრის აპარატის პროგრამის ,,მშვიდობის ლაბორატორია“ ფარგლებში მიმდინარეობდა.
ინტეგრაციისა და ჩართულობის ახალგაზრდული საზაფხულო ბანაკი იწყება
იუსტიციისა და სამოქალაქო ინტეგრაციის საკითხებში აფხაზეთის მინისტრის აპარატი იწყებს პროექტს „ინტეგრაციისა და ჩართულობის ახალგაზრდული საზაფხულო ბანაკი“
პროექტი გულისხმობს აფხაზეთიდან დევნილი 12 წლიდან 15 წლის ჩათვლით მოზარდების საზაფხულო ბანაკში განთავსებას.
ბანაკის მონაწილეებისთვის დაგეგმილია შემეცნებითი ტრენინგები, პრაქტიკული სამუშაოები, სახალისო, სპორტული და გუნდური აქტივობები.
30 მოზარდი შეირჩევა კონკურსის წესით.
პროექტი განხორციელდება დაბა შეკვეთილში 31 ივლისიდან 9 აგვისტოს ჩათვლით.
განაცხადების მიღების ბოლო ვადაა 19 ივლისი.
დაინტერესებულმა პირებმა გთხოვთ, შეავსოთ ქვემოთ მოცემული სარეგისტრაციო ფორმა.
 
 
გისურვებთ წარმატებებს!
 
აფხაზეთიდან დევნილი ბავშვები ესპანეთის სამეფოში გაემგზავრნენ
აფხაზეთის ავტონომიური რესპუბლიკის მთავრობისა და ესპანეთში მოქმედ ასოციაციას „TODOS SOMOS NIÑOS“ (ყველანი ბავშვები ვართ) და ინტეგრაციისა და სოლიდარობის ფონდ „FINSOL“-ის თანამშრომლობის ფარგლებში, კონფლიქტის შედეგად დაზარალებული ოჯახებიდან 20-მდე ბავშვი ზაფხულის არდადეგების გასატარებლად ესპანეთში გაემგზავრა.
დევნილი ბავშვები ესპანური მხარის მიერ შერჩეულ მასპინძელ ოჯახებში იცხოვრებენ და ესპანეთში მიმდინარე კულტურულ-საგანმანათლებლო პროგრამებსა და გასართობ აქტივობებში აქტიურად ჩაერთვებიან.
ესპანეთში გამგზავრებამდე პროგრამის ბენეფიციარებს, იუსტიციისა და სამოქალაქო ინტეგრაციის საკითხებში აფხაზეთის მინისტრის აპარატის ორგანიზებითა და მხარდაჭერით, ზალიკოს ცენტრმა უმასპინძლა.
ღონისძიებას აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე, იუსტიციისა და სამოქალაქო ინტეგრაციის საკითხებში აფხაზეთის მინისტრი ნანა გაბელია და აფხაზეთის განათლებისა და კულტურის მინისტრი ეკა ხოფერია ესწრებოდნენ. ღონისძიების ბოლოს, პროექტის მონაწილე ბავშვებს სამახსოვრო საჩუქრები გადაეცათ.
პროექტის მიზანი, სოციალურად დაუცველი დევნილი ოჯახების წევრთა მხარდაჭერაა.
ნანა გაბელიამ ევროკავშირის შესახებ ცნობიერების ამაღლების პროგრამის წარმატებულ მონაწილეებს სერტიფიკატები გადასცა
ევროკავშირის თაობაზე ცნობიერების ამაღლების კამპანიის ფარგლებში, მინისტრის აპარატის მიერ,აფხაზეთის მთავრობის საჯარო მოხელეებისთვის დაგეგმილი პროექტი წარმატებით დასრულდა.
იუსტიციისა და სამოქალაქო ინტეგრაციის საკითხებში აფხაზეთის მინისტრმა ნანა გაბელიამ და სამხრეთ კავკასიაში ევროპის საჯარო სამართლის ორგანიზაციის რეგიონული წარმომადგენლობის (EPLO ) ხელმძღვანელმა იოსებ ნანობაშვილმა პროგრამის მონაწილეებს აქტიური ჩართულობისთვის მადლობა გადაუხადეს და წარმატებულ მონაწილეებს სერტიფიკატები გადასცეს.
ერთთვიანი სალექციო კურსის განმავლობაში, მსმენელებმა მიიღეს სისტემატიზებული და პრაქტიკულ მიდგომებზე დაფუძნებული ინფორმაცია ევროკავშირის ინსტიტუციონალური მოწყობის, ევროკავშირის გადაწყვეტილების მიღების პროცედურებისა და ამ პროცესში ევროკავშირის ინსტიტუტების როლის შესახებ.
შეხვედრას მინისტრის პირველი მოადგილე გიორგი გაბედავა, მინისტრის მოადგილე მარინე გითოლენდია და მოწვეული სტუმრები ესწრებოდნენ
იუსტიციისა და სამოქალაქო ინტეგრაციის საკითხებში აფხაზეთის მინისტრის აპარატის ორგანიზებით ბავშვთა უფლებების შესახებ შეხვედრა გაიმართა
 
იუსტიციისა და სამოქალაქო ინტეგრაციის საკითხებში აფხაზეთის მინისტრის აპარატის ორგანიზებითა და იძულებით გადაადგილებულ ქალთა ასოციაციის „თანხმობა“ აქტიური ჩართულობით, ბავშვთა უფლებების შესახებ ცნობიერების ამაღლების თაობაზე შეხვედრა გაიმართა.
ღონისძიება მისასალმებელი სიტყვით იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრმა ნანა გაბელიამ გახსნა.
აღნიშნული პროექტის მიზანია აფხაზეთის კონფლიქტის შედეგად დაზარალებული 15-17 წლის სამოცამდე დევნილი მოზარდის ცნობიერების ამაღლება და ინფორმირებულობის გაზრდა ისეთ მნიშვნელოვან საკითხებზე, როგორებიცაა ბავშვთა უფლებების კონვენცია, ბულინგი-როგორც ძალადობის ერთ-ერთი ფორმა და მასთან გამკლავების უნარ-ჩვევები, სახელმწიფოში არსებული ახალგაზრდული სერვისები, მათზე ხელმისაწვდომობა და სხვა.
შეხვედრაში, ასევე, იძულებით გადაადგილებულ ქალთა ასოციაციის „თანხმობა“ წარმომადგენელი ნანა გოგოხია, საქართველოს გენერალური პროკურატურის პროკურორი ია ჩხეიძე, სსიპ დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს დეპარტამენტის უფროსი ნინო ტყეშელაშვილი და არასრულწლოვანთა რეფერირების ცენტრის უფროსი ნათია ალიაშვილი მონაწილეობდნენ.
აღსანიშნავია, რომ ამ პროგრამით გათვალისწინებული საინფორმაციო და სამუშაო შეხვედრები უკვე გაიმართა ზუგდიდისა და ხონის მუნიციპალიტეტებში, ამჟამად კი სამიზნე აუდიტორია, ქალაქ თბილისსა და ქალაქ რუსთავში მცხოვრები აფხაზეთიდან დევნილი მოზარდები არიან.
ღონისძიებას იუსტიციისა და სამოქალაქო ინტეგრაციის საკითხებში აფხაზეთის მინისტრის მოადგილეები, მინისტრის აპარატის თანამშრომლები და მოწვეული სტუმრები ესწრებოდნენ.
ბავშვთა უფლებების შესახებ ცნობიერების ამაღლების პროექტი მინისტრის აპარატის პროგრამის „სამოქალაქო ინტეგრაციის მხარდაჭერა“ ფარგლებში ხორციელდება.
 
 
 
 
 
 
 
 
 
 
ბათუმში დევნილ მოზარდთა სამოქალაქო ჩართულობის სივრცე გაიხსნა
აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ და იუსტიციისა და სამოქალაქო ინტეგრაციის საკითხებში აფხაზეთის მინისტრმა ნანა გაბელიამ ქალაქ ბათუმში დევნილ მოზარდთა სამოქალაქო ჩართულობის სივრცე გახსნეს.
შეხვედრის მონაწილეებს მისასალმებელი სიტყვით აჭარის ავტონომიური რესპუბლიკის მთავრობის თავმჯდომარე თორნიკე რიჟვაძემ მიმართა.
პროექტის ფარგლებში აფხაზეთიდან დევნილი 14-17 წლის სამოცამდე მოზარდი, ორი თვის განმავლობაში, სხვადასხვა სახის საგანმანათლებლო-შემეცნებით და გასართობ აქტივობებში ჩაერთვება. ახალგაზრდები მიიღებენ ცოდნას და გამოცდილებას ისეთ მნიშვნელოვან საკითხებზე, როგორებიცაა გუნდური მუშაობა, ტოლერანტობა, მიმღებლობა, მულტიკულტურალიზმი და ეფექტური კომუნიკაციის უნარები.
ღონისძიებას, ასევე, იუსტიციისა და სამოქალაქო ინტეგრაციის საკითხებში აფხაზეთის მინისტრის პირველი მოადგილე გიორგი გაბედავა, მინისტრის აპარატის წარმომადგენლები და მოწვეული სტუმრები ესწრებოდნენ.
პროექტი „დევნილ მოზარდთა სამოქალაქო ჩართულობის სივრცე“ იუსტიციისა და სამოქალაქო ინტეგრაციის საკითხებში აფხაზეთის მინისტრის აპარატის პროგრამის სამოქალაქო ინტეგრაციის მხარდაჭერისა და რეგიონებში დევნილ მოზარდთა ხელშეწყობის ფარგლებში ხორციელდება.
ნანა გაბელიას ინიციატივით აფხაზეთის ომის ვეტერანთა ოჯახის წევრებისთვის გასვლითი ღონისძიება მოეწყო
აფხაზეთის ავტონომიური რესპუბლიკის მთავრობის თავმჯდომარის მოადგილე ანზორ მარგიანი და იუსტიციისა და სამოქალაქო ინტეგრაციის საკითხებში აფხაზეთის მინისტრი ნანა გაბელია აფხაზეთის ომის ვეტერანთა ოჯახის წევრებს არაფორმალურ გარემოში შეხვდნენ.
ღონისძიება იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატის მხარდაჭერითა და სსიპ „ვეტერანების საქმეთა სახელმწიფო სამსახურის“ აფხაზეთის ავტონომიური რესპუბლიკის სამმართველოს აქტიური ჩართულობით განხორციელდა.
მინისტრის აპარატის პროექტი „სოციალიზაციის როლი კონფლიქტის ტრანსფორმაციაში“, ითვალისიწინებდა არაფორმალურ გარეომოში შემეცნებით და სახალისო აქტივობებს აფხაზეთის ომის ვეტერანთა ოჯახის წევრების, 15-17 წლის ასაკის ორმოცამდე მოზარდის, მონაწილეობით.
შეხვედრისას ახალგაზრდებისთვის აქტუალურ თემებზე ლექცია-ტრენინგი ჩაატარა, თავდაცვის სამინისტროს ყოფილი 23-ე ბრიგადის მე-6 სატანკო ბატალიონის მეთაურის მოადგილემ, ამჟამად თავდაცვის პოლკოვნიკმა როზმან ლოლაძემ.
აღნიშნული აქტივობის მიზანი იყო ახალგაზრდების სოციალური და სამოქალაქო ინტეგრაციის ხელშეწყობა, მათი შესაძლებლობების გამრავალფეროვნება, მშვიდობასა და კონფლიქტის ტრანსფორმაციაზე ცნობიერების ამაღლება და ზოგადად, აფხაზეთის ომის ვეტერანთა ოჯახის წევრების მხარდაჭერა.
ღონისძიება მინისტრის აპარატის პროგრამის „მშვიდობის ლაბორატორია“ ფარგლებში გაიმართა და მას იუსტიციისა და სამოქალაქო ინტეგრაციის საკითხებში აფხაზეთის მინისტრის მოადგილეები და მინისტრის აპარატის წარმომადგენლები ესწრებოდნენ.
საქართველოს რეგიონებში ბავშვთა უფლებების შესახებ შეხვედრები გაიმართა
იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის პირველმა მოადგილე გიორგი გაბედავამ იძულებით გადაადგილებულ ქალთა ასოციაციის "თანხმობა" წარმომადგენელთან, ნანა გოგოხიასთან ერთად, ბავშვთა უფლებებთან დაკავშირებით შეხვედრები გამართა.
 
სამუშაო შეხვედრებში მინისტრის აპარატის სამართალშემოქმედებისა და სამართლებრივი უზრუნველყოფის დეპარტამენტის უფროსი თემურ გასვიანი და ადამიანის უფლებათა დაცვის სამმართველოს უფროსი ავთანდილ ხაზალია მონაწილეობდნენ.
 
ქალაქ ზუგდიდსა და ქალაქ ხონში აფხაზეთის საჯარო სკოლების მოსწავლეებთან გამართული საინფორმაციო ხასიათის შეხვედრები მოიცავდა ისეთ აქტუალურ საკითხებს, როგორებიცაა: ბავშვთა უფლებების კონვენცია, ძირითადი უფლებები და მოვალეობები, ბულინგი, სახელმწიფოში არსებული ახალგაზრდული სერვისების ხელმისაწვდომობა და სხვა.
 
პროექტი მინისტრის აპარატის პროგრამის "სამოქალაქო ინტეგრაციის მხარდაჭერა" ფარგლებში მიმდინარეობდა და მისი მიზანი გახლდათ ბავშვთა უფლებების შესახებ აფხაზეთის კონფლიქტის შედეგად დაზარალებული ბავშვებისა და მოზარდების ცნობიერების ამაღლება და ინფორმირებულობის გაზრდა.
 
აღნიშნული შეხვედრები აფხაზეთის ავტონომიური რესპუბლიკის განათლებისა და კულტურის სამინისტროს,ადგილობრივი ხელისუფლებისა და რაიონული პროკურატურების წარმომადგენელთა აქტიური ჩართულობითა და მხარდაჭერით შედგა.
ნანა გაბელია ქალაქ სალონიკში საქართველოს დამოუკიდებლობის დღისადმი მიძღვნილ საღამოს დაესწრო
ქალაქ სალონიკში საქართველოს გენერალური საკონსულოს ორგანიზებით საქართველოს დამოუკიდებლობის დღისადმი მიძღვნილი საზეიმო ღონისძიება გაიმართა, რომელსაც აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძესთან ერთად, იუსტიციისა და სამოქალაქო ინტეგრაციის საკითხებში აფხაზეთის მინისტრი ნანა გაბელია დაესწრო.
 
აღნიშნულ საღამოზე, იუსტიციისა და სამოქალაქო ინტეგრაციის საკითხებში აფხაზეთის მინისტრის აპარატის ორგანიზებით და სალონიკში საქართველოს გენერალური კონსულის ნოდარ კომახიძის მხარდაჭერით, აფხაზეთის სიმღერისა და ცეკვის სახელმწიფო აკადემიურმა ანსამბლმა კონცერტი გამართა.
 
კონცერტზე ანსამბლი "აფხაზეთი" კონცეფტუალური ფოლკლორული პროგრამით „ქორეონიკონი“, 11 ქორეოგრაფიული და 9 მუსიკალური ნომრით, წარსდგა.
 
წარმოდგენის მიზანი გახლდათ ქართველი თანამემამულეებისთვის ქართულ-აფხაზური საერთო წარსულისა და მომავლის, კულტურისა და ტრადიციების შეხსენება და კიდევ ერთხელ გაზიარება.
 
ქართული კულტურის საღამოს საბერძნეთის რესპუბლიკის მთავრობის, დიპლომატიური კორპუსის, ბიზნეს წრეების წარმომადგენლები, სასულიერო პირები, ასევე, სალონიკში მცხოვრები ქართველი, მათ შორის აფხაზეთიდან დევნილი, ემიგრანტები ესწრებოდნენ.
 
აღნიშნული ღონისძიება ქ.სალონიკში მიმდინარე, საქართველოს დამოუკიდებლობის დღისადმი მიძღვნილი, კვირეულის ფარგლებში მოეწყო.
ნანა გაბელია ქართულ-აფხაზური ტრადიციებისა და კულტურის პოპულარიზაციის მიზნით შექმნილ სასწავლო სივრცეს ესტუმრა
აღნიშნულ სივრცეში იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატი ილორის წმინდა გიორგის სახელობის ეკლესიის წინამძღვართან დეკანოზ ლევან ჯანაშიასთან ერთად ახორციელებს პროექტს „ქართულ-აფხაზური საერთო ტრადიციებისა და კულტურის პოპულარიზაცია აფხაზეთიდან დევნილი ბავშვებისა და ახალგაზრდების ჩართულობით“.
 
პროექტი ითვალისწინებს რვა თვის განმავლობაში თბილისში მდებარე ილორის წმინდა გიორგის სახელობის ეკლესიის ტერიტორიაზე არსებულ სივრცეში, 6-დან -15 წლის ჩათვლით, აფხაზეთიდან დევნილი მოზარდებისა და ახალგაზრდების სწავლებას.
 
პროგრამის 40 მონაწილე შეისწავლის კერამიკის, კალიგრაფიის, მხატვრული კითხვის ხელოვნებას, ხალხურ სიმღერებს, ხატვას, ქსოვას, საეკლესიო გალობასა და ხატწერას.
 
აღნიშნული პროექტი მინისტრის აპარატის პროგრამის ,,სამშვიდობო რესურსი-ქართულ-აფხაზური ურთიერთობების მხარდაჭერა“ ფარგლებში ხორციელდება.
 
 
 
 
 
 
 
 
 
 
 
 
 
 
 
 
ნანა გაბელიას მადლობის სიგელი გადაეცა
საქართველოს ტექნიკურ უნივერსიტეტში სამართლისა და საერთაშორისო ურთიერთობების ფაკულტეტის დღე აღინიშნა.
ღონისძიება მისასალმებელი სიტყვით უნივერსიტეტის რექტორმა, აკადემიკოსმა დავით გურგენიძემ გახსნა.
ფაკულტეტის დეკანმა, პროფესორმა ირაკლი გაბისონიამ ფაკულტეტის ისტორია მიმოიხილა და იმ წარმატებულ პროექტებზე ისაუბრა, რომლებიც ფაკულტეტის პროფესორ-მასწავლებლებმა, ახალგაზრდა მკვლევარებმა და სტუდენტებმა ერთობლივად განახორციელეს.
სტუდენტების კარიერული განვითარების მიმართულებით უნივერსიტეტთან მჭიდრო თანამშრომლობისა და ფაკულტეტის პოპულარიზაციაში შეტანილი წვლილისთვის მადლობის სიგელები გადაეცათ აფხაზეთის ავტონომიური რესპუბლიკის მთავრობის თავმჯდომარეს რუსლან აბაშიძეს, იუსტიციიისა და სამოქალაქო ინტეგრაციის საკთხებში აფხაზეთის მინისტრს ნანა გაბელიას და აფხაზეთის ფინანსთა და ეკონომიკის მინისტრს ლევან თევზაიას.
ღონისძიებას სტუ-ის ადმინისტრაციის წარმომადგენლები, ფაკულტეტის პროფესორ-მასწავლებლები, სტუდენტები და მიწვეული სტუმრები ესწრებოდნენ.
 
 
 
 
 
 
 
 
 
 
 
 
 
 
 
 
 
ნანა გაბელიამ საქართველოს დამოუკიდებლობის დღისადმი მიძღვნილ ღონისძიებაში მონაწილეობა მიიღო

იუსტიციისა და სამოქალაქო ინტეგრაციის საკითხებში აფხაზეთის მინისტრის აპარატის ორგანიზებითა და საქართველოს საპატრიარქოს წმინდა ნინოს სახელობის მართლმადიდებლურ სკოლასთან პარტნიორობით, თბილისის ეთნოგრაფიული მუზეუმის ეზოში პროექტი „ჩვენი დროის მშვიდობისმყოფელები“ განხორციელდა.

პროექტის მიზანია აფხაზეთიდან დევნილი ქართველი და ლტოლვილი უკრაინელი მოზარდების გაცნობა-დამეგობრების გრძელვადიანი პერსპექტივის შექმნა, ორი ქვეყნის ახალგაზრდების ერთმანეთთან დაახლოების პროცესის ხელშეწყობა და მშვიდობის თემასთან დაკავშირებულ საერთო ინტერესებსა და პრობლემურ საკითხებზე თანამშრომლობა.

პროგრამის მიმდინარეობისას წმინდა ნინოს სახელობის მართლმადიდებლური სკოლისა და სსიპ მიხეილ გრუშევსკის სახელობის ქ. თბილისის N41 საჯარო სკოლის მოსწავლეებმა ერთობლივად იმუშავეს და 26 მაისისადმი მიძღვნილ თემატიკაზე საინტერესო მხატვრული ტილოები შექმნეს. ასევე, წმინდა ნინოს სახელობის მართლმადიდებულური სკოლის ანსამბლის წევრებმა ქართული ხალხური სიმღერები შეასრულეს.

ღონისძიებას აფხაზეთის ფინანსთა და ეკონომიკის მინისტრი ლევან თევზაია, იუსტიციისა და სამოქალაქო ინტეგრაციის საკითხებში აფხაზეთის მინისტრის პირველი მოადგილე გიორგი გაბედავა, წმინდა ნინოს სახელობის მართლმადიდებლური სკოლის ფილოლოგი სოფიკო გორგილაძე, მინისტრის აპარატის თანამშრომლები და მოწვეული სტუმრები ესწრებოდნენ.

#26მაისი
#თავისუფლებისსიყვარულით
#ესდღეჩვენია