აფხაზეთის ავტონომიური რესპუბლიკის მთავრობა

Аҧснытәи автономтә республика аиҳабыра

ახალი ამბები
აფხაზეთის ქალაქების სახელწოდებებით ჰუდები საჩუქრად ონლაინ-სკოლის მონაწილეთათვის
იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატის მხარდაჭერით ემიგრაციაში მცხოვრები მოზარდებისა და საქართველოში მცხოვრები მათი თანატოლებისთვის დამზადდა ჰუდები.
 
ჰუდები, ფონდის "დიასპორების ალიანსი საქართველოსთვის" პირველი საერთაშორისო დიასპორული ონლაინ-სკოლის მოსწავლეთათვის დამზადდა, მათთვის შერჩეული სპეციალური დიზაინით - აფხაზეთის ქალაქების სახელწოდებების წარწერებითა და მხარზე საქართველოს რუკით.
 
მსოფლიოში ახალი კორონავირუსის პანდემიით გამოწვეული სირთულეების გამო, მოსწავლეებისთვის შერჩეული საჩუქრების, ჩვენს სამშობლოში გადაცემა ვერ მოხერხდება, თუმცა ისინი 20-მდე ქვეყანაში გაიგზავნა ადრესატებთან.
 
აღსანიშნავია, რომ იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატი და ფონდი "დიასპორების ალიანსი საქართველოსთვის" აფხაზეთის თემის პოპულარიზაციისთვის მომავალშიც გეგმავენ საერთო პროექტების განხორციელებას.
,,ინგლისური ენის შემსწავლელი ონლაინ კურსის" კურსდამთავრებულთა დაჯილდოება

იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატის ორგანიზებით განხორციელდა პროექტი "ინგლისური ენის შემსწავლელი ონლაინ კურსი“.

პროექტის დასრულების შემდგომ, მზიურის პარკში წარმატებულ კურსდამთავრებულთა სერტიფიკატების გადაცემის ცერემონიალი გაიმართა.

პროექტის მონაწილეებს მიესალმნენ იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრი დავით ფაცაცია, პროექტის პარტნიორი ორგანიზაციების წარმომადგენლები - კემბრიჯის განათლების სახლის დირექტორი, ეკა მელაძე და საერთაშორისო კულტურულ-საგანმანათლებლო ცენტრის დირექტორი, ირმა ჯანგირაშვილი.

დავით ფაცაციამ დევნილი ახალგაზრდების პროექტში ჩართულობასა და  მომავალში დაგეგმილ ღონისძიებებში მათი მონაწილეობის მნიშვნელობაზე ისაუბრა. მან წარმატებულ კურსდამთავრებულებს სერტიფიკატები გადასცა და წარმატებები უსურვა.

ონლაინ-კურსში მონაწილეობა მიიღეს აფხაზეთიდან დევნილმა და ოკუპირებულ ტერიტორიაზე მცხოვრებმა ახალგაზრდებმა და პროექტის მიზანია მათთვის ხელმისაწვდომი გახადოს ინგლისური ენის შესწავლა, ხელი შეუწყოს დევნილი ახალგაზრდების პოტენციალის მიზნობრივ განვითარებასა და აფხაზეთიდან დევნილების საქართველოს სამოქალაქო საზოგადოების მშენებლობის პროცესში უფრო ეფექტურ ჩართულობას.

აღსანიშნავია, რომ მინისტრის აპარატის მიერ მსგავსი ღონისძიებები მთელი ქვეყნის, მათ შორის ოკუპირებული ტერიტორიის მასშტაბით მომავალშიც იგეგმება.

სენაკში აფხაზეთიდან დევნილი ბავშვების მონაწილეობით მინი ფეხბურთის ტურნირი გაიმართა

სენაკის მუნიციპალიტეტში, აფხაზეთიდან დევნილი ბავშვების მონაწილეობით  მორიგი ღონისძიება გაიმართა.

იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატის ინიციატივითა და სსიპ - "კულტურის, სპორტისა და ახალგაზრდულ საქმეთა სააგენტოს" მხარდაჭერით, პროექტის - "ჯანსაღი ცხოვრების წესი და ბუნებაზე ზრუნვა - ჩვენი არჩევანია" ფარგლებში, სენაკის მუნიციპალიტეტის დევნილთა დასახლებაში   მინი ფეხბურთის ტურნირი ჩატარდა და  დასუფთავების აქცია მოეწყო.

პროექტის მიზანია აფხაზეთიდან დევნილ ბავშვებში ჯანსაღი ცხოვრების წესის პოპულარიზაცია,  მათი ფიზიკური უნარ-ჩვევების განვითარება  და  გარემოს დაცვით აქტივობებში მონაწილეობით, ბუნების მიმართ პასუხისმგებლობის გაცნობიერების ხელშეწყობა.

აფხაზეთის ავტონომიური რესპუბლიკის მთავრობის ინიციატივით ხონში საქველმოქმედო, გამწვანების და სპორტული ღონისძიებები გაიმართა

აფხაზეთის ავტონომიური რესპუბლიკის მთავრობის ინიციატივით ქალაქ ხონის №4 საჯარო სკოლის დაწყებითი კლასის 100-მდე მოსწავლეს საბავშვო, ილუსტრირებული ბიბლია, თემატური გასაფერადებელი ჟურნალები და სახატავი ფანქრები გადაეცა. მოზარდებს მიესალმნენ და საჩუქრები გადასცეს აფხაზეთის ავტონომიური რესპუბლიკის მთავრობის თავმჯდომარემ რუსლან აბაშიძემ, იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრმა დავით ფაცაციამ, ხონის მუნიციპალიტეტის მერმა ლადო ჯურხაძემ და ხონისა და სამტრედიის ეპარქიის მიტროპოლიტმა მეუფე საბამ.

დღესვე ქალაქ ხონში გამწვანების აქცია მოეწყო, რომლის ფარგლებშიც №4 საჯარო სკოლის, საბავშვო ბაღის, ხონის ეკლესიისა და დევნილთა დასახლების მიმდებარე ტერიტორიებზე 200 ძირი ელდარის ფიჭვის ნერგი დაირგო.

მოგვიანებით ქალაქ ხონის სტადიონზე ადგილობრივი და დევნილი ახალგაზრდების მონაწილეობით მინიფეხბურთში ტურნირი გაიმართა. გამარჯვებულებს თასები, მედლები და სპორტული აღჭურვილობის სრული კომპლექტი გადაეცათ.

ღონისძიებები იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატის, აფხაზეთის ავტონომიური რესპუბლიკის სულიერების ცენტრის და კულტურის, სპორტის და ახალგაზრდულ საქმეთა სააგენტოს ორგანიზებითა და ბაკურ სულაკაურის გამომცემლობისა და კომპანია „კარფურის“ მხარდაჭერით ჩატარდა. ორგანიზებაში ასევე აქტიურად იყო ჩართული აფხაზეთის ავტონომიური რესპუბლიკიდან იძულებით გადაადგილებულ პირთა-დევნილთა სამინისტროს იმერეთის ტერიტორიული ორგანო და ხონის დევნილთა საინიციატივო ჯგუფი.

2020 წლის 15 ოქტომბერს აფხაზეთის ავტონომიური რესპუბლიკის მთავრობის სხდომა გაიმართა

დღეს აფხაზეთის ავტონომიური რესპუბლიკის მთავრობის მორიგი სხდომა გაიმართა. სხდომას მთავრობის თავმჯდომარე რუსლან აბაშიძე უძღვებოდა.

სხდომაზე მოისმინეს აფხაზეთის ავტონომიური რესპუბლიკის აღმასრულებელი ხელისუფლების დაწესებულების მიერ მიმდინარე წლის 9 თვის განმავლობაში გაწეული საქმიანობის ანგარიში. ასევე მოისმინეს აფხაზეთის ავტონომიური რესპუბლიკის მთავრობის მიერ COVID-19-ის გავრცელების წინააღმდეგ განხორციელებული პრევენციული და სამომავლოდ დაგეგმილი ღონისძიებების შესახებ ინფორმაცია.

გმირთა მოედანზე საქართველოს ერთიანობისთვის დაღუპულთა ხსოვნას პატივი მიაგეს

იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრმა დავით ფაცაციამ, აფხაზეთის ავტონომიური რესპუბლიკის თავმჯდომარე - რუსლან აბაშიძესთან, აფხაზეთის ავტონომიური რესპუბლიკის უმაღლესი საბჭოს თავმჯდომარე - ჯემალ გამახარიასთან და მთავრობის წევრებთან ერთად, აფხაზეთის შეიარაღებული კონფლიქტის დროს დაღუპულთა ხსოვნას პატივი მიაგო.

„27 წლის წინ 27 სექტემბერს სოხუმი დაეცა. რუსეთის ოკუპაციურმა ძალებმა და ბანდ-ფორმირებებმა დაიკავეს ქალაქი. მტრის მიერ თავს მოხვეულ ომში 13 თვის და 13 დღის განმავლობაში დაიღუპა ათასობით მეომარი და მშვიდობიანი მოქალაქე, როგორც ქართული ისე აფხაზური მხრიდან. ეს არის ჩვენი საერთო ტრაგედია და დროის ამ გადმოსახედიდან ყველანი დავრწმუნდით, რომ ამ ძმათამკვლელ ომში დამარცხდა ყველა.

მინდა ქედი მოვიხარო უახლესი ისტორიის დიდებული გმირების წინაშე, რომლებმაც თავი შესწირეს საქართველოს ტერიტორიული მთლიანობისათვის ბრძოლას - ჟიული შარტავა, რაულ ეშბა, გურამ გაბესკირია, ჯუმბერ ბეთაშვილი, არშაველ შენგელია, სუმბათ სააკიანი, მიხეილ კოკაია, მამია ალასანია, ვახტანგ გეგელაშვილი, ალექსანდრე ბერულავა და მთავრობის დაცვის წევრები. ამ ადამიანების სახელები მუდამ იქნება თაობებისათვის დიდებული გმირობისა და ღირსების მაგალითი.

საქართველოს ხელისუფლება არასდროს შეეგუება ოკუპაციას და ყველა ხერხს მიმართავს იმისთვის, რომ აფხაზებსა და ქართველებს შორის აღდგეს მშვიდობა, ნდობა და სიყვარული. უწმინდესის ლოცვა-კურთხევით  გავერთიანდებით ჩვენი საერთო მომავლის გადასარჩენად.

უდიდესი ტრაგედიის მიუხედავად დარწმუნებული ვარ, რომ კონფლიქტის მშვიდობიანი მოგვარება არის ერთადერთი და უალტერნატივო გზა საერთო კეთილდღეობისა და დევნილების საკუთარ სახლებში ღირსეული დაბრუნების.“ - განაცხადა დავით ფაცაციამ.

ქალაქ ფოთმა „მხატვარ-მარინისტთა“ არტ-პლენერს უმასპინძლა
იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატის, ქალაქ ფოთის მუნიციპალიტეტისა და საქართველოს მხატვართა კავშირის მხარდაჭერით, ქალაქ ფოთში, ხელოვანთა პარკში შავი ზღვის აუზის ქვეყნების ,,მხატვარ-მარინისტთა" საერთაშორისო არტ-პლენერის შემაჯამებელი გამოფენა მოეწყო.
 
საერთაშორისო გამოფენაზე წარმოდგენილი იყო 20 ქართველი მხატვრის 60-მდე ნამუშევარი. პროექტის ფარგლებში გამოიცემა კატალოგი, სადაც წარმოდგენილი იქნება არტ-პლენერში მონაწილე მხატვრების მიერ შესრულებული ნამუშევრები. აღსანიშნავია, რომ კატალოგში შევა იმ მხატვართა ნამუშევრებიც, რომლებმაც კორონავირუსით გამოწვეული პანდემიის გამო ვერ შეძლეს საქართველოში ჩამოსვლა.
 
გამოფენას იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრი დავით ფაცაცია, საქართველოს პარლამენტის მაჟორიტარი დეპუტატი ირაკლი ხახუბია, ქალაქ ფოთის მერი გოჩა კურდღელია, საკრებულოს თავმჯდომარე ბექა ვაჭარაძე, საკრებულოს წევრები და ადგილობრივი ხელისუფლების სხვა წარმომადგენლები ესწრებოდნენ.
 
შავი ზღვის აუზის ქვეყნების ,,მხატვარ-მარინისტთა" საერთაშორისო არტ-პლენერის შემაჯამებელი გამოფენა აფხაზეთის დღისადმი მიძღვნილი კვირეულის ფარგლებში გაიმართა და მიზნად ისახავს აფხაზეთელი მხატვრების პოპულარიზაციას, „მარინისტი“ მხატვრების შემოქმედებითი ურთიერთობების გაღრმავებასა და განვითარებას, ხელოვანთა დახმარებით ქართულ-აფხაზური ურთიერთობების წახალისებას.
ონლაინ კონკურსის - ,,ენგურს იქით სანაპირო“ გამარჯვებული ჟურნალისტების დაჯილდოება
აფხაზეთის ავტონომიური რესპუბლიკის მთავრობის ინიციატივით და იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატის ორგანიზებით, სასტუმრო „მუზაში“, ონლაინ კონკურსის - ,,ენგურს იქით სანაპირო“ გამარჯვებული ჟურნალისტების დაჯილდოება გაიმართა.
 
იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატის მიერ, ჟურნალისტებისთვის გამოცხადებულ ონლაინ კონკურსის - ,,ენგურს იქით სანაპირო“ ფარგლებში გამოვლენილ საუკეთესო ჟურნალისტური ნამუშევრების ავტორებს, ფულადი ჯილდო და სამახსოვრო საჩუქრები გადაცათ.
 
I ადგილი - ქეთი ხატიაშვილი - „19 წლის აფხაზი სტუდენტი გოგოს სამირას დღიურებიდან“
II ადგილი - თამარ ბუბაშვილი - „აფხაზეთი იმედის დილაში“ (ვიდეო სიუჟეტი)
III - ადგილი - გულიადა ჭკადუა - „რამდენიმე ფრაგმენტი სურათისათვის“
 
ასევე, სპეციალური სახელობითი საჩუქრები გადაეცათ იმ ჟურნალისტებს, რომლებიც წლების განმავლობაში აქტიურად მუშაობდნენ აფხაზეთთან დაკავშირებულ საკითხებზე და განსაკუთრებული წვლილი მიუძღვით აღნიშნული თემის ინტენსიურად გაშუქებაში.
 
ჟურნალისტები იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრმა დავით ფაცაციამ დააჯილდოვა.
 
პროექტის მიზანია, ჟურნალისტების ჩართულობით, აფხაზეთის კონფლიქტის შედეგად დაშორიშორებულ საზოგადოებებს შორის ნდობის აღდგენისა და შერიგების პროცესების ხელშეწყობა, სამშვიდობო და სამოქალაქო ინტეგრაციის პროცესების განვითარება.
შეხვედრა საქართველოში UNDP-ის ხელმძღვანელ - ლუიზა ვინტონთან
აფხაზეთის ავტონომიური რესპუბლიკის მთავრობის თავმჯდომარე - რუსლან აბაშიძემ და იუსტიციისა და სამოქალქო ინტეგრაციის საკითხებში აფხაზეთის ავტონომიური რესპუბლიკის მინისტრმა დავით ფაცაციამ, საქართველოში გაეროს განვითარების პროგრამის (UNDP) ხელმძღვანელ - ლუიზა ვინტონთან სამუშაო შეხვდრა გამართეს.
 
შეხვედრაზე საუბარი შეეხო აფხაზეთის ოკუპირებულ ტერიტორიაზე ამჟამად არსებულ ვითარებას, მათ შორის ჰუმანიტარულ საკითხებს. განსაკუთრებული ყურადღება გამახვილდა აფხაზეთში COVID-19 -ით ინფიცირებულ პაციენტთა მზარდ დინამიკაზე და ზოგადად COVID-19 -ით გამოწვეულ გამოწვევებზე. ასევე, განიხილეს არსებული და სამომავლო გეგმები სხვადასხვა მიმართულებით, მათ შორის დევნილთა საკითხებზე.
 
შეხვედრას, მთავრობის აპარატის საერთაშორისო ურთიერთობათა და პროტოკოლის დეპარტამენტის უფროსი დავით გახარია და UNDP-ის კრიზისების პრევენციის და რეაბილიტაციის მიმართულების ხელმძღვანელი გიორგი ვარდიშვილი ესწრებოდნენ.
მზიურის პარკში ღონისძიება „აფხაზეთი ფერებში“-გაიმართა

აფხაზეთის ავტონომიური რესპუბლიკის მთავრობის ინიციატივითა და იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატის ორგანიზებით მზიურის პარკში ღონისძიება „აფხაზეთი ფერებში“-მოეწყო. ღონისძიებაზე ონლაინ კონკურსების მხატვრებისთვის „აფხაზეთი ფერებში“ და ფოტოკონკურსი „საერთო ტრადიციებით, საერთო მომავლისკენ“. გამრჯვებულების დაჯილდოება გაიმართა .

ღონისძიების ფარგლებში კონკურსებში გამარჯვებულებს სიგელები, სპეციალური პრიზები და ფულადი ჯილდოები გადაეცათ. ასევე, მზიურის პარკში საკონკურსო ნამუშევრების გამოფენა და კატალოგის „აფხაზეთი ფერებში“ პრეზენტაცია გაიმართა.

გამარჯვებულ კონკურსანტებს ჯილდოები აფხაზეთის ავტონომიური რესპუბლიკის მთავრობის თავმჯდომარე - რუსლან აბაშიძემ და იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრმა დავით ფაცაციამ გადასცეს.

ჯანსაღი ცხოვრების წესი და ბუნებაზე ზრუნვა - ჩვენი არჩევანია

იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატის ინიციატივითა და სსიპ - "კულტურის, სპორტისა და ახალგაზრდულ საქმეთა სააგენტოს" მხარდაჭერით, მიმდინარე წლის 31 აგვისტოსა და 2 სექტემბერს ქალაქ ფოთსა და ზუგდიდში ჩატარდა ღონისძიება - "ჯანსაღი ცხოვრების წესი და ბუნებაზე ზრუნვა - ჩვენი არჩევანია".

ღონისძიების ფარგლებში 10-14 წლამდე ასაკის, აფხაზეთიდან  დევნილი ბავშვების მონაწილეობით გაიმართა მინი ფეხბურთის ტურნირები და მოეწყო დასუფთავების აქციები.

პროექტის -  "ჯანსაღი ცხოვრების წესი და ბუნებაზე ზრუნვა - ჩვენი არჩევანია" მიზანია  აფხაზეთიდან დევნილ ბავშვებში ჯანსაღი ცხოვრების წესის პოპულარიზაცია, მათი ფიზიკური უნარ-ჩვევების განვითარება და გარემოს დაცვით აქტივობებში მონაწილეობით, ბუნების მიმართ პასუხისმგებლობის გაცნობიერების ხელშეწყობა.

ფოტოკონკურსი „საერთო ტრადიციებით, საერთო მომავლისკენ“ დასრულდა

იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატის მიერ გამოცხადებული ფოტოკონკურსი „საერთო ტრადიციებით, საერთო მომავლისკენ“ დასრულდა. კონკურსში მონაწილე ათობით ნამუშევრიდან საკონკურსო კომისიის მიერ გამოვლენილ იქნა 10 საუკეთესო ფოტო, რომელთა ავტორებს გადაეცემათ სიგელები, ხოლო I, II, III ადგილის მფლობელები დაჯილდოვდებიან სასაჩუქრე ვაუჩერებით.

კონკურსში მონაწილეობის მიღება შეეძლოთ აფხაზეთის თემატიკით დაინტერესებულ, როგორც პროფესიონალ, ისე მოყვარულ ფოტოგრაფებს. პროექტის მთავარი ამოცანაა აფხაზეთის კონფლიქტის შედეგად გახლეჩილ საზოგადოების წევრებს შორის ნდობის აღდგენისა და შერიგების პროცესების ხელშემწყობი თემების ერთ კადრად გარდაქმნა და ენგურს მიღმა მცხოვრები თანამოქალაქეებისთვის გაგზავნა, როგორც სურვილი და ხედვა საერთო მომავლისა.

საუკეთესო ნამუშევრები ავტორები:
1. კარლო სალუქვაძე
2. თინა მაისურაძე
3. ვაჟა თოფურია
4. ლევან ლუტიძე
5. ირინა მალახოვა
6. ანანო ფეიქრიშვილი
7. ბარბარე რუსიაშვილი
8. ანა შენგელია
9. ინგა ჟვანია
10. ქეთევან ბრაგვაძე

ონლაინ კონკურსი ჟურნალისტებისთვის ,,ენგურს იქით სანაპირო“ დასრულდა

იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის აპარატის მიერ გამოცხადებული ონლაინ კონკურსი ჟურნალისტებისთვის ,,ენგურს იქით სანაპირო“ დასრულდა.

კონკურსში მონაწილეობის მიღება შეეძლო აფხაზეთის თემატიკით დაინტერესებულ ჟურნალისტებს. პროექტის მიზანია ჟურნალისტების ჩართულობით აფხაზეთის კონფლიქტის შედეგად გახლეჩილ საზოგადოების წევრებს შორის ნდობის აღდგენისა და შერიგების პროცესების ხელშეწყობა, სამშვიდობო და სამოქალაქო ინტეგრაციის პროცესების განვითარება.

საუკეთესო ნამუშევრების ავტორებს გადაეცემათ სიგელები და სამახსოვრო საჩუქრები. I, II, III ადგილის მფლობელები კი დაჯილდოვდებიან სასაჩუქრე ვაუჩერებით.

კონკურსში მონაწილე ათობით ნამუშევრიდან საკონკურსო კომისიის მიერ გამოვლენილ იქნა 8 საუკეთესო ჟურნალისტური ნამუშევარი:

1. ქეთი ხატიაშვილი - „19 წლის აფხაზი სტუდენტი გოგოს სამირას დღიურებიდან“;
2. თამარ ბუბაშვილი - „აფხაზეთი იმედის დილაში“ (ვიდეო სიუჟეტი);
3. გულიადა ჭკადუა - „რამდენიმე ფრაგმენტი სურათისათვის“;
4. ნანული ცხვედიანი - „ჩემო უყვავილო ანგელოზებო“;
5. თეონა ზანთარაია - „ერთი დღე ოკუპირებულ აფხაზეთში - როგორია ცხოვრება ენგურს გაღმა საქართველოში და როგორ ხვდებიან აფხაზურ ქორწილში ქართველებს ომის შემდეგ“;
6. ირმა ჯანგირაშვილი - „ენგურს გაღმა დაკარგული იები“;
7. ნინო შონია - „ენგურს იქით სანაპირო“;
8. ნინო ჩიფქიური - „როგორ ებრძვიან ახალ კორონა ვირუსს აფხაზეთსა და ცხინვალის რეგიონებში“.

იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრი დავით ფაცაცია სამების საკათედრო ტაძარში აფხაზეთიდან გადმოსვენებულთა სამოქალაქო პანაშვიდს დაესწრო

იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრი დავით ფაცაცია სამების საკათედრო ტაძარში აფხაზეთიდან გადმოსვენებულთა სამოქალაქო პანაშვიდს და დაღუპულთა სულის მოსახსენებელ პარაკლისს დაესწრო.

სამების საკათედრო ტაძარში იმყოფებოდნენ საქართველოს აღმასრულებელი და საკანონმდებლო ხელისუფლების წარმომადგენლები, აფხაზეთის მთავრობის წევრები, უმაღლესი საბჭოს დეპუტატები, ვეტერანები და დევნილი საზოგადოება, რომლებმაც პატივი მიაგეს დაღუპულთა ხსოვნას და ოჯახის წევრებს მიუსამძიმრეს.

90-იან წლებში აფხაზეთში განვითარებული ტრაგიკული მოვლენების დროს დაღუპული 13 იდენტიფიცირებული პირის ცხედრის (8 სამხედრო, 5 მშვიდობიანი მოქალაქე) საქართველოში გადმოსვენება შერიგებისა და სამოქალაქო თანასწორობის საკითხებში სახელმწიფო მინისტრის აპარატისა და წითელი ჯვრის საერთაშორისო კომიტეტის ერთობლივი ძალისხმევით გახდა შესაძლებელი.

იდენტიფიცირებულთაგან 2 ნეშტს დღეს დიღმის ძმათა სასაფლაოზე სამხედრო პატივით დაკრძალავენ.

14 აგვისტო არის ქართველებისა და აფხაზების საერთო ტრაგედიის და საერთო მარცხის დღე
აფხაზეთის ავტონომიური რესპუბლიკის მთავრობის თავმჯდომარემ რუსლან აბაშიძემ, საქართველოს თავდაცვის მინისტრმა ირაკლი ღარიბაშვილმა, შერიგებისა და სამოქალაქო თანასწორობის საკითხებში საქართველოს სახელმწიფო მინისტრმა თეა ახვლედიანმა, იუსტიციის და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრმა დავით ფაცაციამ, ვეტერანების საქმეთა სახელმწიფო სამსახურის დირექტორმა ვლადიმერ იმნაძემ, აფხაზეთის ავტონომიური რესპუბლიკის მთავრობის წევრებმა და უმაღლესი საბჭოს დეპუტატებმა აფხაზეთში შეიარაღებული კონფლიქტის დაწყების 28 წლისთავთან დაკავშირებით ძმათა სასაფლაოზე პატივი მიაგეს საქართველოს მთლიანობისთვის დაღუპული გმირი მეომრების ხსოვნას და გმირთა მემორიალი ყვავილებით შეამკეს.
 
„1992 წლის 14 აგვისტოს დაიწყო კონფლიქტი, რომელიც დიდხანს მზადდებოდა მესამე მხარის მიერ. სამხედრო დაპირისპირება 13 თვე გაგრძელდა და 1993 წლის 27 სექტემბერს აფხაზეთის ტერიტორიის ოკუპაციით დასრულდა, რასაც ორივე მხრიდან ათასობით მშვიდობიანი მოქალაქე და ჯარისკაცი შეეწირა, 400 ათასზე მეტი ადამიანი დევნილი გახდა.
 
რუსეთის ფედერაციის მიერ დღემდე გრძელდება საქართველოს ტერიტორიების ოკუპაცია, შეზღუდულია მშობლიურ ენაზე განათლების მიღების უფლება, მასობრივად ნადგურდება ქართული კულტურის ძეგლები, სამეცნიერო და საგანმანათლებლო დაწესებულებები, პერმანენტულად ირღვევა ადამიანის ძირითადი უფლებები და თავისუფლება.
 
აფხაზეთის ავტონომიური რესპუბლიკის ლეგიტიმური ხელისუფლება განსაკუთრებულ ყურადღებას უთმობს აფხაზეთის ოკუპირებულ ტერიტორიაზე მცხოვრები მოსახლეობისა და დევნილთა სოციალურ-ეკონომიკურ მდგომარეობასთან დაკავშირებულ სირთულეებს, რისთვისაც ახორციელებს სხვადასხვა პროექტებსა და პროგრამებს. ახორციელებს იმ პროექტების მხარდაჭერას, რომელიც დაშორიშორებულ საზოგადოებებს შორის სახალხო დიპლომატიის, სოციალურ-ეკონომიკურ და კულტურულ-საგანმანათლებლო სფეროებში თანამშრომლობას წაახალისებს.
 
14 აგვისტო არის ქართველებისა და აფხაზების საერთო ტრაგედიის და საერთო მარცხის დღე. ტკივილის და ტრაგედიის სიმძიმის მიუხედავად თანმიმდევრული, რაციონალური სამშვიდობო პოლიტიკით და საერთაშორისო საზოგადოების მხარდაჭერით ყველაფერს გავაკეთებთ, რათა აფხაზებთან ერთად, ერთიან საქართველოში თანაცხოვრებით, გავხდეთ დასავლური სამყაროს სრულფასოვანი წევრი“. - აღნიშნა დავით ფაცაციამ.