25 ივნისს აფხაზეთის ავტონომიური რესპუბლიკის უმაღლესი საბჭოსა და მთავრობის წევრებმა და საქართველოს ტექნიკური უნივერსიტეტის "კონფლიქტებისა დარეგულირების სამართლებრივი, პოლიტიკური და ეკონომიკური კვლევების ცენტრის" წარმომადგენლებმა მოაწყვეს წიგნის "ჰონკონგი, ჩინეთი 1997" პრეზენტაცია-განხილვა.

წიგნის ავტორები არიან წევრები და საქართველოს ტექნიკური უნივერსიტეტის პროფესორები ჯემალ გახოკიძე და სოფო მიდელაშვილი. ნაშრომის შექმნის მოტივაცია განაპირობა საქართველოში არსებულმა მოუგვარებელმა პრობლემებმა. კონფლიქტების ჩიხიდან გამოსასვლელი გზების ძიების პროცესში ზემოთ ხსენებული ცენტრი ჰონკონგის ფენომენმა დააინტერესა, რადგან 1997 წელს ჰონკონგის დედასახელმწიფოში დაბრუნების ფაქტი იყო უნიკალური მოვლენა მსოფლიო პოლიტიკაში. ჰონკონგზე ჩინეთის სახელმწიფო სუვერენიტეტის აღდგენამ საერთაშორისო სამართალში კონფლიქტების დარეგულირების მშვიდობიანად გადაწყვეტის პრეცედენტი შექმნა. ამიტომაც, წიგნის ავტორებმა საქართველოს ოკუპირებული რეგიონების გათვალისწინებით, მნიშვნელოვნად მიიჩნიეს ამ ისტორიული ფაქტის კვლევა და წიგნის სახით წარდგენა. იგი განკუთვნილია როგორც კონფლიქტებითა და საერთაშორისო პოლიტიკით დაინტერესებულ პირთათვის, ისე საზოგადოების ფართო წრისათვის.

წიგნის განხილვისას გაიმართა საინტერესო დისკუსია აფხაზეთის ხელისუფლების წევრებისა და მოწვეულ სტუმართა მონაწილეობით. აღნიშნულ ნაშრომს მიეცა მაღალი შეფასება, ისაუბრეს იმის შესახებ, თუ რამდენად დიდი მნიშვნელობა აქვს დოკუმენტური მასალის საფუძვლიანად გაცნობას, შესაძლებელი პარალელების გავლებას, მსგავსებებისა და განსხვავებების ძიებას საქართველოს კონფლიქტურ რეგიონებთან მიმართებაში.

ჯემალ გახოკიძის თქმით: "არ შეიძლება ჩინეთის მიერ განხორციელებული დიპლომატიური სვლების პირდაპირი კოპირება და გადმოტანა საქართველოში არსებული კონფლიქტების მოგვარების საქმეში. ჰონკონგის პრეცედენტი არის ანგარიშგასაწევი და ყურადსაღები, ის უნდა იქნეს კრიტიკულად გაანალიზებული, სწორედ ეს არის ამ წიგნის მიზანიც".

დასასრულს, მიღწეულ იქნა პრინციპული შეთანხმება შემდგომი ერთობლივი თანამშრომლობის თაობაზე, რაც ითვალისწინებს აფხაზეთის მომავალი კონსტიტუციის პროექტის მომზადებას.

აფხაზეთის ავტონომიური რესპუბლიკის განათლებისა და კულტურის სამინისტრომ თბილისის აპოლონ ქუთათელაძის სახელობის სახელმწიფო სამხატვრო აკადემიასთან ერთად ვალერი არქანიას „არტ-გალერეაში“ გამოფენა სახელწოდებით „თბილისის სამხატვრო აკადემიის საგანძური - XIX –XX სს. 50-ანი წწ. ფერწერა“ გამართა.

ვალერი არქანიას „არტ-გალერეაში“ გამოიფინა აღიარებული ქართველი მხატვრების: მ. თოიძის, ე. ახვლედიანის, ლ. ლონგოს, ა. ციმაკურიძის, ე. ბაღდავაძის, კ. მახარაძის, ვ. შერპილოვის, დ. ხახუტაშვილის, რ. სტურუას (უფროსი), ლ. ბაიხჩევის, თ. ბალანჩივაძის, შ. აბრამიშვილის, ქ. მაღალაშვილის და სხვა მხატვრების 25-მდე ნამუშევარი, რომელთა უმრავლესობა საქართველოს კულტურულ ფასეულობათა ნუსხაშია შესული.

ამჟამად სურათები თბილისის აპოლონ ქუთათელაძის სახელობის სახელმწიფო სამხატვრო აკადემიის საცავშია დაცული. გამოფენა ორი კვირა გასტანს.

ღონისძიებას ესწრებოდნენ აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, აფხაზეთის ავტონომიური რესპუბლიკის განათლებისა და კულტურის მინისტრი დიმიტრი ჯაიანი, აფხაზეთის ავტონომიური რესპუბლიკის დევნილთა საქმეების დეპარტამენტის თავმჯდომარე კონსტანტინე კუჭუხიძე, ნდობის აღდგენისა და შერიგების საკითხებში აფხაზეთის ავტონომიური რესპუბლიკის მინისტრი დავით გვაძაბია, აფხაზეთის ავტონომიური რესპუბლიკის იუსტიციის დეპარტამენტის თავმჯდომარე იგორ კოპალიანი და აფხაზეთის უმაღლესი საბჭოს დეპუტატები.

აფხაზეთის ავტონომიური რესპუბლიკის მთავრობის, აფხაზეთის ავტონომიური რესპუბლიკის უმაღლესი საბჭოსა და აფხაზეთის ყველა უწყების თითოეული თანამშრომლის ხელფასიდან ერთი პროცენტი თბილისის მერიის მიერ შექმნილი სტიქიის შედეგად დაზარალებულთა დასახმარებლად არსებული სპეციალური სახაზინო ანგარიშზე გადაირიცხა.

აფხაზეთის ავტონომიური რესპუბლიკის ყველა უწყების თანამშრომლები აქტიურად იყვნენ ჩართული დედაქალაქის გაწმენდით სამუშაობში და ორგანიზებულად იყვნენ გადანაწილებული სხვადასხვა ობიექტებზე, სადაც აქტიურად მიმდინარეობდა სტიქიის დროს მიყენებული ზარალის სალიკვიდაციო სამუშაოები.

17 ივნისს, აფხაზეთის მთავრობის ინიციატივით, აფხაზეთის ავტონომიური რესპუბლიკის მთავრობის სვხადასხვა უწყებებისა და უმაღლესი საბჭოს წარმომადგენლებმა ეროვნულ სისხლის ბანკში, ლეიკემიით დაავადებული ბავშვების დასახმარებლად სისხლი გაიღეს. სისხლის ბანკი ცენტრალურ საავადმყოფოებსა და იაშვილის სახელობის ბავშვთა კლინიკას დონორების სისხლით ამარაგებს.

ღონისძიება აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტროს ორგანიზებით გაიმართა, რომელიც აქტიურად არის ჩართული დონაციის პროგრამაში „გაიღე სისხლი, გადაარჩინე სიცოცხლე" თანამშრომლობა მომავალშიც გაგრძელდება.

აქციას აფხაზეთის ავტონომიური რესპუბლიკის ჯანმრთელობისა და სოციალური დაცვის მინისტრის მოადგილე მარინა კობახიძე-ონიანი დაესწრო.

აფხაზეთის ავტონომიური რესპუბლიკის მთავრობის თავმჯდომარის მოვალეობის შესრულებელმა ვახტანგ ყოლბაიამ აფხაზეთის მთავრობის წარმომადგენლებთან ერთად, 13 ივნისს სტიქიის შედეგად დაღუპულეთა ხსოვნის პატივსაცემად ვაკე-საბურთალოს მიმდებარე ტერიტორიაზე სიმბოლურად მოწყობილი მემორიალი ყვავილებით შეამკო.

ჩვენს დედაქალაქს ძლიერი წვიმის შედეგად სტიქიური უბედურება დაატყდა თავს, რასაც ადამიანური მსხვერპლი მოჰყვა.

აფხაზეთის ავტონომიური რესპუბლიკის მთავრობის სახელით, მინდა მივუსამძიმრო გარდაცვლილების ოჯახის წევრებს, თანაგრძნობა და თანადგომა გამოვუცხადო მათ ამ უდიდესი განსაცდელის ჟამს. ზარალი ძალიან დიდია. წყალდიდობამ და მოვარდნილმა წყალმა მრავალი ადამიანი უსახლკაროდ დატოვა, მოიშალა ქალაქის ინფრასტრუქტურა. ძალიან მძიმეა თბილისის იერსახის ასეთი ცვლილების აუღელვებლად აღქმა. ჩვენი მთავრობა დაეხმარება მერიას, სხვა ოფიციალურ სტრუქტურებს ქალაქის სარეაბილიტაციიო სამუშაოების ჩატარებაში.

ჩვენ ერთი საზოგადოება ვართ, ასეთი სტიქია ყველას გვაზარალებს, შლის ქალაქის რიტმს, რაც მძიმედ აისახება ყოველი ჩვენგანის სულიერ თუ ფიზიკურ მდგომარეობაზე. მინდა ჩვენს საზოგადოებას, საჯარო დაწესებულებებს, ბიზნესის, სხვა სტრუქტურების წარმომადგენლებს, შევთავაზო საზოგადოებრივი ფონდის ჩამოყალიბების იდეა. ფონდის ფარგლებში ყველას მიეცემა შესაძლებლობა, ფინანსური და მატერიალური დახმარების გაწევისთვის. ასეთი ღონისძიებებით შევძლებთ დავუბრუნდეთ ჩვეული ცხოვრების რიტმს, რომელიც ასე აუცილებელია ჩვენი საზოგადოებისთვის.

ვახტანგ ყოლბაია,
აფხაზეთის ავტონომიური რესპუბლიკის მთავრობის
თავმჯდომარის მოვალეობის შემსრულებელი

„აფხაზეთიდან იძულებით გადაადგილებულ პირთა გასვლითი პროფილაქტიკური სამედიცინო გასინჯვების“ პროგრამის ფარგლებში დღეს, უფასო სამედიცინო გამოკვლევები ზუგდიდის მუნიციპალიტეტის ორ სოფელში – ხურჩასა და რუხში მცხოვრებ 500-მდე დევნილს ჩაუტარდა.

იძულებით გადაადგილებულ პირებს საჭიროების შესაბამისი მედიკამენტები უფასოდ გადაეცათ.

აქციაში მონაწილეობას მიიღეს თბილისის წამყვანი კლინიკების მაღალკვალიფიციურმა სპეციალისტებმა, აგრეთვე აფხაზეთის სამედიცინო დაწესებულებების წამყვანმა ექიმ-სპეციალისტებმა.

ღონისძიებას ადგილზე ადევნებდა თვალს და დევნილთა პრობლემებს ეცნობოდა აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია და აფხაზეთის ავტონომიური რესპუბლიკის დევნილთა საქმეების დეპარტამენტის თავმჯდომარე კონსტანტინე კუჭუხიძე. პროცესს ხელმძღვანელობას აფხაზეთის ჯანდაცვის მინისტრი ქეთევან ბაკარაძე უწევდა.

უფასო სამედიცინო გამოკვლევები ხვალ ზუგდიდის მუნიციპალიტეტის სოფელ ზედა ეწერში მცხოვრებ დევნილებს ჩაუტარდებათ.

პროგრამა აფხაზეთის ავტონომიური რესპუბლიკის მთავრობის ეგიდით და აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტროს ორგანიზებით განხორციელდება.

აფხაზეთის ავტონომიური რესპუბლიკის განათლებისა და კულტურის სამინისტროს სპორტისა და ახალგაზრდულ საქმეთა სამმართველოს ორგანიზებით, 2015 წლის 12-13 ივნისს იოსელიანის სახელობის მძლეოსნობის სასახლეში მძლეოსნობაში აფხაზეთის ღია პირველობა ჩატარდა.

შეჯიბრი ლეგენდარული სპორტსმენის ვიქტორ სანეევის 70 წლის იუბილეს მიეძღვნა. მასში მონაწილეობა მიიღეს 1996-2001 წწ. დაბადებულმა სპორტსმენებმა საქართველოს სხვადასხვა რეგიონიდან.

მძლეოსნობის ექვს სახეობაში სულ 12 გამარჯვებული  გამოვლინდა, 6 გოგონა და 6 ვაჟი.

100 მეტრზე სირბილი – სალომე ფოცხვერაშვილი და ვაჟა უტურაშვილი;

800 მეტრზე სირბილი – ლიდა ბერძენიშვილი და ნიკა ხოჭოლავა;

სიგრძეზე ხტომა – მარი თათარაშვილი და ირაკლი გელანტია;

სამმაგი ხტომა – მაკა სანიკიძე და ირაკლი გელანტია;

ბირთვის კვრა – სალომე თურმანიძე და ბადრი ქიმაძე;

ჭოკით ხტომა – დიანა ზოლოტუხინა და მიშა ცანავა;

გამარჯვებული სპორტსმენები დიპლომებით, მედლებითა და თასებით დაჯილდოვდნენ.

აფხაზეთის ღია პირველობა მძლეოსნობაში მიზნად ისახავს მძლეოსნობის პოპულარიზაციას აფხაზეთიდან დევნილ მოსახლეობაში, წარმატებული და პერსპექტიული სპორტსმენების გამოვლენას, აფხაზეთის ნაკრები გუნდის დაკომპლექტებას, ჯანსაღი ცხოვრების წესის პროპაგანდას.

აფხაზეთის ავტონომიური რესპუბლიკის  მთავრობის თავმჯდომარის მოვალეობის შემსრულებელი ვახტანგ ყოლბაია საქართველოს განათლებისა და მეცნიერების სამინისტროს ეროვნული სასწავლო პროგრამების დეპარტამენტის წარმომადგენელს თამარ ჯუღელს შეხვდა.

შეხვედრას აფხაზეთის განათლებისა და კულტურის მინისტრის პირველი მოადგილე მანანა ქვაჩახია, სოხუმის უნივერსიტეტის პროფესორი თეიმურაზ გვანცელაძე, აფხაზური ენის სპეციალისტი  ირმა ოსია, აფხაზეთის მთავრობის აღმასრულებელი ხელისუფლების დაწესებულებებთან ურთიერთობისა და სოციალურ საკითხთა დეპარატმენტის უფროსის მოადგილეს მარინა შენგელია ესწრებოდნენ.

შეხვედრაზე ისაუბრეს აფხაზური ენის განვითარებისა და პოპულარიზაციის საკითხებზე. განხილულ იქნა ენგურს გამოღმა აფხაზეთის საჯარო სკოლების მე-10, მე-11 კლასებში 2015-2016 სასწავლო წელს, არჩევით სწავლების ფორმად, აფხაზური ენისა და ლიტერატურის სწავლების დანერგვის მოკლევადიანი პროექტი, რაც ითვალისწინებს საქართველოს მასწავლებელთა განვითარების ცენტრის ხელშეწყობით აფხაზური ენის მცოდნე პედაგოგთა ტრენინგ-პროექტის მომზადება-განხორციელებას, ანიმაციური ფილმის შექმნას პატარებისთვის. დაგეგმილია გრძელვადიანი პროექტის შემუშავება აფხაზური ენის სასკოლო სახელმძღვანელოს შექმნის მიზნით, ასევე, სოხუმის სახელმწიფო უნივერსიტეტში აფხაზური ენისა და კულტურის სამეცნიერო კვლევით ინსტიტუტში აფხაზური ენის სწავლების მსურველთა რაოდენობის გაზრდა და შემდგომში მათი დასაქმება საჯარო დაწესებულებებში.

სოხუმის სახელმწიფო უნივერსიტეტისა და აფხაზეთის მეცნიერებათა ეროვნული აკადემიის ორგანიზებით სოხუმის სახელმწიფო უნივერსიტეტის სააქტო დარბაზში აკაკი წერეთლის დაბადებიდან 175 და გარდაცვალებიდან 100 წლისთავისადმი მიძღვნილი სამეცნიერო კონფერენცია გაიმართა.

კონფერენციას დაესწრნენ და საზოგადოებას სიტყვით მიმართეს აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ, აფხაზეთის ავტონომიური რესპუბლიკის უმაღლესი საბჭოს თავმჯდომარე გია (ელგუჯა) გვაზვამ და  სოხუმის სახელმწიფო უნივერსიტეტის რექტორმა, პროფესორმა ჯონი აფაქიძემ.

კონფერენციაში მონაწილეობა საქართველოს აკრედიტირებული უმაღლესი სასწავლებლების პროფესორ-მასწავლებლებმა და დოქტორანტებმა, აგრეთვე სამეცნიერო-კვლევითი დაწესებულებების თანამშრომლებმა მიიღეს.

დღეს, ქუთაისში აფხაზეთის ავტონომიური რესპუბლიკის მთავრობის საკუთრებაში არსებულ სსიპ „ბიზნეს ინკუბატორში" დასუფთავების აქცია გაიმართა. აქციაში ჩართული იყვნენ აფხაზეთის ავტონომიური რესპუბლიკის მთავრობის აპარატისა და მთავრობის სხვადასხვა უწყებების თანამშრომლები, ასევე აფხაზეთის მთავრობის იმერეთისა და სამეგრელო-ზემო სვანეთის წარმომადგენლობა. აფხაზეთის მთავრობის თავმჯდომარის მოვალეობის შემსრულებელი ვახტანგ ყოლბაია დასუფთავების აქციაში მონაწილეობის პარალელურად სსიპ „ბიზნეს ინკუბატორის" მიმდინარე და სამომავლო პროექტებს გაეცნო. ამჟამად ტერიტორიაზე მიმდინარეობს აფხაზეთის ავტონომიური რესპუბლიკის სოფლის მეურნეობის, გარემოს დაცვისა და ბუნებრივი რესურსების დეპარტამენტის მიერ საწარმოსთვის გადაცემული სასათბურე კონსტრუქციების დამონტაჟება, პროექტის ფარგლებში ასევე გათვალისწინებულია სასათბურე მეურნეობაში მოყვანილი პროდუქციისათვის საგამოფენო-სარეალიზაციო პავილიონის მშენებლობა, დაგეგმილია პროფესიული სასწავლო კოლეჯის ამოქმედება.

ვახტანგ ყოლბაიას განცხადებით, „ბიზნეს ინკუბატორს" სერიოზული გეგმები აქვს, მალე სრული დატვირთვით ამუშავდება და 2000-მდე ადამიანს დაასაქმებს.

„შენობა, რომელშიც სსიპ „ბიზნეს ინკუბატორია" განთავსებული, საქართველოს ეკონომიკის სამინისტრომ სარგებლობის უფლებით გადასცა აფხაზეთის მთავრობას. ტერიტორია საკმაოდ დიდია და მოვლა-პატრონობას მოითხოვს. მწირი შესაძლებლობების მოუხედავად, ეს ორგანიზაცია მაინც ახერხებს სირთულეებთან გამკლავებას. არ შემიძლია უდიდესი მადლიერებით არ მოვიხსენიო აშშ-ის განვითარების ფონდი, რომელმაც ამ საქმეში დიდი დახმარება გაგვიწია, ასევე საერთაშორისო ორგანიზაციები, არასამთავრობო სექტორი, იაპონიის საელჩო. ამ ტერიტორიაზე განთავსდება საცდელი სასათბურე მეურნეობა, სადაც მოეწყობა სხვადასხვა ციტრუსოვანი და სხვა მცენარეების, ასევე მრავალნაირი ჯიშის ყვავილების საგამოფენო პავილიონი, საბოლოოდ კი აქ წარმოდგენილი პროდუქცია მომხმარებელზე გაიყიდება. შემდგომში კი არსებული ფართები სხვადასხვა მიმართულების ბიზნეს-ცენტრების ოფისებად იქნება გამოყენებული. უკვე არსებობს ჩაის, წისქვილკომბინატის საამქროები, მაღაზიაც პრაქტიკულად აშენებულია - ერთი სიტყვით, ძალიან სერიოზულ მუშაობას და რაც მთავარია, 2000-მდე ადამიანის დასაქმებას ვგეგმავთ. იქნება მომუშავე პერსონალის გადამზადების, ბიზნეს-ტრენინგების საშუალებაც, რაც კვლაიფიციური მუშახელს სხვდასხვა სექტორში დაასაქმებს. ჩვენ ვცდილობთ „ბიზნესინკუბატორის" ხელმძღვანელს ბატონ ალუ გამახარიას აღმოვუჩინოთ მაქსიმალური დახმარება. მთავრობა დაინტერესებულია, განვავითაროთ ეს პროექტები და დავასაქმოთ დევნილი საზოგადოება. მივცეთ მათ წინსვლისა და განვითარების საშუალება. ვფიქრობ, რამდენიმე თვეში ჩვენ შევძლებთ რეალური, ყველასათვის მისაღები შედეგების დადებას," - განაცხადა ვახტანგ ყოლბაიამ.

რუსთაველის თეატრში, საქართველოს კულტურისა და ძეგლთა დაცვის სამინისტროს მხარდაჭერით, გაიმართა წარმოდგენა - „მთვარის მოტაცება - ქართულ-აფხაზურ ურთიერთობათა მემკვიდრეობითობა".

ღონისძიება ქართველი კომპოზიტორის ოთარ თაქთაქიშვილის დაბადების 90 წლის იუბილეს მიეძღვნა და ხაზს უსვამს სამი ქართველი ხელოვანის: კონსტანტინე გამსახურდიას, ოთარ თაქთაქიშვილისა და შოთა ნიშნიანიძის კავშირს აფხაზეთთან.

ღონისძიებაში მონაწილეობდნენ თბილისის ზაქარია ფალიაშვილის სახელობის ოპერისა და ბალეტის სახელმწიფო პროფესიული თეატრის ორკესტრი, დირიჟორი ზაზა აზმაიფარაშვილი, ანსამბლი „რუსთავი", სოლისტები: მაყვალა ქასრაშვილი, ირინე შერაზადიშვილი, თემურ გუგუშვილი, ელდარ გეწაძე, ალუდა თოდუა, ირინე ალექსიძე, ლევან მაკარიძე, კონცერტმაისტერი - დარეჯან მახაშვილი.

ნაწყვეტები კონსტანტინე გამსახურდიას რომანიდან წაიკითხეს დიმიტრი ჯაიანმა და ელდინო საღარაძემ. ასევე, ოპერის ლიტერატურული მასალის, მონაწილეების, ხალხურ მუსიკასთან კავშირისა და ოპერის დადგმის შესახებ საღამოზე თამარ წულუკიძემ, ანზორ ერქომაიშვილმა, გიზო ჟორდანიამ ისაუბრებეს.

საღამოს ესწრებოდა აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია.

საქართველოს კულტურისა და ძეგლთა დაცვის სამინისტროსა და აფხაზეთის ავტონომიური რესპუბლიკის მთავრობასთან ერთად საღამოს ორგანიზატორი იყო აფხაზეთის სულიერებისა და კულტურის ცენტრი.

შოთა რუსთაველის სახელობის სახელმწიფო აკადემიურ თეატრში, გამოჩენილი ქართველი პოეტისა და საზოგადო მოღვაწის, შოთა რუსთაველის, საქართველოს სახელმწიფო, ილია ჭავჭავაძისა და გიორგი შარვაშიძის პრემიების ლაურეატის გენო კალანდიას დაბადებიდან 75 წლისადმი მიძღვნილი საიუბილეო საღამო გაიმართა.

საღამოს ესწრებდნენ აფხაზეთის ავტონომიური რესპუბლიკის მთავრობისა და საქართველოს საკანონმდებლო და აღმასრულებელი ხელისუფლების წარმომადგენლები. გენო კალანდიას მეგობრები, ოჯახის წევრები და საზოგადო მოღვაწეები. გენო კალანდიას ლექსების პირველი კრებული "ცა და ფოთლები" გამოვიდა 1966 წელს, სოხუმში, ხოლო პირველი პიესები "მთვარის საათი" "ადგილის დედა" და "ძე შეცდომილი" დაიდგა სოხუმის სახელმწიფო დრამატულ თეატრში, მერე უკვე საქართველოს სხვა თეატრებში.

გენო კალანდია 30-მდე პოეტური კრებულისა და დრამატული პიესის ავტორია. მათ შორის განსაკუთრებით გამოირჩევა: "ფესვები", "მიწის ჭრილობა", მწუხრის არაბესკები", "მესამე თვალი", "ასი სონეტი", "რეკვიემი", "ისევ რეკვიემი", "ერთტომეული". მისი ლექსები თარგმნილია და ცალკე წიგნებად გამოცემულია რამდენიმე ენაზე.

იგი სხვადასხვა დროს იყო აფხაზეთის თეატრალური საზოგადოებისა და დემოგრაფიული საზოგადოების პირველი თავმჯდომარე, მწერალთა კავშირის მდივანი, ალმანახ "ეგრისის" რედაქტორი, ჟურნალ "რიწის" პასუხისმგებელი მდივანი. მისი ძალისხმევით შეიქმნა ცნობილი აფხაზი პოეტისა და საზოგადო მოღვაწის გიორგი შარვაშიძის სახელობის სახელმწიფო პრემიების კომიტეტი, რომელსაც წლების განმავლობაში თავად ხელმძღვანელობდა. ამჟამად არის აფხაზეთის ლიტერატურისა და ხელოვნების შემოქმედებითი კავშირის თავმჯდომარე, საქართველოს მწერალთა ეროვნული აკადემიის ვიცე-პრეზიდენტი. გენო კალანდია იყო საქართველოს პარლამენტის მე-2, მე-3, მე-4 მოწვევის დეპუტატი, უგზო-უკვლო დაკარგულთა მოძიების საპარლამენტო კომისიის თავმჯდომარე. არის აფხაზეთის ავტონომიური რესპუბლიკის უმაღლესი საბჭოს დეპუტატი.

თანამედროვე ქართული მწერლობის განვითარებაში შეტანილი წვლილისათვის დაჯილდოებულია ღირსების ორდენით.

გენო კალანდიას საუბილეო საღამოში მონაწილეობა მიიღეს ქართული ხალხური სიმღერისა და ცეკვის სახელმწიფო აკადემიურმა ანსამბლ "რუსთავმა," აფხაზეთის სიმღერისა და ცეკვის სახელმწიფო ანსამბლ "აფხაზეთმა," აფხაზეთის სახელმწიფო საგუნდო კაპელამ, ჯგუფ "ფორტემ," ბორის ბედიამ. მისი ლექსები წაიკითხეს მსახიობებმა: მარინა კახიანმა, მურმან ჯინორიამ, მერაბ ყოლბაიამ, გიორგი გასვიანმა, ნინო შავგულიძემ, დათო ბერაძემ. საიუბილეო საღამოზე პოეტის ლექსების ორტომეულის პრეზენტაცია გაიმართა.

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია აფხაზეთის ვირტუალური არქივის,  www.ava.ge-ს პრეზენტაციას დაესწრო, რომელიც პრეზიდენტის სასახლეში გაიმართა.

პროექტი, რომელიც  საქართველოს პრეზიდენტის სარეზერვო ფონდის მიერ არის დაფინანსებული და აფხაზეთით დაინტერესებული პირებისათვის ვირტუალური სივრცის შექმნას ისახავს მიზანად, ნებისმიერი მომხმარებლისთვის ხელმისაწვდომი  იქნება.

ვებ-გვერდზე დაცულია აფხაზეთის შესახებ საარქივო ინფორმაცია: ფოტო, ვიდეო, წიგნი, გაზეთი, ხელნაწერი, რუკა; ასევე საოჯახო არქივები. ეროვნული არქივების და მუზეუმების მასალების გარდა, ava.ge პირად არქივებსაც აგროვებს; ყველა დაინტერესებულ მომხმარებელს შეუძლია საიტის ადმინისტრაციას მიაწოდოს ინფორმაცია, რომელიც შემდეგ სხვა მომხმარებლებისთვის გახდება ხელმისაწვდომი.

პრეზენტაციაზე შეკრებილ საზოგადოებას სიტყვით საქართველოს პრეზიდენტმა მიმართა და ყურადღება გაამახვილა პროექტის მნიშვნელობაზე:

„აფხაზეთის ვებ-გვერდი კიდევ ერთი ნათელი გზავნილია აფხაზებისადმი და მთლიანად,  საქართველოს მოსახლეობისადმი, თუ როგორ ხედავს ქართული სახელმწიფო ჩვენი მშვენიერი ქვეყნის წარსულსა და მომავალს. ჩვენი სიმდიდრე და სიძლიერე მდგომარეობს სწორედ იმ მრავალფეროვნებაში, მთლიანობასა და ამ მთლიანობის ჰარმონიულ განვითარებაში, რომელსაც ჩვენ მივაღწიეთ და რომელსაც საქართველოს მოქალაქეები არა მხოლოდ ვაფასებთ, არამედ ვუფრთხილდებით კიდეც“, - განაცხადა გიორგი მარგველაშვილმა.

„ახმეტელის თეატრში", 4-5 ივნისს, კონსტანტინე გამსახურდიას სახელობის სოხუმის სახელმწიფო დრამატულმა თეატრმა სპექტაკლ „მილიონრები"-ს პრემიერა გამართა, რომლის ავტორი და რეჟისორიც დათო საყვარელიძეა. ერთმოქმედებიანი სპექტაკლი ედუარდო დე ფილიპოს პიესების მიხედვით დაიდგა, რომლის ქორეოგრაფიაც ეკა არჩაიას ეკუთვნის. რეჟისორის თანაშემწე კი ლეილა მურღულიაა.

სპექტაკლს ესწრებოდნენ აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, აფხაზეთის ავტონომიური რესპუბლიკის უმაღლესი საბჭოს თავმჯდომარე გია გვაზავა, აფხაზეთის განათლებისა და კულტურის მინისტრი დიმიტრი ჯაიანი.

დავით საყვარელიძეს თქმით, სპექტაკლის ფორმის იდეა აგებულია სოხუმის დრამატული თეატრის მსახიობების გასაოცარ ისტორიებზე, ზოგჯერ ძალიან ტრაგიკულზე და ზოგჯერ ძალიან სასაცილოზე.

რეჟისორმა სპექტაკლში გამოიყენა ტექსტები ცნობილი იტალიელი დრამატურგის ედუარდო დე ფილიპოს რამდენიმე პიესიდან.

ომი ყველგან ომია, იტალიშიც და საქართველოშიც. ალბათ, ამიტომაცაა, რომ სპექტაკლში გათამაშებული დრამატული და კომიკური სიტუაციეები, მოქმედ პირთა ხასიათები და ურთიერთობები ასეთი ნაცნობი და ახლობელია თანამედროვე ქართველი მაყურებლისთვის" - განაცხადა დათო საყვარელიძემ.

სპექტაკლში მონაწილეობდნენ სოხუმის თეატრის დასის მსახიობები: ბადრი ბეგალიშვილი, მარინა სოლომონია, პაატა ვახტანგიშვილი, ვერიკო კალანდია, ნიკა წერედიანი, დათო ბერაძე, ბესო ქარჩავა, ჯულიეტა პაკელიანი, ლონდა კაცია, ლიანა მიქაშავიძე, ნინო შავგულიძე, სანათა ძაძამია, ნუგზარ წერედიანი, იუკა ვასაძე, ედემ ხვიჩია, ლელა შარაბიძე და იზოლდა ბოკუჩავა.