აფხაზეთის ავტონომიური რესპუბლიკის მთავრობის და საქართველოში უკრაინის საელჩოს მხარდაჭერით, აფხაზეთიდან დევნილი 12-დან 15 წლამდე ასაკის მოზარდები ბავშვთა მე-11 საერთაშორისო ფესტივალში „მოდით შევცვალოთ სამყარო უკეთესობისკენ" მიიღებენ მონაწილეობას, რომელიც უკრაინაში, „არტეკის" საერთაშორისო საბავშვო ცენტრში გაიმართება.

დევნილი მოზარდები უკრაინაში თბილისის საერთაშორისო აეროპორტიდან გამთენიისას გაემგზავრნენ. ბავშვები აფხაზეთის ავტონომიური რესპუბლიკის განათლებისა და კულტურის მინისტრმა თეიმურაზ მაისურაძემ  გააცილა.

ფესტივალზე ახალგაზრდებს შესაძლებლობა ექნებათ გაეცნონ მსოფლიოს ხალხთა კულტურას და თავად წარმოაჩინონ საქართველოს კულტურული ტრადიციები. ბავშვები ასევე ჩაერთვებიან ერთა ლიგის მესამე გენერალური ასამბლეის მუშაობაში, სადაც მსოფლიოს მრავალ დელეგაციასთან ერთად, მონაწილეობას მიიღებენ დისკუსიებში ბავშვთა უფლებებსა და სხვა აქტუალურ საკითხებზე.

აფხაზეთის ავტონომიური რესპუბლიკის მთავრობის ინიციატივითა და ინტეგრაციისა და სოლიდარობის ფონდის „FINSOL"-ის მხარდაჭერით აფხაზეთიდან დევნილი ბავშვები დასასვენებლად ესპანეთში გაემგზავრნენ.

სოციალურად დაუცველი მოზარდები ესპანეთში 31 აგვისტომდე დარჩებიან. ბავშვები ესპანურ ოჯახებში იცხოვრებენ.

დევნილი მოზარდების მგზავრობისა და იქ ცხოვრების ხარჯებს აფხაზეთის მთავრობა და „FINSOL" -ი უზრუნველყოფს. აფხაზეთის ა/რ მთავრობა და ფონდი „FINSOL"-ი 2008 წლიდან თანამშრომლობს. ხელშეკრულების თანახმად, ყოველწლიურად სოციალურად დაუცველი, დევნილი ბავშვები საზაფხულო არდადეგებს ესპანეთში ატარებენ.

ბავშვები აფხაზეთის დევნილთა საქმეების დეპარტამენტის თავმჯდომარემ, გიორგი ბობოხიძემ თბილისის აეროპორტიდან დღეს დილით გააცილა.

საქართველოს პარლამენტის ეროვნული ბიბლიოთეკის საგამოფენო დარბაზში, გალაკტიონ ტაბიძის 120 წლისთავისადმი მიძღვნილი  ლიტერატურული საღამო და კრებულის „გალაკტიონი, ზღვა და აფხაზეთი" პრეზენტაცია მოეწყო. ღონისძიებას აფხაზეთის ავტონომიური რესპუბლიკის მთავრობის თავმჯდომარე გიორგი ბარამია, გალაკტიონ ტაბიძის ძმისშვილი ნოდარ ტაბიძე, ქართველი პოეტები და მწერლები დაესწრნენ.

ნატო კორსანტიას წიგნში „გალაკტიონი, ზღვა და აფხაზეთი" თავმოყრილია დიდი პოეტის აფხაზეთისადმი მიძღვნილი ლექსები, დღიურები, უბის წიგნაკები და ჩანაწერები. გალაკტიონი სიღრმით ეცნობოდა აფხაზეთის ისტორიულ ძეგლებს, ქალაქებს, სოფლებს, უბრალო ადამიანებს, მათ ტრადიციებს და ამ ყველაფერს წიგნში აქსოვდა. კრებულში გაეცნობით აფხაზეთში შექმნილ ნაწარმოებებს, საზოგადოებისთვის აქამდე უცნობ  საარქივო მასალებს და თანამედროვეთა მოგონებებს დიდი პოეტის აფხაზეთთან ურთიერთობებზე.

ლიტერატურული საღამო აფხაზეთის ავტონომიური რესპუბლიკის მთავრობის მხარდაჭერითა და აფხაზეთის განათლებისა და კულტურის სამინისტროს ორგანიზებით გაიმართა.

აფხაზეთის ავტონომიური რესპუბლიკის მთავრობის ორგანიზებით, თბილისში „აფხაზური კულტურის საღამო" გაიმართა. ღონისძიება დღეს, ევროპის სახლში მოეწყო, რომელსაც აფხაზეთის ავტონომიური რესპუბლიკის მთავრობის თავმჯდომარე გიორგი ბარამია და მიწვეული სტუმრები ესწრებოდნენ.

პროგრამის ფარგლებში, ევროპის სახლის საგამოფენო დარბაზში ნუგზარ ანთელავას ქართულ-აფხაზური წიგნის „აფხაზური მითები და რიტუალები" პრეზენტაცია შედგა, რომელიც აფხაზი ხალხის მითოშემოქმედებისა და რიტუალური პრაქტიკის სალექსიკონო აღწერას წარმოადგენს. პარალელურად მოეწყო აფხაზი მხატვრის, ელდარ ქავშბაიას აფხაზური მითების თემაზე ექსკლუზიურად შექმნილი ილუსტრაციების გამოფენა.

„აფხაზური კულტურის საღამო" ახალგაზრდა აფხაზი დიზაინერის, თინა კიუტის მიერ აფხაზეთის ისტორიულ ქალაქებზე შექმნილი საღამოს კაბებისა და აფხაზეთის ქალაქებზე შექმნილი სლაიდ-შოუს ჩვენებით დასრულდა.

აფხაზეთის ავტონომიური რესპუბლიკის მთავრობის თავმჯდომარის გიორგი ბარამიას ინიციატივით, საქველმოქმედო აქცია დევნილი ბავშვებისათვის გრძელდება. აფხაზეთის ა/რ მთავრობამ ამჯერად კოდორის ხეობიდან დევნილი ბავშვები 3D ფორმატში გადაღებული ანიმაციური ფილმის „მადაგასკარი 3" კინოჩვენებაზე მიიწვია.

მოზარდები კინოთეატრ „რუსთაველს" დღეს სტუმრობდნენ. აქციაში კოდორის ხეობიდან დევნილი 30-მდე ბავშვი ჩაერთო. მათთან ერთად, ფილმის ჩვენებას აფხაზეთის მთავრობის წარმომადგენლებიც დაესწრნენ.

ღონისძიება რეგიონული მართვის საკითხებში აფხაზეთის მინისტრის აპარატის ორაგნიზებითა და კინოთეატრ „რუსთაველის" მხარდაჭერით მოეწყო.

აფხაზეთის ავტონომიური რესპუბლიკის მთავრობის თავმჯდომარის გიორგი ბარამიას ინიციატივით, აფხაზეთის მთავრობის პირველი თავმჯდომარის, არზაყან ემუხვარის ცხოვრებისა და მოღვაწეობის ამსახველი წიგნი - „ქედუხრელი რაინდი" გამოიცა, რომლის პრეზენტაცია საქართველოს ეროვნულ არქივში გაიმართა. პრეზენტაციის პარალელურად, ოქუმის სკოლის დაარსებიდან 160 წლისთავისადმი მიძღვნილი, აფხაზეთში პირველი საგანმანათლებლო კერების საარქივო მასალების გამოფენა მოეწყო. ღონისძიებას საქართველოს პრეზიდენტის დედა გიული ალასანია დაესწრო.

გიორგი ბარამიამ არზაყან ემუხვარის შთამომავალსა და ნაშრომის - „ქედუხრელი რაინდი" ავტორს, ნატო მარშანიას ქართულ ისტორიოგრაფიაში კიდევ ერთი საინტერესო წიგნის შემატებისთვის მადლობა გადაუხადა.

აფხაზეთის მთავრობის თავმჯდომარის განცხადებით, აუცილებელია, რომ თაობებმა იცოდნენ იმ გმირების შესახებ, რომლებიც ქვეყნისა და ქართულ-აფხაზური ურთიერთობების ისტორიას ქმნიან.

„ვფიქრობ სიმბოლურია, რომ არზაყან ემუხვარი, საქართველოს დემოკრატიული რესპუბლიკის მთავრობის პირველი თავმჯდომარის ნოე ჟორდანიას გვერდით განისვენებს საფრანგეთში, ლევილის ქართულ სასაფლაოზე. ასევე სიმბოლურია, რომ წიგნის პრეზენტაცია იმ გამოფენის ფონზე მიმდინარეობს, რომელიც ისტორიულ სამურზაყანოში ქართულ საგანმანათლებლო კერების დაარსებას ეძღვნება. სწორედ ოქუმის სკოლა იყო პირველი საგანმანათლებლო კერა მთელ აფხაზეთში, რომელმაც საქართველოს მისცა გამოჩენილი მოღვაწეები არზაყან ემუხვარი, აკაკი ჩხენკელი და ილია ვეკუა. ჩვენ ვაგრძელებთ სახელოვანი წინაპრების საქმეს. დარწმუნებული ვართ, რომ ისტორიული სამართლიანობა აღსდგება, რასაც საქართველოს უკუპირებული ტერიტორიების დეოკუპაცია და ქვეყნის გამთლიანება ჰქვია,"- განაცხადა გიორგი ბარამიამ.

ღონისძიება აფხაზეთის ავტონომიური რესპუბლიკის მთავრობის მხარდაჭერით, აფხაზეთის განათლებისა და კულტურის სამინისტროსა  და საქართველოს ეროვნულ არქივის ორგანიზებით გაიმართა.

აფხაზეთის ავტონომიური რესპუბლიკის დევნილთა საქმეების დეპარტამენტის ორგანიზებით, ნუცუბიძის მე-4 მ/რ-ში, წყალდიდობის შედეგად დაზარალებულმა, ყოფილ თბილრენმშენის კომპაქტურ ჩასახლების ობიექტში მცხოვრებმა დევნილებმა დახმარება მიიღეს.

აღნიშნულ ობიექტში ჩასახლებულ, აფხაზეთიდან იძულებით გადაადგილებულ, 70-მდე ოჯახს სხვადასხვა სახის სასურსათო პროდუქტი გადაეცა.

7-8 ივნისს ჟენევის მოლაპარაკებების მორიგი, მე-20 რაუნდი გაიმართება. აფხაზეთის ავტონომიური რესპუბლიკის მთავრობის თავმჯდომარე გიორგი ბარამია ჟენევის მოლაპარაკებებში მონაწილეობის მისაღებად შვეიცარიაში უკვე გაემგზავრა. ქართულ დელეგაციას საგარეო საქმეთა მინისტრის მოადგილე სერგი კაპანაძე უხელმძღვანელებს.

ქართული მხარე მოლაპარაკებებზე დააყენებს რუსეთის მიერ ძალის გამოუყენებლობის ვალდებულების აღების და საქართველოს ოკუპირებულ ტერიტორიებზე უსაფრთხოების საერთაშორისო მექანიზმების შექმნის აუცილებლობის საკითხებს, განიხილავს აფხაზეთსა და ცხინვალის ოკუპირებული რეგიონებიდან იძულებით გადაადგილებული პირებისა და დევნილების საცხოვრებელ ადგილებში დაბრუნების ფუნდამენტური უფლების უზრუნველყოფისთვის აუცილებელ პირობებს, იმსჯელებს  საქართველოს ოკუპირებულ რეგიონებში ადამიანის უფლებების დარღვევის შესახებ.

აფხაზეთის ავტონომიური რესპუბლიკის მთავრობის თავმჯდომარის გიორგი ბარამიას ინიციატივით, აფხაზეთის ბაგა-ბაღის „სინათლე"-ს აღსაზრდელებს სხვადასხვა სახის საჩუქრები გადაეცათ. 38-მა დევნილმა ბავშვმა საკანცელარიო და ჰიგიენური ნაკრები საჩუქრად მიიღო.

აღნიშნული აქცია საქველმოქმედო ხასიათს ატარებდა, რომელიც განსაკუთრებულ დავალებათა საკითხებში აფხაზეთის მინისტრის აპარატის ორგანიზებით განხორციელდა.

ბავშვთა დაცვის საერთაშორისო დღესთან დაკავშირებით, აფხაზეთის ავტონომიური რესპუბლიკის მთავრობის ინიციატივითა და ჟვანიას სახელობის ბავშვთა ახალი კლინიკის მხარდაჭერით, აფხაზეთიდან დევნილ 15 წლამდე ასაკის 100 ბავშვს უფასო სამედიცინო-პროფილაქტიკური გასინჯვები ჩაუტარდა.

გამოკვლევებს აფხაზეთის ავტონომიური რესპუბლიკის მთავრობის თავმჯდომარე გიორგი ბარამია და აფხაზეთის ავტონომიური რესპუბლიკის შრომის, ჯანმრთელობისა და სოციალური დაცვის მინისტრი ლექსო ლაგვილავა დაესწრნენ. ბავშვებს საჩუქრებიც დაურიგდათ.

ღონისძიება აფხაზეთის ავტონომიური რესპუბლიკის შრომის, ჯანმრთელობისა და სოციალური დაცვის სამინისტროს ორგანიზებით მოეწყო და მისი მიზანია ბენეფიციართა ჯანმრთელობის მდგომარეობის შესწავლა, ქრონიკულ პაციენტთა გამოვლენა და პრევენციული ღონისძიებების დასახვა.

მსგავ აქციებს აფხაზეთის ავტონომიური რესპუბლიკის მთავრობა მომავალშიც განახორციელებს.

ბავშვთა დაცვის საერთაშორისო დღესთან დაკავშირებით, აფხაზეთის ავტონომიური რესპუბლიკის მთავრობის დევნილთა საქმეების დეპარტამენტის ორგანიზებით, ცნობილი ბრენდის „კოკა-კოლა ბოთლერს ჯორჯიას" ადმინისტრაციამ 30-მდე დევნილი ბავშვისათვის „კოკა-კოლას" ქარხანაში საინტერესო ტური მოაწყო.

მოზარდებმა ქარხნის უახლეს ულტრათანამედროვე წარმოების ტექნოლოგია დაათვალიერეს და  ტექნოლოგიის დარგის მნიშვნელობას გაეცნენ.

ტურის ბოლოს, დევნილ ბავშვებს „კოკა-კოლა"-ს ადმინისტრაციის მიერ სამახსოვრო საჩუქრები დაურიგდათ.

აფხაზეთის ავტონომიური რესპუბლიკის მთავრობის თავმჯდომარის გიორგი ბარამიას ინიციატივა „საჩუქარი ყველა დევნილ ბავშვს" სამეგრელოსა და იმერეთის რეგიონში გრძელდება.

აქციის ფარგლებში, ბავშვთა დაცვის საერთაშორისო დღესთან დაკავშირებით, სამეგრელოსა და იმერეთის რეგიონში მცხოვრები აფხაზეთიდან დევნილი 1300-ზე მეტი ბავშვი საჩუქარს მიიღებს. ტვირთი თბილისიდან დასავლეთ საქართველოში უკვე გაიგზავნა.

აქცია „საჩუქარი ყველა დევნილ ბავშვს", მთელი საქართველოს მასშტაბით ხორციელდება. საჩუქრები უკვე დაურიგდათ ქ. თბილისში, ქ. თელავში, სურამში, ქ. მარნეულში, ქ. ქუთაისში, თეთრიწყაროს რაიონში, წინწყაროსა და ქვემო ბოლნისში მცხოვრებ დევნილ ბავშვებს.

აქციის პარტნიორია ფონდი „კეთილი სამარინელი საქართველოში".

დღეს, აფხაზეთის ხელოვნების სკოლების ახალგაზრდული კონკურს-ფესტივალი „მუზა 2012" გაიხსნა. ფესტივალს აფხაზეთის ავტონომიური რესპუბლიკის თავმჯდომარე, გიორგი ბარამია და მთავრობის წევრები დაესწრნენ.

ფესტივალი წელს პირველად იმართება და მასში აფხაზეთის სახელოვნებო, სამუსიკო და სამხატვრო სკოლების 200-ზე მეტი მოსწავლე  იღებს მონაწილეობას. ღონისძიება მ. ბერძენიშვილის სახელობის კულტურის ცენტრ „მუზა"-ში იმართება.

ფესტივალი 12:00 საათზე, აფხაზეთის სამხატვრო სკოლების მოსწავლეთა ნამუშევრების გამოფენით გაიხსნა. აფხაზეთის სახელოვნებო სკოლების მოსწავლეების მიერ შესრულდა კლასიკური მუსიკის ნაწარმოებები სიმფონიური ორკესტრის თანხლებით. ასევე, წარმოდგენილი იყო ფორტეპიანოს, სიმებიანი ორკესტრის, საესტრადო და ფოლკლორული განყოფილებები. დღის ბოლოს, სახელოვნებო სკოლების პედაგოგთა მონაწილეობით კონცერტი გაიმართა.  

კონკურს-ფესტივალი „მუზა 2012" აფხაზეთის ა/რ მთავრობის მხარდაჭერითა და აფხაზეთის განათლებისა და კულტურის  სამინისტროს ორგანიზებით იმართება და ის  29 მაისს დასრულდება.

აფხაზეთის ავტონომიური რესპუბლიკის მთავრობის თავმჯდომარის გიორგი ბარამიას ინიციატივით, აფხაზეთის ბაგა-ბაღი „იმედის" აღსაზრდელებს საჩუქრები გადაეცათ. ბავშვთა საერთაშორისო დღესთან დაკავშირებით, 40-მდე დევნილმა ბავშვმა საკანცელარიო და ჰიგიენური ნაკრები საჩუქრად მიიღო.

საქველმოქმედო აქცია განსაკუთრებულ დავალებათა საკითხებში აფხაზეთის მინისტრის აპარატის ორგანიზებით განხორციელდა.

აფხაზეთის ავტონომიური რესპუბლიკის მთავრობის ინიციატივით, აღმოსავლეთ საქართველოში აფხაზეთის მთავრობის წარმომადგენლობის 20-მდე თანამშრომელმა მ.იაშვილის სახელობის ბავშვთა კლინიკურ საავადმყოფოში არსებულ სისხლის ბანკში სისხლი ჩააბარა.

მათ მიერ ჩაბარებული სისხლი ლეიკემიით დაავადებულ ბავშვებს დაეხმარება. იაშვილის სახელობის ბავშვთა კლინიკაში ამ დროისთვის ლეიკემიითა და ლიმფომიით დაავადებული ათეულობით ბავშვი მკურნალობს.

აფხაზეთის ავტონომიური რესპუბლიკის მთავრობის წარმომადგენლები მსგავს აქციებში მონაწილეობას მომავალშიც მიიღებენ.