გიორგი ძიგუა იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრად დაინიშნა. ახალი მინისტრი თანამშრომლებს აფხაზეთის ავტონომიური რესპუბლიკის მთავრობის თავმჯდომარე ლევან მგალობლიშვილმა წარუდგინა.

გიორგი ძიგუა წლების განმავლობაში სხვადასხვა თანამდებობაზე მუშაობდა.

1977-1980 წლებში იყო საქართველოს საზღვაო სანაოსნოს პირველი თანრიგის მეზღვაური.

1980-1981 წლებში რსფსრ-ის ჩიტის ოლქის ქალაქ კრასნოკამენსკის გეოლოგიური ექსპედიციის მე-5 თანრიგის სამთო-გამსვლელი მაღაროელი.

1981-1985 წლებში ბათუმის მექანიკური ქარხნის საქონელმცოდნე, მომმარაგებელი.

1985-1989 წლებში აჭარის სამაშველო სამსახურის პირველი თანრიგის მაშველი-მყვინთავი.

1989-1995 წლებში ესპანეთი-საბჭოთა ერთობლივი საწარმო „ამიგოს“ კომერციული დირექტორი.

1996-2000 წლებში თბილისის პოლიციის მთავარი სამმართველო გაზეთი "იმედის" იურისტი.

2000-2005  წლებში მუშაობდა  საქართველოს ადვოკატთა კოლეგიის მთაწმინდის ადვოკატურაში ადვოკატად. 

2004-2005  წლებში თბილისის  სახელმწიფო სამხატვრო აკადემიის იურისტი, იურიდიული სამსახურის უფროსი.

2004 -2005  წლებში - ბაქტერიოფაგის, მიკრობიოლოგიისა და ვირუსოლოგიის სამეცნიერო კვლევითი ინსტიტუტის იურისტი.

2005-2006 წლებში - იურიდიული ფირმა „მთაწმინდის ადვოკატურა“ ადვოკატი.

2007-2012 წლებში - თბილისის  სახელმწიფო სამხატვრო აკადემიაში იკავებდა სხვადასხვა პოზიციებს.

2006-2020  წლებში იყო საქართველოს ადვოკატთა ასოციაცია გ. ძიგუას საადვოკატო ბიუროს ადვოკატი.

2012  წელს - მთაწმინდის საარჩევნო ოლქის იურისტი.

2012 წლიდან მოქალაქეთა პოლიტიკური გაერთიანება „ქართული ოცნება - დემოკრატიული საქართველოს“ წევრი

2012 წლის 1 ნოემბრიდან  მთაწმინდის #1 საარჩევნო ოლქის მაჟორიტარი დეპუტატის ზაზა პაპუაშვილის ბიუროს თანამშრომელი. 

2013, 2014, 2016 წლები მთაწმინდის შტაბის საარჩევნო სპეციალისტი, იურისტი.

2016 წელი დიდუბის საარჩევნო შტაბის იურისტი.

2017 წელი მთაწმინდის შტაბის  იურისტი.

2018 წელი - დიდუბის მე-15 ოლქის მაჟორიტარი დეპუტატის ზაზა პაპუაშვილის ბიუროს თანამშრომელი.

2020 წელი  დიდუბე-ჩუღურეთის მე-6  საარჩევნო ოლქის მაჟორიტარი დეპუტატის გიორგი ვოლსკის  ბიუროს თანამშრომელი. 

2023 წლის 1 აგვისტოდან - შპს "გიორგი ძიგუა და ადვოკატების" დირექტორი.

აფხაზეთის ავტონომიური რესპუბლიკის უმაღლესი საბჭოს დეპუტატებმა მთავრობის ახალ თავმჯდომარესა და მინისტრთა კაბინეტის შემადგენლობას ნდობა დღეს გამოუცხადეს. აფხაზეთის ავტონომიური რესპუბლიკის მთავრობის თავმჯდომარედ ლევან მგალობლიშვილი დაინიშნა.

აფხაზეთის ჯანმრთელობისა და სოციალური დაცვის მინისტრი ლაშა ქარდავა გახდა. ახალი მინისტრი თანამშრომლებს აფხაზეთის ავტონომიური რესპუბლიკის მთავრობის თავმჯდომარე ლევან მგალობლიშვილმა წარუდგინა.

ლაშა ქარდავას სხვადასხვა სექტორში მუშაობის მრავალწლიანი გამოცდილება აქვს.

1996-2005 წლებში მუშაობდა სახელმწიფო საგადასახადო ინსპექციაში სხვადასხვა პოზიციებზე.

2005-2006 წლებში იყო თბილისის საგადასახადო სამსახურის აუდიტის განყოფილების მთავარი ინსპექტორი.

2006-2015 წლებში აუდიტორული ფირმა შპს „კოლხი 2005“-ის აუდიტი.

2010 წლიდან - შპს „გლობალ აუდიტის" დირექტორი - პარტნიორი

2015-2016 წლებში ს.ს "გუდვილის" სამეთვალყურეო საბჭოსთან არსებული აუდიტისა და მონიტორინგის კომიტეტის ფინანსური ანალიზის სპეციალისტი.

2019 წლიდან - შპს „ჰეალაინ ინტერნეიშენელის“ ფინანსური მენეჯერი, 2023 წლიდან - შპს „აბგრეიდ კონსტრაქშენის“ შიდა აუდიტისა და კონტროლის მენეჯერი.

აფხაზეთის ავტონომიური რესპუბლიკის უმაღლესი საბჭოს დეპუტატებმა მთავრობის ახალ თავმჯდომარესა და მინისტრთა კაბინეტის შემადგენლობას ნდობა დღეს გამოუცხადეს. აფხაზეთის ავტონომიური რესპუბლიკის მთავრობის თავმჯდომარედ ლევან მგალობლიშვილი დაინიშნა.

აფხაზეთის მთავრობის თავმჯდომარემ განათლებისა და კულტურის ახალი მინისტრი წარადგინა

აფხაზეთის ავტონომიური რესპუბლიკის მთავრობის თავმჯდომარე ლევან მგალობლიშვილმა მთავრობის დამტკიცების შემდეგ, აფხაზეთის განათლებისა და კულტურის სამინისტროს თანამშრომლებს ახლად დანიშნული მინისტრი დავით მორგოშია პირადად წარუდგინა.

დავით მორგოშიას საჯარო და კერძო სექტორში საქმიანობის გამოცდილება აქვს.

2018 წელს დაინიშნა საქართველოს საელჩოში იტალიის რესპუბლიკაში, ელჩის მრჩევლის ასისტენტად.

ასევე 2018 წელს სტაჟირება გაიარა საქართველოს საგარეო საქმეთა სამინისტროს აზიისა და ოკეანეთის დეპარტამენტში.

2019-2021 წლებში მუშაობდა საერთაშორისო სამეცნიერო ჟურნალ “ბიზნეს-ინჟინერინგში”.

2021 წელს იყო შპს New Way/ ნიუ ვეი სავაჭრო სააგენტოს თანადამფუძნებელი.

2022-2023 წლებში იყო Concentrix USA-ში Spotify-ის მომხმარებელთა იტალიურენოვანი მხარდამჭერი.

2023-2024 წლებში მუშაობდა IT კომპანია TNET-ში Front-end დეველოპერად (React/NextJS)

აფხაზეთის იძულებით გადაადგილებულ პირთა მინისტრად დავით ფაცაცია დაინიშნა. მინისტრი თანამშრომლებს აფხაზეთის ავტონომიური რესპუბლიკის მთავრობის თავმჯდომარე ლევან მგალობლიშვილმა წარუდგინა და წარმატებული საქმიანობა უსურვა.

დავით ფაცაცია წლების განმავლობაში სხვადასხვა თანამდებობას იკავებდა.

2001-2004 წლებში იყო აშშ-ის საერთაშორისო განვითარების სააგენტოს (USAID) და აშშ-ის განათლებისა და განვითარების აკადემიის (AED) პროგრამის „ახალგაზრდა ლიდერები მშვიდობისა და განვითარებისათვის სამხრეთ კავკასიაში“ ტრენერ-კოორდინატორი.

2005 წელს გახდა ფონდი „ღია საზოგადოება - საქართველოს“, პროგრამის „ევროპის სამეზობლო პოლიტიკა“ (ENP Georgia) კონფლიქტების ჯგუფის ხელმძღვანელი.

2006 წელს იყო საერთაშორისო ახალგაზრდული ორგანიზაცია „AIESEC Georgia“-ს დამფუძნებელი და ვიცე-პრეზიდენტი.

2005-2009 წლებში ფონდი „აფხაზეთის მომავალის“ პროექტების მენეჯერი.

2011-2017 წლებში იყო შპს „ავიატორის“ კომერციული დირექტორი.

2019 წელს დაინიშნა ნდობის აღდგენისა და შერიგების საკითხებში აფხაზეთის ავტონომიური რესპუბლიკის მინისტრად.

2019-2021 წლებში იყო იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრი.

2021 წელს აფხაზეთის ავტონომიური რესპუბლიკის მთავრობაში განხორციელებული საკადრო ცვლილებების შემდეგ დაინიშნა აფხაზეთის ავტონომიური რესპუბლიკის აფხაზეთის ავტონომიური რესპუბლიკიდან იძულებით გადაადგილებულ პირთა-დევნილთა მინისტრად, ხოლო 2022 წელს სამინისტროს სახელწოდების ცვლილებიდან გამომდინარე გახდა აფხაზეთის ავტონომიური რესპუბლიკის იძულებით გადაადგილებულ პირთა მინისტრი.

2022 წლიდან ლექციებს კითხულობს თბილისის სახელმწიფო უნივერსიტეტის ეკონომიკისა და ბიზნესის ფაკულტეტზე.

აფხაზეთის ავტონომიური რესპუბლიკის უმაღლესი საბჭოს დეპუტატებმა მთავრობის ახალ თავმჯდომარესა და მინისტრთა კაბინეტის შემადგენლობას ნდობა გამოუცხადეს. აფხაზეთის ავტონომიური რესპუბლიკის მთავრობის თავმჯდომარედ ლევან მგალობლიშვილი დაინიშნა. 

ლევან მგალობლიშვილმა უმაღლეს საბჭოში მინისტრთა კაბინეტის განახლებული შემადგენლობა და მთავრობის სამოქმედო გეგმა წარადგინა.

განახლებულ კაბინეტში აფხაზეთის მთავრობის თავმჯდომარის მოადგილე ანზორ მარგიანი იქნება. იძულებით გადაადგილებულ პირთა მინისტრის თანამდებობას დავით ფაცაცია, განათლებისა და კულტურის მინისტრის დავით მორგოშია, ჯანმრთელობისა და სოციალური დაცვის მინისტრის ლაშა ქარდავა, ფინანსთა და ეკონომიკის მინისტრის ლევან თევზაია, ხოლო იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის თანამდებობას გიორგი ძიგუა დაიკავებს.

დღესვე მთავრობის ახალი თავმჯდომარე აპარატის თანამშრომლებს შეხვდა და თავის ხედვებსა და სამომავლო გეგმებზე ისაუბრა. აფხაზეთის მთავრობაში ლევან მგალობლიშვილი აფხაზეთის ავტონომიური რესპუბლიკის უმაღლესი საბჭოს თავმჯდომარე ჯემალ გამახარიამ წარადგინა.

ლევან მგალობლიშვილი წლების განმავლობაში სხვადასხვა პოზიციებზე მუშაობდა. იყო საქართველოს მე-9 და მე-10 მოწვევების პარლამენტის წევრი. მან აფხაზეთის ავტონომიური რესპუბლიკის მთავრობის თავმჯდომარის თანამდებობაზე რუსლან აბაშიძე შეცვალა, რომელიც აღნიშნულ პოზიციას 2019 წლიდან იკავებდა.

მინდა საზოგადოებას ჩემი გადაწყვეტილების შესახებ ვაცნობო. დღეს მე ვტოვებ აფხაზეთის ავტონომიური რესპუბლიკის მთავრობის თავმჯდომარის თანამდებობას.

2019 წლიდან, დღემდე, აფხაზეთის მთავრობის თავმჯდომარის თანამდებობაზე ყოფნის პერიოდში, ჩემს გუნდთან ერთად, ჩვენი საზოგადოების ინტერესების დასაცავად ბევრ გამოწვევას ღირსეულად ვუპასუხეთ. საფუძველი ჩავუყარეთ ბევრ ახალ ინიციატივას და გვაქვს მნიშვნელოვანი შედეგები.

მადლობა მინდა გადავუხადო აფხაზეთის მთავრობის წევრებს, ერთობლივად განხორციელებული საქმიანობისთვის, სამშვიდობო პოლიტიკის, ინსტიტუციური გაძლიერების, დევნილი მოსახლეობის ჯანმრთელობის დაცვის, განათლების, კულტურის, სპორტისა და ახალგაზრდობის, ეკონომიკური საქმიანობისა და სოციალური უზრუნველყოფის მიმართულებით განხორციელებული უმნიშვნელოვანესი პროგრამებისა და პროექტებისთვის. განსაკუთრებული თანადგომისა და მხარდაჭერისთვის მადლობა მინდა გადავუხადო აფხაზეთის უმაღლეს საბჭოს. მადლობა საქართველოს აღმასრულებელ და საკანონმდებლო ხელისუფლებას ჩვენი საქმიანობის მხარდაჭერისთვის.

მადლობას ვუხდი საქართველოში აკრედიტებული დიპლომატიური კორპუსისა და საერთაშორისო ორგანიზაციების წარმომადგენლებს, რომელთა ჩართულობით, ამ წლების განმავლობაში, აფხაზეთიდან დევნილი მოსახლეობის მხარდასაჭერად არაერთი მნიშვნელოვანი პროექტი და ღონისძიება განხორციელდა.

განსაკუთრებული მადლობა მინდა გადავუხადო აფხაზეთის საზოგადოებას. ჩემთვის დიდი პატივი და ამავდროულად, დიდი პასუხისმგებლობა იყო ვყოფილიყავი მათ სამსახურში და ერთად გვეკეთებინა საქმე, რომელიც კიდევ უფრო მიგვაახლოებდა მიზანთან, რომელსაც გაყოფილი საზოგადოებების გაერთიანება და ქვეყნის ტერიტორიული მთლიანობის აღდგენა წარმოადგენს. მჯერა რომ, ჩვენი ხელისუფლების თანმიმდევრული სამშვიდობო პოლიტიკითა და საერთაშორისო საზოგადოების მხარდაჭერით, მოხდება ჩვენი ერთობლივი მიზნის განხორციელება - ქვეყნის დეოკუპაცია, მშვიდობიანი განვითარება და სტაბილურობის უზრუნველყოფა.

კიდევ ერთხელ მადლობას ვუხდი ჩემი გუნდის წევრებს, უდიდესი მადლობა ჩემს ოჯახს! - რუსლან აბაშიძე

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე უგზო-უკვლოდ დაკარგულთა საერთაშორისო დღისადმი მიძღვნილ ღონისძიებას დაესწრო. ღონისძიება შერიგებისა და სამოქალაქო თანასწორობის საკითხებში სახელმწიფო მინისტრის აპარატის ორგანიზებით გაიმართა.

ღონისძიება შერიგებისა და სამოქალაქო თანასწორობის საკითხებში სახელმწიფო მინისტრმა თეა ახვლედიანმა გახსნა. მინისტრმა 1990-იანი წლების შეიარაღებული მოქმედებებისა და 2008 წლის აგვისტოს რუსეთ-საქართველოს ომის შედეგად, უგზო-უკვლოდ დაკარგულ პირთა მოძიების სახელმწიფო პროგრამის და მათი ხსოვნისადმი მიძღვნილი ღონისძიებების განსაკუთრებულ მნიშვნელობაზე ისაუბრა.

მემორიალთან საქართველოს საგარეო საქმეთა სამინისტროს, სამხრეთ ოსეთის ადმინისტრაციისა და წითელი ჯვრის საერთაშორისო კომიტეტის წარმომადგენლები და უგზო-უკვლოდ დაკარგულთა ოჯახის წევრები იმყოფებოდნენ.

უგზო-უკვლოდ დაკარგულთა საერთაშორისო დღის - 30 აგვისტოს აღნიშვნის მიზანია, უგზო-უკვლოდ დაკარგულთა მოძიების საკითხზე საზოგადოების ყურადღების გამახვილება და ცნობიერების ამაღლება, ოჯახების თანადგომა და მათი გაუჩინარებული ახლობლების ხსოვნის უკვდავყოფა.

საქართველოში 1990-იანი წლების შეიარაღებული მოქმედებების და 2008 წლის აგვისტოს რუსეთ-საქართველოს ომის შედეგად, ამ დრომდე 2000-მდე ადამიანი უგზო-უკვლოდ დაკარგულად მიიჩნევა, რომელთა მოძიება და ოჯახებისთვის დაბრუნება მიმდინარე პროგრამის ფარგლებში, სახელმწიფო პოლიტიკის ერთ-ერთი პრიორიტეტია.

1992 წლის 14 აგვისტოს აფხაზეთში განვითარებულ ტრაგიკულ მოვლენებთან დაკავშირებით აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ და აფხაზეთის ავტონომიური რესპუბლიკის უმაღლესი საბჭოს თავმჯდომარე ჯემალ გამახარიამ საქართველოს ტერიტორიული მთლიანობისთვის დაღუპულ გმირთა მემორიალი გვირგვინით შეამკეს და მათ ხსოვნას პატივი მიაგეს.

„14 აგვისტო აფხაზეთში განვითარებული ტრაგიკული მოვლენების ათვლის წერტილია. დღევანდელი დღე განსაკუთრებულად მძიმეა თითოეული ჩვენგანისთვის.

მუდამ გვემახსოვრება ქვეყნის ერთიანობისა და ღირსების დაცვისთვის ბრძოლაში დაღუპული ჩვენი ვაჟკაცი გმირები. ქედს ვიხრით მათი ხსოვნის წინაშე, თანავუგრძნობთ ოჯახებს და ამავდროულად პატივისცემას ვუდასტურებთ სიმამაცით შთაგონებული გმირების აღზრდისთვის.

32 წელი გავიდა იმ ტრაგიკული მოვლენებიდან. ვფიქრობ, საკმარისი პერიოდია იმის გასაცნობიერებლად, რომ შექმნილი მდგომარეობა და განგრძობადი ოკუპაცია არ შედის არც ქართული და არც აფხაზური საზოგადოებების ინტერესებში.

დიალოგის გზით უნდა მოვძებნოთ პრაგმატული გამოსავალი, ვიმსჯელოთ გახლეჩილი საზოგადოების გაერთიანებაზე, საერთო მომავალსა და ინიციატივებზე, რომლებიც მოსახლეობის უფლებების დაცვაზე, კეთილდღეობასა და ქვეყნის განვითარების პერსპექტივებზე იქნება ორიენტირებული.

მჯერა, ჩვენი ხელისუფლების თანმიმდევრული სამშვიდობო პოლიტიკითა და საერთაშორისო საზოგადოების მხარდაჭერით, აუცილებლად შევძლებთ ქვეყნის დეოკუპაციას და ქვეყანაში მშვიდობის, უსაფრთხოებისა და სტაბილურობის უზრუნველყოფას,“ - განაცხადა რუსლან აბაშიძემ.

საქართველოს ტერიტორიული მთლიანობისთვის დაღუპულ გმირთა მემორიალთან ასევე  აფხაზეთის მთავრობის წევრები, უმაღლესი საბჭოს დეპუტატები, აფხაზეთის ომის ვეტერანები და დაღუპულთა ოჯახის წევრები იმყოფებოდნენ.

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ, აფხაზეთის მთავრობის წევრებთან ერთად, მუხათგვერდის ძმათა სასაფლაოზე 2008 წლის აგვისტოს ომის დროს დაღუპულთა მემორიალი გვირგვინით შეამკო და საქართველოს დამოუკიდებლობისა და ტერიტორიული მთლიანობისთვის ბრძოლაში დაღუპული გმირების ხსოვნას პატივი მიაგო.

„8 აგვისტო საქართველოს უახლეს ისტორიაში ერთ-ერთი უმძიმესი დღეა. 16 წელი გავიდა აგვისტოს ომის ტრაგიკული დღეებიდან. კიდევ ერთხელ ვუსამძიმრებთ ქართველ ხალხს, სრულიად საქართველოს. ქედს ვიხრით და პატივს მივაგებთ ჩვენი დაღუპული გმირების ნათელი ხსოვნის წინაშე, რადგან მათი წვლილი განუზომლად მნიშვნელოვანია საქართველოს სახელმწიფოებრიობისა და მისი დამოუკიდებლობის დაცვის საქმეში.

ჩვენ დღესაც გვიწევს რუსეთის ინტერვენციისა და ჩვენი ტერიტორიების ოკუპაციის მძიმე შედეგებთან გამკლავება. ჩვენ არასოდეს შევეგუებით ოკუპაციას. ქვეყნის ხელისუფლებამ კონფლიქტების მოგვარების მშვიდობიანი კურსი აირჩია, რადგან ეს არის ქვეყნის დეოკუპაციის უალტერნატივო გზა ჩვენი საზოგადოების გაერთიანებისკენ.

ეკონომიკურად ძლიერი, დემოკრატიული ღირებულებების, ევროპული ტიპის საქართველოს ვაშენებთ იმისათვის, რომ ეს იყოს ერთიანი სახელმწიფო ქართველი, აფხაზი და ოსი თანამოქალაქეებისთვის, სადაც დაცული იქნება ყველა მოქალაქისა და ეთნიკური ჯგუფის როგორც იდენტობა, ისე უფლებები.

დარწმუნებული ვარ, საერთაშორისო თანამეგობრობასთან მჭიდრო თანამშრომლობითა და თანმიმდევრული სამშვიდობო პოლიტიკის გატარებით შევძლებთ საზოგადოებებს შორის ნდობის აღდგენასა და მათ გაერთიანებას საერთო ინტერესების გარშემო“, - განაცხადა რუსლან აბაშიძემ.

მემორიალთან საქართველოს პრემიერ-მინისტრი ირაკლი კობახიძე, პარლამენტის თავმჯდომარე შალვა პაპუაშვილი, საქართველოს აღმასრულებელი და საკანონმდებლო ხელისუფლების, აფხაზეთის ავტონომიური რესპუბლიკის უმაღლესი საბჭოს და საქართველოში აკრედიტებული დიპლომატიური კორპუსის წარმომადგენლები იმყოფებოდნენ.

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე 90-იან წლებში განვითარებული ტრაგიკული მოვლენების დროს დაღუპული სამხედრო პირების სამოქალაქო პანაშვიდს დაესწრო.

სამების საკათედრო ტაძარში სამოქალაქო პანაშვიდზე საქართველოს პრეზიდენტი, პრემიერ-მინისტრი, პარლამენტის თავმჯდომარე, შერიგებისა და სამოქალაქო თანასწორობის საკითხებში საქართველოს სახელმწიფო მინისტრი, საქართველოს საკანონმდებლო და აღმასრულებელი ხელისუფლების წარმომადგენლები იმყოფებოდნენ, რომლებმაც ოჯახებს კიდევ ერთხელ მიუსამძიმრეს და დაღუპულთა ხსოვნას პატივი მიაგეს.

დაღუპულთა სამოქალაქო პანაშვიდი სამების საკათედრო ტაძარში ორი დღის განმავლობაში მიმდინარეობდა. გადმოსვენებული 4 მებრძოლის ნეშტი დღეს დიღმის ძმათა სასაფლაოზე სამხედრო პატივით დაკრძალეს. დანარჩენებს კი, ოჯახების გადაწყვეტილებით, საგვარეულო სასაფლაოებზე დაკრძალავენ.

90-იან წლებში აფხაზეთში განვითარებული ტრაგიკული მოვლენების დროს დაღუპული 16 იდენტიფიცირებული პირის ცხედრის (7 სამხედრო და 9 სამოქალაქო პირი) გადმოსვენება შერიგებისა და სამოქალაქო თანასწორობის საკითხებში სახელმწიფო მინისტრის აპარატისა და წითელი ჯვრის საერთაშორისო კომიტეტის ერთობლივი ძალისხმევით, ორმხრივი, ქართულ-აფხაზური საკოორდინაციო მექანიზმის ფარგლებში  გახდა შესაძლებელი.

აღსანიშნავია, რომ აფხაზეთის ავტონომიური რესპუბლიკის მთავრობის გადაწყვეტილებით, 90-იან წლებში აფხაზეთში განვითარებული ტრაგიკული მოვლენების დროს დაღუპული 6 დევნილი პირის ოჯახის წევრებს მატერიალური დახმარება გაეწევათ.

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე, აფხაზეთის მთავრობის წევრებთან ერთად, სამების საკათედრო ტაძარში აფხაზეთიდან გადმოსვენებულთა სამოქალაქო პანაშვიდს დაესწრო.

90-იან წლებში აფხაზეთში განვითარებული ტრაგიკული მოვლენების დროს დაღუპული 16 იდენტიფიცირებული პირის ნეშტის (7 სამხედრო და 9 სამოქალაქო პირი) გადმოსვენება შერიგებისა და სამოქალაქო თანასწორობის საკითხებში სახელმწიფო მინისტრის აპარატისა და წითელი ჯვრის საერთაშორისო კომიტეტის ერთობლივი ძალისხმევით, ორმხრივი, ქართულ-აფხაზური საკოორდინაციო მექანიზმის ფარგლებში გახდა შესაძლებელი.

შეიარაღებული მოქმედებების დროს აფხაზეთში დაღუპულთა სამოქალაქო პანაშვიდი სამების საკათედრო ტაძარში ორი დღის განმავლობაში გაიმართება.

იდენტიფიცირებული 4 მებრძოლის ნეშტს ხვალ დიღმის ძმათა სასაფლაოზე სამხედრო პატივით დაკრძალავენ.

შერიგებისა და სამოქალაქო თანასწორობის საკითხებში სახელმწიფო მინისტრმა თეა ახვლედიანმა აფხაზეთისა და ცხინვალის რეგიონებში მცხოვრები კონფლიქტის შედეგად დაზარალებული მოსახლეობისთვის შექმნილი ერთიანი საინფორმაციო პორტალის პრეზენტაცია გამართა. ღონისძიებას აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე დაესწრო.

ერთიანი საინფორმაციო პორტალის უმთავრესი დანიშნულებაა, ხელი შეუწყოს ოკუპირებულ რეგიონებში მცხოვრებ მოსახლეობას, მათთვის მოქმედ, საინტერესო პროგრამებსა და სერვისებში ჩართვისა და შესაბამისი ინფორმაციის მიღების გამარტივებაში.

სახელმწიფო მინისტრთან ერთად, შეკრებილ საზოგადოებას საქართველოს პარლამენტის ვიცე-სპიკერმა, ტერიტორიული მთლიანობის აღდგენისა და დეოკუპაციის საკითხებთან დაკავშირებული დროებითი კომისიის თავმჯდომარემ გიორგი ვოლსკიმ მიმართა. ერთიანი საინფორმაციო პორტალის პრეზენტაციას საქართველოს პარლამენტის, აფხაზეთის ავტონომიური რესპუბლიკის მთავრობის, სახელმწიფო უწყებების, საქართველოში აკრედიტებული დიპლომატიური კორპუსისა და საერთაშორისო ორგანიზაციების, სახალხო დამცველისა და სამოქალაქო საზოგადოების წარმომადგენლები ესწრებოდნენ.

პორტალი შერიგებისა და სამოქალაქო თანასწორობის საკითხებში სახელმწიფო მინისტრის აპარატის ინიციატივით, შესაბამის დარგობრივ სამინისტროებთან მჭიდრო უწყებათაშორისი თანამშრომლობით, სამოქალაქო საზოგადოების ჩართულობითა და საერთაშორისო პარტნიორების მხარდაჭერით შეიქმნა. მისი სრულფასოვანი ამოქმედება ქართულ, ინგლისურ, აფხაზურ და ოსურ ენებზე სექტემბრიდან იგეგმება.

საქართველოს პარლამენტში, დიასპორისა და კავკასიის საკითხთა კომიტეტის ორგანიზებით, საერთაშორისო დიასპორული პროექტის - „საზღვრებს მიღმა“ მონაწილეების დაჯილდოება გაიმართა. ღონისძიებას აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე დაესწრო.

ღონისძიების მონაწილეებს სიტყვით პარლამენტის თავმჯდომარის პირველმა მოადგილე გიორგი ვოლსკიმ და დიასპორისა და კავკასიის საკითხთა კომიტეტის თავმჯდომარე ბექა ოდიშარიამ მიმართეს.

პროექტში მონაწილეობა მიიღეს ნიდერლანდების, ბელგიის, საბერძნეთის, ირლანდიისა და აზერბაიჯანის (საინგილოს) ქართული დიასპორის წარმომადგენლებმა, მათ შორის აფხაზეთიდან იძულებით გადაადგილებულმა პირებმა.

ღონისძიებას საგარეო საქმეთა მინისტრის მოადგილე ვლადიმერ კონსტანტინიდი, საქართველოს საპატრიარქოს წმინდა თამარ მეფის სახელობის უნივერსიტეტის რექტორი, არქიმანდრიტი ადამი და საქართველოს პარლამენტის წევრები ესწრებოდნენ.

ღონისძიებაზე პროექტის მონაწილეები და ორგანიზატორი - ნიდერლანდებში მოქმედი დიასპორული ორგანიზაციის ხელმძღვანელი თიკა სვანიძე-ვენკო დაჯილდოვდა.

​ღონისძიებაზე ქართული საერთაშორისო დიასპორული თეატრის - „დაბრუნება“, თეატრალური სტუდია „ArtPlaza"-ს და რეჟისორ თამარ ხიზანიშვილის ერთობლივი თეატრალური წარმოდგენა გაიმართა ნოდარ დუმბაძის მოთხრობის - HELLADOS-ის მიხედვით.

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე საქართველოში რუმინეთის საგანგებო და სრულუფლებიან ელჩ რაზვან როტუნდუს შეხვდა.

მთავრობის თავმჯდომარემ რუმინეთის ელჩს აფხაზეთის ოკუპირებულ ტერიტორიაზე ამჟამად არსებული ვითარება გააცნო.

შეხვედრაზე მხარეებმა განიხილეს სხვადასხვა მიმართულებით სამომავლო თანამშრომლობის პერსპექტივები, მათ შორის, კულტურული ურთიერთობების გაღრმავების საკითხები.

რუმინელმა დიპლომატმა კიდევ ერთხელ დაადასტურა მისი ქვეყნის მთავრობის მტკიცე მხარდაჭერა საქართველოს სუვერენიტეტისა და ტერიტორიული მთლიანობის პოლიტიკის მიმართ.