სვეტლანა ქეცბა

აფხაზეთის საზოგადოებას კიდევ ერთი ღირსეული პიროვნება გამოაკლდა - გარდაიცვალა აფხაზეთის სულიერებისა და კულტურის ცენტრის თავმჯდომარე, საქართველოსა და აფხაზეთის ხელოვნების დამსახურებული მოღვაწე, საქართველოს სამოციქულო ავტოკეფალური მართლმადიდებელი ეკლესიის უმაღლესი ჯილდოს „წმიდა გიორგის ოქროს ორდენისა" და ღირსების ორდენის კავალერი სვეტლანა ქეცბა.

სვეტლანა ქეცბა დაიბადა 1933 წლის 17 ოქტომბერს ქ. სოხუმში. 1953 წ. დაამთავრა სოხუმის სახელმწიფო სამუსიკო სასწავლებელი, ხოლო 1958 წ. - თბილისის ვანო სარაჯიშვილის სახელობის სახელმწიფო კონსერვატორია წითელ დიპლომზე მუსიკისმცოდნის კვალიფიკაციით.

1958 წლიდან მუშაობდა სოხუმის პირველ საბავშვო სამუსიკო სკოლაში ჯერ მასწავლებლად, ხოლო შემდეგ დირექტორად; 1974 წლიდან - სოხუმის დიმიტრი არაყიშვილის სახელობის სამუსიკო სასწავლებლის დირექტორად.

1992-2004 წწ. იყო აფხაზეთის ავტონომიური რესპუბლიკის კულტურის მინისტრი, ხოლო 1996-2004 წწ. - საქართველოს კულტურის მინისტრის მოადგილე.

2004-2006 წწ. მუშაობდა აფხაზეთის მთავრობის თავმჯდომარის მოადგილედ, ხოლო 2006 წლიდან იყო აფხაზეთის სულიერებისა და კულტურის ცენტრის თავმჯდომარე.

1971 წლიდან არაერთხელ იყო არჩეული აფხაზეთის კომპოზიტორთა კავშირის თავმჯდომარედ, იყო საბჭოთა კავშირის კომპოზიტორთა კავშირის ცენტრალური სარევიზიო კომისიის, ხოლო შემდეგ - პრეზიდიუმის წევრი.

2000 წლიდან იყო ასოციაციის „ქალები ბავშვებისა და ახალგაზრდობის მომავლისათვის" პრეზიდენტი.

გამოქვეყნებული აქვს ნაშრომები აფხაზური და ქართული სამუსიკო ხელოვნების საკითხებზე, არის მრავალი სტატიის ავტორი, შემდგენელი და რედაქტორი აფხაზ კომპოზიტორთა ნაწარმოებებისა და აფხაზური ხალხური სიმღერების კრებულებისა.

2012 წელს, სრულიად საქართველოს კათოლიკოს-პატრიარქის უწმიდესისა და უნეტარესი ილია II  კურთხევით,  იყო პროექტის ავტორი და შემდგენელი კრებულისა „უფალი სუფევს, მშვენიერება შეიმოსა". 2016 წ. გამოიცა მისი წერილების, ჩანაწერებისა და მოგონებების კრებული „გულის სახსოვარი - აფხაზურ-ქართული ურთიერთობები".

სვეტლანა ქეცბა დაჯილდოვებული იყო აფხაზეთის და საქართველოს უმაღლესი საბჭოების საპატიო სიგელებით, მინიჭებული ჰქონდა იაკობ გოგებაშვილის სახელობის პრემია, ღირსების ორდენი, საქართველოს სამოციქულო ავტოკეფალური მართლმადიდებელი ეკლესიის უმაღლესი ჯილდო „წმიდა გიორგის ოქროს ორდენი", იყო კავკასიის ხალხების მეცნიერებათა აკადემიის წევრი.

ქალბატონი სვეტლანა ქეცბა აფხაზეთის ტრაგედიის დროს უყოყმანოდ დადგა იმ პოზიციაზე, რომელიც მისი ერის გადარჩენის ერთადერთ გზას წარმოადგენდა. მრავალი  ტკივილის ატანა მოუხდა მას ამ ეკლიან გზაზე, მაგრამ სიცოცხლის ბოლომდე არ უღალატია საკუთარი პრინციპებისათვის. იგი უანგაროდ ემსახურებოდა სამშობლოს, სწამდა აფხაზი და ქართველი ხალხის საუკუნოვანი მეგობრობისა და რუდუნებით იღვწოდა იმ სანუკვარი მიზნის მისაღწევად, რასაც აფხაზეთში დაბრუნება და აფხაზეთის დაბრუნება ჰქვია.

„პრობლემის სასწრაფოდ მოგვარება - ეს ადამიანთა ხსნის საკითხია და რაც უფრო გაჭიანურდება, მით უფრო გამწვავდება პრობლემა ყველაზე ძვირფასი პოტენციალის - ადამიანურობის შენარჩუნებისა..." - წერდა ქალბატონი სვეტლანა ერთ-ერთ წერილში. „გადის წლები, მაგრამ ვერ მოვახერხე წარსულთან გამიჯვნა, საკუთარ გულში მშობლიური ადგილებისა და საყვარელი ადამიანების გამო სევდის ჩახშობა..." - ესეც მისი სიტყვებია და ამ სევდით გადაინაცვლა მისმა სულმა მარადისობაში.

უფალმა დაუმკვიდოს საუკუნო სასუფეველი!

მსუბუქი იყოს მისთვის ქართული მიწა!

აფხაზეთის ავტონომიური რესპუბლიკის მთავრობა
აფხაზეთის ავტონომიური რესპუბლიკის უმაღლესი საბჭო

ნაძალადევის რაიონში, ნევროლოგიის ინსტიტუტთან არსებულ კომპაქტურ ჩასახლებაში მცხოვრებ აფხაზეთიდან იძულებით გადაადგილებულ პირებს უფასო სამედიცინო გამოკვლევები ჩაუტარდათ.

სამედიცინო გამოკვლევებში მონაწილეობდნენ „ჩაფიძის სახელობის გადაუდებელი კარდიოლოგიის ცენტრის", თვალის კლინიკა „ახალი მზერისა" და კანისა და ვენეროლოგიურ სნეულებათა ინსტიტუტის წამყვანი სპეციალისტები. სამედიცინო ჯგუფის შემადგენლობაში იყვნენ: ნევროლოგი, უროლოგი, კარდიოლოგი, დერმატოლოგი, გინეკოლოგი, ქირურგი, ოფთალმოლოგი. ბენეფიციარებს ჩაუტარდათ C ჰეპატიტის სკრინინგი.

ექიმთა დანიშნულების შესაბამისად, აფხაზეთიდან დევნილებზე გაიცა მკურნალობისთვის საჭირო სხვადასხვა დანიშნულების მედიკამენტი.

სამედიცინო გამოკვლევებს აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია და აფხაზეთის ავტონომიური რესპუბლიკის ჯანმრთელობისა და სოციალური დაცვის მინისტრის მოადგილე თენგიზ კვირტია ესწრებოდნენ.

აფხაზეთის ავტონომიური რესპუბლიკის მთავრობის მხარდაჭერითა და აფხაზეთის ავტონომიური რესპუბლიკის განათლებისა და კულტურის სამინისტროს ორგანიზებით, ვალერი არქანიას სახელობის არტ-გალერეაში აფხაზეთის ავტონომიური რესპუბლიკის მთავრობის თავმჯდომარესთან არსებული გიორგი შარვაშიძის სახელობის პრემიის ლაურეატების დაჯილდოების ცერემონიალი გაიმართა.

აფხაზეთის ავტონომიური რესპუბლიკის მთავრობის თავმჯდომარესთან არსებული გიორგი შარვაშიძის სახელობის პრემიის წლევანდელი ლაურეატები გახდნენ: ჯემალ შონია - პოეტური კრებულისათვის „წაუკითხავი",  ნანა ქარდავა - წიგნისათვის „სოხუმში, უსახელო ქუჩაზე", აზა ბასლანძე - საბავშვო ლექსების კრებულების სერიისათვის: „მომღერალი ფერები", „თეთრი ღრუბლები", „ოქროს თევზი" და  „მხიარული ფიქრები".

დაჯილდოებას აფხაზეთის ავტონომიური რესპუბლიკის უმაღლესი საბჭოს დეპუტატები და ცხუმ-აფხაზეთის მეცნიერებათა აკადემიის პრეზიდენტი ოთარ ჟორდანია ესწრებოდნენ.

აფხაზეთის ავტონომიური რესპუბლიკის მთავრობის მხარდაჭერითა და აფხაზეთის ავტონომიური რესპუბლიკის განათლებისა და კულტურის სამინისტროს ორგანიზებით, ვალერი არქანიას სახელობის არტ-გალერეაში აფხაზეთის სახელმწიფო საგუნდო კაპელის დამაარსებლის, გიორგი შარვაშიძის სახელობის პრემიის ლაურეატის, აფხაზეთის კულტურის დამსახურებული მუშაკის გურამ ყურაშვილის ხსოვნისადმი მიძღვნილი საღამო გაიმართა.

ღონისძიებას აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, აფხაზეთის ავტონომიური რესპუბლიკის უმაღლესი საბჭოს თავმჯდომარე ელგუჯა გვაზავა და დევნილი საზოგადოება ესწრებოდნენ.

გურამ ყურაშვილმა მნიშვნელოვანი წვლილი შეიტანა ქართული კულტურის განვითარების საქმეში. მან აფხაზეთში, ჯერ კიდევ 1980-იან წლებში შექმნა პირველი ბავშვთა ინტერნაციონალური კაპელა, რომელიც წლების განმავლობაში წარმატებულ კონცერტებს მართავდა არა მარტო ყოფილი საბჭოეთის ქვეყნებში, არამედ მის ფარგლებს გარეთაც. ის საერთაშორისო საგუნდო მუსიკის კონკურსების არაერთგზის გამარჯვებული იყო.

აფხაზეთში განვითარებული ტრაგიკული მოვლენების შემდეგ კოლექტივმა დროებით შეწყვიტა არსებობა. 12 წლის შემდეგ კი გურამ ყურაშვილმა ახლა უკვე ქალაქ თბილისში ახალი შემადგენლობით შექმნა აფხაზეთის საგუნდო კაპელა, რომელმაც ძალიან მალე გამორჩეული სტილის კოლექტივის სახელი დაიმკვიდრა და არაერთხელ წარმოაჩინა საქართველო და აფხაზეთი საერთაშორისო ასპარეზზე.

საზოგადოებათან ურთიერთობის სააგენტო „პროფილის" ორგანიზებით, სასტუმრო „ბილტმორში" ქართული ბრენდების დაჯილდოების რიგით მე-15 ცერემონია გაიმართა. ქართული ბრენდები 5 ძირითად ნომინაციაში გამოვლინდა: ლიდერი, რეპუტაცია და ნდობა, წარმატებული ახალი ქართული ბრენდი, ბრენდ პერსონა და წარმატებული ტელეპროექტი.

ქართულ-აფხაზური ურთიერთობის განმტკიცებაში შეტანილი წვლილისათვის ქართული ბრენდის ჯილდოს მფლობელი აფხაზეთის ავტონომიური რესპუბლიკის საინფორმაციო უზრუნველყოფის ცენტრის გადაცემა „აფხაზეთი" გახდა.

ქართული ბრენდის დაჯილდოება 15 წელია იმართება და მისი მიზანი ქართული ბრენდების პოპულარიზაციის ხელშეწყობაა.

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია სოხუმის სახელმწიფო უნივერსიტეტში სტუდენტებს შეხვდა.

ვახტანგ ყოლბაიამ სოხუმის სახელმწიფო უნივერსიტეტის სტუდენტებს აფხაზეთის ავტონომიური რესპუბლიკის მთავრობის საქმიანობის პრიორიტეტები და მიმართულებები გააცნო. მოხსენების შემდეგ შეხვედრა კითხვა-პასუხის რეჟიმში წარიმართა.

შეხვედრაში სოხუმის სახელმწიფო უნივერსიტეტის რექტორი ზურაბ ხონელიძე, საქართველოს განათლებისა და მეცნიერების მინისტრის მოადგილე თემურ მურღულია, აფხაზეთის ავტონომიური რესპუბლიკის მთავრობის წევრები და სოხუმის სახელმწიფო უნივერსიტეტის პროფესორ-მასწავლებლები ესწრებოდნენ.

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია ბათუმში, სასტუმრო „შერატონში“ გამართულ „გაეროს ახალგაზრდული ასამბლეის“ გახსნას დაესწრო და საზოგადოებას სიტყვით მიმართა.

ღონისძიებას აგრეთვე აჭარის ავტონომიური რესპუბლიკის მთავრობის თავმჯდომარე ზურაბ პატარაძე, აჭარის ავტონომიური რესპუბლიკის უმაღლესი საბჭოს თავმჯდომარე დავით გაბაიძე, აჭარის ავტონომიური რესპუბლიკის მთავრობის წევრები, ნდობის აღდგენისა და შერიგების საკითხებში აფხაზეთის ავტონომიური რესპუბლიკის მინისტრის პირველი მოადგილე ბელა კოპალიანი, საქართველოს პრეზიდენტის ადმინისტრაციის უფროსი გიორგი აბაშიშვილი, საქართველოს ეროვნული უშიშროების საბჭოს მდივანი დავით რაქვიაშვილი და სხვა საპატიო სტუმრები ესწრებოდნენ.

„გაეროს ახალგაზრდული ასამბლეა“ საქართველოს მასშტაბით უპრეცედენტო ღონისძიებაა, რომელსაც 16-18 დეკემბერს ბათუმი მასპინძლობს. პროექტში მონაწილეობას დელეგატის სტატუსით ღებულობს საქართველოს თითქმის ყველა რეგიონის ათასამდე მოსწავლე-ახალგაზრდა. პროექტის ფარგლებში ახალგაზრდა დელეგატები დაესწრებიან სესიებს გაეროს მდგრადი განვითარების მიზნების თემატიკაზე. ისინი ეწვევიან აჭარის სამთავრობო უწყებებს, საერთაშორისო ორგანიზაციებს და დიპლომატიურ კორპუსს, სადაც მათი მუშაობის პრინციპებს გაეცნობიან.

აფხაზეთის ავტონომიური რესპუბლიკის მთავრობამ და აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტრომ ოკუპირებული აფხაზეთიდან თბილისში სამშობიაროდ ჩამოსული ეთნიკურად აფხაზი ახალგაზრდა წყვილი დროებითი საცხოვრებელი ფართით უზრუნველყო და ახალშობილისთვის საჭირო პირველადი მოხმარების ნივთები გადასცა.

ახალგაზრდა ოჯახს კომპანია ჰუმანამ საჩუქრად ახალშობილისთვის საჭირო კვების პროდუქტები გადასცა და შემდგომი დახმარების სურვილი გამოთქვა.

ჟენევაში საერთაშორისო მოლაპარაკებების 42-ე რაუნდი გაიმართა. საქართველოს დელეგაციათან ერთად ჟენევაში აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია იმყოფებოდა. დელეგაციას საქართველოს საგარეო საქმეთა მინისტრის მოადგილე დავით დონდუა ხელმძღვანელობდა.

საერთაშორისო მოლაპარაკებების 42-ე რაუნდის დღის წესრიგის მთავარი საკითხი აფხაზეთისა და ცხინვალის რეგიონებში დარჩენილი ქართველი მოსახლეობის მიმართ ეთნიკური დისკრიმინაციის მძიმე შედეგები და ძალის არგამოყენებისა და უსაფრთხოების საერთაშორისო მექანიზმების შექმნის საკითხი იყო.

მოლაპარაკებებზე საქართველოს დელეგაციამ შეშფოთება გამოთქვა აფხაზეთისა და ცხინვალის რეგიონის რუსეთის ფედერაციაში ინტეგრაციის პროცესის გაგრძელების გამო, კერძოდ სოხუმში რუსეთის ფედერაციის საბაჟო პოსტის შექმნა და ცხინვალში რუსეთის საოკუპაციო რეჟიმის განცხადებები ახალგორში ანალოგიური სტრუქტურის შექმნის შესახებ.

ქართულმა მხარემ ოკუპირებულ ტერიტორიებზე კულტურული მემკვიდრეობის ძეგლების დაცვისა და მათი ავთენტურობის შენარჩუნების აუცილებლობის საკითხი დააყენა. აგრეთვე კიდევ ერთხელ მოუწოდეს საოკუპაციო რეჟიმს გიგა ოთხოზორიას მკვლელის დაუყოვნებლივ დაკავებისაკენ. ხაზი გაესვა გარემოს დაცვის მიმართულებით თანამშრომლობის საჭიროებას.

მწვავე დისკუსიის საგანი იყო საოკუპაციო ხაზზე მავთულხლართებისა და სხვადასხვა ხელოვნური ბარიერების აღმართვის გაგრძელება. მონაწილეებმა საქართველოდან და აშშ-დან მოუწოდეს საოკუპაციო ხაზზე დახურული ე.წ. გადასასვლელი პუნქტების დაუყოვნებლივ გახსნისაკენ. ვრცლად იქნა განხილული თავისუფალი გადაადგილებისა და ადგილობრივი მოსახლეობის საკუთარ სასოფლო-სამეურნეო მიწის ნაკვეთებზე წვდომის აუცილებლობა.

ჟენევის საერთაშორისო მოლაპარაკებების 42-ე რაუნდი 12-13 დეკემბერს გაიმართა.

2017 წლის 12 დეკემბერს საქართველოს სახალხო არტისტი, აფხაზეთის ავტონომიური რესპუბლიკის განათლებისა და კულტურის მინისტრი, საქართველოს სახელმწიფო პრემიის, კოტე მარჯანიშვილისა და გიორგი შერვაშიძის პრემიების ლაურეატი, ღირსების ორდენისა და უკრაინის პრესტიჟის ორდენის კავალერი, მაყურებლის სიმპათიის პრიზის მფლობელი, ქალაქ სენაკის საპატიო მოქალაქე, კონსტანტინე გამსახურდიას სახელობის სოხუმის სახელმწიფო დრამატული თეატრის წამყვანი მსახიობი, დირექტორი და სამხატვრო ხელმძღვანელი ათეული წლების განმავლობაში, 1999-2004 წლების მოწვევის საქართველოს პარლამენტის წევრი  დიმიტრი (დიმა) ჯაიანი ქართულმა საზოგადოებამ უკანასკნელ გზაზე გააცილა.

რუსთაველის თეატრში სახალხო არტისტთან გამოსამშვიდობებლად და ოჯახის წევრებისთვის მისასამძიმრებლად, საქართველოს სხვადასხვა კუთხიდან ასობით ადამიანი იმყოფებოდა, მათ შორის აფხაზეთის ავტონომიური რესპუბლიკის ხელისუფლების, საქართველოს აღმასრულებელი და საკანონმდებლო ხელისუფლების წარმომადგენლები, პოლიტიკოსები, საზოგადო მოღვაწეები, მეგობრები, კოლეგები და აფხაზეთიდან დევნილი საზოგადოება.

დიმიტრი ჯაიანი თბილისში, საბურთალოს საზოგადო მოღვაწეთა პანთეონში დაკრძალეს.

სრულიად საქართველომ, ქართულმა თეატრმა, საზოგადოებამ, ჯაიანების ოჯახმა, გვარმა, მრავალრიცხოვანმა ნათესაობამ და სამეგობრომ აუნაზღაურებელი დანაკლისი განიცადა - 67 წლის ასაკში გარდაიცვალა საქართველოს სახალხო არტისტი, სახელმწიფო პრემიის, კოტე მარჯანიშვილისა და გიორგი შერვაშიძის პრემიების ლაურეატი, ღირსების ორდენისა და უკრაინის პრესტიჟის ორდენის კავალერი, მაყურებლის სიმპათიის პრიზის მფლობელი, ქ. სენაკის საპატიო მოქალაქე, კონსტანტინე გამსახურდიას სახელობის სოხუმის სახელმწიფო დრამატული თეატრის წამყვანი მსახიობი, დირექტორი და სამხატვრო ხელმძღვანელი ათეული წლების განმავლობაში, 1999-2004 წლების მოწვევის საქართველოს პარლამენტის წევრი, აფხაზეთის ავტონომიური რესპუბლიკის განათლებისა და კულტურის მინისტრი დიმიტრი (დიმა) ჯაიანი.

დაიბადა 1950 წლის 20 აგვისტოს, ქალაქ სენაკში, თავადური წარმოშობის ოჯახში. საშუალო სკოლა ოქროს მედალზე დაამთავრა. ლიტერატურისა და ხელოვნების სიყვარული ბავშვობიდან დაჰყვა და, საქართველოს თეატრალური ინსტიტუტის დამთავრების შემდეგ, მთელი ცხოვრება ხელოვანის ნარეკლიანი გზებით იარა, ყველასგან გამორჩეული პიროვნული და პროფესიონალური ნიშნით.

თეატრის უპირველესი დანიშნულება ხომ ისაა, დაგაინტერესოს, ჩაგითრიოს, შეგძრას, ზოგადს, ცხოვრებისეულს და პიროვნულსაც შეეხოს. დიმა ჯაიანის მრავალრიცხოვანი როლები, შესანიშნავი სცენური თუ ეკრანული სახეები სწორედ რომ გაინტერესებდა, ჩაგითრევდა, შეგძრავდა...

,,როცა მის ნამუშევრებს ვუყურებ, არ შეიძლება, მან არ აგაღელვოს, გულგრილი დაგტოვოს...ის გამორჩეული მსახიობია! არიან ისეთებიც, რომელნიც მას ჭარბ ემოციურობას, თავდაუზოგავ ენერგეტიკას, თამაშის ზეაწეულ, რომანტიკულ მანერას ნაკლადაც უთვლიან! მე მათ რიცხვს არ განვეკუთვნები, პირიქით, მე სწორედ ეს თვისებები მხიბლავს, მას ყველაზე დიდ სიამოვნებას სცენური თავდავიწყება სძენს.“
ასე აფასებენ ამ მართლაც გამორჩეული ინდივიდუალობის, თვითმყოფადობის და განსხვავებული პროფესიული ხასიათის მქონე მსახიობის შემოქმედებას მისი უპირველესი შემფასებლები, ქართული თეატრის კორიფეები, პირველი მასწავლებლები, ისინი, ვისთანაც გაიზარდა, ჩამოყალიბდა, შედგა!

დიმა ჯაიანს თითქოს თან დაჰყვა მკვეთრად გამოკვეთილი ლიდერის თვისებები... - არა პირველობის, არამედ ლიდერობის. იგი იყო მზრუნველი, ყურადღებიანი, შემოქმედებითი დისციპლინის, წესრიგის და სამართლიანი ურთიერთობების მკაცრი მცველი და ქომაგი... უამრავი საქმიანი შეხვედრის თუ მეგობრული თავშეყრის ორგანიზატორი, შეუცვლელი თამადა ყველას იუბილეზე, თავკაცი ჭირსა თუ ლხინში....
მას უპრეცენდენტოდ ახალგაზრდულ ასაკში, 38 წლისას მიენიჭა საქართველოს სახალხო არტისტის , კიდევ უფრო ადრე სოხუმის კოლორიტის, ცოტა მოგვიანებით კი ,,ადამიანი-სიმბოლოს” წოდება. არ შეიძლება არ დავეთნხმოთ ხელოვნებათმცოდნეობის მეცნიერებათა დოქტოროს, პროფესორ მერაბ გეგიას შეფასებას: ,,დიმა ჯაიანი, კონსტანტინე გამსახურდიას სახელობის სოხუმის დრამატული თეატრის მსახიობი, იყო სწორედ ის ადამიანი, რომელმაც მთლიანად გაიზიარა დიდი ტრაგედიების მქონე მებრძოლი დევნილი თეატრის ბედი და თავადაც იქცა ამ თეატრის მომავლის არქიტექტორად. მხოლოდ პასუხისმგებლობის გრძნობა, შეუპოვრობა, საკუთარი საქმისადმი უსაზღვრო სიყვარული რომ არა, რა გადაარჩენდა შენობის გარეშე დარჩენილ თეატრს, უსახლკაროდ დარჩენილ სოხუმელთა დასს. ქვეყანაში შექმნილ ისედაც გაუსაძლის პირობებში, სიცივესა და სიბნელეში. ასეთი თეატრის ხელძღვანელობა ხომ ტვირთია. თუმცა კი წმინდათა-წინდა, მაგრამ მაინც ტვირთი.“

ეს სიმძიმე დიმამ საკუთარი მხრებით ზიდა.

დიმა ჯაიანის ცხოვრება მისი წარმატებული შემოქმედებით, არაერთგვაროვანი და ზოგჯერ მოულოდნელი პარალელებით ისეთივეა, როგორც მისი სათაყვანებელი ქვეყანა და მშობლიური თეატრი - ტრაგიკული მოვლენებით, სევდით, გულისტკივილით, თავბრუდამხვევი წარმატებითა და მოულოდნელი სიხარულით.

ბოლო წლებში, აფხაზეთის ავტონომიური რესპუბლიკის განათლების და კულტურის მინისტრის თანამდებობაზე კიდევ ერთხელ გაიბრწყინა დიმა ჯაიანის, როგორც ლიდერის, ხელმძღანელის ორგანიზატორულმა თვისებებმა, საზოგადოებრივმა მოღვაწეობამ, მოგვევლინა შესანიშნავი ტელეწამყვანის როლშიც, როგორც გონიერი, ფართო დიაპაზონის მსახიობი, შესანიშნავი მთხრობელი, ორატორი, პოეზიით გატაცებული და საინტერესო დეკლამატორი, წარსულის აწმყოსთან შემაკავშირებელი, განსაკუთრებული სიყვარულის და პატივისცემის წარმომჩენი საკუთარი ქვეყნის, ხალხის, მისი სათაყვანებელი აფხაზეთის მიმართ.
,,შენ რომ ვინმემ გული ამოგგლიჯოს და ხატის წინ დადოს, მასზე დიდი ასოებით იქნება ამოტვიფრული ერთადერთი სიტყვა ,,აფხაზეთი“ ... ,,მახსოვს, პირველივე ლექციაზე ყველა სტუდენტს გამოვკითხე, ვინ სად აპირებდა სამუშაოდ წასვლას, შენ თქვი - სოხუმშიო, იმ მხარის კაცი ვარო...“

სტუდენტობის დროს აღიარებულ ამ პიროვნულ ჭეშმარიტებას დღეს უკვე ზეციურ საქართველოში გადასული ჩვენი დიმა თითქოს ,,მთვარის მოტაცების” ერთ-ერთი გმირის სიტყვებით ეხმიანება: ,,უთქვამი სიტყვის ბატონი ვარ და მბრძანებელი, ხოლო ნათქვამის - სიკვდილადე მონა-მორჩილი”.

ასე სწამდა, ასე იცხოვრა, ასე წავიდა!

მსუბუქი იყოს მისთვის ქართული მიწა.

აფხაზეთის ავტონომიური რესპუბლიკის მთავრობა

აფხაზეთის ავტონომიური რესპუბლიკის უმაღლესი საბჭო

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია საქართველოში ამერიკის შეერთებული შტატების ელჩის მოადგილე ელიზაბეთ რუდს, ამერიკის შეერთებული შტატების საელჩოს პირველ მდივან ალექს შრენკს  და ამერიკის შეერთებული შტატების საელჩოს წარმომადგენელ ჯონ ჰეინსს შეხვდა. შეხვედრას ნდობის აღდგენისა და შერიგების საკითხებში აფხაზეთის ავტონომიური რესპუბლიკის მინისტრის პირველი მოადგილე ბელა კოპალიანი და აფხაზეთის ავტონომიური რესპუბლიკის მთავრობის აპარატის საერთაშორისო და არასამთავრობო ორგანიზაციებთან ურთიერთობის სამსახურის უფროსი დავით გახარია ესწრებოდნენ.

შეხვედერაზე აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა საელჩოს წარმომადგენლებს გააცნო ინფორმაცია ოკუპირებულ აფხაზეთში არსებული მდგომარეობის შესახებ. მათ შორის ადმინისტრაციულ საზღვარზე გადასასვლელების დახურვით გამოწვეულ პრობლემებზე, განსაკუთრებული ყურადღება გამახვილდა გალის რაიონში ქართულ ენაზე განათლების მიღების აკრძალვაზე, აფხაზეთის ტერიტორიაზე არსებული კულტურული მემკვიდრეობის მდგომარეობასა და ეკოლოგიურ პრობლემებზე.

საელჩოს წარმომადგენლებმა მიიღეს ინფორმაცია აფხაზეთის დევნილი ხელისუფლების საქმიანობისა და მათ მიერ საქართველოს ცენტრალურ ხელისუფლებასთან ერთობლივად განხორციელებული პროექტების, მათ შორის იძულებით გადაადგიულებულ პირებთან, ცენტრალურ სტურქტურებთან ურთიერთობის ფორმების შესახებ.

აფხაზეთის მთავრობაში რალის ევროპის ჩემპიონატის გამარჯვებულ დავით კვარაცხელიასთან შეხვედრა გაიმართა. შეხვედრაზე აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ ევროპის ჩემპიონ დავით კვარაცხელიას მიღწეული წარმატება მიულოცა და კლასიკურ რალიში მოპოვებული წარმატებისა და მსოფლიო არენაზე აფხაზეთის, როგორც საქართველოს განუყოფელი ნაწილის წარმოჩენისათვის აფხაზეთის ავტონომიური რესპუბლიკის მთავრობის მადლობის სიგელი და სიმბოლური საჩუქარი გადასცა.

შეხვედრას აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, აფხაზეთის ავტონომიური რესპუბლიკის უმაღლესი საბჭოს თავმჯდომარე ელგუჯა (გია) გვაზავა, აფხაზეთის ავტონომიური რესპუბლიკის მთავრობის წევრები და უმაღლესი საბჭოს დეპუტატები, ვეტერანი სპორტსმენები და სპორტსმენის მეგობრები ესწრებოდნენ.

აფხაზეთიდან დევნილი დავით კვარაცხელია ბულგარეთში მოღვაწეობს და იგი მრავალი ტიტულის მფლობელია, მათ შორის ბალკანეთის თასის გამარჯვებული.

2017 წლის 17-18 ნოემბერს, პორტუგალიაში გამართულ რალის ევროპის ჩემპიონატის ფინალში საქართველოს სახელით მოასპარეზე სპორტული კლუბი „სტაიკოვ რეისინგ ჯორჯია"-ს წევრებმა დავით კვარაცხელიამ და პლამენ სტაიკოვმა ERT -2  კლასში ევროპის ჩემპიონის ტიტული მოიპოვეს. მათ საგრძნობი უპირატესობით დაამარცხეს მე-2 და მე-3 ადგილზე გასული ეკიპაჟები.

დავით კვარაცხელია აფხაზეთიდან დევნილია. ის თავის ყველა გამარჯვებას სოხუმსა და სოხუმელებს უძღვნის, ხოლო ავტომობილზე სიამაყით უწერია „SOKHUMI-GEORGIA".

რალის ევროპის ჩემპიონატის გამარჯვებული დავით კვარაცხელია საქართველოში ჩამოვიდა და ჩემპიონის თასი ჩამოიტანა. თბილისის საერთაშორისო აეროპორტში ჩემპიონს აფხაზეთის ავტონომიური რესპუბლიკის განათლებისა და კულტურის სამინისტროს სპორტისა და ახალგაზრდულ საქმეთა სამსახურის უფროსი ვიტალი ბენდელიანი, საქართველოს საავტომობილო სპორტის ფედერაციის წარმომადგენლები, აფხაზეთიდან დევნილები და მეგობრები დახვდნენ.

აფხაზეთიდან დევნილი დავით კვარაცხელია ბულგარეთში მოღვაწეობს და იგი მრავალი ტიტულის მფლობელია, მათ შორის ბალკანეთის თასის გამარჯვებული.

2017 წლის 17-18 ნოემბერს, პორტუგალიაში გამართულ რალის ევროპის ჩემპიონატის ფინალში საქართველოს სახელით მოასპარეზე სპორტული კლუბი „სტაიკოვ რეისინგ ჯორჯია"-ს წევრებმა დავით კვარაცხელიამ და პლამენ სტაიკოვმა ERT -2  კლასში ევროპის ჩემპიონის ტიტული მოიპოვეს. მათ საგრძნობი უპირატესობით დაამარცხეს მე-2 და მე-3 ადგილზე გასული ეკიპაჟები.

დავით კვარაცხელია აფხაზეთიდან დევნილია. ის თავის ყველა გამარჯვებას სოხუმსა და სოხუმელებს უძღვნის, ხოლო ავტომობილზე სიამაყით უწერია „SOKHUMI-GEORGIA".

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, აფხაზეთის ავტონომიური რესპუბლიკის უმაღლესი საბჭოს თავმჯდომარე ელგუჯა (გია) გვაზავა, აფხაზეთის ავტონომიური რესპუბლიკის უმაღლესი საბჭოს თავმჯდომარის მოადგილე ჯემალ გამახარია და აფხაზეთის ავტონომიური რესპუბლიკის უმაღლესი საბჭოს იურიდიულ და საპროცედურო საკითხთა კომისიის თავმჯდომარე გივი ლომინაძე ლიტვის საგარეო საქმეთა სამინისტროს ინფორმაციისა და საზოგადოებასთან ურთიერთობის დეპარტამენტის უფროს ოფიცერ დიანა ზარემბიენეს, საქართველოში ლიტვის რესპუბლიკის საგანგებო და სრულუფლებიანი ელჩის მრჩეველ მარუნე კუბილიუტესა და ლიტვის რესპუბლიკის წამყვანი მედიასაშუალებების ჟურნალისტებს შეხვდნენ.

შეხვედერაზე აფხაზეთის ავტონომიური რესპუბლიკის ხელისუფლების წარმომადგენლებმა მოწვეულ სტუმრებს მიაწოდეს ქრონოლოგიური ინფორმაცია აფხაზეთში შეიარაღებულ კონფლიქტამდე არსებული მდგომარეობისა და მის შემდეგ განვითარებულ მოვლენების შესახებ. აგრეთვე ისაუბრეს ოკუპირებულ ტერიტორიაზე მცხოვრები ქართველი მოსახლეობის პრობლემებზე, მათ შორის ქართული ენაზე განათლების მიღების  აკრძალვასა და თავისუფალი გადაადგილების შეზღუდვაზე.