საქართველოს პარლამენტის ეროვნულ ბიბლიოთეკაში ანსამბლ „ლიახვის“ ლოტბარის, ქორმეისტერის დავით ელბაქიძის 70 წლის იუბილესადმი მიძღვნილი ღონისძიება გაიმართა. ღონისძიებას აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე დაესწრო.

საღამოზე სიტყვით გამოვიდნენ და ხელოვანს იუბილე მიულოცეს კულტურისა და ხელოვნების ცნობილმა წარმომადგენლებმა. დავით ელბაქიძემ აღადგინა და გადაამუშავა ლილვაკებზე ჩაწერილი ოსური და ქართული უნიკალური ფოლკლორული ნიმუშები. ის დღემდე აგრძელებს მოღვაწეობას არაერთი საინტერესო ნიმუშის კვლევისა და აღდგენის მიმართულებით.

ღონისძიება სამხრეთ ოსეთის ადმინისტრაციის კულტურისა და სპორტის სამსახურის ორგანიზებით გაიმართა. საღამოს სამხრეთ ოსეთის ადმინისტრაციის ხელმძღვანელი თამაზ ბესტაევი, საგარეო საქმეთა სამინისტროს პოლიტიკური დეპარტამენტის დირექტორი დავით კერესელიძე და საქართველოს ქართულ-ოსური სამეცნიერო-კვლევითი ცენტრის ხელმძღვანელი ნაირა ბეპიევა ესწრებოდნენ.  

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე და იუსტიციისა და სამოქალაქო ინტეგრაციის საკითხებში აფხაზეთის მინისტრი ნანა გაბელია აფხაზეთის კონფლიქტის თემატიკაზე მომუშავე სამოქალაქო საზოგადოებისა და არასამთავრობო სექტორის წარმომადგენლებს შეხვდნენ.

შეხვედრა მისასალმებელი სიტყვით გახსნა აფხაზეთის მთავრობის თავმჯდომარე რუსლან აბაშიძემ. სადისკუსიო შეხვედრაზე ასევე სიტყვით გამოვიდნენ იუსტიციისა და სამოქალაქო ინტეგრაციის საკითხებში აფხაზეთის მინისტრი ნანა გაბელია, ევროპულ-ქართული ინსტიტუტის ხელმძღვანელი გიორგი მელაშვილი და არასამთავრობო სექტორის წარმომადგენლები.

პანელური დისკუსიის ფარგლებში, მონაწილეებმა იმსჯელეს სამშვიდობო პოლიტიკის მიმართულებით რეგიონში არსებულ გამოწვევებსა და პერსპექტივებზე. საუბარი შეეხო ოკუპირებულ აფხაზეთში მცხოვრები მოსახლეობის უფლებრივ მდგომარეობას, დევნილთა წინაშე არსებულ საჭიროებებს და სხვა მნიშვნელოვან საკითხებს.

ღონისძიება „სამშვიდობო რესურსი - ქართულ-აფხაზური ურთიერთობების მხარდაჭერა“ პროგრამის ფარგლებში, იუსტიციისა და სამოქალაქო ინტეგრაციის საკითხებში აფხაზეთის მინისტრის აპარატის ორგანიზებით გაიმართა. შეხვედრაში აფხაზეთის მთავრობის წევრები, მინისტრის აპარატის წარმომადგენლები და მოწვეული სპიკერები მონაწილეობდნენ.

გამოჩენილ სახელმწიფო და საზოგადო მოღვაწეს, დამსახურებულ მეცნიერს, აფხაზი ერის თვალსაჩინო წარმომადგენლს, გიორგი შარვაშიძის სახელობის სახელმწიფო პრემიის ლაურეატს, ვახტანგ გორგასლის I ხარისხის ორდენის კავალერს, ქართულ-აფხაზური ისტორიული ურთიერთობების აღდგენის გულმხურვალე ქომაგს, არასამთავრობო ორგანიზაცია “მშვიდობა და აფხაზეთის აღორძინები”-ს ხელმძღვანელს, ლორიკ მარშანიას დაბადებიდან 90 წელი შეუსრულდებოდა.

აფხაზეთში მომხდარი ტრაგედიის შემდეგ, ლორიკ მარშანია დევნილობაში მყოფი აფხაზეთის ავტონომიური რესპუბლიკის მთავრობის თავმჯდომარის მოადგილედ მუშაობდა და აქტიურად მონაწილეობდა ჟენევის საერთაშორისო მოლაპარაკებებში.

კონფლიქტის მოგვარების ერთდერთ გზად მას ცივილიზებული, მშვიდობიანი, ასევე სახალხო დიპლომატიის მეთოდები მიაჩნდა. აფხაზთა მომავალს ლორიკ მარშანია მხოლოდ ერთიან საქართველოში განიხილავდა „მე ვარ აფხაზი და ამაყად ვამბობ, რომ ჩემი საქართველო აფხაზეთიდან იწყება“.

აფხაზეთის მთავრობის თავმჯდომარე რუსლან აბაშიძემ,  საქართველოს პარლამენტთან არსებული ჰერალდიკის სახელმწიფოს საბჭოს ორგანიზებით გამართულ სემინარში „ავტონომიური რესპუბლიკების სიმბოლოები“ მიიღო მონაწილეობა.

სემინარი  საქართველოს ისტორიული დროშების და საზღვაო რუკების გამოფენით გაიხსნა.  გამოიფინა შუა საუკუნეების (XIV-XVI სს.) პორტოლანები, რომლებზეც საქართველო, ქალაქ თბილისი და საზღვაო ნავსადგური სებასტოპოლისი, დღევანდელი სოხუმი, წარმოდგენილია ისტორიული ხუთჯვრიანი დროშით.

გაიმართა წიგნის “აფხაზეთის სიმბოლიკისათვის“ პრეზენტაცია. ნაშრომში განხილულია,  როგორც აფხაზეთის ჰერალდიკური მემკვიდრეობა, აფხაზეთის ოკუპირებული ტერიტორიის სიმბოლოები დღევანდელი მდგომარეობით, ასევე პროექტები, რომლებიც საქართველოს პარლამენტთან არსებულმა ჰერალდიკის სახელმწიფო საბჭომ შეიმუშავა.

სემინარის მონაწილეებმა განიხილეს აჭარისა და აფხაზეთის ავტონომიური რესპუბლიკების სახელმწიფო სიმბოლოებთან დაკავშირებული საკითხები, აჭარისა და აფხაზეთის ჰერალდიკური მემკვიდრეობა და სამომავლო გეგმები.

სემინარს აფხაზეთის ავტონომიური რესპუბლიკის მთავრობის თავმჯდომარის მოადგილე ანზორ მარგიანი, იუსტიციისა და სამოქალაქო ინტეგრაციის საკითხებში აფხაზეთის მინისტრი ნანა გაბელია, აჭარის ავტონომიური რესპუბლიკების საკანონმდებლო და აღმასრულებელი ხელისუფლების წარმომადგენლები, ჰერალდიკის, ვექსილოლოგიისა და სიმბოლიკის კვლევის ცენტრის წევრები, სამეცნიერო წრეების და საზოგადოებრივი ორგანიზაციების წარმომადგენლები დაესწრნენ.

ტოლერანტობის საერთაშორისო დღე, ერთ-ერთი გამორჩეული დღეა მთელი კაცობრიობისათვის. ტოლერანტობა არის უმნიშვნელოვანესი პრინციპი და ფუნდამენტი, რომელიც ჩვენი ყოველდღიური ურთიერთობების საფუძველს წარმოადგენს.

ჩვენი ქვეყნის ისტორიული გამოცდილება ცხადყოფს, რომ ქართველი ხალხი განსხვავებებს სიმდიდრედ მიიჩნევს. საქართველოს გააჩნია ტოლერანტულ გარემოში მშვიდობიანი თანაცხოვრების უნიკალური და მრავალსაუკუნოვანი ტრადიცია. ჩვენ ქვეყანაში თითოეული მოქალაქის უფლება თავისი კულტურის, რელიგიისა და ტრადიციების თავისუფალ შესრულებაზე დაცულია მისი იდენტობის, წარმოშობის, რასისა და რწმენის განურჩევლად.

საქართველოს ხელისუფლებისათვის მთავარ ღირებულებას ადამიანი, მისი ღირსება და უფლებები წარმოადგენს. სახელმწიფოს მიერ განხორციელებული პოლიტიკა სამოქალაქო თანასწორობისა და ინტეგრაციის პრინციპებზეა დაფუძნებული. მისი მიზანია ეთნიკური უმცირესობების წარმომადგენელთა იდენტობისა და უფლებების დაცვა, თითოეული მოქალაქის განვითარებისათვის თავისუფალი გარემოს უზრუნველყოფა. ტოლერანტული გარემოს დამკვიდრებითა და განმტკიცებით, ქვეყნის ხელისუფლება უზრუნველყოფს ევროპული და დემოკრატიული სახელმწიფოს მშენებლობას.

აფხაზეთის ავტონომიური რესპუბლიკის მთავრობაში აფხაზეთის ფინანსთა და ეკონომიკის სამინისტროს ორგანიზებით პრაქტიკული კონფერენცია „შიდა კონტროლის სისტემა ეფექტიანი მმართველობისთვის აფხაზეთის ავტონომიურ რესპუბლიკაში“ გაიმართა.

კონფერენცია აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძემ გახსნა. მთავრობის თავმჯდომარემ საქართველოს ფინანსთა სამინისტროს მადლობა გადაუხადა თანადგომისთვის. „მნიშვნელოვანი პროცესები დაიწყო ჩვენს მთავრობაში. სამი წლის განმავლობაში შევეცადეთ გაგვეტარებინა რეფორმები ყველა უწყებაში, რომელიც საბიუჯეტო დაფინანსებასთან იყო დაკავშირებული. რეფორმების შედეგად გაიზარდა ბიუჯეტის პროგრამული ნაწილი. განვახორციელეთ ძირფესვიანი ცვლილებები და მოვახდინეთ ოპტიმიზაცია,“ - განაცხადა რუსლან აბაშიძემ.

კონფერენციის ფარგლებში, საქართველოს ფინანსთა სამინისტროს სახელმწიფო შიდა კონტროლის დეპარტამენტის უფროსის მოადგილე ირმა გელანტია-ახვლედიანმა წარმოადგინა პრეზენტაცია „შიდა კონტროლის სისტემა ეფექტიანი მმართველობისთვის აფხაზეთის ავტონომიურ რესპუბლიკაში“ - თბილისიდან - სოხუმამდე კარგი მმართველობის ასაშენებლად. კონფერენციაზე ასევე სიტყვით გამოვიდა საქართველოს ფინანსთა მინისტრის მოადგილე მიხეილ დუნდუა.

შეხვედრაზე წარმოდგენილი იყო აფხაზეთის ფინანსთა და ეკონომიკის მინისტრის, ლევან თევზაიას პრეზენტაცია „ფინანსური მართვისა და კონტროლის სისტემის (FMC) ინტეგრირება აფხაზეთის ფინანსთა და ეკონომიკის სამინისტროში“, რომელიც დისკუსიის რეჟიმში გაგრძელდა.

აღსანიშნავია, რომ FMC-ის პირველი ეტაპის კომპონენტების დანერგვით აფხაზეთის ფინანსთა და ეკონომიკის სამინისტროში გაუმჯობესდება ბიუჯეტის დაგეგმვის ხარისხი და ფინანსური კონტროლის მექანიზმები, რომლებიც ხელს შეუწყობს რესურსების ეკონომიურ, ეფექტიან და პროდუქტიულ გამოყენებას. აგრეთვე, თავის მხრივ მენეჯერული უფლებამოსილების დელეგირება უზრუნველყოფს სამინისტროს სხვადასხვა იერარქიულ საფეხურზე მდგომი მენეჯერის დაწესებულების საქმიანობის მართვაში ჩართულობის ხარისხის ზრდასა და რესურსების ეფექტურ მართვას.

2023 წლისთვის სამინისტროს მიერ იგეგმება, კონტროლს დაქვემდებარებულ ორგანიზაციებთან გაფორმებული შეთანხმებების შინაარსობრივი და მიზნობრივი სრულყოფა.

კონფერენციას აფხაზეთის მთავრობის თავმჯდომარის მოადგილე ანზორ მარგიანი, აფხაზეთის მთავრობის წევრები და სამინისტროების წარმომადგენლები ესწრებოდნენ.

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე და აფხაზეთის განათლებისა და კულტურის მინისტრი ეკა ხოფერია საქართველოს მუნიციპალური განვითარების ფონდის აღმასრულებელ დირექტორს, დავით ტაბიძეს შეხვდნენ.

შეხვედრის მონაწილეებმა სამომავლო ურთიერთთანამშრომლობის საკითხებზე ისაუბრეს. განსაკუთრებული ყურადღება გამახვილდა აფხაზეთის მთავრობისა და აფხაზეთის განათლებისა და კულტურის სამინისტროს ერთ-ერთ მნიშვნელოვან პროექტზე, რომლის ფარგლებში სამგორის რაიონში დაგეგმილია სპორტული აკადემიის მშენებლობა.

აღნიშნული პროექტი გულისხმობს მულტიფუნქციური სპორტული კომპლექსის მშენებლობას, სადაც განთავსდება ფეხბურთის სათამაშო მოედანი, საკალათბურთო დარბაზი და სხვადასხვა სივრცეები სპორტული აქტივობებისთვის.

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე საქართველოში საბერძნეთის რესპუბლიკის საგანგებო და სრულუფლებიან ელჩს, მარია თეოდორუს შეხვდა.

საბაერძნეთის ელჩმა კიდევ ერთხელ დაადასტურა საქართველოს ტერიტორიული მთლიანობის მტკიცე მხარდაჭერა და მისი ქვეყნის ურყევი პოზიცია ოკუპირებული ტერიტორიების არაღიარების პოლიტიკის მიმართ.

რუსლან აბაშიძემ ბერძენ დიპლომატს მადლობა გადაუხადა მისი ქვეყნის მხრიდან საქართველოს ტერიტორიული მთლიანობის მხარდაჭერისთვის.

მთავრობის თავმჯდომარემ ელჩს ოკუპირებულ აფხაზეთში არსებული ვითარების შესახებ ინფორმაცია მიაწოდა, განსაკუთრებული ყურადღება გაამახვილა ადამიანის ფუნდამენტური უფლებების დარღვევის ფაქტებზე და ოკუპირებულ ტერიტორიაზე მცხოვრები მოსახლეობის სოციალურ-ეკონომიკურ მდგომარეობაზე.

შეხვედრაზე მხარეებმა სხვადასხვა მიმართულებით სამომავლო თანამშრომლობის შესაძლებლობები განიხილეს.

საქართველოს საგარეო საქმეთა სამინისტროში ჟენევის საერთაშორისო მოლაპარაკებების თანათავმჯდომარეებთან შეხვედრა გაიმართა, რომელსაც ქართული მხრიდან საგარეო საქმეთა მინისტრის პირველი მოადგილე და ჟენევის მოლაპარაკებებში საქართველოს დელეგაციის ხელმძღვანელი ლაშა დარსალია ხელმძღვანელობდა. შეხვედრაში აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე მონაწილეობდა.

შეხვედრაზე ხაზი გაესვა პროგრესის მიღწევის საჭიროებას ჟენევის საერთაშორისო მოლაპარაკებების დღის წესრიგის ისეთ მთავარ საკითხებში, როგორიცაა რუსეთის მიერ 2008 წლის 12 აგვისტოს ცეცხლის შეწყვეტის შეთანხმებით ნაკისრი საერთაშორისო ვალდებულებების შესრულება და იძულებით გადაადგილებულ პირთა და ლტოლვილთა უსაფრთხო და ღირსეული დაბრუნება. აღინიშნა, რომ ამ კონტექსტში, ჟენევის საერთაშორისო მოლაპარაკებების ფორმატის ეფექტიან ფუნქციონირებას არსებითი მნიშვნელობა აქვს.

ასევე, შეხვედრის მონაწილეებმა მკაფიოდ განაცხადეს, რომ აუცილებელია ინციდენტებისა და მათზე რეაგირების მექანიზმი (IPRM) ყოველგვარი წინაპირობის გარეშე აღდგეს გალში და რეგულარულად, ფუძემდებლური პრინციპების შესაბამისად იმართებოდეს ერგნეთში. შეხვედრაზე ქართულმა მხარემ შეშფოთება გამოთქვა რუსეთის პროვოკაციული და უკანონო ქმედებების გამო ოკუპირებულ რეგიონებსა და საოკუპაციო ხაზის სიახლოვეს, რაც კიდევ უფრო ამძიმებს ადგილზე არსებულ ვითარებას უსაფრთხოების, ჰუმანიტარული და ადამიანის უფლებათა კუთხით.

საქართველოს გარემოს დაცვისა და სოფლის მეურნეობის სამინისტროს ორგანიზებით ტყის პირველი ეროვნული აღრიცხვის შედეგების ანგარიშის განხილვა გაიმართა. ღონისძიებას აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე დაესწრო.

შეხვედრას, ასევე, საქართველოს საკანონმდებლო და აღმასრულებელი ხელისუფლების, საქართველოში აკრედიტებული დიპლომატიური კორპუსის წარმომადგენლები და გარემოსდაცვითი მიმართულებით მომუშავე არასამთავრობო ორგანიზაციები და მოწვეული ექსპერტები ესწრებოდნენ.

ტყის ეროვნული აღრიცხვის პროგრამა გერმანიის მთავრობის მხარდაჭერით და საერთაშორისო თანამშრომლობის საზოგადოების (GIZ) ტექნიკური დახმარებით ხორციელდება.

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე თურქეთის თანამშრომლობისა და კოორდინაციის სააგენტოს (TIKA) თბილისის ოფისის კოორდინატორს თუბა ოზუთოქს შეხვდა.

რუსლან აბაშიძემ სააგენტოს წარმომადგენელს აფხაზეთის ავტონომიური რესპუბლიკის მთავრობის სახელით, აფხაზეთიდან დევნილი მოსახლეობის მხარდამჭერი პროექტების განხორციელებისა და მრავალწლიანი ნაყოფიერი თანამშრომლობისთვის მადლობა გადაუხადა.

შეხვედრაზე მონაწილეებმა ურთიერთთანამშრომლობის სამომავლო გეგმებზე ისაუბრეს, რომელიც დევნილთა დასაქმებისა და მათი სოციალურ-ეკონომიკური მდგომარეობის გაუმჯობესების მიზნით განხორციელდება.

ღონისძიებას აფხაზეთის ავტონომიური რესპუბლიკის ფინანსთა და ეკონომიკის მინისტრი ლევან თევზაია და მინისტრის მოადგილე გიორგი ჯინჭარაძე ესწრებოდნენ.

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე საქართველოში ლატვიის რესპუბლიკის საგანგებო და სრულუფლებიან ელჩს, ედიტე მედნეს შეხვდა. შეხვედრა გაცნობით ხასიათს ატარებდა.

რუსლან აბაშიძემ ლატვიელ დიპლომატს მადლობა გადაუხადა მისი ქვეყნის მხრიდან საქართველოს ტერიტორიული მთლიანობის მხარდაჭერისათვის და აღნიშნა, რომ ლატვია საქართველოს ევროპულ და ევროატლანტიკურ სტრუქტურებში ინტეგრაციის ერთი-ერთი მთავარი მხარდამჭერია.

მთავრობის თავმჯდომარემ ელჩს მიაწოდა ინფორმაცია აფხაზეთის ავტონომიური რესპუბლიკის მთავრობისა და მისი სტრუქტურული ერთეულების საქმიანობის შესახებ. გააცნო ოკუპირებული აფხაზეთის ტერიტორიაზე არსებული ვითარება და საოკუპაციო რეჟიმის მხრიდან ადგილობრივი მოსახლეობის ფუნდამენტური უფლებების დარღვევის ფაქტებზე ისაუბრა.

ლატვიის ელჩმა კიდევ ერთხელ დაადასტურა საქართველოს ტერიტორიული მთლიანობის მტკიცე მხარდაჭერა და მისი ქვეყნის ურყევი პოზიცია ოკუპირებული ტერიტორიების არაღიარების პოლიტიკის მიმართ.

შეხვედრაზე მხარებმა სამომავლო თანამშრომლობის შესაძლებლობები განიხილეს.

აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძესა და შვეიცარიული აგრარული სკოლა კავკასიის დირექტორ თინათინ მახარაძეს შორის სამუშაო შეხვედრა გაიმართა. შეხვედრაში აფხაზეთის მთავრობის თავმჯდომარის მრჩეველი მანანა ქვაჩახია მონაწილეობდა.

შეხვედრის მონაწილეებმა მიმდინარე ეტაპზე ურთიერთთანამშრომლობის ასპექტებსა და სამომავლო გეგმებზე ისაუბრეს. აღსანიშნავია, რომ კოლეჯში წელს პირველად ჩაირიცხა აფხაზეთიდან დევნილი ორი ახალგაზრდა, რომლებიც განათლებას რძის პროდუქტების წარმოებისა და ფერმერობის მიმართულებით მიიღებენ.

სასწავლებლის სტუდენტები სწავლობენ და ცხოვრობენ შვეიცარიული სტანდარტის კეთილმოწყობილ კამპუსში, რომელიც დმანისის მუნიციპალიტეტის სოფელ სარკინეთში მდებარეობს. სწავლა დაფუძნებულია დუალური სწავლების პრინციპებზე, რაც თეორიისა და პრაქტიკის კომბინაციას გულისხმობს.

შვეიცარიული აგრარული სკოლა კავკასია უპრეცედენტო არაკომერციული კერძო ინიციატივაა საქართველოს სასოფლო-სამეურნეო პროფესიული განათლების სექტორში. შვეიცარიული სტანდარტით შექმნილი კოლეჯი სპეციალიზირებულია მეცხოველეობასა და რძის გადამუშავებაში.