აფხაზეთის ავტონომიური რესპუბლიკის მთავრობა

Аҧснытәи автономтә республика аиҳабыра

სიახლეები

სოხუმის სახელმწიფო დრამატული თეატრის სპექტაკლის „სხვა საქართველო სად არი?!“ პრემიერა შედგა

რუსთაველის თეატრის ექსპერიმენტალურ სცენაზე კონსტანტინე გამსახურდიას სახელობის სოხუმის სახელმწიფო დრამატული თეატრის ახალი სპექტაკლის პრემიერა შედგა. თეატრალურმა დასმა რეჟისორ მერაბ ყოლბაიას სპექტაკლი „სხვა საქართველო სადარი?!" წარმოადგინა.

სპექტაკლში თავმოყრილია გამოჩენილ პოეტთა ლექსები, რომლებიც სამშობლოს სიყვარულს, ქალ-ვაჟთა ტრფიალს, თავისუფლებისადმი სწრაფვასა და საქართველოს ორი ძირძველი კუთხის, აფხაზეთისა და სამაჩაბლოს უდიდეს ტრაგედიას ეხება. ინსცენირებაში ჩართულია აფხაზ პოეტთა ლექსები.

პრემიერას აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, აფხაზეთის მთავრობის წევრები და უმაღლესი საბჭოსა დეპუტატები დაესწრნენ.

სპექტაკლში მონაწილე მსახიობებს შორის არიან მერაბ ყოლბაია, პაატა ვახტანგიშვილი, რამაზ ხომასურიძე, ნინო შავგულიძე და მარიამ ყოლბაია.

დამდგმელი მხატვარია თეო კუხიანიძე; მუსიკალური გაფორმება გიორგი ჯიქიას ეკუთვნის, ვოკალი ვეზდენ ოკუჯავას, სასცენო მოძრაობის პედაგოგიკი ირაკლი ბიბილურია.

საქართველოს საპატრიარქოს და აფხაზეთის მთავრობის ორგანიზებით 23 მაისს „აფხაზეთობა“ აღინიშნა

საქართველოს საპატრიარქოს და აფხაზეთის მთავრობის ორგანიზებით 23 მაისს „აფხაზეთობა“ აღინიშნა.

23 მაისი სვიმონ კანანელის ხსენების დღეა. სრულიად საქართველოს კათოლიკოს-პატრიარქის, ილია მეორის ინიციატივით და ლოცვა კურთხევით ეს დღე „აფხაზეთობის" დღედ დადგინდა.

„აფხაზეთობის" დღეს, სხვადასხვა ღონისძიებები მიეძღვნა.

პირველი ღონისძიება გმირთა მოედანზე გაიმართა. აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ და მთავრობის სხვა წევრებმა საქართველოს ერთიანობისათვის დაღუპულ გმირთა მემორიალი გვირგვინით შეამკეს. მემორიალთან ის მოქალაქეებიც მივდნენ, რომლებმაც აფხაზეთის ომში ახლობლები დაკარგეს.

„აფხაზეთობის" ტრადიციის დამკვიდრების მნიშვნელობაზე ისაუბრა ვახტანგ ყოლბაიამ. მისი თქმით, შემთხვევითი არ არის, რომ ასეთ თარიღად სვიმონ კანანელის ხსენების დღე შეირჩა.

„ეს თარიღი ჩვენთვის გლოვის, ტირილის, სულიერი განცდების დღე იყო მუდამ. მაგრამ ყველამ კარგად უნდა გავიაზროთ ჩვენი პატრიარქის ბრძნული სიტყვები: ტირილს, გლოვას, თავისი ვადა აქვს. დროა ახალ მომავალზე ვიზრუნოთ, რომელიც ჩვენ თავად უნდა შევქმნათ. 23 მაისი, სვიმონ კანანელის ხსენების დღე - „აფახაზეთობა" ერთნაირად ეკუთვნის აფხაზებს და ქართველებს. ამიერიდან ეს დღე დღესასწაულის, ზეიმის დღედ უნდა ვაქციოთ. სხვაგვარად ჩვენ წაგებული აღმოვჩნდებით. ეს დღე, სხვა განწყობას შექმნის, სხვა მოლოდინს გააჩენს, ქართველებშიც და აფხაზებშიც. ახალ შუქს შეიტანს ჩვენი კონფლიქტის მოწესრიგების საკითხში. ასეთი სიბრძნისა და წინდახედულებისთვის ჩვენ ყველანი უდიდეს მადლობას მოვახსენებთ პატრიარქს.

23 მაისი, სვიმონ კანანელის ხსენების დღეს უკავშირდება. ის ერთ-ერთია 12 მოციქულთაგან, რომელსაც ქალწულმა მარიამმა საქადაგებლად საქართველოში, აფხაზეთში ჩამოსვლა დაავალა. სვიმონ კანანელი პირველი საუკუნეების 50-იან წლებში აფხაზეთში მოღვაწეობდა და მისიის შესრულების შემდეგ სხვაგან წასვლა აღარ ისურვა, აფხაზეთში დარჩენა მოიწადინა. მან ყველაფერი იღონა იმისთვის, რომ ქართველებს და აფხაზებს იმ მშვენიერ კუთხეში ერთად ეცხოვრათ, ერთად მოქცეულიყვნენ ქრისტიანებად. თავისი მისია სვიმონ კანანელმა ბრწყინვალედ შეასრულა და აღესრულა კიდეც აფხაზეთში. მისი განსასვენებელიც აფხაზეთშია. წმინდანის საფლავზე აგებული ახალი ათონის მონასტერი კი ჩვენი, აფხაზების და ქართველების ერთობის გვირგვინია. ამიტომაც აბსოლუტურად კანონზომიერია და ნამდვილად არ არის შემთხვევითი, რომ პატრიარქმა აფხაზეთის დღე იმ მოციქულის სახელს დაუკავშირა, რომელმაც აფხაზეთისათვის, საქართველოსთვის იღვაწა, იტანჯა და ღვთით მადლცხებული აღესრულა", - განაცხადა ვახტანგ ყოლბაიამ.

მომავალი წარსულით იქმნება...

გმირთა მემორიალიდან „აფხაზეთობის" აღნიშვნამ ბავშვთა ქალაქ „მზიურში" გადაინაცვლა, სადაც აფხაზეთის ღირსეული წარმომადგენლების მემორიალი გაიხსნა. ქვაზე 13 პიროვნების სახელი და გვარია ამოტვიფრული: დიმიტრი (არზაყან) ემხვარი, ილია ვეკუა, აკაკი ჩხენკელი, გიორგი შარვაშიძე, ამბროსი ხელაია, დიმიტრი გულია, ლეო ბოკერია, ზურაბ სოტკილავა, ავთანდილ (ბასა) ღოღობერიძე, ვიტალი დარასელია, ვიქტორ სანეევი, ვლადიმერ ბარქაია და გიორგი (ჟორა) სიჭინავა. ეს ადამიანები დევნილ მოსახლეობაში ჩატარებული გამოკითხვის შედეგად შეირჩა, რომელსაც აფხაზეთის მთავრობა რამდენიმე თვის განმავლობაში სოციალური ქსელების მეშვეობით ატარებდა.

მემორიალი საზეიმოდ გახსნეს და საზოგადოებას სიტყვით მიმართეს აფხაზეთის მთავრობის თავმჯდომარის მოვალეობის შემსრულებელმა ვახტანგ ყოლბაიამ და სტუმრებმა: სპორტისა და ახალგაზრდობის საქმეთა მინისტრმა ლევან ყიფიანმა, შერიგებისა და სამოქალაქო თანასწორობის საკითხებში სახელმწიფო მინისტრის პირველმა მოადგილემ ქეთევან ციხელაშვილმა, საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრის პირველმა მოადგიელმ გოგი ფაცაციამ, ასევე ილია ვეკუას, ზურაბ სოტკილავას, არზაყან ემხვარის, ვიტალი დარასელიას ნათესავებმა და ცნობილმა ქართველმა ფეხბურთელმა სიომა ბარქაიამ. ღონისძიებას აფხაზეთის განათლებისა და კულტურის მინისტრი დიმიტრი ჯაიანი უძღვებოდა. შესრულდა ქართულ-აფხაზური სიმღერები. საზოგადოებას წარუდგინეს მემორიალური ქვის ავტორი მოქანდაკე ზურაბ კოკაია.

ვახტანგ ყოლბაიას თქმით, ქვაზე ამოტვიფრულია ისეთი ადამიანების გვარ-სახელები, რომლებზეც ვერც ქართველს და ვერც აფხაზს აუგი ვერ დასცდება. მათ თავიანთ მხრებზე ატარეს ქართულ-აფხაზური ურთიერთობა.

„ეს იმდენად სათუთი თემაა, რომ საზოგადოების არაერთგვაროვანი რეაქცია სრულიად გასაგებია ჩვენთვის. იმისათვის, რომ თავიდან აგვეცილებინა ზედმეტი ვნებათაღელვა, ჩვენ გადავწყვიტეთ, გამოკითხვა სოციალურ ქსელებში ჩაგვეტარებინა. დასახელებული იყო 50-ზე მეტი გვარი. აქედან, ყველაზე მეტი ხმა იმ გვარების წილად მოვიდა, რომლებიც შემდეგ მემორიალურ ქვაზე ამოიტვიფრა. ეს ის ხალხია, რომლებმაც თავიანთი საქმიანობითა და მოღვაწეობით უდიდესი წვლილი შეიტანეს საქართველოს სახელის სადიდებლად. ამ თვალსაზრისით, ისინი გლობალური, პლანეტარული მასშტაბის ფიგურები არიან. ეს ეხება ხელოვნებას, მეცნიერებას, ჯანდაცვას, სპორტს, საზოგადოებრივ მოღვაწეობას. გამოკითხვაში დასახელებული ყველა პიროვნება ძალიან ღირსეული და დასაფასებელია, მაგრამ საზოგადოებამ ისეთი ხალხი შეარჩია, რომელნიც მაღალი ჰუმანისტური იდეებით მუდამ გამოირჩეოდნენ. ეს ის ხალხია, რომელთა მიმართ, ვერც ქართველს და ვერც აფხაზს აუგი ვერ დასცდება. ქართულ-აფხაზური ურთიერთობის წინსვლაში მათ ლომის წილი უდევთ. ბუნებრივია, შეიძლება გარკვეული კითხვებიც დაისვას, უკმაყოფილების განცდაც იყოს. მაგრამ ყველამ უნდა იცოდეს, რომ ქვაზე ამოტვიფრული გვარ-სახელების შერჩევისერთ-ერთი მთავარი კრიტერიუმი ქართულ-აფხაზური ურთიერთობებია, მისი ისტორია და მომავალია. სწორედ ამას ქადაგებს მუდამ ჩვენი კათოლიკოს-პატრიარქიც ", - აღნიშნა ვახტანგ ყოლბაიამ.

მისივე თქმით, იგი სრულიად იზიარებს საზოგადოების აზრს, შერჩეულ პიროვნებებთან დაკავშირებით, თუმცა პირადად ის მაინც დაუმატებდა რამდენიმე გვარს.

„ეს ჩემი არჩევანი არ არის, ეს გამოკითხვის შედეგებია. ყველანი ხედავთ, ხალხმა ვის მიანიჭა უპირატესობა - მსოფლიოში განთქმულ ქირურგს, გამოჩენილ ტენორს, საქვეყნოდ აღიარებულ სპორტსმენებს, ოლიმპიურ ჩემპიონს, აფხაზური ანბანის შემდგენელს, ცნობილ პოეტსა და მთარგმნელს, აფხაზეთის მთავრობის პირველ თავმჯდომარეს. სიმართლე გითხრათ, ამ სიას 2-3 კაცს კიდევ დავუმატებდი, - მაგრამ საზოგადოებრივ აზრზე დაყრდნობა სამართლიან გადაწყვეტილებად მიმაჩნია, რასაც უმრავლესობა ვიზიარებთ", - განაცხადა აფხაზეთის მთავრობის თავმჯდომარის მოვალეობის შემსრულებელმა.

ღონისძიების ბოლოს, იქ მისულმა საზოგადოებამ მემორიალური ქვა წითელი მიხაკებით შეამკეს.

დღის დასკვნითი ღონისძიება საქართველოს საპატრიარქოში გაიმართა. საპატრიარქოს მხარდაჭერით სოხუმის სახელმწიფო უნივერსიტეტის მიერ ორგანიზებული კონფერენცია სახელწოდებით „აფხაზეთი" გაიმართა.

დამსწრე საზოგადოებას სიტყვით მიმართეს აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ, სასულიერო პირებმა და სოხუმის სახელმწიფო უნივერსიტეტის წარმომადგენლებმა.

ღონისძიების ბოლოს გაიმართა აფხაზეთიდან დევნილი კომპოზიტორის ია მაისაიას სიმღერის „აფხაზეთო საქართველოს მშვენებავ" კლიპის პრეზენტაცია გაიმართა.

Abkhazia News

23 მაისს „აფხაზეთობა“ აღინიშნა

საქართველოს საპატრიარქოს და აფხაზეთის მთავრობის ორგანიზებით  23 მაისს „აფხაზეთობა" აღინიშნა.

23 მაისი სვიმონ კანანელის ხსენების დღეა, უწმინდესისა და უნეტარესის, სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსის და ბიჭვინთისა და ცხუმ-აფხაზეთის მიტროპოლიტის ილია მეორის ინიციატივით და ლოცვა კურთხევით 23 მაისი „აფხაზეთობის" დღედ დადგინდა.

ამ დღესთან დაკავშირებით, სხვადასხვა ღონისძიებები გაიმართა:

09:00 საათზე, სვეტიცხოვლის საპატრიარქოს ტაძარში, მოციქული სვიმონ კანანელის ხსენების დღესთან დაკავშირებით სადღესასწაულო წირვა გორისა და ატენის მიტროპოლიტმა ანდრიამ აღავლინა.

დღესვე, აფხაზეთის ხელისუფლების წარმომადგენლებმა, სტუდენტებმა, აფხაზეთის ომში დაღუპულთა დედებმა და დევნილმა საზოგადოებამ გმირთა მემორიალი გვირგვინით შეამკეს.

13:30 საათზე, ნოდარ დუმბაძის სახელობის ბავშვთა ქალაქ „მზიურში", ქვების ხეივანში, დაიდგა აფხაზეთის გამოჩენილი პიროვნებებისადმი მიძღვნილი ქვა, რომელზეც ამოტვიფრულია აფხაზეთის მკვიდრი ცნობილი საზოგადო მოღვაწეების, სასულიერო პიროვნების, სპორტსმენების, მწერლების, ხელოვანების და მედიცინის მუშაკების სახელები.

ქვის მემორიალი საზეიმოდ გახსნეს და საზოგადოებას სიტყვით მიმართეს აფხაზეთის მთავრობის თავმჯდომარის მოვალეობის შემსრულებელმა ვახტანგ ყოლბაიამ და სტუმრებმა: სპორტისა და ახალგაზრდობის საქმეთა მინისტრმა ლევან ყიფიანმა, შერგებისა და  სამოქალაქო თანასწორობის საკითხებში სახელმწიფო მინისტრის პირველმა მოადგილემ ქეთევან ციხელაშვილმა, საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრის პირველმა მოადგიელმ გოგი ფაცაციამ, ასევე ილია ვეკუას, ზურაბ სოტკილავას, არზაყან ემხვარის, ვიტალი დარასელიას ნათესავებმა და ცნობილმა ქართველმა ფეხბურთელმა ვლადიმერ (სიომა) ბარქაიამ. ღონისძიებას აფხაზეთის განათლებისა და კულტურის მინისტრი დიმიტრი ჯაიანი უძღვებოდა. შესრულდა ქართულ-აფხაზური სიმღერები. მემორიალური ქვა მოქანდაკე ზურაბ კოკაიამ შექმნა.

აფხაზეთის მთავრობა რამდენიმე თვის განმავლობაში ატარებდა საზოგადოებრივ გამოკითხვას დევნილ მოსახლეობაში, რათა გამოევლინათ აფხაზეთის საზოგადოების ყველა დროის გამოჩენილი პიროვნებები. ხმათა უმრავლესობით შერჩეულ იქნა 13 პიროვნება: დიმიტრი (არზაყან) ემხვარი, ილია  ვეკუა, აკაკი ჩხენკელი, გიორგი შარვაშიძე, ამბროსი ხელაია, დიმიტრი გულია, ლეო ბოკერია, ზურაბ სოტკილავა, ავთანდილ (ბასა) ღოღობერიძე, ვიტალი დარასელია, ვიქტორ სანეევი, ვლადიმერ ბარქაია და გიორგი (ჟორა) სიჭინავა.

საპატრიარქოში აფხაზეთისადმი მიძღვნილი სამეცნიერო კონფერენცია გაიმართა, რომელიც სოხუმის სახელმწიფო უნივერსიტეტისა და საქართველოს საპატრიაქროს ორგანიზებით მოეწყო. კონფერენციის შემდგომ აფხაზეთიდან დევნილი კომპოზიტორის ია მაისაიას სიმღერის „აფხაზეთო საქართველოს მშვენებავ" კლიპის პრეზენტაცია გაიმართა.

აფხაზეთის განათლებისა და კულტურის სამინისტროს დღეს ესტონეთის დელეგაცია სტუმრობდა

აფხაზეთის განათლებისა და კულტურის სამინისტროს დღეს ესტონეთის დელეგაცია სტუმრობდა. დელეგაციის წევრებს აფხაზეთის მთავრობის თავმჯდომარის მოვალეობის შემსრულებელი ვახტანგ ყოლბაია და აფხაზეთის განათლებისა და კულტურის მინისტრი დიმიტრი ჯაიანი შეხვდნენ.

ვიზიტი დაგეგმილი იყო პროექტის „ხარისხიანი განათლება სოციალური რისკის ბავშვებისათვის" ფარგლებში, რომლის მიზანია ურთიერთთანამშრომლობით ესტონეთის საუკეთესო პრაქტიკის გაზიარება, რომელიც მიზანმიმართულია ბავშვებზე ორიენტირებული განათლების დანერგვის ხელშესაწყობად. პროექტის მიზანი თანხვედრაშია იუნესკოს მიზნებთან „განათლება ყველასათვის" და მილენიუმის განვითარების მიზნებთან - განათლების ხარისხის გაუმჯობესება და ხელმისაწვდომობა.

ესტონური დელეგაციის ვიზიტის ფარგლებში, ხელი მოეწერა ურთიერთთანამშრომლობის მემორანდუმს. ესტონეთის საელჩოს, აფხაზეთის მთავრობის, ორგანიზაცია „სკოლა, ოჯახი, საზოგადოება"-სა და აფხაზეთის განათლებისა და კულტურის სამინისტროს შორის. მემორანდუმს ხელი მოაწერა აფხაზეთის მთავრობის თავმჯდომარის მოვალეობის შემსრულებელმა ვახტანგ ყოლბაიამ, აფხაზეთის განათლებისა და კულტურის მინისტრმა დიმიტრი ჯაიანმა, ორგანიზაციის „სკოლა, ოჯახი, საზოგადოება" ხელმძღვანელმა ლაშა მკურნალიძემ და თბილისში ესტონეთის საელჩოს მისიის ხელმძღვანელის მოადგილემ სვენ სიჰრვატიმ.

პროექტში ჩართულნი არიან შემდეგი ქვეყნები: ესტონეთი, აზერბაიჯანი, სომხეთი, ბელორუსია და საქართველო. პროექტის პარტნიორია, აფხაზეთის განათლებისა და კულტურის სამინისტრო. პროექტის ფარგლებში 2014 წლის 24-25 მაისს დაიწყება პირველი სამუშაო შეხვედრა აფხაზეთის განათლებისა და კულტურის სამინისტროში.

შეხვედრაზე პროექტის მიმართულებების შესახებ და მასში აფხაზეთის სკოლების ჩართულობის მნიშვნელობაზე ისაუბრა აფხაზეთის განათლებისა და კულტურის მინისტრის მოადგილემ, განათლების ექსპერტმა, ქალბატონმა ბელა კოპალიანმა.

23 მაისი სვიმონ კანანელის ხსენების დღეა, უწმინდესისა და უნეტარესის, სრულიად საქართველოს კათოლიკოს-პატრიარქის ინიციატივით და ლოცვა კურთხევით 23 მაისი „აფხაზეთობის“ დღედ დადგინდა

ამ დღესთან დაკავშირებით, დაგეგმილია სხვადასხვა ღონისძიებები:

09:00 საათზე, სვეტიცხოვლის საპატრიარქოს ტაძარში, მოციქული სვიმონ კანანელის ხსენების დღესთან დაკავშირებით სადღესასწაულო წირვას გორისა და ატენის მიტროპოლიტი ანდრია აღავლენს. 

11:00 საათზე, აფხაზეთის ხელისუფლების წარმომადგენლები და დევნილი საზოგადოება გმირთა მემორიალს გვირგვინით შეამკობენ.

13:30 საათზე, ნოდარ დუმბაძის სახელობის ბავშვთა ქალაქ "მზიურში", ქვების პარკში დაიდგმევა აფხაზეთის გამოჩენილი პიროვნებებისადმი მიძღვნილი ქვა, რომელზეც ამოტვიფრულია აფხაზეთის მკვიდრი ცნობილი საზოგადო მოღვაწეების, სასულიერო პიროვნების, სპორტსმენების, მწერლების, ხელოვანების და მედიცინის მუშაკების სახელები.

ღონისძიებას საზეიმოდ გახსნის აფხაზეთის მთავრობის თავმჯდომარის მოვალეობის შემსრულებელი ვახტანგ ყოლბაია. შესრულდება ქართულ- აფხაზური სიმღერები.

აფხაზეთის მთავრობა რამდენიმე თვის განმავლობაში ატარებდა საზოგადოებრივ გამოკითხვას დევნილ მოსახლეობაში, რათა გამოევლინათ აფხაზეთის საზოგადოების ყველა დროის გამოჩენილი პიროვნებები. ხმათა უმრავლესობით შერჩეულ იქნა 13 პიროვნება: დიმიტრი (არზაყან) ემხვარი, ილია ვეკუა, აკაკი ჩხენკელი, გიორგი შარვაშიძე, ამბროსი ხელაია, დიმიტრი გულია, ლეო ბოკერია, ზურაბ სოტკილავა, ავთანდილ (ბასა) ღოღობერიძე, ვიტალი დარასელია, ვიქტორ სანეევი, ვლადიმერ ბარქაია და გიორგი (ჟორა) სიჭინავა.

15:00 საათზე კი საპატრიარქოში  აფხაზეთისადმი მიძღვნილი სამეცნიერო კონფერენცია გაიმართება, რომელის სოხუმის სახელმწიფო უნივერსიტეტისა და საქართველოს საპატრიარქოს ორგანიზებით მოეწყობა. კონფერენციის შემდგომ აფხაზეთიდან დევნილი კომპოზიტორის ია მაისაიას სიმღერის "აფხაზეთო საქართველოს მშვენებავ" კლიპის პრეზენტაცია გაიმართება.

საქართველოს პარლამენტის ეროვნული ბიბლიოთეკაში წიგნის „ქართული პერიოდული პრესის მასალები“ 1900-1921 წწ. ( აფხაზეთი - რელიგია, განათლება, კულტურა) პრეზენტაცია გაიმართა

 საქართველოს პარლამენტის ეროვნული ბიბლიოთეკის საგამოფენო დარბაზში გაიმართა წიგნის „ქართული პერიოდული პრესის მასალები" 1900-1921წწ. (აფხაზეთი - რელიგია, განათლება, კულტურა) პრეზენტაცია. წიგნის შემდგენელი და რედაქტორია - ირაკლი გელენავა.

ღონისძიებას აფხაზეთის განათელბისა და კულტურის მინისტრი დიმა ჯაიანი უძღვებოდა.

პრეზენტაციას აფხაზეთის მთავრობის თავმჯდომარის მოვალეობის შემსრულებელი ვახტანგ ყოლბაია, აფხაზეთის უმაღლესი საბჭოს თავმჯდომარე გია გავზავა, სოხუმის სახელმწიფო უნივერსიტეტის რექტორი ჯონი აფაქიძე, აფხაზეთის მთავრობის წევრები, აფხაზეთის უმაღლესი საბჭოს დეპუტატები, სოხუმის სახელმწიფო უნივერსიტეტის პროფესორ-მასწავლებლები და დევნილი საზოგადოება დაესწრო.

წიგნის გამოცემით ხელი შეეწყობა 1900-1921 წლების აფხაზეთში განათლებისა და კულტურის ისტორიის კვლევის გაძლიერებას, მთელი რიგი ისტორიული მომენტების ობიექტურად შესწავლასა და დაზუსტებას. მეცნიერულ ბრუნვაში შემოვა ასობით ახალი დოკუმენტი/პირველწყარო.

აღნიშნული წიგნი გადაეცემა ყველა მსხვილ წიგნსაცავს და საგანმანათლებლო-კვლევით დაწესებულებებს, ასევე აფხაზეთის ა/რ საჯარო სკოლებისა და ოკუპირებული გალის რაიონის საშუალო სკოლების ბიბლიოთეკებს.

წიგნი გამოცემულია აფხაზეთის განათლებისა და კულტურის სამინიტროს ადამიანური რესურსის გამოყენებით.

აფხაზეთის განათლებისა და კულტურის მინისტრის მოადგილე ბელა კოპალიანი პოლონეთში საგანმანათლებლო სფეროს ექსპერტებს შეხვდა

აფხაზეთის განათლებისა და კულტურის მინისტრის მოადგილე ბელა კოპალიანი სამუშაო ვიზიტით პოლონეთში იმყოფებოდა,სადაც შეხვედრები გამართა საგანმანათლებლო სფეროს ექსპერტებთან. ვიზიტი პროექტის - „სასკოლო მზაობის ცენტრები საქართველოს სასოფლო რეგიონებში"ფარგლებში განხორციელდა.

პროექტის მიზანია საქართველოში დანერგოს საპილოტე პროგრამა 5 წლის ასაკის ბავშვების სასკოლო მზაობისათვის იმ მუნიციპალიტეტებში, სადაც არ არის საბავშვო ბაღები.

პროექტის ფარგლებში, შერჩეული სკოლების ბაზაზე ჩატარდება სკოლამდელი განათლების ცენტრების სარემონტო სამუშაოები, თითოეული ცენტრი აღიჭურვება შესაბამისი ავეჯით. ასევე შერჩეული პედაოგები გაივლიან გადამზადებას, საპილოტე პროექტის განმავლობაში უზრუნველყოფილნი იქნებიან მეთოდური მასალებით და სახელფასო ანაზღაურებით.

პროექტი სრულ თანხვედრაშია საქართველოს განათლებისა და მეცნიერების სამინისტროს მიერ გამოცხადებულ პოლიტიკასთან სკოლამდელი განათლების სფეროში.

პოლონეტში ვიზიტის ფარგლებში სამუშაო შეხვედრები გაიმართა ვარშავის კოპერნიკის სამეცნიერო, საგანმანათლებლო ინიციატივებისა და საზოგადოებრივ საგანმანათლებლო ინიციატივების ცენტრებში. შეხვედრები მოეწყო ასევე, სკოლამდელი განათლების სპეციალისტებთან და მასწავლებელთა კვალიფიკაციის ამაღლების ცენტრში.

პოლონელმა კოლეგებმა, საქართველოს დელეგაციის წარმომადგენლებს გააცნეს საუკეთესო პრაქტიკის მქონე სკოლამდელი განათლების სპეციალისტების მიერ ჩატარებული მეცადინეობები.

საპილოტე პროექტის წარმატებით განხორციელების შემდეგ, კვლავ გაიზრდება საქართველოს მასშტაბით სასკოლო მზაობის ცენტრების დაფუძნება, რომელშიც აქტიურად იქნება ჩართული აფხაზეთის განათლებისა და კულტურის სამინისტრო.

პროექტის პარტნიორები არიან პოლონეთის საგარეო საქმეთა სამინისტრო, პოლონური საგანმანათლებლო ორგანიზაცია „ედუკატორი", საქართველოს განათლებისა და მეცნიერების სამინისტრო, ასოციაცია „კივიტას გეორგია" და აფხაზეთის განათლებისა და კულტურის სამინისტრო.

აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტროს მიერ გამოცხადებული კონკურსის ფარგლებში წერითი ტესტირების მეორე ეტაპი ჩატარდა

აფხაზეთის ა/რ ჯანმრთელობისა და სოციალური დაცვის სამინისტროს მიერ გამოცხადებული კონკურსის ფარგლებში, დღეს წერითი ტესტირების მეორე ეტაპი ჩატარდა. კონკურსი სამინისტროს 13 ვაკანტურ თანამდებობაზე გამოცხადდა. აღნიშნული ადგილების დასაკავებლად 78 განაცხადი შემოვიდა, რომელთაგან მეორე ეტაპზე  მონაწილეობის მისაღებად 55 კონკურსანტი გადავიდა.

გამოცდებს საკონკურსო კომისიის თავმჯდომარე, აფხაზეთის ა/რ ჯანმრთელობისა და სოციალური დაცვის მინისტრი ქეთევან ბაკარაძე, კომისიის თავმჯდომარის მოადგილე, აფხაზეთის ა/რ მთავრობის იურიდიულ საკითხთა და ადამიანური რესურსების მართვის დეპარტამენტის უფროსი, ნოდარ ჯალაღონია, კომისიის წევრები: საქართველოს ჯანმრთელობისა და სოციალური დაცვის სამინისტროს, ჯანმრთელობის დაცვის დეპარტამენტის უფროსი მარინა დარახველიძე, საჯარო სამსახურის ბიუროს ადმინისტრაციული დეპარტამენტის უფროსი კობა ყალიჩავა, აფხაზეთის პროფესიული კავშირის ხელმძღვანელი შალვა წულეისკირი და არასამთავრობო ჰუმანიტარული ფონდი „აფხაზეთი"-ს ფსიქოლოგი თეა კაჭარავა ესწრებოდნენ.

საკონკურსო კომისია კონკურსანტებს აცნობებს ტესტირების  შედეგებს. პრეტენზიის არსებობის შემთხვევაში კონკურსანტებს საშუალება ექნებათ განცხადება შეიტანონ საპრეტენზიო კომისიაში.

ქუთაისში მცხოვრებ, სოციალურად დაუცველ აფხაზეთიდან დევნილებს უფასო სამედიცინო გამოკვლევები ჩაუტარდათ

აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტროსა და აკადემიკოს ვ.ივერიელის სახელობის ენდოკრინოლოგია-მეტაბოლოგია-დიეტოლოგიის ცენტრ „ენმედიცს" შორის გაფორმებული თანამშრომლობის მემორანდუმის ფარგლებში, მორიგი სამედიცინო პროფილაქტიკური-გამოკვლევები ქუთაისში მცხოვრებმა, სოციალურად დაუცველმა დევნილებმა გაიარეს.

გამოკვლევები 17-18 მაისს ქუთაისის მერიის, ჯანდაცვისა და სოციალური სამსახურის შენობასა და ავანგარდის ტერიტორიაზე არსებულ დევნილთა კომპაქტურ ჩასახლებაში მიმდინარეობდა. კლინიკა „ენმედიცის" მაღალპროფესიულ ექიმთა ჯგუფი ორი დღის განმავლობაში, როგორც ადგილობრივ მოსახლეობას, ასევე აფხაზეთიდან იძულებით გადაადგილებულმა პირებს სხვადასხვა სახის დიაგნოსტიკურ და ლაბორატორიულ გამოკვლევებს უტარებდა. აქციაში მონაწილეობა მიიღეს კლინიკის სპეციალისტებმა, კერძოდ თერაპევტმა, პედიატრმა, კარდიოლოგმა, ნევროლოგმა, გინეკოლოგმა, ქირურგი, ოფთალმოლოგმა, ბავშვთა ენდოკრინოლოგმა და ოტორინოლარინგოლოგმა.

მემორანდუმის ფარგლებში სამედიცინო-პროფილაქტიკური გამოკვლევები თბილისში მცხოვრებ მრავალშვილიან დედებს, აფხაზეთის ომის ვეტერანებს, ომში დაღუპულთა დედებსა და ბორჯომში მცხოვრებ დევნილ მოსახლეობას უკვე ჩაუტარდა.

სამედიცინო აქციაში საქართველოს სხვა რეგიონში მცხოვრები იძულებით გადაადგილებული პირებიც ჩაერთვებიან.

ვახტანგ ყოლბაია სამეგრელოს რეგიონში იმყოფებოდა

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია 17 და 18 მაისს სამეგრელოს რეგიონში იმყოფებოდა. მთავრობის თავმჯდომარის მოვალეობის შემსრულებელი აფხაზეთის ავტონომიური რესპუბლიკის ჯანმრთელობისა და სოციალური დაცვის მინისტრ ქეთევან ბაკარაძესთან ერთად ქალაქ ჯვარში აფხაზეთიდან დევნილი მოსახლეობის სამედიცინო-პროფილაქტიკური გასინჯვების პროცესს დაესწრო,შეხვდა და გაესაუბრა დევნილებს, გაეცნო მათ პრობლემებს, რიგი საკითხები ადგილზე გადაწყვიტა. დევნილებს 2 დღის განმავლობაში ჩაუტარდათ ლაბორატორიული და დიაგნოსტიკური გამოკვლევები, რომელშიც მონაწილეობა მიიღეს ღუდუშაურის სახელობის ეროვნული სამედიცინო ცენტრის წამყვანმა სპეციალისტებმა. დევნილებს დანიშნულების შესაბამისად გადაეცათ მედიკამენტები და დაურიგდათ ჰუმანიტარული ტვირთი.

ვახტანგ ყოლბაია სამეგრელო-ზემო სვანეთის რეგიონში აფხაზეთის ავტონომიური რესპუბლიკის მთავრობის წარმომადგენლობის ხელმძღვანელ ოთარ გოგოხიასთან ერთად გაეცნო სამეგრელოს რეგიონში სოფლის მეურნეობის საპილოტე პროგრამის მიმდინარეობას. შეგახსენებთ, რომ საქართველოს ეკონომიკის სამინისტროს მიერ აფხაზეთის მთავრობას სარგებლობის უფლებით გადმოეცა რამოდენიმე ასეული ჰექტარი მიწის ნაკვეთი, სადაც წელს პირველად 10 ჰექტარზე ჩატარდა ხვნა-თესვის სამუშაოები. აღნიშნული პროექტის გეგმა საქართველოს სოფლის მეურნეობის სამინისტორსა და აფხაზეთის სოფლის მეურნეობისა და გარემოს დაცვის დეპარტამენტის თანამშრომლობით შეიქმნა. მიწის ნაკვეთის მოსარგებლეები აფხაზეთიდან დევნილები არიან და პროექტის ფარგლებში დასაქმებულია 20-ზე მეტი დევნილი ოჯახი. ვახტანგ ყოლბაია ზუგდიდში შეხვდა აფხაზეთის სოფლის მეურნეობისა და გარემოს დაცვის დეპარტამენტის წარმომადგენლებს და პროექტის უშუალო ბენეფიციარებს, მათთან ერთად განიხილა პროექტის ეფექტურად განხორციელებისათვის აუცილებელი სამომავლო გეგმები.

ვახტანგ ყოლბაია აფხაზეთის მთავრობისთვის გადაცემულ მიწის ნაკვეთზე დასაქმებულ დევნილებს შეხვდა

აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ სამეგრელოში, საქართველოს ეკონომიკის სამინისტროს მიერ აფხაზეთის მთავრობისთვის სარგელობის უფლებით გადაცემული მიწის ნაკვეთი მოინახულა. ყოლბაია გაეცნო 10 ჰექტარი ფართობის ნაკვეთზე პირველად ჩატარებულ ხვნა-თესვის პროცესს. აღნიშნულ მიწის ნაკვეთზე, საქართველოს სოფლის მეურნეობის სამინისტორსა და აფხაზეთის სოფლის მეურნეობისა და გარემოს დაცვის დეპარტამენტის თანამშრომლობით შეიქმნა გეგმა და დასაქმდა 20-ზე მეტი დევნილი ოჯახი. სავარგულზე წელს სიმინდი დაითესება და მოწეული მოსავალი დევნილ ოჯახებზე გადანაწილდება.

დევნილთა თქმით, ისინი მიესალმებიან აღნიშნულ გადაწყვეტილებას, რადგან ხშირ შემთხვევაში მიწა მათთვის არსებობის ერთადერთი წყაროა.

„სხვა დევნილებთან ერთად მეც გაწევრიანებული ვარ ჯგუფში, რომელიც აფხაზეთის მთავრობისა და ცენტრალური მთავრობის ხელშეწყობით მიწას ამუშავებს. წელს გადაწყვეტილი გვაქვს სიმინდის მოყვანა, რომელსაც დევნილები გავინაწილებთ, მომავალ წელს ვაპირებთ გავაფართოვოთ სამუშაოები, რისი სრული დაპირებაც გვაქვს აფხაზეთს მთავრობისგან, მათგან სრულ მხარდაჭერას ვგრძნობთ. ასე რომ, მომავალს იმედის თვალით ვუყურებთ", - განაცხადა აფხაზეთიდან დევნილმა რევაზ ჯალაღონიამ.

ქალაქ ჯვარში აფხაზეთიდან დევნილთა სამედიცინო-პროფილაქტიკური გამოკვლევები მიმდინარეობს

დღეს, ქალაქ ჯვარში, აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტრო ღუდუშაურის კლინიკის თანადგომით დევნილთა მორიგ სამედიცინო გამოკვლევას ატარებს. გამოკვლევები უტარდება როგორც დევნილ, ისე ოკუპირებული აფხაზეთიდან გადმოსულ მოსახლეობას. სამედიცინო გამოკვლევები მრავალპროფილურია და მოიცავს ქირურგიას, დერმატოლოგიას, ენდოკრინოლოგიას, პედიატრიას, ექოსკოპიურ გამოკვლევებს, გინოკოლოგიას, კარდიოლოგიას. ადგილზე რიგდება ჰუმანიტარული დახმარება, ასევე 70-მდე დასახელების მედიკამენტი.

აქციის მნიშვნელობასა და მასშტაბებზე ისაუბრა აფხაზეთის ჯანმრთელობისა და სოციალური დაცვის მინისტრმა ქეთევან ბაკარაძემ. მისი თქმით, ამ რეგიონში მძმე სოციალური ფონია და ასეთი ტიპის აქციას სასიცოცხლო მნიშვნელობა აქვს.

„დაბა ჯვარში, გრძელდება აფხაზეთის ჯანდაცვის პროგრამული უზრუნველყოფა გასვლითი ღონისძიების ფარგლებში, რომელიც მოიცავს დევნილი მოსახლეობისა და არა მარტო მათ მრავალპროფილურ კვლევებსა და უფასო მედიკამენტების გაცემას. ამჯერად ჩვენი მხარდამჭერები არიან ღუდუშაურის ეროვნული ცენტრის წამყვანი სპეციალისტები, აქ წარმოდგენილია ექიმების ფართო სპექტრი, რომლებიც უსასყიდლოდ ემსახურებიან ბენეფიციარებს. ეს არის საზღვრისპირა რეგიონი, აქ ძალიან მძიმე სოციალური ფონია, საკმაოდ ბევრი სოციალურად დაუცველია და მათი განსაკუთრებული თხოვნა იყო, რომ სწორედ ამ რეგიონში ჩატარებულიყო კვლევები და სწორედ ამ თხოვნის საფუძველზე მოხდა ჩვენი აქ ჩამოსვლა. ხვალაც ასეთივე რეჟიმით გაგრძელდება ანალოგიური ღონისძიება ამავე რეგიონში და უფრო მეტ ნაკადს ველოდებით. ასევე აღსანიშნავია, რომ ხალხი ოკუპირებული ტერიტორიებიდანაც გადმოდის. ეს ხორციელდება ადგილობრივი მუნიციპალიტეტის მიერ, აქ მობილიზებულია რამდენიმე ავტოსატრანსპორტო საშუალება. ჩვენი ღონისძიების მხარდამჭერია ასევე წალენჯიხის მუნიციპალიტეტი. მინდა ვისარგებლო შემთხვევით და ძალიან დიდი მადლობა გადავუხადო მათ ასეთი თანადგომისათვი", - განაცხადა ქეთევან ბაკარაძემ.

დღის მეორე ნახევარში სამედიცინო გამოკვლევების პროცესს შეურეთდა აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია. იგი ადგილზე გაეცნო აქციის მიმდინარეობასა და დევნილთა პრობლემებს. ყოლბაიას განცხადებით, მიუხედავად იმისა, რომ ქვეყანაში საყოველთაო დაზღვევის პროგრამა მოქმედებს, აფხაზეთის მთავრობის მხრიდან ჩატარებული აქციები დამატებით პროფილაქტიკურ-პრევენციულ ხასიათს ატარებს. მისი თქმით, სამეგრელოში გამოკვლევები უკვე მესამედ დარდება და ამავე რეგიონში, კონკრეტულად ზუგდიდში, უახლოეს მომავალში კიდევ ერთხელ ჩატარდება სამედიცინო გამოკვლევები, შემდეგ კი აქცია გაგრძელდება იმერეთში, აჭარასა და თბილისში.

„აფხაზეთის ჯანდაცვის სამინისტრო, უკვე მერამდენედ აწყობს ასეთ ღონისძიებას. სამეგრელოში ჩვენ უკვე მესამედ ვატარებთ კვალიფიციურ გამოკვლევებს. მიუხედავად იმისა, რომ არსებობს საყოველთაო დაზღვევის პროგრამა, რომელიც საკმაოდ ნაყოფიერად მუშაობს მთელი ქვეყნის მასშტაბით, ჩვენ მაინც საჭიროდ მივიჩნიეთ, საკუთარი ბიუჯეტიდან გამოგვეყო სახსრები უფრო პროფილაქტიკური და პრევენციული გამოკვლევებისთვის. დღევანდელმა აქციამ კიდევ ერთხელ ნათლად დაგვანახა, რომ მსგავსი შეხვედრები მოსახლეობასთან უფრო ინტენსიური უნდა იყოს. გარდა იმისა, რომ ასეთი გამოკვლევები ადამიანის ხასიათზე, უნარზე, მის შრომისუნარიანობაზე ძალიან დადებით გავლენას ახდენს, ამავე დროს, ისიც მინდა ვთქვა, რომ დევნილებისათვის ეს არის პირდაპირი კონტაქტი აფხაზეთის ხელისუფლებასთან, სამინისტორებთან, ყველა ხელმძღვანელ პირთან, ეს კი მათში მარტოსულობის განცდას მთლიანად თუ არა, ნაწილობრივ მაინც აქარწყლებს. აქვე მინდა დავძინო, რომ ეს იმას არ ნიშნავს, რომ ჩვენ მხოლოდ დევნილი მოსახლეობის გამოკვლევით ვართ დაკავებული, არამედ, ვისაც სურვილი აქვს, ადგილობრივ ხელისუფლებასთან შეთანხმებით, ადგილობრივი მოსახლეობაც სარგებლობს ამ სიკეთით, რასაც ჩვენ ნამდვილად მივესალმებით. მინდა ვისარგებლო შემთხვევით და უღრმესი მადლობა გადავუხადო ამ მხარის გუბერნატორს - ლევან შონიას, სენაკის გამგებელს, წალენჯიხის გამგებელს, ჯვარის გამგებელს, ვინც ჩვენ მუდამ მხარში გვიდგას და გვახვედრებს გამართულ ინფრასტრუქტურას, რომ გამოკვლევები სრულყოფილად წარმიართოს, გარდა ამისა, ისინი ჩვენს დასახმარებლად საკუთარ პერსონალსაც უხმობენ და ასე ერთობლივად, მხარში დგომით და თანამშრომლებით, ჩვენ გვსურს დავძლიოთ ის უდიდესი პრობლემა, რასაც ადამიანის ჯანმრთელობის მდგომარეობის გაუმჯობესება ჰქვია. მახარებს დევნილების მადლიერება და კმაყოფილების გრძნობა, მაგრამ ეს ნამდვილად არ არის ბევრი, კიდევ ერთხელ დავრწმუნდი იმაში, რომ ამგვარი აქციები უფრო ინტენსიური უნდა გახდეს. ამას ემატება ისიც, რომ ჩვენ დევნილებს უფასოდ ვაძლევთ წამლებს. ვფიქრობ, მომავალი წლისთვის, ჩვენს ბიუჯეტში კიდევ უფრო უნდა გავზარდოთ უფასო წამლებისთვის განკუთვნილი სახსრები. გამოიკვეთა კიდევ ერთი მომენტი - დევნილი პაციენტი და ექიმი უშუალო კონტაქტის მეშვეობით, როცა რაიმე პრობლემურ შემთხვევასთან გვაქვს საქმე, უკვე თბილისში აგრძელებენ მკურნალობას. მინდა დიდი მადლობა გადავუხადო ღუდუშაურის სამედიცინო ცენტრის, რესპუბლიკური საავადმყოფოს, კლინიკა „ენმედიცისა" და ტატიშვილის კლინიკის ხელმძღვანელობას, რომლებთანაც ჩვენ მემორანდუმი გვაქვს გაფორმებული. ვფიქრობ, რომ ერთობლივად ძალიან კარგ საქმეს ვაკეთებთ. ჩვენ სამეგრელოში კიდევ ერთ პროფილაქტიკურ გასინჯვას გავაკეთებთ, ალბათ ეს იქნება ქალაქ ზუგდიდში, სადაც ძალიან დიდი კომპაქტური ჩასახლებებია, საიდანაც მოგვმართეს შესაბამისი თხოვნით და ჩვენი ჯანდაცვის სამინისტრო ჩვენი ბიუჯეტიდან გამოყოფილი სახსრების ფარგლებში კიდევ ერთ გამოკვლევაზე იზრუნებს", - განაცხადა ვახტანგ ყოლბაიამ.

თბილისის №153 საჯარო სკოლაში თეატრალიზებული საღამო „სიზმრად ვნახე აფხაზეთი“ მოეწყო

თბილისის №153 საჯარო სკოლაში ჟიულ შარტავას 70 წლის იუბილისადმი მიძღვნილი თეატრალიზებული საღამო „სიზმრად ვნახე აფხაზეთი" მოეწყო. სკოლის მოსწავლეებმა საქართველოს უახლოესი ისტორიის ერთ-ერთი ყველაზე დრამატული ფურცლები - აფხაზეთის ომი და ომისშემდგომი მოვლენები გააცოცხლეს. მათ მიერ მომზადებული ლიტერატურული კომპოზიციები დამსწრე საზოგადოებას აფხაზეთის ომში დაღუპულ გმირებზე მოუთხრობდა. მოსწავლეებმა წაიკითხეს ლექსები, წარმოადგინეს ჟიული შარტავას პერსონაჟი და გააცოცხლეს ის ფურცლები, რომელიც მის აფხაზეთის ავტონომიური რესპუბლიკის მინისტრთა საბჭოს თავმჯდომარის პერიოდს ეხებოდა.

სკოლის ბიბლიოთეკას საჩუქრად გადაეცა მაყვალა ბერიანიძის ავტორობით გამოცემული წიგნები „ორივე მხარეს" და „აფხაზები ოსმალურ საარქივო დოკუმენტებში".

ღონისძიებას აფხაზეთის უმაღლესი საბჭოს თავმჯდომარე გია გვაზავა, უმაღლესი საბჭოს დეპუტატი აკაკი გასვიანი, აფხაზეთის განათლებისა და კულტურის მინისტრი მოადგილე ბესიკ ოდიშარია და აფხაზეთის მთავრობის აპარატის წარმომადგენლები ესწრებოდნენ.

თსუ-ს სოხუმის ფილიალის დაარსებიდან 25-ე წლისთავისადმი მიძღვნილი სამეცნიერო კონფერენცია გაიმართა

სოხუმის სახელმწიფო უნივერსიტეტში აკადემიური პერსონალისა და სტუდენტთა სამეცნიერო კონფერენციის გახსნითი პლენარული სხდომა გაიმართა. სხდომა ივანე ჯავახიშვილის სახელობის თბილისის სახელმწიფო უნივერსიტეტის სოხუმის ფილიალის დაარსებიდან 25-ე წლის იუბილეს მიეძღვნა.

სხდომაზე სიტყვით გამოვიდნენ აფხაზეთის ა/რ მთავრობის თავმჯდომარის მოვალეობის შემსრულებელი ვახტანგ ყოლბაია, სოხუმის სახელმწიფო უნივერსიტეტის რექტორი, ისტორიის მეცნიერებათა დოქტორი ჯონი აფაქიძე, აფხაზეთის უმაღლესი საბჭოს თავმჯდომარე გია გვაზავა და აფხაზეთის განათლებისა და კულტურის მინისტრი დიმიტრი ჯაიანი.

ჯონი აფაქიძებ სოხუმის სახელმწიფო უნივერსიტეტის საქმიანობისა და მიღწევების შესახებ პრეზენტაცია გამართა და დამსწრე საზოგადოებას სამომავლო გეგმები გააცნო.

სამეცნიერო კონფერენციაზე სოხუმის სახელმწიფო უნივერსიტეტის სტუდენტმა ნიკა ფარცვანიამ „აფხაზეთის ოკუპაციის სამართლებრივ-პოლიტიკური ასპექტები"-ზე ისაუბრა.

ღინისძიებას აფხაზეთის უმაღლესი საბჭოს დეპუტატები, აფხაზეთის მთავრობის წევრები, უნივერსიტეტის პროფესორ-მასწავლებლები და სტუდენტები დაესწრნენ.

ზუგდიდის რაიონის სოფელ რიყეში აგროტექნიკური სამუშაოების განხორციელება დაიწყო

ზუგდიდის რაიონის სოფელ რიყეში, მიწის ფართობის ერთ-ერთ ნაკვეთზე აფხაზეთის ავტონომიური რესპუბლიკის მთავრობის მხარდაჭერითა და შპს „მექანიზატორის" თანადგომით კომპლექსური აგროტექნიკური სამუშაოების განხორციელება (ნიადაგის ხვნა, დადისკვა, დაფარცხვა, თესვა და კულტივაცია სასუქის შეტანით) დაიწყო. აღნიშნულ ფართობის შემდგომ დამუშავებას უზრუნველყოფენ გამყოფ ხაზთან მცხოვრები აფხაზეთიდან იძულებით გადაადგილებული პირები, რომლებიც ამ პროექტის უშუალო ბენეფიციარები და სარგებლის მიმღები პირები იქნებიან.

ცენტრალური ხელისუფლების გადაწყვეტილებით, აღნიშნული მიწის ფართობი სარგებლობის უფლებით აფხაზეთის ა/რ სტრუქტურებს გადმოეცა.

პროექტის განხორციელებაში მონაწილეობენ აგრეთვე სოფლის მეურნეობის, გარემოს დაცვისა და ბუნებრივი რესურსების დეპარტამენტის, ფინანსთა და ეკონომიკის სამინისტროსა და სსიპ „აფხაზეთიდან იძულებით გადაადგილებულ პირთა სტაჟირების, კვალიფიკაციის ამაღლებისა და დასაქმების ხელშეწყობის ცენტრი"-ს სპეციალისტები.