აფხაზეთიდან დევნილი ახალგაზრდების ჩართულობის გაძლიერების მიზნით, კახეთის რეგიონში, აფხაზეთის ავტონომიური რესპუბლიკის იუსტიციისა და სამოქალაქო ინტეგრაციის სამინისტროს ახალგაზრდულ მრჩეველთა საბჭოს წარდგენა გაიმართა, რომელიც აფხაზეთის მთავრობის თავმჯდომარის ინიციატივით შეიქმნა.

ღონისძიების ფარგლებში ახალგაზრდული მრჩეველთა საბჭოს წევრებმა საკუთარი გამოცდილება, სამომავლო ხედვები და ინიციატივები წარმოადგინეს. ასევე გაეცნენ აფხაზეთის მთავრობის სხვადასხვა უწყების საქმიანობასა და ცენტრალური ხელისუფლების ახალგაზრდულ პოლიტიკას.

შეხვედრაზე დამსწრე საზოგადოებას სიტყვით აფხაზეთის ავტონომიური რესპუბლიკის მთავრობის თავმჯდომარემ გიორგი ჯინჭარაძემ მიმართა, რომელმაც სამშვიდობო პოლიტიკის მნიშვნელობასა და ამ პროცესებში ახალგაზრდების განსაკუთრებულ როლზე ისაუბრა.

შეხვედრაში საქართველოს პარლამენტის თავმჯდომარის პირველი მოადგილე გიორგი ვოლსკი, შერიგების და სამოქალაქო თანასწორობის საკითხებში საქართველოს სახელმწიფო მინისტრის პირველი მოადგილე ლია გიგაური, აფხაზეთის იუსტიციისა და სამოქალაქო ინტეგრაციის მინისტრი ალიონა ჩხოტუა, ახალგაზრდობის სააგენტოს ხელმძღვანელის მოვალეობის შემსრულებელი ვახტანგ ბააკაშვილი და აფხაზეთის მთავრობის წევრები მონაწილეობდნენ.

შეხვედრა კითხვა-პასუხის რეჟიმში წარიმართა, სადაც მონაწილეებმა ახალგაზრდების შეკითხვებს უპასუხეს.

ღონისძიება პროექტის „ვორქშოფი ახალგაზრდული მრჩეველთა საბჭოს ეფექტიანი ფუნქციონირებისთვის“ ფარგლებში გაიმართა, რომელიც სამშვიდობო პოლიტიკისა და სამოქალაქო ინტეგრაციის პროცესში ახალგაზრდების ჩართულობას ისახავს მიზნად.

აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე დევნილი მოსახლეობის საჭიროებების გაცნობის მიზნით მოქალაქეებთან შეხვედრებს აქტიურ რეჟიმში აგრძელებს.

მორიგი შეხვედრა აფხაზეთის მთავრობის ადმინისტრაციაში გაიმართა, რომლის ფარგლებში იძულებით გადაადგილებულმა პირებმა მათთვის მნიშვნელოვანი და მწვავე პრობლემური საკითხები მთავრობის თავმჯდომარეს პირადად გააცნეს.

შეხვედრაზე გიორგი ჯინჭარაძემ აღნიშნა, რომ დევნილი მოსახლეობის მხარდაჭერა და მათი საცხოვრებელი პირობების გაუმჯობესება აფხაზეთის მთავრობის პრიორიტეტს წარმოადგენს და კომპეტენციის ფარგლებში ყველა საკითხის მაქსიმალურად დროულად შესწავლას და მათზე ეფექტურ რეაგირებას დაჰპირდა.

ასევე, მთავრობის თავმჯდომარემ დევნილ მოქალაქეებს მიაწოდა ინფორმაცია, აფხაზეთის მთავრობის მოქმედი პროგრამების შესახებ და ხაზგასმით აღნიშნა, რომ თითოეული პროგრამა მორგებულია დევნილი მოსახლეობის საჭიროებებსა და პრიორიტეტებზე, რაც მიზნად ისახავს მათი სოციალური მდგომარეობის გაუმჯობესებას.

აფხაზეთიდან დევნილი მოსახლეობის საჭიროებების გაცნობის მიზნით მთავრობის თავმჯდომარესთან შეხვედრები ყოველთვიურად იმართება.

აფხაზეთიდან დევნილმა საზოგადოებამ სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსის, ბიჭვინთისა და ცხუმ-აფხაზეთის მიტროპოლიტის, უწმინდესისა და უნეტარესი ილია II-ის ხსოვნას პატივი მიაგო.

ილია II-ის ღვაწლისა და აფხაზეთის საზოგადოების წინაშე განსაკუთრებული დამსახურების აღსანიშნავად, დევნილი მოქალაქეები დღეს თბილისის ილორის წმინდა გიორგის სახელობის ეკლესიაში შეიკრიბნენ, სადაც ტაძრის წინამძღვარმა მამა ლევან ჯანაშიამ პატრიარქის სულის მოსახსენებელი პანაშვიდი გადაიხადა.

პანაშვიდს აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე, აფხაზეთის უმაღლესი საბჭოს თავმჯდომარე ჯემალ გამახარია, საქართველოს პარლამენტის პირველი ვიცე-სპიკერი გიორგი ვოლსკი, საქართველოს პარლამენტის წევრი ლიკა შარტავა, საქართველოს იუსტიციის მინისტრის მოადგილეები მერაბ ტურავა და გიორგი დგებუაძე, ვეტერანების საქმეთა სახელმწიფო სამსახურის დირექტორი კობა კობალაძე, სოხუმის სახელმწიფო უნივერსიტეტის რექტორი თეა ჯუღელი, აფხაზეთის მთავრობის წევრები, უმაღლესი საბჭოს დეპუტატები და აფხაზეთის მეომართა კავშირის წევრები ესწრებოდნენ.

მთავრობის თავმჯდომარემ აფხაზეთის საზოგადოების სულიერი ერთიანობის საქმეში საქართველოს კათოლიკოს-პატრიარქის განსაკუთრებულ წვლილზე ისაუბრა.

„სიმბოლურია დღეს აფხაზეთის საზოგადოების შეკრება ილორის წმინდა გიორგის ეკლესიაში, რადგან აღნიშნული ეკლესიის მშენებლობა მოხდა ჩვენი კათოლიკოს-პატრიარქის ილია მეორის ლოცვა-კურთხევით. იგი აფხაზეთის საზოგადოებისთვის არ იყო მხოლოდ სულიერი მამა, ის იყო ბიჭვინთისა და ცხუმ-აფხაზეთის მიტროპოლიტი, რომლის მოღვაწეობა მჭიდროდ იყო დაკავშირებული აფხაზეთთან.

მე მჯერა, რომ მისი ლოცვა-კურთხევით ჩვენ აუცილებლად დავუბრუნდებით ჩვენ კუთხეს - ჩვენს მშობლიურ აფხაზეთს“, - განაცხადა გიორგი ჯინჭარაძემ.

სრულიად საქართველოს კათოლიკოს-პატრიარქი, უწმინდესი და უნეტარესი ილია II აფხაზეთში 11 წლის განმავლობაში მოღვაწეობდა, როგორც ცხუმ-აფხაზეთის ეპარქიის მიტროპოლიტი. მისი ინიციატივითა და ლოცვა-კურთხევით 2016 წელს, თბილისში, საფუძველი ჩაეყარა ილორის წმინდა გიორგის სახელობის ტაძრის მშენებლობას.

კათოლიკოს-პატრიარქი ილია II 17 მარტს, 93 წლის ასაკში გარდაიცვალა. 22 მარტს პატრიარქს სიონის საკათედრო ტაძარში დაკრძალავენ.

აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე, საქართველოს პრეზიდენტთან და აფხაზეთის მთავრობის წევრებთან ერთად, სრულიად საქართველოს კათოლიკოს-პატრიარქის, ილია II-ის პანაშვიდს დაესწრო.

აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძემ სამების საკათედრო ტაძარში სრულიად საქართველოს კათოლიკოს-პატრიარქის ხსოვნას პატივი მიაგო.

მთავრობის თავმჯდომარე ასევე, საქართველოს პრეზიდენტთან, პრემიერ-მინისტრთან, თბილისის მერთან და აღმასრულებელი ხელისუფლების წარმომადგენლებთან ერთად, სრულიად საქართველოს კათოლიკოს-პატრიარქის ილია II-ის პანაშვიდს დაესწრო.

საქართველოს კათოლიკოს-პატრიარქი 17 მარტს, 93 წლის ასაკში გარდაიცვალა. მის გარდაცვალებასთან დაკავშირებით, საქართველოში გლოვა გამოცხადდა. ილია II-ს 22 მარტს სიონის ტაძარში დაკრძალავენ.

აფხაზეთის ავტონომიური რესპუბლიკის იძულებით გადაადგილებულ პირთა მინისტრი დავით ფაცაცია საქართველოში წმინდა საყდრის სამოციქულო დესპანს ანტე იოზიჩს შეხვდა.

შეხვედრის მონაწილეებმა სხვადასხვა სფეროში ურთიერთობების გაღრმავების პერსპექტივები განიხილეს. საუბარი შეეხო აფხაზეთიდან დევნილი ახალგაზრდების ხელშეწყობის მიზნით, ერთობლივი პროექტის განხორციელებას და საერთაშორისო პროექტებში მათი ჩართულობის შესაძლებლობებს.

„ანტე იოზიჩს მადლობა გადავუხადე გამოხატული თანადგომისათვის. დარწმუნებული ვარ, ჩვენი პარტნიორობა მომავალში კიდევ უფრო აქტიურ და მჭიდრო ხასიათს მიიღებს.“ - განაცხადა მინისტრმა დავით ფაცაციამ.

აფხაზეთის ავტონომიური რესპუბლიკის იძულებით გადაადგილებულ პირთა მინისტრი დავით ფაცაცია, აფხაზეთის ფინანსთა და ეკონომიკის მინისტრ თენგიზ ნასარიძესთან, დევნილთა, ეკომიგრანტთა და საარსებო წყაროებით უზრუნველყოფის სააგენტოსა და ჩუღურეთის რაიონის გამგეობის წარმომადგენლებთან ერთად, თბილისში, წინამძღვრიშვილის ქ. №12-ში მდებარე დევნილთა განსახლების ობიექტში მცხოვრებ, აფხაზეთიდან იძულებით გადაადგილებულ პირებს შეხვდა და მათ საჭიროებებს ადგილზე გაეცნო.

აღნიშნულ მისამართზე საკანალიზაციო სისტემის რეაბილიტაცია, დევნილთა, ეკომიგრანტთა და საარსებო წყაროებით უზრუნველყოფის სააგენტოსა და ქალაქ თბილისის ჩუღურეთის რაიონის გამგეობის თანადაფინანსებით განხორციელდება. ხოლო, აფხაზეთის ავტონომიური რესპუბლიკის იძულებით გადაადგილებულ პირთა სამინისტრო უზრუნველყოფს ობიექტის სადარბაზოს რეაბილიტაციას.

„მადლობას ვუხდით დევნილთა, ეკომიგრანტთა და საარსებო წყაროებით უზრუნველყოფის სააგენტოს და ადგილობრივი თვითმმართველობის ორგანოებს, რომელთა მხარდაჭერითაც შესაძლებელი გახდა ქვეყნის მასშტაბით დევნილთა განსახლების ობიექტებზე არსებული კრიტიკული ინფრასტრუქტურული პრობლემების ძირითადი ნაწილის მოწესრიგება.“ - განაცხადა მინისტრმა დავით ფაცაციამ.

შეხვედრაში ასევე მონაწილეობდნენ აფხაზეთის აფხაზეთის ავტონომიური რესპუბლიკის მომსახურების სააგენტოს წარმომადგენლები.

აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე საქართველოში ბულგარეთის რესპუბლიკის საგანგებო და სრულუფლებიან ელჩ ვესელინ ვალკანოვს შეხვდა.

შეხვედრაზე მთავრობის თავმჯდომარემ აფხაზეთის ავტონომიური რესპუბლიკის მთავრობის საქმიანობის შესახებ ისაუბრა და ელჩს აფხაზეთიდან დევნილი მოსახლეობის ძირითადი გამოწვევები გააცნო. 

გიორგი ჯინჭარაძემ ბულგარელ დიპლომატს ოკუპირებულ აფხაზეთში არსებული ვითარება გააცნო და ყურადღება გაამახვილა ოკუპირებულ ტერიტორიაზე ადამიანის ფუნდამენტური უფლებების დარღვევის ფაქტებზე. საუბარი შეეხო ჟენევის საერთაშორისო მოლაპარაკებების მიმდინარეობას.

შეხვედრაზე სხვადასხვა პრიორიტეტული მიმართულებებით სამომავლო ურთიერთთანამშრომლობის გაღრმავების შესაძლებლობები განიხილეს.

აფხაზეთის მთავრობის თავმჯდომარემ ვესელინ ვალკანოვს მადლობა გადაუხადა საქართველოს ტერიტორიული მთლიანობის მხარდაჭერისა და იმ თანადგომისთვის, რომელსაც ბულგარეთი აფხაზეთიდან დევნილი მოსახლეობის მიმართ იჩენს.

კონსტანტინე გამსახურდიას სახელობის სოხუმის სახელმწიფო დრამატული თეატრის სცენაზე სეზონი პრემიერით გაიხსნა. მაყურებელმა ალექსანდრე ქანთარიას პიესის მიხედვით დადგმული სპექტაკლი - "მარიამობისთვე 1924“ იხილა.

დადგმა, რომელიც დოკუმენტურ-ისტორიულ მოვლენებს ემყარება, 1924 წლის აჯანყების ტრაგიკულ პერიოდს ასახავს და საქართველოს დამოუკიდებლობისთვის ბრძოლის ერთ-ერთ უმნიშვნელოვანეს ეპიზოდს აცოცხლებს. 

საპრემიერო ჩვენებას აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე, საქართველოს კულტურის მინისტრ თინათინ რუხაძესთან და  პარლამენტის თავმჯდომარის პირველ მოადგილე გიორგი ვოლსკისთან ერთად დაესწრო.

პრემიერას ასევე აფხაზეთის ავტონომიური რესპუბლიკის უმაღლესი საბჭოს თავმჯდომარე ჯემალ გამახარია, აფხაზეთის განათლებისა და კულტურის მინისტრი გიორგი ძაძამია, აფხაზეთის მთავრობისა და უმაღლესი საბჭოს წევრები, ხელოვნების სფეროს წარმომადგენლები და დევნილი საზოგადოება ესწრებოდა.

ქალთა კვირეულის ფარგლებში, აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტროს ინიციატივით და ჩაჩავას კლინიკის მხარდაჭერით, აფხაზეთიდან დევნილ ქალბატონებს უფასო სამედიცინო გამოკვლევები ჩაუტარდათ.

აღნიშნული ინიციატივის ფარგლებში, ბენეფიციარებმა მიიღეს კვალიფიციური გინეკოლოგიური კონსულტაცია და სხვადასხვა პროფილური სამედიცინო მომსახურება. 

სამედიცინო აქციის მიმდინარეობის პროცესს აფხაზეთის ჯანმრთელობისა და სოციალური დაცვის მინისტრის მოადგილე მანონა გეჯუა და კლინიკის სამედიცინო ხელმძღვანელი ლეილა ნადარეიშვილი ესწრებოდნენ.

აფხაზეთის ავტონომიური რესპუბლიკის მთავრობის ინიციატივით, ქალთა კვირეულის ფარგლებში, აფხაზეთის მთავრობის თავმჯდომარე გიორგი ჯინჭარაძე, აფხაზეთის იძულებით გადაადგილებულ პირთა მინისტრ დავით ფაცაციასთან და აფხაზეთის მთავრობის აპარატის უფროს გიორგი სუთიძესთან ერთად, იმერეთის რეგიონში იმყოფებოდა, სადაც 100 წელს გადაცილებულ დევნილ ქალბატონებს დედის დღე და ქალთა საერთაშორისო დღე პირადად მიულოცა.

მთავრობის თავმჯდომარე და მინისტრი ქალბატონებს სახლში ეწვივნენ, მათ მიმართ განსაკუთრებული პატივისცემა და სითბო გამოხატეს და სადღესასწაულო საჩუქრები გადასცეს.

გიორგი ჯინჭარაძის თქმით, 100 წელს გადაცილებული ქალბატონები არიან ცოცხალი მემატიანეები და სიმბოლოები იმ გამძლეობისა, რაც აფხაზეთიდან დევნილ საზოგადოებას ახასიათებს. მსგავსი ღონისძიებები კი მიზნად ისახავს დევნილი მოსახლეობის, განსაკუთრებით კი უფროსი თაობის მიმართ მუდმივი ზრუნვისა და თანადგომის გამოხატვას.

„მქონდა პატივი 8 მარტი მიმელოცა ორი გამორჩეული ქალბატონისთვის, რომლებიც 100 წელს არიან გადაცილებული. ჩვენი პასუხისმგებლობა და ვალდებულებაა, რომ ჩვენმა ქალბატონებმა მუდმივად იგრძნონ ჩვენი მხარდაჭერა და გვერდში დგომა“, - განაცხადა გიორგი ჯინჭარაძემ.

აფხაზეთის მთავრობის ორგანიზებით, ქალთა კვირეულის ფარგლებში სხვადასხვა სადღესასწაულო და საქველმოქმედო ღონისძიებები მთელი ქვეყნის მასშტაბით გაიმართა.