აფხაზეთის ავტონომიური რესპუბლიკის მთავრობა

Аҧснытәи автономтә республика аиҳабыра

სიახლეები

რეზო ქობალიამ ზუგდიდის მუნიციპალიტეტში დევნილთა ჩასახლებებში შესრულებული სარემონტო სამუშაოები დაათვალიერა

 

აფხაზეთის ავტონომიური რესპუბლიკიდან იძულებით გადაადგილებულ პირთა - დევნილთა სამინისტროს დაფინანსებით სოფელ ჭითაწყარში, ელქსელისა და აღმაშენებლის №222-ში მდებარე, ყოფილი პროფსასწავლებლის შენობას და ხუბულავას ქუჩაზე №14-ში (ყოფილი ვეტლაბორატორიის ერთსართულიანი შენობა) დევნილთა კომპაქტურ ჩასახლებას სარემონტო-აღდგენითი სამუშაოები ჩაუტარდა.

აღნიშნულ ობიექტებზე იმყოფებოდნენ და შესრულებული სამუშაოები დაათვალიერეს სამეგრელო-ზემო სვანეთში აფხაზეთის ავტონომიური რესპუბლიკის მთავრობის წარმომადგენლობის ხელმძღვანელმა  რეზო ქობალიამ და აფხაზეთის ავტონომიური რესპუბლიკიდან იძულებით გადაადგილებულ პირთა - დევნილთა სამინისტროს  წარმომადგენლებმა.

სოხუმის შუქურას კულტურული მემკვიდრეობის ძეგლის სტატუსი მიენიჭა

საქართველოს კულტურული მემკვიდრეობის დაცვის ეროვნული სააგენტოს გადაწყვეტილებით სოხუმის შუქურას კულტურული მემკვიდრეობის უძრავი ძეგლის სტატუსი მიენიჭა. ბრძანებას ხელს სააგენტოს დირექტორი ნიკოლოზ ანთიძე აწერს. სოხუმის შუქურა, ლითონის კონუსისებური კოშკი, სანავიგაციო ნაგებობაა და ის სოხუმის სანაპიროზე, გუმისთის კონცხზეა განთავსებული. სწორედ აქედან ეწოდა მის ირგვლივ მდებარე დასახლებულ რაიონს მაიაკი.

სოხუმის შუქურა ფრანგული წარმოებისაა, ის 1861 წელს პარიზში ცნობილი ინჟინერის ერნესტ გუენის ფირმაში დამზადდა. მოგვიანებით ამ ფირმამ შექმნა ეიფელის კოშკი და დღეს ერნესტ გუენის სახელი ამ კოშკზე საპატიო 72 სახელს შორის არის ამოტვიფრული.

კონსტრუქცია სოხუმში 1861 წელს ჩამოიტანეს და მის აწყობას 150 დღე დასჭირდა. სოხუმის შუქურა ექსპლუატაციაში 1864 წლის 14 აპრილიდან შევიდა. მისი სიმაღლე 37 მეტრია, ნათების სიშორე 14 საზღვაო მილი. შუქურის შიდა დახვეული კიბე 137 საფეხურისგან შედგება და იმ სიმაღლიდან სოხუმისა და მისი მიმდებარე ტერიტორიების ულამაზესი ხედი იშლება. ამიტომაც თავის დროზე სოხუმის შუქურა ერთ-ერთ ღირსშესანიშნაობად ითვლებოდა და აქ ქალაქის სტუმრები მოჰყავდათ ხოლმე.

ამჟამად სოხუმის შუქურა ტექნიკურად მძიმე მდგომარეობაშია, მის კიბეზე ასვლაც ძალიან საშიშია და გადაუდებელ რესტავრაციას საჭიროებს.

ვ.არქანიას სახელობის არტ-გალერეაში მხატვარ ალექსანდრე თოდუას ნამუშევრების პერსონალური გამოფენა გაიხსნა

2019 წლის 8 ოქტომბერს აფხაზეთის ავტონომიური რესპუბლიკის უმაღლესი საბჭოს, აფხაზეთის ა/რ განათლებისა და კულტურის სამინისტროსა და აფხაზეთის კულტურისა და ხელოვნების ცენტრის ორგანიზებით ვალერი არქანიას სახელობის არტ-გალერეაში მხატვარ ალექსანდრე თოდუას ნამუშევრების პერსონალური გამოფენა გაიხსნა.
გამოფენაზე წარმოდგენილია მხატვრის ფერწერული ნამუშევრები.

მხატვარი ალექსანდრე თოდუა დამსწრეთ წარუდგინა და მის შემოქმედებაზე ისაუბრა აფხაზეთის ა/რ რესპუბლიკის უმაღლესი საბჭოს წევრმა, მხატვარმა ნუგზარ მგალობლიშვილმა.

გამოფენის გახსნას ესწრებოდნენ აფხაზეთის ავტონომიური რესუბლიკის უმაღლესი საბჭოს თავმჯდომარე ჯემალ გამახარია, აფხაზეთის ა/რ განათლებისა და კულტურის მინისტრი როლანდ ნიჟარაძე და სხვ.

გამოფენა 2019 წლის 11 ოქტომბრის ჩათვლით გაგრძელდება.

როლანდ ნიჟარაძემ აფხაზეთის ღვაწლმოსილ პედაგოგებს მასწავლებლის დღე მიულოცა

აფხაზეთის ავტონომიური რესპუბლიკის განათლებისა და კულტურის მინისტრი როლანდ ნიჟარაძე, მასწავლებლის საერთაშორისო დღესთან დაკავშირებით, მასწავლებელთა ღვაწლის დაფასებისა და მათთვის პატივის მიგების მიზნით, გუდაუთის რაიონის სოფელ ოთხარას საშუალო სკოლის ღვაწლმოსილ პედაგოგებს - ჟენია გასვიანსა და მარო გამყრელიძეს ეწვია.

როლანდ ნიჟარაძემ მადლობა გადაუხადა მათ საზოგადოების განვითარებაში შეტანილი წვლილისა და მომავალ თაობებზე ზრუნვისათვის და აფხაზეთის განათლებისა და კულტურის სამინისტროს საპატიო სიგელები და საჩუქრები გადასცა. მინისტრმა მრავალგანსაცდელგამოვლილ პედაგოგებს ჯანმრთელობა და დიდხანს სიცოცხლე უსურვა.

მასწავლებლებმა დიდი სიხარული და მადლიერება გამოთქვეს გახსენებისათვის. მათ აფხაზეთში ცხოვრების ბედნიერი პერიოდი გაიხსენეს და აღნიშნეს, რომ შინ დაბრუნების იმედი ჯერაც არ დაუკარგავთ.

გაგრაში დაღუპულთა ხსოვნას პატივი მიაგეს

გაგრის დაცემის დღესთან დაკავშირებით აფხაზეთის ავტონომიური რესპუბლიკის მთავრობამ, აფხაზეთის ავტონომიური რესპუბლიკის უმაღლესმა საბჭომ და საზოგადოებრივი კავშირი „გაგრის“ წევრებმა გმირთა მოედანზე, საქართველოს ერთიანობისთვის დაღუპულ გმირთა მემორიალი გვირგვინით შეამკეს.

ძვირფასო მასწავლებლებო!
გილოცავთ მასწავლებელთა საერთაშორისო დღეს! 5 ოქტომბერს მსოფლიოს 100–ზე მეტ ქვეყანაში აღინიშნება მასწავლებლის დღე და მიზანი ყველგან ერთია: მასწავლებელთა ღვაწლის დაფასება და მათთვის მადლობის გადახდა საზოგადოების განვითარებაში შეტანილი წვლილისათვის.

მასწავლებლობა ოდითგან ერთ-ერთ ყველაზე საპატიო და საპასუხისმგებლო პროფესიად იყო მიჩნეული. მიუხედავად ღირებულებათა გადაფასებისა, ასე დღესაც და ასევე იქნება ხვალაც, რადგან ქვეყნის უკეთესი მომავალი უკეთესი მომავალი თაობის გარეშე წარმოუდგენელია, ეს კი - ღირსეული მასწავლებლის გარეშე.

დღეს ხშირად ამბობენ: „ყველაზე დიდი ინვესტიცია მომავალი თაობის აღზრდაში ჩადებული ინვესტიციააო“, მე კი ერთსაც დავამატებდი: ამ ინვესტიციის წარმატება თქვენს გარეშე წარმოუდგენელია.

ჩემი და ყველა სხვა მილოცვაც, რომელსაც დღეს მიიღებთ, უპირველესად მადლიერების გამოხატვაა ჩვენი მომავალი თაობის აღზრდაში გაწეული წვლილისათვის და მისი ადეკვატური დაფასებაც ვერანაირი ანაზღაურებითა თუ ჯილდოთი ვერ მოხდება. ეს მხოლოდ თქვენი აღზრდილების წარმატებებსა და მიღწევებს შეუძლია. ამიტომაც გისურვებთ, ბევრი ამგვარი წარმატებული აღზრდილი გყოლოდეთ!

ჩემი მილოცვა, რა თქმა უნდა, მთელი საქართველოს მასწავლებლებს ეკუთვნით, მაგრამ მინდა გამოვყო აფხაზეთის საჯარო და ოკუპირებული გალის რაიონის სკოლების პედაგოგები. პირველნი - აქ, დევნილობაში მოზარდებს აფხაზეთის სიყვარულსა და იქ დაბრუნების რწმენას უნერგავენ; მეორენი კი - იქ არსებულ ურთულეს ვითარებაში, ბავშვებს საქართველოს ერთიანობის იდეით მუხტავენ და აკრძალულ ქართულ ენასა და საქართველოს ისტორიას აშკარად თუ მალულად ასწავლიან... ეს ქვეყნის გამთლიანებისთვის დაუღლელი ბრძოლაა და გისურვებთ, ამ ბრძოლაში ყველას ერთად გაგვემარჯვოს!

როლანდ ნიჟარაძე,

აფხაზეთის ავტონომიური რესპუბლიკის განათლებისა და კულტურის მინისტრი.
 
აფხაზეთის ავტონომიური რესპუბლიკის მთავრობამ და უმაღლესმა საბჭომ გაგრაში დაღუპულთა ხსოვნას პატივი მიაგეს

თბილისში მშენებარე ილორის წმინდა გიორგის სახელობის ეკლესიაში  1992 წლის ოქტომბერში გაგრაში განვითარებული ტრაგიკული მოვლენების დროს დაღუპულთა სულების მოსახსენიებელი პანაშვიდი გადაიხადეს. პანაშვიდს აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი რუსლან აბაშიძე, აფხაზეთის ავტონომიური რესპუბლიკის უმაღლესი საბჭოს თავმჯდომარე ჯემალ გამახარია, აფხაზეთის ავტონომიური რესპუბლიკის მთავრობის თავმჯდომარის მოადგილე ანზორ მარგიანი, აფხაზეთის ავტონომიური რესპუბლიკის მთავრობის წევრები, აფხაზეთის ავტონომიური რესპუბლიკის უმაღლესი საბჭოს დეპუტატები და აფხაზეთიდან დევნილი საზოგადოება ესწრებოდნენ.

დღესვე გაგრის დაცემის დღესთან დაკავშირებით აფხაზეთის ავტონომიური რესპუბლიკის მთავრობამ, აფხაზეთის ავტონომიური რესპუბლიკის უმაღლესმა საბჭომ და საზოგადოებრივი კავშირი „გაგრის“ წევრებმა გმირთა მოედანზე, საქართველოს ერთიანობისთვის დაღუპულ გმირთა მემორიალი გვირგვინით შეამკეს.

შეხვედრა დევნილებთან ოზურგეთში

2019 წლის 5 ოქტომბერს  წარმომადგენლობის  ხელმძღვანელი ზაზა ჩაჩავა და დევნილებთან ურთიერთობის, სოციალურ საკითხთა და რეგიონული მართვის სამსახურის უფროსი სპეციალისტი ლაშა გადილია ოზურგეთში, ოზურგეთის მუნიციპალიტეტში მცხოვრებ  დევნილებს შეხვდნენ. შეხვედრას, ასევე, ესწრებოდა გურიის მხარის გუბერნატორი ზურაბ ნასარაია. შეხვედრაზე დევნილებს მიეწოდათ ინფორმაციები აფხაზეთის ა/რ  მთავრობისა, აფხაზეთის  ა/რ ჯანდაცვის სამინისრტოს, წარმომადგენლობისა და ადგილობრივი თვითმმართველობის ბიუჯეტებით გათვალისწინებული პროგრამების შესახებ. ამავდროულად, მოისმინეს დევნილი მოსახლეობის წინაშე არსებული სოციალურ -ეკონომიკური და ყოფითი პრობლემები და  დაისახა გზები წამოჭრილი პრობლემების მოგვარებისათვის.

საქართველოს ეროვნულ ოლიმპიურ კომიტეტში ჟიული შარტავას სახელობის ალპინიადის მონაწილეები დააჯილდოვეს

აფხაზეთის ავტონომიური რესპუბლიკის განათლებისა და კულტურის სამინისტრომ 2019 წლის 21 სექტემბერიდან 4 ოქტომბრის ჩათვლით ჟიული შარტავას სახელობის მშვიდობისა და ერთიანობის საერთაშორისო ალპინიადა გამართა, ალპინიადის ინიციატორები იყვნენ საქართველოს მთამსვლელთა გაერთიანებული ფედერაცია და ეროვნული ერთიანობის ცენტრი - ,,ჟიული შარტავას საზოგადოება“.

4 ოქტომბერს საქართველოს ეროვნულ ოლიმპიურ კომიტეტში ამ ალპინიადის ამსახველი დოკუმენტური ფილმის პრეზენტაცია გაიმართა. ამასთანავე დააჯილდოვეს მთამსვლელები, რომლებმაც ამ დღეებში ჟიული შარტავას სახელობის მწვერვალი ხელმეორედ დალაშქრეს. შეგახსენებთ, რომ 2018 წელს საქართველოს ჩრდილოეთ მიჯნაზე აღმოსავლეთ კავკასიონის ერთ-ერთ მწვერვალს, რომელიც ზღვის დონიდან 3700 მეტრზე მდებარეობს, აფხაზეთის ავტონომიური რესპუბლიკის მთავრობის ინიციატივით, საქართველოს პირველი ეროვნული გმირის ჟიული შარტავას სახელი ეწოდა. ინიციატივის მხარდამჭერები იყვნენ საქართველოს ოლიმპიური კომიტეტი, საქართველოს პოლიტექნიკური უნივერსიტეტი და მთამსვლელები.

ეროვნული ერთიანობის ცენტრის - ,,ჟიული შარტავას საზოგადოების“ თავმჯდომარემ ვახტანგ ყოლბაიამ ალპინიადის განსაკუთრებული მხარდაჭერისათვის სიგელებით დააჯილდოვა აფხაზეთის ავტონომიური რესპუბლიკის განათლებისა და კულტურის მინისტრი როლანდ ნიჟარაძე, ამავე სამინისტროს სპორტისა და ახალგაზრდულ საქმეთა სამსახურის უფროსი ვიტალი ბენდელიანი, სააქციო საზოგადოება „ყაზბეგის“ დამფუძნებელი გოგი თოფაძე და სხვ.

ცერემონიას ესწრებოდნენ: საქართველოს ოლიმპიური კომიტეტის პირველი ვიცეპრეზიდენტი ელგუჯა ბერიშვილი, ჟიული შარტავას ოჯახის წევრები და სხვები. მეუღლემ ლია ჯალაღონიამ, ჟიული შარტავას დაფასებისა და უკვდავყოფისათვის, თითოეულ მონაწილესა და ორგანიზატორს განსაკუთებული მადლობა გადაუხადა.

ია მაისაიას სიმღერების ალბომის „აფხაზეთო, მე უშენოდ, მზეც ობოლი მგონია“ პრეზენტაცია გაიმართა

აფხაზეთის კულტურისა და ხელოვნების ცენტრმა საქართველოს შოთა რუსთაველის თეატრისა და კინოს სახელმწიფო უნივერსიტეტის დიმიტრი ალექსიძის სახელობის სასწავლო თეატრის დარბაზში ცნობილი სოხუმელი კომპოზიტორისა და მომღერლის ია მაისაიას სიმღერების ალბომის „აფხაზეთო, მე უშენოდ, მზეც ობოლი მგონია“ პრეზენტაცია გამართა. კომპაქტ-დისკი აფხაზეთის კულტურისა და ხელოვნების ცენტრმა გამოსცა. სიმღერები მარიკა ქაცარავასა და „სანო“-ს ხმისჩამწერ სტუდიებში ჩაიწერა. ალბომში წარმოდგენილია კომპოზიტორის მიერ წლების განმავლობაში შექმნილი საუკეთესო ნაწარმოებები.

კულტურის დარგში ნაყოფიერი შემოქმედებითი მოღვაწეობისათვის ია მაისაია დაჯილდოვებულია: ღირსების ორდენით; გიორგი შარვაშიძის სახელობის სახელმწიფო პრემიით; აფხაზეთის ავტონომიური რესპუბლიკის უმაღლესი საბჭოს საპატიო სიგელით და სხვ. მისი შთაგონების უპირველესი წყარო მშობლიური აფხაზეთია და შესაბამისად, არერთი სიმღერა აქვს მისთვის მიძღვნილი.

პრეზენტაციაზე, აფხაზეთის ავტონომიური რესპუბლიკის უმაღლესი საბჭოს თავმჯდომარემ ჯემალ გამახარიამ ია მაისაიას სიმღერების ალბომის გამოსვლა მიულოცა და აფხაზეთის ა/რ უმაღლესი საბჭოს საპატიო სიგელი გადასცა. აფხაზეთის ვტონომიური რესპუბლიკის განათლებისა და კულტურის მინისტრმა როლანდ ნიჟარაძემ ია მაისაია აფხაზეთის ა/რ განათლებისა და კულტურის სამინისტროს სიგელით დააჯილდოვა. საქართველოს მწერალთა კავშირის თავმჯდომარემ მაყვალა გონაშვილმა კი ის ნაყოფიერი საზოგადოებრივი და შემოქმედებითი მოღვაწეობისათვის, დიპლომით - „თამარ დედოფლის ენდალმა“ დააჯილდოვა.

ია მაისაიას შემოქმედებით ცხოვრებაზე ისაუბრეს: მუსიკათმცოდნემ მაია დათუნაშვილმა, პოეტებმა მზია ხეთაგურმა, მაია კახიძემ და თამარ შაიშმელაშვილმა, აფხაზეთის კულტურისა და ხელოვნების ცენტრის ლიტერატურულ-შემოქმედებითი მიმართულების ხელმძღვანელმა ნანა ქარდავამ. ღონისძიებას მსახიობი და ტელეწამყვანი გიორგი გასვიანი უძღვებოდა.

საღამოზე, მუსიკალურ კრებულში შესულ სიმღერებს ასრულებდნენ ქართული ესტრადის ვარსკვლავები: სოფო ბედია, ელენე ფოჩხუა, ბოკა კვეკვესკირი, თინათინ ჭულუხაძე, მამუკა პავლიაშვილი, ჯაბა მესტვირიშვილი, ანსამბლები: „მუხამბაზი“ და „მეცო“. კომპოზიტორი ია მაისაია საღამოზე სამადლობელი სიტყვით გამოვიდა და თავისი რეპერტუარიდან რამდენიმე სიმღერა შეასრულა.

სიმღერების ალბომის პრეზენტაციას აფხაზეთის ავტონომიური რესპუბლიკის მთავრობის წევრები, აფხაზეთის ა/რ უმაღლესი საბჭოს დეპუტატები, ქართული ინტელიგენციისა და მუსიკალური სფეროს წარმომადგენლები ესწრებოდნენ.

სამინისტრომ აჭარისა და იმერეთის რეგიონში სარემონტო-აღდგენით სამუშაოებთან დაკავშირებით გამოცხადებულ ტენდერებზე გამარჯვებული გამოავლინა.

აჭარის ავტონომიურ რესპუბლიკაში ჩასატარებელ სარემონტო სამუშაოებთან დაკავშირებით 24517 ლარის ღირებულების ტენდერი შედგა და გაიმარჯვა შპს ,,იორ ბუილდინგ კომპანმა’’. სამუშაოების ღირებულება შეადგენს 24517 ლარს. სამუშაოები დაიწყება 2019.10. 07 ოქტომბერს და დამთავრდება 2019.12 07 დეკემბერს.

1.ქ. ქობულეთი, 9 აპრილის ქ. # 109 (ყოფილი სკოლა #7)
2. დაბა ჩაქვის ყოფილი სკოლის შენობა

იმერეთის რეგიონში ქ. ხონში ჩასატარებელ სარემონტო სამუშაოებზე გაიმარჯვა შპს ,,ზანგო 2015’’ -მა, სამუშაოების ღირებულება შეადგენს 18208 ლარს.’’ სამუშაოების ღირებულება შეადგენს 24517 ლარს. სამუშაოები დაიწყება 2019.10. 07 ოქტომბერს და დამთავრდება 2019.12.07 დეკემბერს.

  1. ქ.ქუთაისში, ნიკეას ქ. # 21 ( ყოფილი აისის შენობა)- ჩასატარებელ სარემონტო სამუშაოებზე გაიმარჯვა შპს ,,ზანგო 2015’’ -მა, სამუშაოების ღირებულება შეადგენს 7177 ლარს. სამუშაოები დაიწყება 2019.10. 07 ოქტომბერს და დამთავრდება 2019.12.07 დეკემბერს.

    ქ.ხაშურში ჩასატარებელ სარემონტო-აღდგენითი სამუშაოებთან დაკავშირებით, ტენდერი განმეორებით არ შედგა, ქ. ხაშური ( ყოფილი 64-ე პროფსასწავლებლის შენობა, 19725 ლარის ღირებულების)

ქ.თბილისში შენობების სარემონტო და გამაგრებით სამუშაოებზე განმეორებითი ტენდერი შედგა და გაიმარჯვა შპს ,, გია კონტრაქშენ’’-მა, სამუშაოების ღირებულება შეადგენს 19360 ლარს. სამუშაოები დაიწყება 2019.10. 10 ოქტომბერს და დამთავრდება 2019.12.10 დეკემბერს.

1 .ქ. თბილისი, ვარკეთილი-3, 2მ/რ კ#34-შენობის გამაგრების სამუშაოები
2. ქ.თბილისი. დაბა წყნეთი, გურამიშვილის #40-ში სარემონტო სამუშაოები

 

საქართველოს რეგიონული ლიგის ჩემპიონატის საფეხბურთო მატჩი სოხუმის ,,დინამოს“ გამარჯვებით დამთავრდა

2019 წლის 2 ოქტომბერს, სოხუმის ,,ცხუმსა“ და სოხუმის ,,დინამოს“ შორის აღმოსავლეთ საქართველოს რეგიონული ლიგის ჩემპიონატის კალენდარული მატჩი გაიმართა. მატჩი საინტერესოდ და დაძაბულად წარიმართა და გაიმარჯვა სოხუმის ,,დინამომ“ (ანგარიშით 2-1).

მატჩის ბოლოს აფხაზეთის ავტონომიური რესპუბლიკის განათლებისა და კულტურის სამინისტროს სპორტისა და ახალგაზრდულ საქმეთა სამსახურის უფროსმა ვიტალი ბენდელიანმა მატჩი შეაფასა და სოხუმის ,,დინამოს“ ფეხბურთელებს გამარჯვება მიულოცა.

აღმოსავლეთ საქართველოს რეგიონული ლიგის ჩემპიონატი საქართველოს ფეხბურთის ფედერაციის მხარდაჭერით ტარდება.

სამუშაო შეხვედრა სამეგრელო-ზემო სვანეთის რეგიონში

ზუგდიდის მუნიციპალიტეტის საკრებულოში სამუშაო შეხვედრა გაიმართა. შეხვედრაში ზუგდიდის მუნიციპალიტეტის საკრებულოს თავმჯდომარე მამუკა წოწერია, აფხაზეთის ავტონომიური რესპუბლიკის უმაღლესი საბჭოს თავმჯდომარის მოადგილე თამაზ ხუბუა, სამეგრელო-ზემო სვანეთის რეგიონში აფხაზეთის ავტონომიური რესპუბლიკის მთავრობის წარმომადგენლობის ხელმძღვანელი რეზო ქობალია და მთავარი მრჩეველი თემურ ბოკუჩავა მონაწილეობდნენ. შეხვედრაზე  ადგილობრივი ხელისუფლებისა და აფხაზეთის მთავრობის წარმომადგენლობის ერთობლივი თანამშრომლობით განხორციელებული საქმიანობის შესახებ, ასევე დევნილი მოსახლეობის საჭიროებებზე ისაუბრეს.

დღესვე აფხაზეთის ავტონომიური რესპუბლიკის უმაღლესი საბჭოს თავმჯდომარის მოადგილე თამაზ ხუბუა სამეგრელო-ზემო სვანეთის რეგიონში აფხაზეთის ავტონომიური რესპუბლიკის მთავრობის წარმომადგენლობის თანამშრომლებს შეხვდა.

რუსლან აბაშიძემ „კოდორი-2015“-ის სტაციონარული საფუტკრე დაათვალიერა

აფხაზეთის ავტონომიური რესპუბლიკის ფინანსთა და დარგობრივი ეკონომიკის სამინისტროს საქვეუწყებო დაწესებულება „აგრარულ საკითხთა დეპარტამენტის“ ორგანიზებით გარდაბნის მუნიციპალიტეტის სოფელ ვახტანგისში აფხაზეთიდან დევნილთა სასოფლო-სამეურნეო კოოპერატივის „კოდორი-2015“-ის სტაციონარულ საფუტკრეში ღონისძიება „დევნილი მეფუტკრეების მიღწევები და მათ წინაშე არსებული პრობლემები“ გაიმართა.

ღონისძიებაზე აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა რუსლან აბაშიძემ დათვალიერა წარმოდგენილი პროდუქცია ასევე, გაესაუბრა დევნილ მეფუტკრეებს და მათ საჭიროებებს გაეცნო.

ღონისძიებას აფხაზეთის ავტონომიური რესპუბლიკის მთავრობის თავმჯდომარის მოადგილე ანზორ მარგიანი, აფხაზეთის ავტონომიური რესპუბლიკის მთავრობის წევრები, აფხაზეთის ავტონომიური რესპუბლიკის მთავრობის, საქართველოს ბიზნეს პალატის, აფხაზეთის ავტონომიური რესპუბლიკის სავაჭრო-სამრეწველო პალატის, სამოქალაქო სექტორისა და საერთაშორისო ორგანიზაციების წარმომადგენელები და დევნილი მეფუტკრეები ესწრებოდნენ.

რუსლან აბაშიძე საფრანგეთის რესპუბლიკის ელჩს შეხვდა

აფხაზეთის მთავრობაში აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი რუსლან აბაშიძე საქართველოში საფრანგეთის რესპუბლიკის საგანგებო და სრულუფლებიან ელჩ დიეგო კოლასს შეხვდა. შეხვედრა გაცნობით ხასიათს ატარებდა.

მთავრობის თავმჯდომარემ ფრანგ დიპლომატს მიაწოდა ინფორმაცია აფხაზეთის ავტონომიური რესპუბლიკის მთავრობის საქმიანობის შესახებ. გააცნო ოკუპირებულ აფხაზეთში არსებული ვითარება და იქ მიმდინარე მოვლენები.

თავის მხრივ საფრანგეთის რესპუბლიკის ელჩმა კიდევ ერთხელ დაადასტურა მისი ქვეყნის ხელისუფლების მტკიცე და ურყევი მხარდაჭერა ოკუპირებული ტერიტორიების არაღიარებისა და საქართველოს ტერიტორიული მთლიანობის პოლიტიკის მიმართ.

შეხვედრას აფხაზეთის ავტონომიური რესპუბლიკის მთავრობის თავმჯდომარის მრჩეველი ლევან გერაძე და აფხაზეთის ავტონომიური რესპუბლიკის მთავრობის აპარატის საერთაშორისო ურთიერთობათა, ანალიტიკისა და პროტოკოლის დეპარტამენტის უფროსი დავით გახარია ესწრებოდნენ.