აფხაზეთის ავტონომიური რესპუბლიკის იძულებით გადაადგილებულ პირთა სამინისტროს შუამდგომლობით და ვაკის რაიონის გამგეობის „ბინათმესაკუთრეთა ამხანაგობების ხელშეწყობის პროგრამის” ფარგლებში, წყნეთში, აფხაზეთის N14-ში მდებარე დევნილთა განსახლების ობიექტზე, დაახლოებით, 600 კვ.მ ფართობზე სახურავი და წყალსაწრეტი მილები განახლდა.

შესრულებულ სამუშაოებს ადგილზე აფხაზეთის ავტონომიური რესპუბლიკის იძულებით გადაადგილებულ პირთა მინისტრის მოადგილე გიორგი ბულისკერია, ვაკის რაიონის გამგებელი დავით კვინიკაძე გაეცნენ და აფხაზეთის დროებით ოკუპირებული ტერიტორიიდან დევნილ მოქალაქეებს შეხვდნენ.

აფხაზეთის ავტონომიური რესპუბლიკის იძულებით გადაადგილებულ პირთა სამინისტროს წარმომადგენლები აფხაზეთის დროებით ოკუპირებული ტერიტორიიდან დევნილ მოქალაქეებს მთელი ქვეყნის მასშტაბით ხვდებიან, მიღებული ინფორმაციების გათვალისწინებით, ასევე, ცენტრალური და ადგილობრივი ხელისუფლების ჩართულობითა და აქტიური მონაწილეობით ინფრასტრუქტურული თუ სხვას სახის პროექტები ხორციელდება.

აფხაზეთის ავტონომიური რესპუბლიკის იძულებით გადაადგილებულ პირთა მინისტრმა დავით ფაცაციამ, სამინისტროსა და ადგილობრივი თვითმმართველობის წარმომადგენლებთან ერთად, სენაკში, პატივი მიაგო საქართველოს პირველი ეროვნული გმირის, ჟიული შარტავას ხსოვნას, რომელსაც დღეს, 81 წელი შეუსრულდებოდა.

 წმინდა იოანე ნათლისმცემლის სახელობის სენაკის საკათედრო ტაძარში აღევლინა ჟიული შარტავასა და საქართველოს ტერიტორიული მთლიანობის დასაცავად აფხაზეთში დაღუპულ გმირთა სულების მოსახსენებელი პანაშვიდი.

აფხაზეთის ავტონომიური რესპუბლიკის იძულებით გადაადგილებულ პირთა მინისტრმა დავით ფაცაციამ, სენაკის მუნიციპალიტეტის მერმა ვახტანგ გადელიამ და საკრებულოს თავმჯდომარემ საბა ოდიშარიამ, ადგილობრივი თვითმმართველობის წარმომადგენლებთან ერთად, სახვითი ხელოვნების გალერეაში, დაათვალიერეს თემატური ფოტოგამოფენა: „სენაკი - გმირების ქალაქი“.

ჟიული შარტავასა და მისივე სახელობის მხარეთმცოდნეობის მუზეუმებში, გაიმართა ჟიული შარტავას ხსოვნისადმი მიძღვნილი საღამო და ხელოვნების ცენტრის სამხატვრო სკოლის მოსწავლეთა ნამუშევრების გამოფენა.

საქართველოს ეროვნული გმირის, გენერალ-მაიორ გენო ადამიას დაბადების დღესთან დაკავშირებით, აფხაზეთის ავტონომიური რესპუბლიკის მთავრობის თავმჯდომარემ ლევან მგალობლიშვილმა, აფხაზეთის მთავრობის წევრებთან ერთად, გმირთა მოედანზე, გენო ადამიას ბიუსტი ყვავილებით შეამკო და საქართველოს ტერიტორიული მთლიანობისთვის დაღუპული გმირების ხსოვნას პატივი მიაგო.

„დღეს ჩვენ კიდევ ერთხელ პატივს მივაგებთ ჩვენი ქვეყნისთვის თავდადებულ მამულიშვილებს, რომელთა შორის იყო საქართველოს ეროვნული გმირი, გენერალ-მაიორი გენო ადამია.

გენო ადამია იყო პიროვნება, რომელიც სიცოცხლის უკანასკნელ წუთამდე განაგრძობდა საქართველოს ტერიტორიული მთლიანობის დაცვას და ჩვენთვის და ჩვენი მომავალი თაობებისთვის გმირობისა და პატრიოტიზმის შეუფასებელ მაგალითად იქცა.

ჩვენი ვალია, მუდამ გვახსოვდეს ჩვენი ქვეყნის გმირები და ყველაფერი გავაკეთოთ მათი სახელების უკვდავსაყოფად“, - განაცხადა ლევან მგალობლიშვილმა.

გმირთა მოედანზე თბილისის ილორის წმინდა გიორგის სახელობის ტაძრის მეტოქიონის წინამძღვარმა, მამა ლევან ჯანაშიამ დაღუპულთა სულის მოსახსენებელი პანაშვიდი გადაიხადა.

მემორიალთან აფხაზეთის ავტონომიური რესპუბლიკის უმაღლესი საბჭოს დეპუტატები და გენო ადამიას ოჯახის წევრები იმყოფებოდნენ.

გენერალ-მაიორი გენო ადამია საქართველოს შეიარაღებული ძალების 23-ე მექანიზებული ბრიგადის მეთაური იყო. 1993 წლის 27 სექტემბერს, სოხუმის დაცემის შემდეგ, მან უარი თქვა დანებებაზე და მცირე ძალებით განაგრძობდა სეპარატისტებისთვის წინააღმდეგობის ბრძოლას. 28 სექტემბერს ის კელასურის ხიდთან ბრძოლაში დაიღუპა.

გენო ადამიას ცხედარი 1993 წლის ნოემბერში, მისმა თანამებრძოლებმა თბილისში გადმოასვენეს და საბურთალოს სასაფლაოზე დაკრძალეს.

2020 წელს გენო ადამიას საქართველოს ეროვნული გმირის წოდება მიენიჭა.

ღონისძიების ფარგლებში, აფხაზეთიდან დროებით დევნილ ქალებს სიმბოლური საჩუქრები აფხაზეთის თემატიკითა და სამართლებრივი გზამკვლევი გადაეცათ.

შეხვედრაზე მინისტრი აფხაზეთიდან დროებით დევნილ ქალებს მათ პრობლემებზე ესაუბრა. საჭიროების შემთხვევაში, დახმარებასა და მხარდაჭერას დაჰპირდა.

იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრმა გიორგი ძიგუამ №5 პენიტენციურ დაწესებულებაში აფხაზეთიდან დროებით დევნილ მსჯავრდებულებს ქალთა დღესასწაულები მიულოცა და სიმბოლური საჩუქრები გადასცა.

იუსტიციის მინისტრის მოადგილემ გიორგი დგებუაძემ, იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრს გიორგი ძიგუას №5 დაწესებულების ინფრასტრუქტურა დაათვალიერებინა, რომელიც მსჯავრდებულთა დასაქმების, რესოციალიზაციისა და სახელმწიფო სერვისებზე წვდომის სივრცეებს მოიცავს.

შეხვედრას, აფხაზეთის ავტონომიური რესპუბლიკის უმაღლესი საბჭოს დეპუტატები, იუსტიციისა და სამოქალაქო ინტეგრაციის საკითხებში აფხაზეთის ავტონომიური რესპუბლიკის მინისტრის პირველი მოადგილე და აპარატის თანამშრომლები ესწრებოდნენ.

7-8 მარტს, ქალთა საერთაშორისო დღის აღსანიშნავად, სსიპ აფხაზეთის ა/რ სავაჭრო-სამრეწველო პალატასა და აფხაზეთის ა/რ ფინანსთა და ეკონომიკის სამინისტროს ორგანიზებით,ჰიპერმარკეტ „გუდვილის“ (დიდი დიღმის) შესასვლელ სივრცეში, ოკუპირებული აფხაზეთიდან დევნილი მეწარმე ქალების პროდუქციის გამოფენა-გაყიდვა გაიმართა.

ღონისძიება, რომელშიც 20-ზე მეტი დევნილი ქალბატონი მონაწილეობდა “გუდვილის “ მხარდაჭერითა და ხელშეწყობით ჩატარდა.

საქართველოს ეროვნული გმირს ჟიული შარტავას 81 წელი შეუსრულდებოდა. ამ დღესთან დაკავშირებით, აფხაზეთის ავტონომიური რესპუბლიკის მთავრობის თავმჯდომარე ლევან მგალობლიშვილმა, საქართველოს პარლამენტის წევრ ლიკა შარტავასთან და აფხაზეთის მთავრობის წევრებთან ერთად, ვაკის პანთეონში, ჟიული შარტავას საფლავი ყვავილებით შეამკო და მის ხსოვნას პატივი მიაგო.

„დღეს პატივი მივაგე საქართველოს პირველი ეროვნული გმირის, ჟიული შარტავას ხსოვნას. ჟიული შარტავა თავისი საქმით და იდეებით იყო პიროვნება, რომელიც დაიბადა გმირობისთვის.

ჩემთვის, როგორც აფხაზეთის მთავრობის თავმჯდომარისთვის, ძალიან საამაყოა და ამავე დროს უდიდესი პასუხისმგებლობაც ვიყო მისი თანამდებობრივი მემკვიდრე.

მისმა სიმამაცემ, თავდადებამ და სამშობლოსადმი უანგარო სიყვარულმა, მტკიცე საფუძველი ჩაუყარა საქართველოს დამოუკიდებლობას და სამუდამოდ უკვდავყო ჟიული შარტავას სახელი. რაც მან თავისი სიცოცხლით გაიღო, ამას ჩვენ, ქართველები და აფხაზები,  მშვიდობისა და ხალხის ერთობის გზით მივაღწევთ და აღვადგენთ საქართველოს ტერიტორიული მთლიანობას“, - განაცხადა ლევან მგალობლიშვილმა.

ეროვნული გმირის საფლავზე აფხაზეთის უმაღლესი საბჭოს თავმჯდომარე ჯემალ გამახარია, უმაღლესი საბჭოს დეპუტატები და ჟიული შარტავას ოჯახის წევრები იმყოფებოდნენ.

2025 წლის 4-5 მარტს ჟენევის საერთაშორისო მოლაპარაკებების 63-ე რაუნდი გაიმართა. საქართველოს დელეგაციას საგარეო საქმეთა მინისტრის მოადგილე ლაშა დარსალია ხელმძღვანელობდა. სამუშაო ჯგუფის შეხვედრებში აფხაზეთის ავტონომიური რესპუბლიკის მთავრობის თავმჯდომარე ლევან მგალობლიშვილი მონაწილეობდა.

შეხვედრაზე ქართულმა დელეგაციამ ძირითადი აქცენტი გააკეთა ჟენევის საერთაშორისო მოლაპარაკებების დღის წესრიგის მთავარ საკითხებზე, როგორიცაა რუსეთის მიერ ევროკავშირის შუამავლობით დადებული 2008 წლის 12 აგვისტოს ცეცხლის შეწყვეტის შეთანხმებით ნაკისრი საერთაშორისო ვალდებულებების სრულად შესრულების აუცილებლობა და ოკუპირებული ტერიტორიებიდან იძულებით გადაადგილებული პირებისა და ლტოლვილების საკუთარ სახლში უსაფრთხო და ღირსეული დაბრუნება.

ასევე, ხაზი გაესვა გალში ინციდენტების პრევენციისა და მათზე რეაგირების მექანიზმის (IPRM) ყოველგვარი წინაპირობების გარეშე აღდგენის და გალსა და ერგნეთში ხსენებული მექანიზმის რეგულარულად, ფუძემდებლური პრინციპების შესაბამისად გამართვის მნიშვნელობას.

63-ე რაუნდის ფარგლებში საქართველოს დელეგაციამ შეშფოთება გამოხატა ოკუპირებულ რეგიონებში უსაფრთხოების, ჰუმანიტარული და ადამიანის უფლებების კუთხით შექმნილ უმძიმეს ვითარებაზე, მიმდინარე უკანონო მილიტარიზაციაზე, და ამ კონტექსტში, ოჩამჩირეში რუსეთის უკანონო საზღვაო ბაზის მშენებლობისა და სოხუმის აეროპორტის ამოქმედების ფაქტებზე. ქართულმა მხარემ ასევე დაგმო საქართველოს ოკუპირებულ აფხაზეთის რეგიონში ე.წ. საპრეზიდენტო არჩევნების ჩატარება და საოკუპაციო რეჟიმის ლიდერთან რუსეთის პრეზიდენტის დღევანდელი შეხვედრა, რაც წარმოადგენს ანექსიისკენ გადადგმულ მორიგ ნაბიჯებს და უხეშად არღვევს საქართველოს სუვერენიტეტსა და ტერიტორიულ მთლიანობას მის საერთაშორისოდ აღიარებულ საზღვრებში.

რუსეთისა და საოკუპაციო რეჟიმების წარმომადგენლებმა, ჩვეული პრაქტიკის მსგავსად, მოლაპარაკებების მაგიდა დატოვეს დღის წესრიგის ერთ-ერთ უმთავრეს საკითხზე, რომელიც ოკუპირებული ტერიტორიებიდან იძულებით გადაადგილებული პირებისა და ლტოლვილების საკუთარ სახლში დაბრუნებას შეეხებოდა.

ჟენევის საერთაშორისო მოლაპარაკებები შექმნილია ევროკავშირის შუამავლობით დადებული 2008 წლის 12 აგვისტოს ცეცხლის შეწყვეტის შესახებ შეთანხმების საფუძველზე და მის მთავარ განსახილველ საკითხებს ცეცხლის შეწყვეტის შეთანხმების შესრულება, იძულებით გადაადგილებულ პირთა და ლტოლვილთა საკუთარ სახლში უსაფრთხო და ღირსეულ დაბრუნება, რუსეთის ოკუპაციის შედეგად შექმნილი უსაფრთხოებისა და ჰუმანიტარული პრობლემები წარმოადგენს.

მოლაპარაკებები იმართება ევროკავშირის, გაეროს და ეუთოს თანათავმჯდომარეობით და საქართველოს, რუსეთის ფედერაციისა და ამერიკის შეერთებული შტატების მონაწილეობით. სამუშაო ჯგუფის შეხვედრებს ესწრებიან აგრეთვე აფხაზეთის ავტონომიური რესპუბლიკის მთავრობის თავმჯდომარე და ყოფილი სამხრეთ ოსეთის ავტონომიური ოლქის ტერიტორიაზე დროებითი ადმინისტრაციულ-ტერიტორიული ერთეულის ადმინისტრაციის ხელმძღვანელი, ისევე, როგორც ცხინვალსა და სოხუმში რუსეთის საოკუპაციო რეჟიმის წარმომადგენლები.

დავით ფაცაცია სენაკში, საქართველოს ეროვნული გმირების - ჟიული შარტავას 81-ე, გურამ გაბესკირიას 78-ე და გენო ადამიას 89-ე დაბადების თარიღებისადმი მიძღვნილი კვირეულის ფარგლებში გამართულ ღონისძიებებს დაესწრო

"მქონდა პატივი სენაკში დავსწრებოდი, გენო ადამიას სახელობის პირველი საჯარო სკოლის მოსწავლეთა მონაწილეობით გამართულ, ჟიული შარტავას, გურამ გაბესკირიას და გენო ადამიას ხსოვნისადმი მიძღვნილ ლიტერატურულ-მხატვრულ კომპოზიციას და თემატურ საღამოს - „სენაკი - გმირების ქალაქი“.

ეს ადამიანები - ეროვნული გმირები, ჩვენი სამშობლოს საამაყო შვილები არიან, რომლებმაც თავი გაწირეს საქართველოს ერთიანობისთვის და სამშობლოს ერთგულების, სიყვარულის და თავდადების მაგალითი აჩვენეს მომავალ თაობებს.

მჯერა, რომ მათი თავგანწირვა არ ჩაივლის უკვალოდ და ყველანი ერთად, ჩვენი ერთობით და სიყვარულით, მალე ერთიან საქართველოში ვიზეიმებთ ისტორიული სამართლიანობის აღდგენას და სოხუმში ვიტყვით ჩვენი გმირების სადიდებელს იმ სიტყვებით, რომელსაც გენო ადამია აუცილებლად იტყოდა - ჩვენ აფხაზები და ქართველები არ ვართ მტრები, ჩვენ ვართ ძმები და ჩვენი ძმობა უნდა აღდგეს, ის შუღლი და ბოროტება, რაც მტერმა დათესა უნდა იყოს დამარცხებული, ჩვენი ერთიანობით და სიყვარულით.

მადლობა ღონისძიების ყველა ორგანიზატორსა და მხარდამჭერს, რომ ახალგაზრდებს არ ვაძლევთ ჩვენი გმირების დავიწყების საშუალებას." - David Patsatsia / დავით ფაცაცია

აფხაზეთის ავტონომიური რესპუბლიკის სავაჭრო-სამრეწველო პალატამ, კომპანია „გაბელინთან“ თანამშრომლობით, 28 თებერვალს და 1 მარტს თბილისი მოლში გამართა ხელნაკეთი ნივთების გამოფენა-გაყიდვა, სადაც აფხაზეთიდან დევნილმა მეწარმეებმა საკუთარი უნიკალური ნამუშევრები წარმოადგინეს.

გამოფენაზე სტუმრებს შესაძლებლობა ჰქონდათ ენახათ და შეეძინათ სხვადასხვა სახის ხელნაკეთი პროდუქცია, მათ შორის დეკორატიული ხის დაფები, ტექსტილის ნაწარმი, ნაქსოვი სათამაშოები,სამკაულები, ეპოქსიდის ნაკეთობები, კერამიკული ნივთები და სხვა.

ღონისძიება მნიშვნელოვანი პლატფორმა გახდა დევნილი მეწარმეებისთვის, რათა ფართო საზოგადოებისთვის გაეცნოთ თავიანთი შემოქმედება, გაეზარდათ ცნობადობა და გაეძლიერებინათ ეკონომიკური შესაძლებლობები.

ინფრასტრუქტურული პროგრამების მონიტორინგის ფარგლებში, აფხაზეთის ავტონომიური რესპუბლიკის იძულებით გადაადგილებულ პირთა მინისტრმა დავით ფაცაციამ სამინისტროს წარმომადგენლებთან ერთად, ამჯერად, თბილისში, ჯ. ბაგრატიონის ქ. №2-ში, ერეკლე მეორეს მე-4 შესახვევში, რკინიგზის ქ. №14-ში, კერესელიძის ქ. №13-სა და პეტრიწის ქ. №1ა-ში მდებარე დევნილთა განსახლების ობიექტებში განხორციელებული და მიმდინარე ინფრასტრუქტურული პროექტები დაათვალიერა. ასევე, სოციალური, თუ სხვა ტიპის პროექტების განხორციელების მიზნით გაეცნო აფხაზეთის დროებით ოკუპირებული ტერიტორიიდან დევნილთა წინაშე არსებულ საჭიროებებს.

აღნიშნულ მისამართებზე სახურავების სარეაბილიტაციო სამუშაოები, აფხაზეთის ავტონომიური რესპუბლიკის იძულებით გადაადგილებულ პირთა სამინისტროს ინფრასტრუქტურული პროგრამების ფარგლებში, დევნილთა, ეკომიგრანტთა და საარსებო წყაროებით უზრუნველყოფის სააგენტოსთან აქტიური თანამშრომლობით განხორციელდა.

„ჩვენ ეტაპობრივად ვხვდებით დევნილ მოქალაქეებს, ადგილზე ვეცნობით მათ წინაშე არსებულ საჭიროებებს და შესაძლებლობების ფარგლებში ყველაფერს ვაკეთებთ იმისთვის, რომ უფრო აქტიურად შევძლოთ მათი მხარდაჭერა და მჯერა, რომ თითოეული ჩვენგანის ძალისხმევა გამოიტანს მნიშვნელოვან შედეგებს.“ - განაცხადა მინისტრმა დავით ფაცაციამ.

აფხაზეთის ავტონომიური რესპუბლიკის განათლებისა და კულტურის მინისტრი,დავით მორგოშია და მინისტრის პირველი მოადგილე, ბექა ღვაჩლიანი, “OKTAGON MMA”-ის მეორე ქართველ ჩემპიონს, ბენო ადამიას შეხვდნენ და სიმბოლური საჩუქარი გადასცეს.

ჟენევის საერთაშორისო მოლაპარაკებების მორიგი რაუნდი იმართება. ქართული დელეგაციის შემადგენლობაში აფხაზეთის ავტონომიური რესპუბლიკის მთავრობის თავმჯდომარე ლევან მგალობლიშვილი იმყოფება.

ლევან მგალობლიშვილის განცხადებით, მოლაპარაკებების 63-ე რაუნდის ძირითადი თემები იქნება 2008 წლის 12 აგვისტოს ცეცხლის შეწყვეტის შეთანხმებით ნაკისრი საერთაშორისო ვალდებულებების შესრულება და იძულებით გადაადგილებულ პირთა უსაფრთხო და ღირსეული დაბრუნების საკითხები.

„ჟენევაში მოლაპარაკებების 63-ე რაუნდი იწყება, სადაც ქართული მხარე ძირითად ყურადღებას 2008 წლის 12 აგვისტოს ცეცხლის შეწყვეტის შეთანხმების შესრულების აუცილებლობასა და ოკუპირებული ტერიტორიებიდან დროებით დევნილი მოსახლეობის საკუთარ სახლებში უპირობოდ დაბრუნების საკითხებზე გაამახვილებს.

საუბარი ასევე შეეხება ჰუმანიტარული მნიშვნელობის საკითხებს, მათ შორის, თავისუფალი გადაადგილების უფლების შეზღუდვის, მშობლიურ ენაზე განათლების მიღების აკრძალვის და უკანონო დაკავებების ფაქტებს.

განვიხილავთ, ოკუპირებულ ტერიტორიაზე ბოლო პერიოდში განვითარებულ მოვლენებს, მათ შორის, ე.წ. არჩევნების შედეგად არსებულ მდგომარეობას, სოხუმის აეროპორტის გახსნის მიუღებლობას და საოკუპაციო რეჟიმის სხვა დესტრუქციულ ქმედებებს.

გვაქვს მოლოდინი, რომ ჟენევის საერთაშორისო მოლაპარაკებების 63-ე რაუნდი გარკვეულწილად პოზიტიური შედეგების მომტანი იქნება“, - განაცხადა ლევან მგალობლიშვილმა.

დღეს ჟენევაში თანათავმჯდომარეებთან ტექნიკური შეხვედრები იმართება, ხვალიდან კი მოლაპარაკებათა 63-ე რაუნდი ოფიციალურად დაიწყება.

აფხაზეთის მთავრობის მინისტრთა კაბინეტის წევრებმა გურამ გაბესკირიას ხსოვნას პატივი მიაგეს, საქართველოს ეროვნული გმირს გურამ გაბესკირიას 78 წელი შეუსრულდებოდა.

ამ დღესთან დაკავშირებით, აფხაზეთის ავტონომიური რესპუბლიკის მთავრობის მინისტრთა კაბინეტის წევრებმა, აფხაზეთის უმაღლესი საბჭოსა და ვეტერანების საქმეთა სახელმწიფო სამსახურის წარმომადგენლებთან ერთად, დიღმის ძმათა სასაფლაოზე გურამ გაბესკირიას საფლავი ყვავილებით შეამკეს და მის ხსოვნას პატივი მიაგეს. გურამ გაბესკირია 1947 წლის 2 მარტს სოხუმში დაიბადა.

1992 წელს სოხუმის მერი გახდა, ხოლო 1993 წელს აფხაზეთის ავტონომიური რესპუბლიკის მინისტრთა საბჭოს და თავდაცვის საბჭოს წევრი.

1993 წლის 27 სექტემბერს, სოხუმის დაცემის დღეს, აფხაზმა სეპარატისტებმა პოლკოვნიკი გურამ გაბესკირია აფხაზეთის ავტონომიური რესპუბლიკის მთავრობის წარმომადგენლებთან ერთად დახვრიტეს.

გურამ გაბესკირიას ცხედარი ოკუპირებული სოხუმიდან 2017 წელს გადმოასვენეს და სამხედრო პატივით დიღმის ძმათა სასაფლაოზე დაკრძალეს. 2017 წლის 27 სექტემბერს გურამ გაბესკირიას საქართველოს ეროვნული გმირის წოდება მიენიჭა.