აფხაზეთის ავტონომიური რესპუბლიკის განათლებისა და კულტურის სამინისტრომ, სასწავლო წლის დამთავრებასთან დაკავშირებით, აფხაზეთის საჯარო სკოლების პედაგოგებთან ვიდეოკონფერენცია გამართა.

პედაგოგებს დისტანციური სწავლების საკითხებში აქტიურობისა და ყველა შესაბამისი შესაძლებლობის ეფექტურად გამოყენებისათვის მადლობა გადაუხადა აფხაზეთის ავტონომიური რესპუბლიკის განათლებისა და კულტურის მინისტრმა როლანდ ნიჟარაძემ. მან აღნიშნა, რომ დროის გამოწვევას ასევე ღირსეულად გაუმკლავდნენ ოკუპირებული გალის რაიონის სკოლების პედაგოგები, რომელთაც ისედაც რთულ ვითარებაში - ქართულად სწავლა/სწავლების უკიდურესად შეზღუდვის პირობეში უწევთ საქმიანობა. თუმცა, როგორც როლანდ ნიჟარაძენ დასძინა, მავთულხლართები დიდხანს ვერ გაძლებს და ის მალე ბერლინის კედელივით დაინგრევა.

აფხაზეთის ავტონომიური რესპუბლიკის განათლებისა და კულტურის სამინისტრომ აფხაზეთის ტიტულოვან სპორტსმენებთან და მწვრთნელებთან კორონავირუსით გამოწვეულ რთულ ვითარებასა და ამ ვითარებიდან გამოსვლის საკითხებზე ვიდეოკონფერენცია გამართა.

აფხაზეთის ავტონომიური რესპუბლიკის განათლებისა და კულტურის მინისტრმა როლანდ ნიჟარაძემ პანდემიის გამო როგორც ყველა, ისე სპორტის სფეროში შექმნილ საგანგებო მდგომარეობაზე საუბრის შემდეგ აღნიშნა, რომ „აფხაზეთი ყოველთვის იყო სახელოვანი სპორტსმენების, ოლიმპიური და მსოფლიო ჩემპიონების სამჭედლო. ეს ტრადიცია კი არც აფხაზეთის ომის შემდეგ დარღვეულა და აფხაზეთის მკვიდრნი, აწ უკვე იქიდან იძულებით გადაადგებული პირები, ისევ ღირსეულ ადგილებს იკავებენ სპორტის სხვადასხვა სახეობაში, ქვეყნის შიგნით თუ მის ფარგლებს გარეთ“.

ძვირფასო მეგობრებო!

გილოცავთ 26 მაისს, საქართველოს დამოუკიდებლობის დღეს, ჩვენი ქვეყნის უმთავრეს ეროვნულ დღესასწაულს!

ჩვენი დიდი წინაპრების თავგანწირულმა საუკუნოვანმა ბრძოლამ თავისუფლებისა და დამოუკიდებლობისათვის, როგორც იქნა, შედეგი გამოიღო და ასრულდა ყველა ქართველის ოცნება - საქართველო დამოუკიდებელი გახდა!

სრულიად საქართველოს კათალიკოს-პატრიარქის, მცხეთა–თბილისის მთავარეპისკოპოსის, ბიჭვინთისა და ცხუმ-აფხაზეთის მიტროპოლიტის, უწმინდესისა და უნეტარესის ილია II-ს ლოცვა-კურთხევით 23 მაისი, სვიმონ კანანელის ხსენების დღე 2014 წელს აფხაზეთის დღედ დადგინდა.
2014 წლიდან ეს დღე ყოველწლიურად, აფხაზეთიდან დევნილი შემოქმედებითი კოლექტივებისა და დევნილი საზოგადოების მონაწილეობით, .გასართობი და შემეცნებითი ღონისძიებებით აღინიშნებოდა. წლეულს კი, კორონავირუსის პანდემიის გამო, შეცვლილი ფორმატით აღინიშნა.

აფხაზეთის დღეს ოკუპირებული გალის რაიონის სკოლების მოსწავლეებიც გამოეხმაურნენ. გალის რაიონის საგანმანათლებლო რესურსცენტრის უფროსის ნონა შონიას თქმით, არჩევანი თემაზე - „გაზაფხული აფხაზეთში“ შეჩერდა.

გაზაფხული იწურება და ამ დროს განსაკუთრებულად ლამაზია აყვავებული აფხაზეთი. სწორედ ეს განუმეორებლობა გადმოსცეს მოსწავლეებმა მათ მიერ გადაღებული ფოტოებით, ჩანახატებითა თუ ჩანაწერებით და აფხაზეთის დღეს კიდევ უფრო მოგვანატრეს აფხაზეთი.

აფხაზეთის ავტონომიური რესპუბლიკის განათლებისა და კულტურის სამინისტროს განათლებისა და საგანმანათლებლო პროგრამების სამსახურის ორგანიზებით, აფხაზეთის საჯარო სკოლებმა, 23 მაისს, სვიმონ კანანელის ხსენების დღეს, დისტანციურ ფორმატში, აფხაზეთის დღე აღნიშნეს.

როგორც სხვა სკოლებში, ასევე აფხაზეთის მეორე საჯარო სკოლაში ზოგადი თემა ისევ და ისევ აფხაზეთი იყო, სათაურებად კი - „ყველას გვაქვს ჩვენი აფხაზეთი!“ და „ჩვენ დავბრუნდებით!“ - შეირჩა.

სრულიად საქართველოს კათოლიკოს-პატრიარქმა, მცხეთა-თბილისის მთავარეპისკოპოსმა, ბიჭვინთისა და ცხუმ-აფხაზეთის მიტროპოლიტმა, უწმინდესმა და უნეტარესმა, ილია მეორემ 23 მაისი, სვიმონ კანანელის ხსენების დღე, 2014 წელს აფხაზეთის დღედ დააწესა.

წმინდა მოციქული სვიმონ კანანელი ქრისტეს 12 მოციქულთაგან ერთ-ერთი იყო. საეკლესიო გადმოცემის თანახმად, ის ანდრია პრველწოდებულთან ერთად შავი ზღვის სანაპიროზე მდებარე ქვეყნებში, მათ შორის აფხაზეთში, ღვთის სიტყვას ქადაგებდა. სვიმონ კანანელი აქ წარმართებმა წამებით მოკლეს. წმინდანი აფხაზეთში, ანაკოფიაში, ათონის მთაზე დაკრძალეს. შემდგომში მის საფლავზე მონასტერი აშენდა.

სამიზნე ჯგუფებს წარმოადგენენ აფხაზეთიდან იძულებით გადაადგილებული პირები, კერძოდ: ავტორიზებული პროფესიული საგანმანათლებლო დაწესებულებების პროფესიული სტუდენტები; ავტორიზებული უმაღლესი საგანმანათლებლო დაწესებულებების (ბაკალავრები, მაგისტრანტები) სტუდენტები; ავტორიზებული სამედიცინო/სტომატოლიგიური დაწესებულებების რეზიდენტები.

განმცხადებელს ელექტრონული სახით მოეთხოვება შემდეგი დოკუმენტების წარმოდგენა:

• განცხადება;
• პირადობის დამადასტურებელი მოწმობის ასლი;
• დევნილის მოწმობის ასლი;
• ცნობა სასწავლებლიდან, რომ არის აქტიური სტატუსის მქონე სტუდენტი/რეზიდენტი;
• რეკომენდაცია/დახასიათება სასწავლებლიდან;
• სასწავლო ბარათი (კომისია იხელმძღვანელებს ბოლო სემესტრის მონაცემებით);
• წარმატებულობისა და განსაკუთრებული მიღწევების დამადასტურებელი სათანადო დოკუმენტაციის სერტიფიკატები, სიგელები (არსებობის შემთხვევაში);
• ინვოისი (ცნობა პირის მიერ სასწავლებლისათვის გადასახდელი სწავლის წლიური საფასურის ოდენობის თაობაზე, სადაც მიეთითება განცხადების შემოტანის მომენტისათვის სასწავლებლისთვის დარჩენილი გადასახდელი თანხის ოდენობა).

გაითვალისწინეთ: განცხადებაში აუცილებელია პირის საკონტაქტო მონაცემების (ტელეფონი, ფაქტობრივი მისამართი, ელექტრონული ფოსტა), განმცხადებლის ხელმოწერისა და თარიღის აღნიშვნა.

თანადაფინანსება განსაზღვრულია შემდეგნაირად:

1. 500 ლარის ოდენობით - ავტორიზებულ უმაღლეს საგანმანათლებლო დაწესებულების (ბაკალავრები, მაგისტრანტები) სტუდენტებისა და ავტორიზებული სამედიცინო/სტომატოლოგიური დაწესებულებების რეზიდენტების შემთხვევაში (აკადემიური მოსწრება სასწავლებელში ბოლო სემესტრში მიღებული ქულების საშუალო არითმეტიკულის გამოანგარიშებით 80-დან 90%-მდე );

2. 700 ლარის ოდენობით - ავტორიზებულ უმაღლეს საგანმანათლებლო დაწესებულების (ბაკალავრები, მაგისტრანტები) სტუდენტებისა და ავტორიზებული სამედიცინო/სტომატოლოგიური დაწესებულებების რეზიდენტების შემთხვევაში (აკადემიური მოსწრება სასწავლებელში ბოლო სემესტრში მიღებული ქულების საშუალო არითმეტიკულის გამოანგარიშებით 90%-დან 99- მდე).

3. 2250 ლარის ოდენობით - ავტორიზებულ უმაღლეს საგანმანათლებლო დაწესებულების (ბაკალავრები, მაგისტრანტები) სტუდენტებისა და ავტორიზებული სამედიცინო/სტომატოლოგიური დაწესებულებების რეზიდენტების შემთხვევაში (აკადემიური მოსწრება სასწავლებელში ბოლო სემესტრში მიღებული ქულების საშუალო არითმეტიკულის გამოანგარიშებით 99%-დან 100%).

4. 300 ლარის ოდენობით - ავტორიზებული პროფესიული საგანმანათლებლო დაწესებულების პროფესიული სტუდენტების შემთხვევაში;

სრული სასწავლო პერიოდის განმავლობაში (სწავლების ყველა საფეხურის გათვალისწინებით) პროგრამის ფარგლებში ერთი და იგივე პიროვნება ფინანსდება მხოლოდ 2-ჯერ (აღნიშნული მოთხოვნა არ ვრცელდება რეზიდენტურის სტუდენტებზე. რეზიდენტურაში სწავლება ფინანსდება მხოლოდ ერთხელ მიუხედავად იმისა, რომ სტუდენტი პირველად სარგებლობს წარმოდგენილი პროგრამით). ასევე, ერთი და იგივე პიროვნება არ დაფინანსება 2-ჯერ ერთი კალენდარული წლის განმავლობაში.

მეორე ეტაპის საბუთების მიღება დაიწყება 01 მაისს და გაგრძელდება 31 მაისის ჩათვლით.
განცხადებების მიღება ხდება შემდეგ ელექტრონულ მისამართზე - apkhazeti@mes.gov.ge.

თითოეულ ეტაპზე, შემოსული განცხადებების განხილვისას, დასაფინანსებლად პრიორიტეტი მიენიჭება უფრო მაღალი შეფასების (აკადემიური მოსწრების ფურცლის მიხედვით) მქონე სტუდენტებს, ხოლო თანაბარი შეფასების შემთხვევაში მათ, ვინც მეტად წარმატებულია, რაც დასტურდება სერტიფიკატების, სიგელებისა და დიპლომების წარდგენით.

ინფორმაციისთვის დარეკეთ ნომრებზე: 595 34 33 20; 577 09 22 39

აფხაზეთის ავტონომიური რესპუბლიკის განათლებისა და კულტურის სამინისტრო თავის საქმიანობას, დისტანციური მუშაობის რეჟიმში, მის კომპეტენციაში შემავალი ყველა მიმართულებით აგრძელებს. სამინისტროს ერთ-ერთ მთავარ პრიორიტეტს წარმოადგენს დისტანციური სწავლების უზრუნველყოფა აფხაზეთის საჯარო სკოლებში, რაც საქართველოს განათლების, მეცნიერების, კულტურისა და სპორტის სამინისტროს მიერ გაცემულ რეკომენდაციებს ეფუძნება.

აფხაზეთის ავტონომიური რესპუბლიკის განათლებისა და კულტურის მინისტრის როლანდ ნიჟარაძის განცხადებით: „დისტანციური სწავლების პროცესში აქტიურად ჩაერთვნენ აფხაზეთის საჯარო სკოლები, რომელთაც გადაეგზავნათ დისტანციური სწავლა-სწავლების პირველადი რეკომენდაციები. სკოლებში ჩატარდა მოსამზადებელი სამუშაოები: კლასების მიხედვით შეიქმნა დახურული ონლაინ ჯგუფები, მესენჯერ-ჩათები, გათვალისწინებულ იქნა ყველა მოსწავლის შესაძლებლობები, დაინიშნა სატელეფონო კონცულტაციები. სკოლებს მიეწოდათ გრიფირებული სასკოლო სახელმძღვანელოების ელექტრონული ვერსიები. (გამომცემლობებმა მოსწავლეებსა და მასწავლებლებს გრიფირებული სასკოლო სახელმძღვანელოების ელექტრონულ ვერსიებზე უფასო წვდომა შესთავაზეს).

აფხაზეთის ავტონომიური რესპუბლიკის განათლებისა და კულტურის სამინისტროს „წარმატებული ახალგაზრდების მხარდაჭერის პროგრამის“ ფარგლებში, 2020 წლის I ეტაპზე, მარტში დაფინანსდა 44 აფხაზეთიდან დევნილი წარმატებული ახალგაზრდა. ხოლო ის 33 წარმატებული სტუდენტი, რომლებიც აკმაყოფილებდნენ პროგრამის დებულებით განსაზღვრულ კრიტერიუმებს, მაგრამ პროგრამის პირველი კვარტლის ბიუჯეტის ამოწურვის გამო, ვერ დაფინანსდნენ, სამინისტრომ აპრილში დააფინანსა.

წლეულს, ამ ეტაპისთვის სულ დაფინანსებულია 77 წარმატებული ახალგაზრდა აფხაზეთიდან. დაფინანსების მომდევნო ეტაპის დაწყებასთან დაკავშირებით სამინისტრო საკუთარ ვებ და ფეისბუკგვერდებზე გაავრცელებს განცხადებას.

1907 წლის 23 აპრილს თანამედროვეობის ერთ-ერთი უდიდესი მათემატიკოსი, თვალსაჩინო საზოგადო მოღვაწე, აკადემიკოსი ილია ვეკუა აფხაზეთში, სამურზაყანოს ერთ-ერთ ულამაზეს სოფელ შეშელეთში დაიბადა. რთული და წინააღმდეგობრივი, ამავე დროს ძალიან წარმატებული და შთამბეჭდავი აღმოჩნდა დიდი მეცნიერის მიერ შეშელეთიდან მთაწმინდამდე განვლილი გზა...

ილია ვეკუა თავის დროზე მსოფლიოში აღიარებული ქართული მათემატიკური სკოლის ერთ-ერთი ფუძემდებელი გახდა. მან დიდი წვლილი შეიტანა მათემატიკისა და მექანიკის მეცნიერებათა განვითარებაში, შეძლო პერსპექტიული მიმართულებების აღმოჩენა და ახალი სამეცნიერო სკოლის შექმნა.

დევნილთა კომპაქტურ ჩასახლებებში მცხოვრები 70 წელს გადაცილებული იძულებით გადაადგილებული პირების დახმარების ფარგლებში დღეს აფხაზეთის ავტონომიური რესპუბლიკის განათლების და კულტურის მინისტრმა როლანდ ნიჟარაძემ და მინისტრის მოადგილეებმა ირაკლი გელენავამ და ირმა კეკელიძემ თბილისში, ტაშკენტის ქუჩაზე მდებარე კომპაქტურ ჩასახლებაში მცხოვრები დევნილები მოინახულეს და მათ სურსათი და სააღდგომო ნობათი გადასცეს.

70 წელს გადაცილებულ იძულებით გადაადგილებულ პირთა დახმარება აფხაზეთის ავტონომიური რესპუბლიკის მთავრობის მიერ შემუშავებული პროგრამის ფარგლებში მთელი საქართველოს მასშტაბით მიმდინარეობს. აფხაზეთის ავტონომიური რესპუბლიკის განათლებისა და კულტურის სამინისტრო ამ პროგრამის განხორციელებაში აქტიურად მონაწილეობს.