აფხაზეთის ავტონომიური რესპუბლიკის განათლებისა და კულტურის მინისტრი, ბექა ღვაჩლიანი, სამეგრელოში მცხოვრებ აფხაზეთიდან დროებით დევნილ მოსახლეობას შეხვდა და სააღდგომო ნობათები გადასცა.

შეხვედრის ფარგლებში, მინისტრმა ყურადღება გაამახვილა დევნილთა სოციალურ, საგანმანათლებლო და საცხოვრებელ საჭიროებებზე, დაჰპირდა მათ დახმარებას სამინისტროს კომპეტენციის ფარგლებში.

აღნიშნული ინიციატივა განხორციელდა აფხაზეთის ავტონომიური რესპუბლიკის მთავრობის ორგანიზებითა და ქალაქ თბილისის მერიის მხარდაჭერით. აღდგომის დღესასწაულთან დაკავშირებით, მთელი ქვეყნის მასშტაბით, სააღდგომო ნობათი გადაეცა აფხაზეთიდან იძულებით გადაადგილებულ, სოციალურად დაუცველ კატეგორიაში მყოფ დაახლოებით 1000 ოჯახს. ნობათის დარიგების პროცესში აქტიურად მონაწილეობდნენ აფხაზეთის მთავრობის წევრები, მთავრობის აპარატის წარმომადგენლები და სამინისტროს თანამშრომლები.

აფხაზეთის ავტონომიური რესპუბლიკის განათლებისა და კულტურის მინისტრი ბექა ღვაჩლიანი ზოგადი განათლების ახალი ხედვის განხილვას დაესწრო, რომელიც საქართველოს განათლების, მეცნიერებისა და ახალგაზრდობის მინისტრმა ალექსანდრე წულაძემ სასკოლო საზოგადოებასა და დაინტერესებულ მხარეებთან შეხვედრაზე წარადგინა.

მინისტრმა საქართველოს განათლების სფეროში არსებული გამოწვევებისა და სამომავლო ხედვების შესახებ ისაუბრა. ყურადღება გამახვილდა STEAM მიმართულების გაძლიერებაზე, რაც მოსწავლეებს სამომავლოდ დაეხმარება თანამედროვე ტექნოლოგიების გამოყენებით გაიმარტივონ სასწავლო პროცესი და დაეუფლონ განახლებულ სასწავლო მეთოდებს.

პრეზენტაციაზე ასევე სწავლა-სწავლების ხარისხის ამაღლებასა და მოსწავლეების კარიერული განვითარების ხელშეწყობაზე ისაუბრეს და მასწავლებელთა გადამზადებისა და მათი პროფესიული განვითარების შესაძლებლობები განიხილეს.

აფხაზეთის განათლებისა და კულტურის მინისტრმა საქართველოს განათლების მეცნიერებისა და ახალგაზრდობის სამინისტროსთან ურთიერთთანამშრომლობის გაძლიერებასა და აფხაზეთის სკოლებში თანამედროვე სწავლების მეთოდების დანერგვასთან დაკავშირებით მზაობა გამოთქვა.

აფხაზეთის ავტონომიური რესპუბლიკის განათლებისა და კულტურის მინისტრი ბექა ღვაჩლიანი საერთაშორისო ტურნირ Journeymen World Classic -ის ჩემპიონს ალექსი თოდუას შეხვდა და მნიშვნელოვანი წარმატება პირადად მიულოცა.

თავისუფალი ჭიდაობის ტურნირი ნიუ-იორკში გაიმართა, სადაც 15-19 წლის ასაკობრივ ჯგუფში, 102 კილოგრამი წონით კატეგორიაში აფხაზეთიდან დროებით დევნილმა სპორტსმენმა ალექსი თოდუამ ჩემპიონის ქამარი მოიპოვა.

შეხვედრისას მინისტრმა ყურადღება გაამახვილა სპორტსმენის პროფესიული განვითარების საჭიროებებსა და შესაბამის მხარდამჭერ პროგრამებზე, ხოლო ალექსი თოდუამ მინისტრს საკუთარი კარიერული გამოცდილება და სამომავლო მიზნები გააცნო.

სპორტსმენის წარმატებებს შორის აღსანიშნავია 2023 წელს სომხეთის ქალაქ არტაშაკში და 2021 წელს რუმინეთის საერთაშორისო ტურნირებზე მოპოვებული გამარჯვება, სადაც სხვადასხვა წონით კატეგორიაში ჩემპიონის ტიტულები მოიპოვა.

შეხვედრას აფხაზეთის ავტონომიური რესპუბლიკის განათლებისა და კულტურის მინისტრის მოადგილე დავით მიქავა, აფხაზეთის კულტურის, სპორტისა და ახალგაზრდულ საქმეთა სააგენტოს დირექტორი ანეტა კიტია, სააგენტოს კულტურის, სპორტისა და ახალგაზრდული პოლიტიკის სამსახურის უფროსის მოადგილე ვიტალი ბენდელიანი და სპორტსმენის მწვრთნელი იაგო ბუაძე ესწრებოდნენ.

აფხაზეთის ავტონომიური რესპუბლიკის განათლებისა და კულტურის სამინისტროსა და მოხალისეთა ორგანიზაცია "ახალგაზრდობა და ვეტერანები ეროვნული თავდაცვისა და უსაფრთხოებისთვის“ შორის ურთიერთთანამშრომლობის მემორანდუმი გაფორმდა.

მემორანდუმს ხელი აფხაზეთის განათლებისა და კულტურის მინისტრმა ბექა ღვაჩლიანმა და ორგანიზაციის დამფუძნებელმა ედუარდ ჯიშკარიანმა მოაწერეს.

ხელმოწერის შემდეგ, აფხაზეთის განათლებისა და კულტურის მინისტრმა, ორგანიზაციის დამფუძნებელთან ერთად, გომბორის მოხალისეთა მოსამზადებელ ცენტრში საბანაკე ტერიტორია და არსებული ინფრასტრუქტურა დაათვალიერა.

მოხალისეთა ორგანიზაციასთან თანამშრომლობის ფარგლებში, აფხაზეთიდან დროებით დევნილ მოსწავლეებს, შესაძლებლობა ექნებათ მიიღონ თეორიული ცოდნა საგანგებო სიტუაციებისა და თავდაცვის საკითხების შესახებ, ჩაერთონ შემეცნებით-პრაქტიკულ აქტივობებში და შეიძინონ გუნდური და ლიდერის თვისებები.

სამინისტროს მიერ განსაზღვრული კრიტერიუმების გათვალისწინებით, ახალგაზრდულ ბანაკში მონაწილეობის მისაღებად მაღალი აკადემიური მოსწრების მქონე დევნილი მოსწავლეები და ვეტერანების შვილები შეირჩევიან.

შეხვედრას ვეტერანების საქმეთა სამსახურის დირექტორი, გენერალ-მაიორი კობა კობალაძე, მინისტრის მოადგილე დავით მიქავა და აფხაზეთის კულტურის, სპორტის და ახალგაზრდულ საქმეთა სააგენტოს დირექტორი ანეტა კიტია ესწრებოდნენ.

აფხაზეთის ავტონომიური რესპუბლიკის განათლებისა და კულტურის მინისტრი ბექა ღვაჩლიანი სოხუმის კონსტანტინე გამსახურდიას სახელობის სახელმწიფო დრამატული თეატრის დარბაზში „SITFY“ თეატრალური ფესტივალის დახურვის ცერემონიას დაესწრო.

კონკურსის სპეციალურმა ჟიურიმ გამარჯვებულები შვიდ სხვადასხვა ნომინაციაში გამოავლინა და ფესტივალის პრიზები გადასცა. ნომინაციაში „საუკეთესო ტექსტი“ გამარჯვებული ზურაბ კანდელაკის სპექტაკლი „მოსასმენი თამაში მაყურებლისთვის“ გახდა.

თეატრალურ ფესტივალზე საუკეთესო სპექტაკლის ნომინაციაში გამარჯვებული პიესა „წვიმიანი ღამე“ მინისტრმა ბექა ღვაჩლიანმა დააჯილდოვა.

საერთაშორისო ფესტივალი საქართველოში წელს პირველად ჩატარდა და მასში 15 ქვეყნის, მათ შორის საუდის არაბეთის, რუმინეთის, კატარის, ომანის, თურქეთის, იაპონიის, უნგრეთის, ტუნისისა და ბაჰრეინის წარმომადგენლები მონაწილეობდნენ.

ფესტივალს სოხუმის სახელმწიფო დრამატულმა და თუმანიშვილის კინომსახიობთა თეატრებმა უმასპინძლეს, სადაც ორი კვირის განმავლობაში ორკაციანი პიესები -დუორამები იყო წარმოდგენილი.

თეატრალური ფესტივალი „SITFY“ 2016 წლის იანვარში რეჟისორის, მაზენ ელ-გარაბავის მიერ დაარსდა და მისი მიზანი თეატრის მოყვარული ახალგაზრდების მხარდაჭერა იყო.

აკაკი ხორავას სახელობის მსახიობთა სახლში ინტეგრირებული თეატრის ,,აზდაკის ბაღის” 10 წლის იუბილე გაიმართა, რომელსაც აფხაზეთის კულტურის, სპორტის და ახალგაზრდულ საქმეთა სააგენტოს დირექტორი ანეტა კიტია დაესწრო.

ღონისძიების ფარგლებში, თეატრის სამხატვრო ხელმძღვანელმა და რეჟისორმა ბაჩო გაბრუაშვილმა ინტეგრირებული თეატრის „აზდაკის ბაღის“ 10 წლიანი შემოქმედებითი საქმიანობის შესახებ ისაუბრა. დასის წევრებმა კი სხვადასხვა სპექტაკლებიდან ეპიზოდები წარმოადგინეს.

დამსწრე საზოგადოებას სიტყვით აფხაზეთის მთავრობის თავმჯდომარე ლევან მგალობლიშვილმა მიმართა, ინტეგრირებული თეატრის დასს 10 წლის იუბილე მიულოცა, ღონისძიების სტუმრებს ,,აზდაკის ბაღისთვის" აფხაზეთის სახელმწიფო თეატრის სტატუსის მინიჭების გადაწყვეტილება გააცნო და ასევე შემოქმედებითი საქმიანობის განსახორციელებლად შესაბამისი სივრცის გადაცემის საკითხი აცნობა.

საიუბილეო საღამოს აფხაზეთის ავტონომიური რესპუბლიკის მთავრობის თავმჯდომარე ლევან მგალობლიშვილი,
საქართველოს კულტურის მინისტრი თინათინ რუხაძე, ტერიტორიული მთლიანობის აღდგენისა და დეოკუპაციის საკითხებთან დაკავშირებული დროებითი კომისიის თავმჯდომარე გიორგი ვოლსკი, აფხაზეთის უმაღლესი საბჭოს თავმჯდომარე ჯემალ გამახარია, აფხაზეთის მთავრობისა და უმაღლესი საბჭოს წევრები და სხვა მოწვეული სტუმრები ესწრებოდნენ.

ინტეგრირებული თეატრი, რომელიც 2015 წელს დაარსდა, აერთიანებს 20-მდე განსაკუთრებული საჭიროების მქონე პირს, მათ შორის აფხაზეთიდან დროებით დევნილ მსახიობებს.

აფხაზეთის განათლებისა და კულტურის მინისტრი ბექა ღვაჩლიანი, აფხაზეთის ავტონომიური რესპუბლიკის მთავრობის თავმჯდომარე ლევან მგალობლიშვილთან ერთად წყნეთში აფხაზეთიდან დროებით დევნილი ახალგაზრდებისთვის განახლებული ქორეოგრაფიული დარბაზის გახსნას დაესწრო.

მოწვეულ სტუმრებს ცეკვის ანსამბლმა "ხალისი" საქართველოს სხვადასხვა კუთხისთვის დამახასიათებელი ქორეოგრაფიული ნომრები წარუდგინა.

ღონისძიებაზე აფხაზეთის ავტონომიური რესპუბლიკის განათლებისა და კულტურის მინისტრმა მოცეკვავეებს და დამსწრე საზოგადოებას სიტყვით მიმართა და დროებით დევნილ ახალგაზრდებს წარმატებები უსურვა.

"მოხარული ვარ, რომ დღეს ერთად ვზეიმობთ ამ შემოქმედებითი სივრცის განახლებას. ჩვენ მხარს ვუჭერთ ნიჭიერი ადამიანების განვითარებას და მჯერა, რომ ეს ადგილი, აფხაზეთიდან დროებით დევნილ და სხვა მრავალ ახალგაზრდას, მისცემს ახალი შესაძლებლობების აღმოჩენისა და საკუთარი უნარების გაღრმავების საშუალებას. ვუსურვებ მათ წინსვლას, წარმატებებსა და დიდ მიღწევებს კარიერაში!“ – განაცხადა ბექა ღვაჩლიანმა.

აფხაზეთის ავტონომიური რესპუბლიკის განათლებისა და კულტურის მინისტრი ბექა ღვაჩლიანი, აფხაზეთის ავტონომიური რესპუბლიკის მთავრობის თავმჯდომარე ლევან მგალობლიშვილთან ერთად, ვალერი არქანიას სახელობის საგამოფენო დარბაზში “აზდაკის ბაღის” სამხატვრო ხელმძღვანელს, რეჟისორ ბაჩო გაბრუაშვილს და თეატრის დასის წევრებს შეხვდა.

შეხვედრაზე მთავრობის წევრებმა, თეატრის წარმომადგენლებს პროფესიულ საქმიანობაში წარმატება უსურვეს და განვითარების სამომავლო გეგმებზე ისაუბრეს.

მთავრობის თავმჯდომარის ლევან მგალობლიშვილის და მთავრობის წევრების ერთობლივი გადაწყვეტილებით, უახლოეს მომავალში ინტეგრირებულ თეატრ "აზდაკის ბაღს" სახელმწიფო თეატრის სტატუსი მიენიჭება.

თეატრი რამდენიმე დღეში 10 წლის იუბილეს აღნიშნავს, რაც ამ გადაწყვეტილებას კიდევ უფრო სიმბოლურს ხდის.

ინტეგრირებული თეატრი “აზდაკის ბაღი” 2015 წელს დაარსდა და მისი დასი 20-მდე განსაკუთრებული საჭიროების მქონე პირს აერთიანებს.

აფხაზეთის ავტონომიური რესპუბლიკის განათლებისა და კულტურის მინისტრი,დავით მორგოშია და მინისტრის პირველი მოადგილე, ბექა ღვაჩლიანი, “OKTAGON MMA”-ის მეორე ქართველ ჩემპიონს, ბენო ადამიას შეხვდნენ და სიმბოლური საჩუქარი გადასცეს.

აფხაზეთის ავტონომიური რესპუბლიკის განათლებისა და კულტურის მინისტრი დავით მორგოშია, აფხაზეთიდან დროებით დევნილებთან შეხვედრების ფარგლებში, თბილისში, ბერი გაბრიელ სალოსის გამზირი №48ა-ში მდებარე დევნილთა განსახლების ობიექტში იმყოფებოდა.

მინისტრმა მოსახლეობას აფხაზეთის განათლებისა და კულტურის სამინისტროს 2025 წლის პროგრამები გააცნო და მათგან განათლების მიმართულებით არსებული საჭიროებები მოისმინა.

შეხვედრაზე ასევე იმსჯელეს სოციალურ და ინფრასტრუქტურულ საჭიროებებსა და მათი მოგვარების გზებზე.
 
აფხაზეთის მთავრობის თავმჯდომარის ლევან მგალობლიშვილის დავალებით, გრძელდება აფხაზეთიდან დროებით დევნილ მოსახლეობასთან შეხვედრები, რომლის მიზანი დევნილების საჭიროებებისა და პრობლემების შესწავლა და შემდგომ მათი ოპერატიულად გადაწყვეტაა.

მაგიდის ჩოგბურთში აფხაზეთის ღია ახალგაზრდული პირველობა გაიმართა, რომელშიც საქართველოს თითქმის ყველა რეგიონიდან, 130-მდე ახალგაზრდა სპორტსმენი მონაწილეობდა. 

რეგიონალურ გუნდებს შორის აფხაზეთის ჩოგბურთელთა ახალგაზრდულმა გუნდმა 3 ოქროს, ერთი ვერცხლის და ორი ბრინჯაოს მედალი მოიპოვა. 

ოქროს მედლები ელენე ქობალიამ, მათე ყიფშიძემ და ანასტასია ჩხარტიშვილმა, ვერცხლის - აკაკი გაბიცინაშვილმა, ხოლო ბრინჯაოს მედლები - ბარბარე სიხარულიძემ და ანდრია ჩხარტიშვილმა მიიღეს.

ტურნირს აფხაზეთის ა/რ განათლებისა და კულტურის მინისტრის პირველი მოადგილე ბეჟან ნემსაძე, მინისტრის მრჩეველი ბექა ღვაჩლიანი, აფხაზეთის კულტურის, სპორტისა და ახალგაზრდულ საქმეთა სააგენტოს დირექტორი ანი კიტია, აფხაზეთის ა/რ რეგიონალური ოლიმპიური კომიტეტის ხელმძღვანელი ვიტალი ბენდელიანი ესწრებოდნენ.