აფხაზეთის ავტონომიური რესპუბლიკის მთავრობა

Аҧснытәи автономтә республика аиҳабыра

ახალი ამბები
აფხაზეთის საჯარო სკოლების მოსწავლეები პროფესიული განათლების შესაძლებლობებს გაეცნენ
ქვეპროგრამა ,,პროფესიული უნარების განვითარების მხარდაჭერა სკოლებში“ აფხაზეთის ავტონომიური რესპუბლიკის განათლებისა და კულტურის სამინისტროს ,,განათლების ხელშეწყობის პროგრამის“ ერთ-ერთი შემადგენელი ნაწილია. აფხაზეთის საჯარო სკოლების მოსწავლეები, ტერიტორიული პრინციპით (ზუგდიდი, ქუთაისი, სენაკი, ფოთი, თბილისი), უკვე მონაწილეობდნენ პროფესიულ სასწავლებლებში ჩატარებულ საინფორმაციო ტურებში, რომელთა მიზანი მათთვის პროფესიული არჩევანის გაკეთებაში დახმარება და არსებული პროფესიების შესახებ ინფორმაციის მიწოდება იყო.
 
დღეს დასკვითი საინფორმაციო შეხვედრა გაიმართა სსიპ კოლეჯ ,,მერმისში“. აქ აფხაზეთის №2 და №3 საჯარო სკოლების მოსწავლეებს პროფესიული განათლების შესაძლებლობები, ინოვაციური ლაბორატორიების მუშაობის სპეციფიკა და კოლეჯ „მერმისის“ სხვადასხვა მიმართულების პროგრამები გააცნეს.
 
შეხვედრას სსიპ კოლეჯი ,,მერმისის“ დირექტორი ნონა ღუდუშაური მასპინძლობდა.
 
შეხვედრაში ასევე მონაწილეობდნენ: სსიპ პროფესიული უნარების სააგენტოს წარმომადგენლები - მანანა გაბუნია და სალომე ცხადაძე, აფხაზეთის ავტონომიური რესპუბლიკის მთავრობის თავმჯდომარის მრჩეველი მანანა ქვაჩახია, აფხაზეთის ა/რ განათლებისა და კულტურის მინისტრის პირველი მოადგილე ნინო ლობჟანიძე და სხვ.
დედა ენის დღე - აფხაზეთის საჯარო სკოლებში
14 აპრილი - დედა ენის დღე აფხაზეთის საჯარო სკოლებში მრავალფეროვნად აღინიშნა. მოსწავლეებმა წარმოადგინეს პრეზენტაციები, რომლებიც ქართველი ერის საოცარი ერთიანობისა და დამოუკიდებლობისაკენ სწრაფვის 1978 წლის 14 აპრილისეულ სულისკვეთებას გამოხატავდა. გაიმართა ლიტერატურულ-მხატვრული კომპოზიციები: „ენა დედაა ერისა“, „ო, ენავ ,ჩემო, დედაო ენავ,“ „საქართველოს მთებში გაგაჩინა ზენამ"; ჩატარდა ვიქტორინა-კონკურსები: „ვინ უკეთ იცის მშობლიური ენა", „რომელია სწორი“ და „როგორ უნდა ვილაპარაკოთ“; მოამზადეს კედლის გაზეთები.
 
გაიმართა საუბრები და დისკუსიები თემებზე: 1978 წლის 14 აპრილის მოვლენების კვალდაკვალ, ქართული ენა ქართულ პოეზიაში, ქართული ენა მსოფლიო ენათა სისტემაში და ა. შ. ასევე მოეწყო ესეებისა და ნახატების კონკურსები.
აფხაზეთის ა/რ განათლებისა და კულტურის სამინისტროს ქვეპროგრამა - „STEM განათლების ხელშეწყობა"... ამოქმედდა
 აფხაზეთის ავტონომიური რესპუბლიკის განათლებისა და კულტურის სამინისტროს ქვეპროგრამის - „STEM განათლების ხელშეწყობა - მზარდი და ინოვაციური გონება“ - ფარგლებში, აფხაზეთის №2 და №3 საჯარო სკოლების მოსწავლეებს მასწავლებელთა პროფესიული განვითარების ეროვნულ ცენტრში კლუბ „ჩხირკედელას“ ლაბორატორიამ უმასპინძლა. პროგრამა საბუნებისმეტყველო საგნების მხარდაჭერას ითვალისწინებს.
 
 მოსწავლეები STEM კლუბის მუშაობის პრინციპებს გაეცნენ. ამასთანავე კლუბ „ჩხირკედელას“ კონსულტანტებმა სკოლის STEM კლუბის ხელმძღვანელ მასწავლებლებს სათანადო კონსულტაციები გაუწიეს და სამომავლო პროექტების შემუშავების გზებზე იმსჯელეს.
აფხაზეთის სკოლების მოსწავლეებისთვის წიგნიერების კლუბი შეიქმნა
აფხაზეთის ავტონომიური რესპუბლიკის განათლებისა და კულტურის სამინისტროსა და მასწავლებელთა პროფესიული განვითარების ეროვნული ცენტრის თანამშრომლობით, წიგნიერების კომპეტენციის განვითარების მიზნით, აფხაზეთის სკოლების მოსწავლეებისთვის წიგნიერების კლუბი შეიქმნა.
 
ამასთან დაკავშირებით გამომცემლობა „პალიტრა L-ში“ გაიმართა შეხვედრა, რომელსაც აფხაზეთის ავტონომიური რესპუბლიკის განათლებისა და კულტურის მინისტრი ეკა ხოფერია, მასწავლებელთა სახლის დაწყებითი საფეხურის ექსპერტ-კონსულტანტი ანი კუდუხაშვილი, გამომცემლობა „პალიტრა L-ის“ მთავარი რედაქტორი მაია ალუდაური და სხვ. ესწრებოდნენ.
 
შეხვედრაზე ისაუბრეს „პალიტრა L-ის“ თანამშრომლების - მარიამ აღდგომელაშვილისა და მარიამ გიორგაძის მიერ კლუბის წევრებისთვის შემუშავებულ 3-თვიან პროგრამაზე, რომლის ფარგლებშიც მოსწავლეები ქართველ და უცხოელ ავტორებს გაეცნობიან, თვეში ერთხელ გამართავენ წაკითხული წიგნის განხილვა/დისკუსიას და ავტორებთან შეხვედრებს.
 
აქვე გამომცემლობა „პალიტრა L-მა“ აფხაზეთის ავტონომიური რესპუბლიკის განათლების და კულტურის სამინისტროს აფხაზეთის სკოლების მოსწავლეებისთვის 12 დასახელების 250-ზე მეტი წიგნი გადასცა.
რუსლან აბაშიძე და ეკა ხოფერია ეროვნულ ბიბლიოთეკაში აფხაზეთის წარმატებულ ახალგაზრდებს შეხვდნენ
საქართველოს პარლამენტის ეროვნული ბიბლიოთეკის საგამოფენო დარბაზში აფხაზეთის ავტონომიური რესპუბლიკის მთავრობის თავმჯდომარემ რუსლან აბაშიძემ და აფხაზეთის ავტონომიური რესპუბლიკის განათლებისა და კულტურის მინისტრმა ეკა ხოფერიამ სამინისტროს „წარმატებული ახალგაზრდების მხარდაჭერის პროგრამის“ ფარგლებში დაფინანსებულ ახალგაზრდებთან შეხვედრა გამართეს.
 
ეკა ხოფერიამ აღნიშნა, რომ „სამინისტრო „წარმატებული ახალგაზრდების მხარდაჭერის პროგრამას“ 2008 წლიდან ახორციელებს და ამ ხნის განმავლობაში აფხაზეთიდან დევნილ ასეულობით სტუდენტს გაეწია ფინანსური დახმარება. პროგრამის ფარგლებში დაფინანსებულმა არაერთმა სტუდენტმა შემდგომში სწავლა საზღვარგარეთ გააგრძელა, კვალიფიციურ კადრად ჩამოყალიბდა და ქვეყნის შიგნით თუ მის ფარგლებს გარეთ წარმატებული კარიერა აიწყო“.
 
რუსლან აბაშიძე და ეკა ხოფერია აფხაზეთის წარმატებულ ახალგაზრდებს განათლების - აფხაზეთის საჯარო და გალის ოკუპირებული ტერიტორიის სკოლების - მიმართულებით არსებულ სამინისტროს პროგრამებსა და პროექტებზე, პერსპექტივებზე ესაუბრნენ და შემდეგ მათი შესაბამისი ხედვები და მოსაზრებები მოისმინეს. საბოლოოდ შეხვედრა საინტერესო დისკუსიაში გადაიზარდა და მომავალში აზრთა უფრო ხშირად გაცვლის სურვილით დასრულდა.
ქუთაისის საერთაშორისო უნივერსიტეტმა აფხაზეთის სკოლების უფროსკლასელებისთვის პრეზენტაცია გამართა

ქუთაისის საერთაშორისო უნივერსიტეტმა, აფხაზეთის ავტონომიური რესპუბლიკის განათლებისა და კულტურის სამინისტროს ინიციატივით, აფხაზეთის სკოლების უფროსკლასელებისთვის ონლაინ პრეზენტაცია გამართა.

ქუთაისის საერთაშორისო უნივერსიტეტის კანცლერმა მაგდა მაღრაძემ და სხვა თანამშრომლებმა აბიტურიენტებს უნივერსიტეტის პრიორიტეტული მიმართულებები და პროგრამული უპირატესობები გააცნეს; ხაზგასმით აღნიშნეს ის მნიშვნელოვანი გარემოებები, რომ უნივერსიტეტში სწავლა ინგლისურენოვანია და ის ერთადერთი უნივერსიტეტია სამხრეთ კავკასიაში, რომელიც სტუდენტებს ყველა საჭირო ინფრასტრუქტურით უზრუნველყოფილ კამპუსს სთავაზობს.

პრეზენტაციის მსვლელობისას აბიტურიენტებმა მათთვის საინტერესო შეკითხვებზე პასუხებიც მიიღეს.

დასასრულ აფხაზეთის ავტონომიური რესპუბლიკის განათლებისა და კულტურის მინისტრმა ეკა ხოფერიამ მადლობა გადაუხადა უნივერსიტეტის წარმომადგენლებს ამომწურავი ინფორმაციისთვის და აღნიშნა, რომ აფხაზეთის სკოლების აბიტურიენტებს თანდათან საქართველოს თითქმის ყველა უმაღლეს სასწავლებელს გააცნობენ.

პროფესიული განათლება - ახალი თაობისთვის!

აფხაზეთის ავტონომიური რესპუბლიკის განათლებისა და კულტურის სამინისტრომ, პროფესიული განათლების შესაძლებლობების გაცნობის მიზნით, აფხაზეთის საჯარო სკოლების მოსწავლეებთან ონლაინ საინფორმაციო შეხვედრა გამართა.

შეხვედრის მონაწილეებს შესავალი სიტყვით მიმართა აფხაზეთის ავტონომიური რესპუბლიკის განათლებისა და კულტურის მინისტრმა ეკა ხოფერიამ. ქვეპროგრამაზე ისაუბრა აფხაზეთის ავტონომიური რესპუბლიკის მთავრობის თავმჯდომარის მრჩეველმა მანანა ქვაჩახიამ.

აფხაზეთის საჯარო სკოლების საშუალო საფეხურის მოსწავლეებს არსებული პროფესიების შესახებ ინფორმაცია მიაწოდეს და სასწავლო პროგრამები გააცნეს სსიპ პროფესიული უნარების სააგენტოს დირექტორის მოადგილემ თამარ სამხარაძემ, შოთა მესხიას ზუგდიდის სახელმწიფო სასწავლო უნივერსიტეტის წარმომადგენელმა მანანა სამუშიამ, სსიპ კოლეჯი „ფაზისის“ (ფოთი) დირექტორმა ნინო ბაკურაძემ, სსიპ კოლეჯი „იბერიას“ (ქუთაისი) დირექტორმა ირაკლი ავალიანმა.

ონლაინ შეხვედრაზე მიღებული ინფორმაცია მოზარდებს პროფესიული არჩევანის გაკეთებაში დაეხმარება.

 

ეკა ხოფერია აფხაზეთის ავტონომიური რესპუბლიკის უმაღლესი საბჭოს საპატიო სიგელით დაჯილდოვდა

 „აფხაზეთის ავტონომიური რესპუბლიკის განათლებისა და კულტურის სფეროში ნაყოფიერი მოღვაწეობისათვის, აფხაზეთის პრობლემატიკის ობიექტური საინფორმაციო უზრუნველყოფის საქმეში შეტანილი განსაკუთრებული წვლილისათვის, აქტიური სახელმწიფოებრივი, ეროვნული და მოქალაქეობრივი პოზიციისათვის“  აფხაზეთის ავტონომიური რესპუბლიკის განათლებისა და კულტურის მინისტრი ეკა ხოფერია  აფხაზეთის ავტონომიური რესპუბლიკის უმაღლესი საბჭოს საპატიო სიგელით დაჯილდოვდა.

მინისტრს სიგელი აფხაზეთის ავტონომიური რესპუბლიკის უმაღლესი საბჭოს თავმჯდომარის მოადგილემ თამაზ ხუბუამ და საერთაშორისო ურთიერთობათა, განათლებისა და კულტურის კომიტეტის თავმჯდომარემ ნუგზარ მგალობლიშვილმა გადასცეს.

პროფესიული განათლების შესაძლებლობების გაცნობის მიზნით
აფხაზეთის ავტონომიური რესპუბლიკის განათლებისა და კულტურის სამინისტრო, ,,განათლების ხელშეწყობის პროგრამის“ ფარგლებში, ახალი ქვეპროგრამის - „პროფესიული უნარების განვითარების მხარდაჭერა სკოლებში“ განხორციელებას იწყებს. ამ ინფორმაციის მიწოდებისა და პროფესიული განათლების შესაძლებლობების გაცნობის მიზნით, აფხაზეთის საჯარო სკოლების საშუალო საფეხურის მოსწავლეებთან ონლაინ საინფორმაციო შეხვედრა გაიმართა.
 
ონლაინ ჩართვაში მონაწილეობდნენ სსიპ პროფესიული უნარების სააგენტოს დირექტორის მოადგილე თამარ სამხარაძე, ზუგდიდის შოთა მესხიას სახელმწიფო სასწავლო უნივერსიტეტის რექტორი თეონა ხუფენია, კოლეჯ ,,ლაკადას“ დირექტორი თეონა ქუხილავა, აფხაზეთის ავტონომიური რესპუბლიკის მთავრობის თავმჯდომარის მრჩეველი მანანა ქვაჩახია, აფხაზეთის ავტონომიური რესპუბლიკის განათლებისა და კულტურის მინისტრის პირველი მოადგილე ნინო ლობჟანიძე და სხვ.
 
შეხვედრის მიზანი იყო პროფესიული განათლების პოპულარიზაცია ახალგაზრდებში და მათთვის დახმარების გაწევა პროფესიული არჩევანის გაკეთებისას. პროგრამა მოსწავლეებს ასევე დაეხმარება საკუთარი თავის შეცნობასა და შესაძლებლობების რეალიზებაში.
 
შეხვედრა კითხვა-პასუხის რეჟიმში წარიმართა და მოსწავლეებმა მათთვის საინტერესო საკითხებზე კვალიფიციური ინფორმაცია მიიღეს.
,,ოკუპაციის კვირეული” - აფხაზეთის საჯარო სკოლებში
21-25 თებერვალს, რუსეთის მიერ საქართველოს ოკუპაციის დღესთან დაკავშირებით, აფხაზეთის ცამეტივე საჯარო სკოლაში ,,ოკუპაციის კვირეული” გაიმართა.
 
კვირეულის ფარგლებში სკოლებში თემაზე - „25 თებერვალი - საბჭოთა ოკუპაციის დღეა“ - მოეწყო კონკურსები და ლექცია/სემინარები, კონფერენციები და ლიტერატურული საღამოები, ვიქტორინები, ნახატებისა და პოსტერების გამოფენები და ესეების კონკურსები. ამავე თემისადმი მიძღვნილ პოეზიის საღამოებზე მოსწავლეებმა წაიკითხეს ქართველი პოეტების ლექსები ამ ტრაგიკულ დღეზე.
 
„ოკუპაციის კვირეულის“ მიზანია მოსწავლეებმა სრული იფორმაცია მიიღონ რუსულ აგრესიაზე და გაითავისონ ის ტკივილი, რასაც ოკუპაცია ჰქვია.
 
მოსწავლეებმა თავიანთი ინიციატივით წუთიერი დუმილით პატივი მიაგეს უკრაინაში რუსული ოკუპაციის შედეგად დაღუპული უკრაინელი ჯარისკაცების ხსოვნას.
 
 
აფხაზეთის ავტონომიური რესპუბლიკის განათლებისა და კულტურის სამინისტრომ 2022 წლის მეცნიერთა მხარდაჭერის პროგრამის განხორციელება დაიწყო
პროგრამის მიზანია აფხაზეთიდან დევნილი მეცნიერების მხარდაჭერა და მათი სამეცნიერო კვლევებში ჩართულობის ხელშეწყობა. პროგრამის ფარგლებში შესაძლებელია დაფინანსდეს:
 
ა) სამეცნიერო ლიტერატურის/კვლევის გამოცემა;
ბ) სამგზავრო ხარჯები მეცნიერებისთვის, ბაკალავრიატის, მაგისტრატურის, დოქტორანტურის სტუდენტებისთვის;
გ) ასევე შესაძლებელია დაფინანსდეს მეცნიერი, რომელიც არაა აფხაზეთიდან, მაგრამ მისი კვლევის თემა აქტუალურია და მნიშვნელოვანია კონკრეტული მეცნიერების დარგში;
 
დ) უპირატესობა მიენიჭება თანადაფინანსებით წარმოდგენილ და თემატურად აფხაზეთთან დაკავშირებულ პროექტებს;
ე) არ დაფინანსდება ერთი და იგივე ავტორის მიერ ზედიზედ 2 წლის განმავლობაში შემოტანილი პროექტი სამეცნიერო ნაშრომის ბეჭდვის თაობაზე.
 
ბეჭდვასთან დაკავშირებლი პროექტები 2022 წლის 10 ნოემბრამდე მიიღება, ხოლო სამგზავრო ხარჯები 2022 წლის 30 ნოემბრამდე დაფინანსდება.
 
დაწვრილებითი ინფორმაციისთვის იხ. http://abkhazia.gov.ge/banner/25
აფხაზეთის საჯარო სკოლები „საბუნებისმეტყველო მეცნიერებების სწავლების მხარდაჭერის“ ონლაინ ტრენინგში ჩაებნენ
აფხაზეთის ავტონომიური რესპუბლიკის განათლებისა და კულტურის სამინისტრომ, მასწავლებელთა პროფესიული განვითარების ეროვნული ცენტრის მხადაჭერით, ონლაინ ტრენინგის - „ციფრული ტექნოლოგიების და ელექტროინჟინერიის საფუძვლები STEM კლუბის ხელმძღვანელი მასწავლებლებისთვის“ - განხორციელება დაიწყო. ამ ეტაპისთვის აფხაზეთის №2 და №3 საჯარო სკოლების 22 მასწავლებელი გადამზადდება.
 
STEM მეცნიერების, ტექნოლოგიის, ინჟინერიისა და მათემატიკის აბრევიატურაა. STEM განათლება უზრუნველყოფს საბუნებისმეტყველო საგნების ერთიანად სწავლებას. ტრადიციულად ისინი ცალ-ცალკე ისწავლება და მოზარდები ვერ ხედავენ ამ საგნებს შორის მჭიდრო კავშირს.
 
ტრენინგ მოდულის მიზანია კლუბის ხელმძღვანელებმა შეძლონ STEM აქტივობების და პროექტების განხორციელება. აამაღლონ მოსწავლეთა ცნობიერება გლობალური გამოწვევების და საქართველოს მდგრადი განვითარების მიმართულებით. შეიძინონ ელექტრონულ კომპონენტებთან მუშაობის და პროგრამირების საბაზო უნარები.
შეხვედრები teams-ის პლატფორმის საშუალებით ჩატარდება.
აფხაზეთის ავტონომიური რესპუბლიკის განათლებისა და კულტურის სამინისტრო „წარმატებული ახალგაზრდების მხარდაჭერის პროგრამის“ 2022 წლის I ეტაპის განხორციელებას იწყებს

პროგრამის სამიზნე ჯგუფებს წარმოადგენენ აფხაზეთიდან იძულებით გადაადგილებული პირები, კერძოდ: ავტორიზებული პროფესიული საგანმანათლებლო დაწესებულებების პროფესიული სტუდენტები; ავტორიზებული უმაღლესი საგანმანათლებლო დაწესებულებების (ბაკალავრები, მაგისტრანტები) სტუდენტები; ავტორიზებული სამედიცინო/სტომატოლიგიური დაწესებულებების რეზიდენტები.

 

თანადაფინანსება განსაზღვრულია შემდეგნაირად:

 

  1. 500 ლარის ოდენობით - ავტორიზებული უმაღლესი საგანმანათლებლო დაწესებულების (ბაკალავრები, მაგისტრანტები) სტუდენტებისა და ავტორიზებული სამედიცინო/სტომატოლოგიური დაწესებულებების რეზიდენტების შემთხვევაში (აკადემიური მოსწრება სასწავლებელში ბოლო სემესტრში მიღებული ქულების საშუალო არითმეტიკულის გამოანგარიშებით 80-დან 90%-მდე );
  2. 700 ლარის ოდენობით - ავტორიზებული უმაღლესი საგანმანათლებლო დაწესებულების (ბაკალავრები, მაგისტრანტები) სტუდენტებისა და ავტორიზებული სამედიცინო/სტომატოლოგიური დაწესებულებების რეზიდენტების შემთხვევაში (აკადემიური მოსწრება სასწავლებელში ბოლო სემესტრში მიღებული ქულების საშუალო არითმეტიკულის გამოანგარიშებით 90% დან 98%).
  3. 1125 ლარის ოდენობით - ავტორიზებული უმაღლესი საგანმანათლებლო დაწესებულების (ბაკალავრები, მაგისტრანტები) სტუდენტებისა და ავტორიზებული სამედიცინო/სტომატოლოგიური დაწესებულებების რეზიდენტების შემთხვევაში (აკადემიური მოსწრება სასწავლებელში ბოლო სემესტრში მიღებული ქულების საშუალო არითმეტიკულის გამოანგარიშებით 99% და 100%).
  4. 300 ლარის ოდენობით - ავტორიზებული პროფესიული საგანმანათლებლო დაწესებულების პროფესიული სტუდენტების შემთხვევაში; სრული სასწავლო პერიოდის განმავლობაში (სწავლების ყველა საფეხურის გათვალისწინებით) პროგრამის ფარგლებში ერთი და იგივე პიროვნება ფინანსდება მხოლოდ 2-ჯერ (აღნიშნული მოთხოვნა არ ვრცელდება რეზიდენტურის სტუდენტებზე. რეზიდენტურაში სწავლება ფინანსდება მხოლოდ ერთხელ, მიუხედავად იმისა, რომ სტუდენტი პირველად სარგებლობს წარმოდგენილი პროგრამით). ასევე, ერთი და იგივე პიროვნება არ დაფინანსდება 2-ჯერ ერთი კალენდარული წლის განმავლობაში.

 

მოქალაქეთა განცხადებების მიღება გაგრძელდება 1 თებერვლიდან  28 თებერვლის ჩათვლით.

განცხადებები მიიღება ელექტრონულ მისამართზე - apkhazeti@mes.gov.ge და ასევე აფხაზეთის ავტონომიური რესპუბლიკის განათლებისა და კულტურის სამინისტროში, მისამართი: თბილისი, უზნაძის ქ. №68

შენიშვნა* დოკუმენტაციის ელექტრონულად გამოგზავნის შემთხვევაში, სტუდენტი ვალდებულია სასწავლო ბარათი მატერიალური სახით წარმოადგინოს სამინისტროში.

დამატებითი ინფორმაციისთვის დარეკეთ ნომრებზე: 598 17 41 78; 577 09 22 39

იხ. ვრცლად: http://abkhazia.gov.ge/banner/26

აფხაზეთის ა/რ განათლებისა და კულტურის სამინისტრომ 2021 წლის საგანმანათლებლო საქმიანობა შეაჯამა

აფხაზეთის ავტონომიური რესპუბლიკის განათლებისა და კულტურის სამინისტრომ 2021 წლის საგანმანათლებლო პროგრამებისა და პროექტების შემაჯამებელი საღამო გამართა. აფხაზეთის ავტონომიური რესპუბლიკის განათლებისა და კულტურის მინისტრმა ეკა ხოფერიამ მოწვეულ სტუმრებს დაწვრილებით უამბო თითოეულ მათგანზე. მან განსაკუთრებული აქცენტი გააკეთა „ონლაინ საკვირაო სკოლაზე“, რომელიც აფხაზეთის სკოლებში საქართველოში ამერიკის საელჩოს თანადაფინანსებითა და მასწავლებელთა პროფესიული განვითარების ეროვნული ცენტრის პედაგოგების მონაწილეობით განხორციელდა. ასევე ისაუბრა "ევროპულ სკოლასთან" თანამშრომლობის კარგ ტრადიციაზე.

აქვე აფხაზეთის ავტონომიური რესპუბლიკის განათლებისა და კულტურის სამინისტროსა და მასწავლებელთა პროფესიული განვითარების ეროვნულ ცენტრს შორის ურთიერთთანამშრომლობის მემორანდუმი გაფორმდა.

მემორანდუმს ხელი მოაწერეს აფხაზეთის ავტონომიური რესპუბლიკის განათლებისა და კულტურის მინისტრმა ეკა ხოფერიამ და მასწავლებელთა პროფესიული განვითარების ეროვნული ცენტრის დირექტორმა ბერიკა შუკაკიძემ.

მემორანდუმის მიზანია აქტიური თანამშრომლობა მასწავლებელთა პროფესიული განვითარების მიმართულებით, STEM (საბუნებისმეტყველო) საგნების სწავლების ხელშეწყობა, ასევე სასწავლო მასალების ორმხრივი გაცვლა, საერთო პროექტების ინიცირება და ა. შ.

რუსლან აბაშიძე და ეკა ხოფერია სოხუმის თეატრის საპრემიერო ჩვენებას დაესწრნენ

სოხუმის კ. გამსახურდიას სახელობის სოხუმის სახელმწიფო დრამატული თეატრის სცენაზე ჯონ ბოინტონ პრისტლის კლასიკად ქცეული დეტექტიური ნაწარმოების „ინსპექტორის ზარის“ მიხედვით დადგმული სპექტაკლის „სტუმრის“ მორიგი საპრემიერო ჩვენება გაიმართა.

სპექტაკლის საპრემიერო ჩვენებას აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე და აფხაზეთის ავტონომიური რესპუბლიკის განათლებისა და კულტურის მინისტრი ეკა ხოფერია დაესწრნენ.

პიესის გადმოქართულებული ვერსიის ავტორია ლაშა იმედაშვილი, ხოლო დამდგმელი რეჟისორი დავით საყვარელიძე. სპექტაკლში სოხუმის სახელმწიფო თეატრის დასთან ერთად მოწვეული მსახიობებიც მონაწილეობენ.

სპექტაკლში მოქმედება ვითარდება საქართველოს პირველი დემოკრატიული რესპუბლიკის პერიოდში მცხოვრები ერთ-ერთი მეწარმის ოჯახში, სადაც მოულოდნელი სტუმრის გამოჩენა დღის წესრიგს მთლიანად ცვლის.