აფხაზეთის ავტონომიური რესპუბლიკის კულტურისა და განათლების მინისტრი დავით მორგოშია, აფხაზეთის მთავრობის თავმჯდომარე ლევან მგალობლიშვილთან და მთავრობის სხვა წევრებთან ერთად სოხუმის სახელმწიფო უნივერსიტეტს ეწვია.

შეხვედრას სოხუმის სახელმწიფო უნივერსიტეტის რექტორმა ზურაბ ხონელიძემ უმასპინძლა, სადაც აფხაზეთის მთავრობის თავმჯდომარემ და კულტურისა და განათლების მინისტრმა შეკრებილ პროფესორ-მასწავლებლებს  სიტყვით მიმართეს.

ლევან მგალობლიშვილმა სამშვიდობო პოლიტიკის განხორციელებაში განათლების როლზე და პროცესში ახალგაზრდების აქტიური ჩართულობის ხელშეწყობაზე ისაუბრა.

ყურადღება გამახვილდა ქართულ-აფხაზური ურთიერთობების გაღრმავებისა და განვითარების საკითხში სოხუმის სახელმწიფო უნივერსიტეტის მრავალწლიან და ნაყოფიერ საქმიანობაზე.

აფხაზეთის ავტონომიური რესპუბლიკის მთავრობის თავმჯდომარემ აკადემიური წრის წარმომადგენლებს მრავალწლიანი და ნაყოფიერი საქმიანობისთვის მადლობა გადაუხადა.

მხარეებმა თანამშრომლობის სამომავლო გეგმებზეც იმსჯელეს.

აფხაზეთის ავტონომიური რესპუბლიკის განათლებისა და კულტურის მინისტრი დავით მორგოშია, მინისტრის მოადგილე ნინო ლობჟანიძესთან ერთად, მასწავლებელთა პროფესიული განვითარების ეროვნულ ცენტრში იმყოფებოდა, სადაც ცენტრის დირექტორ ბერიკა შუკაკიძეს შეხვდა.

შეხვედრაზე აფხაზეთის განათლებისა და კულტურის სამინისტროსა და მასწავლებელთა პროფესიული განვითარების ეროვნულ ცენტრს შორის თანამშრომლობის გაღრმავებისა და ცენტრის სასწავლო პროექტებში აფხაზეთის საჯარო სკოლების პედაგოგებისა და მოსწავლეების ჩართულობის  საკითხი განიხილეს.

ყურადღება გამახვილდა აფხაზეთის  სკოლებში STEM განათლების - მათემატიკის, ინფორმატიკისა და საბუნებისმეტყველო საგნების ინტეგრირებულ სწავლებასთან დაკავშირებით თანამშრომლობაზე.

ბერიკა შუკაკიძემ სტუმრებს საბუნებისმეტყველო კლუბ "ჩხირკედელას“ ბაზაზე არსებული ლაბორატორია დაათვალიერებინა და კლუბის მუშაობის პრინციპები და STEM პროექტები გააცნო.

შეხვედრაზე ცენტრისა და სამინისტროს თანამშრომლობის ფარგლებში, აფხაზეთის სკოლებში მოქმედი დისტანციური სწავლების გაძლიერების საკითხზეც იმსჯელეს

აფხაზეთის ავტონომიური რესპუბლიკის განათლებისა და კულტურის სამინისტროში აფხაზეთის წარმატებული სპორტსმენებისა და სპორტის სხვადასხვა სახეობაში 2024 წლის ევროპის და მსოფლიოს ჩემპიონების დაჯილდოება გაიმართა.

სამინისტროს საპატიო სიგელები და სიმბოლური საჩუქრები აფხაზეთის განათლებისა და კულტურის მინისტრმა დავით მორგოშიამ და მინისტრის პირველმა მოადგილემ გიორგი ჯინჭარაძემ გადასცეს.

მინისტრმა სპორტსმენებს საერთაშორისო ტურნირებზე მიღწეული წარმატებებისთვის მადლობა გადაუხადა და მორიგი გამარჯვებები უსურვა.

"სპორტი ჩვენი სამინისტროს ერთ-ერთი პრიორიტეტული მიმართულებაა. ამჟამად სპორტის განვითარების მიზნით არაერთ ახალ ინიციატივას განვიხილავთ. ამასთანავე, შევეცდებით, თითოეულ თქვენგანს კიდევ უფრო უკეთესი შედეგების მიღწევაში შეგიწყოთ ხელი“, - აღნიშნა დავით მორგოშიამ.

ღონისძიებას აფხაზეთის განათლებისა და კულტურის სამინისტროს თანამშრომლები და აფხაზეთის სპორტული საზოგადოების წარმომადგენლები ესწრებოდნენ.

აფხაზეთის ავტონომიური რესპუბლიკის განათლებისა და კულტურის მინისტრი დავით მორგოშია, მინისტრის პირველ მოადგილე გიორგი ჯინჭარაძესთან ერთად, საპროდიუსერო კომპანია „20 Steps“-ს ეწვია და კინოპროდიუსერ ვლადიმერ კაჭარავას და რეჟისორ მამუკა ტყეშელაშვილს შეხვდა.

შეხვედრის ფარგლებში დავით მორგოშიამ და ვლადიმერ კაჭარავამ მოკლემეტრაჟიანი ანიმაციური ფილმის „სოხუმის“ შექმნასთან დაკავშირებით თანამშრომლობის საკითხი განიხილეს.

ანიმაციაში ასახული იქნება სოხუმში ომამდე და ომის შემდგომ განვითარებული ამბები.

ანიმაციას 2025 წლის 26 მაისს თბილისის დახურული ჩვენების შემდეგ, ანესის (Annecy) ანიმაციური ფილმების საერთაშორისო ფესტივალზე წარადგენენ.

აფხაზეთის ძიუდოს აკადემიის ორგანიზებით, ტრადიციული ტურნირი - აფხაზეთის ღია პირველობა ძიუდოში გაიმართა. ტურნირში 2010-2015 წლებში დაბადებული ძიუდოისტები მონაწილეობდნენ.

ღონისძიების ფარგლებში, აფხაზეთის ავტონომიური რესპუბლიკის განათლებისა და კულტურის მინისტრმა დავით მორგოშიამ, აფხაზეთის ფინანსთა და ეკონომიკის მინისტრ ლევან თევზაიასთან, ვეტერანების საქმეთა სახელმწიფო სამსახურის თავმჯდომარე კობა კობალაძეს და ამავე სამსახურის თავმჯდომარის მოადგილე ჯანდრი უბირიასთან ერთად, აფხაზეთის წარმატებული ძიუდოისტები და ძიუდოს აკადემიის ხელმძღვანელები სამინისტროს საპატიო სიგელებით დააჯილდოვა.

შესაბამისი მედლებით, დიპლომებით და თასებით დაჯილდოვდნენ ტურნირის პრიზიორი სპორტსმენები.

დაჯილდოების ცერემონიას აფხაზეთის განათლებისა და კულტურის მინისტრის პირველი მოადგილე გიორგი ჯინჭარაძე, მინისტრის მრჩეველი ანი კიტია, სამინისტროს თანამშრომლები და ძიუდოს გულშემატკივრები ესწრებოდნენ.

წყნეთში აფხაზეთის ომში გმირულად დაღუპული ნოდარ მათიაშვილის სახელობის სკვერი გაიხსნა.

ღონისძიებას თბილისის საკრებულოს თავმჯდომარე, ვაკის მაჟორიტარი დეპუტატი გიორგი ტყემალაძე, სახელდებისა და სიმბოლიკის კომისიის თავმჯდომარე ლევან აბაშიძე, თავდაცვის მინისტრის მოადგილე პაატა პატიაშვილი, ვეტერანების საქმეთა სახელმწიფო სამსახურის თავმჯდომარე კობა კობალაძე, აფხაზეთის ავტონომიური რესპუბლიკის განათლებისა და კულტურის მინისტრი დავით მორგოშია, აფხაზეთის იძულებით გადაადგილებულ პირთა მინისტრი დავით ფაცაცია, ვაკის რაიონის გამგებელი დავით კვინიკაძე, საკრებულოს წევრები, ნოდარ მათიაშვილის ოჯახის წევრები, მეგობრები და ადგილობრივი მოსახლეობა დაესწრნენ.

სიტყვით გამომსვლელებმა ქვეყნის თავისუფლებისა და დამოუკიდებლობის დაცვის საქმეში ნოდარ მათიაშვილის დამსახურებაზე ისაუბრეს.

ნოდარ მათიაშვილი 1959 წელს წყნეთის იმ უბანში დაიბადა, სადაც საკრებულომ მისი სახელობის სკვერი გახსნა.

1993 წელს, საომარი მოქმედებების დროს, თანამებრძოლის დახმარების დროს, ნოდარ მათიაშვილი სეპარატისტებმა ტყვედ აიყვანეს და წამებით მოკლეს.

სიკვდილის შემდეგ იგი დაჯილდოებულია ვახტანგ გორგასლის I ხარისხის ორდენით.

აფხაზეთის ავტონომიური რესპუბლიკის განათლებისა და კულტურის მინისტრი დავით მორგოშია, მინისტრის მოადგილე ნინო ლობჟანიძესთან ერთად, საქართველოს ტექნიკური უნივერსიტეტის ვირტუალური მოდელირების ცენტრს ეწვია და მის ხელმძღვანელს, ფიზიკის დეპარტამენტის პროფესორს დავით სონღულაშვილს შეხვდა.

შეხვედრის ფარგლებში დავით მორგოშიამ და დავით სონღულაშვილმა თანამშრომლობის ამ ეტაპისთვის აფხაზეთის ერთ-ერთ საჯარო სკოლაში სწავლების ელექტრონული მეთოდების, ანუ თანამედროვე ტექნოლოგიების გამოყენებით სწავლების საპილოტე პროგრამის შემოღების საკითხი განიხილეს.

დავით სონღულაშვილმა სტუმრებს ასევე, სწავლების ელექტრონული მეთოდები და ინოვაციური პროექტები გააცნო და რეალურ-ვირტუალური ლაბორატორია დაათვალიერებინა.

ტექნიკური უნივერსიტეტის ვირტუალური მოდელირებისა და კონსტრუირების ცენტრი, დავით სონღულაშვილის ხელმძღვანელობით, აქტიურად თანამშრომლობს საქართველოს ათეულობით სკოლასთან და მეთოდურად დიდ დახმარებას უწევს მოსწავლეებს ინოვაციური იდეების რეალიზებაში.

აფხაზეთის ავტონომიური რესპუბლიკის განათლებისა და კულტურის მინისტრმა დავით მორგოშიამ საქართველოს პარამკლავჭიდის ეროვნული ნაკრების წევრს, მსოფლიოს ორგზის ჩემპიონს ლაშა მიქავას სამინისტროს საპატიო სიგელი და სიმბოლური საჩუქრები გადასცა.

ლაშა მიქავამ ახლახან მოლდოვაში გამართულ პარამკლავჭიდის მსოფლიო ჩემპიონატზე 2 ოქროს მედალი და შესაბამისად, პარამკლავჭიდში მსოფლიოს ორგზის ჩემპიონის ტიტული მოიპოვა.

მინისტრმა ლაშა მიქავას გამარჯვება მიულოცა და მორიგი წარმატებები უსურვა.

აფხაზეთის განათლებისა და კულტურის სამინისტრო, სპორტის განვითარებისა და სპორტსმენების ხელშეწყობის მიზნით, კვლავაც არაერთ მსგავს აქტივობას გეგმავს.

აფხაზეთის ავტონომიური რესპუბლიკის განათლებისა და კულტურის მინისტრი დავით მორგოშია ქუთაისში, აფხაზეთის № 5, №6 და ფოთში, აფხაზეთის №21 საჯარო სკოლებში იმყოფებოდა და სკოლების საჭიროებებს გაეცნო.

დაიგეგმა სამომავლოდ განსახორციელებელი სამუშაოები, რომლებიც საგანმანათლებლო დაწესებულებებში ლაბორატორიების განვითარების, სპორტული ინფრასტრუქტურის გაუმჯობესების და ეზოების კეთილმოწყობის სამუშაოებს ითვალისწინებს.

დავით მორგოშიამ პედაგოგებს არსებული მიღწევებისთვის მადლობა გადაუხადა და აქტიური თანამშრომლობის იმედი გამოთქვა.

აფხაზეთის ავტონომიური რესპუბლიკის განათლებისა და კულტურის მინისტრი დავით მორგოშია, მინისტრის მოადგილე ნინო ლობჟანიძესთან ერთად, სენაკისა და ზუგდიდის მუნიციპალიტეტებში განთავსებულ აფხაზეთის საჯარო სკოლებს ეწვია და პედაგოგებსა და მოსწავლეებს შეხვდა.

მინისტრმა უშუალოდ პედაგოგებისგან მოისმინა სკოლების მიღწევებსა და წარმატებებთან დაკავშირებული ინფორმაცია. ხარისხიანი განათლების მისაღებად აუცილებელ საჭიროებებს, ინფრასტრუქტურულ და საგანმანათლებლო გამოწვევებს გაეცნო და მათი მოგვარების გეგმებზე ისაუბრა.

დავით მორგოშიამ ვიზიტის ფარგლებში, ასევე ქ. ზუგდიდში მდებარე აფხაზეთის მე-11 საჯარო სკოლის მშენებლობა დაათვალიერა და მის მიმდინარეობას გაეცნო.

აფხაზეთის განათლებისა და კულტურის სამინისტროს ძალისხმევითა და დონორების დაფინანსებით, ზუგდიდისა და ჩხოროწყუს მუნიციპალიტეტებში განთავსებულ აფხაზეთის №10 და №11 საჯარო სკოლებს თანამედროვე სტანდარტების შესაბამისი ახალი შენობები ექნებათ.

აფხაზეთის ავტონომიური რესპუბლიკის განათლებისა და კულტურის მინისტრი დავით მორგოშია აფხაზეთის საჯარო სკოლების დირექტორებს და პედაგოგებს შეხვდა.

შეხვედრაზე დირექტორებმა სკოლების მიღწევებზე და მოსწავლეებისა და კურსდამთავრებულების წარმატებებზე ისაუბრეს. ყურადღება გამახვილდა ხარისხიანი განათლების მისაღებად აუცილებელ საჭიროებებზე, ინფრასტრუქტურულ, საგანმანათლებლო და სწავლა-სწავლების პროცესში არსებულ გამოწვევებზე.

შეხვედრაზე აღინიშნა, რომ აფხაზეთის განათლებისა და კულტურის სამინისტროს ძალისხმევითა და დონორების დაფინანსებით, ზუგდიდისა და ჩხოროწყუს მუნიციპალიტეტებში განთავსებულ აფხაზეთის №10 და №11 საჯარო სკოლებს თანამედროვე სტანდარტების შესაბამისი ახალი შენობები ექნებათ.

"აფხაზეთის საჯარო სკოლების პედაგოგებს განსაკუთრებული და მნიშვნელოვანი წვლილი შეგაქვთ მომავალი თაობების სწავლების, აღზრდისა და განვითარების საკითხებში. ჩვენი მიზანია, მაქსიმალურად გავაუმჯობესოთ და ხელი შევუწყოთ ამ პროცესს. აფხაზეთის მთავრობის უმთავრეს პრიორიტეტს სკოლების ინფრასტრუქტურული განვითარება წარმოადგენს და ამ მიმართულებით უკვე დაგეგმილია რამდენიმე მნიშვნელოვანი პროექტის განხორციელებაც. წლების განმავლობაში ამ პროცესში საერთაშორისო ორგანიზაციები და დონორები იყვნენ ჩართულნი, სწორედ, ამიტომ, მინდა ვისარგებლო შემთხვევით და მადლობა გადავუხადო მათ გაწეული საქმიანობისთვის", - განაცხადა დავით მორგოშიამ.

შეხვედრას სამინისტროს თანამშრომლები და თბილისსა და საქართველოს სხვა რეგიონებში განთავსებული 13-ვე საჯარო სკოლის დირექტორები და პედაგოგები ესწრებოდნენ.

აფხაზეთის ავტონომიური რესპუბლიკის განათლებისა და კულტურის მინისტრმა დავით მორგოშიამ ვ. არქანიას არტგალერეაში მორიგი გაცნობითი ხასიათის შეხვედრა აფხაზეთის შემოქმედებით კოლექტივებთან გამართა.

შეხვედრაზე კულტურის სფეროს წარმომადგენლებმა საკუთარ შემოქმედებით საქმიანობასა და სამომავლო გეგმებზე ისაუბრეს. ყურადღება გაამახვილეს აფხაზეთის კულტურის განვითარებისთვის აუცილებელ საჭიროებებზე, ახალი პროექტების დაფინანსებაზე, ახალგაზრდების ხელშეწყობის აუცილებლობაზე და სხვა პრიორიტეტულ საკითხებზე.

"აფხაზეთის მთავრობის სამოქმედო გეგმა ეყრდნობა სამშვიდობო პოლიტიკას, სახალხო დიპლომატიას, რომლის განუყოფელი ნაწილიცაა კულტურა - ლიტერატურა და ხელოვნება. ამ თვალსაზრისით კულტურის ენას, კულტურათა დიალოგს მნიშვნელოვანი სიტყვა ეკუთვნის. დღევანდელი შეხვედრის შემდეგ, იმედი მრჩება, რომ ჩვენ ნაყოფიერად ვითანამშრომლებთ და ამ სფეროში არსებულ ხარვეზებს ერთობლივად აღმოვფხვრით“, - განაცხადა დავით მორგოშიამ.

შეხვედრას აფხაზეთის თეატრების, ანსამბლების და კაპელას ხელმძღვანელები, ასევე მწერლები, მხატვრები, მუსიკოსები, მსახიობები, სამინისტროს თანამშრომლები და კულტურის სფეროს წარმომადგენლები ესწრებოდნენ.

აფხაზეთის ავტონომიური რესპუბლიკის განათლებისა და კულტურის მინისტრმა დავით მორგოშიამ ვ. არქანიას არტგალერეაში აფხაზეთის სპორტული ფედერაციებისა და კლუბების, აფხაზეთის კულტურის, სპორტის და ახალგაზრდულ საქმეთა სააგენტოს ხელმძღვანელებთან, აფხაზეთის დამსახურებულ სპორტსმენებთან და მწვრთნელებთან გაცნობითი ხასიათის შეხვედრა გამართა.

შეხვედრაზე ფედერაციების და კლუბების წარმომადგენლებმა საკუთარ საქმიანობასა და სპორტულ მიღწევებზე ისაუბრეს. ყურადღება გაამახვილეს სპორტული ინფრასტრუქტურის გაუმჯობესებაზე, შესაბამისი ინვენტარის საჭიროებაზე და საერთაშორისო ასპარეზობებში მონაწილეობისთვის დაფინანსების მოპოვებაზე.

„ეს იყო ინფორმაციული ხასიათის, ძალიან სასარგებლო შეხვედრა, რომელიც მომავალში ინდივიდუალურად გაგრძელდება. ჩვენ ერთად შევეცდებით, გამოვნახოთ გზები და შესაძლებლობები, სპორტის შემდგომი განვითარებისთვის, იმისთვის თუ როგორ დავეხმაროთ აფხაზეთის სპორტსმენებს კიდევ უკეთესი შედეგების მიღწევაში“, - განაცხადა დავით მორგოშიამ.

შეხვედრას სამინისტროს თანამშრომლები და აფხაზეთის სპორტული საზოგადოების წარმომადგენლები ესწრებოდნენ.

„თბილისობის“ დღესასწაულის ფარგლებში,  ეთნოგრაფიულ მუზეუმში, აფხაზეთის ავტონომიური რესპუბლიკის მთავრობისა და აფხაზეთის განათლებისა და კულტურის სამინისტროს ორგანიზებით, „აფხაზური ეზო“ მოეწყო.

ღონისძიებას აფხაზეთის ავტონომიური რესპუბლიკის მთავრობის თავმჯდომარე ლევან მგალობლიშვილი, საქართველოს პარლამენტის თავმჯდომარის პირველი მოადგილე, ტერიტორიული მთლიანობის აღდგენისა და დეოკუპაციის საკითხებთან დაკავშირებული დროებითი კომისიის თავმჯდომარე გიორგი ვოლსკი, აფხაზეთის მთავრობის წევრები, უმაღლესი საბჭოს დეპუტატები და დიპლომატიური კორპუსის წარმომადგენლები ესწრებოდნენ.

საზოგადოებას მისასალმებელი სიტყვით აფხაზეთის ავტონომიური რესპუბლიკის განათლებისა და კულტურის მინისტრმა დავით მორგოშიამ მიმართა. მან სტუმრებს მადლობა გადაუხადა მობრძანებისთვის და ღონისძიების მნიშვნელობაზე ისაუბრა.

„აფხაზურ ეზოში“ წარმოდგენილი იყო აფხაზეთიდან დევნილი მეწარმეების პროდუქცია, ეთნოგრაფიული დეკორისა და ხელნაკეთი ნივთების გამოფენა, ღვინისა და ტრადიციული კერძების დეგუსტაცია და სოხუმურად ქვიშაზე მომზადებული ყავა.

ასევე მოეწყო ტრადიციული სამოსის, აფხაზეთის თემატიკის ფოტოების და ბეჭდური გამოცემების გამოფენა, კალიგრაფიის მასტერკლასი.

ბოლოს სტუმრების წინაშე აფხაზეთის სიმღერისა და ცეკვის სახელმწიფო აკადემიური ანსამბლი „აფხაზეთი“, მასთან არსებული ბავშვთა ანსამბლი „ოტობაია“ და გოგონათა ფოლკლორული ანსამბლი „გუმბათი“ აფხაზური და ქართული სიმღერებითა და ცეკვებით წარდგნენ.